ပျက်စီးခြင်း’က စကားမပြောသော်လည်း လှည့်ထွက်ကာ တိုက်ပွဲစင်မြင့်သို့ ဦးတည်လိုက်သည်။ လူတိုင်းက သူ မည်သူ့ကို စိန်ခေါ်လိုသည်ကို သိကြပေသည်။
တုန်းဟွာနယ်မြေတစ်ခုလုံးတွင် အဆင့်မြင့်ရန်ဟောင်များကြား လေးယောက်သာလျှင် ပြီးပြည့်စုံသော မဟာလမ်းစဉ်ကို ပိုင်ဆိုင်ထားသည်။ ‘ပျက်စီးခြင်း’က သူတို့ထဲမှ တစ်ယောက်ဖြစ်ကာ အခြားသုံးယောက်အပြင် မည်သူက သူ့အတွက် စိန်ခေါ်ရန် ထိုက်တန်နိုင်သနည်း။
သို့သော် ကျန်းယွဲ့လီက အဆင့်ရှစ်ရန်ဟောင်အမျိုးသမီးတစ်ယောက် ဖြစ်ကာ ကျုံးချန်က မကြာသေးခင်ကမှ ကျော်ကြားလာခြင်း ဖြစ်သည်။ ‘ပျက်စီးခြင်း’၏ အကျင့်အရ စိန်ခေါ်မှုအသေးအဖွဲကို လုပ်ဆောင်လိမ့်မည်မဟုတ်ပေ။ ထို့ကြောင့် တုန်းဟွာနယ်မြေအတွင်း နံပါတ်တစ်ပါရမီရှင်ဟု ကျော်ကြားသော နင်ဟွာတစ်ယောက်သာ သူ စိန်ခေါ်ရန် အရည်အချင်း ပြည့်မီပေသည်။
‘ပျက်စီးခြင်း’က အကျော်ကြားဆုံး ပုဂ္ဂိုလ်လေးယောက်ထဲမှ ထိပ်ဆုံးတွင် ရှိနေသည့် နင်ဟွာကိုသာ စိန်ခေါ်ပေလိမ့်မည်။ ယခင်က သူသည် တုန်းဟွာကျောင်းတော်သို့ လာရောက်ကာ စိန်ခေါ်ရန် ပြောကြားခဲ့သည်။
“အထူးချွန်ဆုံး ပုဂ္ဂိုလ်နှစ်ယောက်ရဲ့ ပထမဆုံတိုက်ပွဲကို တွေ့ကြုံရလိမ့်မယ်လို့ ကျုပ် မထင်ထားမိဘူး။”နန်ဟွာကလန်ခေါင်းဆောင်က အပြုံးနှင့် ပြောလိုက်သည်။ ထိုခေါင်းဆောင်ပုဂ္ဂိုလ်များပင် အတော်လေး စိတ်ဝင်စားနေကြပုံရသည်။ ‘ပျက်စီးခြင်း’ နှင့် နင်ဟွာနှစ်ယောက်လုံးက အနာဂတ် ခေါင်းဆောင်ဖြစ်လာမည့်သူများ ဖြစ်ရာ သူတို့လိုခေါင်းဆောင်များနှင့် တစ်တန်းတည်းဖြစ်လာမည်မှာ အနှေးနှင့် အမြန်ပင် ဖြစ်သည်။ ထို့ကြောင့် ထိုတိုက်ခိုက်မှုက သူတို့ လျစ်လျူရှုရန် တတ်နိုင်သည့် တစ်စုံတစ်ခု မဟုတ်ပေ။
အနာဂတ်တွင် ထိုလူနှစ်ယောက်က ဤနေရာတွင် ထိုင်နေသော သူများအားလုံးထက် ပို၍ သန်မာအားကောင်းလာလိမ့်မည် ဖြစ်သည်။ ဤသည်မှာ လုံးဝ အံ့အားသင့်စရာမရှိပေ။ မျိုးဆက်ဟောင်းများ လူအိုကြီးများကကျော်တက်ခံရန် စောင့်ဆိုင်းနေခြင်း ဖြစ်ပေသည်။
“ဒီတိုက်ပွဲအတွက် အချိန်နည်းနည်း ထပ်ယူရလိမ့်ဦးမယ်လို့ ထင်ထားတာ။ ပျက်စီးခြင်းနတ်နန်းတော်ရဲ့ ဆက်ခံသူက ဒီလောက် တိုက်ရိုက်ဆန်လိမ့်မယ်လို့ ထင်မထားမိဘူး။ ကြည့်ရတာ တုန်းဟွာနယ်မြေမှာ အတောက်ပဆုံး တည်ရှိမှုဖြစ်ဖို့အတွက် သူ့ကိုယ်သူ သက်သေပြဖို့ မစောင့်နိုင်တော့ဘူး ထင်တယ်။” လင်းရှောင်နန်းတော်သခင်က ပြုံးကာ ပြောလိုက်သည်။ “နင်ဟွာကို အနိုင်ယူဖို့ဆိုတာ လွယ်တာတော့ မဟုတ်ဘူး။ ကျုပ် အထင်အရ ‘ပျက်စီးခြင်း’က ရှုံးလိမ့်မယ်။”
နယ်မြေသခင်က စကားမပြောခဲ့ပေ။ သည်တစ်ကြိမ်၌ စိန်ခေါ်ခံရသူက တုန်းဟွာနယ်မြေတစ်ခုလုံးတွင် အထူးချွန်ဆုံးသော သူ့သား နင်ဟွာဖြစ်သည်။ သို့သော် သူ့သားက မည်မျှ ထူးချွန်နေပါစေ ဤအခြေအနေ၌ သူ့သားအား ချီးမွမ်းရန်မှာ မသင့်လျော်ပေ။
“စိတ်ဝင်စားစရာပဲ။ ခင်ဗျားတို့ရော ဘယ်သူနိုင်မယ်လို့ ထင်လဲ။” မိုးကြိုးပြစ်ဒဏ်ကောင်းကင်အရှင်က အပြုံးနှင့် မေးလိုက်သည်။
“နင်ဟွာ” မြူနှင်းဝေနတ်နန်းတော်မှ ဓားနတ်မိမယ်က ပြောလိုက်သည်။
“နင်ဟွာ” တုန်းဟွာကျောင်းတော် ကျောင်းအုပ်က ပြောလိုက်သည်။ “တုန်းဟွာကျောင်းတော်မှာ အရင်တုန်းက ‘ပျက်စီးခြင်း’ တိုက်ခိုက်ခဲ့ဖူးပေမယ့် လူတိုင်းကို အနိုင်ယူနိုင်တဲ့ စွမ်းအားမရှိဘူး။ သူက အစွမ်းထက်ပေမယ့် ပြိုင်ဘက်ကင်းတော့ မဟုတ်ဘူး။”
လူတိုင်းက သူ့ထက် နင်ဟွာ၏ ခွန်အားက ပို၍ ကောင်းမွန်မည်ဟု သဘောပေါက်ထားကြသည်။ နင်ဟွာက တုန်းဟွာကျောင်းတော်တွင် ကျင့်ကြံနေခဲ့ခြင်း ဖြစ်သည်။
‘ပျက်စီးခြင်း’ သည် တုန်းဟွာကျောင်းတော်မှ အဆင့်ကိုးရန်ဟောင် ရွှမ်ဝူဓားအင်ပါယာနှင့် တစ်ခါတိုက်ခိုက်ဖူးခဲ့သည်။ သူက ရွှမ်ဝူဓားအင်ပါယာကို ရှုံးနိမ့်ခဲ့သည့်အတွက် ပြိုင်ဘက်ကင်းတစ်ယောက် မဟုတ်ကြောင်း သက်သေပြနေသည်။
သို့သော် နင်ဟွာသာ ရွှမ်ဝူဓားအင်ပါယာနှင့် တိုက်ခိုက်လျှင် ရွှမ်ဝူကိုယ်တိုင်ပင် နင်ဟွာကို အနိုင်ယူမည်လား မသေချာပေ။
ပြိုင်ဘက်ကင်း ပါရမီရှင်တစ်ယောက်သည် အခြားသူများကို ပြိုင်ဘက်ကင်းဟု ခံစားလာရအောင် အမှန်တကယ် လုပ်ဆောင်နိုင်ပေသည်။ နင်ဟွာက တိုက်ခိုက်သည့်အခါ သူသည် သူ့ပြိုင်ဘက်က မည်မျှ သန်မာအားကောင်းနေပါစေ ပြဿနာမရှိဟု လူတိုင်းကို တူညီသော ခံစားချက်အား ခံစားရစေသည်။ သူတို့အားလုံးက သူ့ရှေ့၌ တူညီသော ခံစားချက်ကို ရရှိကြပေသည်။
တိတိကျကျဆိုရလျှင် ထို့ကြောင့်ပင် သူက တုန်းဟွာနယ်မြေ၏ နံပါတ်တစ်ပါရမီရှင်ဟု အမည်ကျော်ခြင်း ဖြစ်ပေသည်။
သူ၏ မဟာလမ်းစဉ်ချိပ်ပိတ်လမ်းစဉ်က သူနှင့် ရင်ဆိုင်လာသမျှ ပြိုင်ဘကခတိုင်းကို လွှမ်းမိုးနိုင်စွမ်း ရှိပေသည်။
“နင်ဟွာ” အင်ပါယာယန်ကလည်း ပြောလိုက်သည်။ တုန်းဟွာနန်းတော်ရှိ လူတိုင်း၏ အမြင်က အတူတူပင် ဖြစ်ပုံရသည်။ သူတို့အားလုံးသည် ‘ပျက်စီးခြင်း’က ထူးချွန်ပြီး အကျော်ကြားဆုံးလေးယောက်ထဲမှ တစ်ယောက် ဖြစ်လျှင်ပင် သူက နံပါတ်တစ်ပါရမီရှင်ကို လှုပ်ခါနိုင်စွမ်း မရှိနိုင်သေးပေ။
လူအများက သူတို့အား အကျော်ဇေယျလေးဦးဟု ခေါ်ကြသော်လည်း နင်ဟွာက သူ့အဆင့်နှင့်သူ ရှိနေစဉ် အခြားလူသုံးယောက်က အဆင့်တူတွင် ရှိနေသည်။
“တိုက်ပွဲပြီးမှပဲ သေချာသိရမှာပေါ့။” ထိုအခိုက်တွင် လူတိုင်းသည် အေးစက်သော အသံတစ်ခုကို ကြားလိုက်ကြရသည်။ အားလုံးသော ကျင့်ကြံသူများက လှည့်ကာ ပျက်စီးခြင်းနတ်ဘုရားဟု လူသိများသည့် ပျက်စီးခြင်းနတ်နန်းတော်၏ နန်းတော်သခင်ကို ကြည့်လိုက်ကြသည်။
လူတိုင်းသည် သူ၏ ဆက်ခံသူ ‘ပျက်စီးခြင်း’ က ရှုံးနိမ့်လိမ့်မည်ဟု တွေးနေကြသည်။
လူတိုင်းသည် ပျက်စီးခြင်းနတ်ဘုရားကို ကြည့်ကာ ပြုံးလိုက်ပြီး မည်သူကမှသူ့ကို မတုံ့ပြန်ကြပေ။ သူတို့က တိုက်ပွဲစင်မြင့်ထက်ကိုသာ ဆက်၍ ကြည့်နေခဲ့သည်။
အောက်ဘက်ရှိ ရီဖူရှင်းနှင့် အခြားလူများက ထိုတိုက်ပွဲအကြောင်း သိချင်နေကြသည်။ ဥပမာအနေနှင့် ကျန်းယွဲ့လီနှင့် ကျုံးချန်သည် ထိုတိုက်ပွဲကို အလွန် အာရုံစိုက်ထားကြပေသည်။ သူတို့နှစ်ယောက်သည်လည်း ထိုလေးယောက်တွင် စာရင်းဝင်ကာ တုန်းဟွာနယ်မြေ၏ ထိပ်ဆုံးတွင် ရပ်တည်နေပြီး ဖြစ်သည်။
“ဘယ်သူနိုင်မယ်လို့ထင်လဲ။” လီချန်ရှန်းက ရီဖူရှင်းကို ကြည့်ကာ အသံတိုးတိုးနှင့် မေးလိုက်သည်။
“နင်ဟွာရဲ့ ခွန်အားကို ကျွန်တော် ကောင်းကောင်းမသိဘူး။” ရီဖူရှင်းက တုန့်ပြန်လိုက်သည်။ “တုန်းဟွာကျောင်းတော်မှာ ‘ပျက်စီးခြင်း’ရဲ့ အပြုအမူက အရမ်း လွှမ်းမိုးနိုင်စွမ်းရှိတယ်။ ပျက်စီးခြင်းဝင်ရိုးမှာ ကြောက်စရာကောင်းတဲ့ အင်အားကို ပိုင်ဆိုင်ထားတယ်။ အဲဒါက သူနဲ့ အဆင့်တူတဲ့ လူတွေ သူ့ကို အနိုင်ယူဖို့ခက်ခဲစေတယ်။ ဒါပေမယ့် သူ့ပြိုင်ဘက်က တုန်းဟွာနယ်မြေရဲ့ နံပါတ်တစ်ပါရမီရှင်ဆိုရင်တော့ ဘယ်သူနိုင်မလဲဆိုတာ ကျွန်တော် မပြောတတ်တော့ဘူး။”
“နင်ဟွာ နိုင်လိမ့်မယ်။” လီချန်ရှန်းက ပြောလိုက်သည်။ သူက ရယ်မောရင်း ပြောနေသော်လည်း သူ့လေသံက သေချာပေသည်။ တိုက်ပွဲ၏ ရလဒ်ကို သူက အသေအချာ သိနေသလိုပင် ဖြစ်လေသည်။
“အရမ်းသေချာတာလား။” ရီဖူရှင်းက မေးလိုက်သည်။
“စောင့်ကြည့်လိုက်။ ဘာမှလွဲစရာရှိမှာ မဟုတ်ဘူး။” လီချန်ရှန်းက တိုက်ပွဲလမ်းစဉ်စင်မြင့်ကို ကြည့်ကာ အပြုံးနှင့် ပြောလိုက်သည်။ တစ်ချိန်တည်းမှာပင် နင်ဟွာက တိုက်ပွဲစင်မြင့်ထက် တက်သွားခဲ့၏။
‘ပျက်စီးခြင်း’၏ ခန္ဓာကိုယ်မှ ကြောက်မက်ဖွယ် မဟာလမ်းစဉ် အရှိန်အဝါ ထွက်ပေါ်လာပြီး ကောင်းကင်တွင် ဖြန့်ကျက်လာသည်။ တိုက်ပွဲစင်မြင့်အတွင်း လေဟာနယ်တွင် ပျက်စီးခြင်းနန်းတော်တစ်ခု ထွက်ပေါ်လာပြီး ကောင်းကင်ထက် လေထဲတွင် လှည့်ပတ်နေသည်။ ပျက်စီးခြင်းဝင်ရိုးနန်းတော်သည် အဆုံးမဲ့ စွမ်းအားများကို စုစည်းကာ စုပ်ယူနေပြီး နှိုင်းယှဉ်မရသော ဖျက်ဆီးခြင်းအလင်းတို့က နန်းတော်မှ ပေါက်ကွဲထွက်၍ ကျဆင်းလာသည်။ မဟာလမ်းစဉ်၏ ကျယ်ပြောသော လေဟာနယ်သည် ကမ္ဘာပျက်ကပ်တစ်ခုအဖြစ်သို့ ပြောင်းလဲသွားပေသည်။
‘ပျက်စီးခြင်း’က မည်မျှ သန်မာအားကောင်းသည်ဖြစ်စေ သူက ဤတစ်ကြိမ်၌ သူ့ အဆင့်ထက်တွင် ရှိနေသော နင်ဟွာနှင့် ရင်ဆိုင်နေရခြင်း ဖြစ်သည်။ သူက နင်ဟွာ့ကို အထင်မသေးရဲဘဲ ချက်ချင်းပင် အသန်မာဆုံး အသွင်သို့ ပြောင်းလဲကာ တိုက်ခိုက်ရန် အသင့်ပြင်လိုက်သည်။
သူ၏ မျက်လုံးများက နက်မှောင်နေပြီး ပျက်စီးခြင်း အနက်ရောင်အလင်းများက ၎င်းတို့မှ လင်းလက်လာကာ အရာအားလုံးကိုပင် ဖျက်ဆီးနိုင်စွမ်း ရှိမည်ဟု ထင်မှတ်ရပေသည်။
ထိုအချိန်တွင် နင်ဟွာက သူ့အထက်သို့ ရောက်လာကာ ယုံကြည်ချက်အပြည့်နှင့် လျှောက်လာခဲ့သည်။ တောက်ပသော နတ်အလင်းတစ်ခုက သူ့ခန္ဓာမှ ထွက်ပေါ်လာပြီး အင်အားကြီးသည့် နတ်ခန္ဓာတစ်ခု ဖြစ်တည်လာသည်။
သူက ‘ပျက်စီးခြင်း’ကို ငုံ့ကြည့်လိုက်၏။ သူ့မျက်လုံးများက ကြောက်မက်ဖွယ် စွမ်းအားများကို သယ်ဆောင်ထား၏။ သူတို့၏ မျက်လုံးများက လေထဲတွင် ထိပ်တို့တွေ့ကာ နှိုင်းယှဉ်မရသော မဟာလမ်းစဉ် ချိပ်စည်းစွမ်းအားတို့ကို ထုတ်လွှတ်လိုက်သည်။ ထိုအခိုက်အတန့်တွင် အဆုံးမဲ့ နတ်အလင်းတို့ ထိုးထွက်လာပြီး မဟာလမ်းစဉ် သင်္ကေတများအဖြစ်သို့ ပြောင်းလဲသွားပေသည်။ ထိုသင်္ကေတတစ်ခုချင်းစီတွင် ကြောက်မက်ဖွယ် ချိပ်စည်းစွမ်းအားများ ပါဝင်နေပြီး ‘ပျက်စီးခြင်း’၏ ခန္ဓာကိုယ်သို့ စိမ့်ဝင်ကာ သူ့မျက်လုံးများထဲ ကျူးကျော်ရန် ကြိုးစားနေသည်။
ဘန်း…
‘ပျက်စီးခြင်း’ ၏ ခန္ဓာကိုယ်ထက်မှ မဟာလမ်းစဉ် စွမ်းအားများက အလွန် ပြင်းထန်လာပြီး မျက်လုံးများမှ ဖျက်ဆီးခြင်းအလင်းတို့ ထွက်ပေါ်လာပြီး မဟာလမ်းစဉ်ချိပ်စည်း စွမ်းအားတို့ကို ကျူးကျော်ဖျက်ဆီးရန် ကြိုးစားလိုက်သည်။ သို့သော် သင်္ကေတများက မကုန်ခမ်းနိုင်အောင် ရှိနေသကဲ့သို့ပင်။ ယင်းတို့က ဆက်လက်ကာ အရူးအမူး ကျူးကျော်လာနေသည်။ ထို့ပြင် အနီးဝန်းကျင်က ၎င်းစွမ်းအားတို့နှင့် ဖုံးလွှမ်းခံထားလိုက်ရသည်။
ထိုသည်မှာ မဟာလမ်းစဉ် ချိပ်စည်းနည်းစနစ်ဖြစ်သော နတ်ဘုရားချိပ်ပိတ်မန္တာန်ပင် ဖြစ်သည်။
“ဖျက်ဆီးစမ်း” ‘ပျက်စီးခြင်း’ က အမိန့်ပေးလိုက်လျှင် ကောင်းကင်ထက်ရှိ ပျက်စီးခြင်းဝင်ရိုးမှ မရေတွက်နိုင်သော နတ်အလင်းတန်းများ ကျဆင်းလာသည်။ အနက်ရောင်လျှပ်စီးများကဲ့သို့ ထိုအလင်းများက သင်္ကေတများပေါ် အပြင်းအထန် ကျရောက်လာကာ ယင်းတို့ကို ဖျက်ဆီးပစ်ချင်နေသည်။ အချို့က ထောင်ချီသည့် ဖျက်ဆီးခြင်း နတ်ဘုရားကပ်ဘေးကဲ့သို့ နင်ဟွာ၏ ခန္ဓာကိုယ်ဆီသို့ တိုးဝင်လာသည်။
သို့သော် ထိုအခိုက်အတန့်တွင် အလွန်ထိတ်လန့်တုန်လှုပ်ဖွယ် အလင်းလွှာကြီးတစ်ခုက ကြီးမားလှသော သင်္ကေတဝင်္ကပါတစ်ခုအဖြစ် နင်ဟွာ၏ နောက်တွင် ထွက်ပေါ်လာသည်။ ထိုဝင်္ကပါသည် အက္ခရာများမှ ဖြစ်တည်လာခြင်းဖြစ်ကာ ရီဖူရှင်းနှင့် ဆင်တူသော ယင်ယန်သင်္ကေတအချို့ ဖြစ်တည်လာသည်။ သို့သော် ထိုဝင်္ကပါအတွင်းတွင် ကြီးမားသော အက္ခရာတစ်ခု ပါဝင်ကာ ၎င်းမှာ ‘ချိပ်စည်း’ ဟူသည့် စာလုံးပင် ဖြစ်သည်။
ထိုမျှမကဘဲ ကြီးမားလှသော ဝင်္ကပါကြီးက ထိုအက္ခရာတစ်ခုမှ ရေးဖွဲ့ထားခြင်းဖြစ်ပြီး အက္ခရာမှ အလွန်တောက်ပသည့် နတ်အလင်းတို့ကို ထုတ်လွှတ်နေသည်။ နင်ဟွာ၏ စိတ်က တွေးလိုက်သည်နှင့် ဝင်္ကပါက စတင်ကြီးမားကျယ်ပြန့်လာပြီး တဖြေးဖြေး ဖွံ့ဖြိုးကာ ဆက်လက်ကြီးမားလာသည်။ အလွန် ကြီးမားကျယ်ပြန့်လာသည်နှင့်အမျှ ပို၍ တောက်ပလင်းလက်လာကာ ၎င်းမှ ပို၍ များပြားသော ချိပ်စည်းအက္ခရာများ ထုတ်လွှတ်လာသည်။
“နင်ဟွာ့ နတ်ဝင်ရိုးပဲ။” လူအများ၏ နှလုံးသားတို့က တုန်ယင်သွားသည်။ ဤသည်မှာ ကောင်းကင်ဝင်ရိုးနတ်ကြေးမုံ၌ အလင်းခြောက်လွှာထုတ်လွှတ်ခဲ့သော နင်ဟွာ၏ မဟာလမ်းစဉ် နတ်ဝင်ရိုးပင် ဖြစ်လေသည်။
ခဏအတွင်းမှာပင် မဟာလမ်းစဉ်နတ်ဝင်ရိုးက ကောင်းကင်နှင့်နေမင်းကို ဖုံးလွှမ်းသည်အထိ ကျယ်ပြန့်လာကာ ကောင်းကင်၏ အစွန်းထိ လွှမ်းမိုးသွားသည်။ မဟာလမ်းစဉ်မှ ထုတ်လွှတ်လာသော နတ်အလင်းတို့က လောကတခွင်ကို ဖုံးလွှမ်းသွားကာ အဆုံးမဲ့ သင်္ကေတအက္ခရာများက မျောလွင့်နေသည်။
ထိုအက္ခရာများက ပျက်စီးခြင်းနတ်ဝင်ရိုးအောက် ဆက်လက် ဖျက်ဆီးခံနေရသော်လည်း အားအင်မကုန်ခမ်းသကဲ့သို့ ကောင်းကင်ကို ဆက်လက်လွှမ်းခြုံနေသည်။ လူတိုင်းသည် နတ်ဝင်ရိုးမှ ထုတ်လွှတ်သော စွမ်းအားသည် မဟာလမ်းစဉ်ချိပ်စည်းစွမ်းအားကြောင့် သက်ရောက်ခံရကာ စတင်အားနည်းလာသည်ကို ရှင်းလင်းစွာ ခံစားမိနိုင်ကြသည်။
‘ပျက်စီးခြင်း’က ထိုနေရာတွင် ရပ်နေကာ ရုတ်တရက် အားအင်ကုန်ခမ်းသွားသလို ခံစားခဲ့ရသည်။ ထိုအချိန်တွင် ကောင်းကင်တွင် ဖြစ်စေ သူ၏ နတ်အာရုံအတွင်းဖြစ်စေ အဆုံးမဲ့ ချိပ်စည်းသင်္ကေတများနှင့် ပြည့်နေကာ မဟာလမ်းစဉ်၏ မဖျက်ဆီးနိုင်သော နတ်အလင်းများအဖြစ် ပြောင်းလဲသွားလေသည်။ သူသည် မဟာလမ်းစဉ်ချိပ်စည်းစွမ်းအားက လေဟာနယ်အား တိုက်စားပစ်နေသည်ကို ခံစားမိပေသည်။
ယင်းက သူ၏ မဟာလမ်းစဉ်နတ်ဝင်ရိုးအား တိုက်စားပစ်နေသည်။
“မင်းရဲ့ နတ်ဝင်ရိုးအဆင့်က ငါ့ထက် နိမ့်တယ်။ ဘယ်လိုများ ငါနဲ့ တိုက်ဖို့ ရည်ရွယ်နေရတာလဲ။” နင်ဟွာက ‘ပျက်စီးခြင်း’ကို ငုံ့ကာ ကြည့်လိုက်သည်။ သူ၏ လေသံက အလွန် လွှမ်းမိုးနိုင်စွမ်း ရှိပေသည်။ သူက ဤလောကတစ်ခွင်၌ မည်သူမှ မယှဉ်နိုင်သော စွမ်းအားကို ထုတ်ဖော်ပြသခဲ့သည်။
‘ပျက်စီးခြင်း’ထံ၌ သူ့အား ငြင်းဆန်ရန် စကားလုံးမရှိခဲ့ပေ။ သူ၏ နတ်ဝင်ရိုးက နင်ဟွာ့လောက် မကောင်းပေ။ ဆိုလိုသည်မှာ မဟာလမ်းစဉ်အဆင့်နှင့် ယှဉ်လျှင် သူက ရှုံးလိမ့်မည် ဖြစ်သည်။သူ၏ ရှုံးနိမ့်မှုက တစ်ဖက်လူသည် မဟာလမ်းစဉ်ကို အပြည့်အဝ ထိန်းချုပ်နိုင်သည်ဟု ဆိုလိုပြီး မဟာလမ်းစဉ် ချိပ်စည်း၏ စွမ်းအားပင် ဖြစ်သည်။ ထို့ကြောင့် သူ၏ အားလုံးသော နည်းစနစ်များက မေးခွန်းထုတ်စရာမလိုအောင် ချိပ်ပိတ်ခံရပြီး အားနည်းသွားခဲ့သည်။ ထိုနတ်ဝင်ရိုးကြောင့် သူက မည်သို့ဖြစ်၍ ဤအခြေအနေ၌ မရှုံးဘဲရှိနေပါမည်နည်း။
“မင်းက ပျက်စီးခြင်းနတ်နန်းတော်ရဲ့ ဆက်ခံသူပဲ။ မင်းမှာ ထူးချွန်ပြောင်မြောက်တဲ့ တိုက်ပွဲစွမ်းရည် ရှိတယ်။ မင်းက မင်းရဲ့ အဆင့်မှာတော့ အထွတ်အထိပ်ကို ရောက်နေခဲ့ပြီ။ တုန်းဟွာနယ်မြေမှာ အရမ်းအစွမ်းထက်လွန်းတဲ့ သူတွေကလွဲရင် မင်းကို အနိုင်ယူနိုင်မယ့်သူ သိပ်မများဘူး။ ဘယ်လိုပဲဖြစ်ဖြစ် အခုချိန်မှာတော့ မင်း ငါ့ကို စိန်ခေါ်နိုင်မှာ မဟုတ်ဘူး။ တစ်နေ့မှာ မင်း ငါ့ရဲ့ မဟာလမ်းစဉ် နတ်ဝင်ရိုးနဲ့ ရင်ဆိုင်နိုင်ပြီလို့ ယုံကြည်ချက်ရှိလာရင် ပြန်လာပြီး စိန်ခေါ်လှည့်ပါ။”
နင်ဟွာက သူ၏ မဟာလမ်းစဉ် စွမ်းအားတို့ကို ရုတ်သိမ်းလိုက်သည်။ သူ့စကားကို ကြားသည့် လူတိုင်းက တိတ်ဆိတ်သွားသော်လည်း သူတို့၏ နှလုံးသားက အပြင်းအထန် နှောက်ယှက်ခြင်း ခံရလေသည်။
တုန်းဟွာနယ်မြေမှ တန်ခိုးရှင်များသည်နင်ဟွာအား အဆင့်အတန်းတစ်ခုတွင် ခွဲခြားထားသည်။ အခြားသုံးယောက်က တူညီစွာ ကျော်ကြားလျှင်ပင် သူတို့သည် သူနှင့် အမှန်တကယ် ခြေရာတိုင်းနိုင်မည်ဟု မယူဆကြပေ။
ယနေ့ နင်ဟွာ၏ စကားလုံးများက ထိုအချက်အား မီးမောင်းထိုးပြနေသည်။ တုန်းဟွာကျောင်းတော်၌ ‘ပျက်စီးခြင်း’ကို အနိုင်ယူနိုင်သည့်သူ သိပ်မများသော်လည်း သူက နင်ဟွာကို စိန်ခေါ်နိုင်သည်ဟု မဆိုလိုပေ။ နင်ဟွာက ပြိုင်ဘက်ကင်းပင် ဖြစ်သည်။
မရေတွက်နိုင်သော မျက်လုံးများက စင်ပေါ်မှ လှည့်ထွက်သွားသော နင်ဟွာ့နောက်ကျောတွင် ကပ်ငြိသွားကြသည်။ ၎င်းတိုက်ပွဲက ဤနည်းလမ်းဖြင့် ပြီးဆုံးသွားလိမ့်မည်ဟု မည်သူကမှ တွေးထင်မထားခဲ့ပေ။ သူတို့ စိတ်ကူးထားသော မည်သည့် ပြင်းထန်သော တိုက်ပွဲမှ မရှိခဲ့ပေ။ နင်ဟွာက သူ၏ မဟာလမ်းစဉ်နတ်ဝင်ရိုးကို ထုတ်လွှတ်သည်နှင့် ‘ပျက်စီးခြင်း’ကိုမဆိုထားနှင့် မည်သူမှ ယှဉ်နိုင်လိမ့်မည် မဟုတ်ပေ။
နင်ဟွာက ပြိုင်ဘက်ကင်းပင် ဖြစ်၏။
***