Switch Mode

အခန်း (၂၃၂)

ကျန်းသခင်လေးလွင့်ထွက်သွားပြီ

“ဟလခွမ်း”

စုရှောင်ရှန် တုန်လှုပ်သွား၏။

ဤနေရာက ချုယွင်ကွင်းပြင်ကလို အကာအကွယ်ဖြင့်ဖုန်းအုပ်ထားခြင်းမပြုသဖြင့် ပွဲကြည့်သူထံမှ ပင်ကိုယ်မှတ်များကို စုရှောင်ရှန် ရယူနိင်သေးသည်။ ရလဒ်အနေဖြင့် ကျန်းမျိုးနွယ်စု၏ သွေးမျိုးဆက်စွမ်းအင်အကြောင်းကို သိလိုက်ရပါသည်။

လူတိုင်း၏ အံ့အားသင့်နေသော မျက်၀န်းများအောက်၌ ကျန်းရှင်းရှုံကို ရင်ဆိုင်နေသော စုရှောင်ရှန်က ကြောက်လန့်၍ နောက်မဆုတ်သွားဘဲ ရှေ့ကို တက်သွားလိုက်သည်။

ယောက်ျားအစစ်တွေက ဘယ်တော့မှ နောက်မဆုတ်ဘူး။

လက်သီးနှစ်ခုဆုံကြသောအခါ မီးတောက်မီးလျှံများတောင်ထွက်လာပြီး ပတ်၀န်းကျင်ရှိ လေဟာနယ်ကိုတောင် တုန်ခါသွားစေခဲ့သည်။

‌စက္ကန့်ပိုင်းအတွင်း တည်ငြိမ်နေခဲ့သော ကွင်းပြင်ကြီးက ဝီသံညံလာ၏။

ထိုလက်သီးနှစ်ချက်ဆုံသောနေရာရှိ လေဟာနယ်၌ ဖြစ်ပေါ်လာသော လှိုင်းများက ပေါက်ကွဲ‌ထွက်‌တော့သည့် ဗုံ့းတစ်လုံးအလား အဝိုင်းသဏ္ဌာန်တွန့်လိမ်သွားသည်။

ထို့နောက်မှ ပေါက်ကွဲသံကြီးနှင့်တူ သူတို့နှစ်ယောက်အောက်ရှိ မြေပြင်က အက်ကွဲလာခဲ့တော့၏။ အဝိုင်းသဏ္ဌာန်ကွေးလိမ်နေသော လှိုင်းများလည်း ပေါက်ကွဲထွက်သွားကာ ကွင်းနံဘေးရှိ လူတိုင်းကို အနောက်လွင့်သွားစေပေလိုက်သည်။

လေထဲမှာရှိသော ကျိုးထျန်းရှန်က ထိုလှိုင်းများနောက်က ဦးစွာ ပါသွားသည့်သူဖြစ်သည်။ မနည်းကိုယ်ကို တည်ငြိမ်အောင်ပြန်ထိန်းနိုင်လိုက်ပြီးနောက်မှာ အောက်ကွင်းပြင်ကို အလန့်တကြားကြည့်လိုက်၏။

ထိုမှ ယှဉ်ပြိုင်ထိုးသတ်နေကြသော သူနှစ်ဦးက လူပြန်ခွဲလိုက်ကြပြီဆိုပေမယ့် အခြေအနေက သူထင်ထားသည်နှင့် ကွဲပြားနေခဲ့သည်။

စုရှောင်ရှန်က နောက်သို့ ခြေလှမ်းအနည်းငယ်ဆုတ်လိုက်ပေမယ့် ကျန်းရှင်းရှုံက မီတာ အတော်များများ‌ နောက်ပြန်လွင့်ထွက်သွား၏။

“ဘာလဲဟ” ကျိုးထျန်းရှန်သူ့မျက်လုံးများ မှားနေသလားတောင် ပွတ်ကြည့်လိုက်ရသည်။

သူတစ်ယောက်တည်းထိုသို့အတွေး၀င်လာခြင်းမဟုတ်ပေ။ ထိုလက်သီးထိုးချက်နှစ်ခု တိုက်ခိုက်ချက်မှ ရလဒ်ကြောင့် ပွဲကြည့်သူများလည်း အံ့ဩဘနန်းဖြစ်သွားကြသည်။

“ဘာလဲဟ။ ကျန်းသခင်လေးက ‌အနောက်ကို လွင့်ထွက်သွားတယ်တဲ့”

“အေးဆို။ စုရှောင်ရှန် သူ့စစ်မှန်ခြင်းနယ်ပယ် ခန္ဓာကိုယ်ကို ဘယ်လောက်တောင် ကျင့်ထားသလဲမသိဘူး။ ကျန်းသခင်လေးလိုလူတစ်ယောက်ကိုတောင် လွင့်ထွက်သွားအောင်ထိုးနိုင်တယ်”

“ဟေ့ကောင်တွေကြည့်ကြဦး၊ ကျန်းသခင်လေးရဲ့ လက်က သွေးထွက်နေတယ်ကွ”

ထိုအရာကိုကြားလို့ သူပြောတဲ့အတိုင်းကြည့်လိုက်ရာမှာ မြေပြင်ကိုတရွတ်တိုက်ပြီး လွင့်ထွက်သွားတာကြောင့် အက်ကြောင်းကြီးနှစ်ခုထားခဲ့သော ကျန်းရှင်းရှုံကိုတွေ့ရသည်။ စုရှောင်ရှန်နှင့် လက်သီးခြင်းယှဉ်ထိုးတဲ့ သူ့လက်က သွေးထွက်နေရုံပင်မဟုတ်ဘဲ အရိုးအဆစ်တောင်လွဲသွားခဲ့သည်။

သွေးထွက်နေတာက လက်သီးထိုးချက်မှ တွန့်လိမ် ကောက်ကွေးကာ ကျိုးသွားသော လက်ချောင်းများက ဖြစ်၏။

ဟူးးးးးး…။

လူတိုင်း ချမ်းစိမ့်စိမ့်ခံစားလိုက်ရပြီး ထပ်မံတိုက်ခိုက်ဖို့ စိတ်လှုပ်ရှားနေဟန်ရသော စုရှောင်ရှန်ကို တအံ့တအားကြည့်လိုက်ပေသည်။

ပွဲကြည့်သူတိုင်း၏ အာရုံများ သူ့စီကိုရောက်လာတာကိုတွေ့သောအခါ စုရှောင်ရှန် အလျင်အမြန် မျက်နှာသေဖြစ်အောင်တည်လိုက်သည်။ ပြီးနောက် ကျန်းရှင်းရှုံကို လက်မထောင်ပြကာ လက်ကို လှုပ်ရမ်းလိုက်၏။

“ကျန်းရှင်းရှုံ။ မဆိုးဘူးတော်တယ်”

စုရှောင်ရှန်၏ ရန်စသလိုလို ဘာလိုလို အပြုအမူကြောင့် လူအုပ်ကြီး ပို၍ ကျေနပ်အားရလာကြပေသည်။ ထိုတိုက်ခိုက်မှုမှ ရလဒ်အရ စုရှောင်ရှန်က ကျန်းရှင်းရှုံကိုတိုက်ခိုက်ရဲတာ ဝှက်ဖဲရှိလို့ကိုးဟု သဘောပေါက်သွားကြသည်။

ကျန်းရှင်းရှုံ၏ မျက်နှာထက်၌လည်း အကျဉ်းတန်သော အမူအရာတစ်ခုရှိနေခဲ့၏။

“အရှင်သခင်နယ်ပယ်ခန္ဓာကိုယ်”

သူမယုံချင်ပေမယ့်လည်း စောနက ထိုးချက်က စစ်မှန်ခြင်းနယ်ပယ်ခန္ဓာကိုယ်၏ အကန့်အသတ်ကိုကျော်လွန်နေတာ ငြင်းမရပေ။ စုရှောင်ရှန်၏ လက်သီးချက်ကလည်း တွန်းကန်အားလိုလို ဘာလိုလိုနှင့် ထူဆန်းတဲ့ သက်ရောက်မှုတစ်ခုရှိသေးပေသည်။

၎င်းက အနည်းဆုံးတော့ အရှင်သခင်နယ်ပယ်ဖြစ်နိုင်လောက်သည့် အစွမ်းထက်သော နည်းစနစ်တစ်ခုဖြစ်ရမည်။

“စုရှောင်ရှန်” ကျန်းရှင်းရှုံ မျက်လုံးများကိုမှေးပြီးရေရွတ်လိုက်သည်။ ထိုတိုက်ခိုက်မှုဖလှယ်မှုမှာ သူအရေးနိမ့်သွားပေသည်။

သူ့လိုလူကိုတောင် ရုပ်ပိုင်းဆိုင်ရာခွန်အားဖြင့်တိုက်ခိုက်နိုင်တာ သူက သာမန် အပြင်စည်းဂိုဏ်းသားတော့မဟုတ်ချေ။ သိုးအရေခြုံထားတဲ့ ဝံပုလွေတစ်ကောင်ဖြစ်၏။

“မင်းက ကျားသားစားချင်လို့ ၀က်ယောင်ဆောင်နေတာပဲကွ။ စိတ်ဝိညာဉ်နန်းတော်ထဲက ဘယ်သူမှ မင်းကို သတိမထားမိတာ မဆန်းပါဘူး” ကျန်းရှင်းရှုံ မှုန်သေသေကြည့်ကာ စကားပြောရင်းက ထလာခဲ့သည်။

စုရှောင်ရှန်က ခေါင်းခါရမ်းလိုက်ပြီးတော့ လေးနက်သောအမူအရာဖြင့် “မဟုတ်ဘူး။ မင်းမှားနေပြီ။ ပထမဆုံးအနေနဲ့ စိတ်ဝိညာဉ်နန်းတော်ထဲမှာ ပါရမီရှင်ဆိုတာဘာလဲ တစ်ချက်ကြည့်တာနဲ့ သိတဲ့လူတွေရှိတယ်။ မင်းကသာ ရေတွင်းအောက်က ဖားငယ်လေးဖြစ်နေတာ။ ဒုတိယအနေနဲ့ မင်းလို ကျားယောင်ဆောင်ထားတဲ့ ကြောင်ကို ငါက ၀က်ယောင်ဆောင်ပြီး စားမနေဘူး”

စုရှောင်ရှန်၏ ကဲ့ရဲ့သော စကားလုံးများကြောင့် လူတိုင်း ထရပ်လိုက်ကြပြီး အချို့ဆို ဒါသူတို့သိတဲ့ စုရှောင်ရှန်များလားတောင် မျက်လုံးများကို ပွတ်ပြီး ကြည့်ယူနေရသည်။ မဟုတ်မှလွဲရော ဒါက စုရှောင်ရှန်ရဲ့ စိတ်နေသဘောထားအစစ်အမှန်များလား။

ဟ မဖြစ်နိုင်လောက်ပါဘူး။

သူ့လျှာက ဘာလို့ သွေးထွက်စေလောက်အောင် ထက်နေတာလဲ။ ကျန်းရှင်းရှုံကိုတောင် ကဲ့ရဲ့‌နေတာလွန်ရော။ ဆေးများမှားစားထားမိသလားမသိ။

“ကောင်းပြီလေ”

၎င်းတို့က စုရှောင်ရှန်တမင်သူ့ကို ဒေါသထွက်လာအောင်ပြောနေသည့်စကားများဆိုတာသိပေမယ့် သူ၏ မာနကြောင့် ဒေါသထွက်လာရသည်။

သူ့ကိုယ်ကိုကိုင်းညွတ်လိုက်သောအခါ ဧရာမ ၀က်ဝံပုံရိပ်ကြီးက သူ့ကိုယ်နှင့် ပေါင်းစပ်သွားခဲ့၏။ ထို့နောက် ကျန်းရှင်းရှုံ၏ ကြွက်သားများ ပို၍ကြီးထွားကျယ်ပြန့်လာကာ အရပ်လည်း ရှည်ထွက်လာခဲ့သည်။

“ကျန်းမျိုးနွယ်စု သွေးမျိုးဆက်စွမ်းအင်၊ အသက်၀င်စမ်း”

ကျန်းရှင်းရှုံက တိုက်ခိုက်မှုတစ်ခုအပြီးနောက်မှာ သွေးမျိုးဆက်စွမ်းအင်ကို နိုးထလာအောင်‌လုပ်နေသောကြောင့် လူတိုင်း ဘာပြောရမှန်းမသိဖြစ်သွားကြ၏။ ၎င်းက စုရှောင်ရှန် ဘယ်လောက် ကြောက်မက်ဖွယ်ရာကောင်းသလဲဆိုတာကို ဖော်ပြသည်။

သူတို့ စုရှောင်ရှန်၏ လှည့်စားမှုအောက်မှာ ရောက်နေခဲ့တာလား။

တကယ်ကို စာအုပ်ကိုအဖုံးကြည့်၍ ဆုံးဖြတ်လို့မရဘူးဆိုတာမှန်၏။ စုရှောင်ရှန်၏ ပေါတောတော ပြုမူပုံများကြောင့် သူ့ခွန်းအားကို အမြဲတမ်းမေ့လျော့နေခဲ့ပါသည်။

ယခုလည်း ကျန်းရှင်းရှုံကို စုရှောင်ရှန် လက်သီးတစ်ချက်တည်းဖြင့် ထိုးပြီးသွားနောက်မှာတောင် သွေးမျိုးဆက်စွမ်းအင်ကို မနိုးထသင့်လို့ခံစားနေရ၏။ စုရှောင်ရှန်က တကယ်ကို လူတွေရဲ့ စိတ်ကို ထိန်းချုပ်တဲ့နေရာမှာ တော်လို့များလား။

ပြိုင်ကွင်းပေါ်မှ လူနှစ်ယောက်ကတော့ ထိုသို့ အတွေးမျိုးရှိမနေပါဘဲ တစ်ဦးကိုတစ်ဦး အသေသတ်ရန်သာ အားခဲထားကြသည်။

ကျန်းရှင်းရှုံ၏ ခန္ဓာကိုယ်က ပြောင်းလဲမှုများကြောင့် စုရှောင်ရှန် အခြေအနေမဟန်တော့တာကို သိလိုက်ရပေသည်။

သူ့ကိုယ်က စိတ်ဝိညာဉ်အနှစ်များကို စုစည်းလိုက်ပြီး ချက်ခြင်း ဖြန့်ထုတ်လိုက်လေသည်။

“ငရဲမီးတောက်ကောင်းကင်”

အကြီးအကဲစန်းလိုတော့ ကောင်းကင်ကို မီးလောင်တိုက်သွင်းပြီး ပင်လယ်ပြင်ကို ဆူမပွက်စေနိုင်ပါချေ။ ဒါပေမယ့် သေခြင်းရှင်ခြင်းကွင်းပြင်ပေါ်က နောက်ဆက်တွဲဖြစ်ရပ်များကတော့ ‌ဩချလောက်စရာကောင်းပေသေးသည်။ အင်မတန်ပူပြင်းလှသော အပူချိန်အောက်မှာ ကျောက်တုံးများပွလာသဖြင့် ကြမ်းပြင်တစ်လျှောက်လုံးမှာ အက်ကြောင်းများထလာခဲ့သည်။

ရှဲရှဲ…။

ကျန်းရှင်းရှုံ ပုံစံပြောင်းပြီးတာနဲ့ စူးအောင့်အောင့် နာကျင်မှုကြီးကို ခန္ဓာကိုယ်တစ်လျှောက်မှာ ခံစားလိုက်ရ၏။ အသားကင်ထားခံရသလို အနံ့များလည်း သူ့နှားခေါင်းထဲကို ဆက်တိုက်၀င်ရောက်လာနေခဲ့သည်။

သူ့စိတ်ဝိညာဉ်အနှစ်များ အသုံးပြုလိုက်ရာ စိတ်ဝိညာဉ်အနှစ်များပါ လောင်ကျွမ်းခံလိုက်ရသည်။

“လခွမ်း ဒါဘာလဲဟ။ ငါတို့ ကျန်းမျိုးနွယ်စုရဲ့ သွေးမျိုးဆက်စွမ်းအင်တောင် မခံနိုင်ဘူးတဲ့”

ကျန်းရှင်းရှုံ၏ အမြင်လည်း ဘယ်ကိုကြည့်ကြည့် ဝေဝါးနေပေသည်။ ထို့နောက် စုရှောင်ရှန်ရှိရာဘက်ကို လှည့်ပြီး တုန့်ဆိုင်းခြင်းမရှိ ပြေး၀င်တော့၏။

ရွှစ်…။

သူ့အလျင်က အင်မတန်မြန်ဆန်လှသောကြောင့် နောက်တွင်တောင် ပုံရိပ်ယောင်များကျန်ခဲ့ပေသည်။

လူတိုင်း အခြေအနေကို မသုံးသပ်နိုင်သေးခင်မှာပင် စုရှောင်ရှန်၏ အထက်၌ သူပေါ်လာသည်။

“ဒီလောက်အမြန်နှုန်းကြီးကြ…”

ထိုလျင်မြန်မှုက စစ်မှန်ခြင်းနယ်ပယ်ကို ကျော်လွန်ပြီး အနည်းဆုံးတော့ အရှင်သခင်နယ်ပယ်မှာရှိသည်။

ကျန်းရှင်းရှုံ၏ လှုပ်ရှားမှုနောက်ကို သူတို့မလိုက်နိုင်ပေမယ့် စုရှောင်ရှန်ကတော့ ရှင်းရှင်းလင်းလင်းကြီးကို မြင်ရသည်။

သူ့အထက်ကိုရောက်လာ‌သောဧရာမ လူထွားကြီးကြောင့် ယွမ်တုကိုတောင် သူသတိရသွားခဲ့၏။ စုရှောင်ရှန် နောက်သို့ဆုတ်မသွားပါဘဲ သူလည်း လက်သီးချီမြှောက်ပြီး ထိပ်တိုက်ရင်ဆိုင်လိုက်သည်။

စုရှောင်ရှန် ဘာလုပ်ချင်နေသလဲဆိုတာ တွေ့သောအခါ ကျန်းရှင်းရှုံ နှာခေါင်းရှုံ့လိုက်၏။ သူကလည်း ခန္ဓာကိုယ်ချင်းတိုက်ခိုက်မှုကိုလိုချင်နေတာဖြစ်သည်။

ကျန်းမျိုးနွယ်စု၏ သွေးမျိုးဆက်ခန္ဓာကိုယ်က စုရှောင်ရှန်ထက် နိမ့်ကျမတဲ့လား။

လက်သီးနှစ်ချက် တဖန်ပြန်‌ဆုံသည်။ ထိုခိုက်မှုမှာ ကျန်းရှင်းရှုံ၏ လက်သီးကို ရစ်ပတ်ထားသော စိတ်ဝိညာဉ်အနှစ်များပွင့်ထွက်သွားခဲ့ပြီး အနက်ရောင် ခက်ထန်သော စွမ်းအင်တစ်ခုကို ထုတ်လိုက်သည်။

ထိုစွမ်းအင်က အနက်ရောင်မြွေတစ်ကောင်လို လက်ကိုရစ်ပတ်နေသည်။ ၎င်းမှ မတည်ငြိမ်‌သော အဖျက်စွမ်းအားက စုရှောင်ရှန်၏ မီးတောက်အစေ့နှင့် အမျိုးအမည်မတူပေမယ့် စွမ်းအားတော့တူလောက်သည်။

အရှင်သခင်နယ်ပယ် နည်းစနစ်။

“ကောင်းကင် အမှောင်ဖုံး ပေါက်ကွဲခြင်း”

“အရည်မရ အဖက်မရတွေ မအော်နဲ့ အော်လိုက်လို့ အစွမ်းပိုထက်မလားဘူး” စုရှောင်ရှန် ထိတ်ထိတ်ပျာပျာမဖြစ်သွားဘဲ ပင့်သက်ကိုရှိုက်လိုက်သောအခါ ထိုစွမ်းအင်များလွင့်ပြယ်သွားခဲ့၏။

ကျန်းရှင်းရှုံ ကြောင်အသွားသည်။ ဒါ ဘာစုန်းအတတ်လဲ။

သူကြက်သေသေနေလို့မပြီးသေးခင် သူ့ကိုယ်ပေါ်မှာ ထူးဆန်းတဲ့ စိတ်ဝိညာဉ်စွမ်းအင်ကို ခံစားမိလိုက်တာကြောင့် အလျင်အမြန် ပြေးဖိနှိပ်သည်။ ထိုစဉ်မှာ စုရှောင်ရှန်က သူ့ကို အငိုက်ဖမ်းထိုးလိုက်၏။

ဘုန်း…။

အရှင်သခင်နယ်ပယ် ခန္ဓာကိုယ်ရဲ့ ခွန်အားအပြည့်က ထိုလက်သီးချက်နောက်၌ ပါပေသည်။ စုရှောင်ရှန်၏ ကြော့ကွင်း‌မှအားကြောင့်တောင် ကြမ်းပြင်က အက်ကွဲထွက်သွားခဲ့ပေသည်။

ဝေ့ဝိုက်နေသော စွမ်းပင်တစ်ခုက ကောင်းကင်ပေါ်သို့ထိုးတက်သွားပြီး ကျန်းရှင်းရှုံကို တစ်ပါးတည်းခေါ်သွားသည်။ ထိုမှ ပြန်ကျလာပြီး တစ်အောင့်သာမကြာသေးချေ စုရှောင်ရှန်က ထပ်မံ ထိုးပစ်လိုက်လို့ လေထဲပြန်တက်သွားခဲ့၏။

“ဝေါ့”

ကျန်းရှင်းရှုံသွေးများအန်ထုတ်လိုက်ပြီး အရိုးကျိုးသံများကိုတောင် ကြားနေနိုင်ပေသည်။ ထိုမြင်ကွင်းနှင့် အသံတို့က လူအုပ်ကြီးကို နေရာမှ တစ်စက်မှ မရွေ့နိုင်အောင် မှင်တက်သွားစေပေ၏။

ဘာလို့ ကျန်းရှင်းရှုံက ထပ်ပြီးတော့ လွင့်ထွက်သွားရတာလဲ။

ကျောက်ကျစ်တုံ့လည်း အိပ်မက်ယောင်နေသလား ဝေခွဲရမဖြစ်နေသည်။ ဒီတိုက်ပွဲ အဆုံးမှာ စုရှောင်ရှန်ကို ကာကွယ်ဖို့ သူကြံထားပေသည်။ ဤသို့ ဖြစ်လာမည်ဟု စိတ်ကူးတောင်မယဉ်ကြည့်ဖူးပေ။ အစကနေအဆုံး ကျန်းရှင်းရှုံသာ လှိမ့်ခံနေရတော့၏။

ဘာလဲကွာ။

ဖျက်။

ကျောက်ကျစ်တုံ့၏ အတွေးများ ပြီးစီးမပြီးမြောက်ခင်မှာ စုရှောင်ရှန် လူအုပ်ကြီးဘက် လှည့်ပြီး လက်ဖျစ်တီးပြတာ တွေ့လိုက်ရသည်။

: [သံသယ အ၀င်ခံရပါသည်။ ပင်ကိုယ်မှတ် +၇၈]

သူတို့တွေ့လိုက်ရတဲ့အရာကြောင့် လူအုပ်ကြီးလည်း ဘာမှ မတုန့်ပြန်နိုင်သေးခင်မှာ လေထဲကို လွင့်ပျံနေသော ‌ကျန်းရှင်းရှုံ အပြင်းအထန်တုန်ခါလာတာကိုတွေ့ရသည်။ ရုတ်တရက်ကြီး သူ့ခန္ဓာကိုယ်တစ်ခုလုံးက တောင့်တင်းသွားသလို ဆန့်ဆန့်ကြီးဖြစ်သွားပေသည်။

ထို့နောက် ပေါက်ကွဲသံများကိုဆက်တိုက်ကြားရတော့၏။

ဘုန်း ဘုန်း ဘုန်း ဘုန်း ဘုန်း…

Comment

Leave a Reply

Options

not work with dark mode
Reset