အပိုင်း(၂၀၃၁)

ထိုက်ဟွာနတ်တေးသွားသံစဉ်

လူအုပ်ကြီးက နင်ဟွာကို ချီးမွမ်းကြသည်။ ပျက်စီးခြင်းနတ်နန်းတော်မှ ကျင့်ကြံသူများရှိရာ နေရာတွင် ‘ပျက်စီးခြင်း’ က ခေါင်းငုံ့ကာ အရက်ခွက်ကို ကောက်ယူလိုက်သည်။ ထို့နောက် သူက တကျိုက်တည်း မော့သောက်လိုက်၏။ သူက ခေါင်းကိုမော့ကာ တုန်းဟွာကျောင်းတော်မှ တန်ခိုးရှင်များကြား နင်ဟွာ ရှိနေရာသို့ ကြည့်လိုက်သည်။

တိုက်ပွဲဝင်လိုစိတ်က သူ့မျက်လုံးထဲမှ ထွက်ပေါ်လာသည်။ တစ်စုံတစ်ခုအား အာရုံခံမိပုံရကာ နင်ဟွာက ခေါင်းကိုလှည့်၍ ‘ပျက်စီးခြင်း’ ထံ ကြည့်လိုက်သည်။ သူတို့အကြည့်များက ဆုံတွေ့သွားကြသည်။ သဏ္ဌာန်မဲ့လှိုင်းတစ်ခုက သူတို့ကြား၌ ဖြစ်တည်လာသည်။

ပတ်ဝန်းကျင်မှ လူများကလည်း တစ်စုံတစ်ခုကို အာရုံခံမိပုံရပေသည်။ သူတို့၏ အကြည့်များက ထိုနှစ်ယောက်ထံ ရွှေ့ပြောင်းရောက်ရှိလာသည်။

ပျက်စီးခြင်းနတ်နန်းတော်မှ တန်ခိုးရှင်များ တုန်းဟွာကျောင်းတော်သို့ လာရောက်သောအခါ ‘ပျက်စီးခြင်း’ က နင်ဟွာကို စိန်ခေါ်ခဲ့သည်။ သို့သော်လည်း နင်ဟွာက ထိုနေရာ၌ မရှိခဲ့ပေ။

ယခု ထိုသို့အခွင့်အရေး ရလာသောအခါ ‘ပျက်စီးခြင်း’ က သေချာပေါက် သူ့ကို အလွတ်ပေးလိမ့်မည် မဟုတ်ပေ။

သို့သော်လည်း ‘ပျက်စီးခြင်း’ က စိတ်မလှုပ်ရှားပေ။ သူသည် နင်ဟွာနှင့် ယှဉ်ရန် လူတိုင်း တိုက်ခိုက်ပြီးသည့်တိုင် စောင့်ဆိုင်းရပေလိမ့်မည်။ သူသည် တုန်းဟွာနယ်မြေအတွင်း ထိပ်သီးပုဂ္ဂိုလ်အဖြစ် ကျော်ကြားသော ထိုအထူးချွန်ဆုံး ပုဂ္ဂိုလ်က မည်မျှ အစွမ်းထက်ကြောင်း မြင်တွေ့လိုပေသည်။

တုန်းဟွာနန်းတော်အတွင်း ပုဂ္ဂိုလ်ကြီးများကလည်း တစ်ခုခုကို ခံစားမိခဲ့သည်။ သူတို့က အောက်ဘက်သို့ ငုံ့ကြည့်ကာ အပြုံးများ ဖြစ်ပေါ်လာသည်။ ကြည့်ရသည်မှာ ထိိပ်သီးပုဂ္ဂိုလ်များ၏ စိတ်လှုပ်ရှားဖွယ် တိုက်ပွဲက ပေါ်ပေါက်လာတော့မည် ဖြစ်သည်။ ‘ပျက်စီးခြင်း’ နှင့် နင်ဟွာအပြင် အခြား ထူးချွန်သူအများအပြားလည်း ရှိသည်။

အခြားသူများက အချင်းချင်း စမ်းသပ်ရန် ထိုအခွင့်အရေးအား သေချာပေါက် အသုံးပြုလိမ့်မည် ဖြစ်သည်။

ထိုအခိုက်အတန့်တွင် အခြားပုံရိပ်တစ်ခုက ရှေ့သို့ ခြေလှမ်းလာပြီး လမ်းစဉ်တိုက်ပွဲထက် ပေါ်ပေါက်လာသည်။ ထိုရန်ဟောင်ထံ၌ စိတ်ကူးယဉ်ဆန်သော အရှိန်အဝါတို့ ရှိပြီး သိမ်မွေ့ပုံပေါ်သည်။

“သူက တုန်းဟွာကောင်းကင် ကု့ချင်းနန်းတော်က တန်ခိုးရှင်တစ်ယောက်ပဲ။” တစ်စုံတစ်ယောက်က အသက်သုံးဆယ်အရွယ် ရန်ဟောင်အား မြင်သည့်အခါ ပြောလိုက်သည်။ ကု့ချင်းနန်းတော်သည် တုန်းဟွာကောင်းကင်၏ ထိပ်သီးအင်အားစုတစ်ခု ဖြစ်သည်။ တုန်းဟွာကောင်းကင်အတွင်း ထိပ်သီးအင်အားစုများမှ အားလုံးသော ရန်ဟောင်များက တုန်းဟွာအခမ်းအနားသို့ တက်ရောက်လာကြသည်။ ဘုံကိုးဆင့်ကောင်းကင်တွင် တုန်းဟွာကောင်းကင်၏ ရန်ဟောင်အများဆုံး ဖြစ်သည်။

ထို့ကြောင့် ယခုအချိန်ထိ တိုက်ပွဲစင်မြင့်ထက် တက်လာသည့် အားလုံးသော ရန်ဟောင်များက တုန်းဟွာကောင်းကင်မှ တန်ခိုးရှင်များ ဖြစ်ကြသည်။

ကု့ချင်းနန်းတော်မှ ရန်ဟောင်က ခေါင်းကို မော့ကာ ကောင်းကင်သို့ ကြည့်လိုက်သည်။ သူ၏ အကြည့်များက လူတစ်ယောက်ထံ ကျရောက်သွား၏။ လူအများက သူကြည့်နေရာသို့ ချက်ချင်း လှည့်ကြည့်လိုက်ကြသည်။ ထိုသူမှာ ညှို့ယူဖမ်းစားနိုင်သော ရုပ်ရည်သွင်ပြင်နှင့် အကြွင်းမဲ့လှပသည့် နတ်မိမယ်ထိုက်ဟွာ ဖြစ်သည်။

သူတို့သည် ကု့ချင်းနန်းတော်မှ တန်ခိုးရှင်ထွက်လာသည်ကို မြင်သောအခါ ဤလမ်းစဉ်တိုက်ပွဲအတွက် ရွေးချယ်ခံရသူက နတ်မိမယ်ထိုက်ဟွာ ဖြစ်လိမ့်မည်ဟု ခန့်မှန်းခဲ့ကြသည်။

ထိုရန်ဟောင်က ပြောလိုက်၏။ “ကျုပ်က ကု့ချင်းနန်းတော်က ဖြစ်ပြီးတော့ မှော်တေးသွားစွမ်းရည်မှာ ကျွမ်းကျင်ပါတယ်။ ထိုက်ဟွာကောင်းကင်အရှင်ရော နတ်မိမယ်ထိုက်ဟွာပါ လာမယ်လို့ ကျုပ် ကြားခဲ့တယ်။ ကျုပ်က ခင်ဗျားတို့ နှစ်ယောက်လုံးကို လေးစားခဲ့တာ ကြာပါပြီ။ ဒါကြောင့် ကျုပ် ဒီနေ့ ထိုက်ဟွာနတ်တေးသွားကို ကြားနိုင်မယ့် အခွင့်အရေးများ ရှိမလား သိချင်မိတယ်။” လူအများက ၎င်းကို  မျှော်လင့်နေခဲ့ကြသည်။ ကျင့်ကြံခြင်းလောကအတွင်း အကျော်ကြားဆုံး ထိပ်တန်း တေးသွား ဆယ်ပုဒ်ထဲမှ တစ်ခုကို ‘ထိုက်ဟွာ’ ဟု ခေါ်ပေသည်။

ထိုက်ဟွာတောင်ဖြစ်စေ ထိုက်ဟွာကောင်းကင်အရှင်ဖြစ်စေ ထိုတေးသွားကို အစွဲပြုကာ အမည်ပေးထားခြင်း ဖြစ်သည်။ သူတို့၏ အမည်များက ထိုက်ဟွာမဟုတ်သော်လည်း ထိုက်ဟွာနတ်တေးသွားကို ကျင့်ကြံသည့်အတွက် ခေါ်ခြင်း ဖြစ်သည်။

မရေတွက်နိုင်သော အကြည့်များက နတ်မိမယ်ထိုက်ဟွာပေါ်သို့ ကျရောက်လာသည်။ သူမက ထရပ်လိုက်ပြီးနောက် ရှေ့သို့ ခြေလှမ်းလိုက်သည်။ သူတို့က သူမ၏ မှင်တက်လောက်အောင် အကြွင်းမဲ့ လှပသော အသွင်အပြင်ကို ကြည့်လိုက်ပြီး လူအများ၏ နှလုံးသားများက လှုပ်ရှားလာပေသည်။ လူအချို့က သူတိုလ မွေးဖွားလာသည့် အချိန်ကတည်းက ကောင်းချီးများ ပိုင်ဆိုင်ထားကြသည်။ သူမသည် ထူးချွန်လှသော ကျင့်ကြံခြင်း အရည်အချင်းများကို ပိုင်ဆိုင်ထားရုံမျှမက ပြိုင်စံရှားအလှတစ်ပါးလည်း ဖြစ်သည်။ အချို့လူများက ကောင်းကင်မှ နှစ်သက်ခြင်းခံရသည့် ကံကြမ္မာရှိကြပေသည်။

ဥပမာအနေနှင့် နင်ဟွာသည် မွေးဖွားစဉ်ကတည်းက အခြားလူများ၏ အထက်တွင် ရှိကာ ကောင်းကင်၏ ဂုဏ်ယူဖွယ်ရာ သားတော်တစ်ပါး ဖြစ်သည်။

နတ်မိမယ်ထိုက်ဟွာက ရှေ့သို့ လျှောက်လာပြီး သူမ၏ ခန္ဓာကိုယ်မှ အလင်းရောင်ဝါတစ်ခု ထွက်ပေါ်လာသည်။ ၎င်းက ညှို့ယူဖမ်းစားနိုင်ပြီး ငြိမ်သက်သော အရှိန်အဝါရှိသည်။ သူမ၏ ခြေလှမ်းများက ဂီတနတ်မိမယ်များကဲ့သို့ပင်။ သူတို့ ပြုလုပ်သော တေးသံက လူအများ၏ နှလုံးသားများကို ညှို့ယူနိုင်သည်။ ထိုခံစားချက်က အလွန် အံ့သြဖွယ်ကောင်းလှသည်။ ၎င်းက အာရုံမှားခြင်း မဟုတ်ဘဲ နတ်မိမယ်ထိုက်ဟွာက အမှန်တကယ် ထိုသို့သော ခံစားချက်ကို ပေးစွမ်းပေသည်။

ဓားသမားက ထက်ရှသော ခံစားချက်ကို ပေးစွမ်းပြီး မဟာလမ်းစဉ် အေးခဲခြင်းစွမ်းရည်ကို ကျင့်ကြံသူက လူအများအား အေးစက်မှုကို ခံစားရစေသည်။

နတ်မိမယ်ထိုက်ဟွာက လူအများကို လှပသော တေးသွားအား နားထောင်နေရသကဲ့သို့ ခံစားချက်ကို ပေးစွမ်းပေသည်။ ၎င်းက အလွန် လန်းဆန်းစေသည်။ သူမကို ကြည့်ရသည်မှာ တေးသွားတစ်ပုဒ်သဖွယ် ကြည်နူးဖွယ် ကောင်းလှသည်။

“အံ့သြစရာပဲ။ မဟာလမ်းစဉ် တေးသွားက သူမ ခန္ဓာကိုယ်နဲ့ အပြည့်အဝပေါင်းစပ်နေပြီ။ သူမက တေးသွားကို ပေါ့ပေါ့ပါးပါး အသုံးပြုနိုင်တယ်။ သူမရဲ့ ခန္ဓာကိုယ်က မဟာလမ်းစဉ် တေးသွားသင်္ကေတတွေလို ဖြစ်နေပြီ။” လီချန်ရှန်းက ချီးမွမ်းလိုက်သည်။ သူ့အနီးမှ လူများသည်လည်း တူညီစွာ ခံစားလိုက်ကြရသည်။ သူတို့ကလည်း သူ၏ ချီးမွမ်းမှုကို သဘောတူကြသည်။ သူမ၏ ကျင့်ကြံခြင်းက အံ့အားသင့်ဖွယ် ကောင်းလှသည်။

ရီဖူရှင်းသည်လည်း ၎င်းကို ခံစားမိပေသည်။ သူသည် နတ်တေးသွားကို ကျင့်ကြံသော်လည်း ထိုသို့သောအဆင့်ထိ မရောက်ရှိသေးပေ။ ကြည့်ရသည်မှာ တစ်ဖက်လူက မှော်တေးသွားတွင် သူ့ထက်ပို၍ အောင်မြင်မှုရရှိထားပုံပေါ်သည်။ သူသည် တေးသွားသံစဉ်အား သူ၏ ကျင့်ကြံမှုကို ထောက်ပံ့ရန်သာ ကျင့်ကြံခဲ့ခြင်းဖြစ်သည်။ သို့သော် နတ်မိမယ်ထိုက်ဟွာက ကွာခြားပေသည်။ သူမက မဟာလမ်းစဉ်တေးသွားတွင် တစ်ဖက်ကမ်းခတ်ကာ သူမ၏ ခန္ဓာကိုယ်နှင့် စိတ်စွမ်းအားတို့က မှော်တေးသွားနှင့် တသားတည်း ဖြစ်သောအဆင့်ထိ ရောက်ရှိနေပြီ ဖြစ်သည်။

ထို့ကြောင့် ရီဖူရှင်းက ထိုတိုက်ပွဲကို မျှော်လင့်နေမိသည်။ နတ်မိမယ်ထိုက်ဟွာက မည်မျှ အစွမ်းထက်မည်နည်း။

နတ်မိမယ်ထိုက်ဟွာက လမ်းစဉ်တိုက်ပွဲ စင်မြင့်ထက်သို့ ခြေချကာ ကု့ချင်းနန်းတော်မှ တန်ခိုးရှင်ရှေ့တွင် ရပ်လိုက်သည်။ “နတ်မိမယ် ကျေးဇူးပြုပြီး သက်ညှာပေးပါဦး။”

“စကြတာပေါ့။” နတ်မိမယ်ထိုက်ဟွာက ခေါင်းညိတ်ကာ ပြန်ဖြေလိုက်သည်။ တစ်ဖက်လူက ထိုင်ချကာ တင်ပျဥ်ခွေလိုက်သည်။ သူ့ရှေ့တွင် ရှေးဟောင်းကု့ချင်းတစ်လက် ပေါ်ပေါက်လာသည်။ ချက်ချင်းပင် သူ၏ မှော်တေးသွားက မဟာလမ်းစဉ် နတ်အလင်းအဖြစ် အပြင်ဘက်သို့ ထွက်ပေါ်လာသည်။ အလွန် လျင်မြန်စွာနှင့် တေးသွားသံစဉ်က ကောင်းကင်ကို လွှမ်းခြုံလာသည်။ မဟာလမ်းစဉ် တေးသွားက လေထဲတွင် ပြည့်နှက်လာခဲ့သည်။

ထိုက်ဟွာနတ်မိမယ်က ထိုနေရာတွင် တိတ်ဆိတ်စွာ ရပ်နေခဲ့သည်။ သူမ၏ ခန္ဓာကိုယ်ထက်တွင် သဏ္ဌာန်မဲ့မှော်တေးသွားက လေပွေလှိုင်းများကဲ့သို့ အပြင်ဘက်သို့ ထွက်ပေါ်လာသည်။ သူမရှေ့တွင် မဟာလမ်းစဉ် ကု့ချင်းတစ်လက် ပေါ်ပေါက်လာသည်။ သူမအနီးရှိ မဟာလမ်းစဉ်စွမ်းအားများက ကု့ချင်းကြိုးများအဖြစ် အသုံးတော်ခံနေသည်။ ကြိုးတစ်ချောင်းချင်းစီက မဟာလမ်းစဉ်မှော်တေးသွားမှ ဖြစ်တည်လာခြင်း ဖြစ်သည်။

ထိုမျှသာ မဟုတ်ပေ။ သူတို့ဝန်းကျင်မှ လမ်းစဉ်တေးသွားက အံ့အားသင့်ဖွယ်ကောင်းလောက်အောင် တသားတည်း ဖြစ်လာပုံရသည်။ ကောင်းကင်တစ်ခုလုံးကို မဟာလမ်းစဉ်စွမ်းအားနှင့် လွှမ်းခြုံထားပြီး သီးခြားနယ်မြေတစ်ခု ဖြစ်တည်လာပုံရသည်။ လေဟာနယ်တစ်ခုလုံးက သူမ၏ မှော်တေးသွားနယ်မြေအတွင်း ကျရောက်သွားသည်။ မရေတွက်နိုင်သော ကု့ချင်းကြိုးများက သူတို့အနီးတွင် ပေါ်ပေါက်လာသည်။

နတ်မိမယ်ထိုက်ဟွာက သူမ၏ နူးညံ့သော လက်များကို ဆန့်ထုတ်လိုက်သည်။ သူမ၏ လက်များက ဖြူနုနေကာ လက်ချောင်းများက သေးသွယ်လှပသည်။ သူမက လက်ချောင်းများကို ကွေးညွှတ်ကာ ကု့ချင်းကြိုးများကို တီးခတ်လိုက်သည်။

တေးသွားသံစဉ်က ကြိုးတစ်ချောင်းစီမှ ထွက်ပေါ်လာသည်။ ချက်ချင်းပင် အသံလှိုင်းတစ်ခု ထွက်ပေါ်လာပြီး မဟာလမ်းစဉ်နယ်မြေအတွင်း ကု့ချင်းကြိုးများကို လိုက်ဖက်ညီကာ တသားတည်း ဖြစ်လာစေသည်။ သူမက ကျယ်လောင်စွာနှင့် စွမ်းအားပြည့်ဝစွာ တီးခတ်နေသည်။ ထိုနူးညံ့လှပသော ပုံရိပ်လေးက ကု့ချင်းကြိုးများကို ရိုးရှင်းစွာ တီးခတ်ရင်း ထိုမျှ အစွမ်းထက်သော တေးသွားကို ထုတ်ဖော်နိုင်လိမ့်မည်ဟု တွေးရန် ခက်ခဲပေသည်။

တစ်ဖက်လူ၏ တေးသွားက ဖြတ်တောက်ခံရလုနီးပါး ဖြစ်သွားခဲ့သည်။ ထိုရန်ဟောင်မှာ သူ၏ ခန္ဓာကိုယ်က အလွန် လေးလံလာသည်ကို ခံစားလိုက်ရသည်။ သူ၏ ကြိုးများကို တီးခတ်ရသည်မှာ အလွန် ခက်ခဲလှသည်။ အစွမ်းထက်လှသည့် တေးသွား သက်ရောက်မှုအောက်တွင် သူ တီးခတ်နေသော တေးသွားက တိုက်ရိုက် ဖိနှိပ်ခံလိုက်ရသည်။

နတ်မိမယ်ထိုက်ဟွာက မရပ်တန့်ခဲ့ပေ။ သူမ၏ လက်ချောင်းများက ကု့ချင်းထိပ်တွင် ကခုန်နေခဲ့သည်။ ချက်ချင်းပင် မရေတွက်နိုင်သော မဟာလမ်းစဉ် တေးသွားများက အဆက်မပြတ် ထွက်ပေါ်လာသည်။ တေးသွားတစ်ခုချင်းစီတွင် ပြိုင်ဘက်ကင်း စွမ်းအားတို့ ပါဝင်နေသည်။ ၎င်းက စွမ်းအားနှင့် ပြည့်နေသော လှပသည့် တေးသွားတစ်ပုဒ် ဖြစ်သည်။ ၎င်းက လေးလံကာ အစွမ်းထက်သည်။ ပတ်ဝန်းကျင် လေဟာနယ်တစ်ခုလုံးက သည်းမခံနိုင်လောက်အောင် လေးလံလာပေသည်။ ယင်းက တစ်ဖက်တန်ခိုးရှင်၏ ပုံရိပ်အား ဖိနှိပ်လိုက်သည်။  ထိုရန်ဟောင်က သူ၏ စိတ်ဝိညာဥ်အတွင်းမှပင် ကြောက်မက်ဖွယ်ဖိအားကို ခံစားခဲ့ရသည်။

ထိုအခိုက်အတန့်တွင် သူက ပုံရိပ်ယောင်တစ်ခုကို မြင်တွေ့လိုက်ရ၏။ သူ ရပ်နေသည့် မြေပေါ်သို့ နတ်တောင်များ ကျဆင်းလာသည်ဟု ခံစားလိုက်ရသည်။ ကျယ်ပြောသော လောကအတွင်း တစ်ယောက်တည်း ရပ်နေသည့် သူက အလွန် သေးငယ်နေပုံရသည်။ သူ၏ မဟာလမ်းစဉ်က ဖိနှိပ်ခံထားရပြီး သူ၏ အသွေးအသားနှင့် စိတ်ဝိညာဥ်သည်လည်း ဖိနှိပ်ခံထားရသည်။ သူက ကု့ချင်းအား ဆက်၍ တီးနိုင်စွမ်း မရှိတော့ပေ။ သူ၏ ကြိုးများက ပြတ်သွားခဲ့သည်။ သူက ခေါင်းကို မော့ကာ သူမ၏ မဟာလမ်းစဉ် ကု့ချင်းကြိုးများကို ကြည့်လိုက်သည်။ ယင်းတို့က သဏ္ဌာန်မဲ့နေဟန် ရှိသော်လည်း သူသည် ၎င်းတို့အား ရှင်းလင်းစွာ မြင်နိုင်သလို ခံစားရပေသည်။ ကြိုးများက နေရာအနှံ့တွင် ရှိနေပြီး သူ့ရှေ့တွင် တောင်များကဲ့သို့ ရှိနေခဲ့သည်။

ထိုအချိန်တွင် ခံစားမှုက ရုတ်တရက် ပျောက်ကွယ်သွားသည်။ မဟာလမ်းစဉ် နယ်မြေသည်လည်း ပျောက်ကွယ်သွားကာ အရာအားလုံးက အိပ်မက်တစ်ခုလိုပင် ဖြစ်သည်။ သူ့ရှေ့၌ ပြိုင်ဘက်ကင်းအလှလေးတစ်ယောက်က ကောင်းကင်တွင် မျောလွင့်နေသည်။ သူမက ထိုနေရာတွင် တိတ်ဆိတ်စွာ ရပ်နေပြီး ရင်သပ်ရှုမောဖွယ် မြင်ကွင်းကို ပေးစွမ်းနေသည်။

“ကျေးဇူးအများကြီးတင်ပါတယ် နတ်မိမယ်။” ရန်ဟောင်က သူမကို အရိုအသေပေးကာ ပြောလိုက်သည်။ သူမက သူ့အား ထိုက်ဟွာနတ်တေးသွားကို တွေ့ကြုံခံစားစေနိုင်ရုံသာ လုပ်ဆောင်ခဲ့သည်။ ထို့ကြောင့် သူက ကျေးဇူးတင်သင့်ပေသည်။ မဟုတ်လျှင် နတ်မိမယ်ထိုက်ဟွာ၏ စွမ်းရည်နှင့် သူမတီးခတ်သော မည်သည််တေးသွားမဆို သူ့အား ဖျက်ဆီးပစ်နိုင်ပေသည်။

သို့သော်လည်း ယခု သူက ထိုက်ဟွာနတ်တေးသွား၏ ခမ်းနားထည်ဝါသော စွမ်းအားကို အမှန်တကယ် ခံစားမိပေသည်။ ထိုသို့သော အလွန် အစွမ်းထက်သော စွမ်းအားနှင့် ရင်ဆိုင်ရသည့်အခါ အဆင့်မြင့်ရန်ဟောင်သည်ပင် သေးငယ်သလို ခံစားရပေသည်။

နတ်မိမယ်ထိုက်ဟွာက ခေါင်းညိတ်လိုက်သည်။ ထို့နောက် သူမက လမ်းစဉ်တိုက်ပွဲထက်မှ ဆင်းလာကာ သူမ၏ နေရာသို့ ပြန်သွားခဲ့သည်။

ရီဖူရှင်းက သူမကို ကြည့်လိုက်သည်။ သူသည် ထိုက်ဟွာနတ်တေးသွားကို အနီးကပ် မတွေ့ကြုံခဲ့ရသော်လည်း လမ်းစဉ်တိုက်ပွဲထက်မှ ခမ်းနားသော စွမ်းအားကို ခံစားမိပေသည်။ ၎င်းက အစွမ်းထက်ကာ ကြွယ်ဝသည်။ ယင်းက မဟာလမ်းစဉ်ကို ဖိနှိပ်နိုင်သည်။ သူသည် ၎င်းနှင့် ပျောက်ဆုံးခြင်းနတ်တေးသွားတို့တွင် မည်သည်က ပိုအစွမ်းထက်သည်ကို သိခဲ့ပြီ ဖြစ်သည်။

“အံ့သြစရာပဲ။” တုန်းဟွာနန်းတော်မှ နယ်မြေသခင်နင်က ချီးမွမ်းလိုက်သည်။ “ဒီနေ့ တုန်းဟွာအခမ်းအနားက အံ့သြစရာတွေနဲ့ ပြည့်နေတာပဲ။ ကျုပ်တို့လို အဖိုးကြီးတွေတောင် ဒီလို နတ်တေးသွားကြောင့် အံ့အားသင့်သွားရတယ်။ ကြည့်ရတာ သူမက ထိုက်ဟွာကောင်းကင်အရှင်ရဲ့ အမွေကို အပြည့်အဝ ဆက်ခံခဲ့ပုံပဲ။”

“ထိုက်ဟွာကောင်းကင်အရှင်ရဲ့ သမီးက ကောင်းကင်ကတောင် ဂုဏ်ယူရတဲ့ ပြိုင်ဘက်ကင်း သမီးတော်ပဲ။ အမျိုးသားတွေ ကြားမှာတောင် သူမကို ယှဉ်နိုင်တာ နည်းနည်းပဲ ရှိလိမ့်မယ်။ သူမက သေချာပေါက် အထွတ်အထိပ် ပုဂ္ဂိုလ်တစ်ဦး ဖြစ်လာလိမ့်မယ်။ သူမက ဒုနယ်မြေသခင်ကို သတိရစေတယ်။” လင်းရှောင်နန်းတော် သခင်က အပြုံးနှင့် ပြောလိုက်သည်။ သူ၏ စကားလုံးများက လူအများ၏ စိတ်ထဲတွင် အတွေးတစ်ခု ထင်ဟပ်လာစေသည်။

သူက မည်သည်ကို ပြောချင်နေသနည်း။

သို့သော်လည်း နင်ဟွာနှင့် နတ်မိမယ်ထိုက်ဟွာက အမှန်တကယ် လိုက်ဖက်ပေသည်။ သူတို့နှစ်ယောက်လုံးက ဤမျိုးဆက်၏ ထိပ်သီးအဆင့်များ ဖြစ်ကြသည်။

“ခင်ဗျားတို့ အားလုံးက အရမ်းမြှောက်ပင့်လွန်းနေပါပြီ။ မြူနှင်းဝေနတ်နန်းတော်က ဂျူနီယာတွေကလည်း သူမထက် မနိမ့်ကျပါဘူး။ ထိုက်ဟွာကောင်းကင်အရှင်က အပြုံးနှင့် ပြောလိုက်သည်။

အောက်ဘက်တွင် တုန်းဟွာကျောင်းတော် အဖွဲ့ဝင်များရှိရာ၌ နင်ဟွာက အရက်ခွက်ကို မြှောက်ကာ ထိုက်ဟွာနတ်မိမယ်အား ပြောလိုက်သည်။ “ဒီနေ့ထိုက်ဟွာနတ်တေးသွားကို ကြားရတဲ့အထိ ကံကောင်းမယ်လို့ ထင်မထားမိဘူး။ အဲဒါက ကျင့်ကြံခြင်း လောကရဲ့ အကျော်ကြားဆုံး တေးသွား ဆယ်ပုဒ်ထဲက တစ်ပုဒ်ဖြစ်ဖို့ ထိုက်တန်ပါတယ်။နတ်မိမယ် ဂုဏ်ပြုခွင့်ပြုပါ။”

လူအများက ထူးဆန်းသော အမူအရာတို့်အား ပြသလာသည်။ နင်ဟွာက အလွန် မာနကြီးလှသည်။ ဤသည်မှာ သူ အခြားသူအား ပထမဆုံးအကြိမ် နှုတ်ဆက်ခြင်း ဖြစ်ပေသည်။

“ဒုနယ်မြေသခင် ကျွန်မကို အရမ်း ချီးကျူးလွန်းနေပါပြီ။” နတ်မိမယ်ထိုက်ဟွာက ခွက်မြှောက်ကာ ပြန်ပြော လိုက်သည်။ သူတို့နှစ်ယောက်က ရပ်နေသည့်နေရာမှ အတူတူ သောက်လိုက်ကြသည်။

ထိုမြင်ကွင်းကို ကြည့်ရင်း တုန်းဟွာနန်းတော်မှ လူများထံ၌ အပြုံးတချို့ ထွက်ပေါ်လာသည်။ သူတို့က စိတ်ဝင်စားစရာ တစ်ခုခု တွေ့သွားကြပုံပင်။

နင်ဟွာနှင့် နတ်မိမယ်ထိုက်ဟွာတို့သာ စုံတွဲ ဖြစ်လာခဲ့လျှင် သူတို့က တုန်းဟွာနယ်မြေအတွင်း ဤမျိုးဆက်များကြားတွင် သေချာပေါက်အလိုက်ဖက်ဆုံး စုံတွဲဖြစ်လာပေလိမ့်မည်။

***


Comment

Leave a Reply


Options

not work with dark mode
Reset