အပိုင်း(၁၂၄၉)

မျိုးနွယ်စုကိုးခုမှ တန်ခိုးရှင်များသည် ထိုအဖြစ်အပျက်များကို မြင်သည့်အခါ အားလုံး အထိတ်တလန့် ဖြစ်ကုန်ကြသည်။

မင်းသားသွမ့်ဝူကျီသည် အရင်ဆုံး ပြင်းထန်စွာ ဒဏ်ရာရသူ ဖြစ်ခဲ့သည်။ သူ၏ လက်ရှိ အခြေအနေအရ ထိုဒဏ်ရာသည် သူ့ကို ပြင်းထန်စွာ သက်ရောက်မှုရှိစေသည်မှာ သေချာပြီး သူ၏ ကိုယ်တွင်းမှ မီးတောက်များကို ထိန်းချုပ်ရန် တိုက်ခိုက်နေရဆဲပင် ဖြစ်သည်။

တိုက်ပွဲကွင်းပြင်၏ အခြားတစ်ဖက်တွင် ရီဖူရှင်းသည် ပတ်ဝန်းကျင်သို့ ဝေ့ဝဲကြည့်သည်။ နတ်ဘုရားယန်မီးပြင်းဖိုသည် အရာအားလုံးကို ဝါးမျိုနေပြီး စိမ်းပုပ်ရောင် ဝဲကတော့ကိုပင် တဖြည်းဖြည်း ဖျက်ဆီးပစ်ခဲ့သည်။ သွမ့်ဝူကျီတွင် သူနှင့် ရင်ဆိုင်နိုင်စွမ်း မရှိတော့သောကြောင့် လေထဲမှ တိုက်ခိုက်မှုသည် အဆုံးသတ်ခဲ့ပြီ ဖြစ်၏။

“သွမ့်ဝူကျီက ရှုံးသွားပြီ” လူတိုင်း၏ နှလုံးသားများက တုန်ယင်နေသည်။ ဤသည်မှာ မျှော်လင့်မထားသော ရလဒ်ဖြစ်သည်။

နတ်သက်ကြွေမီးတောက်သည် အလွန်ကျော်ကြားလှသောကြောင့် လူတိုင်းသည် ဤဘိုးဘေးနယ်မြေအတွင်း သွမ့်ဝူကျီ အနိုင်ရလိမ့်မည်ဟု လူတိုင်း တွေးထင်နေကြသည်။ သို့သော်လည်း ကိစ္စများသည် ခန့်မှန်းထားသည့်အတိုင်း ဖြစ်မလာခဲ့ပေ။

ချန်ယဲ့မြို့မှ ရီဖူရှင်းသည် မီးတောက်အတွင်း၌ သွမ့်ဝူကျီကို ရှုံးနိမ့်စေခဲ့သည်။

ရီဖူရှင်းကို ရွေးချယ်ခဲ့သည့် ကျူးမျိုးနွယ်နှင့် ဝူမျိုးနွယ်သည်ပင် ဤသည်ကို ဖြစ်နိုင်သည်ဟု တွေးထင်မထားခဲ့ပေ။ သူတို့သည် ထိုအခိုက်တွင် အလွန်အံ့အားသင့်စွာဖြင့် ကြည့်နေကြသည်။ သူတို့သည် ရီဖူရှင်းသာ မီးတောက်ကို ကောင်းမွန်စွာ ထိန်းချုပ်နိုင်စွမ်းရှိသည်ကို သိလျှင် လူတိုင်းသည် သူ့အား အင်ပါယာခွာမြို့ကို ခြေမချမှီကပင် ဖိတ်ခေါ်ချက်များ ပေးပို့ခဲ့မည် ဖြစ်သည်။ ထိုသို့လုပ်ရမည့်အစား မည်သူကမှ သူ့ကို လာမရှာခဲ့သောကြောင့် ဝူမျိုးနွယ်သည် မည်သည့်ကုန်ကျမှုမှ မရှိဘဲ ရီဖူရှင်းကို သူတို့နှင့် ပူးပေါင်းရန် စည်းရုံးနိုင်စွမ်း ရှိခဲ့သည်။

သို့သော်လည်း လူအများသည် ကျူးမျိုးနွယ်နှင့် ဝူမျိုးနွယ်တို့၏ ပတ်သက်မှုကို တွေးမိသည့်အခါ အံ့သြစွာ ကြည့်လိုက်ကြသည်။

ကျူးမျိုးနွယ်၏ ရန်ထျန်းကျောက်သည်လည်း ထိုနေရာတွင် ရှိနေပြီး ဝူမျိုးနွယ်က ဖိတ်ခေါ်ခဲ့သော ရီဖူရှင်းသည်လည်း ထိုမျှအထိ အစွမ်းထက်လှပေသည်။ ကြည့်ရသည်မှာ ဘိုးဘေးနယ်မြေ၌ ဤတစ်ခေါက်လှုပ်ရှားမှုမှ ရလဒ်သည် ထပ်၍ သံသယဖြစ်ရန် မလိုတော့အောင် ထင်ရှားနေပုံ ရသည်။

ရှန့်ထိုကျိုယိုး၏ တပည့်သည် သန်မာသည်မှန်သော်လည်း သူတစ်ဦးတည်းနှင့် ရင်ထျန်းကျောက်၊ ရီဖူရှင်းကဲ့သို့သော စွမ်းအားကြီး တန်ခိုးရှင်နှစ်ဦးကို ခုခံရန်မှာ မဖြစ်နိုင်ပေ။

အမှန်တွင်တော့ သူတို့နှစ်ဦးထဲမှ တစ်ဦးနှင့် ရင်ဆိုင်ရန် ကြိုးစားလျှင်ပင် ပြဿနာရှိလိမ့်မည် ဖြစ်သည်။

အဆုံးတွင်တော့ ရီဖူရှင်းသည် ဤတိုက်ပွဲ၌ သူ၏ ခွန်အားကို သက်သေပြသွားခဲ့ပြီး ဖြစ်၏။

ထို့ကြောင့် ဝူမျိုးနွယ်သည် ကျူးမျိုးနွယ်ကို သစ္စာခံရန် ဆန္ဒရှိသည်ဆိုလျှင် ဤတိုက်ပွဲ၏ ရလဒ်မှာ ထပ်၍ သံသယဖြစ်ရန် မရှိတော့ပေ။ ကျူးမျိုးနွယ်သည် အနိုင်ရသူဖြစ်ကာ ဘိုးဘေးနယ်မြေကို အသုံးပြုရန် အခွင့်အရေး ရသွားလိမ့်မည် ဖြစ်၏။

ရှစ်ခုသော မျိုးနွယ်စုများသည် ဤပြိုင်ပွဲမှ ဖယ်ထုတ်ခံခဲ့ရပြီး ဖြစ်သည်။

မေးရန်လိုသည့် မေးခွန်းတစ်ခုမှာ ဝူမျိုးနွယ်နှင့် ရီဖူရှင်းက လက်အောက်ခံဖြစ်လိုသည့် ဆန္ဒရှိလိမ့်မည်လား။

အကယ်၍ သူတို့လက်အောက်ခံ မဖြစ်လိုခဲ့လျှင် ရင်ထျန်းကျောက်နှင့် ရီဖူရှင်း မည်သူက ပို၍ သန်မာသနည်း။

“မြို့စားရီရဲ့ စွမ်းအားက တကယ်ဆန်းကြယ်တာပဲ။ မင်းသားသွမ့်ဝူကျီက သူ့ကို ရှုံးနိမ့်သွားမယ်လို့ ကျုပ် ဘယ်တုန်းကမှ မတွေးဖူးခဲ့ဘူး။ ကြည့်ရတာ ရှန့်ထိုကျိုယိုးရဲ့ တပည့်ကလည်း သူ့ကို ရင်ဆိုင်ဖို့ ခက်ခဲလိမ့်မယ် ထင်တယ်။” ကျူးကလန်မှ ထွားကျိုင်းသန်မာသည့် အနီရောင်မုတ်ဆိတ်မွေးရှည်နှင့် သက်လတ်ပိုင်းလူကြီးက ပြောသည်။

ရှန့်ထိုကျိုယိုး၏ တပည့်က ရီဖူရှင်းကို ကြည့်သည်။

ရီဖူရှင်းသည် သူ့မျက်ခုံးကို ပင့်မသည်။ ကျူးမျိုးနွယ်မှ ဤတန်ခိုးရှင်က မယဉ်ကျေးလှပေ။ မဟုတ်လျှင် ဤသည်မှာ သူနှင့် ရှန့်ထိုကျိုယိုး၏ တပည့်ကြား၌ တိုက်ခိုက်ဖြစ်ရန် သွေးထိုးဖို့ရာ ကြိုးစားနေခြင်း ဖြစ်နိုင်သည်။

လက်ရှိလူများအကြားတွင် သူသည် အများဆုံးတိုက်ခိုက်ခဲ့ရသူ ဖြစ်သည်။

သူသည် သွမ့်ဝူကျီကို အနိုင်တိုက်နိုင်ခဲ့သော်လည်း ထိုသို့ လုပ်ဆောင်နိုင်ရန် သူ၏ စွမ်းအား အများအပြားကို အသုံးပြုခဲ့ရသည့်အပြင် သူ သန့်စင်ထားခဲ့သည့် စွမ်းအားများမှာလည်း ပျက်စီးသွားခဲ့သည်။

ထို့အပြင် သွမ့်ဝူကျီ၏ တိုက်ခိုက်မှုက သူ့ကို ဒဏ်ရာရစေခဲ့သည်။ သူ့ခန္ဓာကိုယ် အတွင်းသို့ ဝင်ရောက်နေသည့် ထိတ်လန့်တုန်လှုပ်ဖွယ် မီးတောက်များနှင့် သူက မည်သို့မှ သက်ရောက်မှုမရှိဘဲ မည်သို့ နေမည်နည်း။

ရှန့်ထိုကျိုယိုး၏ တပည့်သည် အားနည်းခြင်းအလျဉ်း မရှိသကဲ့သို့ သူ၏ ကြာပန်းနက်ကံကြမ္မာမီးတောက်သည် ကြောက်မက်ဖွယ် အဖျက်စွမ်းအားများ ပါဝင်နေပေသည်။

အကယ်၍ သူသာ တိုက်ပွဲအပြီး၌ နောက်တစ်ခါ ထပ် တိုက်ခိုက်ခဲ့ပြီး သူက ရှန့်ထိုကျိုယိုး၏ တပည့်ကို အနိုင်ရရှိခဲ့လျှင်ပင် သူ့တွင် စွမ်းအားအပြည့် ကျန်ရှိမည် မဟုတ်တော့ပေ။

ထိုအခြေအနေတွင် သူနှင့် ရင်ထျန်းကျောက် နှစ်ယောက်သာ ကျန်ရစ်တော့မည် ဖြစ်သည်။

ကျူးမျိုးနွယ်မှ တန်ခိုးရှင်များ မည်သို့ ကြံစည်နေသည်ကို သိနိုင်ပေသည်။

သူသည် ရှန့်ထိုကျိုယိုး၏ တပည့်က တိုက်ခိုက်လာရန်အတွက် သွေးထိုးလှုံ့ဆော်နေသည့်ပုံ ပေါ်ပေသည်။ ရှန့်ထိုကျိုယိုး၏ တပည့်က ရီဖူရှင်းကို စူးစိုက်ကြည့်လိုက်ပြီး ကြာပန်းနက်ကံကြမ္မာမီးတောက်က သူ့ကို ရစ်ပတ်ထားသည်။

သူသည် တိုက်ခိုက်ရန် အသင့်ဖြစ်နေလေသည်။

သို့သော်လည်း ထိုအခိုက်တွင် ပုံရိပ်တစ်ခုသည် ရိပ်ခနဲ လှုပ်ရှားလိုက်ပြီး တိုက်ပွဲကွင်းပြင်သို့ ဆင်းသက်လာကာ ရှန့်ထိုကျိုယိုး၏ တပည့် အရှေ့တွင် ပေါ်ပေါက်လာသည်။

တောက်ပသော ထိုပုံရိပ်သည် အခြားမဟုတ်ဘဲ ရင်ထျန်းကျောက်ပင် ဖြစ်သည်။

သူမသည် ရှန့်ထိုကျိုယိုး၏ တပည့်နှင့် ရီဖူရှင်း တိုက်ခိုက်သည်ကို စောင့်မနေဘဲ သူမက တက်ကြွစွာ ပါဝင်၍ တိုက်ခိုက်ရန် ရောက်လာလေသည်။

ကြောက်မက်ဖွယ် မီးတောက်များသည် သူမအနီးတွင် ရစ်ပတ်နေပြီး နတ်ဘုရားမီးတောက်များဖြင့် လွှမ်းခြုံထားသကဲ့သို့ ဖြစ်သည်။ သူမ၏ ကြမ်းကြုတ်ရက်စက်သော အရှိန်အဝါက ထွက်ပေါ်လာပြီး ရှန့်ထိုကျိုယိုး၏ တပည့်ဆီသို့ ပစ်ဝင်သွားသည်။

ကျူးမျိုးနွယ်မှ တန်ခိုးရှင်သည် ထိုမြင်ကွင်းကို ကြည့်ကာ ထိတ်လန့်တုန်လှုပ်သွားသည်။ သူမက ထိုသို့ ပြုလုပ်သည်ကို သူ အံ့သြနေသည်။

ထို့နောက်တွင် သူ နားလည်သွားသည်။ ဤသူများ အားလုံးသည် ကောင်းကင်ဘုံ၏ ဂုဏ်ယူရသော သားတော်၊ သမီးတော်များ ဖြစ်ကြသည်။

ထို့ကြောင့် ဤရင်ထျန်းကျောက်သည် အလွန်မာနကြီးသောသူ ဖြစ်ကာ သူ၏အကြံအစည်ကို ရိပ်မိသည်နှင့် သူမက ထိုသို့ လုပ်ဆောင်လိုက်ခြင်း ဖြစ်သည်။ ထိုသည်မှာ သူက အသုံးချရန် လုပ်နေသည်ကို စက်ဆုပ်ရွံရှာ၍ဟု ဆိုနိုင်ပေသည်။

ကျူးမျိုးနွယ်မှ တန်ခိုးရှင်သည် အေးစက်စက် ပြုံးသည်။ ရင်ထျန်းကျောက်မှာ အမှန်တကယ်ပင် မာနကြီးလွန်းလှသည်။ သို့ပေမဲ့ ဘိုးဘေးနယ်မြေသည် မျိုးနွယ်စုကိုးခုအတွက် အလွန် အရေးကြီးလှပေသည်။

ယခု ဤအခြေအနေထိ လွယ်ကူစွာ ရောက်ရှိလာပြီးမှ သူက သူတို့ကို မည်သို့ အလွယ်တကူ လွှတ်ပေးနိုင်ပါမည်နည်း။ သူသည် သိသာစွာပင် မည်သည့် နည်းလမ်းကိုမဆိုသုံး၍ ဆူးညှောင့်များကို ဖယ်ရှားရပေမည်။

သင့်ပြိုင်ဘက်၏ စွမ်းအားကို ဖြုန်းတီးပစ်စေခြင်းက အမှန်တကယ်ပင် လှပသော လှည့်ကွက်မဟုတ်ပါလား။

ရီဖူရှင်းသည် ရင်ထျန်းကျောက်ကို ကြည့်လိုက်၏။ ဘယ်လောက် မာနကြီးလိုက်တဲ့ အမျိုးသမီးလဲ။

သွမ့်ဝူကျီသည် ထိုနေရာတွင် ထိုင်နေဆဲ ဖြစ်ကာ သူ့မျက်လုံးများကို ဖွင့်၍ ရီဖူရှင်းကို ကြည့်ကာ ပြောသည်။ “မင်းမှာ ရှိတဲ့ လမ်းစဉ် မီးတောက်က ဘယ်လိုအမျိုးအစားလဲ”

သန့်စင်သည့် အဖြူရောင်မီးတောက်သည် ကြည်လင်လုနီးပါးဖြစ်ကာ လေဟာနယ်မီးတောက်နှင့် တူပေသည်။

ဤကဲ့သို့ မီးအမျိုးအစားမျိုးသည် ငြှိမ်းသတ်၍ မရနိုင်သကဲ့သို့ ထင်မှတ်ရပေသည်။ သူက ၎င်းတို့ကို ထိန်းချုပ်ရန်အတွက် ရန်ဟောင်စွမ်းအားများကို အသုံးပြုသည့်တိုင်အောင် သူသည် ထိုမီးတောက်များ၏ လောင်ကျွမ်းခြင်းကို ခံရဆဲ ဖြစ်ပေသည်။

“အဲဒီမီးတောက်တွေက ကျုပ်ရဲ့ ကျင့်စဉ်ကနေ နှစ်ပေါင်းများစွာ လေ့လာခဲ့ရင်း ထုတ်ဖော်နိုင်ခဲ့တာပါ။ ဒါပေမဲ့ အဲဒီတုန်းက စမ်းသပ်ရုံပဲ စမ်းသပ်ကြည့်ခဲ့ပြီး တစ်ခါမှတော့ မသုံးဖြစ်ခဲ့ဘူး။ အခုတော့ ဒီအပျက်အစီးနယ်မြေထဲမှာ မီးတောက်တွေကို သန့်စင်ရင်းနဲ့ ဒီမီးတောက်တွေကို နောက်တစ်ခါ သုံးကြည့်ဖို့ ကြိုးစားကြည့်ခဲ့တယ်။ အခုတော့ ကျုပ် ဒီမီးတောက်တွေကို ထိန်းချုပ် အသုံးပြုနိုင်ပြီဆိုတော့ သူတို့ကို ဖန်ကြည်ပြာမီးလျှံလို့ ခေါ်မယ်” ရီဖူရှင်းက အဖြေပေးသည်။

“အဲဒီမီးတောက်တွေမှာ အဆုံးမဲ့စွမ်းအားတွေ ရှိတယ်” သွမ့်ဝူကျီက ပြောသည်။

ရီဖူရှင်းက ဖြည်းညင်းစွာ ခေါင်းညိတ်သည်။ အမှန်တကယ်ပင် ထိုမီးတောက်များ အတွင်းတွင် အဆုံးမဲ့စွမ်းအားများ ပါဝင်နေပြီး အလွန်အစွမ်းထက်သည့် တန်ခိုးရှင်ပင်လျှင် ငြှိမ်းသတ်ရန် ခက်ခဲပေလိမ့်မည်။

သွမ့်ဝူကျီသည် ပြုံးကာ ပြောသည်။ “ကျုပ်က ခင်ဗျားကို မီးတောက်တိုက်ပွဲမှာ ရှုံးလိမ့်မယ်လို့ ဘယ်တုန်းကမှ မတွေးမိဖူးဘူး”

နတ်သက်ကြွေမီးတောက်သည် အလွန် အစွမ်းထက်လှသည်မို့ သူသည် ထိုအပေါ်တွင် အလွန်အမင်း ယုံကြည်ချက်ရှိပေသည်။

“ခင်ဗျားလည်း မီးတောက် ထိန်းချုပ်မှုမှာ တော်တော်လေး ကောင်းတယ်” ရီဖူရှင်းက ပြောသည်။ ထို့နောက် သူသည် ပြန်လှည့်ကာ သူ၏ ပုံစံအတိုင်း ပြန်ထိုင်သည်။ သူသည် အပို ပြောခြင်းမဟုတ်ဘဲ အမှန်အတိုင်း ဆိုခြင်း ဖြစ်ပေသည်။

ထိုနတ်သက်ကြွေမီးတောက်သည် သူ၏ ကိုယ်တွင်းသို့ လောင်ကျွမ်းခဲ့သည်။ ၎င်းတို့သည် အတော်လေး ကြောက်မက်ဖွယ် ကောင်းပေသည်။

သွမ့်ဝူကျီသည် ရီဖူရှင်းကို ကြည့်လိုက်ပြီးနောက် လှည့်ထွက်သွားသည်။ ကျုံးမျိုးနွယ်၏ အလင်းသည် တဖြည်းဖြည်း မှေးမှိန်သွားလေသည်။

ရီဖူရှင်းနှင့် ဝူမျိုးနွယ်မှ တန်ခိုးရှင်များ၏ အလင်းသည်သာလျှင် ဆက်လက် တောက်ပနေဆဲ ဖြစ်သည်။

တိုက်ပွဲကွင်းပြင်တွင် တန်ခိုးရှင်နှစ်ဦးသည် ပြင်းထန်သည့် တိုက်ပွဲအတွင်း ပိတ်မိနေကြသည်။ ရင်ထျန်းကျောက်သည် များပြားလှသည့် အစွမ်းထက် လမ်းစဉ် မီးတောက်များစွာ ကျင့်ကြံထားပြီး ၎င်းတို့ အားလုံးကို သူမ၏ တိုက်ခိုက်မှုစွမ်းအားများ၌ ပေါင်းစပ် အသုံးပြုနိုင်ပုံ ရလေသည်။ သူမသည် စွမ်းအားများ ပေါက်ကွဲထွက်လာသည်နှင့်အတူ သူမ၏ တိုက်ခိုက်မှုကို ထုတ်ဖော်သည်။

ရှန့်ထိုကျိုယိုး တပည့်၏ ကြာပန်းနက်ကံကြမ္မာမီးတောက် များသည် အလွန်ပင် အစွမ်းထက်လှသော်လည်း ရင်ထျန်းကျောက်နှင့် ရင်ဆိုင်ရသည့်အခါမှာတော့ အသုံးမဝင်တော့သကဲ့သို့ ထင်မှတ်ရပေသည်။

အဆုံးတွင် ရင်ထျန်းကျောက်သည် ရှန့်ထိုကျိုယိုး၏ တပည့်ကို အနိုင်ရရှိခဲ့ပြီး တိုက်ပွဲကို အဆုံးသတ်သည်။

ဝူးမျိုးနွယ်၏ အလင်းက မှေးမှိန်သွားကာ ကျူးမျိုးနွယ်ဘက်မှ အလင်းသည် ပို၍ အားကောင်းလာပေသည်။

နေမင်း၏ အလင်းများသည် ကျန်ရှိသည့် ကျူးမျိုးနွယ်နှင့် ဝူမျိုးနွယ်တို့ အပေါ်သို့ ကျဆင်းနေသည်။

၎င်းသည် တိမ်တိုက်များအတွင်း အမြင့်ထက်တွင်လည်း တောက်ပနေသည်။

လူတွေကို လက်ခံရခက်ခဲစေသည်မှာ နောက်ဆုံးကျန်ရစ်သည့် တန်ခိုးရှင်များမှာ ကျူးနှင့် ဝူမျိုးနွယ်မှ သူများ ဖြစ်နေခြင်း ဖြစ်ပေသည်။

ထိုမျိုးနွယ်နှစ်ခုမှာ အလွန်ရင်းနှီးသည့် မဟာမိတ်များ ဖြစ်ကြသည်။ ယခု အဆုံးသတ်တွင် သူတို့နှစ်ဖွဲ့သည်သာ ကျန်ရစ်ခဲ့သည်။ ထိုသည်ကို ကြည့်ရသည်မှာ နည်းနည်းလေး ထူးဆန်းနေပေသည်။

အခု သူတို့တစ်ဖက်နှင့် တစ်ဖက် တိုက်ခိုက်ကြမည်လား။

ရီဖူရှင်းသည် သူ၏ စွမ်းအားများကို သန့်စင်ရင်း အလုပ်များနေဆဲ ဖြစ်သည်။ သူသည် မျက်လုံးများကို ပိတ်ကာ ထိုင်၍ ကျင့်ကြံနေပေသည်။ သူသည် ရင်ထျန်းကျောက်၏ တိုက်ပွဲရလဒ်ကိုပင် မြင်တွေ့ပုံမရပေ။

ကျူးမျိုးနွယ်မှ တန်ခိုးရှင်၏ အကြည့်က ရီဖူရှင်းပေါ်သို့ ကျရောက်လာသည်။ “မြို့စားရီ” သူက ပြောသည်။ “ကျုပ်တို့ ပြန်ရောက်တဲ့အခါကျရင် မြို့စားရီအတွက် ကျေးဇူးတင်လက်ဆောင် ပြင်ဆင်ပေးမှာပါ။ ကျုပ်တို့ ဒီတိုက်ပွဲကို ဒီမှာတင် ရပ်လိုက်ကြရအောင်လား။”

သူသည် ရီဖူရှင်း လက်လျှော့လိုက်ရန် မျှော်လင့်နေသည်။

ရင်ထျန်းကျောက်သည် အလွန်ပင် အစွမ်းထက်လှသော်လည်း အရာရာက ကြိုတင်စီစဉ်ထားသည့်အတိုင်း မည်သည့်တိုက်ခိုက်မှုမှ မရှိဘဲ အနိုင်ရနိုင်ပေသည်။

ရီဖူရှင်းသည် ထိုနေရာတွင် ရှိနေဆဲဖြစ်ကာ သူ့ကို ပဟေဠိဖြစ်အောင် ပြုလုပ်နေသည်။

သူက မင်းသားသွမ့်ဝူကျီကို အနိုင်ယူနိုင်စွမ်း ရှိခဲ့သော်လည်း သူသည် သွေးနဂါးဘုံ ဒေသနန်းတော်တွင် ကျင့်ကြံနေသည့် အင်ပါယာဝူ၏ မင်းသမီးကို သေချာပေါက်ရှုံးလိမ့်မည်ဟု မည်သူကမှ မပြောနိုင်ပေ။

“ဒီမှာ အဆုံးသတ်မယ်လား” ရီဖူရှင်းသည် ကျူးမျိုးနွယ်မှ တန်ခိုးရှင်ကို ကြည့်သည်။ “ဝူမျိုးနွယ်ရဲ့ အကြီးအကဲက ကျုပ်ကို ယုံကြည်ပြီး ဒီတိုက်ပွဲကို တိုက်ပေးဖို့ တောင်းဆိုခဲ့တယ်။ ကျုပ်က ဒီအခြေအနေထိ ရောက်အောင် လာပြီးမှ ကျုပ်မှာ ရှိသမျှကို အကုန်ပေးပြီး ဘယ်လို လက်လျှော့နိုင်မှာလဲ။”

ကျူးမျိုးနွယ်မှ တန်ခိုးရှင်က မျက်မှောင်ကြုတ်သည်။ သူသည် ထိုအဖြေကြောင့် အနည်းငယ် စိတ်တိုသွားလေသည်။

ဝူမျိုးနွယ် တန်ခိုးရှင်က ရီဖူရှင်းကို ကြည့်လိုက်ပြီးနောက် ပြောသည်။ “နှစ်ယောက်လုံးက အစွမ်းထက်ပုဂ္ဂိုလ်တွေပဲ။ အဲဒါကြောင့် သူတို့နှစ်ယောက်ကြားက တိုက်ပွဲကို စောင့်ကြည့်တာလည်း ကောင်းပါလိမ့်မယ်။ သူတို့တိုက်ခိုက်ဖို့ကို ကျုပ်တို့က ဘာလို့ ခွင့်မပြုရမှာလဲ”

ကျူးမျိုးနွယ် တန်ခိုးရှင်က မျက်မှောင်ကြုတ်သည်။ ဝူမျိုးနွယ်မှ ဤလူသည် သူ့ကိုယ်ပိုင် အကြံအစည် ရှိနေပုံ ရလေသည်။

ရီဖူရှင်း၏ သန်မာလှသော ခွန်အားကြောင့် သူ့ကို ယုံကြည်ချက်တွေ ဖြစ်စေပြီး သူ့စိတ်ထဲမှာ အောင်နိုင်သူ ဖြစ်လိုသည့် စိတ်များ မွေးဖွားလာခဲ့သည်လား။

“မင်း ဘာတွေတွေးနေတာလဲ၊ ဝူယုံး” ကျူးမျိုးနွယ် တန်ခိုးရှင်က အေးစက်စက် မေးသည်။ ကျူးမျိုးနွယ်မှ အခြားသော တန်ခိုးရှင်များသည်လည်း သူတို့၏ အကြည့်များကို ဝူမျိုးနွယ်ထံသို့ ပို့လွှတ်သည်။ သူတို့၏ မျက်လုံးများထဲတွင် အေးစက်မှုများ ရောင်ပြန်ဟပ်နေသည်။

သူတို့တွေက သီးသန့်ရပ်တည်ရန် ကြိုးစားနေသည်လား။

ဘုန်း …

ထိုအချိန်၌ ရိုင်းစိုင်းပြင်းထန်သည့် မီးတောက်အရှိန်အဝါများ ထွက်ပေါ် လွှမ်းခြုံလာသည်။

ရီဖူရှင်းသည် ကျူးမျိုးနွယ် တန်ခိုးရှင်များကို လျစ်လျူရှုသည်။ သူသည် စွမ်းအားများကို တိုက်ရိုက်ထုတ်ဖော်လိုက်ကာ ရင်ထျန်းကျောက်ထံသို့ လျင်မြန်လှသည့် အရှိန်ဖြင့် ပြေးဝင်သွားသည်။

သူသည် တိုက်ခိုက်ရန် ပြင်ဆင်သည်။

ကျူးမျိုးနွယ် တန်ခိုးရှင်များ၏ သွေးထိုးခဲ့မှုများအတွက် သူက မည်သို့များ သူတို့ကို နာခံနိုင်ပါမည်နည်း။

သူက ဘာကြောင့် ဤနေရာအထိ ရောက်လာခဲ့ရသနည်း။

ခြေတစ်လှမ်းအလို ရောက်ကာမှ သူက လက်လျှော့လိမ့်မည်လား။

“ကျေးဇူးပြုပြီး သင်ကြားပေးပါဦး”

ကြမ်းတမ်းရိုင်းစိုင်းသည့် မီးတောက်များသည် လှည့်ပတ်နေကာ ရင်ထျန်းကျောက်ဆီသို့ ဦးတည်သွား၍ မဟာလမ်းစဉ်၏ မီးပြင်းဖိုသည် အရာအားလုံးကို လောင်ကျွမ်းပစ်လေသည်။ ရင်ထျန်းကျောက်သည် ၎င်းကို စိတ်ရှည်ရှည်နှင့် စောင့်ကာ ရီဖူရှင်းကို စိုက်ကြည့်နေသည်။

လျှပ်တစ်ပြက်အတွင်းတွင် သူမထံမှ မြည်သံတစ်ခု ထွက်ပေါ်လာပြီး နေမင်းကဲ့သို့ တောက်ပသည့် မီးတောက်မီးလျှံများ ထွက်ပေါ်လာသည်။ သူမ ထုတ်လွှတ်လိုက်သည့် ရောင်စဉ်များမှာ ကြောက်မက်ဖွယ် ကောင်းလှသည်။

ဘုန်း …

သူမ၏ ကြမ်းကြုတ်ရက်စက်သည့် အရှိန်အဝါကို တိမ်တိုက်များဆီသို့ ထုတ်လွှတ်သည်။ သူမကို ကြည့်ရသည်မှာ စစ်နတ်ဘုရားမနှင့် အလားသဏ္ဌာန် တူပေသည်။ နတ်ဘုရားအလင်းများသည် ကောင်းကင်အတွင်းသို့ ရိုက်ခတ်သွားခဲ့ပြီး သူမ၏ အကြည့်များသည် တဟုန်ထိုးလာနေသည့် ရီဖူရှင်း၏ ပုံရိပ်ကို ကြည့်နေသည်။

မဟာလမ်းစဉ်နှင့် ပေါင်းစပ်ထားသော စွမ်းအားများ ကျဆင်းလာသည်။ ၎င်းသည် သူမ၏ နေရာကို ခဲသွားစေရန် လုပ်ဆောင်မည့် လေဟာနယ်စွမ်းအား ဖြစ်သည်။

သို့သော်လည်း ရင်ထျန်းကျောက်သည် နောက်သို့ ပြန်ဆုတ်ရန် မစဉ်းစားဘဲ ရှေ့သို့ ဆက်လက် လှမ်းသည်။ သူမသည် ရီဖူရှင်း၏ ကိုယ်အပေါ်သို့ နင်းလျှောက်မည့်ပုံပေါ်သည်။ ကြီးမားသည့် လက်ဝါးရိပ်ကြီးသည် သူမ၏ ရှေ့တွင် ပေါ်ပေါက်လာပြီး သူ့ဆီသို့ ရိုက်ခတ်သည်။

တိုက်ပွဲမှာ တစ်ခဏအတွင်း စတင်ဖြစ်ပွားခဲ့ပြီ ဖြစ်၏။

ကျူးမျိုးနွယ်တန်ခိုးရှင်၏ မျက်နှာမှာ ဒေါသခိုးများ ဝေနေ၏။ သူသည် ရီဖူရှင်းကို ရက်စက်သော အကြည့်များဖြင့် ကြည့်လိုက်သော်လည်း မကြာခင်တွင် တိုက်ပွဲတစ်ခုလုံးကို စောင့်ကြည့်သည်။

ဤတိုက်ပွဲသည် အလွန်အရေးကြီးလှပေသည်။

ဝူကလန်က ရီဖူရှင်းကို ဖိတ်ခေါ်စေခြင်းမှာ အမှန်တကယ်တွင် သူတို့၏ အကြံအစည် ဖြစ်သည်။ ဝူမျိုးနွယ်က ရီဖူရှင်း၏ ခွန်အားကို မြင်သောအခါ သူနှင့်အတူ စွန့်စားရန် ဆုံးဖြတ်လိုက်ကြသည်။

သူ သေချာစောင့်ကြည့်ရလိမ့်မည်။ ရီဖူရှင်းသာ ရင်ထျန်းကျောက် လက်ချက်ဖြင့် ရှုံးနိမ့်ခဲ့လျှင် ဝူမျိုးနွယ်တန်ခိုးရှင်များက သူနှင့် မည်ကဲ့သို့ ရင်ဆိုင်မည်နည်း။

အကယ်၍ သူသာ နိုင်သွားခဲ့လျှင်ပင် ဝူမျိုးနွယ်တန်ခိုးရှင်များက ကျူးမျိုးနွယ် တန်ခိုးရှင်များ၏ အရာအားလုံးကို ယူဆောင်သွားနိုင်လိမ့်မည်လား။

***

အပိုင်း(၁၂၄၉)

Comment

Leave a Reply Cancel reply

Options