အပိုင်း(၁၉၈၆)

လအနည်းငယ်ခန့်ကြာပြီးနောက် ဝမ်ရှန့်စောင့်ကြည့်မျှော်စင်၏ တိုက်ပွဲမှဖြစ်လာသော မုန်တိုင်းက တဖြေးဖြေး ကုန်လွန်သွားပြီး ထိုအကြောင်းကို ပြောသူ လူအနည်းငယ်သာ ရှိတော့သည်။ သို့သော် ဝမ်တုမှ လူအားလုံးမှာ ဓားအင်ပါယာရီလျှို့နျန်ဟူသော နာမည်ကို မှတ်မိသိရှိသွားကြပေသည်။

ဝမ်တုတခွင် ပျံ့နှံ့သွားသော ကောလာဟလများတွင် ရီလျှို့နျန်က ဒဏ္ဍာရီဆန်သော ပုဂ္ဂိုလ်တစ်ဦး ဖြစ် လာခဲ့သည်။ မြောက်ပိုင်းမှ ရန်ဟောင်တန်ခိုးရှင် စစ်တပ်ကို ဦးဆောင်လာသော ရှေးဟောင်းတော်ဝင် ယန်မိသားစုမှ မင်းသား ယန်တုန်းရန်က တုန်းရှောင်းကုန်းမြေမှ အင်အားစုများနှင့် ဝမ်တုမှ တန်ခိုးရှင်များကို ဖိနှိပ်ခဲ့သော်လည်း ဓားအင်ပါယာရီလျှို့နျန်၏ ဓားတစ်ချက်ဖြင့် ထိုရန်ဟောင်စစ်တပ်တစ်ခုလုံး ချေမှုန်းခံလိုက်ရပေသည်။ သူက ရှေးဟောင်းတော်ဝင် ယန်မိသားစုမှ တန်ခိုးရှင်များကို ပြန်ဆုတ်ခွာသွားအောင် လုပ်ဆောင်နိုင်ခဲ့ပြီး ထိုအောင်မြင်မှုသည် ဆေးအင်ပါယာက သူ့အား အထင်ကြီးလေးစားလာအောင် လုပ်နိုင်စွမ်း ရှိခဲ့ပေသည်။

ယခု ရီလျှို့နျန်သည် ဝမ်ရှန့်စောင့်ကြည့်မျှော်စင်၌ ဆေးအင်ပါယာ၏ ကိုယ်တိုင်လမ်းညွှန် ပြသပေးမှုအောက်တွင် ကျင့်ကြံနေသည်။

တိုက်ပွဲတစ်ပွဲတည်းနှင့် ‘ရီလျှို့နျန်’ ဟူသော အမည်ကို ဝမ်တုမှ လူများအားလုံး သိအောင် လုပ်နိုင်ခဲ့သည်။

ဝမ်ရှန့်စောင့်ကြည့်မျှော်စင်တွင် နောက်ထပ် ပြိုင်ဘက်ကင်း ခွန်အားနှင့် ကျင့်ကြံသူတစ်ဦး ရှိသည်။

ဆေးအင်ပါယာ၏ ကိုယ်ပိုင်ကျင့်ကြံရေးနန်းတော်ဖြစ်သော ဝမ်ရှန့်စောင့်ကြည့်မျှော်စင်သို့ ဝင်ရောက်နိုင်သည့်သူကများများစားစား မရှိပေ။

သို့သော်လည်း ထိုအခိုက်အတန့်တွင် အသက်သုံးဆယ်ခန့်ရှိသော တန်ခိုးရှင်တစ်ယောက် လျှောက်လာခဲ့သည်။ သူ့တွင် ထက်မြက်သော အရှိန်အဝါတို့ ရှိနေ၏။ သူသည် အလွန် သိမ်မွေ့ပုံရပြီး စွမ်းအားအရှိန်အဝါတို့ကို ထုတ်လွှတ်မထားသော်လည်း သူ ထိုနေရာ၌ ရပ်နေရုံနှင့်ပင် မိုးမြေနှင့် တသားတည်း ဖြစ်နေကြောင်း ခံစားမိကြပေသည်။ ၎င်းက အလွန် သက်သောင့်သက်သာ ရှိလှသော ခံစားမှုပင် ဖြစ်၏။

ထိုလူက ဝမ်ရှန့်စောင့်ကြည့်မျှော်စင်၏ ထိပ်တန်းပါရမီရှင် ကျုံးချန်ပင် ဖြစ်သည်။

ကျုံးချန်သည် ဝမ်ရှန့်စောင့်ကြည့်မျှော်စင်တွင် နှစ်ပေါင်းများစွာ ကျင့်ကြံခဲ့ပြီး သူသည်လည်း ဝမ်ရှန့်စောင့်ကြည့်မျှော်စင်၏ ထိပ်တန်းပါရမီရှင်ဖြစ်သည့်အတွက် ဤနေရာသို့ လာရန် အခွင့်အရေး ရှိပေသည်။ သူက ကျင့်ကြံချင်သည့်အချိန်တိုင်း ‘ဝိညာဥ်တံခါး’ သို့ အချိန်မရွေးဝင်ရောက်၍ ကျင့်ကြံနိုင်ပေသည်။ ပြီးခဲ့သည့်အချိန်က ယန်တုန်းရန်လာခဲ့ခြင်းမှာ ကျုံးချန်ကြောင့် ဖြစ်သည်။ ကောလာဟလများက ပြောကြသည်မှာ ဝမ်ရှန့်စောင့်ကြည့်မျှော်စင်၏ ထိပ်တန်းပါရမီရှင် ကျုံးချန်သည် အဆင့်မြင့်ရန်ဟောင် အဆင့်သို့ ချိုးဖျက်ဝင်ရောက်သွားနိုင်ပြီဟူ၍ ဖြစ်လေသည်။ ထို့ပြင် သူ၏ မဟာလမ်းစဥ်က ပြီးပြည့်စုံနေဆဲ ဖြစ်သည်။

ထိုရှုထောင့်မှ ဆေးအင်ပါယာသည် ယန်တုန်းရန် ရည်ညွှန်းခဲ့သူမှာ သူ၏ လက်အောက်၌ ကျင့်ကြံနေသောသူကို ရည်ညွှန်းကြောင်း သိရှိခဲ့သည်။

ချို့ယွင်းချက်ကင်း မဟာလမ်းစဥ် နတ်ဝင်ရိုးနှင့် သတ္တမဆင့် အဆင့်မြင့်ရန်ဟောင်တစ်ပါးက ကျင့်ကြံခြင်းလောက၏ အထွတ်အထိပ်တွင် ရပ်တည်နိုင်ပေလိမ့်မည်။ အဆုံးမဲ့ကျယ်ပြောသော ကောင်းကင်ဒေသတွင်ပင် ထိုသို့သော လူမျိုးများများစားစား မရှိချေ။ ကျုံးချန်နှင့် ယှဥ်နိုင်သူမှာလူအနည်းငယ်သာ ရှိပေလိမ့်မည်။ ထိုသို့သော အဆင့်ရှိ မည်သည့်တန်ခိုးရှင်မဆို ကြီးမားသော အလားအလာ ရှိကာ ကျင့်ကြံခြင်းလောကမှ လူတိုင်း၏ အထက်တွင် ရပ်တည်နိုင်မည်သာ ဖြစ်သည်။

ကောင်းကင်ဒေသ၏ ဒဏ္ဍာရီပုဂ္ဂိုလ်ကြီးများအားလုံးသည်လည်း ထိုကဲ့သို့ပင် ဖြစ်ကာ ကျုံးချန်က သူတို့၏ အဆင့်သို့ စတင်ဝင်ရောက်နေပြီ ဖြစ်သည်။

ထိုကြောင့်ပင် ယန်ယွင်ကုန်းမြေက ထိတ်လန့်သွားခဲ့ကာ ယန်တုန်းရန်အား ဤနေရာသို့ စေလွှတ်လိုက်ခြင်း ဖြစ်ပေသည်။

ကျုံးချန်က ဝိညာဥ်တံခါးသို့ လျှောက်လာခဲ့ပြီး သူ့ခေါင်းကို မော့ကာ ကြည့်လိုက်သည်။ ထိုအချိန်၌ အဖိုးအိုတစ်ယောက် ဖြတ်လျှောက်သွားခဲ့၏။ သူသည် ယခင်ရက်က ရီဖူရှင်းအား ဤနေရာသို့ ခေါ်ဆောင်လာသော အဖိုးအိုနှင့် အသက်အရွယ်ချင်း တူပေသည်။ ကျုံးချန်ကို ကြည့်ရင်း သူက အပြုံးတစ်ခု ထုတ်ဖော်ကာ ပြောလိုက်သည်။ “ကျုံးချန်.. တံခါးပိတ်ကျင့်ကြံတာ ပြီးသွားပြီလား။”

“အင်း” ကျုံးချန်က ခေါင်းညိတ်လိုက်သည်။ “ကြားမိတာတော့ ကျွန်တော် တံခါးပိတ်ကျင့်ကြံနေတဲ့အချိန်မှာ ရှေးဟောင်းတော်ဝင် ယန်မိသားစုကလူတွေ လာပြီး ကျွန်တော်တို့ကို ရန်စခဲ့တယ်ဆို။”

“သူတို့လာခဲ့တယ်။ ဒါပေမယ့် သူတို့ သနားစဖွယ်အဖြစ်နဲ့ ပြန်သွားကြရတယ်လေ။” ထိုစီနီယာက အပြုံးနှင့် ပြောလိုက်သည်။

“ကျွန်တော် နောက်ထပ်သတင်းတချို့လည်း ကြားမိသေးတယ်။” ကျုံးချန်က ခေါင်းညိတ်လိုက်ပြီးနောက် ဝိညာဥ်တံခါးကို ကြည့်ကာ ပြောလိုက်သည်။ “ဆရာရဲ့ အထင်ကြီးမှုကို ရတယ်ဆိုတော့ သူက အတော်လေး ထူးချွန်ပြောင်မြောက်တဲ့သူ ဖြစ်ရမယ်။”

“အင်း.. သူက အရမ်းထူးချွန်ထက်မြက်ပြီးတော့ တစ်နေ့မှာ မင်းနဲ့ ပြိုင်ဘက်ကောင်းတွေ ဖြစ်လာနိုင်တယ်။” အကြီးအကဲက အပြုံးနှင့် ပြောလိုက်သည်။ ဆေးအင်ပါယာသည် ယခင်က မည်သူ့ကိုမှ တရားဝင်တပည့်အဖြစ် လက်မခံခဲ့ဖူးလျှင်ပင် လူအများအပြားအား သင်ကြားပေးခဲ့ဖူးသည်။ ကျုံးချန်သည်လည်း ဆေးအင်ပါယာ၏ တပည့်တစ်ယောက်အဖြစ် ဤနေရာတွင် နေထိုင်နေကာ ဆေးအင်ပါယာအား သူ၏ ဆရာအဖြစ် လေးစားပေသည်။

“ကျွန်တော် သွားပြီး တစ်ချက်ကြည့်လိုက်ဦးမယ်။” ကျုံးချန်က ခေါင်းညိတ်ရင်း ပြောလိုက်ပြီးနောက် ဝိညာဥ်တံခါးဆီသို့ စတင်လျှောက်သွားခဲ့သည်။ သူ၏ ခြေလှမ်းများက အလွန် ပေါ့ပါးနေပြီး ပန်းခြံထဲ လမ်းလျှောက်ထွက်နေသကဲ့သို့ပင် ဖြစ်သည်။

ဝိညာဥ်တံခါး၏ အောက်တွင် ရီဖူရှင်းက တိတ်ဆိတ်စွာ ကျင့်ကြံနေခဲ့သည်။ သူက ဝိညာဥ်တံခါးထဲမှ ကျင့်ကြံရေးနေရာအတွင်း ရှိနေဆဲဖြစ်သည်။ သို့သော်လည်း သူက မတူညီသော တစ်စုံတစ်ခုကို ခံစားလိုက်ရသည်။ သူက မျက်လုံးများကို ဖွင့်လိုက်ပြီး အနည်းငယ် အံ့အားသင့်နေခဲ့သည်။ တစ်စုံတစ်ယောက်က ထိုနေရာသို့ အမှန်တကယ် ဝင်ရောက်လာခဲ့သည်။ ထို့ပြင် သူ၏ ခြေလှမ်းများက အလွန် ပေါ့ပါးနေပြီး  ဝိညာဥ်တံခါး၏ ဖိအားကို လုံးဝ မခံစားရသကဲ့သို့ပင် ဖြစ်၏။

သို့သော်လည်း ရီဖူရှင်းသည် ဤနေရာ၏ ကြီးမားလှသော မဟာလမ်းစဥ်ဖိအားတို့ကို မကြာသေးခင်ကပင် ကျင့်သားရလာခဲ့ပြီ ဖြစ်သည်။ သူက ဝိညာဥ်တံခါးကို ပထမဆုံး စ ဝင်လာခဲ့စဥ်ကလို လေးလံသောဖိအားကို မခံစားရတော့ပေ။ သူသည် သူ့အနီးသို့ ချဥ်းကပ်လာသော လူကို လှည့်ကြည့်လိုက်လျှင် ထူးခြားသောအရှိန်အဝါတို့ကို ပိုင်ဆိုင်ထားသည့် ကျုံးချန်ကို မြင်လိုက်ရလေသည်။

“ရီလျှို့နျန်” ကျုံးချန်က ရီဖူရှင်းကို ကြည့်ကာ ပြောလိုက်သည်။

“ခင်ဗျားက…” ရီဖူရှင်းက မေးလိုက်၏။ ဤနေရာသို့ပင် လာခွင့်ရှိလေရာ ထိုသူက ရိုးရှင်းသော သူတစ်ယောက် ဖြစ်လိမ့်မည် မဟုတ်ပေ။ ဝိညာဥ်တံခါးသို့ ဝင်ရောက်ကျင့်ကြံနိုင်ကြသူများမှာ ဝမ်ရှန့်စောင့်ကြည့်မျှော်စင်၏ ကျောရိုးထောက်တိုင်များသာ ဖြစ်လေသည်။ သူ့ရှေ့မှ ထိုလူက သူတို့ထဲမှတစ်ယောက်ဖြစ်နိုင်ပေသည်။

“ကျုံးချန်..” ကျုံးချန်က ပြန်ဖြေလိုက်သည်။ ဝမ်ရှန့်စောင့်ကြည့်မျှော်စင်သို့ ဝင်လာပြီးနောက် သူသည် ဝိညာဥ်တံခါးတွင် ဝင်ရောက်ကျင့်ကြံခဲ့လေရာ ဝမ်ရှန့်စောင့်ကြည့်မျှော်စင်အကြောင်းကို လေ့လာရန် အချိန်မရှိခဲ့ပေ။ ထို့ကြောင့် သူက ဝမ်တုမှ လူများကြားတွင် ထိုလူက ကျော်ကြားသည်အား မသိပါချေ။

“ခင်ဗျားက ဆေးအင်ပါယာရဲ့ တပည့်လား။” ရီဖူရှင်းက အပြုံးနှင့် မေးလိုက်သည်။

“မဟုတ်ပါဘူး။ ကျုပ်က ဆရာ့နောက်ကို လိုက်ပြီး ကျင့်ကြံနေရုံလေးပါ။” ကျုံးချန်က ပြန်ဖြေလိုက်သည်။ “နောက်ဆုံးတစ်ခေါက်တုန်းက ကျုပ်မရှိခဲ့ပေမယ့် တံခါးပိတ်ကျင့်ကြံနေတာကနေ ထွက်လာတော့ လွန်ခဲ့တဲ့ လအနည်းငယ်က ဖြစ်ခဲ့တဲ့ ကိစ္စတွေကို သိခဲ့ရတယ်လေ။ ကျုပ်ကြားတာတော့ မင်းက ထူးခြားပြောင်မြောက်လှတဲ့  စွမ်းရည်တွေနဲ့ မြောက်ပိုင်းက လူတွေ ပြန်ဆုတ်ခွာသွားအောင် ဖိအားပေးနိုင်ခဲ့တယ်ဆို။ ကြည့်ရတာ ဒီဝမ်ရှန့်စောင့်ကြည့်မျှော်စင်မှာ နောက်ထပ် ကျော်ကြားတဲ့လူတစ်ယောက် ရှိလာပြီပဲ။”

သူသည် ရီဖူရှင်းက သူ့ အမည်အား မကြားဖူးသည်ကို မြင်သည့်အခါ အနည်းငယ် အံ့အားသင့်သွားခဲ့သည်။

ဝမ်တုမှ လူများတွင် ‘ကျုံးချန်’ ဟူသော စကားလုံးနှစ်လုံးကို မသိသည့်သူ တစ်ယောက်မှ မရှိပေ။ သို့သော်လည်း ရီဖူရှင်းက အရှေ့နတ်ဘုရားကျွန်းစုနယ်မြေမှ လာခြင်းဖြစ်ကာ သူ၏ အမည်ကို ယခင်က မကြားဖူးခြင်းမှာ အံ့အားသင့်စရာမရှိပါချေ။

“ဒီရက်တွေထဲ ဝိညာဥ်တံခါးမှာ ကျင့်ကြံတော့ ဘယ်လိုခံစားရလဲ။” ကျုံးချန်က မေးလိုက်သည်။

ရီဖူရှင်းက ကျုံးချန်ကို ကြည့်ကာ ပြောလိုက်၏။ “ဒီနေရာမှာ စိတ်ကို လှုံ့ဆော်ပေးနိုင်တဲ့ ဖိနှိပ်ခြင်း မဟာလမ်းစဥ်စွမ်းအားတွေရှိတာကြောင့် ဆင်တူတဲ့ စွမ်းအားကို ကျင့်ကြံတဲ့သူတွေအတွက် အထူးသင့်တော်တဲ့ နေရာတစ်ခုလို့ ထင်မိတယ်။ ဒါပေမယ့် သန့်စင်တဲ့ ဖိနှိပ်ခြင်းစွမ်းအားက ဘယ်လောက် အားကောင်းတယ်ဆိုတာ သိချင်မိတယ်။ ဝိညာဥ်တံခါးက ကောင်းကင်စွမ်းအားထက် ပိုပြီး အစွမ်းထက်လား။”

“မင်း အဲဒီလို ခံစားချင်တယ်ဆိုရင် ကျုပ် မင်းကို ကူညီပေးနိုင်တယ်။” ကျုံးချန်က အပြုံးနှင့် ပြောလိုက်သည်။ ရီဖူရှင်းက ခေတ္တမျှ တွေဝေနေပြီးနောက် ကျုံးချန်ကို ကြည့်ကာ ပြောလိုက်၏။ “ကျေးဇူးပြုပြီး သင်ကြားပေးပါဦး။”

“အသင့်ပြင်ထားပါ။” ကျုံးချန်က ပြောလိုက်သည်။ သူက ထိုနေရာတွင် တိတ်ဆိတ်စွာ ရပ်နေပြီး ဘေးပတ်ဝန်းကျင်ရှိ  မဟာလမ်းစဥ်စွမ်းအားများက စတင်စုစည်းလာကာ သူတို့၏ ခေါင်းထက် လေဟာနယ်ထဲမှ စွမ်းအားမျှင်များစုဝေးမှုက ကြယ်ကျောက်တုံးတစ်ခုအသွင် ဖွဲ့တည်လာစေသည်။ ထိုဝန်းကျင်တစ်ခွင် လေဟာနယ်တွင် တုန်ခါသံများ အဆက်မပြတ် ထွက်ပေါ်လာလေသည်။

ရီဖူရှင်းက ကြယ်ကျောက်တုံးကို မော့ကြည့်လိုက်ပြီး အောက်သို့ စီးဆင်းလာသော မဟာလမ်းစဥ်စွမ်းအားကို ခံစားမိလိုက်ပေသည်။ နောက်တခဏတွင် ကြယ်ကျောက်တုံးက သူ့ဆီသို့ ကျဆင်းလာခဲ့သည်။ သူ၏ မျက်လုံးထဲတွင် ထိုကြယ်ကျောက်တုံးက အလွန် လျင်မြန်စွာ ကြီးမားလာပြီး ကောင်းကင်ကြယ်ကျောက်တုံးတစ်ခု ဖြစ်လာပေသည်။

ရီဖူရှင်း၏ ကိုယ်ပေါ်တွင် ရွှေရောင်အလင်းများ တောက်ပလာကာ နတ်ရောင်ဝါတို့ ထွက်ပေါ်လာ၏။ သူ၏ လက်များကို အထက်သို့ ဆန့်ထုတ်လိုက်ကာ ကြယ်ကျောက်တုံးအား အရှိန်အဟုန်နှင့် တိုက်ခိုက်လိုက်သည်။ ကျယ်လောင်သော တုန်ခါသံက ပဲ့တင်ထပ်လာကာ ကြယ်ကျောက်တုံးက နောက်သို့ ဆုတ်ခွာသွားလျှင်ပင် မည်သည့် ထိခိုက်မှုမှ ဖြစ်မလာပေ။

“အဆင့်မြင့်ရန်ဟောင်” ရီဖူရှင်းက ခပ်တိုးတိုး ရေရွတ်လိုက်သည်။

ကျုံးချန်က လက်ကို ဝှေ့ယမ်းလိုက်ပြီး ချက်ချင်းပင် ကောင်းကင်ထက်၌ မြောက်များစွာသော ကြယ်ကျောက်တုံးများက နေရာအနှံ့တွင် တပြိုင်နက်တည်း ပေါ်ပေါက်လာပေသည်။ ၎င်းတို့ထံမှ ထုတ်လွှတ်နေသော မဟာလမ်းစဥ်ဖိနှိပ်ခြင်းစွမ်းအားက ရီဖူရှင်းအား အသက်ရှုကြပ်လာစေသည်။

အုန်း…

နတ်အလင်းတန်းတစ်ခု ဖြစ်ပေါ်လာပြီး ထိုနေရာတဝိုက်တွင် ထွက်ပေါ်လာသည့် ကြယ်ကျောက်တုံးများက ချက်ချင်းပင် လေဟာနယ်ကို ချိပ်ပိတ်လိုက်ကာ တစ်ခုတည်းသော အဓိကကြယ်ကျောက်တုံးကြီး ဖြစ်လာပေသည်။ ကြယ်ကျောက်တုံးတိုင်းတွင် အလွန် ကြောက်မက်ဖွယ်ကောင်းသော ပျက်စီးခြင်းစွမ်းအားများ ရှိနေ၏။ နှိုင်းယှဥ်မရအောင် အားကောင်းသော မဟာလမ်းစဥ် လေပွေတစ်ခုက ရီဖူရှင်းပေါ်သို့ ကျဆင်းလာကာ သူ့ကို အသက်ရှုကြပ်လာစေသည်။ သူသည် လက်တစ်ချောင်းပင် မလှုပ်နိုင်တော့သလို ခံစားနိုင်ပေသည်။

“ချို့ယွင်းချက်ကင်း မဟာလမ်းစဥ်” ရီဖူရှင်းက မဟာလမ်းစဥ် အကြွင်းမဲ့သီးခြားနယ်မြေအဖြစ်သို့ ကူးပြောင်းလာသော လေဟာနယ်ချိပ်ပိတ် ကြယ်ကျောက်တုံးများကို ကြည့်ကာ ရေရွတ်လိုက်သည်။ ထို့ပြင် ၎င်းသည် သူ ထွက်ပြေးလွတ်မြောက်ရန် မျှော်လင့်ချက်မရှိသော မဟာလမ်းစဥ် သီးခြားနယ်မြေတစ်ခု ဖြစ်လေသည်။

သူသည် ဝမ်ရှန့်စောင့်ကြည့်မျှော်စင်တွင် ထိုသို့သော ချို့ယွင်းချက်ကင်း မဟာလမ်းစဥ်နှင့် အဆင့်မြင့်ရန်ဟောင် အစွမ်းထက် ကျင့်ကြံသူတစ်ယောက်နှင့် ဆုံတွေ့ရမည်ဟု ထင်မှတ်မထားခဲ့ပေ။

“ဘယ်လိုခံစားရလဲ။” ကျုံးချန်က တိုက်ခိုက်မှုအား ရပ်တန့်ကာ ပြုံး၍ ရီဖူရှင်းကို မေးလိုက်သည်။

“တကယ် အစွမ်းထက်တယ်။” ရီဖူရှင်းက လေးစားစွာဖြင့် ပြန်ဖြေလိုက်သည်။ “ဒီလို တိုက်ခိုက်မှုအောက်မှာ ကျုပ်အတွက် ရှောင်တိမ်းစရာနေရာတောင် မရှိဘူး။ ဒီလိုတိုက်ခိုက်မှုမျိုးသာ ကျုပ်ကို တကယ်ထိသွားခဲ့ရင် မသေရင်တောင် ဒဏ်ရာအများကြီးရသွားမှာတော့ အမှန်ပဲ။”

ကျုံးချန်က လက်ကို ဝှေ့ယမ်းလိုက်လျှင် ကြယ်ကျောက်တုံးများက ချက်ချင်း ပျောက်ကွယ်သွားလေသည်။ “ကျုပ်တို့ကြားမှာ ကျင့်ကြံဆင့်ခြင်းကွာနေတော့ ဒီလိုဖြစ်တာက ပုံမှန်ပါပဲ။ ဒါပေမယ့် မင်းနဲ့ ကျုပ်သာ ကျင့်ကြံဆင့်ခြင်းတူနေခဲ့ရင် ဘယ်လိုအဆုံးသတ်မလဲဆိုတာက မေးခွန်းထုတ်စရာ ဖြစ်လာလိမ့်မယ်။”

ရီဖူရှင်းက သဘောတူလိုက်သည်။ သူ ယခင်က တွေ့ကြုံဖူးခဲ့သော ပြိုင်ဘက်များအားလုံးထဲတွင် အဆင့်မြင့်ရန်ဟောင်များ ပါဝင်သော်လည်း ချို့ယွင်းချက်ကင်း မဟာလမ်းစဥ်နတ်ဝင်ရိုးကို ပိုင်ဆိုင်ထားသူ မရှိခဲ့ပေ။ ကျုံးချန်၏ ကျင့်ကြံဆင့်က အမှန်တကယ် သုံးဆင့်တိတိ မြင့်မားပေသည်။ ထို့ပြင် အဆင့်မြင့်ရန်ဟောင်နှင့် အလယ်အလတ်အဆင့်ရန်ဟောင်တို့ကြားမှ စွမ်းအားက ချောက်နက်ကြီးတစ်ခုကဲ့သို့ အကြီးအကျယ် ကွာခြားလှသည်။

ထိုသို့သော ကျင့်ကြံခြင်အဆင့်မျိုးနှင့် ရီဖူရှင်းက သေသည်အထိ တိုက်ခိုက်ကာ သူ့တွင် ရှိသမျှ အားအင်အကုန် အသုံးပြုပြီး တိုက်ခိုက်ခဲ့မည်ဆိုလျှင်ပင် အောင်မြင်နိုင်မည့် အခွင့်အရေး မရှိသလောက် နည်းပါးကသည်။

“ခင်ဗျားရဲ့ တိုက်ခိုက်မှု နည်းစနစ်က ဒီဝိညာဥ်တံခါးနဲ့ အတော်လေးဆင်တူတယ်။” ရီဖူရှင်းက ဝိညာဥ်တံခါးကို လှည့်ကြည့်ရင်း ပြောလိုက်သည်။

“ဆရာ ကျုပ်ကို လမ်းညွှန်ပေးတယ်ဆိုတာက ကျုပ်ရဲ့ ပါရမီအပြင် ပင်ကိုစွမ်းရည်ကလည်း နောက်ထပ်အကြောင်းရင်းတစ်ခုပဲလို့ ပြောတယ်။ ကျုပ်ရဲ့ သဘာဝပင်ကိုစွမ်းရည်ကြောင့် ကျုပ်က ဝိညာဥ်တံခါးနဲ့ ပေါင်းစပ်မှုတချို့ ပြုလုပ်နိုင်ခဲ့တယ်။ ဝိညာဥ်တံခါးမှာ နှစ်ပေါင်းများစွာ ကျင့်ကြံခဲ့ပြီးတော့ အခု ကျုပ်ရောက်နေတဲ့ အဆင့်ထိကျင့်ကြံနိုင်ခဲ့တာပဲ။” ကျုံးချန်က တည်ငြိမ်စွာ ပြန်ဖြေလိုက်သည်။ သူက အလွန် နှိမ့်ချတတ်ပေသည်။ ရီဖူရှင်းသည် သူ၏ အသံမှ မောက်မာမှု အနည်းငယ်မျှပင် ခံစားမိခြင်း မရှိပါချေ။

တစ်စုံတစ်ယောက်က ထိုအဆင့်ထိ ကျင့်ကြံနိုင်သည့်အခါ အတွင်းစိတ်က အလွန် တည်ငြိမ်လာခြင်း ဖြစ်နိုင်ပေသည်။

ပြီးပြည့်စုံသော မဟာလမ်းစဥ်နှင့် သတ္တမဆင့် ရန်ဟောင်တစ်ယောက်ဖြစ်သော သူ့ရှေ့မှ ထိုလူသည် ကောင်းကင်ဒေသတစ်ခုလုံးတွင် အစွမ်းထက်ဆုံး ပုဂ္ဂိုလ်တစ်ယောက် ဖြစ်လာရန် ကံကြမ္မာရှိပုံရလေသည်။

“မင်းတို့ ဒီကိုလာပြီး စကားပြောလှည့်ပါဦး။” အသံတစ်ခု ထွက်ပေါ်လာသည်။ သူတို့နှစ်ယောက်လုံး အဝေးသို့ လှည့်ကြည့်လိုက်သည်။ ကျုံးချန်က ပြုံးကာ ခေါင်းညိတ်လိုက်၏။ “ဟုတ်ကဲ့ပါ ဆရာ။”

***