အပိုင်း(၂၀၄၉)

မလုံလောက်ဘူး

ရီဖူရှင်းက လင်းဟယ်ကို ကြည့်လိုက်သည်။ တစ်ဖက်လူက သူ့အား ဤနေရာ၌ သေစေချင်နေသည်ကို ဝန်ခံရာ၌ တွန့်ဆုတ်နေခြင်း မရှိခဲ့ပေ။

ထိုမျှမကသေး။ ထိုလူများက နောက်ပြန်မဆုတ်ဘဲ ၀မ်ရှန့်စောင့်ကြည့်မျှော်စင်မှ ကျင့်ကြံသူများကို ဆန့်ကျင်နေကြသည်။ သူတို့က အမှန်တကယ်ပင် သတ်ဖြတ်လိုစိတ်များနှင့် ရောက်လာခြင်းဖြစ်သည်။

ရှေးဟောင်းတော်ဝင် ယန်မိသားစုနှင့် လင်းရှောင်နန်းတော်တို့က အင်အားစုများကို ပေါင်းစည်းပြီးနောက် အမှန်တကယ်ပင် ရဲတင်းလွန်းစွာ ပြုမူနေခဲ့သည်လား။

ကောင်းကင်ထက်တွင် မျောလွင့်နေသော မျှော်စင်တစ်ခုရှိနေ၏။ မျှော်စင်၏ တောက်ပသော အရိပ်က ကောင်းကင်တစ်ခွင်ကို လွှမ်းခြုံကာ ဖိနှိပ်ထားသည်။ ယင်းသည် လေဟာနယ်အား လေးလံလာသကဲ့သို့ ခံစားမိစေသည်။ မဟာလမ်းစဥ်အလင်းက စီးဆင်းလာပြီး ချက်ချင်းပင် ရီဖူရှင်းထံသို့ တိုးဝင်သွားသည်။

ရီဖူရှင်း၏ စွမ်းအားများက ပြောင်းလဲသွားပြီး သူ၏ အရှေ့တွင် တောက်ပသော နတ်ဓားတစ်စင်း ချက်ချင်း ပေါ်ပေါက်လာသည်။ ထိုနတ်ဓားတွင် ကြောက်မက်ဖွယ်ဓားစွမ်းအားများ ပါဝင်နေကာ စီးဆင်းလာသော အလင်းကို ဆန့်ကျင်နေသည်။ ၎င်းသည် ရီဖူရှင်း၏ ခေါင်းအထက်တွင် ရစ်ဝဲနေ၏။ ဓားစွမ်းအားလှိုင်းများနှင့် မျှော်စင်၏ အလင်းတို့က ထိပ်တိုက်တွေ့ဆုံသွားကြပြီး နားစည်ကိုပင် ထိုးဖောက်နိုင်သော အသံများ ထွက်ပေါ်လာခဲ့သည်။

“တိုက်ခိုက်။” လင်းဟယ်က အမိန့်ပေးလိုက်၏။ သူ၏ အကြည့်များတွင် ပြင်းထန်သော သတ်ဖြတ်လိုစိတ်များနှင့် ပြည့်နှက်နေသည်။ သူက ချက်ချင်းပင် သူ၏ လက်အောက်ငယ်သားများကို ရှီဖူရှင်းအား သတ်ရန် အမိန့်ပေးလိုက်သည်။

သူအမိန့်ပေးလိုက်သည်နှင့် လင်းရှောင်နန်းတော်မှ အဆင့်ရှစ်ရန်ဟောင်တစ်ယောက်က တိုက်ခိုက်လာသည်။ အဆင့်ရှစ်ကျင့်ကြံသူက ရှေ့သို့ ခြေလှမ်းလိုက်၏။ သူ၏ လက်ထဲတွင် ရှည်လျားသော ရွှေရောင်လှံတစ်လက် ပေါ်ပေါက်လာပြီး တောက်ပသော အလင်းတို့ကို ထုတ်လွှတ်နေကာ ကောင်းကင်သို့ တိုက်ရိုက်ထိုးဖောက်သွားသည်။

ဘုန်း……

ကြောက်မက်ဖွယ် လင်းရှီလှံက အံ့သြထိတ်လန့်ဖွယ်ပင် ဖြစ်သည်။ လှံက အလွန်လျင်မြန်ပြီး လေဟာနယ်ကို ထိုးဖောက်သွားသည်။ ရီဖူရှင်း တုံ့ပြန်သည့် အရှိန်ကလည်း အလွန် လျင်မြန်ကာ ချက်ချင်းပင် လှုပ်ရှားလိုက်၏။ လှံက သူ၏ ပုံရိပ်ကို ဖြတ်သန်း ကျော်ဖြတ်သွား၏။

ရီဖူရှင်းက နောက်တစ်ခါ မလှုပ်ရှားနိုင်ခင် အခြားသော လှံက ကျဆင်းလာသည်။ လင်းရှီလှံက မဟာလမ်းစဥ်နှင့် ပေါင်းစပ်နိုင်သည့်အတွက် ၎င်းက သူ၏ အရိပ်များနောက်မှပင် ထပ်ကြပ်မကွာ လိုက်ပါလာနိုင်သည်ဟု ထင်မှတ်ရပေသည်။ မဟာလမ်းစဥ်၏ စွမ်းအားများက ထိုးဖောက်ဝင်ရောက်သွား၏။ ရီဖူရှင်း၏ လက်ထဲ၌ တူညီသော လှံရှည်တစ်လက် ပေါ်ပေါက်လာခဲ့၏။ ကြောက်မက်ဖွယ် တိုက်ပွဲဆန္ဒက ၎င်းကို ရစ်ပတ်နေသည်။ မည်သည့် တွေဝေမှုမှ မရှိဘဲ သူက လှံကို ရှေ့သို့ ဆန့်ထုတ်လိုက်သည်။ သူက ပြိုင်ဘက်၏ လှံနည်းစနစ်ကို ရှောင်တိမ်းရန် မကြိုးစားတော့ဘဲ ကိုယ်ပိုင်တိုက်ခိုက်မှုဖြင့် ပြန်လည် တုံ့ပြန်လိုက်သည်။

လှံရှည်နှစ်လက် ထိပ်တိုက်တွေ့ဆုံသွားကြသည်။ ရီဖူရှင်း၏ ပုံရိပ်က ချက်ချင်းပင် လွင့်စင်သွားခဲ့၏။ သူက ချို့ယွင်းချက်ကင်း မဟာလမ်းစဥ်ကို ပိုင်ဆိုင်ထားသော်လည်း အဆင့်လေးရန်ဟောင် တစ်ပါးသာ ဖြစ်လေသည်။ သို့သော် သူက လင်းရှောင်နန်းတော်မှ လင်းရှီလှံနည်းစနစ်ကို ကျွမ်းကျင်သည့် အဆင့်ရှစ် ရန်ဟောင်တစ်ပါးကို ရင်ဆိုင်နေရခြင်း ဖြစ်သည်။

လှံနည်းစနစ်များက သူအား အခွင့်မသာမှုကို ဖြစ်စေခဲ့သည်။

အဆင့်ရှစ်တန်ခိုးရှင်က ဆက်လက်၍ မတိုက်ခိုက်တော့ဘဲ ရီဖူရှင်းအား လေးနက်သော အမှုအရာနှင့် ကြည့်လိုက်၏။ ထိုသူက လှံနည်းစနစ်မှာလည်း ကျွမ်းကျင်ပိုင်နိုင်နေသည်လား။

ကြောက်မက်ဖွယ် တိုက်ပွဲစွမ်းရည်က ရီဖူရှင်းလက်ထဲရှိ လှံရှည်မှ ပေါက်ကွဲထွက်လာသည်။ ထိုတိုက်ပွဲ စွမ်းရည်က ရစ်ပတ်နေပြီး သူ၏ ခန္ဓာကိုယ်ကို ရစ်ပတ်လွှမ်းခြုံသွား၏။ ၎င်းသည် ရီဖူရှင်း၏ တိုက်ပွဲဆန္ဒကို ချက်ချင်းပေါက်ကွဲထွက်ပေါ်လာစေသည်။ သူ၏ စွမ်းအင်က အလွန်အစွမ်းထက်လှသည်။ ယင်းမှာ သူပိုင်ဆိုင်ထားသည့် နတ်ဘုရားလှံတစ်လက်ဟုသည်ပင် ထင်မှတ်ရ၏။

မဟာလမ်းစဥ်စွမ်းအားများက အဆင့်ရှစ်တန်ခိုးရှင်၏ ခန္ဓာကိုယ်ကို ဝန်းရံထားသည်။ သူက ထိုနေရာတွင် ရပ်နေပြီး သူ၏ လှံနှင့် တသားတည်းဖြစ်လာသလို ထင်မှတ်ရသည်။ သူက သိမ်မွေ့နက်နဲသော ခံစားချက်ကို ပေးစွမ်း၍ အလွန်ထူးကဲလှသည့် အရှိန်အဝါလည်း ရှိသည်။ ရီဖူရှင်းက တစ်ဖက်လူကို စိုက်ကြည့်လိုက်ပြီး နတ်သစ်ပင်တစ်ပင်က သူ၏ ခန္ဓာကိုယ်တွင် ထွက်ပေါ်လာခဲ့သည်။ မဟာလမ်းစဥ် စွမ်းအင်လှိုင်းများက အဘက်ဘက်သို့ ပျံနှံ့ထိုးထွက်လာ၏။ ကျယ်ပြောသော လေဟာနယ်အတွင်း ၎င်းစွမ်းအင်လှိုင်းများဖြင့် လွှမ်းခြုံခံထားရသည်။

တစ်ချိန်တည်းတွင် ရီဖူရှင်း၏ ခန္ဓာကိုယ်မှ ပြင်းထန်သော အသက်စွမ်းအားတို့ ဖြန့်ကျက် ထိုးထွက်လာခဲ့သည်။ ၎င်းသည် သူ၏ ခွန်အားနှင့် စိတ်စွမ်းအားတို့ကို အဆုံးစွန်ဆုံး ကန့်သတ်ချက်ထိတိုင် ရောက်ရှိစေ၏။ သူ၏ တိုက်ပွဲဆန္ဒက သူ့ခန္ဓာကိုယ်မှ ပေါက်ကွဲထွက်လာသည်။ ထို့ပြင် အလွန် ကြောက်မက်ဖွယ်ကောင်းသည့် မဟာလမ်းစဥ်နယ်မြေတစ်ခုက သူ၏ နောက်တွင် ပေါ်ပေါက်လာသည်။ သူ့ကို ကြယ်များက ဝန်းရံထားပြီး မရေတွက်နိုင်သော ကျောက်စာချပ်များလည်း ပေါ်ပေါက်လာသည်။ ကျောက်စာချပ် တစ်ခုချင်းစီတွင် သင်္ကေတအက္ခရာများကို ရေးထွင်းထားသည်။ မဟာလမ်းစဥ် နတ်အလင်းက တောက်ပနေပြီး မဟာလမ်းစဥ် ဗုဒ္ဓတေးသံကိုလည်း ခပ်တိုးတိုးကြားနိုင်ပေသည်။ ၎င်းမှာ မိစ္ဆာနှိမ်နင်း ဗုဒ္ဓတေးသံပင် ဖြစ်လေသည်။

နောက်တခဏတွင် မဟာလမ်းစဥ်စွမ်းအင်လှိုင်းများက ရီဖူရှင်းခေါင်းထက်၌ ပေါ်ပေါက်လာခဲ့သည်။ ၎င်းတို့က ပတ်ဝန်းကျင်ရှိ စွမ်းအားများကို စုပ်ယူဝါးမြိုနေ၏။ မဟာလမ်းစဥ် ယင်ယန်၀င်္ကပါက ဖွဲ့စည်းလာခဲ့၏။ ထိုယင်ယန်၀င်္ကပါမှာ နတ်သစ်ပင်နှင့်ချိတ်ဆက်ထားပြီး ၎င်းအတွင်းတွင် အပြီးတိုင် ပျော်ဝင်ပေါင်းစပ်နေပုံရလေသည်။ ယင်ယန်၀င်္ကပါ၏ တစ်ဝက်က လောင်ကျွမ်းနေသော နေကဲ့သို့ ပူပြင်းနေပြီး တခြားတစ်ဖက်တွင် လကဲ့သို့ အေးစက်နေသည်။ ယင်စွမ်းအားများက ၎င်းမှ ဖြာကျနေခဲ့သည်။ ကပ်ဘေး ဓားအလင်းများကလည်း အထက်တွင် ထွက်ပေါ်လာသည်။ လေဟာနယ်က အလွန်ပင် ကြောက်ရွံ့ထိတ်လန့်ဖွယ် ဖြစ်လာ၏။ ၎င်းသည် အဆင့်ရှစ်တန်ခိုးရှင်ကိုပင် ဖိအားခံစားရစေသည်။

ယခုတွင် ရီဖူရှင်းက သူ့ထက် အလွန်အစွမ်းထက်နေသလို ထင်မှတ်ရသည်။

ထိုရန်ဟောင် ပုံရိပ်မှာ ပို၍ပင် အစွမ်းထက် အရှိန်အဝါတို့ကို ထုတ်လွှတ်နေသည်။ သူက ထိုနေရာတွင် ရပ်ရုံမျှသာ ရပ်နေသော်လည်း ကြောက်မက်ဖွယ်မဟာလမ်းစဥ် စွမ်းအင်လှိုင်းများက အဘက်ဘက်သို့ ဖြန့်ကျက်လာ၏။ မရေတွက်နိုင်သောအရိပ်များက သူ၏ ပုံရိပ်မှ ခွဲထွက်လာခဲ့ပြီး အရိပ်တစ်ခုချင်းစီတွင် ကြောက်မက်ဖွယ် အရှိန်အဝါများ ပါဝင်နေသည်။ ယင်းတို့က ရီဖူရှင်းထံသို့ တည့်မတ်စွာ တိုးဝင်သွားသည်။ တခဏအတွင်း လှံစွမ်းအားများက ထိတ်လန့် ကြောက်ရွံဖွယ် ဖြစ်ပေါ်လာကြသည်။

မရေတွက်နိုင်သော အရိပ်များက တိုးဝင်လာသည်။ မတူညီသော နေရာများ အရပ်မျက်နှာများတွင် ထွက်ပေါ်လာကြသည်။ ယင်းတို့က နေရာအနှံ့တွင် ပေါ်ပေါက်နေသည်။ နောက်တခဏတွင် အဆင့်ရှစ်ရန်ဟောင်က လှုပ်ရှားလိုက်၏။ သူက မူလနေရာမှာ ပျောက်ကွယ်သွားခဲ့သည်။ ရီဖူရှင်းသည် သူမည်သည့်နေရာသို့ ပျောက်ကွယ်သွားသည်ကို မြင်နိုင်ခြင်းမရှိခဲ့ပေ။

ဘုန်း……

ကောင်းကင်ထက်တွင် ယင်ယန်၀င်္ကမှ ကြောက်မက်ဖွယ်ကပ်ဘေးအလင်းများကို ထုတ်လွှတ်နေသည်။ ယင်းတို့က လေဟာနယ်တစ်ခွင်ကို ဖြန့်ကျက်သွား၏။ တစ်ချိန်တည်းတွင် ရီဖူရှင်းက သူ၏ လှံကို ဆန့်ထုတ်လိုက်သည်။ လှံမှ ထိတ်လန့်ဖွယ် စွမ်းအားတို့ ပေါက်ကွဲထွက်လာပြီးလေဟာနယ်ကို ထိုးဖောက်သွားသလို ထင်မှတ်ရပေသည်။

ဘန်း…

ကျယ်လောင်သော အသံကြီးနှင့်အတူ ရီဖူရှင်း၏ အရှေ့မှာ အရိပ်တစ်ခု ပေါ်ပေါက်လာသည်။ လှံရှည်နှစ်ချောင်းက အချင်းချင်း ထိပ်တိုက်ရင်ဆိုင်မိကြသည်။ သူက ထိုအဖြစ်အား အနည်းငယ် မမျှော်လင့်ထားသည့်အတွက် ထူးဆန်းသော အကြည့်တစ်ခုဖြစ်ပေါ်လာသည်။ ရီဖူရှင်းက ကျရှုံးခြင်းမရှိဘဲ သူ၏ နေရာကို အတိအကျ ဖော်ထုတ်နိုင်ခဲ့၏။ ထိုမျှမကဘဲ ရန်ဟောင်သည် မဟာလမ်းစဥ်နယ်မြေအတွင်း၌ သူ၏ လမ်းစဥ်က ကန့်သတ်ခြင်း ခံထားရကြောင်း ခံစားမိလိုက်သည်။ အေးစက်သည့် စွမ်းအားများက သူ၏ လှုပ်ရှားမှုများကို နှေးကွေးစေသည်။

ထို အဆင့်ရှစ်ရန်ဟောင်၏ အရိပ်က အစအနမကျန်အောင် ပျောက်ကွယ်သွားလေသည်။ နောက်တခဏတွင် နောက်ထပ် အရိပ်တစ်ခုက ချက်ချင်း ထွက်ပေါ်လာပြီး နောက်ထပ် ကြောက်မက်ဖွယ် လှံက ရီဖူရှင်းအား သတ်ဖြတ်ရန် ထိုးဖောက်လိုက်သည်။ ၎င်း၏ အရှိန်က အလွန်လျင်မြန်လာပြီး ရီဖူရှင်းအား ပြန်တုံ့ပြန်၍ မရနိုင်အောင် ဖြစ်စေသည်။

သို့သော်လည်း ကျောက်စာချပ်များက သူ့အား သတ်ဖြတ်ရန် တိုက်ရိုက် ပျံသန်းလာသည်။ ကျယ်လောင်သည့် အသံကြီး ထွက်ပေါ်လာပြီး ထိုကျောက်စာချပ်များက အပြင်းအထန် ပေါက်ကွဲထွက်သွားကာ ဖုန်မှုန့်များအဖြစ်သို့ ပြောင်းလဲသွား၏။ သတ်ဖြတ်ခြင်းအလင်းက ချက်ချင်းပင် လေဟာနယ်ကို ထိုးဖောက်လာသည်။ ရီဖူရှင်း၏ လှံက နောက်တစ်ခါ ပြန်ပေါ်လာခဲ့ပြီး ထိုရန်ဟောင်၏ လှံထိပ်ဖျားဆီသို့ တည့်မတ်စွာ ဆင်းသက်လာခဲ့သည်။ ရီဖူရှင်းက သူ၏ လှုပ်ရှားမှုတိုင်းကို ဖတ်နိုင်သကဲ့သို့ ထင်မှတ်ရပေသည်။ သို့သော်လည်း အစွမ်းထက် တိုက်ခိုက်မှုက ရီဖူရှင်း၏ ခန္ဓာကိုယ်အနီးဝန်းကျင်မှ မဟာလမ်းစဥ်များကို အက်ကွဲတုန်ခါသွားစေသည်။ သူ၏ ပုံရိပ်က နောက်သို့ လွင့်စင်သွားခဲ့ပြန်သည်။

နောက်တခဏတွင် မရေတွက်နိုင်သော လှံများက မတူညီသော နေရာများမှ အဆက်မပြတ် ပေါ်ပေါက်လာသည်။ လှံတစ်ချောင်းချင်းစီသည် နတ်ဘုရား၏ စွမ်းအားများမှ ဖွဲ့စည်းထားသကဲ့သို့ ထင်မှတ်ရသည်။ သို့သော်လည်း ထိုလှံတစ်ချောင်းချင်းစီကို ရီဖူရှင်းက အမှန်တကယ် တားဆီးပိတ်ဆို့ထားနိုင်သည်။ ရီဖူရှင်းနောက်ဆုတ်သွားရသည့် အချိန်တိုင်းတွင် ထိုရန်ဟောင်က နောက်ထပ် လှံတစ်ချောင်းအား ရီဖူရှင်း ထပ်မံ ခံနိုင်ရည် ရှိလိမ့်မည်မဟုတ်ဟု ခံစားမိသည်။ သို့သော်လည်း သူတွေ့ရှိခဲ့ရသည်မှာ ရီဖူရှင်းက နောက်ထပ် လှံကို အမြဲတစေ တားဆီးနိုင်ပေသည်။

ပို၍ ကြောက်မက်ဖွယ်ကောင်းသည်မှာ ထိုနေရာက တဖြည်းဖြည်းနှင့် မဟာလမ်းစဥ် ကန့်သတ်နယ်မြေတစ်ခု ဖြစ်လာခြင်းပင် ဖြစ်သည်။ အေးစိမ့်သည့် စွမ်းအားများက ပို၍ ပြင်းထန်လာပြီး သူ့ခန္ဓာကိုယ်ကို ကျူးကျော်ဝင်ရောက်ကာ သူ့အရှိန်ကို သက်ရောက်စေခဲ့သည်။ ကောင်းကင်မှ ဆင်းသက်လာသည့် ကပ်ဘေး အလင်းများကလည်း သူ့အရိပ်များကို ဖျက်ဆီးပစ်နေသည်။

ရီဖူရှင်းက မရှုံးနိမ့်ရုံမျှမက ထိုရန်ဟောင်၏ လှုပ်ရှားမှုများကို တဖြည်းဖြည်းကန့်သတ်လာနိုင်သည်။

“တစ်ခုခုမှားနေပြီ။” အခြားလူများက စတင်၍ သတိပြုမိလိုက်သည်။ မဟာလမ်းစဥ်စွမ်းအင်လှိုင်းများက သူတို့၏ အနားတွင် ပေါ်ပေါက်လာသည်။ စွမ်းအင်လှိုင်းများက နေရာအနှံ့တွင် ရှိနေ၏။ ကျယ်ပြောသော လေဟာနယ်က ရီဖူရှင်း၏ မဟာလမ်းစဥ်စွမ်းအင်လှိုင်းများနှင့် လွှမ်းခြုံခံထားရသည်။ ယင်းသည် သူ၏ ကိုယ်ပိုင်မဟာလမ်းစဥ်နယ်မြေတစ်ခု အဖြစ်သို့ ပြောင်းလဲ ဖြစ်ပေါ်လာပေသည်။

“ဆက်ပြီး အချိန်မဆွဲနဲ့တော့။ သူ့ကိုသတ်လိုက်။” ယန်တုန်းရန်က အေးစက်သော အကြည့်တို့နှင့် အမိန့်ပေးလိုက်သည်။ ဤတစ်ကြိမ်၌ သူတို့၏ အင်အားက အလွန်သန်မာ အားကောင်းလှသည်။ အဆင့်ရှစ်ရန်ဟောင်များပင် ရှစ်ယောက်ရှိသည်။ ယန်တုန်းရန်နှင့် လင်းဟယ်တို့က သူတို့၏ အဖွဲ့ကြားတွင် အားအနည်းဆုံး ကျင့်ကြံသူဟု ဆိုနိုင်သည်။ ထိုသို့သော အင်အားစုများကို ဆန့်ကျင်ရန်မှာ ရီဖူရှင်းအတွက် ကျိန်းသေခက်ခဲပေလိမ့်မည်။ သူက မည်မျှ ပါရမီ ရှိသည်ဖြစ်စေ ကျိန်းသေ သတ်ဖြတ်ခြင်း ခံရမည်သာ ဖြစ်၏။

“အင်း” အခြားလူများက ခေါင်းညိတ်ကာ ပြန်ဖြေလိုက်ကြသည်။ သူတို့က ရှေ့သို့ တက်ပြီး ချက်ချင်းပင် အံ့သြထိတ်လန့်ဖွယ်ကောင်းလှသည့် မဟာလမ်းစဥ်အရှိန်အဝါတို့ကို ထုတ်လွှတ်ကာ မတူညီသော နေရာများမှ ရီဖူရှင်းထံသို့ ပြေးဝင်သွားကြသည်။

တစ်ချိန်တည်းတွင် ကောင်းကင်ထက်၌ ယင်ယန်၀င်္ကပါက ဖွဲ့စည်းလာပြီး သူတို့အနီးရှိ မဟာလမ်းစဥ်စွမ်းအားများကို စုပ်ယူဝါးမြိုနေသည်။ ကပ်ဘေးအလင်းက ဓားသဏ္ဌာန်များဖြင့် ဆင်းသက်လာ၏။ ၎င်းတို့ သက်ဆင်းလာရာ နေရာအနှံ့တွင် အရာအားလုံးကို ဖျက်ဆီးပစ်လိုက်သည်။

ယန်တုန်းရန်နှင့် လင်းဟယ်သည်လည်း တူညီသော တိုက်ခိုက်မှုကို ခံစားလိုက်ရ၏။

သူတို့က မျက်မှောင်ကြုတ်ကာ ရီဖူရှင်းအား စူးစိုက်ကြည့်လိုက်ကြသည်။ ရီဖူရှင်းက သူ၏ လက်ထဲတွင် လှံရှည်တစ်လက်ကို ကိုင်ဆွဲထားပြီး သူတို့အား တစ်ယောက်တည်း ဆန့်ကျင်နေခဲ့သည်။ သူက သူတို့ထံ တစ်ချက်ဝေ့ဝဲကြည့်ကာ ပြောလိုက်၏။ “ဒီလူတွေနဲ့ မလုံလောက်သေးဘူး။”

***


Comment

Leave a Reply


Options

not work with dark mode
Reset