အပိုင်း(၁၃၉၆)

ဝါးမျိုခြင်း

လေထဲရှိ မီးလျှံခန္ဓာကို မရေတွက်နိုင်သည့် သေဆုံးခြင်းနွယ်များက ရစ်ပတ်လိုက်ကာ အောက်သို့ ဆွဲချသွားခဲ့သည်။

အကိုင်းအခက်များနှင့် နွယ်များသည် ထိုမီးလျှံခန္ဓာကို ချက်ချင်း လွှမ်းမိုးသွား၏။ သစ်ပင်က သူတို့နှစ်ဦးကို ရစ်ပတ်လိုက်ပြီး အပြီးတိုင်ဝါးမျိုလိုက်တော့မည့်ဟန်ရသည်။

များပြားလှသည့် နတ်ဆိုးများနှင့် လူသားများသည် ရှားရှင်းယွန်ကဲ့သို့ အဖြစ်မျိုးကို အတွေ့အကြုံရှိဖူးသည်ဖြစ်ရာ ယခင်ကလို တုန်လှုပ်​နေခြင်း မရှိတော့ပေ။

“ဒါက ရယ်စရာပဲ”

ခရမ်းရင့်ကောင်းကင်နန်းတော်မှ ထန်ကျစ်မော့က ထိုမြင်ကွင်းကို ကြည့်ပြီးနောက် ပြောလိုက်သည်။ မိန်းမတစ်ယောက်အတွက် သေခြင်းက ထိုက်တန်ပါ၏လော။

ဗြဟ္မာ့သန့်စင်ကောင်းကင်မှ သမီးတော်သည်လည်း သက်ပြင်းတစ်ချက်ချလိုက်သည်။ မိန်းမတစ်ယောက်အတွက် ရီဖူရှင်း သေဆုံးရခြင်းမှာ နှမြောစရာကောင်းလှပေသည်။‌

ချင်ရွှမ်ကန်းနှင့် ရီဖူရှင်း အနားရှိ အားလုံးတို့မှာ မျက်နှာများ မကောင်းကြတော့ပေ။ အင်ပါယာရှားပင်လျှင် မတားဆီးနိုင်သောအရာကို သူတို့ မည်သို့ တားဆီးနိုင်မည်နည်း။

သူတို့သည် သေဆုံးခြင်းသစ်ပင်ဆီသို့ ခြေလှမ်းလိုက်ကြသည်။ ချင်ရွှမ်ကန်းက သူ၏ လက်နှစ်ဖက်ကို ဆန့်ထုတ်လိုက်ပြီး အပြင်ဘက်ရှိ အကိုင်းအခက်များနှင့် နွယ်တို့ကို ဖျက်ဆီးလိုက်သော်လည်း သူက ဖြတ်ကျော်ရန် ခက်ခဲနေဆဲဖြစ်သည်။

ရာရာက ကောင်းကင်သို့ လှမ်းလိုက်ပြီး လေထဲတွင် ဓားကို ဝှေ့ယမ်းလိုက်ကာ ပြင်းထန်သည့် ဓားဝင်္ကပါက သူမ၏ ခြေထောက် အောက်ခြေ၌ ပေါ်လာသည်။ သူမ၏ အမူအရာက ဓားကဲ့သို့ အေးစက်နေပြီး လက်က ဓားဝင်္ကပါကို ​စေခိုင်းနေသည်။  သို့သော် ချင်ရွှမ်ကန်းကဲ့သို့ပင် သူမသည်လည်း ချိုးဖျက်နိုင်ခြင်း မရှိသေးပေ။ ဖြတ်တောက်ခံရသည့်သည့် နွယ်နှင့် အကိုင်းအခက်များက ချက်ချင်းပင် ပြန်လည်ကြီးထွလာခဲ့သည်။

သူမသည် အတော်လေး ဒေါသထွက်နေဟန်ရကာ ဓားဖြင့် အဆက်မပြတ် ခုတ်ပိုင်းသော်လည်း မထူးခြားပေ။

ဝုန်း… ဝုန်း…

ဓားများ ထိခတ်သံကို ကြားလိုက်ရသည်။ သူမသည် ဓားဝင်္ကပါကို သုံးကာ ရှုပ်ထွေးနေသည့် အကိုင်းအခက်နှင့် နွယ်များအတွင်းသို့ တရှိန်ထိုး ဝင်ရောက်ရန် ကြိုးစားလိုက်သည်။

သို့သော် မဟာလမ်းစဥ်၏ စွမ်းအားများက သူမကို ချက်ချင်း တားဆီးလိုက်သည်။ သူမက လှည့်ကြည့်လိုက်လျှင် သူမ၏ နောက်၌ ချင်ရွှမ်ကန်းကို တွေ့လိုက်ရသည်။

ချင်ရွှမ်ကန်းက သူ့ခေါင်းကို ခါယမ်းကာ ပြောလိုက်သည်။ “ဒီခရီးစဥ်မှာ သူ့ရဲ့ ကံတရားက အရမ်းကောင်းတယ်”

ရာရာက ချင်ရွှမ်ကန်းကို ဇဝေဇဝါနှင့် ကြည့်လိုက်သည်။ ချင်ရွှမ်ကန်း၌ ကံကြမ္မာ ကံဆိုးခြင်း၊ကံကောင်းခြင်းများကို သိနိုင်သော စွမ်းရည်ရှိကြောင်း သူမသိသည်။ သူက သူတို့အားလုံး ဤနယ်မြေသို့ မဝင်ခင်၌ ရီဖူရှင်း၏ ကံတရားကို စစ်ဆေးကြည့်ခဲ့သည်။

ထို့အပြင် သူမသည် မကြာသေးခင်က သေဆုံးသွားခဲ့သည့် မှော်ဝိဇ္ဇာကို တွေးမိလိုက်၏။ ထိုအကြောင်းများကို ကြည့်လျှင် ရီဖူရှင်း၏ ကံတရားက အလွန် ထူးကဲကြောက်မက်ဖွယ် ကောင်းလှပြီး သူက ကျိန်းသေ ဤနေရာ၌ သေဆုံးရလိမ့်မည် မဟုတ်ပေ။

သူမသည် ထိုအချက်ကို တွေးကာ အတော်လေး စိတ်သက်သာရာ ရသွားခဲ့သော်လည်း စိုးရိမ်ပူပန်မှုက လျော့မသွားပေ။

ချင်ရွှမ်ကန်းသည် သူ့ရှေ့မှ လိုက်သွားရန် ကြိုးစားနေသည့် သူများကို ရပ်တန့်စေလိုက်သည်။ သူက ရီဖူရှင်း၌ မည်သည့် ဝှက်ဖဲရှိနေသည်ကို မသိသော်လည်း သူ့ တပည့်က တစ်ခုခု ထူးခြားစွာ လုပ်ဆောင်ပြနိုင်မည်ဟု ယုံကြည်ပေသည်။

ရီဖူရှင်း၏ ခန္ဓာကိုယ်က ရစ်ပတ်ခံထားရကာ သေဆုံးခြင်း သစ်ပင်၏ ဝါးမျိုခြင်းကို ခံနေရသည်။ အဆုံးမဲ့ သေဆုံးခြင်းအငွေ့အသက်နှင့် အကိုင်းအခက်များက သူထံသို့ တိုးဝင်လာသည်။ သူက လမ်းစဥ်မီးလျှံ၏ ကြောက်မက်ဖွယ် စွမ်းအားကို ဖော်ထုတ်လိုက်ပြီး သူ၏ သက်စောင့်ဟော်နန်းထဲမှ မီးဝိညာဥ်လုံး၏ စွမ်းအားများကို အသုံးပြု၍ သေဆုံးခြင်းနွယ်ပင်များကို လောင်ကျွမ်းပစ်နေသည်။

ကြောက်မက်ဖွယ်မီးလျှံနယ်ပယ်က သူ့ ခန္ဓာကိုယ်အနီးတွင် ပေါ်ပေါက်လာပြီး သူ၏ မျက်လုံးများကို မီးလျှံများအဖြစ်သို့ ပြောင်းလဲသွားစေသည်။

ထိုအချိန်တွင် ထို ရုပ်တုနှင့် တူသော မြင့်မား၍ ထည်ဝါသည့် ပုံရိပ်က ကြီးမားသည့် လက်များစွာကို ဖန်တီးလိုက်ကာ ရှားရှင်းယွန်ကို ကာကွယ်​နေသည့် ရီဖူရှင်းဆီသို့ ပို့လွှတ်လိုက်သည်။ ယင်းသည်

မီးလျှံစွမ်းအားများကို ဖြတ်၍ ရှားရှင်းယွန်ဆီသို့ ဦးတည်လိုက်သည်။

ထိုအရာက သေဆုံးပြီးသည်မှာ နှစ်ပေါင်းများစွာ ကြာမြင့်နေပြီးဖြစ်သော်လည်း ထိုပုံရိပ်က အသက်ကို ယခုချိန်ထိ ဖက်တွယ်ထားဆဲပင် ဖြစ်လေသည်။

ဘုန်း…

ရီဖူရှင်း၏ မျက်လုံးများက လောင်ကျွမ်းနေသည်။ ကြောက်မက်ဖွယ် အကိုင်းအခက်များက သူ့ထံမှ ပေါက်ကွဲထွက်လာသည်။ အစိမ်းရောင်စွမ်းအားများက နေရာတစ်ခုလုံးကို ရုတ်တရက် ဖုံးလွှမ်းသွားကာ ယင်းတို့က လှုပ်ရှားလိုက်တိုင်း အသံများကို ထုတ်လွှတ်နေသည်။ သူ၏ သက်စောင့်ဟော်နန်းအတွင်းမှ အသက်ဓာတ်နတ်သစ်ပင်တွင် အဆုံးမဲ့အသက်ဓာတ်တို့ ပါဝင်နေသည်။

“ခင်ဗျားက အသက်စွမ်းအားကို ဒီလောက်လိုချင်နေမှတော့ လာယူလေ” ရီဖူရှင်း၏ မျက်လုံးများက အေးစက်နေသည်။ ထိုသေဆုံးခြင်း သစ်ပင် အကိုင်းအခက်များက ချက်ချင်းပင် အာရုံခံမိကာ ရီဖူရှင်းထံသို့ အရူးအမူး တိုးဝင်လာသည်။ အဆုံးမဲ့ သေဆုံးခြင်း စွမ်းအားများက သူ့ခန္ဓာကိုယ်အတွင်းသို့ စိမ့်ဝင်လာသည်။ သေဆုံးခြင်းနွယ်များက သူ့ကမ္ဘာ့သစ်ပင်အတွင်းသို့ ထိုးဝင်ကာ ရီဖူရှင်း၏ သက်စောင့်ဝိညာဥ်အတွင်းမှ အသက်ဓာတ်များ အားလုံးကို စုပ်ယူရန် ရည်ရွယ်လေသည်။

ကမ္ဘာ့သစ်ပင်က ယိမ်းနွဲ့နေကာ အဆုံးမဲ့ နတ်အလင်းရောင်တို့ ပေါက်ကွဲထွက်လာသည်။ သေဆုံးခြင်းစွမ်းအားများက သူ့အပေါ်သို့ရောက်လာသည့်အခါ ထိုအလင်းများက စုပ်ယူဝါးမျိုကာ သူ၏ သက်စောင့်ဝိညာဥ်အတွင်းသို့ ပေါင်းစပ်လိုက်သည်။

ရီဖူရှင်း၏ ကာကွယ်ခြင်းကို ခံထားရသော ရှားရှင်းယွန်က ထိုမြင်ကွင်းကြောင့် ထိတ်လန့်သွားပေသည်။ သူမသည် ယခင်က စိတ်ဓာတ်ကျနေသော်လည်း ယခု ဝမ်းမနည်းမိတော့ပေ။ သူမသည် မူလက နှစ်ယောက်လုံး ဝါးမျိုခံရတော့မည်ဟု တွေးနေခဲ့ခြင်း ဖြစ်သည်။

သို့သော်လည်း ရီဖူရှင်း၏ သက်စောင့်ဝိညာဥ်က ထိုသေဆုံးခြင်းသစ်ပင်မှ သေဆုံးခြင်းစွမ်းအားများကို ဝါးမျိုနိုင်နေသည်။

“အဲဒါက သူ့ရဲ့ မူလသက်စောင့်ဝိညာဥ် ဖြစ်နိုင်တယ်” ရှားရှင်းယွန်က တွေးလိုက်သည်။ ၄င်းက နတ်သစ်ပင်တစ်ခုက အခြားနတ်သစ်ပင်နှင့် တိုက်ခိုက်နေသကဲ့သို့ပင် ​ဖြစ်သည်။

ထိုသေဆုံးခြင်းအငွေ့အသက်က ရီဖူရှင်း၏ ခန္ဓာကိုယ်အတွင်း စုပ်ယူခံလိုက်ရပြီး သူနှင့်ပေါင်းစပ်နေသည်။ ထိုသေဆုံးခြင်းသစ်ပင်က အသက်ရှိသည့်အလား သူ့ထံသို့ ပိုမိုများပြားသော အကိုင်းအခက်တို့ကို ပို့လွှတ်နေသည်။

ထို့အပြင် ချောက်ကမ်းပါးက ပြင်းထန်စွာ တုန်ခါလာနေသည်။ သေဆုံးခြင်းနွယ် အကိုင်းအခက်များက ချောက်ကမ်းပါး အောက်ခြေမှ ပိုမို ထွက်ပေါ်လာပြီး ထိုနေရာသို့ ဦးတည်သွားသည်။

“ဘာတွေဖြစ်နေတာလဲ”

ထွက်ခွာရန် ပြင်နေသူများက ထိုမြင်ကွင်းကြောင့် ရပ်တန့်လိုက်သည်။ နောက်လှည့်ကြည့်လိုက်ကြလျှင် သူတို့ အောက်ခြေရှိ မရေတွက်နိုင်သော အကိုင်းအခက်များက နေရာတစ်ခုတည်းသို့ ဦးတည်နေသည်အား မြင်လိုက်ကြရပေသည်။

“သူ အသက်ရှင်နေသေးတယ်လား” သူတို့က အလွန် ထိတ်လန့်အံ့သြသွားကြသည်။

သူတို့သည် လုံးဝမဖြစ်နိုင်သည့်အရာက ဖြစ်ပျက်လာနေသည်ကို မြင်တွေ့ကြရ၏။ ထိုနေရာသည် ရန်ဟောင်ပင်လျှင် ခုခံနိုင်သည့် အရာမျိုးမဟုတ်ပေ။ ရီဖူရှင်း နှင့် ရှားရှင်းယွန် နှစ်ယောက်လုံးက ရှန့်ထိုအဆင့်များ ဖြစ်ကြပြီး သူတို့သည် သေဆုံးခြင်းသစ်ပင်၏ ဝါးမျိုခံရခြင်းမှာ ရှင်သန်နိုင်ရန် နည်းလမ်းမရှိပေ။

ခရမ်းရင့်ကောင်းကင်နန်းတော်မှ မဟာလမ်းစဥ် ထူးခြားခန္ဓာကိုယ်နှင့် ကျန်းယွမ်ပင်လျှင် ရပ်တန့်သွားကာ ထိုနေရာသို့ ကြည့်လိုက်သည်။ သူက ဆက်လက်၍ ရှေ့သို့ မရွေ့လျားသော်လည်း သူ၏ အကြည့်များကတော့ ထိုနေရာ၌ ဆက်လက် တည်ရှိနေပေသည်။

“ကျုပ်တို့ ဆက်မသွားဘူးလား” သူ့ဘေးမှ တစ်ယောက်က မေးလိုက်သည်။

“ခဏလောက် ထပ်စောင့်ကြည့်ဦးမယ်” ကျန်းယွမ်က ပြန်ဖြေလိုက်သည်။

ထိပ်တန်းအင်အားစုမှ လူအများကလည်း ရပ်တန့်သွားသည်။ လေထဲမှ ကြောက်မက်ဖွယ် ခေါင်းကိုးလုံးဖီးနစ်သည်  သေဆုံးခြင်းအငွေ့အသက်တို့ကို အရူးအမူး ဝါးမျိုနေသည်။ ၎င်း၏ မျက်လုံးများက အေးစက်နေပြီး ရက်စက်သည့် အသွင်ကို ပေးစွမ်းကာ ပြင်းထန်သည့် အရှိန်အဝါရှိသည်။

ခေါင်းကိုးလုံးဖီးနစ်များသည် စွန့်ပစ်ခံမျိုးနွယ်များ ဖြစ်သော်လည်း ဖီးနစ်မျိုးနွယ်အခွဲ ဖြစ်သည်။ သို့သော်လည်း သူတို့ထံမှ ကြောက်မက်ဖွယ် အစွမ်းထက်သူတချို့ ပေါ်ပေါက်လာခဲ့ပြီး ကောင်းကင်နတ်ဆိုးနန်းတော်သို့ ဝင်ရောက်နိုင်ခဲ့သည်။ သူတို့သည် အလွန် အစွမ်းထက်ကာ ဖီးနစ်မျိုးနွယ်နှင့် အမြဲလိုလို ပြဿနာများ ရှိခဲ့သည်။

ထိုအချိန်တွင် ခေါင်းကိုးလုံးဖီးနစ်၏ မျက်လုံးများက ထိုဝါးမျိုခံနေရသည့် နေရာသို့ ကြည့်နေသည်။ သေဆုံးခြင်းစွမ်းအားများက အလွန် ထူထပ်လှပြီး ထိုစွမ်းအား အားလုံးကို ဝါးမျိုနိုင်ပါက သူ့အတွက် များစွာ အကျိုးရှိပေလိမ့်မည်။

ထို့အပြင် ထို ရုပ်တုနှင့်တူသော ခန့်ညားသည့်ပုံရိပ်က ရှေးဟောင်း ရမ်ဟောင်တစ်ပါး ကျန်ရစ်ခဲ့ခြင်း ဖြစ်လျှင် ကိစ္စများက ပို၍ပင် ပြီးပြည့်စုံသွားပေလိမ့်မည်။

နှမြောစရာကောင်းသည်မှာ ထိုစွမ်းအား၏ ဝါးမျိုခြင်းအား ခုခံနိုင်စွမ်း မရှိခြင်းပင် ဖြစ်လိမ့်မည်။

သို့သော် ကိစ္စများက တခဏအတွင်း ထူးထူးခြားခြား ပြောင်းလဲသွားသည်။

ရီဖူရှင်း၏ ကမ္ဘာ့သစ်ပင် သက်စောင့်ဝိညာဥ်က သေဆုံးခြင်းအငွေ့အသက်များကို ဝါးမျိုနေသည်ဟု ထင်မှတ်ရပြီး  သေဆုံးခြင်းသစ်ပင်အတွင်းမှ စွမ်းအားများက သူ၏ သက်စောင့်ဟော်နန်းအတွင်း စုပ်ယူခံနေရ၏။ လက်ရှိတွင် သူ၏ သက်စောင့်ဟော်နန်းအတွင်း သေဆုံးခြင်းစွမ်းအားများနှင့် ပြည့်နှက်နေသည်။ ထိုစွမ်းအားများက သူ၏ သက်စောင့်ဟော်နန်းထဲမှ ကမ္ဘာအား လွှမ်းမိုးထားသည်။  သူ၏ ခန္ဓာကိုယ်တစ်ခုလုံးတွင် သေဆုံးခြင်းအငွေ့အသက်များက စီးဆင်းနေပြီး သူ၏ ဖြူဖျော့သော မျက်နှာ၌ သေဆုံးခြင်း အရေးအကြောင်းတို့ ထင်ဟပ်နေသည်။

ထိုသေဆုံးခြင်းနတ်ဘုရားကဲ့သို့ ပုံရိပ်ဆီမှ မရေတွက်နိုင်သော ရှေးဟောင်းသစ်ပင်ကဲ့သို့ လက်များက ရီဖူရှင်းထံသို့ တိုးဝင်လာနေပြီး သူ့ခန္ဓာကိုယ်ကို ရစ်ပတ်ကာ ကမ္ဘာသစ်ပင်ကို သိမ်းပိုက်ရန် ပြင်နေသည်။ စွမ်းအားနှစ်ခုသည်တစ်ခုနှင့်တစ်ခု ပဋိပက္ခဖြစ်ပြီး အချင်းချင်းတိုက်ခိုက်နေသည်။

ကမ္ဘာ့သစ်ပင် သက်စောင့်ဝိညာဥ်က ယိမ်းနွဲ့နေကာ ရှေးဟောင်းသစ်ပင်၏ အစိတ်အပိုင်းတိုင်းမှ နတ်အလင်းများ ထွက်ပေါ်နေသည်။ ထိုအလင်းများက လောကအတွင်းရှိ မည်သည့်အရာကိုမဆို လွှမ်းမိုးနိုင်စွမ်းရှိသကဲ့သို့ ထင်မှတ်ရသည်။

နတ်သစ်ပင်များက ပေါင်းစည်းသွားသည်ဟု ထင်မှတ်ရသည်။ သေဆုံးခြင်းသစ်ပင်မှ အကိုင်းအခက်များက ကမ္ဘာ့သစ်ပင် သက်စောင့်ဝိညာဥ်ဆီသို့ တဖြည်းဖြည်း စိမ့်ဝင်နေသည်။ ထိုသည်မှာ မြွေက ဆင်အား မျိုရန် ကြိုးစားနေသည်နှင့် တူညီနေသည်။

သေဆုံးခြင်းအငွေ့အသက်များက ရှားရှင်းယွန်၏ ခန္ဓာကိုယ်အတွင်းသို့ မရပ်မနား တိုးဝင်နေသည်။ သူမပေါ်မှ သေဆုံးခြင်းအငွေ့အသက်တို့က ပိုမို ထူထပ်လာပြီး  ရီဖူရှင်းသည် မတတ်သာစွာနှင့် သူမ၏ ခန္ဓာကိုယ်ကို ကမ္ဘာ့သစ်ပင်နှင့် ရစ်ပတ်ကာ အသက်ဓာတ်များကို သူမ၏ ခန္ဓာကိုယ်ဆီ ပို့လွှတ်၍ သေဆုံးခြင်း စွမ်းအားများကို သူမအစား တိုက်ခိုက်ပေးနေရသည်။

အချိန်များ ကုန်လွန်သွားပြီး အပြင်ဘက်ရှိ တန်ခိုးရှင်များသည် အလွန်ထူထပ်နေသည့် သေဆုံးခြင်းစွမ်းအားများကို ဆက်လက်၍ စောင့်ကြည့်နေကြသည်။ နေရာတစ်ခုလုံးမှ အကိုင်းအခက်များက အတွင်း၌ မည်သည်တို့ ဖြစ်ပျက်နေသည်အား ပြောနိုင်ရန် ခက်ခဲစေသည်။

“သေဆုံးခြင်းစွမ်းအားတွေက လျော့ပါးလာပြီပဲ” တန်ခိုးရှင်တစ်ဦးက ပြောလိုက်သည်။ လူတိုင်း၏ မျက်လုံးများက ထိုနေရာမှ အကြည့်မလွှဲကြ​ပေ။

သူတို့သည် ဇဝေဇဝါဖြစ်ကာ ရီဖူရှင်းက အမှန်တကယ် အသက်ရှင်နေလိမ့်မလားဟု အံ့သြနေကြသည်။

သူတို့က အတွင်း၌ မည်သည့်အရာတို့ ဖြစ်ပျက်နေသည်အား အလွန် သိလို​နေကြပေသည်။

“ဘာလဲဟ…” ထိုအချိန်တွင် အပြင်ဘက်ရှိ အချို့သူများက အကိုင်းအခက်များ တစ်ခုပြီးတစ်ခု နွမ်းခြောက်ကုန်သည်အား မြင်ကာ ထိတ်လန့်ကုန်ကြလေသည်။

သေဆုံးခြင်းစွမ်းအားများက ခမ်းခြောက်ကုန် သည်လား။

မည်သည့်အရာများ ဖြစ်ပျက်နေရသနည်း။

ယူချင်းသည် ထိုအနီးတွင် ရပ်ကာ အရာအားလုံးကို စိုးရိမ်ပူပန်စွာ စောင့်ကြည့်နေကြသည်။ သူ့အနီးရှိ လူတိုင်းသည်လည်း ထိုနည်းတူဖြစ်သည်။ ရီဖူရှင်းတစ်ခုခုလုပ်ပြနိုင်မည်ဟု သူတို့ယုံကြည်ထားကြ၏။

ဝူယုံးနှင့် အခြားသူများသည်လည်း အံ့သြမှင်တက်နေကြသည်။ သူတို့သည် ရီဖူရှင်းနှင့် အချိန်ကြာမြင့်စွာ ရှိနေခဲ့သော်လည်း သူတို့ တွေ့မြင်ထားသည်ထက် သူက ပိုကြောက်မက်ဖွယ် ကောင်းပေသည်။ ယခင်နှစ်များစွာက အင်ပါယာခွာနယ်မြေ၌ ဖြစ်ပျက်ခဲ့သည်များမှ သူ၏ သတ္တိသွေးကို သက်သေပြခဲ့ပြီး ဖြစ်သော်လည်း သူတို့သည် ထိုသို့သော အခြေအနေ၌ပင် ရီဖူရှင်းက ရှင်သန်နိုင်စွမ်းရှိလိမ့်မည် မယုံကြည်နိုင်ကြပေ။

ထိုရှေးဟောင်းသစ်ပင်၏ ခြောက်သွေ့မှုက သိသာစွာ တိုးမြင့်လာခဲ့သည်။ ချောက်ကမ်းပါးအတွင်းမှ သေဆုံးခြင်းစွမ်းအားများက လျော့ပါးလာသည်။ များပြားလှသည့် တန်ခိုးရှင်များသည် သူတို့၏ မျက်လုံးများကို အောက်ဘက်မှ မြင်ကွင်းကို စူးစိုက်ကြည့်နေကြသည်။

ထိုအခိုက်တွင် ရီဖူရှင်းနှင့် ရှားရှင်းယွန် နှစ်ဦးလုံးက ပိုးအိမ်အတွင်း ရစ်ပတ်ခံထားရသကဲ့သို့ ထင်မှတ်ရပေသည်။ သူ၏ ကမ္ဘာ့သစ်ပင် အကိုင်းအခက်များက အပြင်သို့ပင် ထွက်ပေါ်နေပြီး သေဆုံးခြင်းနတ်ဘုရားနှင့်တူသော ထိုပုံရိပ်ကိုပင် ရစ်ပတ်ထားကာ သေဆုံးခြင်းစွမ်းအားများကို တဖြည်းဖြည်း ဝါးမျိုနေသည်။

သေဆုံးပြီးသည်မှာ နှစ်ပေါင်းများစွာ ကြာမြင့်နေခဲ့သော်လည်း ထိုဖြစ်တည်မှု၌ ပြင်းထန်သော မဟာလမ်းစဥ် သေဆုံးခြင်းစွမ်းအားများက ရှိနေဆဲပင် ဖြစ်သည်။ ရန်ဟောင်တစ်ပါးအနေနှင့် ထိုမဟာလမ်းစဥ် စွမ်းအားများ​က သူတို့၏ အသွေးအသားများထဲတွင် ပျော်ဝင်နေပြီး ဖြစ်သည်။  သူတို့ သေဆုံးသွားသည်မှာ နှစ်ပေါင်းများစွာ ကြာမြင့်နေလျှင်ပင် သူတို့၏ ခန္ဓာကိုယ်က အကောင်းပကတိ ကျန်ရစ်နေနိုင်ပြီး မဟာလမ်းစဥ် စွမ်းအားများကလည်း တည်ရှိနေနိုင်ပေသည်။

ကမ္ဘာ့သစ်ပင်သည် ထိုဖြစ်တည်မှု၏ ခန္ဓာကိုယ်အား တဖြည်းဖြည်း ရစ်ပတ်ကာ ဝါးမျိုလိုက်သည်။ သေဆုံးခြင်းစွမ်းအားများက ရီဖူရှင်း၏ ကမ္ဘာ့သစ်ပင်ကို နက်မှောင်သွားစေသော်လည်း ကမ္ဘာ့သစ်ပင်၏ အကိုင်းအခက်များက ရစ်ပတ်နေကာ အင်ပါယာခွာနယ်မြေမှ မီးဝိညာဥ်နှင့် အရပ်ဆယ်မျက်နှာ နတ်ဆင်အင်ပါယာ၏ အရိုးတို့ကို ဝါးမျိုသကဲ့သို့ ဆက်လက်၍ လုပ်ဆောင်နေသည်။

ရီဖူရှင်း၏ ခန္ဓာကိုယ်သည် ကြောက်မက်ဖွယ် လေပွေတစ်ခုအဖြစ် ပြောင်းလဲသွားသည်ဟု ထင်မှတ်ရသည်။ ကမ္ဘာ့သစ်ပင်သည် သူ၏ ခန္ဓာကိုယ်အတွင်းသို့ ပြန်လည်ဆုတ်ခွာကာ ပျောက်ကွယ်သွားသည်။ ထိုရန်ဟောင်ဖြစ်တည်မှုသည်လည်း နောက်ထပ်ဆက်၍ မြင်ရတော့မည် မဟုတ်ပေ။ သို့သော်လည်း ရီဖူရှင်း၏ သက်စောင့်ဟော်နန်းအတွင်း၌ ထိုပုံရိပ်က ပေါ်ပေါက်လာခဲ့သည်။

ရီဖူရှင်းသည် နက်မှောင်နေသော စွမ်းအားများ၏ ဖုံးလွှမ်းခံထားရကာ သူ့ထံ၌ သေဆုံးခြင်းစွမ်းအားများက အလွန်ထူထပ်နေသည်။ ရှားရှင်းယွန်သည်လည်း အခြေအနေမကောင်းလှပေ။ သူတို့သည် မလှုပ်မယှက်နှင့် ကျောက်ရုပ်တုများကဲ့သို့ ပြောင်းလဲသွားသလို ထင်မှတ်ရသည်။

သူတို့ နှစ်ဦးကို ရစ်ပတ်ထားသော သေဆုံးခြင်းသစ်ပင်က လျင်မြန်စွာ ညှိုးခြောက်လာခဲ့သည်။ နေရာတစ်ခုလုံးကို လွှမ်းခြုံထားသည့် အကိုင်းအခက်များသည်လည်း ညှိုးခြောက်ကာ ပြုတ်ကျသွားခဲ့ပေသည်။

သေဆုံးခြင်းစွမ်းအားများက တဖြည်းဖြည်း ပျက်ပြယ်လာပြီး လေနှင့်အတူ လွင့်စင်ပပျောက်သွားသည်။

“သေဆုံးခြင်းစွမ်းအားတွေ မရှိတော့ဘူး” အပြင်ဘက်ရှိ ထိုလူများ အလွန် ထိတ်လန့်သွားကြသည်။ ယူချင်းက ရှေ့သို့ လှမ်းကာ ရှေးဟောင်းသစ်ပင် အကိုင်းအခက်များအတွင်းသို့ တစ်ဟုန်ထိုး ဝင်သွားကာ ဖျက်ဆီးပစ်လိုက်သည်။

ထိုအကိုင်းအခက်များသည် အလွန်ပင် ကျိုးကြေလွယ်သွားကာ တစ်ချက်တည်းနှင့်ပင် အားလုံးကို ဖျက်ဆီးပစ်လိုက်နိုင်သည်။

၎င်းတို့သည် လျင်မြန်စွာပင် ဖုန်မှုန့်များအဖြစ် ပြောင်းလဲသွားပေသည်။

ယူချင်းသည် ထို အောက်ဘက်တစ်နေရာ၌ ထွက်ပေါ်လာသည်။ ပုံရိပ်နှစ်ခုက သူ့ဘေးတွင် တိတ်ဆိတ်စွာနှင့် ကျောက်ရုပ်များကဲ့သို့ ရပ်နေပေသည်။

***


Comment

Leave a Reply


Options

not work with dark mode
Reset