Chapter 1618

ပတ်ပတ်ချာလည်နေသည့် ဖုန်မှုန့်မြူမှုန်များသည် မှတ်ဉာဏ်များ တပြုံတမ စီးဝင်သွားသည်နှင့် မြင့်တက်ပျံသန်းသွားကြပြီး တွင်းနက်ကြီးက ၎င်းတို့အားလုံးကို ဝါးမျိူပစ်လိုက်သည်။

အကြွင်းမဲ့၏ ဝိဉာဉ်အသိသည် ရှီယန်၏ တွင်းနက်ကြီးထဲသို့ ရောက်ရှိသွားပြီး သူ့အား ဖရိုဖရဲဖြစ်နေပြီး ပြင်းထန်သော မှတ်ဉာဏ်များ နှင့် တွေးခေါ်ခံစားချက်များ ရရှိသွားစေခဲ့သည်။ ၎င်းတို့သည် မရေမတွက်နိုင်အောင် များပြားသော သက်ရှိများး၏ အတွေ့အကြုံများ ၊ ဝိဉာဉ်အသစ်တစ်ခု ဖန်တီးရန်အတွက် အခြေခံအုတ်မြစ်ပစ္စည်းများ ဖြစ်ကြသည်။

အကြွင်းမဲ့၏ ဝိဉာဉ်အသိသည် ရှီယန်၏ ဝိဉာဉ်ယဇ်ပလ္လင်ထဲ၌ တွင်းနက်ကြီး၏ သန့်စင်ပြုပြင်ခံနေရသည်။ သူ့ဝိဉာဉ်ကန်က ဝိဉာဉ်စွမ်းအားအမျှင်တစ်ခုကို ထုတ်လွှတ်ပြီး အကြွင်းမဲ့၏ စွမ်းအားနှင့် ပေါင်းစည်းနေသည်။ ၎င်းတို့သည် ထူးခြား၍ ကမောက်ကမဖြစ်နေသော်လည်း ဖြူစင်သည့် စွမ်းအားတစ်ခုကို အတူတကွ ဖန်တီးကြပြီး သူ၏ ကြီးမားကျယ်ပြန့်သော ပိုင်နက်ထဲသို့ ပျံသန်းသွားကြသည်။

လင်းဖြာတောက်ပသည့် ရှီယန်၏ပိုင်နက်ထဲ၌ ဖရိုဖရဲဖြစ်နေသည့် လေထုကြီးသည် ဝေးလံချောင်ကျသော သက်ရှိကြယ်များပေါ် ဆင်းကျသွားပြီး ပင်လယ်ထဲသို့ နစ်ဝင်သွားသည်။ ၎င်းတို့သည် မျိုးနွယ်စုအသစ်များအဖြစ်သို့ တိုးတက်ကြီးထွားမယ့် ဘဝမျိုးစေ့များ ၊ မျိုးနွယ်စုအသစ်များ၏ ဘိုးဘေးဖြစ်မယ့်သူများပင်တည်း။

ရှီယန်က အကြွင်းမဲ့၏ အသိပင်လယ်ကို စုစည်းပြီး စွမ်းအားများကို ပိုမိုသန့်စင်သော ဝိဉာဉ်စွမ်းအားများအဖြစ်သို့ သန့်စင်စစ်ထုတ်၍ သူ့ဝိဉာဉ်ကန်ထဲသို့ သွန်းထည့်နေစဉ်တွင် သူ့ပိုင်နက်ထဲရှိ ကြယ်ပင်လယ်သည် သက်ရှိများ ၊ မျိုးနွယ်စုအသစ်များကို ပိုမိုများပြားစွာ မွေးထုတ်ပေးနေသည်။ ၎င်းတို့သည် အချောင်ကျဆုံးနေရာများထိ ပြန့်ကျဲသွားကြသည်။ ကျက်တီးကုန်းမြေအချို့သည် ရိုးရှင်းသော အသိဉာဏ်ပေါ်ပေါက်လာရန် ဝိဉာဉ်ဗဟိုချက်ကိုပင် ရရှိသွားကြသည်။

သူသည် အကြွင်းမဲ့၏ ဝိဉာဉ်အသိဖြင့် ထူးကဲခြားနားသော သက်ရှိများ ၊ မျိုးနွယ်စုများပါဝင်သော သူ့ကိုယ်ပိုင်စကြာဝဠာကို ဖန်တီးနေခြင်းဖြစ်သည်။

ထိုစဉ် နတ္ထိသည် စိတ်ရှုပ်တွေဝေနေဆဲဖြစ်သည်။ သူသည် ကောင်းကင်ပေါ် ရပ်တန့်နေရင်း သူ့စိတ်ထဲ၌ လွန်ဆွဲနေဆဲဖြစ်သည်။

တဖြည်းဖြည်းနှင့် အသိပင်လယ်ရှိ အကြွင်းမဲ့၏ ဝိဉာဉ်အသိမျှင်များသည် အပြည့်အဝ ဝါးမျိူခံလိုက်ရသည်။ မကြာသေးခင်ကမှ နိုးထလာသည့် အကြွင်းမဲ့၏ အသိဉာဏ်အမျှင်သည် ဖရိုဖရဲဖြစ်လာပြီး တကမ္ဘာလုံးကို လွှမ်းမိုးထားသည့် စွမ်းအားသည်  ကိစ္စရပ်များအားလုံးကို နောက်ထပ်မထိန်းချုပ်နိုင်တော့ချေ။

ဘုန်း…

ရုတ်တရက် ရှီယန်၏ ဦးခေါင်းကို ပစ်မှတ်ထားချိန်ရွယ်ထားသည့် စိတ်ပိုင်းဆိုင်ရာတိုက်ခိုက်မှုသည် အကြွင်းမဲ့မူလ၏ ကျန်ရှိနေသေးသော ဝိဉာဉ်အသိအားလုံးနှင့် ရောစပ်သွားပြီး နတ္ထိ၏ ဦးခေါင်းထဲသို့ ကြမ်းကြမ်းတမ်းတမ်း ပစ်ဝင်၍ သူ့ဝိဉာဉ်ယဇ်ပလ္လင်ထဲသို့ ဧရာမစကြာဝဠာလက်နက်တစ်ခုသဖွယ် တိုးဝင်သွားသည်။

နတ္ထိ၏ စိတ်သည် ဇဝေဇဝါ ဖြစ်နေစဉ် တိုက်ခိုက်ခံလိုက်ရသဖြင့် သူ့ကို ချက်ချင်းစိုးရိမ်ကြောက်လန့်သွားစေသည်။

ဝှစ်…ဝှစ်…ဝှစ်

စွမ်းအင်အသိအလွှာ၏ လေဟာပြင်ထဲ၌ မီးလျှံလုံး သို့မဟုတ် လေဆင်နှာမောင်း ၊ မှောင်မည်းနေသည့် မိုးကြိုးမုန်တိုင်း သို့မဟုတ် စိမ်းလန်စိုပြည်သော တောနက်တစ်ခုပမာ ရှိကြသည့် များပြားလွန်းလှသော စွမ်းအင်အသိဇစ်မြစ်များသည် ရုတ်တရက် ထိုးကျလာကြပြီး နတ္ထိ၏ ဝိဉာဉ်ယဇ်ပလ္လင် နှင့် အသိပင်လယ်သို့ ဝင်ရောက်သွားကြသည်။

ယင်းစွမ်းအင်အသိဇစ်မြစ်များတွင် မတူညီကွဲပြားသော စွမ်းရည်များ ရှိကြသည်။ ၎င်းတို့သည် သဘာဝစွမ်းအင်အသိများ၏ နိယာမများဖြစ်ကြသောကြောင့်ဖြစ်သည်။ ၎င်းတို့သည် ငြိမ်ဝပ်နေခဲ့ကြသည့် အဓိကအရာများဖြစ်ကြပြီး စုပ်ယူမခံကြရသေးပါ။ အခုချိန်၌ ၎င်းတို့သည် ကြယ်ကြွေများသဖွယ် တရစပ် ထိုးကျလာကြပြီး နတ္ထိ၏ စွမ်းအင်အသိအလွှာသို့ ဝင်သွားကြသည်။

စွမ်းအင်အသိအားလုံး၏ အဓိကသော့ချက်များသည် နတ္ထိထံသို့ ရောက်လာကြပြီး သူ့ကို အခြားစွမ်းအင်အသိအများအပြားအား နားလည်သိရှိသွားစေသည်။ ၎င်းက သူ၏ ထူးကဲကောင်းမွန်သော ကျင့်ကြံခြင်းအဆင့်ကို နောက်ထပ်တစ်ကြိမ် မြင့်တက်သွားစေသည်။

စွမ်းအင်အသိဇစ်မြစ်များနှင့် အတူ ဝင်လာသည့် အရာသည် အကြွင်းမဲ့၏ ဝိဉာဉ်ကန်မှ သန့်စင်သော ဝိဉာဉ်စွမ်းအားဖြစ်သည်။ ၎င်းဝိဉာဉ်စွမ်းအားသည် အခိုးအငွေ့အဖြစ်သို့ ပြောင်းလဲသွားပြီး နတ္ထိ၏ ဦးခေါင်း နှင့် ဝိဉာဉ်ကန်ထဲသို့ ဝင်သွားကြသည်။

ဝိဉာဉ်ဆွဲဖြဲခံရသည့် မချိမဆံ့သော ဝေဒနာက နတ္ထိ၏ ဦးနှောက်ကို လွှမ်းမိုးသွားပြီး သူ့ကို စူးရှကျယ်လောင်စွာ ငိုကြွေးမြည်တမ်းသွားစေသည်။ သူ့အသံက ယင်းနေရာတစ်ခုလုံးကို တုန်ခါသွားစေခဲ့၏။

နတ္ထိသည် သူ့ကံကြမ္မာကို မြင်ခဲ့ပြီးသားဖြစ်သဖြင့် မည်သည့်အရာပဲ ရွေးချယ်နေပါစေ လမ်းဆုံးသို့ ရောက်နေပြီဖြစ်ကြောင်း သူ သိလိုက်သည်။ ထို့ကြောင့် သူသည် စိုးရိမ်တုန်လှုပ်ပြီး ဝမ်းနည်းနောင်တရဖို့သာ တတ်နိုင်တော့သည်။

အကယ်၍ သူ ရှီယန်ကို သတ်နိုင်ရင်တောင် နောက်ဆုံး၌ အကြွင်းမဲ့ကို သူ နှိုးမိသွားပြီး သူ့ကိုယ်သူ ဆုံးရှုံးသွားမှာဖြစ်ကြောင်း သူ သိသည်။ ထို့ကြောင့် သူသည် အလွန်တွေဝေနေခဲ့ပြီး သူ့ဝိဉာဉ်ကို အကာအကွယ်ကင်းမဲ့စွာ နေစေခဲ့မိသည်။ ထို့ကြောင့်သာ အကြွင်းမဲ့က အခွင့်အခါရှာတွေ့ပြီး သူ့ကို တိုက်ခိုက်လိုက်ခြင်းဖြစ်သည်။

နတ္ထိ၏ ကြီးမားကျယ်ပြန့်သော အသိပင်လယ်၌ သန့်စင်သော ဝိဉာဉ်စွမ်းအားဖြင့် ဖန်တီးထားသည့် ခပ်ရေးရေးအရိပ်တစ်ခုသည် ဝိဉာဉ်ကန်ပေါ်၌ ဖြည်းဖြည်းချင်း ထွက်ပေါ်လာခဲ့သည်။

၎င်းမထင်မရှားအရိပ်သည် အရပ်ရှည်သည်။ ငရဲမှ ရောက်လာခါစသဖွယ် သူ့တွင် ခံ့ညားထည်ဝါပြီး လွှမ်းမိုးခြယ်လှယ်နိုင်သော အော်ရာရှိနေ၏။ သူ ပေါ်ထွက်လာသည်နှင့် နတ္ထိ၏ ဝိဉာဉ်ကန်ထဲ၌ အော်ဟစ်ကြွေးကြော်ရင်း အမြင့်သို့ ပျံတက်လိုက်သည်။

နတ္ထိ၏ နဂါးခန္ဓာကိုယ်သည် ဆိုးဆိုးရွားရွား တွန့်လိမ်နေပြီး မချိဆံ့သော ဝေဒနာဖြင့် အော်ဟစ်ညဉ်းတွားနေသည်။ ထိုအဖြစ်သည် တကယ်ကို ကြောက်ရွံ့ဖွယ်ကောင်းလှသည်။ သူသည် အပြည့်အဝသေဆုံးမှုကို ရင်ဆိုင်နေရသည့်ပမာပင်။

နတ္ထိကြယ်ပိုင်နက် ၊ နတ္ထိ၏ အုတ်မြစ်ဖြစ်သော နေရာ၌ ထူးဆန်းသော သွေးရောင်အလင်းရောင်ခြည်များ ပစ်ထွက်လာကြသည်။ ယင်းသွေးရောင်အလင်းတန်းများသည် နတ္ထိ၏ အသိပင်လယ်သို့ ဝင်သွားကြပြီး မထင်မရှားသော ထိုအရိပ်ဆီသို့ စုစည်းသွားကြသည်။

ထိုသို့ဖြင့် အရိပ်သည် ပိုမိုကြည်လင်လာခဲ့သည်။

ထိုသူသည် ကြံ့ခိုင်သန်မာသည့် မိစ္ဆာခန္ဓာကိုယ်နှင့် အထက်စီးဆန်သည့် ယောကျာ်းတစ်ယောက်ဖြစ်သည်။ သို့သော် သူ့ပုံစံသည် နီရဲရဲဆံပင်အရှည်ကြီးနှင့်  ရဲရဲတောက်နီစွေးသော သွေးဆာနေသည့် မျက်လုံးတစ်စုံတို့ဖြင့် အလွန်ထူးဆန်းနေသည်။ ထို့နောက်၌ နတ္ထိ၏ ဝိဉာဉ်ကန်ပေါ် ရပ်တန့်ရင်း ပြုံးလိုက်သည်။

“ဪ ဒီလိုကိုး”

“သွေးသောက်သခင်”

ထိုယောကျာ်းကို တွေ့သည့်အခါ နတ္ထိသည် သွေးပျက်သွားပြီး ကြောက်လန့်တကြားဖြင့် အော်လိုက်သည်။

ထို့နောက် ချက်ချင်းပင် နတ္ထိသည် တစ်ခုခုကို နားလည်သွားပြီး အသံကျယ်ကျယ်ဖြင့် ပြောလိုက်သည်။ “ဝါးမျိုသူရဲ့ စွမ်းအင်အသိအားလုံးကို မင်း အနိုင်ယူပြီးသူ့ကို ငြိမ်ဝပ်သွားအောင်ထိ ပြင်းပြင်းထန်ထန် ရိုက်နှက်နိုင်ခဲ့တာ မအံ့သြတော့ပါဘူး။ ငါ့ပိုင်နက်အတွင်းမှာတောင် မင်းက ကြယ်တာရာဘိုးေးအဆင့်ကို ရောက်နိုင်ခဲ့တာ အံ့သြစရာမရှိတော့ပါဘူး။ မင်း ငါ့ကိုတောင် သတ်လုနီးပါးဖြစ်သွားခဲ့တယ်။ မင်းက သူ ဖြစ်နေခဲ့တာကိုး။ မင်းက သူ ခဏတဖြုတ် သတိဝင်လာတဲ့အချိန် ဖန်တီးလိုက်တဲ့ ဝိဉာဉ်ပဲ။ တကယ်လို့ မင်းသာ သူ့ကို အောင်အောင်မြင်မြင် သတ်နိုင်ပြီး ငါ့ကို အဆုံးသတ်နိုင်ခဲ့ရင် ဒီ့ထက်စောပြီး မင်း နိုးထလာမှာပဲ”

“အမှန်ပဲ။ အဲ့ဒါက တကယ်ဆိုးတာပဲ ဟုတ်တယ်မလား။ ကံမကောင်းစွာနဲ့ ငါ့ဝိဉာဉ်ထဲက အဟန့်အတားက အခုချိန်မှပဲ ပျောက်ပြယ်သွားတာ။ မဟုတ်ရင် ငါ့ကို တစ်ခါသတ်နိုင်ဖို့ မင်း ဘယ်တတ်နိုင်မှာလဲ။ တကယ်လို့ ငါ့မှာသာ င့ါအသိဉာဏ် နဲ့ မှတ်ဉာဏ်တို့ ရှိနေခဲ့မယ်ဆိုရင် မင်းတို့အားလုံးက ငါ့ခန္ဓာကိုယ် မြန်မြန်ပြန်ကောင်းလာအောင် ကူညီပေးကြရမှာ။ ဒါပေမယ့် မင်း နဲ့ ဝါးမျိူသူ တို့ရဲ့ ယှဉ်ပြိုင်မှုကြောင့် ငါက နောက်ထပ်နှစ်ပေါင်း သောင်းချီကြာအောင် အိပ်စက်သွားခဲ့ရတယ်….”

“ကံကောင်းချင်တော့ ငါ့ခန္ဓာကိုယ် ပျက်စီးသွားပြီး ငါ့ဝိဉာဉ်တစ်စစီ ဖြစ်သွားတဲ့အချိန်မှာ ငါ စိုက်ခဲ့တဲ့ မျိုးစေ့က ကြီးထွားလာပြီး မင်းတို့အားလုံးကို အုပ်မိုးပေးနိုင်တဲ့ အရမ်းမြင့်တဲ့ သစ်ပင်တစ်ခုဖြစ်လာခဲ့တယ်။ တခြားစကြာဝဠာကနေ ရောက်လာတဲ့ ဟိုမျိုးစေ့က အချိန်အကြာကြီး ကြီးထွားလာပြီးတဲ့နောက်မှာ ငါ့ကိုတောင် ခြိမ်းခြောက်နိုင်လောက်အောင်ထိ အရမ်းသန်မာလာတာကို ငါ မယုံနိုင်သေးဘူး”

သွေးသောက်သခင်၏ ဧရာမမိစ္ဆာခန္ဓာကိုယ်ကြီးသည် နတ္ထိ၏ အသိပင်လယ်၌ ပေါ်ထွက်လာခဲ့သည်။ ထို့နောက်၌ သူက ဘာမှမဟုတ်သည့်သဖွယ် ပြောလိုက်သည်။ “ငါ့အသိပင်လယ်ထဲ မင်း ဝင်လာတာဆိုတော့ ဒီတစ်ခါတော့ မင်း ကံမကောင်းတော့ဘူးပဲ။ ငါ့နိုးထမှုက မင်းရဲ့ အကြီးမားဆုံးကံဆိုးမှုပဲ”

စကားပြောနေရင်း သွေးသောက်သခင်သည် ပျံထွက်သွားပြီး စွမ်းအင်အသိအလွှာနှင့် နတ္ထိကြယ်ပိုင်နက်တို့ကို ဖြတ်ကျော်၍ နတ္ထိ၏ ပင်မဝိဉာဉ်ထံသို့ တိုက်ရိုက်သွားလိုက်သည်။

သွေးသောက်သခင်သည် လက်တစ်ဖက်မြောက်လိုက်သည်။ အံ့သြထိတ်လန့်ဖွယ်လက်တစ်ခုသည် နေ ၊ လ ၊ ကြယ် ၊ သတ္တု ၊ သစ်သား ၊ ရေ ၊ မီး ၊ မြေ ၊ လျှပ်စီး ၊ မြေဆွဲအား ၊ ဟင်းလင်းပြင် စသည်တို့ပါဝင်သော များပြားလွန်းသည့် စွမ်းအားများနှင့်အတူတကွ နတ္ထိ၏ နဂါးဝိဉာဉ်ကို ဖမ်းဆုပ်ပြီး သူ့ပါးစပ်ထဲသို့ ထည့်သွင်း၍ ဝါးမျိူပစ်လိုက်သည်။

တစ်ချိန်တည်းလိုလို၌ နတ္ထိ၏ မိုင်ပေါင်း သန်းနဲ့ချီကျော် ရှည်လျားသော ခန္ဓာကိုယ်သည် ရုတ်တရက် ရှုံ့တွသွားသည်။ သူ့စိတ်ဝိဉာဉ် ၊ ဝိဉာဉ် ၊ အရိုးများ နှင့် အသွေးအသားများအားလုံး စုပ်ယူပစ်ခံရသည့်ပမာပင်။ နတ္ထိ၏ ကြီးမားကျယ်ပြန့်သော အသက်စွမ်းအင်သည် ထာဝရရှင်သန်မယ့် ရှေးဟောင်းသစ်ပင်တစ်ခုပမာ ဖြစ်နေခဲ့သည်။ နောက်ဆုံး၌ ၎င်းသည် သူ့အဆုံးသတ်အချိန်သို့ ရောက်သွားသည့်ပမာ ညိုးနွမ်းခြောက်သွေ့လာခဲ့သည်။

လူတွေကို ကြောက်လန့်တုန်လှုပ်စေနိုင်သော အော်ရာတစ်ခုသည် နတ္ထိ၏ ညိုးနွမ်းခြောက်သွေ့သော ခန္ဓာကိုယ်မှ ထွက်လာခဲ့သည်။ ရှီယန်သည် အကြွင်းမဲ့မူလ၏ အသိပင်လယ်ကို ဝါးမျိူနေစဉ်ဖြစ်သော်လည်း ထူးခြားဆန်းကြယ်ပြီး ကြောက်ရွံ့ဖွယ်ကောင်းသည့် ထိုစွမ်းအားက သူ့ကို ဖြူဖပ်ဖြူရော် ဖြစ်သွားစေခဲ့သည်။

“ဘာဖြစ်သွားတာလဲ”

သူသည် မနေနိုင်ဘဲ နတ္ထိဘက်သို့ လှည့်ကြည့်လိုက်သည်။ သူ့နှလုံးသားထဲ အလွန်အမင်း အန္တရာယ်များသည့် ခံစားချက်တစ်ခု ထွက်ပေါ်လာသည်နှင့်အညီ သူ့မျက်နှာထားသည် အကြီးအကျယ် ပြောင်းလဲသွားသည်။

မကြာခင်၌ ရှီယန်သည် ဘေးအန္တရာယ်ကို သတိပြုမိသွားသည်။ သူ့ပင်မခန္ဓာကိုယ် နှင့် နတ်ဆိုးကိုယ်ပွားမှ ဖြစ်ပေါ်လာသော သူ့ဧရာမခန္ဓာကိုယ်ကြီးသည် အဖျက်စွမ်းအားကို ရုတ်တရက် ထုတ်လွှတ်လိုက်သည်။

ဟင်းလင်းပြင် ၊ ကြယ်တာရာ ၊ ရှင်ခြင်း ၊ ဝါးမျိူခြင်း နှင့် အခြားယုတ်ညံ့စမ်းအားရှစ်ခုတို့ကို တစ်ပြိုင်နက်ထုတ်လွှတ်ရင်း နတ္ထိဘက်သို့ တဟုန်ထိုး တိုက်ခိုက်လိုက်သည်။ မရေမတွက်နိုင်အာင် များပြားသော ဟင်းလင်ပြင်ဓားလက်များ ဖြတ်ခုတ်လာကြပြီး ကြယ်တာရာပိုက်ကွန်တစ်ခုသည် ကောင်းကင်ပေါ်မှ ထိုးဆင်းကြလာသည်။ ရှင်ခြင်းစွမ်းအား၏ ဧရာမလက်တစ်ခုက ဆွဲဖြဲလိုက်ပြီး မကောင်းသည့် ခံစားချက်များ ပေါက်ကွဲထွက်လာကြသည်။ သွေးချောင်းစီးနေသည့် ကျွန်းစုရှစ်ခုသည် နေရာအနှံ့သို့ ပျံသန်းသွားကြပြီး ရှီယန်၏ ခန္ဓာကိုယ်က နတ္ထိ၏ ခန္ဓာကိုယ်ကို ကိုက်ဖြတ်ဆွဲဖြဲလိုက်သည်။

“င့ါမျက်လုံးတွေ……”

ညိုးခြောက်သွားသည့် နဂါးခန္ဓာကိုယ်မှ ရှေးဟောင်းအသံတစ်ခု ထွက်လာခဲ့သည်။ ရှီယန်၏ စွမ်းအားက ၎င်းကို ထိမှန်ရိုက်ခတ်သွားသည့်အချိန်၌ နဂါးသည် သူ့အရေခွံသာ ကျန်ရစ်နေခဲ့သည့်ဟန်ပေါ်သည်။ သူ့ကိုယ်ထဲရှိ သွေး နှင့် အသွေးအသားများ ပျောက်ကွယ်သွားကြ၏။

မှားယွင်းနေသော အခြေအနေကို ရှီယန် သတိပြုမိသွားသည့်အချိန်၌ သူ ပေါင်းစည်းလိုက်သည့် စွမ်းအင်အသိသင်္ကေတမျှော်စင်သည် ရုတ်တရက် ပေါက်ကွဲသွားသည်။ များပြားလှသော အကြွင်းမဲ့မူလသင်္ကေတများသည် လိပ်ပြာများသဖွယ် နဂါးခေါင်းဘက်သို့ ပျံသန်းသွားကြသည်။ စွမ်းအင်အသိသင်္ကေတမျှော်စင် ပေါက်ကွဲသွားသည်နှင့် ဧရာမမျက်လုံးတစ်ခု ထွက်ပေါ်လာသည်။ ယင်းမျက်လုံးလည်း နဂါးခေါင်းဘက်သို့ ပျံသန်းသွား၏။

ဘုန်း…ဘုန်း…

နတ္ထိ၏ နဂါးခေါင်းသည် သူ့ခန္ဓာကိုယ်နှင့်အတူ ပေါက်ကွဲထွက်သွားသည်။ ရှီယန်လောက် ကြီးမားပြီး တစ်နည်းတစ်ဖုံဖြင့် အသွင်အပြင်ပုံစံ တူညီသော ဧရာမမိစ္ဆာတစ်ကောင်သည် ပေါက်ကွဲမှုများအလယ် ၊ မှုန်ဝါးပြီး ပတ်ပတ်ချာလည်နေသော အကြွင်းမဲ့မူလ၏ ဝိဉာဉ်အသိများကြား၌ ထွက်ပေါ်လာခဲ့သည်။

ထိုဧရာမမိစ္ဆာကြီးသည် အလွန်စွမ်းအားကြီးပြီး ကြည့်ကောင်းသည်။ သွေးကြောဆုံမှတ်များနေရာတွင် ကမ္ဘာတစ်ခုစီ ရှိနေသောကြောင့် သူ့ခန္ဓာကိုယ်သည် ဂြိုဟ်အများအပြားဖြင့် လုပ်ထားသည့်ဟန်ပေါ်ပြီး ရှေးခေတ်အချိန်၏ ခြေရာအရိပ်ယောင်များကို သယ်ဆောင်နေသည်။ စွမ်းအင်အသိသင်္ကေတမျှော်စင်ပေါ်ရှိ မျက်လုံးသည် နဂါး၏ ယင်းမိစ္ဆာ၏ နဖူးပေါ်သို့ ဆင်းကျသွားပြီး သူ့တတိယမျက်လုံးဖြစ်လာခဲ့သည်။ ဤမိစ္ဆာ၏ အော်ရာသည် နတ္ထိထက် ပိုပြင်းထန်ပြီး ပိုကြောက်ဖို့ကောင်းသည်။

“ကြည့်ရတာ ငါ သူ့ကို အရင်တုန်းက တွေ့ဖူးတယ်ထင်တယ်….” နတ္ထိ၏ ခန္ဓာကိုယ်မှ ရုတ်တရက် ထွက်လာသည့် သတ္တဝါကို ကြည့်ပြီး ရှီယန်သည် ရင်းနှီးသော ခံစားချက်တစ်ခုရရှိနေသည်။ သွေးနွယ်ရှင်လက်စွပ်ထဲရှိ အဟန့်အတားကို သူ ချိုးဖျက်လိုက်သည့်အချိန်တုန်းက ကြောက်ရွံ့ဖွယ်ကောင်းသော ထိုပုံရိပ်ကို သူ မထင်မရှားတွေ့ခဲ့ရကြောင်း သေသေချာချာ မှတ်မိနေသေးသည်။ သို့သော် သူ့မှတ်ဉာဏ်ထဲရှိ မိစ္ဆာ၌ တတိယမျက်လုံးမရှိပါ။

“သွေးသောက်သခင် သွေးသောက်သခင်”

သူ့ခေါင်းထဲ၌ နားလည်သဘောပေါက်မှုတစ်ခု ဖြတ်ပြေးသွားခဲ့သည်။ ရှီယန်သည် မထိန်းချုပ်နိုင်ဘဲ စူးရှအက်ကွဲသော အသံဖြင့် အော်လိုက်သည်။ သူ့မျက်နှာသည် အလွန်ကိုးယိုးကားရားဖြစ်နေ၏။

နတ္ထိ၏ ခန္ဓာကိုယ်ကို ဆွဲဖြဲပြီး ထွက်လာသည့် ဧရာမမိစ္ဆာကြီးသည် သွေးသောက်သခင်၏ အသွင်အပြင်ပုံစံနှင့် ရှိနေသည်။ တတိယမျက်လုံးမှအပ သူတို့နှစ်ယောက်ကြား၌ ကွာခြားမှုတစ်ခုမှ မရှိချေ။

“နားမလည်သေးဘူးလား”

သွေးသောက်သခင်သည် သွားဖြဲလျက် ရှီယန်ဘက်သို့ လျှောက်သွားလိုက်သည်။ အဆုံးမဲ့အသိပင်လယ်သည် အခိုးအငွေ့များသဖွယ် သူ့ချွေးပေါက်များထဲသို့ ဝင်သွားကြသည်။ တစ်ဝက်တစ်ပျက် ကျန်ရှိနေသေးသော အကြွင်းမဲ့၏ ဝိဉာဉ်ကန်သည် ပျံထွက်လာပြီး သူ့နဖူးပေါ်ရှိ တတိယမျက်လုံးမှတစ်ဆင့် သူ့ခေါင်းထဲသို့ ဝင်သွားသည်။

“ဒါဆို ခင်ဗျားက သူပေါ့”

နောက်ဆုံး၌ ရှီယန်သည် နားလည်သဘောပေါက်သွားပြီး သူ့အသိစိတ် ပြန်လည်နိုးကြားလာခဲ့သည်။ သူ့ခေါင်းထဲရှိ ပဟေဠိများအားလုံး ရှင်းလင်းသွားခဲ့၏။

သွေးသောက်သခင်က အဘယ်ကြောင့် အရမ်းအင်အားကြီးရတာလဲ။ ဝါးမျိူသူကို ငြိမ်ဝပ်သွားလောက်အောင်ထိ ဘယ်လိုလုပ်ပြင်းပြင်းထန်ထန် ရိုက်နှက်နိုင်ရတာလဲ။ ဟွေက အဘယ်ကြောင့် သူ့ကို ရန်မစရဲရတာလဲ။ သူ့လက်စွပ်က ရှီယန်အား ဟင်းလင်းပြင်ကို ဖြတ်ကျော်သွားစေပြီး အမှောင်တောနက်ထဲသို့ ရောက်သွားအောင် အဘယ်ကြောင့် လုပ်နိုင်ခဲ့သနည်း။ သူ့မေးခွန်းများအားလုံးအတွက် အဖြေရရှိခဲ့ပြီဖြစ်သည်။ အဘယ်ကြောင့်ဆိုသော် သွေးသောက်သခင်သည် အကြွင်းမဲ့ဖြစ်နေသောကြောင့်ပင်တည်း။

သွေးသောက်သခင်သည် ရှေ့သို့ ဆက်လှမ်းနေသည်။ အသိပင်လယ်အလွှာရှိ ဝိဉာဉ်အသိသည် ပျောက်ကွယ်သွားပြီး စွမ်းအင်အသိအလွှာရှိ စွမ်းအင်အသိဇစ်မြစ်အားလုံးသည် သူ့ခေါင်းထဲသို့ ဝင်သွားကြသည်။ သူ့စွမ်းအားကို မြန်မြန်ဆန်ဆန် ပြန်စုစည်းနေခြင်းဖြစ်သည်။

“လွန်ခဲ့တဲ့ နှစ် သန်းပေါင်းများစွာတုန်းက ကစဉ့်ကလျားအဖြစ်အပျက်တစ်ခုကနေ ငါ နိုးထလာခဲ့တယ်။ လောကတစ်ခု တည်ဆောက်ပြီး သက်ရှိသတ္တဝါတွေကို ဖန်ဆင်းခဲ့တယ်။ အဲ့လိုလုပ်လာနေရင်းနဲ့ မင်း နေထိုင်တဲ့ စကြာဝဠာကို ငါ တွေ့ခဲ့တယ်။ အဲ့ဒါက ငါ့စကြာဝဠာနဲ့ လုံးဝကွဲပြားတယ်။ ဒါပေမယ့် အဲ့စကြာဝဠာမှာ မယုံနိုင်ဖွယ်ရာအင်အားကြီးလွန်းတဲ့ အကာအကွယ်ရှိနေလို့ ငါ မကျူးကျော်နိုင်ခဲ့ဘူး။ ငါ ဝင်သွားဖို့ ကြိုးစားခဲ့သေးတယ်။ အဲ့လိုလုပ်နေရင်းနဲ့ ငါ့စွမ်းအားအများကြီး ကုန်ဆုံးသွားခဲ့တယ်….”

သွေးသောက်သခင်သည် ရှေ့သို့ ဆက်လျှောက်လာရင်း ပြောလိုက်သည်။

“ကံမကောင်းစွာနဲ့ပဲ အဲ့အလွှာကို ငါ ဖွင့်လိုက်နိုင်တဲ့အချိန်မှာ စိတ်ဖောက်တဲ့အခြေအနေထဲ ငါ ရောက်သွားခဲ့တယ်။ ကမ္ဘာအသစ် တည်ဆောက်ပြီး ဂြိုဟ်တွေ သက်ရှိသတ္တဝါတွေ ဖန်တီးခဲ့တာနဲ့ အကာအကွယ်ကို ဖွင့်ရာမှာ စွမ်းအားအများကြီး ကုန်ဆုံးသွားခဲ့တာကြောင့်လည်း ငါ ဒဏ်ရာရသွားခဲ့တယ်။ ငါ့ခန္ဓာကိုယ် နဲ့ ဝိဉာဉ်တို့က ဖြည်းဖြည်းချင်း ခွဲထွက်နေကြတယ်။ ဒါပေမယ့် ငါ့အသိစိတ်မပျောက်ဆုံးခင်မှာ အဲ့စကြာဝဠာက ဝိဉာဉ်တစ်ခုကို ငါ ကြိုးစားပြီး ဆွဲခေါ်သွားခဲ့တယ်။ အဲ့ဒါက မင်းပဲ……”

“တကယ်လို့ ငါသာ စိတ်ဖောက်ပြားတဲ့ အခြေအနေမှာ မရောက်သွားဘဲ ၊ ငါ့ခန္ဓာကိုယ် နဲ့ ဝိဉာဉ်တို့ကလည်း ခွဲထွက်သွားကြပြီး အကြွင်းမဲ့မူလသတ္တဝါတွေ မဖြစ်သွားကြရင် မင်းကို ငါ့ကမ္ဘာထဲ မျက်တောင်တစ်ခတ်အတွင်း ဆွဲခေါ်သွားနိုင်မှာပဲ။ ဒါပေမယ့် ငါ မင်းကို မင်းရဲ့ ကမ္ဘာကနေ ဆွဲခေါ်ထုတ်တဲ့အချိန်မှာ ငါက အရမ်းအားနည်းနေလို့ မင်းကို ဂရုမစိုက်နိုင်တော့ဘူး။ နောက်တော့ ငါက လုံးဝ အပိုင်းပိုင်းကွဲထွက်သွားခဲ့တယ်။ ငါ့အသိစိတ်လည်း ဆုံးရှုံးသွားရလို့…မင်းကို မင်းရဲ့စကြာဝဠာကနေ ငါ့စကြာဝဠာထံ ခေါ်သွားဖို့ နှစ်ပေါင်းသန်းနဲ့ချီကျော်….ခေတ်ကာလနှစ်ခုစာ ကြာမြင့်သွားခဲ့တယ်။ မင်းဟာ အဆုံးမဲ့အသူရာမှာ ပိတ်မိနေခဲ့တယ်”

“ငါ့ဝိဉာဉ်အသိ မပျောက်ဆုံးခင်မှာ ငါ့နိုးထလာမှုအတွက် ကြိုတင်ပြင်ဆင်ထားခဲ့တယ်။ အကြွင်းမဲ့မူလခေတ်ရဲ့ ကောလဟလတွေက ငါ့ရဲ့ ပထမဆုံးအစီအစဉ်ပဲ။ အကြွင်းမဲ့မူလခေတ်က သက်ရှိသတ္တဝါတွေအားလုံး သေဆုံးသွားကြသရွေ့ အဲ့ဒါက ငါ့အသိပင်လယ်ထဲက နိယာမစည်းမျဉ်းတွေကို နိုးထသွားစေပြီး ငါ့ဝိဉာဉ်က ပြန်စုစည်းကြလိမ့်မယ်။ အားအကောင်းဆုံးတွေ ဖြစ်လာကြတဲ့ နတ္ထိ ၊ ဝါးမျိူသူ ၊ ဟွေ ၊ ယွမ် နဲ့ ပုတ်သင်တို့က သူတို့ထဲ တစ်ယောက်ပဲကျန်တဲ့အထိ အချင်းချင်းသတ်နေကြသရွေ့ ငါ့ခန္ဓာကိုယ်လည်း ပြန်အသက်ဝင်လာမှာပဲ”

“တကယ်လို့ ငါ့ဝိဉာဉ် ဒါမှမဟုတ် ခန္ဓာကိုယ် တစ်ခုခုသာ နိုးထနိုင်ရင် ငါ အလုံးစုံ နိုးထလာနိုင်မှာပဲ”

“ဒါပေမယ့် ဝမ်းနည်းဖို့ကောင်းတာက နတ္ထိ ၊ ဝါးမျိူသူ နဲ့ ဟွေ တို့အားလုံး ဒဏ်ရာရသွားကြပြီး ငြိမ်ဝပ်သွားကြတယ်။ အဲ့အပြင် ယွမ် နဲ့ ပုတ်သင်တို့က အဲ့တိုက်ပွဲမှာ ဝင်မပါကြဘူး။ အဲ့ဒါကြောင့် ငါ နိုးထမလာနိုင်ဘဲ ငါ့ဝိဉာဉ်က ဆက်လက်အိပ်စက်နေခဲ့ရတယ်”

“ဒါပေမယ့် ငါ့အသိပင်လယ်ကတော့ အဆုံးမဲ့အသူရာရဲ့ တစ်ဖက်မှာ ဆက်လက်လှုပ်ရှားလည်ပတ်နေခဲ့တယ်။ အကြွင်းမဲ့မူလသတ္တဝါတွေရဲ့ အကြွင်းအကျန် ဝိဉာဉ်များ နဲ့ သန့်စင်တဲ့ ဝိဉာဉ်စွမ်းအားတို့က သက်ရှိအသစ်များနှင့်မျိုးနွယ်စုအသစ်များကို ဖန်တီးပြီး ခေတ်သစ်စတင်စေခဲ့ကြတယ်။ အဲ့ဒါကြောင့်ပဲ နတ္ထိကလည်း ဝါးမျိူသူနဲ့ အဆက်မပြတ် တိုက်နေရတဲ့ စစ်ပွဲကြောင့် ဘဝအသစ်ဖန်တီးချင်ခဲ့တာ။ အဲ့ချိန်မှာပဲ ငါ သွေးသောက်သခင်ကို ဖန်တီးခဲ့တယ်။ ငါ ခဏတဖြုတ်လေး နိုးထလာခဲ့တယ်။ အဲ့လိုနဲ့ပဲ ရဲရင့်ပြီး ကြမ်းတမ်းတဲ့ သွေးသောက်သခင်ကို ငါတို့ တွေ့ကြရတာ”

“ဒါပေမယ့် နတ္ထိတို့ ဝါးမျိုသူတို့ စတဲ့ ငါ့ကိုယ်အစိတ်အပိုင်းတွေက သူ သေတဲ့အချိန်ထိ သူက ဘယ်သူလဲဆိုတာ မသိခဲ့ကြဘူး။ ငါကလည်း နိုးထမလာနိုင်ခဲ့ဘူး။ မဟုတ်ရင် အခုချိန်မှာ ဒီလိုမျိုး အရမ်းရှုပ်ထွေးနေမှာ မဟုတ်ဘူး”

“ငါ့ကိုယ်အစိတ်အပိုင်းတွေမှာ ရှိတဲ့ ဝိဉာဉ်အမှတ်အသားမှာ အရေးကြီးတဲ့ ငါ့မှတ်ဉာဏ်အပိုင်းအစတွေ ရှိခဲ့တယ်။ ကြယ်တာရာဘိုးဘေးအဆင့်ရောက်သူတွေက ပိုင်နက်တစ်ခုလုံးကို ထိန်းချုပ်နိုင်ကြောင်း သူ သိခဲ့တယ်။ သူ့အလိုလိုသိစိတ်နဲ့ သူက လွတ်မြောက်ချင်ခဲ့တယ်။ သူ မသေခင်မှာ သူ့လျို့ဝှက်နည်းပညာနဲ့ နတ္ထိရဲ့ မူလစွမ်းအင်ကို သွားထိပြီး အခြားပိုင်နက်ကနေ သူစိမ်းဝိဉာဉ်တစ်ခုကို ခေါ်လာခဲ့တယ်။ နှစ်အများကြီးကြသွားပြီးနောက်မှာမှ နတ္ထိကြယ်ပိုင်နက်ထဲ မင်းရဲ့ဝိဉာဉ် ဆွဲခေါ်ခံရတာက မတော်တဆပဲ”

“ငါ အရာအားလုံးကို မထိန်းချုပ်နိုင်ခဲ့ဘူးလို့ပဲ ပြောနိုင်တော့တယ်။ အနည်းဆုံး မင်းရဲ့ ဝိဉာဉ်ကို ငါ မထိန်းချုပ်နိုင်ဘူး”

“အဲ့ဒါကြောင့် မင်းကို ဝါးမျိူစွမ်းအင်အသိကို ရရှိစေခဲ့တယ်။ ပြီးတော့ မင်းဝိဉာဉ်ရဲ့ ထူးခြားတဲ့ အချက်လက္ခဏာကြောင့် မင်း ဝါးမျိူလိုက်တဲ့ စွမ်းအားနဲ့ ဝိဉာဉ်အားလုံးက မင်းရဲ့အပိုင်တွေဖြစ်သွားကြတယ်။ သူတို့က ငါ့အသိပင်လယ်ထဲ ပြန်ရောက်မလာကြတော့ဘူး။ နောက်ဆုံးတော့ သူတို့က မင်းကို မြင့်တက်လာစေကြပြီး အခုနောက်ဆုံး ငါ့ကို ခြောက်လှန့်နိုင်တဲ့ စွမ်းအားတောင် မင်း ရသွားခဲ့တယ်”

အကြွင်းမဲ့မူလသည် စကားပြောခြင်း နှင့် လျှောက်လှမ်းနေခြင်းကို တစ်ပြိုင်နက် ရပ်လိုက်သည်။ အသိပင်လယ်ထဲရှိ ဝိဉာဉ်ကန်အပါအဝင် ဝိဉာဉ်အသိအမျှင်အားလုံးသည် သူ့ခန္ဓာကိုယ်ထဲသို့ ဝင်သွားကြသည်။

အကြွင်းမဲ့မူလ၏ ဝိဉာဉ်အသိအလွှာ၌ စွမ်းအင်အသိဇစ်မြစ်တစ်ခုလေးမျှ မကျန်ရှိတော့ချေ။ အသိပင်လယ်တွင်လည်း ဝိဉာဉ်အသိအမျှင်တစ်ခုလေးပင် မရှိတော့ဘဲ မှောင်မည်းသော လေဟာပြင်တစ်ခုသာ ကျန်ရှိတော့သည်။

“အဆုံးသတ်ဖို့ အချိန်ကျပြီ” ရှီယန်ကို ကြည့်ပြီး အကြွင်းမဲ့မူလသည် ဘာမှဂရုမစိုက်သည့် မျက်နှာထားနှင့် ရှိနေသည်။ “ငါ မင်းကို သတ်ပြီး ငါ့ထံကနေ မင်း ခိုးသွားခဲ့တဲ့ စွမ်းအားတွေကို ငါ့စွမ်းအားပြန်ပြည့်လာဖို့အတွက် ပြန်ယူလိုက်မယ်။ မင်းနေထိုင်ခဲ့တဲ့ စကြာဝဠာကို သိမ်းပိုက်စိုးမိုးဖို့ ငါ ထပ်သွားအုံးမယ်။ ပြီးတော့ အဲ့စကြာဝဠာကို အခြားစကြာဝဠာတွေဆီ သွားဖို့ တံတားအနေနဲ့ ငါ အသုံးချလိုက်မယ်…အို…အဆုံးမဲ့တဲ့ စကြဝဠာတွေ…”

ရှီယန်သည် လျို့ဝှက်ဆန်းကြယ်သော ပဟေဠိက ရှင်းလင်းသွားသည့်ပမာ ပြင်းပြင်းထန်ထန် တုန်လှုပ်သွားခဲ့သည်။

“ခင်ဗျား နိုင်မယ်ဆိုတာ သေချာရဲ့လား” ရှီယန်သည် ချက်ချင်း သူ့ကိုယ်သူ ပြန်ထိန်းချုပ်လိုက်သည်။ ကြယ်အလင်းတန်းများသည် သူ့ခေါင်းထဲ လင်းဖြာဖြတ်သန်းသွားကြပြီး သူ၏ ပျာယာခတ်၍ စိုးရိမ်တုန်လှုပ်နေသော အတွေးများကို ဖြတ်တောက်ပေးလိုက်သည်။ ရှီယန်သည် သူ၏ နဂိုအေးစက်တည်ငြိမ်သော မျက်နှာထားနှင့် ရှိလိုက်ပြီး ထေ့ငေါ့ပြောလိုက်သည်။ “ခင်ဗျားက အခုချိန်မှာ မပြည့်စုံသေးဘဲ အများကြီးကင်းမဲ့နေသေးတယ်။ ဥပမာ ရှင်ခြင်းစွမ်းအင်အသိ ၊ ဟင်းလင်းပြင်စွမ်းအင်အသိ ၊ ကြယ်တာရာစွမ်းအင်အသိ နဲ့ ခင်ဗျားနှလုံးသားထဲက မကောင်းတဲ့အတွေးတွေနဲ့ ဖန်တီးထားတဲ့ ရက်စက်ကြမ်းတမ်းတဲ့ နှလုံးသားတို့ပေါ့။ သေချာပေါက် ခင်ဗျားရဲ့ သွေးကီအနှစ်သာရ တစ်ဝက်လောက်ကိုလည်း ကျုပ်တို့ ထည့်တွက်ရမှာပေါ့”

ရှီယန်သည် အကြွင်းမဲ့မူလ ခန္ဓာကိုယ်ဖြင့် ဝါးမျိူသူ ၊ ယွမ် နှင့် ကျက်သရေကုန်းမြေအဖြစ်ရှိသော နတ္ထိ၏ အစိတ်အပိုင်းတစ်ခုကို ဝါးမျိူခဲ့သည်။ လက်ရှိသူ့ခန္ဓာကိုယ်၌ အကြွင်းမဲ့မူလ၏ သွေးကီအနှစ်သာရ တစ်ဝက်ခန့် နှင့် ပေါများလွန်းသော ရှင်ခြင်းစွမ်းအား ပါရှိနေသည်။ ဝါးမျိူစွမ်းအင်အသိဇစ်မြစ် နှင့် ရက်စက်ကြမ်းကြုတ်သော နှလုံးကိုပါ ထည့်တွက်လျှင် အခုအခိုက်အတန့်၌ သူသည် အကြွင်းမဲ့ထက် အင်အားမလျော့နည်းပါ။

“ငါက မပြည့်စုံဘူးဆိုရင်တောင် မင်းကို ဖျက်ဆီးပစ်ဖို့တော့ လုံလောက်ပါသေးတယ်။ နောက်မှ အပြည့်အဝ ပြန်ကောင်းလာဖို့ မင်းကို အသုံးချပစ်မယ်” အကြွင်းမဲ့က ပေါ့ပေါ့ပါးပါးဖြင့် ပြောလိုက်သည်။

သူ စကားပြောနေစဉ် အဆုံးမဲ့အသူရာကြီး ပြိုကျသွားသည်။ အဆုံးမဲ့အသူရာပေါ်ရှိ ကြီးမားကျယ်ပြန့်သော စကြာဝဠာ ၊ မရေမတွက်နိုင်အောင် များပြားသည့် ပိုင်နက်များ ၊ ကြယ်များ နှင့် ဂြိုဟ်များသည် ပြိုကျလာကုန်ကြသည်။

အကြွင်းမဲ့သည် စကြာဝဠာတစ်ခုလုံး၏ စွမ်းအားကို အသုံးပြုပြီး ရှီယန်ကို သတ်၍ သူ့ဝိဉာဉ်ကို ပျောက်ကွယ်သွားစေချင်သည်။

ကြယ်ပိုင်နက်တစ်ခုတည်းမဟုတ်ပါ။ တကယ့်စကြာဝဠာတစ်ခုလုံးဖြစ်သည်။

၎င်းသည် မရှိခြင်းပင်လယ် ၊ နတ္ထိကြယ်ပိုင်နက် ၊ လှိုင်းမြစ်ပိုင်နက် ၊ တိမ်မြူပိုင်နက် စသည့် ပိုင်နက်ပေါင်း သန်းချီကျော်ဖြင့် ဖွဲ့စည်းတည်ထောင်ထားသော ကြီးမားကျယ်ပြန့်လွန်းလှသည့် ကြယ်ပင်လယ်ဖြစ်သည်။ စကြာဝဠာ၏ ထူးကဲခြားနားသော အော်ရာ၌ စွမ်းအင်အသိပေါင်း ထောင်ချီကျော် ပါဝင်ကြသည်။ ၎င်းတို့မှာ အခြေခံသဘောတရားငါးခု ၊ ကြယ် ၊ ရှင်ခြင်း ၊ ဆွဲငင်အား ၊ လေပွေ၊ လျှပ်စီးစသည်တို့ဖြစ်သည်။

ခွပ်…ခွပ်…ခွပ်…

လေဟာပြင်သည် အက်ကွဲကြေမွသွားသည့် ကျောက်တုံးတစ်ခုပမာ အပိုင်းပိုင်းအစအစအက်ကွဲသွားပြီးနောက် ဖုန်မှုန့်မြူမှုန်များအဖြစ်သို့ ပြောင်းလဲသွားကြသည်။ သက်ရှိသတ္တဝါများ ၊ ဝိဉာဉ်ဖြစ်စေ လူသားဖြစ်စေ မည်သူကမှ ကြောက်ရွံ့ဖွယ်ထိုဘေးအန္တရာယ်ကို မခုခံနိုင်ကြပါ။ သူတို့၏ ဝိဉာဉ်အမှတ်အသားများသည် တခဏအတွင်း ပျက်ပြယ်သွားခဲ့သည်။

“အား…”

ရှီယန်သည် ကောင်းကင်ကို ရင်ဆိုင်မော့ကြည့်ပြီး အော်ဟစ်မြည်ဟိန်းလိုက်သည်။ သူ့ဧရာမခန္ဓာကိုယ်ကြီးသည် ဓားပေါင်း သောင်းချီကျော်၏ လှီးဖြတ်ခံရသည့်ပမာ ခံစားလိုက်ရသည်။ သူ့ခန္ဓာကိုယ်ပေါ်၌ သွေးယိုစီးသည့် အပေါက်များ အများအပြားထွက်ပေါ်လာခဲ့သည်။ သူ့ဝိဉာဉ်ယဇ်ပလ္လင်၌ အက်ရာများ ထွက်ပေါ်လာခဲ့၏။ ချွန်ထက်သော ဓားလက် သန်းပေါင်းများစွာ၏ လှီးဖြတ်ခံလိုက်ရသည့်ပမာပင်။

“အဲ့လိုလုပ်နိုင်တာ ခင်ဗျား တစ်ယောက်တည်းမှ မဟုတ်တာ” ရှီယန်သည် ကောင်းကင်ကို လက်ညိုးထိုးပြီး သူ့ဝိဉာဉ်ယဇ်ပလ္လင်ရှိ သူ့ပိုင်နက်ဖြစ်သော စကြာဝဠာ ထွက်ပေါ်လာခဲ့သည်။

ကြီးမားကျယ်ပြန့်သော စကြာဝဠာသည် အလွန်တောက်ပလွန်းသည်။ ၎င်းသည် လေဟာပြင်ထဲက ဧရာမပုံရိပ်တစ်ခုသဖွယ် ပေါ်နေသော်လည်း ၎င်းသည် ပုံရိပ်တစ်ခုသက်သက်မဟုတ်ပါ။ ၎င်းသည် အစစ်အမှန်ဖြစ်၏။

ထိုစကြာဝဠာ၌ မရေမတွက်နိုင်အောင် များပြားသည့် တောင်တန်းတောင်ကုန်းများ ၊ ကန်များ နှင့် ပင်လယ်များ ပါရှိသော ဂြိုဟ်များ အများအပြားရှိသည်။ ၎င်းသည် နယ်နိမိတ်အစွန်းမရှိဘဲ မျိုးနွယ်စုအများအပြား၏ ဘိုးဘေးများကို ကာပေးထားသည်။ ၎င်းတွင် စကြာဝဠာအစစ်တစ်ခု၌ ရှိသင့်သည့် အရာအားလုံးရှိနေသည်။

စကြာဝဠာနှစ်ခု ၊ အပေါ်တစ်ခု နှင့် အောက်တစ်ခုတို့သည် အချင်းချင်း ကျွံဝင်လာကြပြီး တစ်ပြိုင်နက် တွန်းတိုက်လိုက်ကြသည်။

ထိုသို့ဖြင့် ၎င်းတို့သည် ပြင်းပြင်းထန်ထန် တိုက်မိသွားကြသည်။

ဘုန်း…ဘုန်း….ဘုန်း

ဒုန်း…ဒုန်း….

ဂျိန်း…ဂျိန်း…ဂျိန်း…

ပေါက်ကွဲသံအများအပြား ပဲ့တင်ထပ်မြည်လာသည်။ သက်ရှိသတ္တဝါများ ၊ နေများ ၊ လများ ၊ ကြယ်တာရာများ ၊ လေဟာပြင်များ နှင့် ပိုင်နက်များသည် အပြီးအစီး ပျက်စီးပျောက်ကွယ်သွားကြသည်။

ရှီယန် နှင့် အကြွင်းမဲ့တို့၏ စကြာဝဠာတို့သည် ဆိုးဆိုးရွားရွား အက်ကွဲပျက်စီးသွားကြသည်။ ထိုစကြာဝဠာထဲ၌ နေထိုင်သည့် သက်ရှိသတ္တဝါများကလည်း ကပ်စိုက်မှုထဲသို့ ဆွဲထည့်ခံကြရသည်။ သူတို့သည် ကူကယ်ရာကင်းမဲ့စွာဖြင့် တန်းခနဲ အသတ်ခံကြရသည်။

“ဆင်းကျလာစမ်း”

အကြွင်းမဲ့၏ မျက်နှာထားသည် အလွန်အမင်း အေးစက်သွားသည်။ ကြီးမြတ်သော ကလန်ခုနှစ်ခု၏ မရေမတွက်နိုင်သော အဖွဲ့ဝင်များနေထိုင်သည့် ထူးကဲသော ကုန်းမြေများသည် ရုတ်တရက် ရှီယန်၏ စကြာဝဠာကို ပစ်မှတ်ထားလိုက်ကြသည်။ ၎င်းတို့သည် ထာဝရကင်းမဲ့မှု ၊ အထီးကျန်မှု နှင့် အေးစက်မှုတို့ကို ရှီယန်၏ စကြာဝဠာသို့ ယူဆောင်သွားပြီး သူ့ကို လုံးလုံးဖျက်ဆီးပစ်ချင်နေကြသည့်ပမာပင်။

အကြွင်းမဲ့၏ စကြာဝဠာထဲရှိ ပိုင်နက်အများအပြားသည် စွမ်းအင်အသိဇစ်မြစ်များအဖြစ်သို့ ပြောင်းလဲသွားကြသည့်ဟန်ပေါ်သည်။ ၎င်းတို့သည် မီးလျှံများ ၊ ရေခဲပန်းဆွဲများ ၊ လျှပ်စီးမိုးကြိုးများ ၊ လျှပ်စီးနဂါးများ ၊ ကြယ်ကြွေများ နှင့် အခြားရက်စက်ကြမ်းတမ်းသော တိုက်ခိုက်မှုများအဖြစ်သို့ ပြောင်းလဲသွားကြပြီး ရှီယန်၏ စကြာဝဠာအား ပြင်းထန်စွာဖြင့် တရစပ်တိုက်ခိုက်လိုက်ကြသည်။

ရှီယန်၏ စကြာဝဠာအသစ်၏ အစိတ်အပိုင်းအများအပြားသည် ပြင်းထန်လွန်းသော ထိုတိုက်ခိုက်မှုအောက်၌ ပေါက်ကွဲသွားကြသည်။ သူ့စကြာဝဠာသည် ကျုံ့သွားပြီး အစက်သေးသေးလေးတစ်ခုအဖြစ်သို့ ပြောင်းလဲ၍ လုံးဝပျောက်ကွယ်သွားတော့မလို ဖြစ်နေသည်။

ဒုန်း…

သူ့ဝိဉာဉ်ယဇ်ပလ္လင်ပင်လျှင် အကြွင်းမဲ့မူလ၏ နောက်ထပ်တစ်ကြိမ် တိုက်ခိုက်ခံလိုက်ရသည်။ သူ့အသိပင်လယ်၌ ပင်လယ်ရေလှိုင်းအမြင့်များ ရိုက်ခတ်နေကြသည်။ ငြိမ်သက်အေးချမ်းနေသော ဝိဉာဉ်ကန်သည် ပြင်းပြင်းထန်ထန် ဆူပွက်နေကြပြီး ဝိဉာဉ်အရည်များသည် လွင့်စင်ထွက်တော့မလို ဖြစ်နေ၏။

ရှီယန်၏ မကျိုးပျက်နိုင်သော ခန္ဓာကိုယ်သည် အက်ကွဲလာခဲ့သည်။ သူ့အရိုးများ ကျိုးသွားပြီး ကိုယ်တွင်းအင်္ဂါများသည် ကမောက်ကမဗြောင်းဆန်ကုန်၏။ သူ့ထံမှ သွေးများ လွင့်စင်စီးကျလာကြသည်။ ၎င်းသည် ဝိဉာဉ်နစ်မြုပ်စေခြင်း တိုက်ခိုက်မှုပင်ဖြစ်သည်။

သူ့ပိုင်နက် ၊ ဝိဉာဉ် ၊ ဝိဉာဉ်အသိ နှင့် ခန္ဓာကိုယ်တို့တစ်ခုလုံး တိုက်ခိုက်ခံနေရသည်ကို သူ ခံစားမိသည်။ ဧရာမတူများက သူ့အပေါ် အဆက်မပြတ် ထုလာကြသည့်ပမာ ခံစားရသည်။ ၎င်းတို့သည် သူ့ဝိဉာဉ် နှင့် ခန္ဓာကိုယ်ကို ထုနှက်နေကြပြီး သူ မတောင့်ခံနိုင်သော ဆိုးရွားလွန်းသည့် မချိမဆံ့ဝေဒနာကို ခံစားရအောင် လုပ်နေကြသည်။

နောက်တခဏ၌ သူ ပြိုလဲသွားပြီး ဤကမ္ဘာပေါ်ရှိ သူ့ခြေရာအရိပ်ယောင်များအားလုံ ဖျောက်ဖျက်ခံရတော့မည့်ပမာ ဖြစ်နေသည်။

“ငါ့စွမ်းအားတစ်ဝက်ခန့် မင်း ရထားပြီး ငါ့ဆိုးယုတ်မှုရဲ့ မူလအရင်းအမြစ်ကို မင်း ရထားတယ်။ အဲ့ဒါနဲ့ပဲ ငါ့ကို အနိုင်ယူနိုင်လိမ့်မယ်လို့ မင်း ထင်နေတာလား” အကြွင်းမဲ့မူလ၏ အသိစိတ်က သူ့ကို တိုက်ခိုက်လာသည်။ သူ့ခေါင်းထဲ၌ ကြောက်ရွံ့တုန်လှုပ်ဖွယ် ဆူညံသံများ ပြည့်နှက်သွားစေပြီး ပေါက်ကွဲစေသည်။ ၎င်းတို့သည် ကမ္ဘာကြီးကို ရှင်းလင်းပျောက်ကွယ်သွားစေနိုင်သော လျှပ်စီးမိုးကြိုးများ နှင့် မိုးထစ်ချုန်းများထက်ပင် ပို၍ ဆိုးရွားပြင်းထန်ကြသည်။

“တစ်ဝက်…ခင်ဗျားရဲ့ စွမ်းအား ထက်ဝက်….ခင်ဗျားခန္ဓာကိုယ်အစိတ်အပိုင်းရဲ့ ထက်ဝက်။ အဲ့ဒါဆို ခင်ဗျား ထိန်းချုပ်နိုင်တဲ့ အရာအားလုံးကို ကျုပ်လည်း ထိန်းချုပ်နိုင်မှာပဲ” ရှီယန်၏ ဦးခေါင်းထဲတွင် လက်ကနဲ ဖြစ်သွားသည်။ သူ့ဝိဉာဉ် ပေါက်ကွဲလုခါနီး၌ ကောင်းကင်ကို မော့ကြည့်ပြီး မြည်ဟိန်းကြွေးကြောလိုက်သည်။ သူ့အသံက ကောင်းကင်နှင့်မြေကြီးကြား အလွှာများကို ဆုတ်ဖြဲသွားပြီး စကြာဝဠာအများအပြားကို ထိုးဖောက်ဖြတ်သန်းသွားခဲ့သည်။

“ခင်ဗျားရဲ့စကြာဝဠာ…အဲ့မှာ ကျုပ်ရဲ့ တစ်စိတ်တစ်ပိုင်း ပါဝင်နေတယ်။ ဒါပေမယ့် ခင်ဗျားကတော့ ကျုပ် စကြာဝဠာကို မထိနိုင်ဘူး” ခိုင်ခံ့မာကြောသည့် စိတ်စွမ်းအားတစ်ခုသည် မယုံနိုင်ဖွယ်ရာဘေးအန္တရာယ်နှင့်အတူ ရှီယန်၏ ခေါင်းပတ်ပတ်လည်၌ လည်ပတ်နေကြသည်။ ကြောက်ရွံ့ဖွယ်ခွန်အားကြီးသော လေပွေတစ်ခုသဖွယ် ဖွဲ့စည်းတည်ဆောက်ကြပြီး အကြွင်းမဲ့မူလ၏ စကြာဝဠာအား ဟုန်းခနဲ တိုးတိုက်ဆောင့်လိုက်သည်။

ချက်ချင်းပင် ၎င်းသည် ဧရာမပင့်ကူအိမ်တစ်ခုအဖြစ်သို့ ပြောင်းလဲသွားပြီး အကြွင်းမဲ့မူလ၏ စကြာဝဠာ၏ ထောင့်နေရာတိုင်းသို့ ချိတ်ဆက်တွယ်ညှိ၍ အောက်သို့ ဆွဲချလိုက်သည်။

“ငါ့အတွက် ပြောင်းလဲစမ်း”

ရုတ်တရက် ရှီယန်၏ ကြီးမားကျယ်ပြန့်သော စကြာဝဠာသည် အကြီးအကျယ် ပြောင်းလဲသွားသည်။ စကြဝဠာနှစ်ခုအကြားတွင် မယုံနိုင်ဖွယ်ရာကြီးမားသော တွင်းနက်ကြီးတစ်ခု ပေါ်လာပြီး ပြင်းပြင်းထန်ထန် လည်ပတ်နေသည်။

မရှိခြင်းပင်လယ်အပါအဝင် ပိုင်နက်အများအပြားသည် ရှီယန်၏ စကြာဝဠာထဲသို့ ကျွံဝင်သွားကြပြီး သူ့ကမ္ဘာကို တိုက်ခိုက်ခဲ့ကြသည်။ သို့သော် ထိုအခိုက်အတန့်၌ ၎င်းတို့သည် တွင်းနက်ကြီး၏ ဝါးမျိူမှု ခံကြရသည်။ တစ်ချိန်တည်း၌ ရှီယန်၏ နှလုံးထဲရှိ ဘဝသစ်ပင်သည် အကြီးအကျယ် ဝေဆာလာပြီး သူ့ကို မယုံနိုင်ဖွယ်ရာပြိုင်ဘက်ကင်းစွမ်းအားများ ရရှိသွားစေသည်။

ကြီးမားသိပ်သည်းသော ဤအသက်စွမ်းအင်က သူ၏ ထိခိုက်ဒဏ်ရာရထားသော ဒဏ်ရာကို ပြန်ကောင်းစေခဲ့သည်။ သူ့ထံမှ စီးထွက်ခဲ့သည့် သွေးများလည်း ပြန်စုစည်းပြီး သူ့ခန္ဓာကိုယ်ထဲသို့ ပြန်ဝင်လာကြသည်။

ရှီယန်၏ စကြာဝဠာတွင် အခုချိန်၌ မရှိခြင်းပင်လယ်တစ်ခုလုံး နှင့် ပိုင်နက်အများအပြားကို ဖုံးလွှမ်းသွားနိုင်သည့် တွင်းနက်ကြီးတစ်ခု ရှိနေသည်။

သူ့ခန္ဓာကိုယ်သည် အော်ဟစ်ကြွေးကြော်ရင်း သွေးသောက်သခင် အသွင်ပုံစံဖြင့် ရှိနေသော အကြွင်းမဲ့မူလကို ခန္ဓာကိုယ်ချင်း အရူးအမူးကိုက်ဖြတ်ဆွဲဖြဲနေသည်။ ချွန်ထက်သော လက်သည်းခြေသည်းများကို လွှဲရမ်းလိုက်သည့်အခါ ဧရာမဟင်းလင်းပြင်ဓားလက်များက သွေးသောက်သခင်၏ ရင်ဘတ်ကို လှီးဖြတ်ပြီး သူ့ကို ဆိုးဆိုးရွားရွား သွေးထွက်သွားစေသည်။

ရှီယန်သည် ဆိုးရွားလွန်းသော သွေးရူးသွေးတန်းအခြေအနေသို့ ကျရောက်သွားလုဆဲဆဲဖြစ်သည်။ သူ့ထံမှ ရက်စက်ကြမ်းကြုတ်ပြီး ရိုင်းစိုင်းကြမ်းတမ်းသည့် အော်ရာ ထွက်လာနေသည်။ သူ့ဧရာမပါးစပ်ပေါက်ကို ဟပြီး အကြွင်းမဲ့၏ အသွေးအသားများကို ကိုက်ဖြတ်ဆွဲဖြဲလိုက်သည်။ အကြွင်းမဲ့၏ သွေး နှင့် အသားတုံးများကို အတူတကွ ဝါးမျိူပစ်လိုက်၏။

“မဟုတ်ဘူး… မဖြစ်နိုင်ဘူး။ ငါ့စကြာဝဠာကို မင်း ချည်နှောင်လို့မရဘူး” အကြွင်းမဲ့၏ စကြာဝဠာကို တုန်ခါစေနိုင်သော အသံသည် တုန်တုန်ယင်ယင်ဖြင့် ထွက်လာခဲ့သည်။

“ကျုပ်ဝိဉာဉ် နဲ့ ခန္ဓာကိုယ် တစ်ဝက်ခန့်က ခင်ဗျားထံကနေ လာတာပဲ။ နောက်တစ်ဝက်ကတော့ ခင်ဗျားရဲ့ မကောင်းတဲ့ရူးသွပ်မှုကြောင့် ဖြစ်ပေါ်လာတာ။ အဲ့ဒါကြောင့်ပဲ ခင်ဗျားရဲ့ကမ္ဘာကို ကျုပ် ထိန်းချုပ်နိုင်တာ။ ခင်ဗျားကတော့ ကျုပ်ရဲ့ ဝိဉာဉ်အမျှင်တစ်ခုတောင် မရခဲ့ဖူးဘူး။ ခင်ဗျားမှာ ကျုပ်ကို ထိန်းချုပ်နိုင်ခွင့်မရှိဘူး။ ကျုပ်ကို ခေါ်ခဲ့တာ ခင်ဗျား ကိုယ့်သေတွင်းကိုယ်တူးလိုက်တာပဲ။ ပျက်စီးခြင်းက ခင်ဗျားရဲ့ ကံကြမ္မာပဲ”

ရှီယန်သည် သွေးရူးသွေးတန်း အော်နေရင်း အကြွင်းမဲ့ကို ရိုင်းရိုင်းစိုင်းစိုင်း ကြမ်းကြမ်းတမ်းတမ်းဖြင့် ရိုက်နှက်တိုက်ခိုက်နေသည်။ သူ့ပါးစပ်ကြီးသည် အကြွင်းမဲ့မူလ၏ ရင်ဘတ်ထဲသို့ နစ်ဝင်သွားသည်။ လွှသွားပမာ သွားများက အကြွင်းမဲ့မူလ၏ အသွေးအသားကို ကိုက်ဖြတ်ဝါးမျိူနေ၏။

ခုနှစ်ရာ့နှစ်ဆယ်သော သွေးကြောဆုံမှတ်များကို သန့်စင်မွမ်းမံပြီးနောက်၌ သူ့စွမ်းအားသည် မရပ်မနား ထိုးတက်သွားသည်။

ဝါးမျိူစွမ်းအင်အသိဇစ်မြစ် နှင့် ရက်စက်ယုတ်မာသော နှလုံးသားတို့ဖြင့် ရှီယန်သည် ဝါးမျိူခြင်း၏ အမြင့်ဆုံးအစွမ်းအစကို ထိန်းချုပ်နိုင်သည်။

တိုက်ခိုက်နေရင်း သူသည် ဝါးမျိူစွမ်းအင်အသိဖြင့် အကြွင်းမဲ့၏ သွေး နှင့် အသားစများကို စားသုံးနေခဲ့သည်။ ထို့ကြောင့် သူ ပိုတိုက်ခိုက်လေလေ အင်အားပိုကြီးလာလေလေဖြစ်ခဲ့သည်။ ဆန့်ကျင်ဘက်အနေနှင့် အကြွင်းမဲ့သည် စားသုံးခံရပြီး အဆက်မပြတ် အင်အားချည့်နဲ့လာနေသည်။

သူ့စကြာဝဠာသည် ချည်နှောင်ခံရသည်။ ပိုင်နက်များ ၊ ကုန်းမြေများ ၊ ပင်လယ်များ ၊ တောင်ကုန်းတောင်တန်းများ တစ်ခုချင်းစီသည် ရှီယန်၏ စကြာဝဠာထဲသို့ ဖြည်းဖြည်းချင်း ဆွဲခေါ်ခံနေကြရသည်။

ရှီယန်သည် အကြွင်းမဲ့၏ စကြာဝဠာကို ဝါးမျိူနေရင်း သူ၏ အသွေးအသားများကို စားသုံးနေသဖြင့် သူ၏ အသစ်စက်စက်စကြာဝဠာသည် သာမာန်မျက်စိဖြင့် မြင်နိုင်သော နှုန်းထားနှင့် ကြီးမားကျယ်ပြန့်လာပြီး ကြီးကြီးမားမား တိုးတက်ပြောင်းလဲလာခဲ့သည်။

ရှီယန်၏ အတွေးပြောင်းလဲသွားသည်နှင့် အချို့ကုန်းမြေများနှင့် ပိုင်နက်များသည် ထူးခြားသော နည်းလမ်းတစ်ခုဖြင့် ဝါးမျိူခြင်းတွင်းနက်ကြီးကို ဖြတ်ကျော်သွားပြီးနောက်၌ ချက်ချင်းမပျော်ဝင်မပျက်စီးသွားကြကြောင်းကို သူ သတိထားမိသွားသည်။

ဥပမာအနေဖြင့် ကောင်းကင်ကျောက်တုံးကုန်းမြေ ၊ တိမ်မြူပိုင်နက် ၊ ဆန်းကြယ်ကောင်းကင်ကလန် ၊ စုန်းကလန် နှင့် အရိုးဖြူကလန်တို့၏ ပိုင်နက်များသည် ထိခိုက်နစ်နာမှုမရှိဘဲ တွင်းနက်ကြီးကို ဖြတ်ကျော်သွားကြသည်။ ၎င်းတို့သည် ကြီးမားကျယ်ပြန့်လာနေသော ရှီယန်၏ စကြာဝဠာပေါ်သို့ ထိုးကျသွားကြပြီး စကြာဝဠာအသစ်၏ အစိတ်အပိုင်းတစ်ခု ဖြစ်လာကြသည်။ ထိုပိုင်နက်များ၌ နေထိုင်သော သက်ရှိသတ္တဝါများထဲမှ ဖြစ်စဉ်တစ်ခုလုံးအတွင်း၌ ဒဏ်ရာရသွားပြီး အသတ်ခံရသူ တစ်ယောက်တစ်လေမျှ မရှိပါ။

သို့သော် သူတို့ ဘယ်နေရာရောက်နေကြမှန်း မသိကြသဖြင့် ဇဝေဇဝါ ဖြစ်နေကြသည်။

မည်သို့ပင်ဖြစ်သေ သူ ဂရုမစိုက်သော သို့မဟုတ် သူ့ရန်သူများ နေထိုင်သည့် ကုန်းမြေများ ၊ ပိုင်နက်များ နှင့် သက်ရှိကြယ်များသည် ဝါးမျိူခြင်းတွင်းနက်ကြီးထဲသို့ ထိုးဆင်းဝင်ရောက်သွားကြသည်နှင့် ဘာမှမတတ်နိုင်ပဲ အစိတ်စိတ်အပိုင်းပိုင်း ကွဲအက်ပျက်စီးသွားကြသည်။ ထိုပိုင်နက်များ၌ နေထိုင်ရှင်သန်သူများသည် မျက်တောင်တစ်ခတ်အတွင်း ဖုန်မှုန့်များဖြစ်သွားကြပြီး ရှီယန်၏ အသိပင်လယ်သို့ စုပ်ယူခံကြရသည်။ ဝိဉာဉ်ကန်မှ ဝိဉာဉ်စွမ်းအားကို ရရှိပြီးနောက်၌ ၎င်းတို့သည် စကြဝဠာအသစ်၏ တစ်ထောင့်တစ်နေရာတွင် သက်ရှိသတ္တဝါအသစ် ၊ မျိုးနွယ်စုအသစ်သို့ ပြောင်းလဲသွားကြမည်ဖြစ်သည်။

အချိန်သည် မြန်ဆန်စွာ ကုန်ဆုံးသွားခဲ့သည်။

အချိန်မည်မျှကြာသွားမှန်းမသိ အကြွင်းမဲ့မူလ၏ အလွန်အမင်းကြီးမားသော ခန္ဓာကိုယ်ကြီးသည် မရုန်းကန်တော့ချေ။ ရှီယန်က သူ့သွေးကီအနှစ်သာရအားလုံးကို စုပ်ယူပစ်ပြီး သူ့သွေးကြောများအတွက် သန့်စင်သော သွေးအဖြစ် နှင့် သူ့ခန္ဓာကိုယ်အတွက် ကြီးမားသိပ်သည်းသော စွမ်းအားအဖြစ်သို့ ပြောင်းလဲပစ်လိုက်သည်။

“ခန္ဓာကိုယ်၊ ဝိဉာဉ် ၊ အသွေးအသား နဲ့ ဆံပင်တောင် ပါတယ်…အဲ့ဒါတွေအားလုံးက သက်ရှိအသစ်တွေ ဖန်တီးဖို့ အခြေခံပစ္စည်းတွေဖြစ်လာကြမှာပဲ။ ဟန်ထျန်း ၊ မွန်တီစီ ၊ ဟီရို ၊ အင်ပါယာပင်လယ်ငမန်း နဲ့ ဒါကုလ တို့ကို ပြန်အသက်သွင်းဖို့ သူတို့မှတ်ဉာဏ်တွေကို ဆွဲနှုတ်ထားလိုက်မယ်…..”

ထို့နောက် ရှီယန်သည် အကြွင်းမဲ့၏ ခြောက်သွေ့ညိုးနွမ်းသော ခန္ဓာကိုယ်ကြီးကို ဧရာမတွင်းနက်ကြီးထဲသို့ ပစ်ထည့်လိုက်သည်။

ရှီယန်သည် ဟန်ထျန်း နှင့် ကျဆုံးသွားသော အခြား သူ့မိတ်ဆွေသိုင်းပညာရှင်များ၏ မှတ်ဉာဏ်များကို ဆွဲနှုတ်ထားခဲ့သည်။ သူ့ဝိဉာဉ်စွမ်းအားဖြင့် သူ့စကြာဝဠာအသစ်စက်စက်၌ သူတို့ကို ပြန်အသက်သွင်းလိုက်မည်ဖြစ်သည်။

အကြွင်းမဲ့မူလ၏ စကြာဝဠာကြီး တွင်းနက်ကြီးထဲသို့ အပြီးအစီး ပျောက်ကွယ်သွား၍ သူ့ခန္ဓာကိုယ်လည်း အထဲသို့ ပစ်ထည့်ခံလိုက်ရသည့် အခိုက်အတန့်၌ ရှီယန်သည် သူ့ကိုယ်သူ ပကတိလေဟာပြင်ထဲ ရပ်တန့်နေသည်ကို တွေ့ရှိလိုက်သည်။

ကောင်းကင် ၊ မြေကြီး ၊ နေ ၊ လ ၊ ကြယ် သို့မဟုတ် တောင်ကုန်းတောင်တန်းနှင့် မြစ် တစ်ခုတစ်လေမျှပင် မရှိပါ။ ထာဝရအမှောင်ထု နှင့် အဆုံးအစမဲ့လေဟာပြင်သာ ရှိနေသည်။

“ငါ့စကြာဝဠာ၊ ငါ မွေးဖွားခဲ့တဲ့ စကြာဝဠာက..ဘယ်နေရာမှာများ ရှိမလဲ။ ငါ့ဝိဉာဉ်က ဒီကို ရောက်လာဖို့ နှစ်ပေါင်း သန်းနဲ့ချီအောင် ခရီးနှင်ခဲ့ရတာ။ ဒီနေ့အထိ အဲ့စကြာဝဠာက ဆက်ရှိနေအုံးမလား မရှိတော့ဘူးလား။ အဲ့ဒါက ပျောက်ကွယ်သွားလောက်ပြီလား။ စွမ်းအား ၊ ဝိဉာဉ်တွေ ၊ အတွေးခံစားချက်တွေ ၊ သွေး အရာအားလုံးကို သန့်စင်ပြုပြင်ပြီးမှ ငါ စူးစမ်းရှာဖွေလိုက်ရင် အဲ့ဒါကို ရှာတွေ့နိုင်တာလည်းဖြစ်နိုင်တာပဲ”

“အင်း အဲ့လိုဖြစ်ဖို့ကတော့ အချိန်က စကားပြောသွားမှာပါ….”

ပကတိလေဟာပြင်ထဲ၌ ရှီယန်သည် ဖန်ဆင်းရှင်တစ်ပါးသဖွယ် တင်ပျဉ်ခွေထိုင်လိုက်သည်။

သူ့ခေါင်းထက်၌ စကြာဝဠာအသစ်စက်စက် ရပ်တန့်နေသည်။ သူ့စွမ်းအားကို လှုံ့ဆော်၍ သူ့ကမ္ဘာအသစ်အား ပြီးမြောက်အောင် တည်ဆောက်လိုက်သည်။ သက်ရှိသတ္တဝါ နှင့် မျိုးနွယ်စုအသစ်များကို ဖန်တီးပြီး သူတို့အား အသက် နှင့် ဝိဉာဉ်များ ပေးအပ်လိုက်သည်။ သူသည် သူတို့၏ ဘိုးဘေး၊ အကြွင်းမဲ့၊ ထာဝရရှင်သန်သူပင်မဟုတ်ပါလော…။

ပြီးပါပြီ…။

***