အပိုင်း(၁၄၃၈)

မိန်းမတွေက ပြဿနာပဲ

ဝမ်ယန်ပင်း ထွက်သွားပြီးနောက် နေ့တွင် ဟောက်ထျန်းမြို့မှ ထိတ်လန့်ဖွယ်သတင်းများ ထွက်ပေါ်လာသည်။

ဟောက်ထျန်းမြို့၏ ဝမ်မိသားစုသည် ခုနစ်ရက်နောက်ပိုင်းတွင် ကောင်းကင်နတ်တံခါးဂိုဏ်းကို ဝင်ရောက်လိမ့်မည် ဖြစ်ကာ ကောင်းကင်နတ်တံခါးမှ စစ်ဆေးမှုကို ဖြတ်ကျော်ကြမည် ဖြစ်၏။

ဤရှေးဟောင်းမိသားစုသည် နှစ်ပေါင်းများစွာပြီးနောက် ကောင်းကင်နတ်တံခါးသို့ ပြန်လည် ရောက်ရှိလာတော့မည် ဖြစ်သည်။

သတင်းက အုတ်အော်သောင်းနင်း ဖြစ်သွားစေသည်။ ကြည့်ရသည်မှာ ဝမ်ယန်ပင်းက ချင်းဟယ်ထံ လာလည်သည့်အခါကပင် သူတို့သည် ဆုံးဖြတ်ချက်ချပြီး ဖြစ်ပေလိမ့်မည်။ ထို့ကြောင့် ဝမ်ယန်ပင်းက ဤစကားလုံးများကို ပြောခဲ့သည်မှာ တစ်ဖက်တွင် ကောင်းကင်အာဏာစက်ဘုံ၏ ဖြစ်ရပ်များအပေါ် ဝမ်မိသားစု သဘောထားကို ပြသလိုသောကြောင့် ဖြစ်လေသည်။ အခြားတစ်ဖက်တွင် သူက သူ၏ ရည်မှန်းချက်တို့ကို ပြသလိုသောကြောင့် ဖြစ်လေသည်။

ဝမ်မိသားစုသည် အသင့်ပြင်နေခြင်း ဖြစ်ပေမည်။

ကောင်းကင်နတ်တံခါးဂိုဏ်း စမ်းသပ်မှုသည် နှစ်ပေါင်းများစွာအတွင်း ကျင်းပခဲ့ခြင်း မရှိပေ။ ထိုစမ်းသပ်ပွဲ ကျင်းပသည့် အကြိမ်တိုင်း၌ ဟောက်ထျန်းမြို့တွင် အရေးကြီးဆုံးကိစ္စ ဖြစ်ခဲ့သည်။ ဤတစ်ကြိမ်၌လည်း ခြွင်းချက် မဟုတ်ပေ။

များပြားလှသည့် လူများက ကောင်းကင်နတ်တံခါးဂိုဏ်း၏ စည်းမျဉ်းများကို တွေးမိသည့်အခါ လူအများတို့က ထူးဆန်းမှုအား ခံစားလိုက်ရသည်။

ဝမ်မိသားစုသာမကဘဲ ဝမ်ယန်ပင်းသည်လည်း ထို့အတွက် အသင့်ဖြစ်နေသည်လား။

ထိုအချိန်အတွင်း ဟောက်ထျန်းမြို့မှ လူတိုင်းသည် ဤကိစ္စအကြောင်း ပြောဆိုနေကြပေသည်။

တစ်ချိန်တည်းမှာပင် မရေတွက်နိုင်သည့် လူများသည် ထိုစမ်းသပ်ပွဲကို မျှော်လင့်နေကြသည်။

ကောင်းကင်နတ်တံခါး စမ်းသပ်မှုအတွင်း အထက် ကောင်းကင်နတ်တံခါးမှ ကျန်းထိုက်ချူးသည် အောက်ကောင်းကင်နတ်တံခါးမှ ဝမ်ယန်ပင်းနှင့် တိုက်ခိုက်ရမည် ဖြစ်သည်။

အထက်နှင့် အောက်မှ ပြိုင်ဘက်ကင်း ပုဂ္ဂိုလ်နှစ်ယောက်သည် ပထမဆုံးအကြိမ် ထိပ်တိုက်တွေ့ဆုံကြမည် ဖြစ်သည်။

အဆုံးတွင် မည်သူက အထူးချွန်ဆုံး ဖြစ်မည်နည်း။

ဟွားချင်းယွင်အတွက်တော့ သူ့အဆင့်က လုံလောက်ခြင်းမရှိသေးတာကြောင့် သူက ဝမ်ယန်ပင်းနှင့် တိုက်ခိုက်နိုင်ခြင်း မရှိပေ။

များပြားလှသည့် အပြင်လူများမှာလည်း အတော်လေး အံ့အားသင့်နေကြသည်။ ခရမ်းရင့်ကောင်းကင်နန်းတော်နှင့် ကောင်းကင်အာဏာစက် ပြည်ထောင်တို့ လာမည့်အချိန်၌ ကောင်းကင်နတ်တံခါးဂိုဏ်းအတွင်းတွင် အခမ်းအနားကြီးတစ်ခု အရင် ကျင်းပလိမ့်မည်ဟု မည်သူမှ မျှော်လင့်မထားခဲ့ကြပေ။

ဤတစ်ကြိမ်တွင် ဝမ်မိသားစုက ကောင်းကင်နတ်တံခါးဂိုဏ်းကို ပြန်လာသည်မှာ အင်အားဖြည့်ပေးရန် ဖြစ်လိမ့်မလား။

နန်းတော်အတွင်း ချင်းဟယ်နှင့် ရီဖူရှင်းသည်လည်း သတင်းကို လက်ခံရရှိပေသည်။

ထိုအချိန်၌ ချင်းဟယ်နှင့် ရီဖူရှင်းက ယင်း ကိစ္စရပ်ကို ဆွေးနွေးနေကြသည်။

“ဒါဆို အဲဒီနေ့က ဝမ်ယန်ပင်း ဒီကို လာခဲ့တာ သူတို့ရဲ့သဘောထားကို ပြဖို့ပေါ့။ သူတို့သာ ကောင်းကင်နတ်တံခါးဂိုဏ်းကို ဝင်သွားခဲ့ရင် ရှင့်အစ်ကိုသုံးအပေါ် လွှမ်းမိုးမှုန်နည်းနည်း ရှိလာလိမ့်မယ်” ချင်းဟယ်က ရီဖူရှင်းကို ပြောလိုက်သည်။ သိသာစွာပင် ကောင်းကင်နတ်တံခါးဂိုဏ်း၏ လက်ရှိ အုပ်ချုပ်သူများဖြစ်သည့် ကျန်းကလန်နှင့် ဟွားကလန်သည်  တစ်စိတ်တစ်ဝမ်းတည်း ဖြစ်ကာ ဂူတုံးလျှိုအား ကောင်းကင်နတ်တံခါးဂိုဏ်းသို့ ပြန်ခေါ်လာကြသည်။

သို့သော် ဝမ်မိသားစု၏ သဘောထားကသာ ကွဲပြားလျှင် သူတို့က ကောင်းကင်နတ်တံခါးသို့ ဝင်ရောက်၍ အုပ်ချုပ်သူ မိသားစုများထဲမှ တစ်ခု ဖြစ်လာပါက ကိစ္စရပ်များက ကွဲပြားသွားပေလိမ့်မည်။

ရီဖူရှင်းက အနည်းငယ် မျက်မှောင်ကြုတ်လိုက်သည်။ ချင်းဟယ်က ဆက်ပြောလိုက်၏။ “ဝမ်မိသားစုက အချိန်ကောင်းကို ရွေးလိုက်တာပဲ။ သူတို့က အခုချိန်မှ ကောင်းကင်နတ်တံခါးကို ဝင်ဖို့ တောင်းဆိုလိုက်တာက  ကောင်းကင်နတ်တံခါးဂိုဏ်းဟာ သူတို့သဘောနဲ့သူတို့ တွေးရမယ့်အစား ဖိအားနဲ့ ရင်ဆိုင်ရစေချင်နေတာပဲ။ အဲဒါကြောင့် အခုချိန်ကစပြီး သူတို့ ဆုံးဖြတ်ချက်ချတဲ့အခါ ကိုယ့်ကိုယ်ကိုယ် တွေးပြီး လုပ်တော့မှာမဟုတ်ဘူး”

“ကောင်းကင်နတ်တံခါး စမ်းသပ်မှာက ဘယ်လိုမျိုးလဲ” ရီဖူရှင်းက မေးလိုက်သည်။

ကောင်းကင်နတ်တံခါး စမ်းသပ်မှုက ရှုပ်ထွေးပေမဲ့ တည့်တိုးဆန်တယ်။ အဲဒီမှာ အပိုင်းသုံးပိုင်းရှိတယ်။” ချင်းဟယ်က ပြောလိုက်သည်။ “ပထမတစ်ခုက အုပ်ချုပ်သူ စွမ်းရည်ကို စစ်ဆေးတာပဲ။ သူက ရန်ဟောင် အထွတ်အထိပ်အဆင့်ကို ရောက်နေလားဆိုတာ ကြည့်လိမ့်မယ်။ ဒုတိယက ခွန်အားကို စမ်းသပ်စစ်ဆေးတာ။ သူတို့ ကလန်သား ရန်ဟောင်တစ်ပါးက ကောင်းကင်နတ်တံခါးရဲ့ ရန်ဟောင်ပုဂ္ဂိုလ်တွေနဲ့ ယှဉ်နိုင်စွမ်းရှိရဲ့လားဆိုတာကို စစ်ဆေးမှာ။ တတိယအပိုင်းက လူငယ်မျိုးဆက်ရဲ့ စွမ်းရည်ကို စစ်ဆေးတာ။ သူတို့ရဲ့ လူငယ်မျိုးဆက်မှာ အထူးချွန်ဆုံးသူက ကောင်းကင်နတ်တံခါးဂိုဏ်းရဲ့ အထူးချွန်ဆုံး မျိူးဆက်နဲ့ တိုက်ခိုက်နိုင်မလား ဆိုတာကို ကြည့်ကြလိမ့်မယ်။”

“အဲဒီအပိုင်းသုံးပိုင်းမှာ ကလန်ရဲ့ အထက် အလယ် အောက် အဆင့်သုံးဆင့်နဲ့ အကဲဖြတ်တယ်။ လူသုံးယောက်ပဲ စမ်းသပ်မှုကို ခံယူရမှာကြောင့် ကြားရတာ ရိုးရှင်းနေပေမဲ့ ထိပ်တန်းအင်အားစု ကောင်းကင်နတ်တံခါးဂိုဏ်းရဲ့ အဆင့်သုံးဆင့်နဲ့ ယှဉ်ပြိုင်နိုင်ဖို့ဆိုတာ ကလန်တော်တော်များများ မလုပ်နိုင်ကြလောက်အောင် ခက်ခဲတယ်။ အထွတ်အထိပ်အဆင့် ယှဉ်ပြိုင်မှုက မရေတွက်နိုင်တဲ့ အင်အားစုတွေကို ရှင်းထုတ်ပစ်နိုင်ဖို့ လုံလောက်တယ်။ ပြီးတော့ ကလန်ခေါင်းဆောင်က အထွတ်အထိပ်အဆင့် ဖြစ်ရမယ်။ မဟုတ်ရင် တခြားအဆင့်နှစ်ခုမှာ နိုင်လည်း အဓိပ္ပာယ်မရှိ ဖြစ်သွားလိမ့်မယ်။ ဝမ်မိသားစုရဲ့ ခေါင်းဆောင်ကတော့ ရန်ဟောင် အထွတ်အထိပ်အဆင့်ကို ရောက်နေပြီးပြီ”

“အဲဒါကြောင့် သူတို့သာ နောက်အဆင့်နှစ်ခုကို ဖြတ်ကျော်နိုင်ရင် ဝမ်မိသားစုက ကောင်းကင်နတ်တံခါးဂိုဏ်းကို ပြန်ဝင်သွားနိုင်ပြီ”

ချင်းဟယ်က ရီဖူရှင်းကို အားလုံး ရှင်းပြလိုက်သည်။

ရီဖူရှင်းက ခေါင်းညိတ်ကာ ပြောလိုက်၏။ “သိပြီ။ ဝမ်မိသားစု ကောင်းကင်နတ်တံခါးကို ပြန်ဝင်နိုင်ဖို့ ဖြစ်နိုင်ချေ ဘယ်လောက်မြင့်တယ်လို့ ထင်လဲ”

“ဝမ်မိသားစုက ပထမဆုံးတစ်ခုကို အောင်မြင်မှာဆိုတော့ သူတို့က တခြားအဆင့်နှစ်ခုက တစ်ခုကို အောင်မြင်ဖို့ လိုတယ်။ ဝမ်မိသားစုမှာ ကောင်းကင်နတ်တံခါးဂိုဏ်းက ရန်ဟောင်တွေနဲ့ ယှဉ်နိုင်တဲ့ ပုဂ္ဂိုလ်မရှိတာကြောင့် သူတို့ရဲ့ အဓိကသော့ချက်က ဝမ်ယန်ပင်း ဖြစ်လိမ့်မယ်။ သူ့ရဲ့ စွမ်းဆောင်ရည်က ဝမ်မိသားစု ကောင်းကင်နတ်တံခါးဂိုဏ်းကို ပြန်နိုင်မပြန်နိုင် ဆုံးဖြတ်ပေးလိမ့်မယ်။”

ချင်းဟယ်က ပြောလိုက်သည်။ “ဒီနေ့ ကောင်းကင်နတ်တံခါးဂိုဏ်းရဲ့ ရန်ဟောင်အဆင့်အောက် ထိပ်တန်းပုဂ္ဂိုလ်က ကျန်းကလန်ရဲ့ ကျန်းထိုက်ချူး ဖြစ်မယ်။ ကျန်းထိုက်ချူးနဲ့ ဝမ်ယန်ပင်းကြား တိုက်ပွဲက ဝမ်မိသားစုရဲ့ ကံကြမ္မာကို ဆုံးဖြတ်ပေးလိမ့်မယ်”

“ကျန်းထိုက်ချူးကို ကောင်းကင်နတ်တံခါးဂိုဏ်း ကျန်းကလန်က မြေတောင်မြှောက်ပေးခဲ့တယ်။ ဝမ်ယန်ပင်းက သူ့ကို နိုင်နိုင်လား။” ရီဖူရှင်းက မေးလိုက်သည်။

“ဟောက်ထျန်းမြို့မှာ ပြောကြတာက အထက်ကောင်းကင်နတ်တံခါးမှာ ကျန်းထိုက်ချူးနဲ့ ဟွားချင်းယွင် ရှိပြီး အောက်ကောင်းကင်နတ်တံခါးမှာ ဝမ်ယန်ပင်း ရှိတယ်။ ဒီလူသုံးယောက်ရဲ့ ကျော်ကြားမှုက အတူတူပဲဆိုတော့ ဝမ်ယန်ပင်းရဲ့ အရည်အချင်းက တခြားနှစ်ယောက်နဲ့ သိပ်ကွာမှာ မဟုတ်ဘူး။ ပြီးတော့ ဝမ်မိသားစုက ကောင်းကင်နတ်တံခါးဂိုဏ်းရဲ့ ခေါင်းဆောင်တစ်ယောက် ဖြစ်ခဲ့ဖူးပြီး ဝမ်မိသားစုမှာ အစွမ်းထက်ဆုံး ထူးခြားလမ်းစဉ်တစ်ခု ရှိတယ်။ ပြောကြတာတော့ ဝမ်ယန်ပင်းက အဲဒါကို အရမ်းမြင့်တဲ့ အဆင့်ထိ ကျင့်ကြံနိုင်ခဲ့တယ်တဲ့။ အဲဒါကြောင့် တိုက်ပွဲကို ကြိုတင်ခန့်မှန်းနိုင်ဖို့တော့ ခက်ခဲလိမ့်မယ်။ ကျွန်မက သူတို့ တိုက်ခိုက်တာကို လုံးဝ မမြင်ဖူးခဲ့ဘူးလေ” ချင်းဟယ်က ရှင်းပြလိုက်သည်။

ရီဖူရှင်းက ခေါင်းညိတ်လိုက်သည်။ သူသည် အစ်ကိုသုံးကို သက်ရောင်မှု ရှိလာမည်ဟု ထင်မှတ်မထားခဲ့ပေ။

“ထူးခြားလမ်းစဉ်က ဘာလဲ” ရီဖူရှင်းက တွေဝေစွာနှင့် မေးလိုက်သည်။

“ထူးခြားလမ်းစဉ်ဆိုတာ ကျင့်စဉ်တစ်ခုပဲ။ ဒါပေမဲ့ သာမန်ကျင့်စဉ်တွေနဲ့ ကွဲပြားတယ်။ ကောင်းကင်နတ်တံခါးဂိုဏ်း အရင်မျိုးဆက်တွေထဲမှာ ထူးခြားလမ်းစဉ်တွေကို ဖန်တီးခဲ့တဲ့ အစွမ်းထက် ပုဂ္ဂိုလ်တွေ ရှိခဲ့တယ်။ ထူးခြားလမ်းစဉ် တချို့က ပျောက်ဆုံးသွားပြီး တချို့ကတော့ ကျဆင်းသွားပေမဲ့ တချို့ကတော့ ဆက်လက် တိုးတက်ပြောင်းလဲနေတယ်။ အခုထိအောင် ကျန်းကလန်နဲ့ ဟွားကလန်နှစ်ခုလုံးမှာ သူတို့ရဲ့ ထူးခြားလမ်းစဉ်တွေ ရှိပြီးတော့ ဝမ်ကလန်ကလည်း အတူတူပဲ။ ဂူထျန်းရှင်း အဲဒီအချိန်တုန်းကဘာကြောင့် ပြိုင်ဘက်ကင်းလဲဆိုတာက သူက ကောင်းကင်လမ်းစဉ်ကို ထိတွေ့နိုင်ပြီး သူ့ ဘိုးဘေးတွေရဲ့ ထူးခြားလမ်းစဉ်ပေါ်အခြေခံပြီး ပိုပြီးအစွမ်းထက်တဲ့ လမ်းစဉ်ကို ဖန်တီးနိုင်ခဲ့လို့ပဲ”

ချင်းဟယ်က ဆက်ပြောလိုက်သည်။ “သူတို့အပြင် ဟောက်ထျန်းမြို့မှာ အစွမ်းထက်အင်အားစု အများကြီး ရှိပေမဲ့ သူတို့မှာ ဘယ်သူ့ဆီမှ ထူးခြားလမ်းစဉ် မရှိကြတာကြောင့် ဟိုကလန်တွေလို အဆင့်မျိုးကို ရောက်ဖို့ အရမ်းခက်ခဲတယ်။ ဂူထျန်းရှင်းလို လူမျိုး နောက်တစ်ခါ လောကကြီးမှာ ပေါ်လာတာမျိုးမှ မဟုတ်ရင်ပေါ့”

ရီဖူရှင်းက ယခင်က အစ်ကိုသုံး၏ တိုက်ခိုက်မှုများကို စဉ်းစားလိုက်သည်။ သူ၏ သက်စောင့်ဝိညာဉ်နိုးထပြီးနောက် အစ်ကိုသုံးအနီးတွင် နတ်အရှိန်အဝါများ ရှိနေတတ်ပြီး သူ၏ စွမ်းအားများ ချိပ်ပိတ်ခံထားရလျှင်ပင် အလွန် အစွမ်းထက်ပေသည်။ ယခုတွင် ချိပ်စည်းက ပျက်ပြယ်သွားပြီဖြစ်ရာ သူ၏ စွမ်းအားက ပိုမို အားကောင်းသန်မာလာမည် ဖြစ်သည်။

သူမက ထိုအကြောင်းကို ပြောသည့်အခါတွင် သူမ၏ မျက်လုံးထဲ၌ အပြုံးရိပ်တို့ ယှက်သန်းသွားသည်။ သူမက ပြောလိုက်သည်။ “ကျွန်မ သိသလောက်တော့ ဒီနေ့ရဲ့ အဓိကကလန်တွေ အနည်းငယ်မှာ ထူးခြားလမ်းစဉ်ကို ချိပ်ပိတ်ထားပြီး ကျန်ရစ်ခဲ့တဲ့ နောက်ဆုံး နေရာတစ်ခုက ဟောက်ထျန်းမြို့မှာ ရှိနေတယ်။ အဲဒါကို အစွမ်းထက်ပုဂ္ဂိုလ်တွေက စောင့်ကြပ်နေတယ်။ ဘယ်သူကမှ ယူနိုင်စွမ်းမရှိကြဘူး။ ရှင် သွားကြည့်ဖို့ စိတ်ဝင်စားလား။”

“ကောင်းကင်နတ်တံခါးဂိုဏ်းက ကျန်းကလန်နဲ့ ဟွားကလန်တောင် မယူနိုင်ဘူးလား” ရီဖူရှင်းက သံသယဖြစ်စွာ မေးလိုက်သည်။

“မဟုတ်ဘူး” ချင်းဟယ်က သူမ၏ ခေါင်းကို ယမ်းကာ ပြောလိုက်၏။ “အဲဒါကို ဘိုးဘေးတစ်ယောက် ထားရစ်ခဲ့တာ။ ကောင်းကင်နတ်တံခါးဂိုဏ်းကလည်း သူ့ရဲ့ စည်းမျဉ်းတွေကို လိုက်နာရတယ်။ အတိတ်တုန်းက ဂူထျန်းရှင်းနဲ့ ဂူကျန်းနန်က အဲဒီကို ကိုယ်တိုင်သွားခဲ့ကြပေမဲ့ သူတို့ နှစ်ယောက်လုံး ကျရှုံးခဲ့တယ်။ ကောင်းကင်အာဏာစက်ဘုံရဲ့ လူစွမ်းကောင်း အများကြီးလည်း အဲဒီကို သွားခဲ့ကြပေမဲ့ ထူးခြားလမ်းစဉ်က အဲဒီမှာ ချိပ်ပိတ်ခံထားရတုန်းပဲ ရှိသေးတယ်”

ရီဖုရှင်း၏ မျက်လုံးများက ရုတ်တရက် လင်းလက်သွားသည်။ သူက ချင်းဟယ်ကို ကြည့်ကာ ပြောလိုက်သည်။ “ကျွန်တော်တို့ ဘယ်အချိန် သွားကြမလဲ”

ရီဖူရှင်းက သူမကို ကြည့်လိုက်လျှင် ချင်းဟယ်က ပြုံး၍ ပြောလိုက်သည်။ “ကြည့်ရတာ ရှင်လည်း ကြိုးစားကြည့်ချင်နေပုံပဲ”

“ကျွန်တော်က ကောင်းကင်လမ်းစဉ် နတ်ခန္ဓာပဲလေ” ရီဖူရှင်းက ရယ်မောကာ ပြောလိုက်သည်။

“…” ချင်းဟယ်က မျက်လုံးလှန်ကြည့်လိုက်သည်။ ‘ဤအကောင်က ကောင်းကင်လမ်းစဉ် နတ်ခန္ဓာဆိုတဲ့ စကားကို ခဏခဏ ပြောနေတယ်လို့များ သူ့ကိုယ်သူ မတွေးမိဘူးလား’ ဟု သူမ တွေးလိုက်၏။

ကောင်းကင်လမ်းစဉ် နတ်ခန္ဓာဟူသော ဤဘွဲ့မည်က မည်သည့် နေရာကလာသနည်း။

“ရှင်က အတော် အရှက်မရှိတာပဲ” ချင်းဟယ်၏ ရှက်ရွံ့သည့် အပြုံးနှင့် ပြောလိုက်ခြင်းက သူမကို ပိုကာ ဆွဲဆောင်မှု ရှိသွားစေသည်။ ရင်သပ်ရှုမောဖွယ် မျက်နှာအား ကြည့်ကာ ရီဖူရှင်းသည် ခေတ္တမျှ နစ်မျောသွားခဲ့သည်။ ဂျီယူသည်လည်း သူမကဲ့သို့ပင် ဖြစ်သည်။

သူမက သူ့ကို အရှက်မရှိဟု ပြောလိုက်သည့်အခါ သူတို့က ပို၍ နီးစပ်လာသည်ဟု ထင်ရပေသည်။

“ဒါဆို ကျွန်မတို့ အခု သွားကြမလား” ချင်းဟယ်က မေးလိုက်သည်။

“ကောင်းပြီလေ” ရီဖူရှင်းက ပြန်ဖြေလိုက်သည်။ “တခြားလူတွေကို ခေါ်လိုက်ဦးမယ်”

“ကောင်းပါပြီ။ ကျွန်မတို့ အပြင်ဘက်မှာ တွေ့မယ်” ချင်းဟယ်က ခေါင်းညိတ်ကာ ပြောလိုက်သည်။

ရီဖူရှင်းက သူနှင့် အခြားသူများ နေသည့် နေရာသို့ ပြန်သွားပြီးနောက် ထွက်ခွာရန် လူစုလိုက်သည်။

အခြားသူများက ထွက်ခွာရန် အသင့်ဖြစ်နေကြသော်လည်း ရှားရှင်းယွန်က ထိုနေရာ၌ ထိုင်နေဆဲသာ ဖြစ်သည်။

“ကျုပ်တို့ အခု သွားသင့်ပြီ” ရီဖူရှင်းက သူမကို ပြောလိုက်သည်။

“မသွားဘူး” ရှားရှင်းယွန်က အေးစက်စွာ ပြောလိုက်သည်။

“အမ် ….” ရီဖူရှင်းက မျက်တောင်ခတ်ကာ မေးလိုက်သည်။ “ဘာဖြစ်လို့လဲ”

“ကျွန်မက ခံစားချက်အခြေအနေကို မပျက်စီးစေချင်ဘူး” ရှားရှင်းယွန်က ပြောလိုက်သည်။ သူတို့အနီးမှ လူတိုင်းက ရီဖူရှင်းအား အဓိပ္ပာယ်အပြည့်နှင့် ကြည့်လိုက်သည်။

သူတို့က အတူတကွ သွားလာနေကြသည်ဖြစ်ရာ မင်းသမီး၏ စိတ်ကို မည်သူက မဖတ်နိုင်ဘဲ နေပါမည်နည်း။

အထူးသဖြင့် ရှားရှင်းယွန်နှင့်အတူ အောက်ဘုံမှ လာခဲ့ကြသူများဖြစ်သည်။ သူမက အများကြီး အားထုတ်ကြိုးပမ်းမှုများ ပြုလုပ်ခဲ့ပြီး လူတိုင်းက မည်သည့်အတွက် မသိရမည်နည်း။.

ယနေ့တွင် ဂျီယူသည် သူ၏ နှလုံးသားထဲမှ အနာရွတ်တစ်ခု ထာဝရ ဖြစ်လာတော့မည်။ သူတို့က မူလတောင်တန်းမှ အဖြစ်အပျက်များ ပြီးသည့်နောက်တွင် လူတိုင်းသည် ရှားရှင်းယွန်နှင့် ရီဖူရှင်းကြားတွင် တစ်ခုခု ဖြစ်လာရန် မျှော်လင့်နေကြသည်။

ချင်းဟယ်က ထွက်ပေါ်လာပြီး ရီဖူရှင်းအား ခိုးယူသွားလိမ့်မည်ဟု မည်သူက သိပါမည်နည်း။

သူတို့က မည်သို့ ပြောနိုင်ပါမည်နည်း။

သူက အမှန်တကယ့်ကို ငါးရံ့နှစ်ကောင် ဖမ်းနေပေသည်။

ဗြဟ္မာ့သန့်စင်ကောင်းကင်၏ နံပါတ်တစ် နတ်မိမယ်သည် အသက်ရှူမှားလောက်အောင် လှပပြီး ညှို့ဓာတ်အလွန် ပြင်းသည်။

ရီဖူရှင်းထံ၌ ထူးဆန်းသော အမူအရာဖြစ်ပေါ်လာ၏။ သူက ရှားရှင်းယွန်ကို ကြည့်ကာ မေးလိုက်သည်။ “သဝန်တိုနေတာလား”

ရှားရှင်းယွန်က အေးခဲသွားသည်။ သူမက လက်သီးကို ကျစ်ကျစ်ဆုပ်ကာ သူမ၏ မျက်နှာက နီရဲသွားသည်။

သူမက မတ်တတ်ရပ်၍ ခေါင်းမော့ကာ လှပသည့် မျက်ဝန်းတစ်စုံဖြင့် ရီဖူရှင်းအား စူးစိုက်ကြည့်ရင်း ပြောလိုက်သည်။ “ရှင်က ကိုယ့်ကိုယ်ကိုယ် တော်တော် အကောင်းမြင်တတ်တာပဲ”

သူမက ပြောပြီးသည်နှင့် ရှေ့သို့ ခြေလှမ်းလိုက်ကာ ပြောလိုက်သည်။ သွားကြမယ်”

“…”

ရီဖူရှင်း၏ မျက်နှာက သုန်မှုန်သွားသည်။ သူ့အနီးမှ လူတိုင်းက သူ့ကို ကြည့်နေကြသည်။ ရီဖူရှင်းသည် ထိုမြင်ကွင်းကို မြင်လျှင် ထူးဆန်းသလို ခံစားလိုက်ရ၏။ သူက မေးလိုက်သည်။ “မင်းတို့က ဘာကြည့်နေတာလဲ”

ဤကောင်တွေမှာ တချို့ အမြင်တွေ ရှိနေသေးသည်လား။

ခွန်ရွှမ်က ရီဖူရှင်းကို ဖြတ်ကာ လျှောက်သွားကာ သူမ၏ မျက်လုံးထဲတွင် အထင်အမြင်သေးခြင်းတို့ ခိုတွဲနေခဲ့သည်။ သူမသည် ရှားရှင်းယွန်က ရီဖူရှင်းအတွက် လုပ်ပေးခဲ့သမျှ အရာအားလုံးကို မြင်တွေ့ခဲ့သည်။ သို့သော် ဤအကောင်က ယခုတွင် ဗြဟ္မာ့သန့်စင်ကောင်းကင်မှ နံပါတ်တစ်နတ်မိမယ် ချင်းဟယ်နှင့် ငြိချင်နေသည်။ သူက အတော် အရှက်မဲ့လှ၏။

“ဥဒေါင်းမလေး၊ မင်းကရော ဘာကြည့်တာလဲ” ရီဖူရှင်းက ခွန်ရွှမ်၏ စိတ်ပျက်သော အကြည့်ကို မြင်လျှင် မေးလိုက်၏။

သူမက ဘာကို ဆိုလိုချင်နေသည်လဲ။

“သခင် ကျွန်တော်ကတော့ နံပါတ်တစ်နတ်မိမယ်က ပိုကောင်းလိမ့်မယ် ထင်တယ်” သိမ်းငှက်လေးက လောကကြီး အေးချမ်းနေမှာ စိုးရိမ်သည့်အတွက် ဝင်ပြောလိုက်သည်။ နတ်မိမယ်၏ အလှက အလွန် နူးညံ့ပြီး ဆိုးဝါးသည့် စရိုက်ရှိသော ရှားရှင်းယွန်နှင့် မတူပေ။

“ထွက်သွားစမ်း” ရီဖူရှင်းက ပြောကာ သူ့ကို ကန်ထုတ်လိုက်၏။

သိမ်းငှက်နက်က မြေပေါ်တွင် လိမ့်သွားကာ ထရပ်၍ ရီဖူရှင်းအား ဝမ်းနည်းပက်လက် မော့ကြည့်လိုက်သည်။ သူက တစ်ခုခု ထပ်ပြောလိုသော်လည်း ရီဖူရှင်း၏ မျက်နှာထက်မှ အပြုံးရေးရေးကို မြင်သည့်အခါ သူက တစ်ဖန်ခေါင်းငုံ့လိုက်ပြီး အပြစ်ရှိဟန် ပြုမူနေသည်။

သိမ်းငှက်လေးသည် ဤတစ်ကြိမ်၌ သခင့်အတွက် အပြစ်တင်မှုကို ခံယူလိုက်သည်။

ရီဖူရှင်းက သက်ပြင်းချလိုက်ပြီးနောက် အဝေးသို့ လျှောက်သွားခဲ့သည်။ သူ၏ စိတ်ထဲတွင် မိန်းမတွေက အလွန် ပြဿနာများသည်ဟု တွေးတောနေပေသည်။

***


Comment

Leave a Reply


Options

not work with dark mode
Reset