အပိုင်း(၂၀၁၁)

သင်ကြားပြသခြင်း

ရီဖူရှင်းနှင့် သူ့အဖွဲ့က လိန်မိသားစု၏ အိမ်တော်၌ အခြေချခဲ့ကြသည်။ အနီးအနားရှိ မိသားစုများမှာ သတင်းအစအနများ ရရှိသွားကြပြီး ဧည့်သည်များက မစဲဘဲ ရှိနေတော့၏။ သို့သော်လည်း ထိုနေရာကို လာသည့် အများစုမှာ တုန်းဟွာနယ်မြေ၏ ထိပ်သီးပုဂ္ဂိုလ်စာရင်းဝင် ဖြစ်လာတော့မည့် ကျုံးချန်အား မြင်တွေ့လိုသောကြောင့် ဖြစ်လေသည်။

ထို့ကြောင့် ကျုံးချန်က အတော်လေး အလုပ်များနေတော့သည်။ တုန်းဟွာကောင်းကင်မှ လူအများစုက သူ့ထံသို့ အထူးလာရောက်လည်ပတ်ကြခြင်း ဖြစ်သည်။ သူတို့ထဲမှ အများစုက အကြီးအကဲများ ဖြစ်ကြပြီး ထိုသူများ၏ လာရောက်လည်ပတ်မှုကို ငြင်းဆန်ရန် ခက်ခဲပေသည်။ အထူးသဖြင့် ထိုလူများက လိန်မိသားစုနှင့် နှစ်ပေါင်းများစွာ ဆက်ဆံရေးကောင်းခဲ့သော မိသားစုများမှ လူတို့ဖြစ်လေသည်။

ရီဖူရှင်းနှင့် လီချန်ရှန်းသည်လည်း အိမ်တော်ဝန်းအတွင်း ရှိနေခဲ့၏။ လီချန်ရှန်းက အဝေးသို့ ကြည့်ကာ အပြုံးနှင့် ပြောလိုက်သည်။ “ဂျူနီယာညီငယ်ကျုံးက အခု အရမ်းအလုပ်များနေတာပဲ။ လာလည်ကြတဲ့သူတွေမှာ လွှမ်းမိုးနိုင်စွမ်းအရှိဆုံး မိသားစုတချို့က ခေါင်းဆောင်တွေလည်း ပါတယ်။”

“အစ်ကိုကျုံးက တုန်းဟွာကောင်းကင်ရဲ့ အနာဂတ်ထောက်တိုင်တစ်ခု ဖြစ်လာမယ့်သူပဲ။ ဒီအင်အားစုတွေရဲ့ တန်ဖိုးထားခြင်းခံရတဲ့အပြင် တချို့အင်အားစုတွေနဲ့ ရင်းနှီးထားတာက ထိခိုက်စရာမရှိပါဘူး။” ရီဖူရှင်းက အပြုံးနှင့် ပြောလိုက်သည်။ ထိုသည်က နားလည်ရန် လွယ်ကူပေသည်။ ဆေးအင်ပါယာ သို့မဟုတ် အင်ပါယာရှီကဲ့သို့သော အစွမ်းထက်သော ပုဂ္ဂိုလ်မျိုးနှင့် သိကျွမ်းခြင်းက အလွန်ကောင်းမွန်သောအရာ ဖြစ်သည်။

ယခု ကျုံးချန်က ဒေသတစ်ခုလုံး၌ အစွမ်းထက်ပုဂ္ဂိုလ် ဖြစ်မလာခင် သူနှင့် အချို့သော ဆက်သွယ်ချက်အချို့ ပြုလုပ်ရခြင်းကို မည်သူက မပျော်ရွှင်ဘဲနေပါမည်နည်း။

“အဲဒါအမှန်ပဲ။ အဲဒီလူတွေထဲ တချို့က သူတို့ ကလန်ရဲ့ အထူးချွန်ဆုံး သခင်မလေးတွေကိုတောင် ခေါ်လာကြသေးတယ်။ အကုန်လုံးက အသွင်အပြင်ရော ပါရမီရော ထိပ်တန်းပဲ။ အဲဒီအဖိုးကြီးတွေ သူတို့ ဘယ်အဆင့်မှာပဲ ရှိနေနေ မျိုးဆက်အငယ်တစ်ယောက်ကို လာဖားယားနေကြတယ်။ ရှက်စရာပဲ။” လီချန်ရှန်းက ထို အဖြစ်အပျက်တစ်ခုလုံးကို တက်ကြွစွာ စောင့်ကြည့်နေရင်း အပြုံးနှင့် ဆက်ပြောလိုက်သည်။ “ဒါပေမယ့် အဲဒီထဲမှာ တချို့ကတော့ အတော်လေး လှကြတယ်။ ဂျူနီယာညီလေးကျုံးကလည်း လက်တွဲဖော်မရှိသေးဘူးဆိုတော့ အခွင့်အရေး ရှိနိုင်ပါတယ်။”

ရီဖူရှင်းသည် လီချန်ရှန်းက နောက်ပြောင်နေကြောင်း သိရှိပေသည်။ ကျုံးချန်၏ ခွန်အားနှင့် ယနေ့ အဆင့်အတန်းအရ သူ၏ တာအိုလက်တွဲဖော်က အလွန် ထူးချွန်သော ပါရမီအရည်အချင်း ရှိနေမှသာ ထိုက်တန်ပေလိမ့်မည်။ သို့သော်လည်း သိသာစွာပင် ထိုသို့သော အတွေးမျိုး ရှိပုံမရပေ။ မဟုတ်လျှင် သူက ယခုထိ လိုက်ဖက်သော လက်တွဲဖော်ကို မရှာဖွေဘဲ ရှိနေလိမ့်မည် မဟုတ်ပေ။

သို့သော် သူတို့က ရန်ဟောင်အဆင့်သို့ ရောက်နေပြီဖြစ်ရာ ထိုသို့သော နည်းလမ်းမျိုးက သူတို့အပေါ် အမှန်တကယ် သက်ရောက်မှုမရှိပေ။  သို့သော်လည်း အစွမ်းထက် မိသားစုကြီးများက ထိုသို့သော နည်းလမ်းကို သုံးရလျှင်ပင် ကျုံးချန်အပေါ် သူတို့၏ အရေးထားမှုကို  ဖော်ပြလိုကြသည်။ သူတို့က သူ့ကို မိသားစုအတွင်း ဆွဲသွင်းရန် အခွင့်အရေးရဖို့ရာ သူတို့ကိုယ်သူတို့ နှိမ့်ချရန် ဝန်မလေးကြပေ။ သူတို့ အောင်မြင်သွားလျှင် ထို နောက်လာမည့် ကြယ်ပွင့်က သူတို့ မိသားစုဝင် ဖြစ်နေမည် ဖြစ်ကာ ထိုပတ်သတ်မှုနှင့် သက်ဆိုင်သော အကျိုးအမြတ်များကိုလည်း သူတို့ ခံစားနိုင်ကြမည် ဖြစ်သည်။

ရီဖူရှင်း၏ အမြင်အရ ထိုအကြံအစည်က ကျရှုံးဖို့ရာများလေသည်။

ထိုအချိန်၌ လူနှစ်ယောက်က ထိုလမ်းအတိုင်း လျှောက်လာနေကြသည်။ သူတို့က လိန်မိသားစုမှ အငယ်များ ဖြစ်ကြသည်။ သူတို့နှစ်ယောက်ကို ကြည့်ရသည်မှာ အသက်နှစ်ဆယ်ကျော်သေးပုံမရပေ။ သူတို့၏ ကျင့်ကြံခြင်းကလည်း အနည်းငယ် နိမ့်ကျနေသေးသည်။ သူတို့က ယောက်ျားလေးတစ်ယောက်နှင့် မိန်းကလေးတစ်ယောက် ဖြစ်ကြပြီး သူတို့က အပြုအမူကောင်းများနှင့် ယဥ်ကျေးပုံပေါ်လေသည်။

“လိန်ယန်၊ လိန်ရှီးက စီနီယာတို့ကို နှုတ်ဆက်ပါတယ်။” သူတို့နှစ်ယောက်က လီချန်ရှန်းနှင့် ရီဖူရှင်း၏ ရှေ့သို့ ရောက်သည့်အခါ အရိုအသေပေးလိုက်သည်။

“အင်း” လီချန်ရှန်းက ခေါင်းညိတ်ပြလိုက်၏။ “ဘာကိစ္စရှိလို့လဲ။”

“ကျွန်မတို့ ဒီမှာ ကျင့်ကြံခြင်းအတွက် အကြံဉာဏ်တချို့ လာတောင်းတာပါ။” လိန်ရှီးက ပြောလိုက်သည်။

လီချန်ရှန်း၏ မျက်နှာထက်တွင် ရယ်မြူးရိပ်တို့ ဖြစ်ပေါ်လာသည်။ လိန်မိသားစုမျိုးဆက်များက ဝမ်ရှန့်စောင့်ကြည့်မျှော်စင်၏ လူများထံမှ အကြံဉာဏ်တောင်းခံခြင်းမှာ ပုံမှန်ပင် ဖြစ်သည်။ အကျိုးမရှိလျှင်ပင် အရှုံးလည်း မရှိသောကြောင့် နားလည်သဘောပေါက်မှုအချို့ ရနိုင်လျှင် အကောင်းဆုံး ဖြစ်သည်။

“မင်းတို့ မိသားစုရဲ့ ညီအစ်ကိုမောင်နှမတွေ အားလုံး ဒီရက်တွေထဲ ကျုံးချန်ဆီ အကြံဉာဏ် သွားမတောင်းကြဘူးလား။ သူက အရမ်းအရည်အချင်းရှိတာ မင်းတို့ အသိပဲ။ မင်းတို့ သူ့ဆီ သွားမေးသင့်တယ်။” လီချန်ရှန်းက ပြုံးလိုက်သည်။

“ကျွန်မတို့ကို အကြီးအကဲတွေက ပြောဖူးတယ်။ ဝမ်ရှန့်စောင့်ကြည့်မျှော်စင်က လာတဲ့ စီနီယာအားလုံးက ကျွန်မတို့အတွက် သင်ကြားပြသပေးခြင်းရဲ့ အဖိုးတန်အရင်းအမြစ်တွေပဲတဲ့။ စီနီယာကျုံးအပြင် စီနီယာလီနဲ့ စီနီယာရီတို့ကလည်း ကျင့်ကြံခြင်းမှာ စီနီယာကျုံးလိုမျိုး နားလည်သဘောပေါက်နိုင်စွမ်းမြင့်မားတဲ့ သူတွေလို့ ပြောကြတယ်။” လိန်ရှီးက အရိုအသေပြုလိုက်သည်။ သူမက အလွန် ယဥ်ကျေးပေသည်။

“မိန်းမငယ်လေးက ဘယ်လိုပြောရမလဲကောင်းကောင်းသိတာပဲ။” လီချန်ရှန်းက အပြုံးနှင့် ပြောလိုက်သည်။ လိန်ရှီးက ငယ်ရွယ်သော်လည်း မြင်နေရသကဲ့သို့ အမှန်တကယ် ငယ်ရွယ်ခြင်း ရှိပုံမရပေ။ သူမက ရှန့်ထိုအဆင့်သို့ ရောက်နေခဲ့ပြီ ဖြစ်၏။ သို့သော်လည်း လီချန်ရှန်းကဲ့သို့ အဖိုးကြီး ရှေ့၌ သူမက မိန်းမငယ်လေးပင် ဖြစ်သည်။ သူက နှစ်ပေါင်းများစွာ ကျင့်ကြံလာခဲ့ပြီး အဆင့်ကိုးရန်ဟောင်သို့ ရောက်ရှိနေခဲ့သော ထိပ်သီးပုဂ္ဂိုလ်တစ်ဦးပင် ဖြစ်သည်။

“သိပ်ကောင်းတယ်။ မင်းက အပြောကောင်းမှတော့ မေးစရာရှိတာ မေးပါ။” လီချန်ရှန်းက အပြုံးနှင့် ပြန်ဖြေလိုက်သည်။

“စီနီယာ ကျွန်တော်ကရော” လိန်ယန်က မေးလိုက်သည်။

“ဟိုမှာ…” လီချန်ရှန်းက ရီဖူရှင်းကို ညွှန်ပြလိုက်ပြီး လိန်ယန်၏ အနည်းငယ် မရေရာသော အကြည့်တို့က သူ့ထံ ကျရောက်လာသည်။ သူသည် ရီဖူရှင်းက အလွန်ပင် ပါရမီရှိပြီး အစွမ်းထက်ကြောင်း အကြီးအကဲများထံမှ ကြားခဲ့ဖူးသည့်အတွက် သံသယမရှိပေ။ သို့သော် ရီဖူရှင်းက အလွန် ငယ်ရွယ်ပေသည်။ လီချန်ရှန်းက အဆင့်ကိုးရန်ဟောင်တစ်ပါး ဖြစ်ကာ ကျုံးချန်ကလည်း ပြီးပြည့်စုံသော မဟာလမ်းစဥ်နှင့် အဆင့်မြင့်ရန်ဟောင်တစ်ပါး ဖြစ်လေသည်။ ထို့ကြောင့် သူတို့နှစ်ယောက်၏ သင်ကြားပြသပေးခြင်းက ရီဖူရှင်းထက် ပို၍ သင့်တော်ပေလိမ့်မည်။ အရည်အချင်းကြောင့် မဟုတ်ဘဲ ကျင့်ကြံခြင်းဆိုင်ရာ နားလည်သဘောပေါက်ခြင်းတွင် အဆင့်မြင့်ရန်ဟောင်များဖြစ်သော လီချန်ရှန်းနှင့် ကျုံးချန်က ပို၍ အားကောင်းပေလိမ့်မည်။

“ဘာလို့လဲ၊ မင်း မယုံဘူးလား။” လီချန်ရှန်းက လိန်ယန်၏ အကြည့်တို့အား မြင်သည့်အခါ ပြုံးလိုက်သည်။

“မလုပ်ရဲပါဘူး။” လိန်ယန်က သူ့ခေါင်းကို ယမ်းကာ ရီဖူရှင်းအား အရိုအသေပေးလိုက်သည်။ “အကြီးအကဲက အကြံပေးဖို့ဆန္ဒရှိရင် ကျွန်တော် လေးစားစွာ သင်ယူမှာပါ။”

“စီနီယာအစ်ကိုက အရမ်းပျင်းနေတာနဲ့ မင်းကို ငါ့ဆီ ထိုးချလိုက်တာပဲ။” ရီဖူရှင်းက လီချန်ရှန်းကို ကြည့်ကာ ပြုံးလိုက်ပြီးနောက် လိန်ယန်အား ခေါင်းညိတ်ပြလိုက်သည်။ “ဘာမေးချင်လို့လဲ။”

“ကျေးဇူးတင်ပါတယ် စီနီယာ။” လိန်ယန်က ရီဖူရှင်း၏ စကားများကို ကြားသည့်အခါ တစ်ဖက်လူက သူ့အား ညွှန်ကြားပြသပေးရန် ဆန္ဒရှိသည်ကို သိလိုက်တာကြောင့် မေးလိုက်၏။ “ဓားပြားကြီးနည်းစနစ်နဲ့ ပတ်သတ်ပြီး နည်းနည်းလောက် ညွှန်ကြားပြသပေးဖို့ တောင်းဆိုချင်ပါတယ်။”

လိန်မိသားစုမှ လူများက ဓားစွမ်းရည်ကြောင့် ကျော်ကြားကြသည်။ လိန်ခွမ်ရှန်းကိုယ်တိုင်က ကောင်းကင်ဓား၏ ပြယုဂ်ဖြစ်သည်။

“ငါက ဓားစွမ်းရည်မှာ ကောင်းပေမယ့် ဓားပြားကြီးနဲ့ ပတ်သတ်တဲ့ ဗဟုသုတကျ သိပ်မရှိလှဘူး။” ရီဖူရှင်းက ပြောလိုက်သည်။

“အကြီးအကဲတွေ ပြောတာတော့ ကျင့်ကြံခြင်းဆိုတာ အကန့်အသတ်မရှိဘူး။ အထူးသဖြင့် သေချာတဲ့ အဆင့်တစ်ခုကို ရောက်သွားခဲ့ရင် ပိုပြီး ကျယ်ပြန့်လာတယ်တဲ့။ ကျွန်တော်တို့ ဦးလေးက ဓားပြားကြီး နည်းစနစ်မှာ တော်ပေမယ့် သူကလည ဝမ်ရှန့်စောင့်ကြည့်မျှော်စင်ကို ဝင်ရောက်ကျင့်ကြံခဲ့တယ်။ ဒါကြောင့် စီနီယာက ဓားပြားကြီး နည်းစနစ်ကို မကျင့်ကြံရင်တောင် လမ်းညွှန်ပြသမှုအချို့တော့ ပေးနိုင်မယ်လို့ ယုံကြည်ပါတယ်။” လိန်ယန်က ပြန်ဖြေလိုက်သည်။

ရီဖူရှင်းက ပြုံးလိုက်၏။ လိန်ယန်က အခွင့်အရေးအား မည်သို့ အရယူရမည်ကို သိရှိပေသည်။ သူတို့ဘေးမှ လီချန်ရှန်းသည် လိန်ရှီးကို စတင်သင်ကြားပေးနေပြီ ဖြစ်တာကြောင့် သူက ပြောလိုက်၏။ “ကောင်းပြီ။ မင်း ဘာမေးခွန်းမေးချင်လဲ။”

“မိသားစုထဲမှာ ကျွန်တော့်အဆင့်အနေအထားက ပါရမီကလည်း ပျမ်းမျှ တိုက်ခိုက်ရေးစွမ်းအားကလည်း အလယ်အလတ်ပဲ ရှိတယ်။ ကျွန်တော်တို့မျိုးဆက်က တချို့ညီအစ်ကိုတွေက တူညီတဲ့ ဓားနည်းစနစ်ကို ကျင့်ကြံကြပေမယ့် သူတို့က ကျွန်တော့်ထက် ပိုသာကြတယ်။ ဒါကြောင့် ကျွန်တော့်ရဲ့ နည်းစနစ်မှာ တစ်နေရာရာက ပြဿနာရှိနေလား ပြောပြပေးပါ။” လိန်ယန်က ရီဖူရှင်းကို ပြောလိုက်သည်။ သူက ကိုယ်ပိုင်ပြဿနာကို နားလည်သဘောပေါက်ခြင်း မရှိသဖြင့် ရီဖူရှင်းအား ညွှန်ပြပေးရန် တောင်းဆိုရခြင်း ဖြစ်လေသည်။

ရီဖူရှင်းက ခေါင်းညိတ်လိုက်သည်။ ထိုလိန်ယန်က ဉာဏ်ကောင်းသော ကောင်လေး ဖြစ်ပေသည်။ ရီဖူရှင်းက ပြောလိုက်၏။ “မင်းရဲ့ ဓားနည်းစနစ်ကို ကြည့်ရအောင်။”

“ကောင်းပါပြီ။” လိန်ယန်က ခေါင်းညိတ်လိုက်သည်။ သူ၏ ပုံရိပ်က လှုပ်ရှားသွားပြီး သူက လေဟာနယ်အတွင်း ခြေလှမ်းကာ ရုတ်တရက် အလွန်အားကောင်းသော မဟာလမ်းစဥ် ဓားစွမ်းရည်တို့ ပေါက်ကွဲထွက်လာ၏။ လိန်ယန်က အရှိန်အဟုန်ဖြင့် လှုပ်ရှားနေပြီး မမြင်ရသော ဓားများက စုစည်းလာကာ သဏ္ဌာန်ဖွဲ့တည်လာသည်။ သူ၏ လက်ဝါးက ကောင်းကင်သို့ ဦးတည်လိုက်လျှင် ရုတ်တရက် လေထဲ၌ ဓားများ ထွက်ပေါ်လာ၏။ သူ့ခန္ဓာကိုယ်မှ အရှိန်အဝါတို့က တက်လက်မြင့်တက်နေပြီး ပို၍ အားကောင်းသန်မာလာသည်။

သန်မာသော ဓားစွမ်းများက လေဟာနယ်အတွင်း စူးရှသော အသံများကို ဖြစ်ပေါ်စေကာ အလွန်ထက်ရှသော အရှိန်အဝါတို့က ကောင်းကင်တခွင်ကို လွှမ်းခြုံသွားသည်။ သူ၏ အရှိန်အဝါက အမြင့်ဆုံးသို့ တက်သွားသည့်အခါ လိန်ယန်က လက်နှစ်ဖက်ကို ဆန့်ထုတ်လိုက်ပြီး ဓားတစ်လက်အား ကိုင်ကာ လေဟာနယ်အတွင်း ခုတ်ပိုင်းလိုက်သည်။ ချက်ချင်းပင် ဓားအလင်းများက တစ်ချိန်တည်း ပေါက်ကွဲထွက်လာကာ အလွန်တောက်ပသည့် ဓားအရှိန်အဝါများအဖြစ် ပြောင်းလဲသွားလေသည်။ ၎င်းတို့က ကောင်းကင်သို့ တည့်မတ်စွာ ထိုးတက်သွားပြီး လေဟာနယ်အား ထက်ပိုင်းခွဲရန် ရည်ရွယ်လိုက်သည်။ ၎င်းတို့က အဝေးသို့ ရောက်သည့်တိုင် အားနည်းသွားခြင်းမရှိပေ။

ရီဖူရှင်းက တိတ်ဆိတ်စွာ စောင့်ကြည့်နေခဲ့သည်။ ထိုဓားပြားကြီးနည်းစနစ်က အလွန်ကောင်းမွန်ပြီး ထိုမှ ထွက်ပေါ်လာသော လမ်းစဥ်စွမ်းအားကလည်း အားကောင်းလှပေသည်။ လိန်ယန်သည် သူ ရှန့်ထိုအဆင့်တွင် ရှိစဥ်ကနှင့် တူညီနေကာ ရက်စက်ပြတ်သား၍ လွှမ်းမိုးနိုင်စွမ်းရှိပြီး အနိုင်မခံအရှုံးမပေးစိတ်ဓာတ်နှင့် ဓားပြားကြီးနည်းစနစ်၏ အနှစ်သာရကို အပြည့်အဝ ဖော်ပြသွားနိုင်သည်။

လိန်ယန်က ဓားစွမ်းအားများကို ရုတ်သိမ်းလိုက်ပြီး မြေပြင်သို့ ဆင်းလာခဲ့သည်။ သူက ရီဖူရှင်း၏ ရှေ့သို့ ပြန်ရောက်လာကာ ပြောလိုက်သည်။ “စီနီယာ”

“မဆိုးဘူး။” ရီဖူရှင်းက ခေါင်းညိတ်ကာ အသိအမှတ်ပြုလိုက်သည်။ “လမ်းစဥ်စွမ်းအားကို အပြည့်အဝ ထုတ်ဖော်သွားနိုင်ပြီး ဓားပြားကြီးလမ်းစဥ်အတိုင်း ရက်စက်ပြတ်သား လွှမ်းမိုးနိုင်စွမ်းရှိတယ်။ ဒါပေမယ့် အင်အားအလွန်အကျွံစိုက်ထုတ်ပြီး အဲဒီပုံစံရအောင် ဖိအားပေးနေသလို ဖြစ်နေတယ်။”

လိန်ယန်က စဥ်းစားနေ၏။ သူက ရီဖူရှင်းစကားလုံးများ၏ နောက်ကွယ်မှ အဓိပ္ပါယ်ကို နားလည်ရန် ကြိုးစားနေသည်။ နောက်ဆုံး၌ သူက ပြောလိုက်၏။ “ကျေးဇူးပြုပြီး ရှင်းပြပေးပါဦး စီနီယာ။”

“လွန်ခဲ့တဲ့ လအနည်းငယ်က ငါ နတ်သမုဒ္ဒရာကုန်းမြေကို သွားခဲ့ပြီး အဲဒီမှာ မိုးကြိုးပြစ်ဒဏ်ကောင်းကင်အရှင် ချန်ရစ်ခဲ့တဲ့ အမွေအနှစ်ကို တွေ့ခဲ့တယ်။ အဲဒီမှာ ပုဆိန်နည်းစနစ်အများကြီးရဲ့ ခုတ်ပိုင်းရာတွေကို တွေ့ခဲ့ပြီး အဲဒီထဲက တချို့ကို မဟာလမ်းစဥ် စွမ်းအား အသုံးပြုပြီး ခုတ်ပိုင်းထားတာ မဟုတ်ဘူးဆိုတာ သိခဲ့ရတယ်။ ဒါပေမယ့် အဲဒီခုတ်ပိုင်းရာတွေက စိတ်စွမ်းအားတွေက မဟာလမ်းစဥ်စွမ်းအားကို သုံးပြီး ခုတ်ပိုင်းထားတာထက် ပိုအားကောင်းနေတယ်။ အမှတ်အသားတွေ အများကြီး လုပ်ပြီးတဲ့အခါမှာ မိုးကြိုးပြစ်ဒဏ်ကောင်းကင်အရှင်က မဟာလမ်းစဥ်ရဲ့ အတားအဆီးကို ချိုးဖျက်နိုင်ခဲ့တယ်။”

“ငါက အဲဒီအခြေအနေထိ မရောက်ခဲ့ပေမယ့် ဉာဏ်အလင်းတချို့ရခဲ့တယ်။ မင်းရဲ့ ဓားနည်းစနစ်မှာ ရည်ရွယ်ချက် စိတ်ဝိညာဥ်ထက် နည်းစနစ်ရဲ့ သဏ္ဌာန်ကို ပိုအလေးထားနေပုံရတယ်။ ဒါက သိပ်သဘာဝမကျဘူး။” ရီဖူရှင်းက ပြောလိုက်သည်။

သို့သော်လည်း လိန်ယန်က တွေဝေနေဆဲသာ ဖြစ်၏။ သူနှင့် ရီဖူရှင်း၏ အဆင့်ကြားတွင် ကွာခြားမှုကြီး ရှိနေရာ နားလည်သဘောပေါက်မှု၌လည်း အတူတူပင် ဖြစ်သည်။ အချို့သော အရာများမှာ သူ၏ နားလည်နိုင်စွမ်းထက် ကျော်လွန်နေပေသည်။

“မင်းရဲ့ ဓားနဲ့ ငါ့ကို တိုက်။” ရီဖူရှင်းက ပြောလိုက်သည်။

“ကောင်းပါပြီ။”

လိန်ယန်က ခေါင်းညိတ်လိုက်ပြီး ဓားစွမ်းအားများကို တဖန်စုစည်းလိုက်သည်။ ရီဖူရှင်း၏ ခန္ဓာကိုယ်အား လေဟာနယ်ကိုပင် ဖျက်ဆီးပစ်တော့မည့် မုန်တိုင်းကဲ့သို့သော ဓားစွမ်းအားများဖြင့် လွှမ်းခြုံထားခဲ့သည်။ နောက်တခဏတွင် လိန်ယန်က ဓားတိုက်ခိုက်မှုကို ပြုလုပ်လိုက်သည်။ သူက တွေဝေခြင်းမရှိဘဲ သူ့ဓားနှင့် ရီဖူရှင်းအား တိုက်ရိုက်တိုက်ခိုက်လိုက်သည်။ သူ၏ ဓားက ရီဖူရှင်းအား အန္တရာယ်မဖြစ်စေသည်ကို သိရှိထားပေသည်။

ရီဖူရှင်းက ဓားလာနေသည်ကို မြင်သောအခါ လက်အား မြှောက်၍ ဓားကို ညွှန်ပြလိုက်သည်။

ထိုအခိုက်၌ လိန်ယန်သည် အနည်းငယ် ထိတ်လန့်မှုကို ခံစားလိုက်ရသည်။ ရီဖူရှင်း၏ လက်ချောင်းမှ မည်သည့် မဟာလမ်းစဥ် အရှိန်အဝါကိုမှ သူ မခံစားမိပေ။

ကလန်…

ဓားက ကျိုးသွား၏။ ထို့နောက် လက်ချောင်းက ကျဆင်းလာပြီး ဓားကျိုးရှိနေသော မြေပြင်တွင် အလင်းတန်းတစ်ခု ပေါ်ပေါက်လာ၏။  မမြင်ရသော သဏ္ဌာန်မဲ့ ဓားစွမ်းအားတစ်ခု ထွက်ပေါ်လာကာ သူ၏ ဓားအား နှစ်ပိုင်းခွဲပစ်လိုက်သည်။

ထိတ်လန့်သွားမှုကြောင့် လိန်ယန်၏ လက်မောင်းများက ဘေးဘက်သို့ တွဲလောင်းကျသွားခဲ့သည်။ ၎င်းက မည်သို့ဖြစ်ရသနည်း။

သူသည် အံ့သြမှင်တက်စွာဖြင့် ထိုနေရာတွင် ရပ်နေခဲ့ပြီး မျက်တောင်ကိုသာ အဆက်မပြတ် ခတ်နေခဲ့သည်။ တစ်ခါတစ်ရံ၌ သူက မျက်မှောင်ကြုတ်လိုက်ပြီး တစ်ခါတစ်ရံ၌ ပြေလျော့သွားခဲ့သည်။ ခဏအကြာတွင် သူက မျက်လုံးများကို မှိတ်လိုက်ပြီး စျာန်ဝင်စားခြင်းအခြေအနေသို့ ရောက်ရှိသွားခဲ့သည်။ သူက ခေတ္တမျှ သူ့ပတ်ဝန်းကျင်ကို မေ့လျော့သွား၏။

ရီဖူရှင်းက သူ့အားမနှောက်ယှက်ပေ။ အခြားတစ်ဖက်တွင် လီချန်ရှန်းနှင့် လိန်ရှီးတို့က သူတို့ထံ ကြည့်နေကြသည်။ အစက သူသည် လိန်ရှီးအား ကျင့်ကြံခြင်းအကြောင်း သင်ကြားပြသပေးနေသော်လည်း လိန်ယန်က မှင်တက်နေသည်အား မြင်လိုက်ရသောအခါ လီချန်ရှန်းက စိတ်ဝင်စားသွားလေသည်။ မည်သည်တို့ ဖြစ်နေသနည်း။

လိန်ရှီးက မည်သို့ဖြစ်သွားသည်ကို မသိဘဲ လိန်ယန်အား ဇဝေဇဝါနှင့် ကြည့်နေခဲ့သည်။

ခဏကြာပြီးနောက် လိန်ယန်၏ ခန္ဓာကိုယ်မှ မမြင်ရသော စွမ်းအင်အတက်အကျ ဖြစ်မှုများ ဖြစ်ပွားလာကာ အချို့အပြောင်းအလဲများက သူ့တစ်ကိုယ်လုံးတွင် နေရာယူလာပုံရသည်။ ထိုအပြောင်းအလဲက မမြင်သာသော်လည်း သူ့အရှိန်အဝါက ယခင်ကထက် ပို၍ ထက်ရှလာပုံရသည်။ သူက မျက်လုံးများကို ဖွင့်ကာ ရီဖူရှင်းကို ကြည့်လိုက်ပြီးနောက် ဦးညွှတ်ကာ အရိုအသေပေးလိုက်၏။ “ကျေးဇူးတင်ပါတယ် ဆရာ။”

ရုတ်တရက် သူ အချိန်ကြာမြင့်စွာ ရှုပ်ထွေးနေခဲ့သော မေးခွန်းက ယခုတွင် ရှင်းလင်းသွားပြီဖြစ်သည်။ သူက ကျင့်ကြံခြင်းလမ်းစဥ်ကို ရှာဖွေတွေ့ရှိခဲ့ပြီ ဖြစ်၏။ သူသည် လီချန်ရှန်းက ညွှန်ကြားပြသပေးရန် မျှော်လင့်ခဲ့မိသော်လည်း ကံကောင်းထောက်မစွာဖြင့် ရီဖူရှင်းက သင်ပြပေးသည်ကို လက်ခံရရှိခဲ့သည်။ သူသည် မျှော်မှန်းထားသည်ထက် ပို၍ ရရှိခဲ့သောကြောင့် အလွန် ကျေးဇူးတင်နေတော့၏။

“ဒါက..” လီချန်ရှန်းက အပြုံးတစ်ခုကို လှစ်ဟပြလာသည်။ “မင်းက သူ့ကို တပည့်အဖြစ် လက်ခံမလို့လား။”

ရီဖူရှင်းက ခေါင်းကို ယမ်းကာ လိန်ယန်အား ကြည့်လိုက်သည်။ “ကျွန်တော့မှာ တပည့်လက်ခံဖို့ ရည်ရွယ်ချက်မရှိဘူး။”

“ကျွန်တော် နားလည်ပါပြီ။” လိန်ယန်က ပြောလိုက်သည်။ “ဒါပေမယ့် ဒီနေ့ စီနီယာ့ဆီက ညွှန်ကြားပြသမှုကို ရရှိခဲ့တာ မမေ့နိုင်စရာ အဖြစ်အပျက်ပါပဲ။ နေ့တိုင်း အမှတ်ရနေပါ့မယ်။”

လိန်ရှီးက အနည်းငယ် အံ့အားသင့်သွားသည်။ ကြည့်ရသည်မှာ လိန်ယန်က အတော်လေး အကျိုးရှိသွားခဲ့ပုံပေါ်လေသည်။

ရီဖူရှင်းက ထပ်မပြောတော့ပေ။ “ငါက မြင်သလောက်ပဲ ထောက်ပြပေးရုံပါယ မင်း ဘယ်လောက် နားလည်သဘောပေါက်နိုင်လဲဆိုတာကတော့ မင်းရဲ့ ကိုယ်ပိုင်အရည်အချင်းပေါ် မူတည်နေတယ်။ ပြန်သွားပြီး ကျင့်ကြံချေ။ သေချာနားလည်အောင် ကြိုးစား။”

“ဟုတ်ကဲ့ စီနီယာ” လိန်ယန်က ဦးညွှတ်ကာ ပြောလိုက်သည်။ “ဒါဆို ကျွန်တော် သွားလိုက်ပါဦးမယ်။”

ထို့နောက် သူက ချက်ချင်း ထွက်ခွာသွားတော့၏။

***


Comment

Leave a Reply


Options

not work with dark mode
Reset