အပိုင်း (၁၉၅၁)

နှုတ်ဆက်လမ်းခွဲ

နေ့ရက်များက ကုန်ဆုံးသွားခဲ့ပြီ ဖြစ်သည်။ ရီဖူရှင်းသည် ကျင့်ကြံရာတွင်သာ အပြည့်အဝ အာရုံစူးစိုက်နေပုံရသည်။

ယနေ့ ကျင့်ကြံခြင်းစင်မြင့်ထက်၌ အလွန်တောက်ပသော ယင်ယန်စွမ်းအားများက ရီဖူရှင်းပုံရိပ်ထက်တွင် ပေါ်ပေါက်လာကာ သူ့ကို ဝန်းရံနေသည်။ သူ့ ခန္ဓာကိုယ်တစ်ခုလုံးက တောက်ပနေပြီး ယင်ယန်ဝင်္ကပါသည် သူ့ခန္ဓာကိုယ်ပေါ်တွင် ထွက်ပေါ်လာသည်။ သူ၏ ပုံရိပ်က ဘေးပတ်ဝန်းကျင်ရှိ မဟာလမ်းစဥ်စွမ်းအားများနှင့် အလွန်ပင် တသားတည်းဖြစ်နေပေသည်။ မဟာလမ်းစဥ်၏ တုန်ခါသံများက သူ၏ ခန္ဓာကိုယ်အတွင်းမှ ဆက်လက်ထွက်ပေါ်လာနေပြီး သူ့အနီးရှိ မဟာလမ်းစဥ်များကို သူနှင့် ပေါင်းစပ်ကာ ပဲ့တင်ထပ်လာစေသည်။

တောက်ပသော နေမင်းနှင့် လမင်းတို့က တစ်ချိန်တည်း ပေါ်ပေါက်လာသည်။ ပြင်းထန်သော မဟာလမ်းစဥ်စွမ်းအင်လှိုင်းများက သူ့အနီးတွင် ရစ်ပတ်နေကာ တဖြေးဖြေး ကြောက်မက်ဖွယ် ဝင်္ကပါတစ်ခု ဖြစ်တည်လာစေသည်။ ထိုဝင်္ကပါတည်ဆောက်ပုံက အလွန် တည်ငြိမ်ပြီး ရီဖူရှင်း၏ ခန္ဓာကိုယ်နှင့် တသားတည်း ဖြစ်နေသည်။ အချိန်တို့ကြာပြီးနောက် ယင်းတို့သည် တောက်ပသော ပန်းချီကားချပ်တစ်ခုသဖွယ် ဖြစ်တည်လာသည်။ ကောင်းကင်တွင် နေမင်းနှင့် လမင်းတို့ဖြစ်တည်နေပြီး ယင်ယန်ငါးသဏ္ဌာန်က ၎င်းတို့ကို စက်ဝိုင်းကဲ့သို့ လှည့်ပတ်နေကာ ဝင်္ကပါအစီအရင်တစ်ခုလုံးကို ပြည့်စုံလာစေသည်။

တုန်ခါသံများကို နန်းတော်မှပင် ကြားနိုင်ကြသည်။ လူအများ၏ အ​ကြည့်တို့က ရီဖူရှင်း ကျင့်ကြံရာ နေရာသို့ ရောက်ရှိလာကြသည်။ သည်လူက ကျင့်ကြံနေစဥ်မှာ မည်သို့ဖြစ်၍ ထိုမျှ ပွက်လောရိုက်စေရသနည်း။

သို့သော်လည်း လူအုပ်ကြီးသည် ရီဖူရှင်းကို နှောက်ယှက်သည်ထက် သူ့ကို ဆက်လက်ကျင့်ကြံထားစေခြင်းက ပိုကောင်းသည်ကို သိရှိကြသည်။

ပေ့ကုံးအော့က ၎င်းနှင့် အသားကျနေခဲ့ပြီ ဖြစ်သည်။ ရီဖူရှင်းက ကမ္ဘာကို တုန်လှုပ်စေသော မည်သည့်အပြုအမူကို လုပ်သည်ဖြစ်စေ ပေ့ကုံးအော့က အံ့အားသင့်လိမ့်မည် မဟုတ်ပေ။ သူက ထိုသူသည် မကောင်းဆိုးဝါးဆန်လှသော တည်ရှိမှုတစ်ခုဖြစ်ကြောင်း လက်ခံခဲ့ပြီး ဖြစ်သည်။ တုံ့ယွမ်အိမ်တော်ရှိရာ ကုန်း​မြေမဆိုထားနှင့် လက်ရှိ ဖန်းလိုင်ကုန်းမြေထက်၌ပင် ရီဖူရှင်းကို မည်သူမှ ယှဥ်နိုင်လိမ့်မည် မဟုတ်ပေ။ မည်သူကမှ သူနှင့် ယှဥ်နိုင်ရန် အရည်အချင်းမပြည့်မီလိမ့်မည် မဟုတ်ချေ။ မဟုတ်လျှင် ပေ့ကုံးအော့၏ အဆင့်ရှစ်ကျင့်ကြံခြင်းနှင့် သူက ရီဖူရှင်းနောက်သို့ လိုက်ပါရန်ဆန္ဒရှိမည် မဟုတ်ပေ။

ကျင့်ကြံခြင်းလောကတွင် တစ်စုံတစ်ယောက်၏ စွမ်းအင်က အမြဲဦးစားပေးပင်ဖြစ်ကာ အရာအားလုံး အထက်၌ တည်ရှိပေသည်။

ထို့နောက် ကျင့်ကြံသည့်နေရာရှိ ရီဖူရှင်း၏ မျက်လုံးတို့ ပွင့်လာသည်။ သူ၏ နက်မှောင်လှသော မျက်လုံးများတွင် နေနှင့်လတို့၏ အလင်းများ ပါဝင်နေသည်။ သူ၏ ခေါင်းကို မော့ကာ ​ကောင်းကင်ရှိ ယင်ယန်ဝင်္ကပါကို ကြည့်လိုက်သည်။ သူသည် နောက်ထပ် မဟာလမ်းစဥ်နတ်ဝင်ရိုးကို ဖွဲ့စည်းနိုင်ခဲ့ပေသည်။ သို့သော်လည်း သူသည် ဤနတ်ဝင်ရိုး၏ အဆင့်ကို မြှင့်တင်ရန် လိုအပ်နေဆဲဖြစ်သည်။

ယင်ယန်စွမ်းအားက တစ်ခုနှင့်တစ်ခု လိုက်ဖက်ညီစွာ တည်ရှိနေသည်။ သူသည် ထိုစွမ်းအားကို သူ၏ ဓားစွမ်းရည်နှင့် ထောက်ပံ့ပေးခဲ့လျှင် မည်မျှ အစွမ်းထက်လိုက်မည်နည်း။ ရီဖူရှင်းက သူ့ကိုယ်သူ တွေးလိုက်သည်။ နတ်ဓား၏ အလင်းက ယင်ယန်ဝင်္ကပါအစွန်းမှ ထွက်ပေါ်လာသည်။ နောက်တစ်ခဏတွင် သူ၏ စွမ်းအားက ပြောင်းလဲသွားပြီး တောက်ပနေသော ကောင်းကင်ထက်ရှိ မဟာလမ်းစဥ်စွမ်းအားများက ပျောက်ကွယ်လာကာ ရီဖူရှင်း၏ ခန္ဓာကိုယ်အတွင်းသို့ ချက်ချင်း တိုးဝင်လာလေသည်။

သို့သော်လည်း သူက ထွက်မသွားသေးဘဲ ဆက်လက်ကျင့်ကြံနေသည်။ သူ၏ ကျင့်ကြံဆင့်က စတုတ္ထဆင့်သို့ ရောက်ရှိပြီး အလယ်အလတ်အဆင့် ရန်ဟောင်တစ်ပါး ဖြစ်လာခဲ့ပြီ ဖြစ်သည်။ ဆိုလိုသည်မှာ သူသည် ပြီးပြည့်စုံသော စတုတ္ထဆင့် မဟာလမ်းစဥ်နတ်ဝင်ရိုး ရှိနေခဲ့ပြီဟု ဆိုလိုပေသည်။ အမှန်တွင် သူ၏ နတ်ဝင်ရိုးကို သက်သေပြခဲ့ပြီး ဖြစ်သည်။ ယခု သူက နတ်ဝင်ရိုးအသစ်ကို နားလည်သဘောပေါက်လျှင် သူ၏ အဆင့်အုတ်မြစ်ဖြင့် အလွန်လျင်မြန်စွာ တိုးတက်လာလိမ့်မည် ဖြစ်သည်။

သူက လက်ကို ဆန့်တန်းလိုက်ပြီး သူ့လက်ဝါးအား ဖြန့်ထုတ်လိုက်သည်။ သူ့ထံတွင် ဆေးလက်တစ်ဆုပ် ရှိပေသည်။ ရီဖူရှင်းသည် ဆေးများကို သူ့ပါးစပ်ထဲသို့ ပစ်ထည့်ကာ အကုန် မြိုချလိုက်၏။ ချက်ချင်းပင် တုန်ခါသော အသံများက သူ့ခန္ဓာကိုယ်အတွင်းမှ ထွက်ပေါ်လာသည်။ မဟာလမ်းစဥ်အရှိန်အဝါတို့က အလွန် ပေါကြွယ်လှသည်။ သူ၏ အသက်စွမ်းအားက ပို၍ အားကောင်းလာပြီး သူ့ ခံနိုင်ရည်က ပိုမိုအစွမ်းထက်လာသည်။

ဆေးလုံးများက အလွန် စွမ်းရည်ပြည့်ဝလှသည်။

သို့သော်လည်း ထိုဆေးလုံးများအားလုံးက သူ့ဘာသာ ဖော်စပ်ထားခြင်း ဖြစ်သည်။ ထိုဆေးလုံးများကို စားသောက်ခြင်းမပြုပါလျှင် ဖြုန်းတီးရာကျပေလိမ့်မည်။ သူဖော်စပ်သော ဆေးလုံးများက သူ့စွမ်းရည်ကို များစွာ တိုးတက်မလာစေနိုင်သလို ဘေးထွက်ဆိုးကျိုးများ မရှိပေ။ ၎င်းတို့က သူ၏ အခြေခံအုတ်မြစ်ကို ခိုင်မာလာသည်။ အလွန်လျင်မြန်စွာပင် သူ့အရှိန်အဝါက အလွန် အစွမ်းထက်လာသည်။ သို့သော် သူက အချိန်တစ်ခုအထိ ဆက်လက်ကျင့်ကြံနေပေသည်။

ရက်အနည်းငယ် ကြာပြီးနောက် ရီဖူရှင်း၏ ခန္ဓာကိုယ်ထဲမှ မဟာလမ်းစဥ်တုန်ခါသံများက ကျင့်ကြံရေးစင်မြင့်ထက်တွင် ထွက်ပေါ်နေ၏။ တောက်ပသော မဟာလမ်းစဥ်ဝင်္ကပါက သူ့ကို ရစ်ပတ်နေပြီး ကောင်းကင်အရောင်က ပြောင်းလဲသွားသည်။ ရီဖူရှင်းသည် သူ၏ ကျင့်ကြံရေးရလဒ်ကို စိတ်ကျေနပ်ပေသည်။ သူ့ခေါင်းကို မော့လိုက်ပြီး မဟာလမ်းစဥ် နတ်ဝင်ရိုးအသစ်ကို ကြည့်ရင်း ပြုံးလိုက်သည်။

နောက်တခဏတွင် သူ့ခန္ဓာကိုယ်ကို လွှမ်းခြုံထားသည့် မဟာလမ်းစဥ်အလင်းများက အစအနမကျန်အောင် ပျောက်ကွယ်သွားသည်။ အရာအားလုံးက ပုံမှန်အတိုင်း ပြန်ဖြစ်သွား​လေသည်။ သူက ထရပ်လိုက်ပြီး နောက်ဆုံးတွင် ကျင့်ကြံသည့်အချိန်က ပြီးဆုံးသွားခဲ့ပြီဖြစ်သည်။

ရီဖူရှင်း ထွက်လာသည့်အခါ သူက ဖီးနစ်နှင့် တွေ့ဆုံခဲ့သည်။ စီဖုန်းက သူ့ကို ကြည့်ကာ မေးလိုက်၏။ “ကျင့်ကြံတာ ပြီးသွားပြီလား။”

“အင်း” ရီဖူရှင်းက ခေါင်းညိတ်ကာ ပြန်ဖြေလိုက်သည်။ “ကျုပ် နောက်ပိုင်းကျရင် အချိန်အကြာကြီး ကျင့်ကြံဖြစ်တော့မှာ မဟုတ်ဘူး။”

သူက ကျင့်ကြံဆင့်ကို ချိုးဖျက်ပြီးနောက် အချိန်ယူကာ ထိုကျင့်ကြံဆင့်ကို ခိုင်မာစေရန် လုပ်ဆောင်ရပေမည်။ သူက မဟာလမ်းစဥ်နတ်ဝင်ရိုးအသစ်တစ်ခုကို ဖွဲ့စည်းနိုင်ခဲ့ပြီ ဖြစ်သည်။ ယခုတွင် သူက ဆက်လက်ကျင့်ကြံနေ၍ အကျိုးရှိတော့မည် မဟုတ်သော အဆင့်တစ်ခုသို့ ရောက်နေပြီ ဖြစ်သည်။ ထို့ကြောင့် သူက တံခါးပိတ်ကျင့်ကြံနေရန် မလိုတော့ပေ။

“ငါ့ရဲ့ နတ်မီးလျှံရော။ အဲဒါကို ငါ့ရဲ့ ကျင့်ကြံမှုအတွက် ရည်ရွယ်ပြီး ယူလာတာလို့ နင် မပြောခဲ့ဘူးလား။” စီဖုန်းက သူမ၏ လှပသော မျက်လုံးများနှင့် ရီဖူရှင်းကို ကြည့်ကာ မေးလိုက်သည်။

“အဟမ်း… အဟမ်း..” ရီဖူရှင်းက ဖီးနစ်ကို ကြည့်ကာ ပြောလိုက်သည်။ “စီဖုန်း၊ နတ်မီးလျှံက ကျုပ် ခန္ဓာကိုယ်ထဲမှာ ပေါင်းစပ်သွားခဲ့ပြီ။ မင်း အဲဒါကို အာရုံခံဖို့ ဆန္ဒရှိရင် မင်း ကျုပ်ဘေးမှာ နေပြီး ကျင့်ကြံလို့ရပါတယ်။”

စီဖုန်းက ရီဖူရှင်းကို စိုက်ကြည့်ပြီး မည့်စကားမှ မပြောတော့ပေ။

ကုန်လွန်ခဲ့သော ဤရက်များအတွင်း ဆေးဖော်စပ်ခြင်းမှအပ ရီဖူရှင်းက တံခါးပိတ်၍သာ ကျင့်ကြံနေခဲ့သည်။ သူက မည်သည့်အချိန်တွင် သူမကို သူ့ဘေး၌ ကျင့်ကြံရန် အခွင့်အရေး ပေးခဲ့ပါသနည်း။

သည်လူက ဝူထုံကျွန်းပေါ်၌ ဖီးနစ်မောင်နှံပျံသန်းခြင်းကို ပြသခဲ့စဥ်ကပင် တစ်ခုခု ကြံစည်ထားခဲ့သည်လား။

ထင်ထားသလိုပင် ယောက်ျားတို့၏ စကားလုံးများက ယုံကြည်၍ မရနိုင်ပေ။

“ကျုပ် အာခီမီအိမ်တော်ကို သွားကြည့်လိုက်ဦးမယ်။” ရီဖူရှင်းက တချိုးတည်းလစ်ပြေးရန် ကြံစည်ကာ ပြောလိုက်သည်။ အမျိုးသမီးများကို မဆန့်ကျင်သင့်ပေ။ သူမက ဖီးနစ်တစ်ကောင်ဖြစ်သော်လည်း အမျိုးသမီးတစ်ဦးပင် ဖြစ်လေသည်။

ဝှစ်! ရုတ်တရက် စီဖုန်း၏ နောက်ကျောမှ တောင်ပံများ ထွက်ပေါ်လာကာ လေထဲ၌ ဖြန့်ကျက်လိုက်သည်။ ကြောက်မက်ဖွယ် တောင်လောင်နေသော မဟာလမ်းစဥ်အရှိန်အဝါတို့သည် သူမ၏ နတ်ငှက်အမွေးအတောင်တို့မှ ထွက်ပေါ်လာ၏။ ငှက်မွေးတွင် ကြောက်မက်ဖွယ် စွမ်းအားများ ပါဝင်နေပုံရသည်။ သဏ္ဌာန်မဲ့စွမ်းအားများက ရီဖူရှင်း၏ ခန္ဓာကိုယ်ကို လွှမ်းခြုံလာသည်။ စီဖုန်းက ပြောလိုက်၏။ “နင်က အခု လမ်းစဥ်ကို သက်သေပြပြီး အလယ်အလတ်အဆင့်ရန်ဟောင်ကို ရောက်နေပြီ။ နင် ဒီလောက်အကြာကြီး ကျင့်ကြံပြီးပြီဆိုတော့ နင့်ကျင့်ကြံခြင်းစွမ်းရည်တွေက တိုးတက်လာလောက်ပြီပေါ့။ နင့်ရဲ့ စွမ်းရည်တွေကို အခု စမ်းကြည့်ရင် ဘယ်လိုလဲ။”

စီဖုန်းက ရီဖူရှင်း အချိန်တိုင်းရှောင်ပြေးနေသည်ကို ခွင့်ပြုလိမ့်မည် မဟုတ်ပေ။ မဟာလမ်းစဥ်နတ်မီးလျှံက ချက်ချင်းပင် ရီဖူရှင်း၏ ခန္ဓာကိုယ်ပေါ်သို့ ကျရောက် တောက်လောင်လာသည်။

ရီဖူရှင်းက ကျရောက်လာနေသော မဟာလမ်းစဥ်စွမ်းအင်လှိုင်းများကို ခံစားမိပေသည်။ သူ ခန့်မှန်းထားသလိုပင် သည်ဖီးနစ်က သူ့အပေါ်သို့ အာဃာတတို့ ထားနေခဲ့ပြီဖြစ်သည်။

“ကောင်းပြီလေ။” ရီဖူရှင်းက ပြန်ဖြေလိုက်သည်။ သူ့ပုံရိပ်က ဖျတ်ခနဲ ပျောက်ကွယ်သွားပြီး ကောင်းကင်သို့ ထိုးတက်သွားကာ တိမ်တိုက်များအထက်၌ ချက်ချင်း ထွက်ပေါ်လာသည်။ ဖီးနစ်ကလည်း အနီရောင်နတ်မီးလျှံတစ်ခု ဖြစ်လာကာ တူညီစွာပင် တိမ်တိုက်များပေါ်သို့ ထိုးတက်လာသည်။ သူမ၏ အရှိန်က အလွန် ကြောက်စရာကောင်းပြီး ဒုံးကျည်တစ်ခုကဲ့သို့ပင် ဖြစ်၏။

နန်းတော်အောက်ဘက်မှ လူအများက အပြင်သို့ထွက်လာကြသည်။ မည်သည်တို့ ဖြစ်ပျက်နေသနည်း။

ဆရာကြီးသိမ်းငှက်သည်လည်း ကောင်းကင်ထက်ရှိ ပြင်းထန်သော မဟာလမ်းစဥ်လှိုင်းများကို ပြူးကျယ်သော မျက်လုံးများနှင့် ကြည့်နေခဲ့သည်။ မျှော်လင့်ထားသည့်အတိုင်းပင် ဖီးနစ်က အလွန် လွှမ်းမိုးနိုင်လှသည်။ သူ့သခင်ကို တိုက်ခိုက်ရန် လှုံ့ဆော်နိုင်သည့် သူမက အံ့ဖွယ်ပင် ဖြစ်သည်။ ဆရာကြီးသိမ်းငှက် တုန်လှုပ်သွားပေသည်။

တိမ်တိုက်များအထက် ကောင်းကင် အမြင့်ဆုံးနေရာသို့ ရောက်သည့်အခါမှသာ သူတို့နှစ်ယောက်က ရပ်တန့်ခဲ့သည်။ သူတို့သည် တိုက်ပွဲမှ ထွက်လာသော စွမ်းအင်လှိုင်းများ အရှေ့နတ်ဘုရားကျွန်းစုနယ်မြေသို့ မသက်ရောက်စေဖို့ရာ အမြင့်ဆုံးနေရာကို သွားရောက်ရန် လိုပေသည်။ သို့ဆိုလျှင်ပင် စွမ်းအင်လှိုင်းများက သူတို့ထံ တစ်လှိုင်းပြီးတစ်လှိုင်း ရောက်ရှိလာနေဆဲ ဖြစ်သည်။ အောက်ဘက်ရှိလူများက အပေါ်ဘက်မှ အခြေအနေကို အလွန်အာရုံစိုက်နေသော်လည်း မည်သူကမှ သူတို့ကို ရပ်တန့်ရန် မလာခဲ့ကြပေ။

ဝှီး…

ပူလောင်လှသော လေပြင်းများက အော်မြည်နေသည်။ ဖီးနစ်၏ ကြီးမားသော ပုံရိပ်တစ်ခုက စီဖုန်းပုံရိပ်အနီး၌ ထွက်ပေါ်လာသည်။ ကြီးမားသော ဖီးနစ်က ၎င်း၏ တောင်ပံများကို ဖြန့်ကျက်ကာ အောက်ဘက်သို့ ရိုက်ခတ်လိုက်သည်။ ယင်းသည် ကောင်းကင်တခွင်ကို လွှမ်းခြုံထားသော အလွန် ပူပြင်းသော မီးလျှံများကို ဖြစ်ပေါ်လာစေသည်။ ကြည့်ရသည်မှာ ၎င်း၏ လမ်းကြောင်းရှိ အရာအားလုံးကို လောင်ကျွမ်းနိုင်ပုံရလေသည်။

မဟာလမ်းစဥ်အလင်းများက ရီဖူရှင်းကို ရစ်ပတ်နေ၏။ သူက ထိုနေရာတွင် တိတ်ဆိတ်စွာ ရပ်နေပြီး စီဖုန်းကို ရင်ဆိုင်လိုက်သည်။ ထင်ထားသလိုပင် မဟာလမ်းစဥ်နတ်မီးလျှံတို့က ပြီးပြည့်စုံသော အရှိန်အဝါတို့ကို ထုတ်လွှတ်နေသည်။ ရီဖူရှင်း၏ လက်ရှိကျင့်ကြံဆင့်နှင့်ပင် သူသည် မီးလျှံများမှလာသော ခြိမ်းခြောက်ခြင်းအရှိန်အဝါကို ခံစားမိပေသည်။

ဖီးနစ်၏ မရေတွက်နိုင်သော မီးလျှံငှက်မွေးများမှာ ကခုန်နေပြီး ကောင်းကင်တွင် တစ်ခုတည်းအဖြစ် ပေါင်းစည်းလာသည်။ တဖြေးဖြေးနှင့် စစ်မှန်သော ဖီးနစ်ကြီးတစ်ကောင်သဏ္ဌာန် ထွက်ပေါ်လာလေသည်။ ၎င်းသည် ကောင်းကင်ကို လွှမ်းခြုံ၍ နေကို ဖုံးကွယ်ထားသည်။ ထိုမြင်ကွင်းမှာ ခမ်းနားကြီးကျယ်ထည်ဝါလှပေသည်။

ရီဖူရှင်းသည် ဤတစ်ကြိမ်၌ စီဖုန်းက အလေးအနက်ဖြစ်နေသည်ကို ပြောနိုင်ပေသည်။ သူမသည် ယခုလက်ရှိ သူ့စွမ်းရည်ကို မြင်တွေ့လိုနေသည်။ သူမက အခြားသော တန်ခိုးရှင်များနှင့် ကွဲပြားခြားနားပြီး သူမ၏ မဟာလမ်းစဥ်ကလည်း အပြစ်အနာအဆာ ကင်းမဲ့သည်။သူမသည် သာမန်တန်ခိုးရှင်များထက် အလွန်အစွမ်းထက်လှသည်။ ရီဖူရှင်းနှင့် သူမသည် တူညီသော အ​ခြေအနေတွင် တည်ရှိပေသည်။

ရီဖူရှင်း အချိန်ကြာမြင့်စွာ တံခါးပိတ်ကျင့်ကြံနေသည့်အတွက် ဖြစ်ပေါ်လာသော မကျေနပ်မှုများအပြင် ယခုလက်ရှိ ရီဖူရှင်း၏ လက်ရှိစွမ်းရည်ကိုလည်း သိချင်ပေသည်။

ရီဖူရှင်းကလည်း စီဖုန်းတွေးနေသည်အား နားလည်ပေသည်။ မာနကြီးသော ဖီးနစ်အား စည်းရုံးသိမ်းသွင်းရာတွင် သူ၏ အစစ်အမှန် စွမ်းရည်အချို့ကို ပြသရန် လိုအပ်သည်။

သူ၏ စွမ်းအားများက ပြောင်းလဲသွားသည်။ ချက်ချင်းပင် ကောင်းကင်ထက်တွင် နေနှင့်လတို့ ထွက်ပေါ်လာကာ သူ့အနီးတွင် ဝန်းရံလာသည်။ သူ၏ အထက်တွင် အလွန် တောက်ပသော နတ်ဝင်္ကပါတစ်ခု ပေါ်ပေါက်လာ၏။ ယင်ယန်စွမ်အားတို့က သူ့အနီးတွင် စီးဆင်းနေပြီး နေနှင့်လတို့က ဝင်္ကပါထဲ၌ ထွက်ပေါ်လာသည်။ ယင်းတို့သည် ကျယ်ပြောလှသော လေဟာနယ်အတွင်းမှ မဟာလမ်းစဥ်အရှိန်အဝါတို့ကို ပြင်းထန်စွာ စုပ်ယူနေ၏။

ထိုဝင်္ကပါသည် အလွန် လျင်မြန်စွာ ကျယ်ပြန့်လာသည်။ ယင်းသည် ကြီးမားသော ဝင်္ကပါတစ်ခုဖြစ်လာကာ အချိန်တိုအတွင်း ကောင်းကင်တစ်ခုလုံးကို ဖုံးလွှမ်းလာပြီး ဖီးနစ်ကြီးကို တိုက်ရိုက်လွှမ်းမိုးရန် ကြိုးစားလာ၏။

ယင်ယန်စွမ်းအားက ဆင်းသက်လာပြီး ချက်ချင်းပင် ကြီးမားသော ဖီးနစ်၏ ပုံရိပ်ကို လွှမ်းခြုံလာသည်။ ဖီးနစ်သည် စူးရှကျယ်လောင်သော အသံနှင့် ဟစ်အော်လာသည်။ သူမ၏ ထက်ရှသော လက်သည်းများက ရှေ့သို့ ဆန့်ထွက်လာကာ ကောင်းကင်ထက်ရှိ ယင်ယန်ဝင်္ကပါကို ဖျက်ဆီးစုတ်ဖြဲရန် ကြံရွယ်လိုက်သည်။ သူမက အလွန် လွှမ်းမိုးနိုင်စွမ်းရှိပေသည်။

ယင်စွမ်းအားရောင်ဝါနှင့် နတ်မီးလျှံတို့၏ ရောင်ဝါတို့က တစ်ချိန်တည်းတွင် ဖီးနစ်ပေါ်သို့ ဆင်းသက်လာသည်။ ဖီးနစ်၏ ပုံရိပ်သည် ပုံရိပ်ယောင်အဖြစ်သို့ ပြောင်းလဲသွားကာ အလွန်ကြောက်မက်ဖွယ်ကောင်းသော ဖိအားတို့ကို ရင်ဆိုင်လိုက်သည်။ မရေတွက်နိုင်သော နတ်ဓားတို့က ယင်ယန်ဝင်္ကပါအတွင်း စီးဆင်းနေခဲ့သည်။ နောက်တခဏတွင် နေမင်းနတ်ဓား၏ ဓားချီများနှင့်  အရိပ်ဓားတို့က သူတို့လမ်းတလျှောက်ရှိ အရာအားလုံးကို ဖျက်ဆီးတိုးဝင်လာသည်။

ဖီးနစ်က နောက်ထပ်တစ်ခါ ကျယ်လောင်စူးရှစွာ အော်မြည်လိုက်သည်။ သူမသည် လက်သည်းများကို ပင့်မရင်း ထိုတိုက်ခိုက်မှုတို့အား ပြင်းထန်စွာ ရိုက်ခတ်ကာ တားဆီးလိုက်သည်။ သူမက မီးလျှံများကို အသုံးပြုကာ ထက်ရှသော ဓားများကို အရည်ပျော်စေရန် ကြိုးစားလိုက်သော်လည်း ထိုသို့လုပ်ရန် အလွန် ခက်ခဲနေပေသည်​။

သိပ်မကြာခင်မှာပင် ကြီးမားလှသော ဖီးနစ်အရိပ်က ပျောက်ကွယ်သွားသည်။ ထိုအဖြစ်က တိုက်ခိုက်မှုကို လေ့လာနေသော အရှေ့နတ်ဘုရားကျွန်းစုနယ်မြေမှ ရန်ဟောင်များ၏ နှလုံးသားကို တုန်လှုပ်သွားစေသည်။ ရီဖူရှင်း၏ ကျင့်ကြံခြင်းက ထိုမျှ ကြောက်မက်ဖွယ်ကောင်းသော အဆင့်သို့ ရောက်ရှိနေပြီလား။

စီဖုန်းက ရီဖူရှင်းအား သူမ၏ လှပသော မျက်လုံးများနှင့် စိုက်ကြည့်လိုက်သည်။ သူမ၏ မျက်နှာထက်၌ စိတ်မကျေနပ်သည့် အကြည့်တို့ ​ရှိနေခဲ့သည်။

“မင်းက ကောင်းကောင်း လက်ရည်ယှဥ်ချင်တယ်ဆိုရင် ကျုပ်က မင်းကို အချိန်တိုင်း အဖော်လုပ်ပေးမှာပါ။” ရီဖူရှင်းက အပြုံးနှင့် ပြောလိုက်သည်။ “လာ.. လိုက်ခဲ့။ ကျုပ် အခု ကျွန်းသခင်နဲ့ သွားတွေ့မလို့။”

“ဘာလို့ ကျွန်းသခင်နဲ့ သွားတွေ့မှာလဲ။” စီဖုန်းက မေးလိုက်သည်။

“နှုတ်ဆက်စကားပြောဖို့လေ။” ရီဖူရှင်းက ပြန်ဖြေလိုက်သည်။ သူက အရှေ့နတ်ဘုရားကျွန်းစုနယ်မြေတွင် နှစ်အတော်ကြာ ကျင့်ကြံခဲ့သည်။ ယခု သူက နောက်တဆင့်ကို ချိုးဖျက်ဝင်ရောက်သွားပြီဖြစ်ရာ သူက ထွက်သွားရန် နှုတ်ဆက်သင့်ပြီ ဖြစ်သည်။

သူတို့ထွက်သွားတော့မှာလား စီဖုန်းက တွေးလိုက်သည်။ လွန်ခဲ့သော နှစ်များက စီဖုန်းသည် ရီဖူရှင်းနောက်သို့ လိုက်၍ အရှေ့နတ်ဘုရားကျွန်းစုနယ်မြေမှ ထွက်ခွာရန် ပြင်ဆင်ခဲ့သည်။ သို့သော် သူတို့က ကျွန်းပေါ်တွင် နှစ်အတန်ကြာ ကျင့်ကြံခဲ့သည်။ ယခု ထွက်ခွာရမည့်ရက်က နောက်ဆုံး ရောက်ရှိလာခဲ့ပြီ ဖြစ်သည်။ ရီဖူရှင်းသည် ကောင်းကင်ဒေသမှ ထွက်သွားရန် ပြင်ဆင်နေပြီ ဖြစ်သည်။

***


Comment

Leave a Reply


Options

not work with dark mode
Reset