အပိုင်း(၁၄၆၇)

ရှက်ရွံ့ခြင်း

ရီဖူရှင်းသည်လည်း ရီထျန်းယွိ နှင့် အခြားလူများကို မြင်ပေမဲ့ သူက သူတို့အား တစ်ချက်မျှသာ ကြည့်ကာ အဝေးသို့ အကြည့်လွှဲလိုက်သည်။

သူက ဗြဟ္မာ့သန့်စင်ကောင်းကင်၏ နံပါတ်တစ်နတ်မိမယ်က အလွန် ဆွဲဆောင်အား ကောင်းပြီး ဤနေရာသို့ ရောက်လာသည့် တန်ခိုးရှင်အဖွဲ့များမှာ ခရမ်းရင့်ကောင်းကင်မှာထက်ပင် ပို၍ များပြားနေမည်ဟု ထင်မှတ်မထားခဲ့ပေ။ လတ်တလောတွင် ကောင်းကင်အာဏာစက်ဘုံ၌ ဖြစ်ရပ်ပေါင်းများစွာ ဖြစ်ပျက်ခဲ့ပြီး အခြေအနေက တစထက်တစ ပိုမိုပြင်းထန်လာခဲ့သည်က ကောင်းကင်အာဏာစက်ဘုံရှိ များပြားလှသော တန်ခိုးရှင်များ မည်သည့်အတွက် ပို၍ လှုံ့ဆော်ခံရသလဲဟူသည့် အကြောင်းရင်းပင် ဖြစ်သည်။

ထိုအချိန်တွင် လူအများက ရွှမ်ထျန်းစံအိမ်ဘက်သို့ မော့ကြည့်လိုက်ကြလျှင် ဝတ်စုံရှည်များ ဝတ်ဆင်ထားသည့် နတ်မိမယ်များက ကောင်းကင်မှ ဆင်းသက်လာကာ မတူညီသည့် နေရာများတွင်  ရပ်လျုက်ကြသည်။ သူတို့အားလုံးက ရင်သပ်ရှုမောဖွယ် လှပကြပေသည်။

ကောင်းကင်ပေါ်မှနေ၍ ပုံရိပ်များ အဆက်မပြတ် ဆင်းသက်လာကြသည်။ သူတို့သည် နတ်သမီးများက သေမျိုးလောကသို့ ရောက်လာကြသကဲ့သို့ပင် ဖြစ်ကာ သူတို့သည် မတူညီသည့် နေရာများတွင် တိတ်ဆိတ်ငြိမ်သက်စွာ ရပ်လိုက်ကြသည်။

အမြင့်ဆုံးနေရာတွင် အသက်ရှုမှားလောက်အောင် လှပသော ပြိုင်ဘက်ကင်း နတ်မိမယ်တစ်ပါးက ဖြေးညင်းစွာ ဆင်းသက်လာသည်၊ သူမသည် ဗြဟ္မာ့သန့်စင်ကောင်းကင်၏ နံပါတ်တစ်နတ်မိမယ် ချင်းဟယ်ပင် ဖြစ်သည်။

ချင်းဟယ်က ရွှမ်ထျန်းစံအိမ် ထိပ်ဆုံး၌ ဆင်းသက်လိုက်သည်။ သူမသည် ထိုင်လိုက်ကာ လက်ကို ဝှေ့ယမ်းလိုက်လျှင် ရှေးဟောင်းကု့ချင်းတစ်လက်က သူမ ရှေ့တွင် ပေါ်ပေါက်လာ၏။

ထိုသည်က မဟာဗြဟ္မာ့ကောင်းကင်အသံလားဟု လူအများက တွေးမိကာ မငြိမ်မသက်ဖြစ်လာကြသည်။ လူအများသည် ဗြဟ္မာ့သန့်စင်ကောင်းကင်၏ ဤအစွမ်းထက်ပညာရပ်အကြောင်း ကြားဖူးကြသော်လည်း သူတို့သည် ဗြဟ္မာ့သန့်စင်ကောင်းကု်မှ ချင်းဟယ်ကို သူမ၏ အလှတရားကြောင့် သတိပြုမိခဲ့ကြသည်ဖြစ်ရာ သူတို့သည် သူမ၏ ခွန်အားကို သတိပြုမိတော့မလိုပင် ဖြစ်သည်။

သို့သော် မဟာဗြဟ္မာ့အသံသည် သတ်ဖြတ်ခြင်းဂီတဖြစ်သည်။ ဤသတ်ဖြတ်ခြင်း စွမ်းအားက ချင်းဟယ်၏ လက်အတွင်း၌ မည်သို့ ဖြစ်လာလိမ့်မည်ကို မည်သူမှ မသိကြပေ။

“ဒီမှာ နတ်မိမယ်ဘယ်နယောက်လဲ” တစ်ယောက်က ရွှမ်ထျန်းစံအိမ်၌ ပေါ်ပေါက်လာသော ဗြဟ္မာ့သန့်စင်ကောင်းကင်၏ နတ်မိမယ်များကို ရေတွက်နေရင်းက ခပ်တိုးတိုး မေးလိုက်သည်။

“အားလုံးပေါင်း နတ်မိမယ် ၈၁ ယောက် ရောက်လာကြတာ” တစ်ယောက်က ပြောလိုက်သည်။ လူအများသည် ရွှမ်ထျန်းစံအိမ် စင်မြင့်များထက်တွင် နတ်မိမယ် ၈၁ ယောက်ရှိသည်ကို ရှင်းလင်းစွာ သိရှိကြသည်။

ဗြဟ္မာ့သန့်စင်ကောင်းကင်တွင် ကျိုထျန်းနတ်မိမယ် ကိုးယောက်ရှိပြီး သူတို့၏ အုပ်ချုပ်မှုအောက်တွင် သက်ဆိုင်ရာ နတ်မိမယ်ကိုးပါး ထပ်ရှိသည်။

ဆိုလိုသည်မှာ ဗြဟ္မာ့သန့်စင်ကောင်းကင်မှ နတ်မိမယ် ၈၁ ပါးလုံး ဤနေရာသို့ ရောက်ရှိနေခြင်း ဖြစ်သည်။ ထိုအင်အားက ကြောက်မက်ဖွယ်ပင် ဖြစ်သည်။

နတ်မိမယ်ဟူသည့် ဘွဲ့မည်မှာ မြင့်မားသည့် ကျင့်ကြံဆင့်နှင့် မသက်ဆိုင်ပေ။ ဗြဟ္မာ့သန့်စင်ကောင်းကင်တွင် နတ်မိမယ်များထက် ပို၍ ကျင့်ကြံဆင့် မြင့်မားသော တန်ခိုးရှင်အများအပြား ရှိသည်။ ထို့ကြောင့် သူတို့ကို ဗြဟ္မာ့သန့်စင်ကောင်းကင်၏ အားအကောင်းဆုံး ပုဂ္ဂိုလ်များဟု မဆိုနိုင်ပေ။

သို့သော် ထိုအချိန်တွင် ပိုမို များပြားသည့် သူများက ရွှမ်ထျန်းစံအိမ်မှ လျှောက်ကာ ဆင်းလာကြသည်။ သူတို့သည် ဗြဟ္မာ့သန့်စင်ကောင်းကင်မှ အခြားတန်ခိုးရှင်များ ဖြစ်ကြသည်။ သူတို့က ဆင်းသက်လာကာ နတ်မိမယ်များ၏ အနီးသို့ ရောက်ရှိလာပြီး ကူညီအားဖြည့်ပေးရန် စီစဉ်နေသည်။

ထိုမြင်ကွင်းကို ကြည့်ရင်း များပြားလှသော လူများထံတွင် ကွဲပြားခြားနားသည့် အကြည့်တို့ ပေါ်ပေါက်လာသည်။ ဤတစ်ကြိမ်၌ ဗြဟ္မာ့သန့်စင်ကောင်းကင်မှ တန်ခိုးရှင်မည်မျှများများ အသုံးပြုမည်နည်း။

သို့သော် ရှန့်ထိုအဆင့် တန်ခိုးရှင် ရာနှင့်ချီကာ တစ်ချိန်တည်း ပေါ်ပေါက်လာလျှင်ပင် သူတို့က ပေထောင်ချီကျယ်သော စင်မြင့်ထက်တွင် မတူညီသည့် နေရာများ၌ တကွဲတပြားနေရာယူထားကြကာ နေရာတိုင်းကို ဖြည့်စွက်နိုင်ရုံသာ ရှိလေသည်။

ထိုအချိန်၌ ရွှမ်ထျန်းစံအိမ်တွင် ဗြဟ္မာ့သန့်စင်ကောင်းကင်၏ ရန်ဟောင်တန်ခိုးရှင်များလည်း ရှှိနေသည်။ သူမက အောက်ဘက်ရှိ လူအုပ်ထံ ငုံ့ကြည့်ကာ စကားဆိုလိုက်သည်။ “ဒီနေ့ ချင်းဟယ်က ဗြဟ္မာ့သန့်စင်ကောင်းကင်က တန်ခိုးရှင်တွေ အားလုံးကို ဦးဆောင်ပြီး  ကောင်းကင်အာဏာစက်ဘုံရဲ့ အင်အားစုအားလုံးက တန်ခိုးရှင်တွေကို စိန်ခေါ်စေပါမယ်။ ဒီတစ်ကြိမ်တိုက်ပွဲမှာ အင်အားစုအားလုံးက လူတွေအကုန် ပါဝင်နိုင်တယ်။ လူအရေတအတွက် အကန့်အသတ်မရှိဘူး။ တိုက်ပွဲဝင်တဲ့ ယှဉ်ပြိုင်သူ အရေအတွက်နဲ့ ကျွန်မတို့ဘက်က တန်ခိုးရှင်တွေနဲ့ အရေအတွက်ကို အခြေအနေအရ ညှိပေးမယ်။ ဒဏ်ရာရသွားတဲ့ ဘယ်သူမဆို အစားထိုးခံရလိမ့်မယ်”

“တစ်ခုရှိတာက သတ်ဖြတ်ခြင်းစွမ်းအားဝင်္ကပါက ထိန်းချုပ်လို့ရနိုင်တဲ့အရာတော့ မဟုတ်ဘူး။ အဲဒါကြောင့် ကျင့်ကြံခြင်းမှာ မလုံလောက်သေးတဲ့ သူတွေက ကျေးဇူးပြု ပြီး စူးစမ်းလိုစိတ်နဲ့ တိုက်ပွဲထဲ အရမ်းကာရော ဝင်မလာပါနဲ့။ ရွှမ်ထျန်းစံအိမ်အထိ ရောက်နိုင်တဲ့သူကို ဝင်္ကပါဖြိုခွဲနိုင်တယ်လို့ သတ်မှတ်မယ်။ ဒီနေ့ ဘယ်သူက ရွှမ်ထျန်းစံအိမ်ကို အရင်ဆုံး ဦးဆောင် ဝင်ရောက်သွားမလဲ ကြည့်လိုက်ကြရအောင်”

သူမ၏ အသံက ကောင်းကင်တစ်ခွင်ကို ဖြတ်သန်းကာ ပျံ့နှံ့သွားပြီး လူတိုင်းရှင်းလင်းစွာ ကြားလိုက်သည်။ သူမက လက်ကို ဝှေ့ယမ်းကာ ပြောလိုက်သည်။ “ကျေးဇူးပြု ပြီး”

ထိုစကားများ ပြောပြီးနောက် သူမသည် ရွှမ်ထျန်းစံအိမ်သို့ ပြန်ဆုတ်ခွာက ချင်းဟယ်နှင့် အခြားနတ်မိမယ်များအတွက် နေရာပေးထားခဲ့သည်။

ထိုအချိန်တွင် ရွှမ်ထျန်းစံအိမ် စင်မြင့်ထက်တွင် ချင်းဟယ်သည် တစ်ယောက်တည်း ထိုင်နေကာ ပြိုင်ဘက်ကင်းအသွင် ဖြစ်၍နေသည်။ သူမက မျက်လွှာချလိုက်ပြီး သွယ်လျသည့် လက်ချောင်းများကို ကြိုးများအပေါ်သို့ တင်လိုက်သည်။

သူမသည် အောက်ဘက်ရှိ လူများကို မကြည့်ခဲ့ပေ။ အောက်ဘက်လောကရှိ ဆူညံပွက်လောရိုက်နေသည့် အသံများက သူမကို နှောက်ယှက်နိုင်ခြင်း မရှိသကဲ့သို့ပင် ဖြစ်သည်။

ထိုအချိန်တွင် ချင်းဟယ်သည် လူအများတို့အား အထီးကျန်ဆန်သည့် ခံစားချက်ကို ဖြစ်ပေါ်စေသည်။ လောက၌ သူမတစ်ယောက်သာ ရှိနေသကဲ့သို့ပင် ဖြစ်သည်။

ထပ်ပြောရလျှင် ချင်းဟယ်ထံ၌ မြင်ဖူးနေကြ ချိုသာခြင်းနှင့် နူးညံ့ခြင်းတို့ကို မတွေ့ရတော့ပေ။ ထို့အစား သူမ၏ အရှိန်အဝါက အေးစက်နေသည်။ သူမ၏ ရှည်လျားသော ဝတ်စုံရှည်က အနည်းငယ် လွင့်ဝဲနေပြီး သတ်ဖြတ်ခြင်းစွမ်းအား အရှိန်အဝါတို့က ကောင်းကင်နှင့် မြေကြီးအကြား ရစ်သိုင်းလာသည်။

သူမနှင့် အဝေးရှိ လူများသည်ပင် ချင်းဟယ်၏ အရှိန်အဝါ ပြောင်းလဲသွားသည်ကို ရှင်းလင်းစွာ ခံစားမိကြပေသည်။ ယခု သူမသည် လုံးဝ မတူညီသည့် သူတစ်ဦး ဖြစ်သွားခဲ့သည်။

“ဂီတကျင့်စဉ်လား” ရီထျန်းယွိ ဘေးရှိ နတ်ဘုရားဂီတနန်းတော်မှ လူငယ်က လေထဲမှာ ရှိနေသည့် သူမအား ကြည့်ကာ ရေရွတ်လိုက်သည်။ “သူမက တကယ့်ကို လှပတာပဲ”

“အဟုတ်ပဲ။ တကယ်လို့ ထျန်းယွိသာ သူမနဲ့ လက်ထပ်ခဲ့ရင် အဲဒါက ဇာတ်လမ်းကောင်းလေးတစ်ပုဒ် ဖြစ်မှာ အသေအချာပဲ။” စီနီယာအစ်ကိုက အပြုံးနှင့် ပြောလိုက်သည်။ နတ်ဘုရားနန်းတော်မှာပင် ချင်းဟယ်၏ အသွင်အပြင်မျိုးကို ပြိုင်ဘက်ကင်းဟု သတ်မှတ်နိုင်ပေသည်။ သူတို့ကဲ့သို့သော အဆင့်မှ တန်ခိုးရှင်များသည် ကာမတပ်မက်ခြင်းမှ လွတ်ကင်းနိုင်ပြီ ဖြစ်သော်လည်း အလှကိုတော့ လေးစားမက်မောမိဆဲ ဖြစ်သည်။ လှပသည့်အရာများအား မည်သူက မနှစ်သက်ဘဲ နေလိမ့်မည်နည်း။

“တစ်ယောက်ကတော့ စ လှုပ်ရှားနေပြီ”ထိုအချိန်တွင် သူတို့က တစ်နေရာသို့ ကြည့်လိုက်ကြကာ အဖွဲ့တစ်ဖွဲ့ စင်မြင့်ထက်သို့ ဆင်းသက်လာသည်အား မြင်လိုက်ကြရသည်။ သူတို့၏ ခေါင်းဆောင်က သာမန်မဟုတ်သည့်ပုံပေါ်ကာ တန်ဖိုးကြီး အဝတ်အစားများကို ဝတ်ဆင်ထားသည်။ သူတို့က အလွန်ပင် မျက်စိဖမ်းစားနိုင်သော်လည်း သူတို့၏ မျက်နှာများကတော့ အရုပ်ဆိုးလှသည်။

သူတို့သည် ခရမ်းရွှေကြွက်ကလန်မှ တန်ခိုးရှင်များပင် ဖြစ်ကြသည်။

မမျှော်လင့်စွာပင် နတ်ဆိုးကလန်မှ လူများက အရင်ဆုံး လှုပ်ရှားလာကြပေသည်။

“ကြွက်တွေက ဝင်္ကပါကို စိန်ခေါ်ဖို့ အတော်လေး စိတ်အားထက်သန်နေတာပဲ။ သူတို့က နောက်ပိုင်းမျိုးဆက်တွေရဲ့ ရုပ်ရည်ဗီဇကို တိုးတက်စေချင်နေတာလား။ အိပ်မက်ကနေ နိုးလိုက်စမ်းပါကွာ” ပတ်ဝန်းကျင်ရှိ အချို့သော လူသားတန်ခိုးရှင်များက လှောင်ပြောင်သရော်လိုက်သည်။

လူသားတန်ခိုးရှင်များ၏ မျက်လုံးထဲတွင် ခရမ်းရွှေကြွက်များက ချင်းဟယ်နှင့် မထိုက်တန်ပေ။ သူတို့မှာသာ အတွေးတချို့ အမှန်တကယ် ရှိနေခဲ့ပါက မတော်လောဘတက်နေခြင်းပင် ဖြစ်သည်။

ထိုသည်က ခရမ်းရွှေကြွက်များ အလွန် ကြိုးစားနေရခြင်း၏ အကြောင်းရင်းပင် ဖြစ်သည်။ သူတို့က နတ်ဆိုးဘုံတွင် ထိပ်သီးအင်အားစု ဖြစ်လျှင်ပင်  လောကကြီးက သူတို့အား အထင်အမြင်သေးနေကြဆဲပင် ဖြစ်သည်။ လောကကြီး၏ အမြင်တွင် ကြွက်များမှာ အဆင့်နိမ့်နတ်ဆိုးသားရဲများပင် ဖြစ်သည်။ ထိုသို့သော အရိုးစွဲနေသည့် အမြင်တို့ကို မျိုးဆက်တစ်ခုတည်းနှင့် ပြောင်းလဲမပစ်နိုင်ပေ။ မျိုးဆက်ပေါင်းများစွာ ကြိုးစားအားထုတ်ရန် လိုပေသည်။ တစ်နေ့တွင် သူတို့ နတ်ဆိုးဘုံ၏ အထွတ်အထိပ်၌ ရပ်တည်နိုင်သည့်အခါ လောကကြီးက သူတို့အား မလေးစားဘဲ နေနိုင်တော့မည် မဟုတ်ပေ။

ခရမ်းရွှေကြွက်ကလန်မှ တန်ခိုးရှင်များသည် အောက်ခြေမှ တက်လာကြခြင်း ဖြစ်သည်။ သူတို့သည် မော့ကြည့်လိုက်ကြပြီး လက်ဆုပ်အရိုအသေပြု၍ ပြောလိုက်သည်။ “ကျုပ်တို့က အကြံဉာဏ်လိုချင်ပါတယ်”

“တန်ခိုးရှင် ၃၂ ယောက်” လူများက ရေရွတ်လိုက်သည်။ ခရမ်းရွှေကြွက်ကလန်သည် တိုက်ပွဲအတွင်း တန်ခိုးရှင် ၃၂ ယောက် စေလွှတ်ခဲ့သည်။

သူတို့က ပြောပြီးနောက် အလွန် ထက်ရှသည့် ခရမ်းရွှေရောင် နတ်အလင်းက သူတို့အား လွှမ်းခြုံကာ တောက်ပလာသည်။ သူတို့ထံမှ ရွှေရောင်လေစီးကြောင်းများ ထွက်ပေါ်လာသည်။

တစ်ချိန်တည်းမှာပင် ချင်းဟယ်သည် ကောင်းကင်အထက်တွင် လက်နှစ်ဖက်နှင့် ကု့ချင်းကို စတင် တီးခတ်လိုက်သည်။ ဂီတသံထွက်လာသည့်အခါ၌ စင်မြင့်ထက်တွင် သတ်ဖြတ်ခြင်း အငွေ့အသက်များ ဖုံးလွှမ်းလာပြီး လူအများကို အေးစက်သည့် ခံစားမှုများ ခံစားလာရစေသည်။

တစ်ချိန်တည်းမှာပင် များပြားလှသည့် နတ်မိမယ်များက စတင်တိုက်ခိုက်လိုက်သည်။ သန့်စင်သည့် အလင်းများက သူတို့၏ ခန္ဓာကိုယ်တွင် လင်းလက်တောက်ပလာသည်။ တခဏအတွင်းတွင် ကု့ချင်းတေးသံအတွင်းသို့ ထိုအရှိန်အဝါများက ပေါင်းစပ်သွားသည်။  ကောင်းကင်နှင့် မြေကြီးအကြားမှ မဟာလမ်းစဉ် စွမ်းအားများက စတင် စီးဆင်းလာပြီး  မကြာခင်၌ လူအများသည် သူတို့အရှေ့မှ လောကကြီးက ပြောင်းလဲသွားသည်ကို တွေ့ရှိလိုက်ကြသည်။

ထိုစင်မြင့်ထက်၌ မရေတွက်နိုင်သည့် အရိပ်များ ထွက်ပေါ်လာသည်။ ပေထောင်ချီမြင့်မားသော စင်မြင့်ထက်တွင် ဗြဟ္မာ့သန့်စင်ကောင်းကင်မှ နတ်မိမယ်တို့၏ ပုံရိပ်များနှင့် ပြည့်နှက်သွားသည်။

ထိုပုံရိပ်များသည် နတ်မိမယ်များ၏ စွမ်းအားတို့မှ ပြောင်းလဲလာခြင်းဖြစ်သည်ဟု ထင်မှတ်ရသည်။ ထိုအခိုက်တွင် သူတို့အားလုံးသည် ချင်းဟယ်ဦးဆောင်သည့် ကု့ချင်းတေးသံနှင့်အတူ လှုပ်ရှားလာကြသည်။ ခဏအတွင်းတွင် စင်မြင့်ထက်ရှိ ဝင်္ကပါက စတင် အသက်ဝင်လာပေသည်။

ဘုန်း…

တောက်ပနေသည့် ၃၂ ခုသော ခရမ်းရွှေအလင်းများက ကောင်းကင်သို့ တစ်ဟုန်ထိုး တက်သွားကာ အလျင်မြန်ဆုံး အခြေအနေသို့ ရောက်ရှိလာသည်။ သူတို့သည် မဟာလမ်းစဉ်ကိုပင် တိုက်ရိုက်ထိုးဖောက်နိုင်စွမ်း ရှိဟန်တူသည်။

ဘန်း.. ဘန်း…

ကောင်းကင်ရှိ အရိပ်များက ချက်ချင်းပင် အစိတ်စိတ်အမွှာမွှာ ကွဲကြေသွားခဲ့သည်။  ကောင်းကင်ထက်သို့ တစ်ဟုန်ထိုး တက်သွားသည့် ၃၂ ခုသော ခရမ်းရွှေအလင်းများက ဖျက်ဆီး၍ မရနိုင်ဟန် ရှိသည်။ ယင်းတို့သည် စွမ်းအားများကို တသားတည်း ဖြစ်စေပြီး ပေါက်ကွဲထွက်လာသည့် စွမ်းအားများက မဟာလမ်းစဉ်ကို တိုက်ရိုက်ထိုးဖောက်သွားစေသည်။

“အရမ်းမြန်တာပဲ” လူများသည် နတ်အလင်းတန်းများကို ကြည့်လိုက်ပြီး မှတ်ချက်ပြုလိုက်သော်လည်း သူတို့သည် ရှင်းလင်းစွာ မြင်နိုင်ရန်ပင် ခက်ခဲလှပေသည်။

အလွန်တိုတောင်းလှသော အချိန်အတွင်း မည်မျှ များပြားသည့် အရိပ်များ ဖျက်ဆီးခံလိုက်ရပြီလဲ မည်သူမှ မသိရှိပေ။ ထိုမြင်ကွင်းသည် လူအများကို ခရမ်းရွှေကြွက်တို့၏ ခွန်အားကို ပြန်လည် တန်ဖိုးဖြတ်စေခဲ့သည်။ ခရမ်းရွှေကြွက်များက အလွန် ရုပ်ဆိုးသော်လည်း အစွမ်းထက်သည်မှာ အမှန်ပင် ဖြစ်သည်။

သို့သော် နတ်မိမယ်များ၏ အရှိန်အဝါက ပို၍ တောက်ပလာကာ တေးသွားက ပို၍ လျင်မြန်လာပြီး ကောင်းကင်ကို ထိုးဖောက်၍ ခရမ်းရွှေကြွက်ကလန်မှ တန်ခိုးရှင်များ၏ နားစည်ကို ထိုးဖောက်ဝင်ရောက်သွားစေသည်။ သူတို့သည် အိပ်မွေ့ချခံလိုက်ရသည်ဟု ထင်မှတ်ရကာ အဆုံးမဲ့ ပုံရိပ်ယောင်ကမ္ဘာအတွင်း ကျရောက်သွားခဲ့ပြီး အရိပ်များက ဖျက်ဆီးပစ်၍ မရနိုင်သကဲ့သို့ပင် ဖြစ်သည်။

“သူတို့က အဲဒီဝင်္ကပါကို တိုက်ရိုက် ချိုးဖျက်ချင်ပေမဲ့ ခရမ်းရွှေကြွကတွေမှာ အဲဒီလိုလုပ်နိုင်တဲ့ ခွန်အား မရှိဘူး။” ကောင်းကင်နတ်တံခါးဂိုဏ်းမှ လူအုပ်အလယ်ရှိ ဟွားချင်းယွင်က ရေရွတ်လိုက်သည်။

ရီဖူရှင်းသည်လည်း သူ့စကားကို သဘောတူသည်။ နတ်မိမယ် ၈၁ ယောက် ထိန်းချုပ်သည့် ဝင်္ကပါအား မည်သို့ လွယ်လွယ်ကူကူ ချိုးဖျက်နိုင်ပါမည်နည်း။

သူတို့က ချင်းဟယ်ထက် သာသည့် အကြွင်းမဲ့ခွန်အား မရှိလျှင် သူတို့သည် ဝင်္ကပါအတွင်း ထိုကဲ့သို့ ဝင်ရောက်ချိုးဖျက်ပါက ခံစည်းကသာ ကျရောက်သွားပေလိမ့်မည်။

ခရမ်းရွှေကြွက်ကလန်၏ တန်ခိုးရှင်များက အလောသုံးဆယ်နိုင်လွန်းပုံပေါ်သည်။

သူတို့က ကိုယ့်ကိုယ်ကိုယ် သက်သေပြချင်စိတ်များလွန်းသွားဟန် ရှိသည်။

မဟာဗြဟ္မာ့အသံသည် ကောင်းကင်နှင့် မြေကြီးအကြားတွင် ပဲ့တင်ထပ်ကာ ပေါ်ပေါက်လာနေသည်။ တိုက်ပွဲအတွင်းမရှိသည့် လူများ၏ စိတ်ဝိညာဉ်များပင်လျှင် အားကောင်းစွာ နှောက်ယှက်ခံနေရသည်။ သူတို့၏ ရှေ့မှ မြင်ကွင်းက အစစ်အမှန် မဟုတ်သော်လည်း မရေတွက်နိုင်သည့် နတ်မိမယ်များက သူတို့၏ မျက်လုံးရှေ့တွင် ကခုန်နေဆဲဖြစ်သည်။

ခရမ်းရွှေကြွက်တန်ခိုးရှင်များသည်လည်း ထိုသည်ကို သတိပြုမိပေသည်။ သူတို့က အလွန် လျင်မြန်စွာ လှုပ်ရှားနေသော်လည်း သူတို့၏ စွမ်းအားများက အနည်းငယ် လှုပ်ခတ်လာပြီး ဝိညာဉ်များက မတည်မငြိမ်ဖြစ်လာကာ မဟာဗြဟ္မာ့အသံသည် သူတို့၏ နားစည်များအတွင်း အရူးအမူးဝင်ရောက်လာသည်။ အသံများက ပုံရိပ်ယောင်များက သူတို့၏ စိတ်အတွင်း တိုးဝင်လာသည်။

ဘုန်း…

အလွန်တောက်ပသည့် ခရမ်းရွှေအလင်းများက ခရမ်းရွှေကြွက်များ ရပ်နေရာအလယ်ဗဟိုမှ ထွက်ပေါ်လာပြီး သူတို့၏ အရှိန်က မီးရှူးမီးပန်းကဲ့သို့ လျင်မြန်လာကာ မရေတွက်နိုင်သည့် အရိပ်များက တိုက်ရိုက်ထိုးဖောက်ခံလိုက်ရသည်။ ယခုတွင် သူတို့သည် ဝင်္ကပါကို ဖြိုခွဲရန် ဆက်လက်ကြိုးစားနေကြသည်။

သို့သော် ခဏအကြာတွင် သူတို့သည် မရေတွက်နိုင်သည့် နတ်မိမယ်အရိပ်များက နတ်ဓားများကို ကိုင်ဆောင်ကာ တစ်ချိန်တည်းတွင် ထွက်ပေါ်လာပြီး နတ်ဓားများအပေါ်မှ အရှိန်အဝါများက သူတို့၏ စိတ်ဝိညာဉ်ကို ခြိမ်းခြောက်နေခဲ့သည်။

“သတိထား” အလယ်ရှိ ခရမ်းရွှေကြွက်က အော်ဟစ်လိုက်သော်လည်း နောက်ကျသွားခဲ့သည်။ မဟာဗြဟ္မာ့အသံသည် ပို၍ ကြည်လင်ပြတ်သားကာ အစွမ်းထက်လာခဲ့သည်။ ယင်းတွင် အလွန် အစွမ်းထက်သည့် သတ်ဖြတ်ခြင်းစွမ်းအားများ ပါဝင်နေသည်။ တစ်ချိန်တည်းမှာပင် သူတို့၏ စိတ်အတွင်း၌ မရေတွက်နိုင်သော နတ်ဓားများသည် အခြားလောကမှ လက်နက်များကဲ့သို့ ကျဆင်းလာပြီး အရာအားလုံးကို ဖျက်ဆီးပစ်ရန် ကြိုးစားနေသည်။

ဓားများ ထွက်ပေါ်လာသည်နှင့် သူတို့၏ စိတ်ဝိညာဉ်က ထိုးဖောက်ခံလိုက်ရသလို ခံစားရကာ ဓားများက သူတို့၏ ရုပ်ပိုင်းဆိုင်ရာ ခုခံမှုကို လျစ်လျူရှုကာ သူတို့၏ စိတ်ဝိညာဉ်ကို တိုက်ရိုက်တိုက်ခိုက်လာလေသည်၊

အားနည်းလှသည့် မရေတွက်နိုင်သော ခရမ်းရွှေကြွက်များသည် ကျယ်လောက်စွာ အော်မြည်လိုက်ကြသည်။ သူတို့၏ ဝိညာဉ်က ထောင်သောင်းချီသည့် အပိုင်းအစများအဖြစ် ဖျက်ဆီးပစ်ခြင်းကို ခံလိုက်ရသကဲ့သို့ ခံစားကြရပေသည်။ သူတို့က သွေးအန်ထုတ်လိုက်ရကာ သူတို့၏ ခန္ဓာကိုယ်များက လေထဲမှ ပြုတ်ကျလာခဲ့သည်။ သူတို့ထံမှ ထွက်ပေါ်နေသည့် အလင်းများက ချက်ချင်းပင် မှေးမှိန်သွားကာ အရှိန်အဝါများကလည်း ပျောက်ကွယ်သွားခဲ့သည်။

ဖူး……..

ခရမ်းရွှေကြွက်တန်ခိုးရှင်များသည် သွေးများ ဆက်တိုက်အန်ထုတ်နေရပြီး ကောင်းကင်မှနေ၍ တစ်ယောက်ပြီး တစ်ယောက် ပြုတ်ကျလာသည်။ သူတို့သည် ထိုသို့သော တိုက်ခိုက်မှုကို တောင့်ခံနိုင်ခြင်း မရှိကြပေ။

ထိုမြင်ကွင်းကို ကြည့်ရင်း လူတိုင်းက သက်ပြင်းချလိုက်ကြသည်။ အရင်ဆုံး လှုပ်ရှားချင်သူများသည် လောကကြီး၏ အာရုံစိုက်မှုကို ခံရသော်လည်း  ယခုတွင် သူတို့က ကျရှုံးခဲ့ရပြီး အနုတ်သဘောဆောင်သည့် ဥပမာဖြစ်လာခဲ့သည်။

ယနေ့ ဤအခြေအနေတွင် ဗြဟ္မာ့သန့်စင်ကောင်းကင်သည် မဟာဝင်္ကပါတစ်ခုကို စီစဉ်ခင်းကျင်းခဲ့ပြီးယင်းကို ချိုးဖျက်ရန်မှာ သေချာပေါက် လွယ်ကူလိမ့်မည်မဟုတ်ပေ။ ထိုအခိုက်အတန့်တွင် သူတို့၏ အရှက်ရမှုက ဝင်္ကပါအတွင်းသို့ စတင်ဝင်ရောက်စဉ်က ခံစားခဲ့ရသည့် ခံစားမှုနှင့် အတူတူပင် ဖြစ်တော့သည်။

***


Comment

Leave a Reply


Options

not work with dark mode
Reset