အခန်း ( ၂၅ )

“ ကျုပ် လုပ်နိုင်တယ် ”
ရွှီချင်းသည် တစ်ဖက်လူ၏ အမူအရာကို မြင်သောအခါ လေးနက်သောအသံဖြင့် ပြောလိုက်သည်။
ကြက်ခြေခတ်သည် တစ်ခွန်းမှမဆိုတော့ဘဲ ထွက်ခွာသွားသည်။ ခဏအကြာ ဝံပုလွေအုပ်ကြီး ရောက်ချလာတော့သည်။

ရွှီချင်း၏မျက်နှာကို လေပြင်းတစ်ချက် တိုက်ခတ်သွားသည်နှင့်အတူ ဆိုးဝါးသောအနံ့အသက်တစ်မျိုးပါ ဒွန်တွဲပါလာသည်။ ထိပ်ဆုံးတွင် ဝံပုလွေဆယ်ကောင်နှင့် အထက်ရှိပြီး တစ်ကိုယ်လုံး မည်းနက်နေကြကာ သွေးဆာနေသောမျက်ဝန်းများ ရှိနေကြသည်။ မိုးကြိုးအဖွဲ့၏ ပဏာမအစီအစဉ်သည် ထိုဝံပုလွေအုပ်ကြီးကို သိသိသာသာ အားလျော့သွားအောင် စွမ်းဆောင်နိုင်ခဲ့ကြောင်း ထင်ရှားသည်။ သွေးအလိမ်းလိမ်းဖြစ်နေကြသော ထိုဝံပုလွေနက်အုပ်ကြီးသည် မယှဉ်သာလောက်အောင် ရက်စက်ကြမ်းကြုတ်လာကြသည်။

ထိုအခိုက် ၎င်းတို့သည် ဝပ်နေသော ရွှီချင်းကို သတိထားမိဟန်မတူဘဲ ကြက်ခြေခတ်နောက်သို့သာ လိုက်ချင်နေကြသည်။

သို့ပေမည့် ၎င်းတို့နီးကပ်လာသည့်အခိုက် ဓားမြှောင်တစ်လက် ရုတ်ခြည်း ပျံထွက်လာသည်။ ဝှစ်ခနဲ လေတိုးသံနှင့်အတူ ဓားမြှောင်သည် ရှေ့ဆုံးမှ ဝံပုလွေနက်၏ နဖူးတည့်တည့်ကို ထိုးဖောက်သွားသည်။

ထိုဝံပုလွေနက်သည် နာကျင်စွာ အော်ဟစ်ကာ ချက်ချင်း ဇီဝိန်ချုပ်သွားသည်။ ၎င်း၏အလောင်းကြီး ဘုန်းခနဲ ခွေခေါက်ကျသွားစဉ် ရွှီချင်းသည် လျှပ်စီးလက်သည့်အလား ပြေးဝင်သွားသည်။

မည်းနက်တောက်ပြောင်နေသော သံတုတ်ကလေးသည် အေးစိမ့်စိမ့်အလင်းတစ်ချက် ဖျတ်ခနဲ ဝင်းလက်သွားကာ နောက်ထပ်ဝံပုလွေနက်တစ်ကောင်၏ ခေါင်းကို ထိုးဖောက်သွားသည်။ ယင်းနောက် ရွှီချင်းသည် ခန္ဓာကိုယ်ကိုလှည့်ကာ အလစ်ဝင်လာသော တတိယမြောက် ဝံပုလွေတစ်ကောင်အား ဘယ်လက်သီးစာ ကြွေးလိုက်သည်။

ဝံပုလွေ၏ခေါင်းကြီး ချက်ချင်း ကြေမွသွားပြီး သွေးစသွေးနများ ရွှီချင်းအပေါ် ဖွာခနဲ ကျဆင်းလာသည်။

တတိယမြောက်ဝံပုလွေကို သတ်ဖြတ်ပြီးနောက် ရွှီချင်းသည် ထပ်မံလှုပ်ရှားသွား၏။

ယခုအခါ သူသည် ရက်သျှာရာနတ်ဆိုးတစ်ကောင်ပမာ လက်ဖျားခါရလောက်အောင် မြန်ဆက်သွက်လက်စွာ လှုပ်ရှားနေသည်။ သူသည် သွေးအေးသောအကြည့်ဖြင့် ဝံပုလွေအုပ်ကြီးထံ ဝင်ရောက်တိုက်ခိုက်လိုက်သည်။

မည်းနက်သော သံတုတ်ကလေး၏ အေးစက်စက်အလင်းများ တဖျပ်ဖျပ်ဝင်းလက်နေပြီး ဝံပုလွေနက်များ၏ နာကျင်စွာ အူသံများ ဘေးပတ်ဝန်းကျင်တခွင် လွင့်ပျံသွားသည်။

သူ့ကိုယ်ပေါ်သို့ ဝံပုလွေများ၏သွေးများ တစတစ ရောက်ရှိလာကြပြီး သူ့လက်များသည်လည်း သွေးစသွေးနီများဖြင့် နီရဲခြောက်ကပ်နေသည်။ သူသည် ကျိချွဲချွဲ ဖြစ်နေပါသော်လည်း သံတုတ်ကို မြဲမြံစွာ ဆုပ်ကိုင်ထားဆဲပင်။ ယခုအခါ သံတုတ်၏အရောင်သည်ပင် ကြက်သွေးရောင်ဖြစ်နေတော့သည်။

သို့သော်လည်း ဝံပုလွေအုပ်ကြီးက ဖြန့်ကျက်၍ လာကြသည်ဖြစ်ရာ တချို့အကောင်များက သူ့ကို ကျော်ဖြတ်သွားနိုင်ကြသည်။

တချို့ဝံပုလွေများ၏ ကုတ်ရာခြစ်ရာများသည်လည်း သူ့ကိုယ်ပေါ် အထပ်ထပ် ရှိနေသည်။

သို့သော်လည်း ရွှီချင်းသည် လျင်မြန်သွက်လက်စွာ ခုန်ပျံကျော်လွှားကာ ဝံပုလွေများကို တစ်နည်းနည်းဖြင့် တားဆီးနေ၏။ သူ၏ဒဏ်ရာများနှင့်ပတ်သက်၍ တိုက်ပွဲအတွင်း ခရမ်းရောင်သလင်းကျောက်၏ ကြောက်ခမန်းလိလိ ပြန်လည်ကုစားနိုင်စွမ်းက လက်ဖျားခါရလောက်သော အာနိသင်များကို ပေးစွမ်းနေသည်။

သူ၏အပြင်ပန်းဒဏ်ရာများအားလုံး အသက်ရှူချိန်အနည်းငယ်အတွင်း ပျောက်ကင်းသွားရသည်။ ပို၍ ပြင်းထန်သော ဒဏ်ရာများသည်ပင် သွေးတိတ်သွားသည်။

သူ့ခန္ဓာကိုယ်တစ်ခုလုံးကို ဝံပုလွေများ၏ သွေးများက ဖုံးလွှမ်းနေသောကြောင့် တခြားလူများသည် ထိုအခြင်းအရာကို ပြတ်သားစွာ မြင်နိုင်စွမ်း မရှိကြပေ။

သူ၏ဒဏ်ရာသက်သာနိုင်စွမ်းနှင့်ယှဉ်လျှင် သူ၏သက်လုံပြန်ဖြည့်နိုင်စွမ်းက ပို၍ပင် ကြောက်စရာကောင်းလှသည်။ သို့ဖြစ်၍ သူ၏အတိုက်အခိုက်စွမ်းရည်သည် ကျဆင်းသွားခြင်းမရှိဘဲ သြချရလောက်သည်အထိ ဖြစ်နေတော့သည်။

သူ့ဘေးပတ်လည်တွင် ဝံပုလွေအသေများဖြင့် ဖုံးလွှမ်းလာသည်။ သူ၏မျက်ဝန်းများသည် အေးစက်နေပြီး သူ၏တိုက်ခိုက်နိုင်စွမ်းသည် တခြားလူများထက် ကြာမြင့်နေပေရာ ဝံပုလွေများ၏ မျက်ဝန်းများထဲတွင် ကြောက်လန့်သည့်အရိပ်အယောင်များ ဝင်ရောက်လာသည်။

အတန်ငယ်ဝေးသောနေရာမှကြည့်မည်ဆိုပါက သစ်ရွက်များကြားထဲမှ ထိုးဖောက်ဝင်ရောက်လာသော နေရောင်ခြည်တန်းလေးသည် သွေးအလိမ်းလိမ်းဖြစ်နေသော သူ့ခန္ဓာကိုယ်ပေါ် ကျဆင်းသွားပြီး သူ့ခန္ဓာကိုယ်မှ သွေးရောင်ဝင်းလက်နေသည်ကို မြင်နိုင်ပေသည်။

ထိုမြင်ကွင်းကို ကျန့် ( ၂၀၀ ) အကွာတွင် ရှိနေသော ခေါင်းဆောင်လဲ့နှင့် အပေါ်စီးမှ ကြည့်နေသော ကြက်ခြေခတ်သည်လည်း မြင်သွားပြီး ရွှီချင်း၏ရက်စက်ကြမ်းကြုတ်သော စိတ်နှင့် ဇွဲနပဲကြီးပုံကြောင့် သူတို့နှစ်ဦးလုံး ဖြုံသွားကြသည်။

“ ကလေး၊ နောက်ဆုတ်တော့ ”
ခေါင်းဆောင်လဲ့က ရုတ်တရက် အော်ပြောလိုက်သည်။

ရွှီချင်းတွင် အားအင်အနည်းငယ် ကျန်ပါသေးသော်လည်း ဝိညာဉ်စွမ်းအားများစွာ ကုန်ခမ်းနေသည်ကို သူ ခံစားနေရသည်။

ခရမ်းရောင်သလင်းကျောက်သည် သူ၏သက်လုံကို အားကောင်းစေပြီး သူ၏ဒဏ်ရာများကို ကုစားပေးနိုင်ပါသော်လည်း ကုန်လွန်သွားသော ဝိညာဉ်စွမ်းအားများကို မဖြည့်တင်းနိုင်ပေ။

ကံကောင်းထောက်မ၍ သူသည် အပြင်အားကျင့်ကြံသူတစ်ဦးဖြစ်ပြီး ဝိညာဉ်စွမ်းအားကုန်သွားပါက ဘာမှမလုပ်နိုင်တော့သည့် လွမ်ယာကဲ့သို့ မဟုတ်ပေ။

သို့ပေမည့် သူသည်လည်း တစ်နည်းနည်းဖြင့် သက်ရောက်ခံနေရပြီး ဘေးပတ်ဝန်းကျင်ရှိ ဓာတ်နှောပမာဏသိပ်သည်းစွာ ပါဝင်နေသော ဝိညာဉ်စွမ်းအားများကို စုပ်ယူမိလိုက်သည်။ ထိုအခါ သူ့လက်မောင်းပေါ်ရှိ သန္ဓေပြောင်းအမှတ်မှ စူးရှစွာ နာကျင်လာတော့သည်။

ထို့ကြောင့် ခေါင်းဆောင်လဲ့၏စကားကို ကြားသောအခါ ရွှီချင်းသည် တွေဝေတွန့်ဆုတ်မနေတော့ဘဲ ချက်ချင်း နောက်ဆုတ်သွားသည်။

ထိုသို့ သူ ဆုတ်လိုက်စဉ် လုံးဝနီမြန်းမနေသော မျက်လုံးတစ်လုံးနှင့် မည်းနက်နေသော မျက်လုံးတစ်လုံးကို ပိုင်ဆိုင်ထားသော ဝံပုလွေနက်တစ်ကောင်သည် ရွှီချင်းကို ခုန်အုပ်လိုက်သည်။

ထိုအခြင်းအရာကြောင့် ရွှီချင်း၏မျက်ဝန်းများထဲတွင် အေးစက်စက်အလင်းတန်းတစ်တန်း ဖြတ်ပြေးသွားကာ သူ၏သံတုတ်သည် သွေးရောင်ဝင်းလက်သွားပြီး ဝံပုလွေ၏ခေါင်းကို ချက်ချင်း ထိုးဖောက်သွားသည်။ ထို့နောက် သူသည် နောက်ဆုတ်ရန်ပြင်လိုက်သော်လည်း ထိုအခိုက် …

နေရောင်ခြည်အောက်တွင် ပုံရိပ်ယောင်တစ်ခုကို သူ မြင်လိုက်ရခြင်းပေလော၊ မြေပြင်ပေါ် ဘုန်းခနဲ ကျသွားသော ဝံပုလွေ၏အရိပ်သည် ပုံပျက်လာဟန်တူသည်။

ထို့နောက် ထိုအရိပ်သည် ရွှီချင်းရှိနေရာ မြေကြီးထဲမှ အလျင်အမြန် တိုးထွက်လာသည်။

ယခုတိုင်အောင် နေရောင်ခြည်က ဖြိုးဖြိုးဖျဖျ အလင်းလေးသာ ပေးစွမ်းနိုင်သည်ဖြစ်ရာ မည်သည့်အရာကို မြင်နေရမှန်း သူ ဝေခွဲရခက်နေသည်။ ထိုအရိပ်သည် သူ၏ခန္ဓာကိုယ်ထဲသို့ ချည်းနင်းဝင်ရောက်လာ၏။

ထို့နောက် ရွှီချင်း၏ခန္ဓာကိုယ် အရှိန်ပြင်းစွာ တုန်ခါသွားသည်။

ဖော်ပြခြင်းငှာမစွမ်းသာသော မိစ္ဆာစိတ်ဆန္ဒတစ်ခုက သူ၏ခန္ဓာကိုယ်တစ်ခုလုံးကို ကျူးကျော်သိမ်းပိုက်ချင်နေဟန်တူသည်။

ထိုအခါ ပြန်လည်ကုစားနိုင်စွမ်းများမှလွဲ၍ တခြားဘာအစွမ်းသတ္တိမှမပြခဲ့သော ခရမ်းရောင်သလင်းကျောက်လေးတွင် တစ်စုံတစ်ခု ဖြစ်ပျက်သွား၏။

ရုတ်တရက် သလင်းကျောက်က တုန်ခါလာပြီး အေးစိမ့်စီးကြောင်းလေးတစ်ခု ထွက်ပေါ်လာ၏။

ထိုစီးကြောင်းလေး ထွက်ပေါ်လာခြင်းနှင့်အတူ မိစ္ဆာစိတ်ဆန္ဒ ကျူးကျော်ခံနေရသည်ဟူသော ခံစားချက်များ ပျောက်ကွယ်သွားသည်။

ထိုအေးစိမ့်စီးကြောင်းလေးသည် ရုတ်ခြည်း ပေါ်ထွက်လာခဲ့ပြီး မျက်တောင်တစ်ချက်ခတ်အတွင်း အစအနရှာမရအောင် ချက်ချင်းပင် ပျောက်ကွယ်သွားခဲ့သည်။ ထို့နောက် ခရမ်းရောင်သလင်းကျောက်သည် ပုံမှန်အတိုင်း ငြိမ်သက်သွားတော့သည်။

ရွှီချင်းမှာ အံ့အားသင့်သွားရပါသော်လည်း ယခုသည် စဉ်းစားတွေးတောနေရမည့်အချိန် မဟုတ်ပေ။ သူ့ခန္ဓာကိုယ် ပြန်လည်သက်သာလာသည်နှင့် ချက်ချင်း နောက်ဆုတ်လိုက်သည်။ အစောပိုင်းက အဖြစ်အပျက်သည် တဒင်္ဂလေးအတွင်း ဖြစ်ပျက်သွားခဲ့သည်ဖြစ်ပြီး ခေါင်းဆောင်လဲ့ဖြစ်စေ၊ ကြက်ခြေခတ်ဖြစ်စေ တစ်ခုခုလွဲမှားသွားသည်ကို သတိမထားမိလိုက်ချေ။

ရွှီချင်း ပြန်ရောက်လာသောအခါ ခေါင်းဆောင်လဲ့ ထွက်လာသည်။ သူ့အကြည့်များထဲတွင် အံ့အားသင့်နေသော အရိပ်အယောင်များ ရှိနေဆဲပင်။
“ မင်း ကောင်းကောင်းလုပ်ခဲ့တယ်။ မြန်မြန်သွားပြီး အနားယူလိုက်ဦး ”

“ ဝံပုလွေနက်တွေက တားမြစ်နယ်မြေရဲ့ အတွင်းပိုင်းမှာ နေထိုင်ကျက်စားကြတာ။ ဒီကောင်တွေက ဓာတ်နှောပမာဏသိပ်သည်းဆမြင့်မားတဲ့နေရာတွေကို သဘောကျတယ်။ အတွင်းပိုင်းနဲ့ယှဉ်ရင် အပြင်ပိုင်းက ဓာတ်နှောပမာဏနည်းတယ်။ ဒီတော့ ဒီကောင်တွေ ဘာအကြောင်းအရင်းကြောင့်ပဲ ဒီကို ရောက်လာတာဖြစ်ဖြစ် အချိန်အကြာကြီး တိုက်ခိုက်ပြီး အနိုင်မရသေးဘူးဆိုရင် သေချာပေါက် ဆုတ်သွားမှာပဲ ”
ထိုသို့ပြောပြီးသည်နှင့် ခေါင်းဆောင်လဲ့သည် ဝိညာဉ်စွမ်းအားအကုန်ထုတ်ကာ ရွှီချင်းနောက်သို့ လိုက်ပါလာသော ဝံပုလွေနက်များထံ ပြေးဝင်သွားသည်။

တစ္ဆေရိုင်းကြီးသည်လည်း အလျင်အမြန် ရောက်ချလာသည်။ သူသည် အချိန်အတော်ကြာ စောင့်စားနေခဲ့ရပြီး စိတ်မရှည်ဖြစ်လာခဲ့သည်။ ရွှီချင်းသည် သွေးအလိမ်းလိမ်းဖြစ်နေပြီး မနီးမဝေးရှိ ဝံပုလွေအသေကောင်များကို မြင်သောအခါ သူသည် အသက်ဝဝရှူသွင်း၍ ရွှီချင်းကို ကူညီရန် အပြေးလာခဲ့ခြင်း ဖြစ်သည်။

“ ကျုပ် အဆင်ပြေတယ် ”
ရွှီချင်းသည် တစ္ဆေရိုင်းကို သူ့အား မကူညီစေဘဲ ခေါင်းဆောင်လဲ့ဘက်သို့သာ လှည့်ကြည့်လိုက်သည်။ ထို့နောက် သူသည် တစ္ဆေရိုင်းကြီး၏ လေးစားသောအကြည့်အောက်တွင် ချက်ချင်း ထွက်ခွာလာခဲ့သည်။

သူသည် လွမ်ယာကို ကျော်ဖြတ်လာသောအခါ သူမသည်လည်း သတင်းစကားကို ကြားခဲ့ရဟန်တူပြီး သူ့ကို အံ့အားသင့်နေသော အရိပ်အယောင်များဖြင့် ကြည့်နေသည်။ သူမသည် အတန်ကြာ တွေးတောပြီးနောက် သားရေအိတ်ရှုံ့ကို ထုတ်ကာ သူ့ကို ပစ်ပေးလိုက်သည်။

ရွှီချင်းသည် အိတ်ကိုဖမ်းယူလိုက်ပြီး အိတ်ထဲတွင် ဆေးလုံးများ ရှိနေသည်ကို စမ်းမိလိုက်သည်။ သူက ကျေးဇူးတင်စကားဆိုပြီးနောက် လွမ်ယာ၏အကြည့်အောက်မှနေ၍ ထွက်ခွာလာခဲ့ကာ ကြက်ခြေခတ်ကို လှမ်းမြင်လိုက်ရသည်။

ကြက်ခြေခတ်သည် သစ်ပင်တစ်ပင်ပေါ်တွင် ရှိနေပြီး အသံစိုးစဉ်းမျှ မထွက်ပေ။ သူသည် ရွှီချင်းကို အသိအမှတ်ပြုသည့်အနေဖြင့် ခေါင်းညိတ်ပြလိုက်သည်။

ရွှီချင်းသည်လည်း စကားတစ်ခွန်းမဆိုဘဲ ခေါင်းသာညိတ်ပြလိုက်သည်။ သူသည် ပြန်လာပြီးနောက် ထိုင်စရာနေရာတစ်ခုကို ရှာတွေ့သွားသည်။ ထို့နောက် သူသည် အသက်ပြင်းပြင်းရှူသွင်းလိုက်ပြီး အဖြူရောင်ဆေးလုံးသုံးလုံးကို သောက်လိုက်သည်။

ဆေးလုံးများ အရည်ပျော်သွားသည်နှင့် ပြန်လည်အားဖြည့်သည့်အနေဖြင့် သူက ပတ်ဝန်းကျင်မှ ဝိညာဉ်စွမ်းအားများကို စုပ်ယူလိုက်သည်။

အချိန်များ ကုန်လွန်သွားပြီး တစ်နာရီကြာပြီးနောက် ရွှီချင်း၏မျက်လုံးများ ပွင့်လာသည်။ သူ၏စိတ်ပင်ပန်းနွမ်းနယ်မှုများ အတော်လေး သက်သာသွားပါသော်လည်း သူ၏မျက်ဝန်းများထဲတွင် စဉ်းစားရခက်နေသော အရိပ်အယောင်များ ရှိနေသေးသည်။ သူ့ခန္ဓာကိုယ်ထဲရှိ ဓာတ်နှောပမာဏက များများစားစား မရှိတော့သည်ကို သူ သတိထားမိလိုက်သည်။

သို့ဖြစ်၍ သူသည် ဘယ်ဖက်လက်ရှိ အင်္ကျီကို လိပ်တင်လိုက်သည်။ ထိုအခါ သူ၏မျက်ဝန်းများထဲရှိ စဉ်းစားရခက်နေသော အရိပ်အယောင်များသည် အံ့သြတုန်လှုပ်မှုအသွင် ပြောင်းလဲသွားသည်။

သူ့လက်မောင်းပေါ်တွင် သန္ဓေပြောင်းအမှတ်တစ်မှတ်သာ ရှိတော့ပေသည်။

သို့သော်လည်း သူ၏ကျင့်ကြံခြင်းအဆင့်က အဆင့်နှစ်အပြင်ခန္ဓာဖြစ်သည်မှာ သေချာသည်။ ထို့ပြင် မကြာသေးခင်က သူ ဝံပုလွေအုပ်ကြီးနှင့် တိုက်ခိုက်ခဲ့ရပါသော်လည်း အားပျော့မသွားသည်သာမက ပြန်လည်သက်သာလာပြီးနောက် ပို၍ပင် အစွမ်းထက်လာဟန်တူသည်။

သူ တိုက်ခိုက်နေစဉ်အတောအတွင်း ဝိညာဉ်စွမ်းအားများကို စုပ်ယူမိခဲ့ပြီး သူ့လက်မောင်းပေါ်ရှိ သန္ဓေပြောင်းအမှတ်နေရာမှ စူးခနဲဖြစ်သွားသည်ကို သူ သေချာမှတ်မိနေသေးသည်။

အဖြူရောင်ဆေးလုံးများနှင့်ပတ်သက်၍ သူ မသောက်ခဲ့သည့်အလားပင် ဖြစ်ပေမည်။ ၎င်းတို့၏အာနိသင်က ထိုမျှအပြောင်းအလဲ ဖြစ်သွားမည် မဟုတ်ပေ။ ထိုသို့ဆိုပါက သူ့အခြေအနေအတွက် တခြားဖြေရှင်းချက်များ မရှိတော့ဟန်တူသည်။

သို့ပေမည့် ခရမ်းရောင်သလင်းကျောက်မှ ထွက်ပေါ်လာခဲ့သော အေးစိမ့်စီးကြောင်းလေးတော့ ရှိသေးသည်။

“ အရိပ်၊ မိစ္ဆာစိတ်ဆန္ဒ၊ သလင်းကျောက်က ထွက်ပေါ်လာတဲ့ အေးစိမ့်စီးကြောင်း … ”
ရွှီချင်း၏မျက်လုံးများ ကျဉ်းမြောင်းသွားပြီး အစောပိုင်းက ထူးဆန်းသော ဖြစ်ရပ်ကို ပြန်လည်တွေးတောလိုက်သည်။

သူ့ထံသို့ လာနေသော အရိပ်ကိုမြင်လိုက်ရခြင်းသည့် သူ အမြင်မှားခြင်းကြောင့်မဟုတ်မှန်း သေချာသည်။ ယင်းသည် နေရောင်ခြည်ကျရောက်လာခြင်းကြောင့် ဖြစ်ပေါ်လာသော ပုံရိပ်ယောင်တစ်ခုလည်း မဟုတ်နိုင်ပေ။

သို့ဖြစ်၍ သူသည် သလင်းကျောက်မှ အအေးစီးကြောင်းလေးတစ်ခု ထွက်ပေါ်လာသည့်ဖြစ်စဉ်ကို စေ့စေ့စပ်စပ် တွေးတောကြည့်လိုက်သည်။ ထိုစဉ်က သူ့ကို တိုက်ခိုက်လာခဲ့သော မိစ္ဆာစိတ်ဆန္ဒသည် ခရမ်းရောင်သလင်းကျောက်၏ စုပ်ယူခြင်း ခံလိုက်ရသည့်ပမာပင်။

“ အစားခံလိုက်ရတာလား ”
ရွှီချင်းသည် အနည်းငယ် အံ့အားသင့်နေလျက် ခန့်မှန်းကြည့်လိုက်သည်။

ဘာသာပြန်သူမှတ်စု၊ ရက်သျှာရာဆိုသည်မှာ ဟင်ဒူဒဏ္ဍာရီလာနတ်များထဲရှိ နတ်ဆိုး သို့မဟုတ် မှင်စာတစ်ကောင် ဖြစ်သည်။