အပိုင်း(၁၄၆၈)

ဘုန်း!

ခရမ်းရွှေကြွက်ကလန်မှ နောက်ဆုံးတန်ခိုးရှင်က မြေပြင်သို့ ရိုက်ခတ်မိသွားပြီးနောက် အစွမ်းထက် သတ်ဖြတ်ခြင်း စွမ်းအားများက တဖြည်းဖြည်း ပျက်ပြယ်သွားသည်။ အရိပ်များက ပျောက်ကွယ်သွားပြီး အရာအားလုံးက ပြန်လည်ငြိမ်းချမ်းသွားခဲ့သည်။ သို့သော် ရွှမ်ထျန်းစင်မြင့်၏ ထိပ်ဆုံးရှိ ပြိုင်ဘက်ကင်းနတ်မိမယ်အနီးတွင် အေးစက်သည့် လူသတ်ငွေ့များက ဖုံးလွှမ်းထားဆဲ ဖြစ်သည်။

ချင်းဟယ်က သူမ ရှေ့မှ ရှေးဟောင်းကု့ချင်းကို ငုံ့ကြည့်လိုက်ကာ သူမ၏ သေးသွယ်သော လက်ချောင်းများကို ဖယ်ရှားလိုက်၏။ ယခင်တိုက်ပွဲတွင် သူမသည် ကု့ချင်းကို တီးခတ်ကာ နတ်မိမယ်များ ကြောက်မက်ဖွယ် စိတ်ဝိညာဉ် တိုက်ခိုက်မှုများ ပြုလုပ်ရာ၌ ပြင်းထန်သည့် စွမ်းအားများ ထုတ်ဖော်နိုင်ရန် အရေးကြီးသည့် အခန်းကဏ္ဍမှ ပါဝင်ခဲ့သည်။

အဆုံးမဲ့ကျယ်ပြောသည့် နေရာသည် အလွန်ပင် တိတ်ဆိတ်နေခဲ့သည်။ လူများသည် ထိခိုက်ဒဏ်ရာရသည့် ခန္ဓာကိုယ်များနှင့် ထရပ်ကာ စင်မြင့်ထက်သို့ မော့ကြည့်နေသည့် ခရမ်းရွှေကြွက်ကလန်မှ တန်ခိုးရှင်များကို တစ်ဖန်ကြည့်လိုက်ကြသည်။ ခရမ်းရွှေကြွက်များ၏ ခုခံမှုက အမှန်တကယ် အားကောင်းသော်လည်း သူတို့၏ စိတ်ဝိညာဉ်များက မဟာဗြဟ္မာ့အသံနှင့် ဝိညာဉ်သန့်စင်ခြင်း နတ်ဓားတို့၏ တိုက်ခိုက်မှုကို ခံနိုင်ရည်မရှိခဲ့ပေ။

ခရမ်းရွှေကြွက်ကလန် အဖွဲ့၏ ခေါင်းဆောင် ခန္ဓာကိုယ်သည် တောက်ပနေခဲ့သည်။ သူ၏ မျက်လုံးများမှ ခရမ်းရွှေအလင်းများကို ထုတ်လွှတ်နေပြီး လက်လျှော့ရန် ဆန္ဒမရှိဘဲ နောက်တစ်ခါ ထပ်ကြိုးစားချင်နေဟန် ရှိသည်။

ဝှစ်…

လေထုကို ဖြတ်သန်းသွားသည့် အသံတစ်သံ ထွက်ပေါ်လာပြီး ခရမ်းရွှေကြွက်ကလန်ခေါင်းဆောင်က ပျောက်ကွယ်သွားသည်။  သူသည် ခရမ်းရွှေရောင် အလင်းတန်းအဖြစ် ပြောင်းလဲသွားကာ စင်မြင့်ထက်သို့ တစ်ဟုန်ထိုး ပြေးဝင်သွားပြီး ကောင်းကင်တွင် တောက်ပသည့် အလင်းတန်းကို ချန်ထားရစ်ခဲ့သည်။ သူသည် ကောင်းကင်သို့ တည့်မတ်စွာ တိုးဝင်သွားခဲ့သည်။

စင်မြင့်ထက်မှ ချင်းဟယ်၏ ဆံပင်ရှည်များက လေထဲတွင် လူးလွန့်နေသည်။ သူမ၏ အေးစက်ပြီး လှပသော မျက်လုံးများက ကောင်းကင်အောက်ရှိ နတ်အလင်းများကို ကြည့်လိုက်ပြီးနောက် သူမက ရုတ်တရက် ကြိုးများကို သူမ၏ လက်တို့နှင့် ထိခတ်လိုက်သည်။ ကု့ချင်းမှ အင်အားပြင်းထန်သည့် အသံ ထွက်ပေါ်လာသည်။ တစ်ချိန်တည်းမှာပင် နတ်မိမယ်များက သူတို့၏ စွမ်းအားများကို ထုတ်လွှတ်လိုက်ပြီး ကု့ချင်း၏ တေးသွားနှင့် တသားတည်း ဖြစ်သွားစေသည်။

ပုံရိပ်ယောင် နတ်အလင်းများက သဏ္ဌာန်မဲ့ ဓားသွားကဲ့သို့ ကောင်းကင်ကို ထိုးဖောက်သွားသည်။ ယင်းသည် ပြိုင်ဘက် ခန္ဓာကိုယ်ကို ခုတ်ပိုင်းလိုက်ကာ လေထုထဲမှ ခရမ်းရွှေအလင်းတန်းကို ရပ်တန့်စေလိုက်သည်။ ကောင်းကင်ကို ဆက်လက်ဖြတ်သန်းရန် ကြိုးစားနေသော နတ်အလင်းများ လွှမ်းခြုံထားသည့် ပုံရိပ်က ပေါ်ပေါက်လာသည်။ ကြွက်သည် စင်မြင့်ပေါ်သို့ သူ၏ ကိုယ်ပိုင်ခွန်အားဖြင့် ဖြတ်သန်းနိုင်ရန် ကြိုးစားနေသည်။

ချင်းဟယ်က သူ့ကို လျစ်လျူရှုကာ မျက်လွှာချ၍ ကု့ချင်းကို ဆက်လက်တီးခတ်နေသည်။ သူမ၏ နောက်တွင် နတ်ဘုရားမတစ်ပါး၏ ရုပ်တုပေါ်ပေါက်လာသည်။ ထိုနတ်ဘုရားမတွင် လက်အများအပြားရှိကာ လက်တစ်ဖက်ချင်းစီတွင် ဓားတစ်လက်စီ ကိုင်စွဲထားသည်။ မရေတွက်နိုင်သည့် ပုံရိပ်ယောင်များက ခရမ်းရွှေကြွက်၏ ခေါင်းထက်တွင် ပေါ်ပေါက်လာ၏။ မဟာဗြဟ္မာ့အသံတွင် နတ်ဓားအလင်းများက တောက်ပနေပြီး လောက၏ အရာအားလုံးကို သန့်စင်ပစ်တော့မလိုပင် ဖြစ်သည်။

ဘုန်း…

ပြန်လည်မွေးဖွားခြင်းအဆင့် ခရမ်းရွှေကြွက်က တစ်ဖန် ရပ်တန့်သွားကာ ထောင်သောင်းချီသည့် ဓားများက သူ၏ စိတ်ဝိညာဉ်အား ထိုးဖောက်နေသည့်အတွက် တုန်ယင်နေသည်။ သူက ပါးစပ်အပြည့် သွေးအန်လိုက်ရပြီး သူ၏ ခန္ဓာကိုယ်သည် အလင်းတန်းအဖြစ် မြေပြင်သို့ တစ်ဖန် ပြန် ပြုတ်ကျသွားခဲ့သည်။

သူ ခြေထောက်က ကွေးညွှတ်တေပြီး မြေပြင်ပေါ်တွင် ဒူးထောက်လျက် သူ့ပါးစပ်မှ သွေးများ အဆက်မပြတ် အန်ထွက်နေသည်။

သိသာစွာပင် ရွှမ်ထျန်းဝင်္ကပါကို တစ်ယောက်တည်း ဖြိုခွဲရန်မှာ လံယ်ကူသည့်ကိစ္စမဟုတ်ပေ။ ချင်းဟယ်တစ်ယောက်တည်း ဆိုလျှင်ပင် သူမ၏ စွမ်းရည်က ကြွက်ထက် နိမ့်ကျမည် မဟုတ်ပေ။

ထို့ပြင် ကြွက်သည် ထိတ်လန့်စွာဖြင့် ထိခိုက်ဒဏ်ရာရခဲ့သော်လည်း ချင်းဟယ်၏ ကု့ချင်းသံက ရပ်တန့်မသွားခဲ့ဘဲ မဟာဗြဟ္မာ့အသံက ဆက်လက်ထွက်ပေါ်နေသည်။ ရွှမ်ထျန်းဝင်္ကပါသည် အလင်းလွှာအဖြစ် ပြောင်းလဲသွားကာ မရေတွက်နိုင်သည့် နတ်မိမယ်အရိပ်များက ပေါ်ပေါက်လာပြီး ပေထောင်ချီသည့် စင်မြင့်ထက် ပြည့်နှက်သွားပေသည်။

အောက်မှ မော့ကြည့်နေသည့် သူများမှာ ချင်းဟယ် မည်သည့်နေရာ၌ ရှိနေသည်လဲ မမြင်တွေ့ရတော့ပေ။

“နောက်ဆုတ်တော့” ခရမ်းရွှေကြွက်ကလန်၏ နတ်ဆိုးအင်ပါယာက ပြောလိုက်သည်။ ဤတစ်ကြိမ်၌ ထိရောက်သော တိုက်ခိုက်မှုက အပြီးတိုင်ကျရှုံးခဲ့သည်။

သူတို့က ရွှမ်ထျန်းဝင်္ကပါကို အနည်းငယ်မျှပင် မလှုပ်ခတ်စေနိုင်ခဲ့ပေ။

“ချင်းဟယ်ကို ကြည့်ရတာ အရင်ကနဲ့ နည်းနည်းကွာခြားသွားတယ်” ရီဖူရှင်းသည် အဝေးတွင် ပျောက်ကွယ်နေသည့် ပုံရိပ်ကို ကြည့်ပြီး ရေရွတ်လိုက်သည်။ ချင်းဟယ်သည် ကု့ချင်း တီးခတ်နေစဉ်၌ သတ်ဖြတ်ခြင်းစွမ်းအားများဖြင့် ပြည့်နှက်နေပြီး ရီဖူရှင်း ယခင်က ရင်းနှီးခဲ့သည့် ချင်းဟယ်နှင့် လုံးဝကို ကွဲပြားနေခဲ့၏။

ထိုသည်က တိုက်ပွဲမြေပြင်၌ တိုက်ခိုက်နေ၍လား။ သို့မဟုတ်ပါက သူမ၏ စိတ်အခြေအနေက ပြောင်းလဲသွားခဲ့သည့် အတွက်ကြောင့်လား။

“သူမက တကယ့်ကိုပဲ နည်းနည်း ကွဲပြားနေတယ်” သူ့ဘေးမှ ကျန်းထိုက်ချူးက ပြောလိုက်သည်။ “ပြီးတော့ ရွှမ်ထျန်းဝင်္ကပါကို ဖြိုခွဲဖို့ လူအရေအတွက်ကို အားကိုးနေရင် အသုံးဝင်မှာ မဟုတ်ဘူး။ ဒီလို နည်းဗျူဟာမျိုးက ထိပ်သီးပုဂ္ဂိုလ်တစ်ယောက်တည်းဆိုရင်လည်း စိန်ခေါ်ဖို့ စွမ်းဆောင်နိုင်မှာ မဟုတ်ဘူး”

ရီဖူရှင်းက ခေါင်းညိတ်လိုက်သည်။ သူကလည်း ထိုသည်အား သတိပြုမိပေသည်။

အစောပိုင်းတွင် ခရမ်းရွှေကြွက်ကလန်မှ တန်ခိုးရှင်များက ဝင်္ကကို ချိုးဖျက်ရန် ကြိုးစားခဲ့သော်လည်း သူတို့အားလုံးက တစ်ယောက်ချင်းစီသာ တိုက်ခိုက်ခဲ့ကြရသည်။ မဟာဗြဟ္မာ့အသံ၏ သက်ရောက်မှု ကျယ်ပြန့်သော တိုက်ခိုက်မှုနှင့် ဝိညာဉ်သန့်စင်ခြင်း နတ်ဓား တိုက်ခိုက်မှုများကို သူတို့အားလုံးက တူညီစွာ ရင်ဆိုင်ကြရသည်။ ထို့ကြောင့် ကျင့်ကြံဆင့်အနိမ့်ဆုံးသူက အရင်ဆုံး ဒဏ်ရာရပေလိမ့်မည်။

“ဖြေရှင်းဖို့တစ်ခုက အဖွဲ့ဖွဲ့ဖို့ တိုက်ခိုက်မှုစွမ်းရည် တူညီတဲ့ အဆင့်တူ အဖွဲ့ဖြစ်မှရမယ်။ ဒီလိုသာဆိုရင် ထိပ်သီးအင်အားစုတွေ အားလုံးကြားမှာ ဝင်္ကပါကို ဖြိုခွဲနိုင်ဖို့ ကောင်းကင်အာဏာစက် ပြည်ထောင်က အလားအလာ အရှိဆုံး ဖြစ်နေလိမ့်မယ်” ဟွားချင်းယွင်က ခပ်တိုးတိုး ပြောလိုက်သည်။

ရီဖူရှင်း နှင့် အခြားသူများက တိတ်ဆိတ်သွားခဲ့သည်။ ဟွားချင်းယွင် ပြောသည်က ယုတ္တိမတန်သည်တော့ မဟုတ်ပေ။ ယခင်က ကောင်းကင်အာဏာစက် ပြည်ထောင်သည် တန်ခိုးရှင် ကိုးယောက် ပူးပေါင်း၍ နတ်ဘုရားအသံကို ပေါင်းစပ်ကာ ထိတ်လန့်ဖွယ် သတ်ဖြတ်ခြင်း စွမ်းအားကို ဖော်ထုတ် တိုက်ခိုက်နိုင်ခဲ့သည်။ ယခု ရီထျန်းယွိ၏ များပြားလှသော ညီအစ်ကိုများလည်း ရောက်ရှိနေသည်ဖြစ်ရာ သူတို့ ပူးပေါင်းတိုက်ခိုက်ပါက ကောင်းကင်အာဏာစက် ပြည်ထောင်မှ အခြားတန်ခိုးရှင်များ တိုက်ခိုက်သည်ထက် ပို၍ အားကောင်းမည်မှာ မလွဲမသွေပင် ဖြစ်သည်။

သူတို့က ပူးပေါင်းတိုက်ခိုက်ရာ၌ အားအကောင်းဆုံး အင်အားစု ဖြစ်လာပေလိမ့်မည်။ ဝင်္ကပါဖြိုခွင်းခြင်းအနေနှင့် ပြောရလျှင် ကောင်းကင်အာဏာစက် ပြည်ထောင်က အလားအလာ အရှိဆုံးဖြစ်ပေသည်။

လက်ရှိ ရောက်နေသော လူများက သာမန်မဟုတ်သောကြောင့် သူတို့အားလုံးက ပြောနိုင်ပေသည်။

ထိုအချိန်တွင် နောက်ထပ်ပုဂ္ဂိုလ်တစ်ဦး ရှေ့သို့ လျှောက်လာခဲ့သည်။ သူက တစ်ယောက်တည်း ထွက်လာခဲ့ခြင်း ဖြစ်ပြီး ထိုသူမှာ နတ်နဂါးကလန်မှ လုံချန် ဖြစ်သည်။

လုံချန်သည် သူတို့၏ နတ်နဂါးကလန်က ပူးပေါင်းတိုက်ခိုက်မှု၌ အားမကောင်းသည်ကို သိထားသည်။ သူတို့က ဝင်္ကပါအတွင်း တစ်ယောက်ပြီးတစ်ယောက် ရှုံးနိမ့်သွားလိမ့်မည်ကို စိုးရိမ်သည့်အတွက် တစ်ယောက်တည်း ရွှမ်ထျန်းဝင်္ကပါကို ချိုးဖျက်ကြည့်ရန် ကြိုးစားကြည့်ခြင်းမှာ ပို၍ ကောင်းပေသည်။

“လုံချန်က တိုက်ခိုက်ဖို့ အဆင်သင့်ဖြစ်နေပြီ” လူအများက ရေရွတ်လိုက်ကြသည်။

လူသားတန်ခိုးရှင်များနှင့် နတ်ဆိုးဘုံမှ တန်ခိုးရှင်များ အားလုံးသည် လုံချန် ထွက်လာသည်ကို မြင်သောအခါ အာရုံစိုက်လာကြ၏။ နတ်နဂါးကလန်မှ ဤထိပ်သီးပုဂ္ဂိုလ်သည် ‘ရီထျန်းယွိ’ နှင့် တူညီသော အဆင့်အတန်း ရှိသော်လည်း လောကကြီးကတော့ သူ မည်မျှ အစွမ်းထက်သလဲ ရှင်းရှင်းလင်းလင်း မသိရှိကြပေ။

လုံချန်သည် ဤခေတ်အခါ၌ နတ်နဂါးကလန်တွင် ပေါ်ထွန်းခဲ့သည့် ခရမ်းသွေးနတ်နဂါး သန္ဓေပြောင်းမျိုးဆက်ဖြစ်သည်။

နဂါးဝတ်ရုံကို ဝတ်ဆင်ထားပြီး လုံချန်သည် ရပ်နေရုံနှင့်ပင် တောင်တစ်လုံးကဲ့သို့ ခမ်းနားထည်ဝါသည့် အရှိန်အဝါရှိသည်။ သူက စင်မြင့်သို့ မော့ကြည့်လိုက်ပြီးနောက် ခြေလှမ်းလိုက်ကာ စင်မြင့်ထက်သို့ တိုက်ရိုက် လျှောက်သွားခဲ့သည်။

သူက စင်မြင့်ထက် ခြေချလိုက်သည့် အခိုက်တွင် မရေတွက်နိုင်သည့် အရိပ်များက သူ့ကို ဝန်းရံလာသည်ဟု ထင်ရကာ မဟာဗြဟ္မာ့အသံလှိုင်းက သူ့နားစည်သို့ ချက်ချင်း ရိုက်ခတ်လာပြီး သူ့စိတ်ကို ထင်ယောင်ထင်မှား ဖြစ်လာစေသည်။

သို့သော် သူ့ခန္ဓာကိုယ်မှ ချောက်ချားဖွယ် သွေးဆူပွက်စေသော ဟိန်းဟောက်သံက ပေါက်ကွဲထွက်လာသည်။ ရုတ်တရက် ကောင်းကင်သည် သွေးရောင်သို့ ပြောင်းလဲသွားသည်။ သူက မည်သူ့ကိုမှ မကြည့်သလို သူတို့ မည်သည့်နေရာ၌ ရှိနေသည်ကိုလည်း မမြင်ရပေ။ သို့သော် ချောက်ချားဖွယ် လင်းလဲ့နေသည့် သွေးရောင်က ပေထောင်ချီသည့် စင်မြင့်ထက် လွှမ်းခြုံသွားပြီး လောကကြီး၏ အစွန်အဖျားနေရာတိုင်းသို့ ဖုံးလွှမ်းသွားခဲ့သည်။

“အဲဒါက ခရမ်းသွေးနဂါးရဲ့ စွမ်းအားလား” လူအများက ပြောလိုက်ကြပြီး သူတို့၏ နှလုံးသားများက အခုန်မြန်နေခဲ့သည်။ သူတို့သည် သူတို့၏ သွေးကြောများအတွင်းမှ သွေးတို့သည်ပင် ထူးဆန်းစွာ တုံ့ပြန်မှု ရှိလာပြီး အော်မြည်ကာ ဆူပွက်နေသည်။

လုံချန်၏ သွေးစွမ်းအားက အမှန်ပင် ကြောက်မက်ဖွယ် ကောင်းလှကာ ရန်ဟောင်အဆင့်အောက်ရှိ မည်သူမှ မယှဉ်နိုင်ဘဲ အားအကောင်းဆုံး ဖြစ်ပေလိမ့်မည်။

ရီထျန်းယွိ ဘေးရှိ နတ်ဘုရားနန်းတော်မှ တန်ခိုးရှင်များသည်ပင် အံ့အားသင့်သည့် အကြည့်တို့ ဖြစ်ပေါ်လာသည်။ တစ်ယောက်က ပြောလိုက်၏။ “ကောင်းကင်အာဏာစက်ဘုံရဲ့ ခရမ်းသွေးနတ်နဂါးက တကယ်ပဲ သူ့ဘိုးဘေးတွေရဲ့ ကျော်ကြားမှုကို ဆက်ခံဖို့ ထိုက်တန်ပါပေတယ်”

“သူက နဂါးကလန်ရဲ့ ခရမ်းသွေးတော်ဝင်မိသားစုက ဒဏ္ဍာရီသန္ဓေပြောင်းနဂါးလား”

လုံချန်က စင်မြင့်ထက်၌ မတ်တပ်ရပ်နေပြီး သူ၏ စိတ်ဝိညာဉ်က တုန်ခါနေသည်။ သူ၏ မျက်လုံးများက သွေးရောင်သို့ ပြောင်းသွားခဲ့ကာ သူက လက်ကို မြှောက်လိုက်ပြီး ကောင်းကင်သို့ ကုတ်ဆွဲလိုက်သည်။ ရုတ်တရက် မရေတွက်နိုင်သည့် သွေးရောင်နဂါးများ ဖြစ်ပေါ်လာကာ လောကတစ်ခွင်တွင် ရစ်ပတ်နေခဲ့သည်။ ထိုပေါက်ကွဲထွက်လာသည့် သွေးစွမ်းအားများက သွေးလွှမ်းနဂါးများအဖြစ် ပြောင်းလဲသွားသည်။ နတ်မိမယ်များ၏ သွေးကြောများထဲမှ သွေးတို့က အော်မြည်ကာ တုန်ခါနေပြီး ကြောက်ခမန်းလိလိသွေးပင်လယ်က လူတိုင်းကို ဝါးမျိုသွားစေသည်။

“သတိထား” နတ်မိမယ်များ၏ နားတွင် အသံတစ်ခု ကြားလိုက်ရသည်။ လုံချန်ကာ စင်မြင့်ပေါ်တွင် ရပ်နေပြီး ချောက်ချားဖွယ် နဂါးအရိပ်များက သူ့ခန္ဓာကိုယ်ပေါ်၌ ထွက်ပေါ်လာ၍ ကောင်းကင်ကို ဆန့်ကျင်ကာ အော်မြည်နေသည်။ လေထုသည် ပြင်းထန်စွာ တုန်ခါနေခဲ့၏။ သူက လက်သီးကို မြှောက်လိုက်ပြီး လေဟာနယ်အတွင်း လက်သီးတစ်ချက် ပစ်သွင်းလိုက်သည်။

“နတ်နဂါးစွမ်းအား” လူများက ပြောလိုက်သည်။ လက်သီးချက် ထွက်ပေါ်လာသည့်အခါ သူတို့၏ နှလုံးသားများက ပြင်းထန်စွာ ခုန်လှုပ်လာကြသည်။ ဤသည်မှာ လုံချန်၏ တိုက်ခိုက်မှုကို ပထမဆုံး မြင်တွေ့ဖူးကြခြင်း ဖြစ်သည်။ သူက ထိတ်လန့် အံ့သြဖွယ်ကောင်းလောက်အောင် အစွမ်းထက်သည်ဟု ဆုံးဖြတ်နိုင်ပေသည်။

လက်သီးချက် ထွက်ပေါ်လာသည့်အခါ သွေးလွှမ်းသည့် နဂါးများက အော်မြည်နေကာ ထိုအမျိုးသမီးများထံ တစ်ဟုန်ထိုးပြေးသွားခဲ့သည်။ ရွှမ်ထျန်းဝင်္ကပါကို ထိန်းချုပ်နေသည့် အမျိုးသမီးများက ညည်းညူလိုက်ကြသည်။ သူတို့၏ ခန္ဓာကိုယ်များမှ သွေးတို့သည် သူတို့၏ ထိန်းချုပ်မှုမှ လွတ်ထွက်သွားခဲ့ပြီဟု ထင်မှတ်ရကာ သူတို့၏ နူးညံ့လှသော ခန္ဓာကိုယ်များသည် ကျိုးကြေပျက်စီးတော့မလိုပင် ဖြစ်သည်။

ဘန်း.. ဘန်း… ဘန်း…

ဆက်တိုက်ပေါက်ကွဲမှုတို့ ထွက်ပေါ်လာပြီး များပြားလှသည့် အမျိုးသမီးလေးများက အဝေးသို့ လွင့်စင်သွားကြသည်။ ထိုအမျိုးသမီးများ နောက်မှ မတိုက်ခိုက်ရသေးသော သူများသည် ချက်ချင်းပင် ပထမ နေရာကို အစားထိုးလိုက်သော်လည်း သူတို့က သွေးများ ဆူပွက်ကာ အော်မြည်နေသည်ဟု ခံစားလိုက်ကြရသည်။ လုံချန်၏ တိုက်ခိုက်မှုသည် အလွန်ပင် ပြင်းထန်လှသည်။

ကု့ချင်းတေးသွားက ပို၍ ပြင်းထန်လာသည်။ တိမ်တိုက်များနှင့် လေပွေက ကောင်းကင်တွင် ကခုန်နေသည်။ များပြားလှသည့် ဝိညာဉ်သန့်စင်ခြင်း နတ်ဓားများ ပေါ်ထွက်လာပြီး ကောင်းကင်ကို ထိုးဖောက်ကာ လုံချန်ထံသို့ ပြေးဝင်သွားလေသည်။

ဂါး…

နဂါးအော်မြည်သံက ကောင်းကင်ကိုပင် တုန်ခါသွားစေသည်။ လုံချန်၏ နဂါးဝိညာဉ်က သူ့ခန္ဓာမှ ထွက်ခွာသွားပြီး  ခရမ်းသွေးနတ်နဂါးအဖြစ်သို့ ပြောင်းလဲသွားသည်။ ထို ကြီးမားလှသည့် နဂါးက လူသားခန္ဓာကိုယ်ကို ရစ်ပတ်နေသည်။ ကြောက်မက်ဖွယ် ဝိညာဉ်သန့်စင်ခြင်း နတ်ဓားများက ရောက်ရှိလာပြီး သူ့၏ စိတ်ဝိညာဉ်ကို ဖျက်ဆီးရန် ကြိုးစားနေသော်လည်း ခရမ်းသွေးနတ်နဂါး၏ ခုခံမှုစွမ်းအားက အံ့သြဖွယ်ကောင်းလောက်အောင် အားကောင်းလှသည်။ သွေးအလင်းတို့က ဓားနှင့် တွေ့ဆုံကာ ယှဉ်ပြိုင်နေခဲ့သည်။

ဘုန်း…

လုံချန်က ရှေ့သို့ ခြေလှမ်းလိုက်ကာ နတ်မိမယ်များထံ တစ်ဟုန်ထိုး ချဉ်းကပ်သွားခဲ့သည်။ သူက ခြေလှမ်းလိုက်သည့်အချိန်တိုင်း ကောင်းကင်က တုန်ခါနေသည်။ နတ်မိမယ်များ၏ သွေးတို့က ဆက်လက်၍ အော်မြည်နေပြီး နဂါးအော်မြည်သံက ကောင်းကင်ကို တုန်ခါအက်ကွဲသွားစေတော့မလိုပင် ဖြစ်သည်။

နဂါး၏ ခြေလှမ်းတိုင်းနှင့် အော်မြည်သံတိုင်းတွင်  နတ်နဂါးစွမ်းအားများ ပါဝင်နေပြီး အလွန်ပြင်းထန်လှသည်။

ရီထျန်းယွိသည် ဝင်္ကပါအား ချိုးဖျက်နေသည့် လုံချန်ကိုကြည့်ကာ မွန်းကျပ်သလို ခံစားလာရသည်။ နောက်ထပ်တစ်ယောက် ရှိနေခဲ့သေးသည်။ ကြည့်ရသည်မှာ နတ်ဆိုးဘုံမှ လက်ရှိ မျိုးဆက်သည် ကောင်းကင်အာဏာစက်ဘုံ၏ တန်ခိုးရှင်များထက် နိမ့်ကျခြင်း မရှိကြပေ။

သို့သော်လည်း ထိုအချိန်တွင် မဟာဗြဟ္မာ့ကောင်းကင်ဘုံအသံနှင့် မရေတွက်နိုင်သည့် ပုံရိပ်များက လုံချန်ဆီသို့ တိုက်ခိုက်နေခဲ့သည်။ သူက ရှေ့သို့ ဆက်လက်ချီတက်နေပေမဲ့ သူသည်လည်း ဆိုးဝါးစွာ သက်ရောက်ခံနေရပေသည်။

နဂါးအော်မြည်လိုက်သည့် နောက်ထပ် အသံထွက်ပေါ်လာပြီး လောကကြီးကိုပင် တုန်ခါသွားစေသည်။  လုံချန်သည် နတ်နဂါးအဖြစ်သို့ ပြောင်းလဲသွားပြီး နဂါးဝိညာဉ်နှင့် ပေါင်းစပ်လိုက်သည်။ သူက ဆက်လက်ချီတက်ကာ နတ်ဓားမှ တိုက်ခိုက်မှုများကို ထိရောက်စွာ ရှင်းလင်းလိုက်သည်။

ချင်းဟယ်က သူမ၏ ခေါင်းကို မမော့ဘဲ ကု့ချင်းကိုသာ ဆက်လက်တီးခတ်နေသည်။ များပြားလှသော နတ်မိမယ်တို့၏ စွမ်းအားများက တသားတည်း ဖြစ်နေသည်။ သူမနောက်တွင် ခေါင်းသုံးလုံးလက်ခြောက်ဖက်နှင့် နတ်ဘုရားမကဲ့သို့ သန့်စင်မြင့်မြတ်သည့် ပုံရိပ်က တစ်ဖန်ထပ်ကာ ပေါ်ပေါက်လာပြီး ကောင်းကင်အောက်ဘက်သို့ ကြည့်နေခဲ့သည်။ မရေတွက်နိုင်သော နတ်ဓားများက ကျဆင်းလာကာ နဂါးခန္ဓာကိုယ်ကို ခုတ်ပိုင်းလိုက်၏။ နတ်နဂါးသည် တုန်လှုပ်ဖွယ် အော်မြည်သံကို ပြုလုပ်လိုက်ပြီးနောက် အဆုံးထိ ပျံသန်းသွားခဲ့သည်။

နတ်ဘုရားမသည် လက်ခြောက်ဖက်ကို အသုံးပြု ပြီး လက်ဝါးရိပ်များစွာကို တစ်ချိန်တည်း ဖော်ထုတ်လိုက်ကာ မရေတွက်နိုင်သည့် ဓားများက တစ်ခုတည်းအဖြစ် ပေါင်းစည်းသွားပြီး ခုတ်ပိုင်းလိုက်သည်။

ဘုန်း…

နဂါးကြီး၏ ခန္ဓာကိုယ်က ရပ်တန့်သွားပြီး နတ်ဘုရားမ၏ လက်ဝါးရိပ်က လေဟာနယ်အတွင်း ကျန်ရစ်ခဲ့သည်။ လက်ချောင်းဖြင့် တစ်ဖန် ညွှန်ပြလိုက်ရာ နတ်ဓားများက ကျဆင်းလာပြီး နဂါးကြီး၏ ဦးခေါင်းမှ ခန္ဓာထိ တိုက်ရိုက် ထိုးဖောက်လိုက်ကာ ခုခံမှုကို ချိုးဖျက်လိုက်သည်။

ကျယ်လောင်သည့် ဟိန်းဟောက်သံက ထွက်ပေါ်လာပြီး ပိုမို များပြားလှသည့် အမျိုးသမီးလေးများက ထိတ်လန့်ဖွယ် ဒဏ်ရာရသွားသော်လည်း အခြားသော နတ်ဓားများက ဆက်လက်ကျဆင်းလာနေကာ နတ်နဂါးသည် ထိုတိုက်ခိုက်မှုများကို ဆက်လက်တောင့်ခံနိုင်စွမ်းမရှိတော့ဘဲ ပြန် ဆုတ်ခွာလိုက်ရသည်။

နတ်နဂါးကြီးမှ လုံချန်အဖြစ် ပြန်လည်ပြောင်းလဲသွားသည်။ သူက ကောင်းကင်ထက်တွင် ကု့ချင်း တီးခတ်နေသော နတ်မိမယ်ကို မော့ကြည့်ကာ သက်ပြင်းချလိုက်သည်။ “ကြည့်ရတာ တစ်ယောက်တည်း ဝင်္ကပါကို ချိုးဖျက်ဖို့ မဖြစ်နိုင်ဘူးထင်ပါရဲ့”

ထိုစကားများ ပြောပြီးနောက် သူသည် ပြန်လှည့်ထွက်သွားတော့သည်။ သူက ရှုံးနိမ့်သွားသော်လည်း သူ ပြသခဲ့သည့် စွမ်းဆောင်ရည်နှင့် ခွန်အားက ထိတ်လန့်ဖွယ်ပင် ဖြစ်သည်။

လုံချန်၏ ကျရှုံးမှုသည်လည်း ဝင်္ကပါအား ဖြိုခွဲရန် တစ်ယောက်တည်း လုပ်ဆောင်ဖို့ရာ မဖြစ်နိုင်ကြောင်း လူအများကို သတိပြုမိစေခဲ့သည်။ ဤရှုထောင့်မှ ကြည့်လျှင် ကောင်းကင်အာဏာစက်ဘုံမှ များပြားလှသည့် ထိပ်သီးအင်အားစု တော်တော်များများက ဝင်္ကပါအား ဖြိုခွဲနိုင်မည်ပုံ မပေါ်ပေ။

ယခုတွင် အလားအလာအရှိဆုံးမှာ ကောင်းကင်အာဏာစက် ပြည်ထောင်ဖြစ်သည်။ အခြားသော အင်အားစုများမှာတော့ မဖြစ်နိုင်လုနီးပါးပင်ဖြစ်သည်။

***