တိုက်ပွဲလမ်းစဉ်စင်မြင့်သည် သီးခြားနယ်မြေတစ်ခု ဖြစ်လာခဲ့သည်။ ပုံရိပ်နှစ်ခုက ကောင်းကင်တွင် မျောလွင့်နေပြီး မျက်နှာချင်းဆိုင် ရှိနေကြသည်။
ကြီးမားလှသည့် ကျောက်စာချပ်မှ တောက်ပသော မဟာလမ်းစဉ် အလင်းများ ထုတ်လွှတ်နေသည်။ ရီဖူရှင်း၏ ပုံရိပ်ကို ဗဟိုပြုကာ မဟာလမ်းစဉ် နဂါးငွေ့တန်းတစ်ခု ထွက်ပေါ်လာသည်။ နတ်ကျောက်စာချပ်က ရှေးဟောင်းခေတ်မှပင် ဆင်းသက်လာသလို ထင်မှတ်ရကာ လေဟာနယ်အတွင်းရှိ အရာအားလုံးကို ဖိနှိပ်နေသည်။
မျက်စိကျိန်းလောက်သော ဓားအလင်းတစ်ခု ထိုးထွက်လာကာ ကျောက်စာချပ်နှင့် ရိုက်ခတ်သွားသည်။ အလင်းတန်းတစ်ခုချင်းစီက ဓားတစ်လက်ကဲ့သို့ပင်။ သန်းချီသော အလင်းတန်းများက သန်းချီသည့် နတ်ဓားများကဲ့သို့ပင် ဖြစ်သည်။ ကောင်းကင်ထက်တွင် ယင်းတို့က အံ့အားသင့်ဖွယ် ဓားမြစ်တစ်စင်း ဖြစ်တည်လာသည်။ ထိုနတ်ကျောက်စာချပ်က ယင်းတို့ကို ပိတ်ဆို့ထားသည်အား ကြည့်ရင်း ချန်ယိက လက်ချောင်းကို ရှေ့သို့ ညွှန်ပြလိုက်သည်။ ချက်ချင်းပင် အလင်းတန်းတစ်ခုက လေဟာနယ်ကို ထိုးခွင်းကာ နတ်ကျောက်စာချပ်ပေါ် ဆင်းသက်လာသည်။ အလင်းတန်း ထိုကျောက်စာချပ်ပေါ်တွင် ထိပ်ဖျားမှ အောက်ခြေထိ လင်းလက်လာသည်။ အလင်းအမှတ်အသားတစ်ခုက ကြီးမားသော ကျောက်စာချပ်ကြီးပေါ်တွင် ပေါ်ပေါက်လာသည်။
“ကွဲထွက်စမ်း” ချန်ယိက အော်ဟစ်လိုက်သည်။
သူ ပြောလိုက်သည်နှင့် အလွန်တောက်ပသော ကျောက်စာချပ်က အလင်းအမှတ်အသားတလျှောက် နှစ်ပိုင်းကွဲထွက်လာသည်။ နောက်တခဏတွင် ချန်ယိ ပုံရိပ်က ပျေက်ကွယ်သွားပြီး အလင်းတန်းတစ်ခု ဖြစ်လာခဲ့သည်။
ရွှစ်…
အလင်းတန်းက ပျောက်ကွယ်သွား၏။ လူအုပ်ကြီးသည် ရီဖူရှင်း၏ ပုံရိပ်က အနောက်တွင် ပုံရိပ်ယောင်များ ချန်ထားခဲ့သည်ကို မြင်လိုက်ရသည်။ အထက်မှ အလင်းရောင် ကျဆင်းလာသည်နှင့် ပုံရိပ်ယောင်များ ပျောက်ကွယ်သွားပြီး သူတို့နှစ်ယောက်က ကောင်းကင်အမြင့်တစ်နေရာတွင် ထွက်ပေါ်လာသည်။
“အရမ်းမြန်တာပဲ..” လူအုပ်ကြီးက ရေရွတ်လိုက်ကြသည်။
လူအုပ်ကြီးက သူတို့၏ လှုပ်ရှားမှုကို လိုက်ရန် ကြိုးစားသော်လည်း မကြာခင်တွင် သူတို့ ပုံရိပ်များကို မျက်လုံးအမြင်နှင့် ဖမ်းယူရန် မဖြစ်နိုင်ကြောင်း ရှာတွေ့ခဲ့သည်။ သူတို့နှစ်ယောက်လုံးက အလွန် လျင်မြန်လှသည်။ သူတို့က လမ်းစဉ်တိုက်ပွဲစင်မြင့်ထက် မဟုတ်လျှင် ခဏချင်းအတွင်း မိုင်ပေါင်းထောင်ချီ ခရီးသွားနိုင်ကြပေလိမ့်မည်။
သို့သော်လည်း သူတို့နှစ်ယောက်ကြားမှ ကွာခြားချက်မှာ ရီဖူရှင်းက လေဟာနယ်ခရီးသွားခြင်းကို အသုံးပြု၍ ချန်ယိက အလင်းအလျင်နှင့် လှုပ်ရှားနေခြင်း ဖြစ်သည်။ သူတို့နှစ်ယောက်လုံးက အလွန် လျင်မြန်လှသော အရှိန်ကို ပိုင်ဆိုင်ထားသည်။ ၎င်းသည် သူတို့၏ အရှိန်အဟုန်ကို အခြားသူများ လိုက်နိုင်စွမ်းမရှိလောက်အောင် ဖြစ်စေသည်။
ထိုအခိုက်အတန့်တွင် သူတို့နှစ်ယောက်လုံးက ရုတ်တရက် ရပ်တန့်သွားခဲ့သည်။ သူတို့က လေဟာနယ်ကို ဖြတ်ကာ ရပ်၍ အချင်းချင်း စိုက်ကြည့်လိုက်ကြသည်။
“အဲဒီလောက်မြန်တဲ့အရှိန်” နယ်မြေသခင်က ပြောလိုက်သည်။ အချိန်တိုအတွင်း သူတို့နှစ်ယောက်က မရေတွက်နိုင်အောင် အကြိမ်ပေါင်းများစွာ တိုက်ခိုက်ခဲ့ကြပြီး ဖြစ်သည်။ အခြားတန်ခိုးရှင်များက ၎င်းကို ရှင်းလင်းစွာ မမြင်ရသော်လည်း တုန်းဟွာနန်းတော်အတွင်းမှ ပုဂ္ဂိုလ်ကြီးများက အဖြစ်အပျက်များကို မြင်တွေ့ရပေသည်။
“သူ့ဓားပဲ မဟုတ်ဘူး။ သူ့အရှိန်ရောပဲ လျင်မြန်လွန်းတယ်။ ဒါက အလင်းလမ်းစဉ်ပဲ။” အင်ပါယာရှီက ပြောလိုက်သည်။ “မဟာလမ်းစဉ်မှာ အကြွင်းမဲ့ ခွန်အားနဲ့ အားနည်းချက် မရှိဘူးဆိုပေမယ့်လည်း အဲဒါက အသုံးပြုတဲ့လူအပေါ်မှာ မှီခိုနေတုန်းပဲ။ အမှန်မှာတော့ တချို့ မဟာလမ်းစဉ်စွမ်းအားတွေက ကျွမ်းကျင်ပိုင်နိုင်မှု ရှိပြီးသွားရင် တခြားသူတွေထက် ပိုအစွမ်းထက်သွားမှာ အသေအချာပဲ။”
ထိုသူများက သူတို့၏ အဆင့်ကို မြင့်လာအောင် ကျင့်ကြံပြီးနောက် မဟာလမ်းစဉ်၌ သန်မာခြင်း အားနည်းခြင်း မရှိသည်ကို နားလည်သဘောပေါက်ကြသည်။ ဤအချက်အလက်သည် အခြေအနေအားလုံး၌ အမြဲမမှန်ကန်နိုင်ပေ။ အမှန်တွင် တူညီသော လူများက မတူညီသော လမ်းစဉ်များနှင့် ကျင့်ကြံနေလျှင် သူ ကျွမ်းကျင်သည့် လမ်းစဉ်ကြား ခွန်အားအရ ကွာခြားခြင်း ရှိလိမ့်မည် ဖြစ်သည်။
သို့မဟုတ်လျှင် ရန်ဟောင်တိုင်းက အလင်းလမ်းစဉ်နှင့် အခြားသောဒြပ်စင်လမ်းစဉ် ငါးခုကြား ရွေးချယ်ရန် စနိုးစနောင့် ဖြစ်နေလိမ့်မည် မဟုတ်ပေ။ လူတိုင်းက အလင်းလမ်းစဉ်ကိုသာ ကျိန်းသေ ရွေးချယ်ကြပေလိမ့်မည်။
“ဒီတစ်ကြိမ်တော့ သူက ပြိုင်ဘက်အစစ်အမှန်နဲ့ တွေ့ခဲ့တာပဲ။” မိုးကြိုးပြစ်ဒဏ်ကောင်းကင်အရှင်က ရယ်မောရင်း ပြောလိုက်သည်။ ချန်ယိက အမှန်တကယ်ပင် ရီဖူရှင်းအား ခြိမ်းခြောက်နိုင်၏။ သူ၏ စွမ်းရည်က ထူးခြားအစွမ်းထက်ကာ ယခင် လမ်းစဉ်တိုက်ပွဲများ၌ ရှုံးနိမ့်ခြင်း မရှိခဲ့ပေ။ အစွမ်းထက် ကျင့်ကြံသူများစွာကို အနိုင်ယူနိုင်ခဲ့သည့် ရီဖူရှင်းသည် အရှုံးကို မခံစားရသေးသော်လည်း နောက်ဆုံး၌ အလွန် အစွမ်းထက်သော ပြိုင်ဘက်ကို တွေ့ကြုံခဲ့ရပြီ ဖြစ်သည်။
အောက်ဘက်ရှိ လူများက အလွန် စိတ်လှုပ်ရှားနေခဲ့ကြ၏။ သူတို့က မည်သည်ကို ကြည့်နေရသည်အား နားမလည်သော်လည်း သူတို့က ဤတိုက်ပွဲမှာ စိတ်ဝင်စားစရာ ကောင်းကြောင်း ခံစားနေရဆဲပင် ဖြစ်သည်။
သူတို့နှစ်ယောက်က လမ်းစဉ်တိုက်ပွဲစင်မြင့်လေဟာနယ်အတွင်း မျက်နှာချင်းဆိုင်ရပ်နေကြသည်။ ချန်ယိက အလင်း၏သားတော်ကဲ့သို့ အလင်းများဖြင့် လွှမ်းခြုံထားသည်။ အလင်းတန်းတစ်ခုချင်းစီတွင် ကြောက်မက်ဖွယ် စွမ်းအားများ ပါဝင်နေသည်။ သူက ရီဖူရှင်းအား ကြည့်ကာ ပြောလိုက်သည်။ “ရန်ဟောင်ရီက မဟာလမ်းစဉ် လေဟာနယ်စွမ်းအားမှာလည်း ကျွမ်းကျင်လိမ့်မယ်လို့ ထင်မထားမိဘူး။ ကျုပ်တို့ ဒီလို ဆက်တိုက်နေကြရင် ဘယ်အချိန်မှ အနိုင်ရသူကို ဆုံးဖြတ်နိုင်မလဲ ဘယ်သူသိပါ့မလဲ။”
ရီဖူရှင်းက ခေါင်းငုံ့ကာ ချန်ယိကို ကြည့်ရင်း ပြောလိုက်သည်။ “သိပ်ကြာမှာ မဟုတ်ပါဘူး။”
ရီဖူရှင်းက ထိုစကားများကို ပြောလိုက်သည့်အခါ ချန်ယိက မျက်မှောင်ကြုတ်လိုက်၏။ ထို့နောက် သူက ပတ်ဝန်းကျင်တွင် ထူးဆန်းသော ပြောင်းလဲမှုတို့အား ခံစားမိပေသည်။ သူ၏ ပုံရိပ်ကို ဗဟိုပြုကာ လေဟာနယ်၏ တစ်စိတ်တစ်ဒေသက ပြောင်းလဲသွားလေသည်။ မဟာလမ်းစဉ် နယ်မြေတစ်ခု ဖြစ်ပေါ်လာပြီး မရေတွက်နိုင်သော လှိုင်းများက လေဟာနယ်အတွင်း စီးဆင်းလာ၏။ အေးစက်သည့် လတစ်စင်းက ရီဖူရှင်း ရပ်နေသည့် အထက်တွင် ပေါ်ပေါက်လာကာ ကြယ်များက သူ့အား ဝန်းရံထားသည်။ အလွန်အေးစက်သော အရှိန်အဝါတို့က ထိုနေရာတခွင်ကို စီးဆင်းကာ အေးခဲလာပုံရသည်။
ချန်ယိက သူ့အနီးမှ အေးစက်သော အရှိန်အဝါတို့ကို ခံစားမိလိုက်သည်။ သူက ရီဖူရှင်းအား ကြည့်ကာ ရေရွတ်လိုက်၏။ “ယင်စွမ်းအား”
သူက ပြောပြီးသည်နှင့် ရီဖူရှင်းက မျက်လုံးမှော်ပညာအား အသုံးပြုလိုက်သည်ကို မြင်တွေ့လိုက်ရသည်။ မျက်လုံးမှော်ပညာက ချန်ယိ၏ မျက်လုံးများဆီသို့ တည့်မတ်စွာ တိုးဝင်လာပြီး သူ့စိတ်ဝိညာဥ်ထဲသို့ ကျူးကျော်ဝင်ရောက်ရန် ကြိုးစားလိုက်သည်။ သို့သော် ထိုအခိုက်အတန့်တွင် ချန်ယိ၏ မျက်လုံးများမှ ပြင်းထန်သော အလင်းတို့ ထိုးထွက်လာကာ ရီဖူရှင်း၏ ကျူးကျော်ဝင်ရောက်မှုက တားဆီးခံလိုက်ရသည်။
ရီဖူရှင်းထံမှ ထူးဆန်းသော အကြည့်တို့ ဖြစ်ပေါ်လာသည်။ ထိုသည်မှာ သူ၏ မျက်ဝန်းမှော်ပညာ ပထမဆုံးအကြိမ် ကျရှုံးခြင်း ဖြစ်၏။ သူ့ပြိုင်ဘက်၏ မျက်လုံးများမှာ အလင်းမျက်လုံးများကဲ့သို့ ဖြစ်လာပြီး ရီဖူရှင်း၏ မျက်လုံးမှော်ပညာ ကျူးကျော်မှုကို ဟန့်တားလိုက်သည်။
လရောင်က တောက်ပလာသည်။ ၎င်းက ယင်စွမ်းအားဖြစ်သည်။ အေးစက်သော လရောင်၏ အလင်းက လေဟာနယ်ကို အလွန် အေးစက်လာစေသည်။ ၎င်းတွင် အလွန် ကြောက်မက်ဖွယ်ကောင်းသော ဖျက်ဆီးခြင်းစွမ်းအားတို့ ပါဝင်နေပြီး မဟာလမ်းစဉ် ကန့်သတ်နယ်မြေကိုပင် အေးခဲသွားစေသည်။ သို့သော်လည်း ချန်ယိရ ထိုနေရာ၌သာ တိတ်ဆိတ်စွာ ရပ်နေခဲ့ကာ အအေးဓာတ်၏ သက်ရောက်ခြင်း မခံရသကဲ့သို့ပင်။ သူ့နောက်ရှိ ကောင်းကင်ထက်တွင် လေထဲမျောလွင့်နေသော ဓားတစ်လက်ရှိသည်။ ၎င်းက သူ၏ အလင်းဓားပင် ဖြစ်လေသည်။
ပို၍ မျက်စိကျိန်းလောက်ဖွယ် အလင်းတို့ ထိုးထွက်လာပြီး ချန်ယိအနီးတွင် မဟာလမ်းစဉ် ကန့်သတ်နယ်မြေတစ်ခု ဖြစ်ပေါ်လာသည်။ လရောင်က အောက်သို့ ဖြာဆင်းလာသောအခါ အလင်း၏ သီးခြားနယ်မြေနှင့် ထိခတ်မိသွားသော်လည်း ၎င်းကို ထိုးဖောက်နိုင်ခြင်း မရှိခဲ့ပေ။ ချန်ယိ၏ မဟာလမ်းစဉ် ခုခံကာကွယ်မှုကို ချိုးဖျက်နိုင်စွမ်းမရှိခဲ့ချေ။
ဝှစ်…
ချန်ယိ၏ ပုံရိပ်က နောက်တစ်ခါ ပျောက်ကွယ်သွားပြီး အလင်းတန်းတစ်ခုအဖြစ် ရီဖူရှင်းထံ တိုးဝင်လာသည်။ သူ့ပုံရိပ် လှုပ်ရှားလာသည့်အခါ သူ့ကို ဗဟိုပြု၍ ကြောက်မက်ဖွယ် သတ်ဖြတ်ခြင်းစွမ်းအားတို့ ပါဝင်နေသည့် မရေတွက်နိုင်သော နတ်အလင်းတန်းတို့ ထိုးထွက်လာသည်။ အခြားရန်ဟောင်များအတွက် သူ့အနီးတွင် နေမိပါက သူတို့အတွက် ရှင်သန်နိုင်ရန် ခက်ခဲပေလိမ့်မည်။
‘ငါ သက်ရောက်ခံနေရတာပဲ။’ ချန်ယိက တွေးလိုက်သည်။ သူက အမှန်တကယ်ပင် ရီဖူရှင်း၏ မဟာလမ်းစဉ် နယ်မြေစွမ်းအားကြောင့် သက်ရောက်မှုကို ခံစားနေရသည်။ သို့ဆိုလျှင်ပင် သူက အလွန်လျင်မြန်နေဆဲပင် ဖြစ်၏။ သူတို့နှစ်ယောက်ကြားမှ အကွာအဝေးက သူ့အတွက် အသေးအဖွဲပင် ဖြစ်သည်။ သူက လုံးဝလျစ်လျူရှုထားနိုင်၏။
ဘန်း…
အလင်းဓားက လေဟာနယ်ကို ဖြတ်သန်းကာ ရီဖူရှင်း၏ ခန္ဓာကိုယ်ဆီသို့ ထိုးဖောက်လာသည်။ ထိုတိုက်ခိုက်မှု၌ မည်သည့် နည်းစနစ်မှ ပါဝင်မနေပေ။ အလွန်လျင်မြန်လှသည့်အရှိန်ကသာ အကြွင်းမဲ့ခွန်အား ဖြစ်သည်။ အခြားတစ်စုံတစ်ယောက်သာ ဖြစ်လျှင် ချန်ယိ၏ အလင်း ဆင်းသက်လာသည့်အခါ ထိုပြိုင်ဘက်မှာ သေဆုံးနေပြီး ဖြစ်လိမ့်မည်။ သူတို့က သူ့တိုက်ခိုက်မှု စွမ်းအားကို တားဆီးနိုင်လိမ့်မည် မဟုတ်ပေ။
ဓားအလင်းက သူ့ထံသို့ တိုးဝင်လာသည့်အခါ အလွန် အံ့အားသင့်ဖွယ်ကောင်းသော မဟာလမ်းစဉ်စွမ်းအားလှိုင်းများက ရီဖူရှင်း၏ ခန္ဓာကိုယ်အနီး၌ ရုတ်တရက် ထွက်ပေါ်လာသည်။ သူ့အနီးတွင် အလွှာနှစ်ခု ဖြစ်ပေါ်လာသည်။ တစ်ခု ပူပြင်း၍ တစ်ခုက အေးစက်သည်။ ၎င်းသည် လူတိုင်းကို အလွန် မသက်မသာ ခံစားရစေသည်။
ရီဖူရှင်း၏ ပုံရိပ်က ဝေဝါးသွားကာ မရေတွက်နိုင်သော ပုံရိပ်ယောင်များ ထွက်ပေါ်လာ၏။ သူက မဟာလမ်းစဉ် လေဟာနယ်စွမ်းအားကို လေဟာနယ်ခရီးသွားခြင်းအတွက် အသုံးပြုလေသည်။ သို့သော် သူ့ပြိုင်ဘက်၏ အလင်းဓား အရှိန်က လေဟာနယ်ကို ဖိနှိပ်ထားသလို ထင်မှတ်ရသည်။ ချန်ယိက ရီဖူရှင်း ဖြတ်သန်းသွားသမျှ နေရာတိုင်းကို ထပ်ကြပ်မကွာ လိုက်နေခဲ့၏။
တိုက်ပွဲကွင်းပြင်တွင် လူအုပ်ကြီးက ပုံရိပ်ယောင်များစွာ ဟိုဟိုဒီဒီ ပြေးလွှားနေသည်ကို မြင်ရကာ အလင်းများဖြင့် တောက်ပနေသည်ကို တွေ့ကြရပေသည်။
“သူ ဘာလုပ်နေတာလဲ။”
တုန်းဟွာနန်းတော်မှ လူများက တစ်ခုခု ထူးဆန်းနေသည်ကို တွေ့ရှိခဲ့ကြသည်။ အောက်ဘက်ရှိ လူအများသည်လည်း ၎င်းကို သတိပြုပေသည်။ ရီဖူရှင်း၏ ခန္ဓာကိုယ်အနီးတွင် လုံးဝကွဲပြားခြားနားသော စွမ်းအားလှိုင်းနှစ်ခု ပေါ်ပေါက်လာသည်။ သူ လှုပ်ရှားလိုက်သည်နှင့် ထိုစွမ်းအားလှိုင်းနှစ်ခုက ကန့်လန့်ဖြတ်ရောယှက်သွားကာ တစ်ခုနှင့်တစ်ခု ဝိုင်းပတ်နေခဲ့သည်။
ချန်ယိသည်လည်း ၎င်းကို သတိပြုမိသည်။ ထိုမျှမကသေး။ မရေတွက်နိုင်သည့် ဖျက်ဆီးခြင်းအလင်းတို့က သူ့ခန္ဓာကိုယ်အနီး တဖြေးဖြေး ကျဆင်းလာသည်။ ထိုကြောက်မက်ဖွယ် စွမ်းအားနှစ်ခုက ရီဖူရှင်း၏ ခန္ဓာကိုယ်အနီးတွင် မဟာလမ်းစဉ် ဝင်္ကပါတစ်ခုအဖြစ် ဖြေးညင်းစွာ ဖွဲ့စည်းလာသည်။
မကြာခင်၌ ရီဖူရှင်း၏ အထက်တွင် ထိတ်လန့်ဖွယ် ဖျက်ဆီးခြင်းစွမ်းအားတို့က ဖြန့်ကျက်လာတော့၏။ ကောင်းကင်ထက်တွင် မဟာလမ်းစဉ်၏ အဆုံးမဲ့စွမ်းအားများ စုစည်းလာပြီး ခမ်းနားထည်ဝါသည့် မဟာလမ်းစဉ် ဝင်္ကပါတစ်ခု ဖြစ်ပေါ်လာပေသည်။
ဤကြီးမားလှသော ဝင်္ကပါတွင် အပူနှင့်အအေးနှစ်ရပ်လုံး ပါဝင်နေသည့် ယင်ယန်ဝင်္ကပါပင် ဖြစ်သည်။ ၎င်းက ယင်ယန်ငါးတစ်ကောင် ဖြစ်လာခဲ့သည်။
မီးလျှံနှင့်ရေခဲလား။ အချို့လူများက တွေးမိလိုက်ကြသည်။
“ယင်နဲ့ယန်” အခြားလူများက ရေရွတ်လိုက်သည်။ ထိုမြင်ကွင်းက အလွန် ကြောက်မက်ဖွယ် ကောင်းပေသည်။ ကြီးမားသည့် ယင်ယန်ဝင်္ကပါတစ်ခု ပေါ်ပေါက်လာကာ သူတို့အနီးရှိ မဟာလမ်းစဉ်စွမ်းအားများကို စုပ်ယူဝါးမြိုနေပြီး အစစ်အမှန် လေဟာနယ်အဖြစ် ပြောင်းလဲသွားစေသည်။
“မီးလျှံတွေက ဝူထုံနတ်မီးလျှံဖြစ်လိမ့်မယ်။ တခြားတစ်ဖက်က အေးစက်တဲ့ အရှိန်အဝါကတော့ ယင်စွမ်းအား ဖြစ်ပုံရတယ်။” နယ်မြေသခင်နင်က ရေရွတ်လိုက်သည်။
သူက စွမ်းအားနှစ်ကို အာရုံခံမိသည်။ ထိုစွမ်းအားနှစ်ခုက ရောယှက်နေပြီး ဖျက်ဆီးခြင်း ယင်ယန်ဝင်္ကပါ ဖြစ်တည်လာ၏။
စွမ်းအားနှစ်ခုက တစ်ချိန်တည်းတွင် ယင်ယန်ဝင်္ကပါမှ ကျဆင်းလာသည်။ ၎င်းသည် အဆုံးမဲ့ မဟာလမ်းစဉ်ကပ်ဘေးနှင့် တူနေပေသည်။ ၎င်းတို့က နေနှင့် ကောင်းကင်ကို ပိတ်ဆို့ကာဆီးထားသည်။ ဤမဟာလမ်းစဉ်နယ်မြေအတွင်းရှိ အရာအားလုံးမှာ ယင်ယန်ဝင်္ကပါကြောင့် ဖျက်ဆီးခံလိုက်ရသလိုပင်။
ဘုန်း…
နားစည်ထွင်းဖောက်လုမတတ် အသံတစ်ခုကို ကြားလိုက်ကြရသည်။ ယင်ယန်ဝင်္ကပါမှ ကျဆင်းလာသည့် ကပ်ဘေးအလင်းက ချန်ယိခန္ဓာကိုယ်မှ ထွက်ပေါ်လာသော အလင်းတို့နှင့် ထိပ်တိုက်တွေ့ဆုံခဲ့သည်။ ဤတစ်ကြိမ်၌ ၎င်းသည် ချန်ယိခန္ဓာကိုယ်မှ အလင်းလမ်းစဉ်ကို အမှန်တကယ် ဖိနှိပ်နိုင်ခဲ့ပြီး သူ၏ မဟာလမ်းစဉ် နယ်မြေကို ဆက်လက်ဖိနှိပ်နေ၏။
“ဒါက…”
လူအုပ်ကြီးက ကြောက်ရွံ့တုန်လှုပ်လာသည်။ ရီဖူရှင်းရ အလွန် အစွမ်းထက်ပေသည်။ သူက ခုန်းရှောင်းနှင့် ယခင်တိုက်ပွဲတွင် ဤသို့သော စွမ်းရည်မျိုးအား မပြသခဲ့ပေ။ ချန်ယိထွက်ပေါ်လာခြင်းက သူ့ကို ထိုစွမ်းအားများ ထုတ်ဖော်အသုံးပြုလာစေရန် ဖိအားဖြစ်စေခဲ့ပုံရသည်။ သူက အတိအကျ မည်မျှ အစွမ်းထက်သနည်း။
သူ့ကို ကြည့်ရသည်မှာ စွမ်အားများက အကန့်အသတ်မရှိဘဲ အစွမ်းထက်သည့် ပြိုင်ဘက်နှင့်တွေ့ကြုံရသည့်အခါ သူက ပို၍ အစွမ်းထက်လာနိုင်ပုံရလေသည်။
ဤသည်က သူ၏ အသန်မာဆုံး ဝှက်ဖဲဖြစ်လိမ့်မည်ဟု လူအများက တွေးလိုက်ကြသည်။ သူ၏ ဓားနှင့် အလင်းကို ပေါင်းစပ်လိုက်သည်နှင့် ချန်ယိသည် ရီဖူရှင်းအား ခွန်အားအပြည့်အဝကို ဖော်ထုတ်ရန် ဖိအားပေးနိုင်ခဲ့ပုံရလေသည်။
ရီဖူရှင်းက အောက်သို့ ငုံ့ကြည့်လိုက်သည်။ သူ၏ စွမ်းအားက ပြောင်းလဲသွားကာ မရေတွက်နိုင်သော ဖျက်ဆီးခြင်း နတ်အလင်းတို့က ယင်ယန်ဝင်္ကပါမှ ထိုးထွက်လာပြီး ချန်ယိအား သတ်ဖြတ်ရန် တိုးဝင်လာ၏။
ထိုသို့သော စွမ်းအားမျိုးနှင့် ရင်ဆိုင်ရသောအခါ ချန်ယိသည် နောက်ဆုံး၌ ဖိနှိပ်ခံလိုက်ရလေသည်။ သူက ခေါင်းကိုမော့ကာ ရီဖူရှင်းအား ကြည့်လိုက်သည်။ သူ့မျက်လုံးများ၌ စိတ်ပျက်မှုများကို မဖော်ပြနေပေ။ ကြည့်ရသည်မှာ ပို၍ပင် စိတ်လှုပ်ရှားလာပုံရသည်။ သူက အံ့အားသင့်နေပုံပင် မရချေ။
သူ၏ မဟာလမ်းစဉ် နတ်ဝင်ရိုးက သူ့ခန္ဓာကိုယ်နှင့် တသားတည်း ဖြစ်နေသည်။ အဆုံးမဲ့ နတ်အလင်းတို့က သူ့ပုံရိပ်ပေါ်တွင် အဆုံးမဲ့ နတ်အလင်းတို့ စုစည်းလာ၏။ ချန်ယိက တစ်ဖန်လှုပ်ရှားလိုက်ပြန်သည်။ သူ့အလင်းစွမ်းအားနှင့် သူသည် သူ့အပေါ်သို့ ကျဆင်းလာနေသော ယင်ယန်ကပ်ဘေးအလင်းတို့ကို တိုက်ရိုက်ထိုးဖောက်လိုက်သည်။ သူက ရီဖူရှင်းထံသို့ တည့်မတ်စွာ ပြေးဝင်သွားလေသည်။
ကျယ်လောင်သော လေတိုးသံကို ကြားလိုက်ကြရသည်။ ကပ်ဘေးအလင်းက ဆက်လက်ကျဆင်းလာနေပြီး ချန်ယိ၏ အလင်းများပေါ်သို့ သက်ဆင်းသွား၏။ သို့သော်လည်း ရီဖူရှင်း၏ ပြိုင်ဘက်က နောက်ဆုတ်မည့် အရိပ်အယောင်မပြဘဲ ရှေ့သို့သာ ဆက်လက်တိုးဝင်လာ၏။
ဝှစ်…
ရီဖူရှင်း၏ ပုံရိပ်သည်လည်း လှုပ်ရှားသွားသည်။ အလွန် ကြောက်မက်ဖွယ် ယင်ယန်ဝင်္ကပါကလည်း သူနှင့်အတူ လှုပ်ရှားလာသည်။ မရေတွက်နိုင်သော ယင်ယန်ကပ်ဘေးအလင်းများက သူ့ကို ကာကွယ်ထားပြီး ချန်ယိထံ ကျဆင်းလာသည်။ လူအုပ်ကြီးသည် သူတို့၏ ခေါင်းများကို မော့ပြီး အလင်းတန်းနှစ်ခုက အချင်းချင်း တိုက်မိသွားသည်ကို မြင်တွေ့လိုက်ရ၏။ အလွန် ပြင်းထန်သော မျက်စိကျိန်းဖွယ် အလင်းတို့ ထိုးထွက်လာကာ ပတ်ဝန်းကျင်တစ်ခုလုံးကို အလင်းတို့နှင့် လွှမ်းခြုံထားလိုက်သည်။ လမ်းစဉ်တိုက်ပွဲစင်မြင့်နေရာက ပြင်းထန်စွာ တုန်ခါနေလေသည်။
မျက်စိကျိန်းဖွယ်အလင်းတို့ ပျောက်ကွယ်သွားပြီး လမ်းစဉ်တိုက်ပွဲစင်မြင့်က ပုံမှန်ပြန်ဖြစ်သွားသည်။ ချန်ယိက ထိုနေရာ၌ တိတ်ဆိတ်စွာ ရပ်နေခဲ့၏။ သူ့အဝတ်များက စုတ်ပြဲနေသော်လည်း သူက မားမားမတ်မတ် ရပ်နေဆဲဖြစ်ကာ ရီဖူရှင်းအား မော့ကြည့်နေသည်။
ရီဖူရှင်းသည်လည်း ထိုနေရာ၌ တိတ်ဆိတ်စွာ ရပ်နေကာ သူ၏ ပြိုင်ဘက်ကို ကြည့်နေခဲ့သည်။ ထိုချန်ယိက ရီဖူရှင်းတွေ့ဖူးသမျှ သူနှင့် တူညီသောမျိုးဆက်၌ အစွမ်းထက်ဆုံးပင် ဖြစ်လေသည်။
“အံ့မခန်းပါပဲ။ ကျုပ်ရဲ့ အလင်းစွမ်းအားတိုင်းက မင်းကို ထိတောင် မထိနိုင်ခဲ့ဘူး။” ချန်ယိက ချီးမွမ်းလိုက်သည်။ သူက ဆက်ပြောလိုက်၏။ “ကြည့်ရတာ တုန်းဟွာနယ်မြေအတွင်း တူညီတဲ့ မျိုးဆက်ကြားမှာ ဒီလိုလုပ်နိုင်စွမ်းရှိတဲ့သူ မရှိလောက်ဘူး။”
သူ၏ စကားလုံးများတွင် ပြင်းထန်သော ယုံကြည်ချက်များ ပါဝင်နေသည်။ သူမလုပ်နိုင်သည့်အရာကို အခြားသူများလည်း လုပ်နိုင်မည်မဟုတ်ဟု တွေးထားပုံရသည်။ သို့သော်လည်း ထိုယုံကြည်ချက်သည် မာနကြီးမှု၏ နယ်နိမိတ်မျဉ်းဖြစ်ကာ လူအများကလည်း အသိအမှတ်ပြုထားပေသည်။
ချန်ယိကဲ့သို့ အစွမ်းထက်သူတစ်ယောက်ပင် ရီဖူရှင်းအား ခြိမ်းခြောက်နိုင်စွမ်း မရှိခဲ့ပေ။
***