အပိုင်း(၁၄၄၆)

ကောင်းကင်နတ်တံခါးကိုဝင်ခွင့်မရရင်အိမ်မပြန်

နတ်လက်နက်မုန်တိုင်းက အပြင်းအထန်ပင် မိုးရွာသကဲ့သို့ ကျဆင်းလာနေသည်။ မရေတွက်နိုင်သည့် နတ်လက်နက်များက အလွန် လျင်မြန်သည့် အရှိန်ဖြင့် သွားလာနေကြသည်။

ဝမ်ယန်ပင်းရှေ့မှ နတ်ဓားများသည် ရှေ့သို့ ထိုးဖောက်လာနေကြသည်။ လေဟာနယ်ကို ဖြတ်သန်းလာသည့် ပင်းစွမ်းအားသည် နတ်လက်နက် အစစ်အမှန်များထက်ပင် ပို၍ ကြောက်မက်ဖွယ် ကောင်းနေသည်ဟု ထင်မှတ်ရပေသည်။

ထိုထက်ရှမှုက နတ်လက်နက်များ၏ စွမ်းအားကို အဝေးမှ လူများပင် ခံစားသိရှိနိုင်စေသည်။

ဂူတုံးလျှိုသည် သူ ရပ်နေရာ၌ပင် ရှိနေကာ အောက်မှ ပုံရိပ်ကို ငုံ့ကြည့်နေသည်။ သူသည် လှုပ်ရှားမှုမပြုဘဲ သင်္ကေတကိုးခု၏ နတ်အလင်းတို့က သူ့ကို ဝိုင်းပတ်နေသည်။ တောက်ပသည့် ပုံရိပ်တစ်ခုသည် သူ၏ နောက်ကျောမှ ရုတ်တရက် ပေါ်ပေါက်လာသည်။ သူက ရှေ့သို့ ခြေတစ်လှမ်း လှမ်းလိုက်ကာ ကြီးမားသည့် ရွှေရောင်ငှက်ကြီးများက အော်မြည်ရင်း ရှေ့သို့ တိုးဝင်သွားခဲ့သည်။ ယင်းတို့သည် ရွှေရောင်နတ်အလင်းတို့ လွှမ်းခြုံ၍ ပျံသန်းနေပြီး ဖြန့်ကြက်ထားသော သူတို့၏ တောင်ပံတို့က ကောင်းကင်ကို လွှမ်းခြုံထားကာ နတ်လက်နက်များ အားလုံးကို လွှမ်းမိုးလိုက်သည်။

နတ်လက်နက်များနှင့် ငှက်များသည် ပြင်းထန်စွာ ထိခိုက်မိကြပြီး လူအုပ်ကြီးသည် ထိုငှက်များက ဖန်တီးထားခြင်း မဟုတ်ဘဲ ဆင့်ခေါ်လိုက်ခြင်း ဖြစ်သည်ကို အံ့အားသင့်စွာ သိရှိလိုက်ကြရသည်။ ယင်းတို့သည် တည်ဆောက်ထားသည့် ပုံရိပ်ယောင် မဟုတ်ဘဲ အစစ်အမှန် နတ်ငှက်များ ဖြစ်လေသည်။ သူတို့၏ ကြီးမားသော ခန္ဓာများတွင် တိုက်ခိုက်မှုစွမ်းအားတို့ဖြင့် တောက်ပနေပြီး သူတို့ ရှေ့မှ အရာအားလုံးကို ပြားပြားဝပ်ပျက်စီးစေမည့် စွမ်းအားတို့ ပါဝင်နေသည်။ ယင်းတို့သည် လာနေသည့် နတ်လက်နက်များကို အမှန်တကယ်ပင် တားဆီးနိုင်လေသည်။

“သူက နတ်ငှက်တွေကို ဆင့်ခေါ်နိုင်တယ်လား” လူအုပ်ကြီးက ဂူတုံးလျှိုကို ကြည့်လိုက်ပြီး ဂူတုံးလျှိုက အမွေအနှစ်များကို ဆက်ခံခဲ့ရသည်အား အမှတ်ရလိုက်သည်။ သူက မူလတောင်တန်း၏ ကံစွမ်းအားများအားလုံးကို ရရှိခဲ့ပေသည်။

သို့သော် ထိုပြင်းထန်သည့် စွမ်းအားကို ထုတ်ဖော်ပြသခြင်းကလည်း ဝမ်ယန်ပင်း၏ ခိုင်မာသော စိတ်ထားကို မယိမ်းယိုင်စေနိုင်ပေ။ သူ၏ ခြေလှမ်း တစ်လှမ်းချင်းစီတိုင်းတွင် မတူညီသည့် နေရာများမှ နတ်လက်နက်များ ပေါ်ပေါက်လာနေပြီး ယင်းတို့ လှုပ်ရှားမှုအတိုင်း ကောင်းကင်ကို လွှမ်းခြုံသွားခဲ့လေသည်။

ဂူတုံးလျှို ရှိနေရာသို့ နတ်လက်နက်များဖြင့် ဖုံးလွှမ်းသွားစေရန်မှာ အချိန်ခဏမျှသာ ကြာမြင့်လေသည်။ သူ့ကို ဖုံးလွှမ်းထားသည့် ငှက်များသည် တုန်ခါသွားကာ အက်ကြောင်းများ ဖြစ်ပေါ်လာသည်။

“ဝမ်ယန်ပင်းက ‘ပင်း’ လမ်းစဉ်ကို အတော်လေး အားကောင်းအောင် အသုံးပြုနိုင်တာပဲ။ အဲဒီတိုက်ခိုက်မှုက ရိုးရှင်းပေမဲ့ အရမ်း အစွမ်းထက်တယ်။ တခြား ပြန်လည်မွေးဖွားခြင်း အဆင့်တွေ ဆိုရင်တောင် အဲဒီလောက် အစွမ်းထက်တဲ့ တိုက်ခိုက်မှုမျိုးကို တောင့်ခံနိုင်မှာ မဟုတ်ဘူး” တိုက်ပွဲကို စောင့်ကြည့်နေကြသည့် သူများ၏ နှလုံးသားတို့က တုန်ယင်နေသည်။  နတ်လက်နက်များမှ တိုက်ခိုက်မှုတစ်ခုချင်းစီသည် အလွန်အားကောင်းသော စွမ်းအားများ ပါဝင်နေကြောင်း ခံစားမိစေပေသည်။ ထိုနတ်လက်နက်များက တစ်စုံတစ်ယောက်ထံသို့ ကျရောက်လာသည့်အခါ စွမ်းအားများက အလွန် ကြောက်မက်ဖွယ် ကောင်းလှပေသည်။

ဝမ်ယန်ပင်း၏ ကျင့်ကြံဆင့်သည် ရှန့်ထိုအဆင့် အထွတ်အထိပ်သို့ ရောက်ရှိခြင်း မရှိသေးသော်လည်း သူ့ တိုက်ခိုက်မှုများက ထိုသို့အဆင့်မျိုး၏ စွမ်းအားမျိုးကို သယ်ဆောင်ထားပေသည်။

ဝမ်ကလန်က ကျင့်ကြံသော ထူးခြားလမ်းစဉ်သည် ‘ပင်း= တိုက်ခိုက်ခြင်း၊ အင်အား၊ စွမ်းအား’ အပေါ်တွင် အလေးပေးထားသည် ဖြစ်ရာ ယင်းကျင့်စဉ်ကို တိုက်ခိုက်မှုစွမ်းအား၌ ပြိုင်ဘက်ကင်းသည်ဟု ကျော်ကြားပေသည်။

ဝမ်ယန်ပင်းသည် တောက်ပနေသည့် နတ်ငှက်များကို မော့ကြည့်လိုက်သည်။ သူက နောက်တစ်လှမ်း ထပ်လှမ်းလိုက်ကာ နတ်လက်နက်များက ထပ်မံကျဆင်းလာပြန်သည်။ အက်ကွဲသည့် ဆူညံသံများကို ကြားလိုက်ရပြီး ပျက်စီးရာများ ပေါ်ပေါက်လာသည်။ ထိုငှက်များ အားလုံး၏ ပေါ်တွင် အက်ကွဲရာများ ပေါ်ပေါက်လာပြီး ‘ပင်း’ သင်္ကေတများသည်လည်း စတင်အက်ကွဲလာသည်။

ဘုန်း ဆူညံသည့် အသံများကို ကြားလိုက်ရကာ သင်္ကေတများက ပျက်စီးသွားသည်။ နတ်ငှက်များသည်လည်း ထပ်မရှိတော့ပေ။

ထိုသတ်ဖြတ်ခြင်း နတ်လက်နက်များက ဖျက်ဆီးချေမှုန်း ခံလိုက်ရသည်ဟု ထင်မှတ်ရပေသည်။

ဘုန်း …

သို့သော် မကြာခင်၌ ဂူတုံးလျှိုသည် အောက်သို့ နောက်ထပ်ခြေတစ်လှမ်း ထပ်လှမ်းလိုက်ပြီး ထို ထက်ရှသည့် စွမ်းအားများကို ဖိနှိပ်လိုက်ဟန်တူသည်။ ကြီးမားသည့် နတ်ဆိုးသားရဲများက ရှေ့သို့ တိုးဝင်သွားသည်။ အစစ်အမှန် နဂါးများ၊ လိပ်နက်၊ ချီလင်နှင့် ခွေတို့ ထွက်ပေါ်လာလေသည်။

ထိုများပြားလှသည့် သားရဲအုပ်ထဲမှ တစ်ကောင်ချင်းစီတိုင်းကို သူ၏ စိတ်စွမ်းအားများနှင့် ပေါင်းစပ်ထားသည်။ သင်္ကေတစာလုံး ကိုးခုက လှည့်ပတ်နေပြီး ရောက်လာနေသည့် နတ်လက်နက်များကို အပိုင်းပိုင်း ဖျက်ဆီးပစ်လိုက်သည်။

ထိုတိုက်ပွဲက အလွန်ပင် ရင်ထိတ်တုန်လှုပ်ဖွယ် ဖြစ်သည်။ တိုက်ပွဲဝင်သူ နှစ်ဦးလုံးက ဥယျာဉ်ထဲတွင် လမ်းလျှောက်နေသလိုမျိုး ထင်မှတ်ရပေသည်။

သို့သော် ကွာခြားသည်က ဝမ်ယန်ပင်းသည် ကောင်းကင် နတ်တံခါးဂိုဏ်းကို ဝင်ရောက်လိုသည့်အတွက် လမ်းလျှောက် တက်လာနေသည်။

အခြားတစ်ဖက်မှ ဂူတုံးလျှိုသည်တော့ ကောင်းကင်နတ်တံခါးသို့ ဝင်ရောက်ချင်နေသည့် ဝမ်ယန်ပင်း၏ လမ်းကို တားဆီးရန်  ခြေလှမ်းများကို အောက်သို့ ဆင်းလာနေခြင်း ဖြစ်သည်။

သို့သော် နှစ်ယောက်လုံး၏ တိုက်ခိုက်မှုများသည်တော့ လူအုပ်ကြီးအား အသက်ပင် မရှူဘဲ စောင့်ကြည့်နေစေရန် လုပ်ဆောင်နိုင်သည်။ သူတို့ ခြေလှမ်းတစ်လှမ်း လှမ်းလိုက်တိုင်း အလွန် ပြင်းထန်သည့် တိုက်ခိုက်မှု စွမ်းအားများကိုပါ ထုတ်ဖော်ခြင်း ဖြစ်သည်။

နှစ်ယောက်လုံးသည် မျက်နှာချင်းဆိုင် တစ်လှမ်းချင်း တစ်လှမ်းချင်း လျှောက်လာနေသည်။ ပြင်းထန်သည့် အရှိန်အဝါတို့က ရှုပ်ထွေးနေသည့် လေဟာနယ်အတွင်း အော်မြည်နေသည်။ ယခု အခြေအနေကို ကြည့်ကာ ပြောရလျှင် ဝမ်ယန်ပင်းသည် မည်မျှ အစွမ်းထက်သည့် တိုက်ခိုက်မှုကို ဖော်ထုတ်သည်ဖြစ်စေ သူက ဖြတ်ကျော်သွားရန် မျှော်လင့်ချက်မရှိဟု ဆိုနိုင်သည်။

“သူ ထုတ်ဖော်တဲ့ ပင်းစွမ်းအားက ပိုပြီး အစွမ်းထက်လာပြီ”

သူ အထက်သို့ ဆက်တက်သွားလေ အစွမ်းထက်လာလေ ဖြစ်သည်ကို တစ်စုံတစ်ယောက်က ရှာဖွေတွေ့ရှိသွားသည်။ နတ်လက်နက်များက သူ၏ ပြိုင်ဘက်အား ဆက်လက် ပစ်ခတ်နေပြီး သူ ခန္ဓာကိုယ်မှ ထက်ရှသော စွမ်းအားများလည်း တိုးမြင့်လာသည်။ ပင်းစွမ်းအားက အထွတ်အထိပ်သို့ ရောက်ရှိတော့မတတ် ဆက်လက် တိုးမြင့်လာနေသည်။

“သူက အရှိန်ရလာပြီလား”

လူအုပ်ကြီးက ဖြစ်နိုင်သည့် ကောက်ချက်ကို ချလိုက်ပြီး သူတို့၏ စိတ်တို့က တုန်ယင်လာသည်။ ထိုသို့ ဖြစ်နိုင်ချေက အလွန် မြင့်ပေသည်။ ဝမ်ယန်ပင်းသည် ယန်ပင်းပညာရပ်ကို အလွန် မြင့်မားသည့် အဆင့်ထိ ကျင့်ကြံထားသူတစ်ဦး ဖြစ်သည် မဟုတ်ပါလား။

ထိုပင်းလမ်းစဉ်၏ အဆုံးမဲ့ ပြင်းထန်လာသော စွမ်းအားများက ဝမ်ယန်ပင်း စွမ်းအားတိုးမြင့်လာခြင်း လက္ခဏာပင် ဖြစ်သည်။

လက်ရှိတွင် ထိုတိုက်ခိုက်မှုများက ဂူတုံးလျှို၏ ခန္ဓာကိုယ် အနားကိုပင် မရောက်နိုင်ခဲ့ပေ။ သူတို့နှစ်ယောက်အနီးမှ နေရာအနှံ့သည် နှိုင်းယှဉ်မရနိုင်သည့် နက်လက်နက် စွမ်းအားများ၏ မုန်တိုင်း ဖြစ်လာသည်။

ဝမ်ယန်ပင်းက ရှေ့သို့ တစ်ဖန် ထွက်ပေါ်လာပြန်သည်။ သူက ဂူတုံးလျှိုကို မော့ကြည့်ကာ အလွန် ထက်ရှသည့် အသံနှင့် ပြောလိုက်သည်။

“ကျုပ်က နတ်တံခါးကို ဝင်မှာ။ အစွမ်းထက် အမွေအနှစ်တွေကို ဆက်ခံရခဲ့ပေမဲ့ ကျုပ်ရဲ့ လမ်းမှာတော့ မပိတ်နိုင်သေးဘူး”

“မင်းက ကောင်းကင်နတ်တံခါးကို ဝင်လို့မရဘူး” ဂူတုံးလျှို၏ အသံက တည်ငြိမ်စွာ ထွက်ပေါ်လာသည်။ သူက တစ်ခွန်းတည်းသာ ပြောလိုက်၏။

“အဲဒီလိုလား” ဝမ်ယန်ပင်းက ပြန်ဖြေလိုက်သည်။ နောက်ဆုံး၌ သူက ရပ်တန့်လိုက်ပြီး မည်သည့် လှုပ်ရှားမှုမှ ထပ်မလုပ်တော့ပေ။ သူက ရိုးရှင်းစွာပင် လေထဲမှ မုန်တိုင်းကို ကြည့်နေပြီး သန့်စင်သည့် နတ်အလင်းများက သူ့ကို လွှမ်းခြုံထားကာ သူ့ကို အလွန် တောက်ပနေစေသည်။

သူက ချိပ်စည်းများကို ထုတ်ဖော်လိုက်ကာ နတ်အလင်းတို့က သူ့ကို လွှမ်းခြုံထားသည်။ ထို့နောက် သူက တည်ငြိမ်သော အသံဖြင့် ပြောလိုက်သည်။

“ယန်ပင်းပညာရပ် အထွတ်အထိပ်မှာ လမ်းစဉ်အားလုံးက တည်ရှိမှုတစ်ခုတည်းအဖြစ် ပြောင်းလဲသွားတယ်။ ကျုပ်ကလည်း နတ်လက်နက် ဖြစ်လာလိမ့်မယ်”

သူ့အသံကို ကြားလိုက်ရပြီး ပြင်းထန်သည့် နတ်လက်နက်မုန်တိုင်းက သူ၏ ခန္ဓာကိုယ်ကို တိုးဝှေ့လာသည်။ ထောင်သောင်းချီသော နတ်လက်နက်တို့က သူ့ခန္ဓာကိုယ်တွင် ပျော်ဝင်ကာ ပေါင်းစပ်စုစည်းလာသည်။

ခဏချင်းအတွင်းတွင် ဝမ်ယန်ပင်းသည် လက်နက်တို့၏ အရှင်သခင် ဖြစ်လာပြီး သူသည် ထောင်သောင်းချီသော နတ်လက်နက်တို့၏ ခေါင်းဆောင် ဖြစ်လာပေသည်။

အလွန် ထက်ရှသည့် အရှိန်အဝါက ဝမ်ယန်ပင်းထံမှ ပေါက်ကွဲထွက်လာသည်။ ကောင်းကင်ရှိ တိမ်တိုက်များက အော်မြည်နေပြီး ပင်းလမ်းစဉ်သည် ကျယ်ပြောသည့် နေရာတစ်ခွင်ကို ဖြတ်သန်းသွားသည်။

ထိုအချိန်၌ ဝမ်ယန်ပင်းသည် အလွန် အန္တရာယ်များပုံ ပေါ်ကာ သူသည် ထောင်သောင်းချီသည့် လက်နက်တို့၏ တစ်ခုတည်းသော ဖြစ်တည်မှု ဖြစ်လာသည်။

“နောက်ဆုံးတော့ ဒါက ဘယ်လိုဖြစ်မှာလဲ” လူအများက ရေရွတ်လိုက်ကြသည်။ ထိုသည်မှာ လူအများ ခန့်မှန်းထားသကဲ့သို့ ဖြစ်ကာ ဝမ်ယန်ပင်း၏ ယန်ပင်းပညာရပ်က ထိုအဆင့်ထိ ရောက်ရှိနိုင်ပေသည်။

ပြင်းထန်သည့် အလင်းတန်းများ ထွက်ပေါ်လာပြီး လူအုပ်ကြီးသည် ဝမ်ယန်ပင်က သူ ရပ်နေရာမှ ပျောက်ကွယ်သွားသည်ကို မြင်လိုက်ရပြီး ဓားတစ်လက်ကဲ့သို့ အလင်းတန်းအဖြစ် ပြောင်းလဲသွားသည်ကို တွေ့လိုက်ကြရသည်။

သူက အပေါ်သို့ တစ်လှမ်းချင်း ဆက်တက်မသွားနေတော့ဘဲ ချက်ချင်းပင် လေဟာနယ်ကို ဖြတ်ကာ ဂူတုံးလျှိုဆီ တိုးဝင်သွားလေသည်။

လူအုပ်ကြီးက ဝမ်ယန်ပင်း၏ ခန္ဓာကိုယ် မည်သည့်နေရာ၌ ရှိသည်ကို မမြင်ကြရပေ။ သူသည် ဓားတစ်လက် ဖြစ်၍နေကာ သူတို့က ထိုဓားတစ်လက်ကိုသာ မြင်ကြရသည်။ သူသည် ဓားကဲ့သို့ လေထဲကို ထိုးခွင်းသွားပြီး ထက်ရှသည့် အရှိန်အဝါတို့ကို ပြင်းထန်စွာ ထုတ်လွှတ်ထားကာ လေထဲ ထိုးဖောက်သွားလေသည်။ လက်နက်သည် မည်သူမှ စကားမဆိုနိုင်မီ ဦးတည်ရာသို့ ရောက်ရှိသွားကာ နတ်ဆိုးသားရဲတစ်ကောင်၏ ခန္ဓာကိုယ်ကို ထိုးဖောက်လိုက်သည်။ တစ်ယောက်သည် နတ်ဆိုးသားရဲများကို တစ်ကောင်ပြီးတစ်ကောင် ဆင့်ခေါ်နေပြီး ဓားသွားက ယင်းတို့ကို ဖြတ်သန်းကာ သွားနေသော်လည်း လျော့နည်းသွားခြင်း မရှိပေ။ သူတို့အားလုံးသည် လက်နက်မှ တိုက်ခိုက်မှု တစ်ချက်ဖြင့်ပင် ထိုးဖောက်ခံကြရပေသည်။

ထိုဖြောင့်တန်းသည့် ဓားအလင်းတန်းသည် ဂူတုံးလျှို၏ ခန္ဓာကိုယ်ကို ချက်ချင်း ထိုးဖောက်သွားတော့မလို ထင်မှတ်ရပေသည်။ ထိုအလင်းမှာ မျက်စိဖြင့် လိုက်၍ ကြည့်ရန်ပင် ခက်ခဲလောက်အောင် အလွန် လျင်မြန်ပေသည်။

ဘုန်း … ဆူညံသံတစ်ခုကို ကြားလိုက်ရပြီးမှသာလျှင် လူအများသည် ထိုဓားအား ရှင်းလင်းစွာ မြင်နိုင်ကြလေတော့သည်။ ယင်းသည် ဖြစ်တည်မှုတစ်ခု၏ ရပ်တန့်ခြင်းကို ခံလိုက်ရသည်။ ထိုသည်က ဂူတုံးလျှိုကို ဖုံးလွှမ်းပေါင်းစပ်ထားသော တောက်ပနေသည့် နတ်ပုံရိပ်တစ်ခု ဖြစ်လေသည်။ ထိုခန္ဓာသည် နတ်အလင်းတို့ဖြင့် တောက်ပနေပြီး ပတ်ဝန်းကျင်နှင့် တသားတည်း ဖြစ်နေလေသည်။ သင်္ကေတစာလုံးကိုးခုသည် သူ့ကို ဝန်းရံရစ်ပတ်နေသည်။ မရေတွက်နိုင်သည့် သားရဲကြီးများ၏ အရိပ်က တစ်ချိန်တည်းတွင် အော်မြည်နေပြီး လက်သီးချက်တစ်ချက် ထွက်ပေါ်လာသည်။

သူ၏ လက်သီးချက်သည် ဓားပေါ်သို့ ကျရောက်သွားကာ အရာအားလုံးကို သတ်ဖြတ်နိုင်စွမ်း ရှိသည့် ဓားအား ရပ်တန့်သွားစေသည်။

ဓားသည် အော်မြည်နေပြီး ထိုထူးခြားဆန်းကြယ်သည့် အရိပ်ကို ဆန့်ကျင် တိုက်ခိုက်လာသည်။ ကြီးမားသည့် နတ်ဆိုးအရိပ်တို့သည် တစ်ခုပြီးတစ်ခု ဖျက်ဆီးပစ်ခြင်းကို ခံရလေသည်။

ဘုန်း … ဓားသည် ချက်ချင်း ပျောက်ကွယ်သွားကာ လေထုကို ဖြတ်သန်း၍ အခြားတစ်ဖက်တွင် ပေါ်ပေါက်လာကာ ဂူတုံးလျှိုကို နောက်တစ်ဖန် တိုက်ခိုက်လာပြန်သည်။

ဂူတုံးလျှိုသည် သူ့ခေါင်းကို ပင့်မကာ ကြည့်လိုက်သည်။ ထိုထူးခြားဆန်းကြယ်သည့် ပုံရိပ်သည် နေရာကူးပြောင်းနိုင်သည့် အစွမ်းရှိသည်ဟု ထင်မှတ်ရသည်။ ယင်းသည် ဓား၏ အရှေ့၌ တစ်ဖန် ပိတ်ရပ်ကာ ကြောက်မက်ဖွယ် မဟာလမ်းစဉ် လက်သီးချက်ကို ပစ်လွှတ်လိုက်သည်။

သူတို့ အနီးရှိ လေဟာနယ်က တုန်ခါနေသည်။ ထိုဓားက အပြင်းအထန် အော်မြည်နေကာ မတူညီသည့် နေရာများမှ တစ်ခုပြီးတစ်ခု ရောက်လာနေသည်။ သို့သော် ထိုနတ်ပုံရိပ်သည် ဓားများပေါ်ပေါက်လာရာ မည်သည့်နေရာ၌မဆို အတိအကျ တားဆီးထားနိုင်ပြီး မည်သည့်နေရာကိုမဆို ပိတ်ဆို့ တိုက်ခိုက်နိုင်ပေသည်။

ဘုန်း … တုန်ခါသည့် အသံတစ်ခုကို ကြားလိုက်ရပြီး ဓားသည် နောက်သို့ လွင့်သွားကာ လေထဲတွင် ရစ်ဝဲနေသည်။ ထိုပုံရိပ်သည် တောက်ပနေကာ ထိုသည်က ဝမ်ယန်ပင်း ကိုယ်တိုင်ပင် ဖြစ်တော့သည်။

သူ၏ မျက်လုံးများက အလွန် ထက်ရှနေသည်။ ဓားသည် ဆက်လက်ကာ တုန်ခါနေပြီး သူ၏ စိတ်ကလည်း တုန်ယင်နေသည်။

သူ၏ ဓားတိုက်ခိုက်မှုက ရှေ့မှ ထူးခြားဆန်းကြယ်သည့် ခုခံမှုအား မည်သို့ဖြစ်ကာ မချိုးဖျက်နိုင်ရသနည်းဟု အံ့အားသင့်နေပေသည်။

ဝမ်ကလန်၏ တန်ခိုးရှင်များ အားလုံးသည် ထိုမြင်ကွင်းကြောင့် သူတို့၏ အမူအရာများ မည်းမှောင်သွားကြသည်။ သိသာစွာပင် ဝမ်ယန်ပင်းသည် ထိုခုခံကာကွယ်မှုကို မချိုးဖျက်နိုင်ဘဲ ကျန်ရစ်နေပေသည်။

ဝမ်ယန်ပင်းသည် ဓားအဖြစ်သို့ ပြောင်းလဲခဲ့ပြီး ဖြစ်သော်လည်း သူက ဂူတုံးလျှိုကို ဖိအားမပေးနိုင်ဘဲ ဖြစ်နေခဲ့သည်။

“မင်းတို့က ဒီအချိန်ကို မရွေးခဲ့သင့်ဘူး” ဂူတုံးလျှိုက လေထဲတွင် ရစ်ဝဲနေသည့် ဓားကို ပြောလိုက်သည်။

ဝမ်ကလန်သည် ကောင်းကင် နတ်တံခါးဂိုဏ်းသို့ ပြန်လာရန် နှစ်ထောင်ပေါင်းများစွာ စောင့်ဆိုင်း၍ ကြိုးစားခဲ့ကြသည်။

သို့သော် ဂူတုံးလျှိုက ဂူထျန်းရှင်းနှင့် ဂူကျန်းနန်တို့၏ ဆန္ဒကို ပခုံးထမ်းကာ ပြန်လာဖြစ်ခဲ့သည်။ ထို့ကြောင့် သူ့အတွက် ရှုံးနိမ့်ခြင်းက မဖြစ်နိုင်သလို ထိုသို့ ဖြစ်ခွင့်မပြုနိုင်ပေ။ သူသာ ရှုံးနိမ့်ခဲ့ပါက ဂူထျန်းရှင်း သူ့အတွက် လုပ်ပေးခဲ့သမျှ အလကား ဖြစ်သွားရပေလိမ့်မည်။

အရာအားလုံး၏ နောက်ကွယ်တွင် အရေးပါသော လေးနက်မှုတို့ ရှိနေသည်။

ထို့ကြောင့်ပင် ဝမ်ယန်ပင်းကို ကောင်းကင် နတ်တံခါးဂိုဏ်းသို့ ဝင်ရောက်ခွင့်ပြုရန် မဖြစ်နိုင်ပေ။

နှစ်ပေါင်းများစွာ စောင့်ဆိုင်းခဲ့ခြင်းနောက်၌ မည်သို့မှ မဟုတ်ဘဲ အဆုံးသတ်ရတော့မည် ဖြစ်သည်။

“ကျုပ်က ကျိန်းသေ ကောင်းကင်နတ်တံခါးကို ဝင်မှာ” ဓားဆီမှ အသံတစ်ခုကို ကြားလိုက်ရပြီး ထိုအသံက လေထုကို ဖြတ်ခွင်းသွားသည်။ ထိုသည်က ဝမ်ယန်ပင်း၏ ကြုံးဝါးသံ ဖြစ်လေသည်။  ထိုအချိန်တွင် အခြေအနေက မရေရာသော်လည်း သူကတော့ ကောင်းကင် နတ်တံခါးဂိုဏ်းသို့ ကျိန်းသေ ဝင်ရောက်ရမည်ဟူသော ဆုံးဖြတ်ချက်ကို ကိုင်စွဲထားလေသည်။

ဂူတုံးလျှိုသည် အခြားမည်သည့် အရာကိုမှ ပြောဆိုခြင်းမရှိပေ။ မရေတွက်နိုင်သည့် နတ်အလင်းတို့က ကျဆင်းလာပြီး ထိုနတ်ပုံရိပ်က တစ်ဖန်ပြန်ဖြစ်တည်လာကာ တောက်ပသည့် နတ်ဘုရားချပ်ဝတ်ကို ဝတ်ဆင်ထားသကဲ့သို့ပင် ဖြစ်သည်။

တောက်ပနေသည့်  ဂူတုံးလျှို၏ သက်စောင့်ဝိညာဉ်က သူ့အနောက်မှ ပေါ်ထွက်လာသည်။ ထိုသည်က ဝင်္ကပါအစီအရင် ဖြစ်လေသည်။

ဝင်္ကပါသည် နတ်အလင်းများကို ဝါးမျိုကာ အရွယ်အစားက ဆက်လက် ကြီးထွားလာသည်။ သူတို့၏ ပတ်ဝန်းကျင်တွင် မဟာလမ်းစဉ် စွမ်းအားများက အော်မြည်နေပြီး ထိုဝင်္ကပါ၏ ဝါးမျိုခြင်းကို ခံရကာ ဝင်္ကပါနှင့် ပေါင်းစပ်နေသည်။

ယင်း ဝင်္ကပါသည် ခဏချင်းပင် လေထဲ၌ မားမားမတ်မတ် ဖြစ်တည်လာကာ ဂူတုံးလျှို၏ ခန္ဓာကိုယ်ကလည်း တဖြည်းဖြည်း လေထဲသို့ တက်လာခဲ့သည်။

“ကျွယ်ရှန်းဝင်္ကပါ”

ဝမ်ကလန်မှ တန်ခိုးရှင်များ အားလုံးသည် ထိုသက်စောင့်ဝိညာဉ်အား တွေ့သည့်အခါ သွေးဆုတ်ဖြူရော်သွားကြပေသည်။ သူတို့၏ နှလုံးသားများသည် ထိုမြင်ကွင်းကြောင့် သွေးစိမ်းရှင်ရှင် ယိုစီးနေပြီ ဖြစ်သည်။

သူတို့ နှစ်ပေါင်းထောင်ကျော် သည်းခံခဲ့ရသည့် စော်ကားခံရမှုက ဆေးကြော၍ မဖြစ်နိုင်အောင် ကျန်ရစ်နေမည် ဖြစ်သည်။

သူတို့ နှစ်ပေါင်းထောင်ကျော် စွဲကိုင်ထားခဲ့သည့် မျှော်လင့်ချက်တို့က အစိတ်စိတ် ပြိုကွဲရပေတော့မည်။

သူတို့ထဲမှ မည်သူကမှ ဂူတုံးလျှိုက ကျွယ်ရှန်းဝင်္ကပါအား ရရှိထားလိမ့်မည်ဟု မျှော်လင့်မထားခဲ့ကြပေ။

ထိုကျွယ်ရှန်းဝင်္ကပါသည် လွန်ခဲ့သော နှစ်ပေါင်းများစွာက လောကတစ်ခွင်တွင် ကျော်ကြားခဲ့ပြီး မသိသူ မရှိခဲ့ပေ။

ကျွယ်ရှန်းဝင်္ကပါ ပေါ်ထွက်လာသည့်အခါ လမ်းစဉ်အားလုံးက ပျက်စီးရကာ သက်ရှိများအားလုံး သေဆုံးကြရမည် ဖြစ်သည်။

ဂူထျန်းရှင်းသည် သေမင်းနှုတ်ခမ်းဝသို့ ရောက်နေခဲ့သူ ဖြစ်ပြီး ဂူတုံးလိျှုအား ကျွယ်ရှန်းဝင်္ကပါ မည်သို့ လွှဲပြောင်းပေးနိုင်ခဲ့သနည်းဟု သိချင်နေကြပေသည်။

ဂူထျန်းရှင်းက ကောင်းကင်လမ်းစဉ် လျှို့ဝှက်ချက်တို့အား မူလတောင်တန်းတွင် အစီအစဉ်ချကာ ထိန်းသိမ်းထားခဲ့သည်လားဟု သူတို့က စူးစမ်းချင်နေကြပေသည်။

မရေတွက်နိုင်သည့် လူများသည် စိတ်လှုပ်ရှားသည့် အမူအရာတို့ ဖြစ်ပေါ်လာကြသည်။ သူတို့သည် နောက်ထပ်ဂူထျန်းရှင်းအား မြင်တွေ့လိုက်ရသကဲ့သို့ပင် ဖြစ်သည်။

ယင်းသည် ဝင်္ကပါက လေထဲ၌ လည်ပတ် အလုပ်လုပ်လာသည်ထက် ပိုကာ နတ် နှင့် နတ်ဆိုးအရိပ်တို့က ဝင်္ကပါပေါ်တွင် ပေါ်ပေါက်လာသည်။ သူတို့၏ မူလသဏ္ဌာန် မဟုတ်ကြသော်လည်း ပြင်းထန်၍ ကြောက်မက်ဖွယ် အရှိန်အဝါတို့အား ထုတ်ဖော်ပေးနေပေသည်။

ထိုကြီးမားသည့် နတ်ဝင်္ကပါမှ အဆုံးမဲ့ ကြီးမားသော ရှေးဟောင်းသင်္ကေတစာလုံး တစ်ခုပြီးတစ်ခု ပေါ်ပေါက်လာကာ နတ်ဝင်္ကပါအချို့နှင့် တူအောင် ပြုလုပ်နေသည်။

ထိုအခိုက်အတန့်တွင် ကျွယ်ရှန်းဝင်္ကပါအထက်၍ ‘ပင်း’ ဟူသော သင်္ကေတ ပေါ်ပေါက်လာသည်။ ထောင်သောင်းချီသည့် နတ်လက်နက်များက ဝင်္ကပါအတွင်း ပေါ်ပေါက်လာကာ သူတို့၏ ပတ်ဝန်းကျင်၌ မဟာလမ်းစဉ် နတ်လက်နက်များ ဖြစ်ပေါ်လာပေသည်။

“မင်းက ထွက်ပေါ်မလာသင့်ဘူး” ဂူတုံးလျှိုက ဝမ်ယန်ပင်းကို ကြည့်ကာ ပြောလိုက်သည်။ သူ ပြောပြီးသည်နှင့် လက်နက်များက ကျဆင်းလာကာ ရှေးဟောင်းစာလုံး ‘ပင်း’ သည် တောက်ပသည့် အလင်းများနှင့်အတူ မြင့်တက်လာပြီး လေထဲတွင် လင်းလက်နေကာ ထောင်သောင်းချီသည့် နတ်လက်နက်များ၏ သရုပ်သကန် ဖြစ်လာခဲ့သည်။

ဝမ်ယန်ပင်း ပြောင်းလဲထားသည့် ဓားပေါ်တွင် အလွန်ပြင်းထန်သည့် စွမ်းအားတို့ ပေါက်ကွဲထွက်လာသည်။ နတ်လက်နက်တို့က ကျဆင်းလာသည့်အခါ ဓားသည် ပြန်ဆုတ်ရမည့်အစား ရှေ့သို့ တိုးဝင်သွား၍ လေကို ဖြတ်ခွင်းကာ ဂူတုံးလျှိုထံ တည့်တည့် ဦးတည်သွားခဲ့သည်။

ဘုန်း … ဘုန်း … ဘုန်း …

ကြောက်မက်ဖွယ် တိုက်ခိုက်မှု စွမ်းအားတို့က ကျဆင်းလာကာ ဓားပေါ်သို့ ထိမှန်သွားသည်။ သို့သော် ဓားသည် တုံ့ဆိုင်းသွားခြင်း မရှိဘဲ ရှေ့သို့ ဆက်ကာ တိုးဝင်လာသည်။ သို့ပေမဲ့ နတ်လက်နက်များမှ တိုက်ခိုက်မှုသည် ပင်းစွမ်းအား၏ အောက်တွင် အဆက်မပြတ် တိုးမြင့်လာနေသည်။ ထိုသည်က ထိုဓားတစ်လက်၏ တိုက်ခိုက်မှုက မည်မျှ အားကောင်းသည်ဆိုခြင်း မဟုတ်တော့ပေ။

ထိုတောက်ပနေသော နတ်လက်နက်သည် အော်မြည်၍ နောက်သို့ ဆုတ်ခွာသွားရသည်။ ဝမ်ယန်ပင်း၏ ခန္ဓာကိုယ်ကို လေထဲတွင် တစ်ဖန်ထပ်ကာ မြင်လာရသည်။ သွေးတို့က သူ့ပါးစပ်ထောင့်မှ စီးကျလာနေပြီး သူက ဒဏ်ရာရသွားပုံပေါ်သည်။

ဝမ်ယန်ပင်းသည် လေထဲမှ ဂူတုံးလျှိုကို ကြည့်လိုက်ကာ အကူအညီမဲ့သလို ခံစားလိုက်ရသည်။

ကျွယ်ရှန်းဝင်္ကပါ၌ နတ်တို့နှင့် နတ်ဆိုးတို့က အော်မြည်နေသည်။

ဝမ်ယန်ပင်းသည် ယနေ့တွင် ဂူထျန်းရှင်း ဖန်တီးခဲ့ပြီး ထူးခြားလမ်းစဉ်များ၏ အထွတ်အထိပ်တွင် ရှိနေသော ပြိုင်ဘက်ကင်း လမ်းစဉ်ကို ကိုယ်တွေ့ကြုံခဲ့ရပြီ ဖြစ်လေသည်။ မည်သူကမှ ယင်းအောင်မြင်မှုကို ဖိနှိပ်ဟန့်တားနိုင်လိမ့်မည် မဟုတ်ပေ။

ဝမ်ယန်ပင်းသည် မိမိကိုယ်ကိုယ် နတ်လက်နက်အဖြစ် ပြောင်းလဲခဲ့သော်လည်း အချည်းနှီး ဖြစ်ခဲ့ရသည်။

သူ့တွင် အားနည်းချက်များ ရှိနေသည်လား သိချင်မိသည်။

သူက မည်ကဲ့သို့ အထွတ်အထိပ်ကို ရောက်နိုင်မလဲ မေးခွန်းထုတ်မိသည်။

သူက ဂူတုံးလျှိုနှင့် တိုက်ခိုက်ရန်ပင် အရည်အချင်းမီရဲ့လား သိချင်မိသည်။

ဘုန်း …

သူ့ ခန္ဓာကိုယ်က လေထဲတွင် တစ်ဟုန်ထိုး ပြေးထွက်သွားပြီး အဆုံးမဲ့ ထက်ရှသည့် အရှိန်အဝါတို့က သူ့ခန္ဓာကိုယ်သို့ ပေါင်းစပ်လာကာ ဓားပြားကြီးတစ်လက်အသွင် ပြောင်းလဲလိုက်ပြီး လေထုကို လွှမ်းခြုံလိုက်သည်။

ဓားသွားသည် ထိုအခိုက်တွင် ကောင်းကင်ကို ဖြတ်ပိုင်းကာ ဂူတုံးလျှို ရှိနေရာ လေထုကို ခုတ်ဖြတ်လိုက်၏။

သူတို့ အနီးတွင် ဓားသွား လားရာတစ်ခုကိုသာ တွေ့ရှိနိုင်ကြပေသည်။

ဂူတုံးလျှိုက တစ်ချက် ကြည့်လိုက်ပြီး သူ၏ လက်ကို မြှောက်ကာ ပျံသန်းလိုက်သည်။

မရေတွက်နိုင်သည့် နတ်ပုံရိပ်တို့က ဒဏ္ဍာရီပုံရိပ် တစ်ခုတည်း အဖြစ်သို့ ပေါင်းစည်းသွားသည်။ ထိုနတ်ပုံရိပ်များသည် လက်ကို ယှက်ကာ ဓားသွားပေါ် ရိုက်ချလိုက်သည်။ ဓားသွားအလင်းသည် ပြင်းထန်စွာ တောက်ပနေပြီး အောက်သို့ ဆက်လက် ဆင်းချလာရန် ရည်ရွယ်နေသော်လည်း နတ်ပုံရိပ်တို့က နတ်ဝင်္ကပါမှ အလင်းတို့ကို စုပ်ယူကာ ယိမ်းယိုင်စေခြင်းငှာ မစွမ်းသာခဲ့ပေ။

လက်များက ပြောင်းလဲသွားပြီး ဓားသွား၏ လမ်းကြောင်းက ကွေ့ကောက်သွားပြီးနောက် အဝေးသို့ လွင့်ထွက်သွားကာ လေထဲတွင် မြင့်မားသော အသံတစ်ခု ထွက်ပေါ်လာခဲ့သည်။

ဓားသွားအတွင်း ဝမ်ယန်ပင်း၏ မျက်နှာက လုံးဝ ဖြူဖျော့သွားခဲ့သည်။

‘ငါက ဘယ်လောက်တောင် အသုံးကျလိုက်သလဲ’ ဟု သူ တွေးမိလိုက်သည်။

ဝမ်ကလန်မှ ထိုသူများသည်လည်း ထိုမြင်ကွင်းကြောင့် အကူအညီမဲ့သွားသလို ခံစားလိုက်ရသည်။

ဝမ်ကလန် ခေါင်းဆောင်သည် သက်ပြင်းရှည်ကြီး ချလိုက်၏။ သူတို့သည် နှစ်ပေါင်းများစွာ ပြင်ဆင်လာခဲ့ပြီး နောက်ဆုံး၌ ဝမ်ယန်ပင်းကို မွေးထုတ်ပေးနိုင်ခဲ့သော်ငြား ရလဒ်က စိတ်ပျက်ဖွယ်လိလိ ဖြစ်သည်။

“ထွက်သွား” ဂူတုံးလျှိုက ဝမ်ယန်ပင်းကို ပြောလိုက်သည်။

ဓားသွားသည် တုန်ခါနေပြ ဝမ်းနည်းမှုကြောင့် ငိုကြွေးမြည်တမ်း နေသကဲ့သို့ ထင်မှတ်ရပေသည်။

“တော်လောက်ပြီ” ကလန်ခေါင်းဆောင်က ကောင်းကင်သို့ ကြည့်ကာ ညင်သာစွာ ပြောလိုက်သည်။

ဓားသွားအတွင်းမှ ပုံရိပ်က အောက်သို့ ငုံ့ကြည့်လိုက်သည်။ သူက သူ၏ ကလန်သားများကို မြင်သည့်အခါ သူ့ မျက်လုံးတို့က ဝမ်းနည်းမှုနှင့် မှေးမှိန်သွားသည်။

ဤနှစ်များအတွင်း သူတို့ အားလုံး မျှော်လင့်ခဲ့သည့် ဆန္ဒများက သဲထဲရေသွန် ဖြစ်ခဲ့ရသည်။

တစ်နေ့တွင် အမြင့်ဆုံးမှာ ရပ်နိုင်ရန်မှာ သူ ကြီးပြင်းလာရခြင်း၏ အကြောင်းရင်း ဖြစ်သည်။ ကောင်းကင်နတ်တံခါးသို့ ဝင်ခွင့်ရရန်မှာ သူ့ ကျင့်ကြံခြင်း၏ လောင်စာဖြစ်သည်။

လက်ရှိတွင် ထိုခိုင်မာသော ဆုံးဖြတ်ချက်တို့က ပျက်စီးသွားဟန်တူသည်။

သူက နောက်ပြန်ဆုတ်သင့်သလား သိချင်နေမိသည်။

အရာအားလုံးက အကျိုးမဲ့ ဖြစ်ခဲ့ရသည်။ သူက ယနေ့တွင် ဂူတုံးလျှိုအား မနိုင်ခဲ့လျှင် အနာဂတ်တွင်လည်း အတူတူသာ ဖြစ်ပေလိမ့်မည်။ သူ၏ ကြိုးစားအားထုတ်မှု အားလုံးက အဆုံးသတ်တွင် အချည်းနှီး ဖြစ်ရပေတော့မည်။

ထိုအခိုက်အတန့်တွင် ဝမ်ယန်ပင်းသည် ရီဖူရှင်းနှင့် ပြောခဲ့သည့် စကားများကို အမှတ်ရမိသည်။ ကောင်းကင် အာဏာစက်ဘုံ၏ ထိပ်သီးက မည်သူ ဖြစ်လိမ့်မည်နည်းဟု မေးခဲ့ခြင်း ဖြစ်ပေသည်။

လက်ရှိတွင် သူ့ရှေ့၌ တောင်ကြီးတစ်လုံး ကာဆီးထားပြီး သူက အထွတ်အထိပ်သို့ ရောက်ရန် မဖြစ်နိုင်တော့သည်လား သိချင်မိပေသည်။

သူက ကောင်းကင်နတ်တံခါးသို့ ဝင်ခွင့်မရပါက အိမ်သို့ မပြန်ဟု ဆုံးဖြတ်ခဲ့သည်။

လက်ရှိတွင် သူသည် သူ၏ စကားလုံးများကြောင့် ပြန်ဆုတ်ရန် လမ်းမရှိတော့ပေ။

လေထဲရှိ ထိုပုံရိပ်ကို မော့ကြည့်လိုက်ပြီး ချက်ချင်းပင် တစ်ဟုန်ထိုး ပြေးဝင်သွားခဲ့သည်။ လေက ကောင်းကင်တွင် အော်မြည်နေပြီး နတ်လက်နက်တို့၏ စွမ်းအားက လေထုကို ဖုံးလွှမ်းထားသည်။ ဓားပြားကြီး ဓားရှည်တစ်လက်ကဲ့သို့ တစ်ဖန် ပြောင်းလဲသွားကာ မျက်ရည်စက်တို့ ကျဆင်းလာသည်။

ဓားက ငိုကြွေးမြည်တမ်းနေခဲ့သည်။

“ဝမ်ယန်ပင်း” ထိုမြင်ကွင်းကြောင့် ကလန်ခေါင်းဆောင်က အော်ဟစ်လိုက်ပြီးနောက် ပြောလိုက်သည်။

“ဒီကို ပြန်လာခဲ့”

ကြောက်မက်ဖွယ် အရှိန်အဝါတို့ ပေါက်ကွဲထွက်လာကာ သူက ဝင်စွက်ဖက်ရန် ပြင်လိုက်သည်။

“မအောင်မြင်ရင် အိမ်ကို ပြန်မှာ မဟုတ်ဘူး” တည်ငြိမ်သည့် အသံက လေထုကို ဖြတ်ခွင်းကာ ထွက်ပေါ်လာသည်။ ထိုအခိုက်တွင် ဓားက ကွဲကြေ ပျက်စီးသွားခဲ့သည်။

သို့သော် ပျက်စီးသွားသည့် အပိုင်းအစတို့က ထောင်ချီနတ်ဓားတို့နှင့် ပေါင်းစပ်သွားကာ ပတ်ဝန်းကျင်ရှိ မဟာလမ်းစဉ်နှင့် တစ်သားတည်း ဖြစ်သွားခဲ့သည်။

ထိုအခိုက်အတန့်တွင် မရေတွက်နိုင်သည့် ဓားများကို လေထဲတွင် တွေ့လိုက်ရသည်။ မရေတွက်နိုင်သည့် ဝမ်ယန်ပင်းတို့မှာ နေရာအနှံ့တွင် ရှိနေသကဲ့သို့ ဖြစ်လေသည်။

သူက ကောင်းကင်နတ်တံခါးသို့ မဝင်ရပါက အိမ်သို့ မပြန်ရန် ဆုံးဖြတ်ခဲ့သည်။

“ပင်း၊ ဖျက်ဆီးခြင်းစွမ်းအား”

***


Comment

Leave a Reply


Options

not work with dark mode
Reset