Switch Mode

အခန်း (၁၆၃)

မိစ္ဆာသားရဲ

“နင်၀င်မပါနဲ့”

စုရှောင်ရှန် မုကျစ်ရှီ၏ ပါးနှစ်ဖက်ကို ‌စကားမပြောနိုင်အောင် ညှစ်ထားလိုက်သည်။ မုကျစ်ရှီကိုက်ချက်က တကယ် အရင်ဘ၀က ခွေးထက်ဆိုးသည်။ သူသာ စိတ်ဝိညာဉ်အသက်တံဆိပ်ပြားကို ပစ်လိုက်မယ်ဆိုရင် တုန့်ဆိုင်းခြင်းမရှိ မုကျစ်ရှီ လိုက်ဖမ်းလောက်၏။

ပြီးနောက် တံဆိပ်ပြား သူ့ကို ပြန်လာပေးမလားဆိုတာတော့ မပြောနိုင်ပေ။

စုရှောင်ရှန်ကို စူးစူးရှရှစိုက်ကြည့်ပြီး မုကျစ်ရှီ ငြိမ်ကျသွားသည်။

သူမလည်း မတုံးအ‌လေရာ စုရှောင်ရှန်၏ စကားမှ ထူးခြားချက်များကို နားလည်သည်။ ထိုမှ မိုမိုနှင့် တိုက်ပွဲကို ပြန်ချိတ်ဆက်ကြည့်ရာ ဖြစ်ပျက်သွားသည်များကို ပြန်အမှတ်ရ‌လာလေသည်။

စုရှောင်ရှန်အခုပြောနေသည့် မိုမိုရဲ့ လျှို့ဝှက်ချက်က သူမ သတိမေ့သွားရသည်နှင့် တစ်ခုခု ပတ်သက်နေလောက်သည်။

သူတို့နှစ်ဦး ငြင်းခုန်နေကြတာရပ်ပြီး မိုမို့ကိုပြိုင်တူကြည့်လိုက်ကြသည်။ သို့ဖြင့် စုရှောင်ရှန်တို့နှစ်ဦးရဲ့ အကြည့်များကို မခံနိုင်တော့သဖြင့် မုကျစ်ရှီ လက်မြှောက်အရှုံးပေးလိုက်ရ၏။

ထို့နောက် ပြောရမည်များကို အစီအစဉ်ပြုလိုက်ပြီးနောက် “အဲ့ဒီအရာက ငါ့ညာလက်ထဲမှာ အမြဲရှိနေခဲ့တာ သူဘယ်သူမှတောင် မရိပ်မိတာ နင်က သိနေတယ်”

သူမ၏ ညာလက်ကို မိုမို ကိုင်လိုက်ရာ ထိုအရာက အထဲ၌ ရှိနေသေးကြောင်းကို ခံစားလိုက်ရ၏။ ကံကောင်းစွာဖြင့် ထိုအရာက အိပ်မောကျနေပုံရသည်။

သို့သော် မိုမို ထိုအရာရဲ့ အကြောင်းကို များများစားစားမပြောရဲ‌ပါချေ။

စုရှောင်ရှန်လည်း ထပ်‌ပြီး ဒီအတိုင်းမေးနေရင် ဖိအားပေးသလိုဖြစ်နေမှာကြောင့်ရပ်လိုက်သည်။ လျှို့ဝှက်ချက်တစ်ခုကို ဖော်ထုတ်စေဖို့ဆိုတာ လျောက်ပတ်တဲ့ လမ်းညွှန်မှုမျိုးလိုတယ်မဟုတ်ပါလား။

“အဲ့အရာဟုတ်လာ” လိမ္မာပါးနပ်စွာဖြင့် မိုမို့စကားကို စုရှောင်ရှန် ပြန်ပြောလိုက်သည်။

“ဟုတ်တယ်” မိုမို ဆက်လက်၍ ပြောပြမည့်ဟန်ရသည်။ သူမ၏ မျက်၀န်းများက အတိတ်ကိုပြန်မြင်ယောင်သကဲ့သို့ ငူငူကြီးဖြစ်သွားပြီး “ဒီနေ့ထိ အဲ့အရာရဲ့ သရုပ်မှန်က ဘာလဲဆိုတာ မသိရသေးဘူး။ ဒါပေမယ့် ငါ့ပင်ကိုယ်ဓာတ်စွမ်းအင်က အဲ့အရာကြောင့် နိုးထလာတယ်ဆိုတာတော့သိတယ်”

ထိုစကားကြောင့် စုရှောင်ရှန် မှင်တက်သွားသည်။

တစ်စုံတစ်ခုက ပင်ကိုယ်ဓာတ်စွမ်းအင်ကို ဒီလို တိကျတဲ့ လမ်းကြောင်းအတိုင်း နိုးထစေနိုင်တယ်လား။ အဲ့လိုလုပ်ဖို့ ဘယ်လောက်တောင် စွမ်းအားကြီးဖို့ လိုအပ်လိုက်မလဲ။

အကြီးအကဲစန်းလို လူတောင် စတင်ခြင်းနယ်ပယ်တုန်းက သူ့ကို ပင်ကိုယ်မီးဓာတ်စွမ်းအင် ရရှိစေနိုင်ဖို့ အခွင့်အရေးပေးရုံလောက်သာတတ်နိုင်ခဲ့သည်။ ဒါတောင် စစ်မှန်ခြင်းနယ်ပယ်ရောက်မှ မီးဓာတ်စွမ်းအင်က လုံးလုံးလျားလျား နိုးထလာခဲ့၏။

“ချိတ်ပိတ်ခြင်းဓာတ်စွမ်းအင်ရှိတဲ့ လူတွေက သမိုင်းမှာတောင် လူသိနည်းကြတာ။ နင် မဟာဧကရာဇ်ဖုန်းထျန်နဲ့ ဘာပတ်သက်လဲ” မိုမို့ကို စုရှောင်ရှန် ထပ်၍ တွန်းအားမပေးနိုင်ခင်မှာ မုကျစ်ရှီ ကြားဖြတ်ပြောလိုက်သည်။

“မဟာဧကရာဇ် ဖုန်းထျန်ဟုတ်လား။ ငါမသိဘူး” မိုမို့မျက်၀န်းများက နားမလည်နိုင်မှုတို့ဖြင့် ပြည့်နေ၏။

“နင်လိမ်နေတာပဲ” မုကျစ်ရှီ ဆိုသည်။

‘ဒီကောင်မလေး ဘာတွေ ပြောနေတာလဲဟ။ စစ်ဆေးမေးမြန်းပါတယ်ဆို ဘယ်သူက ဒီလိုကြီး ခက်ခက်ထန်ထန် ဆိုလို့တုန်း။ ပြီးတော့ ဘယ်သူက ဒီလို မေးခွန်းမျိုးမေးမှာလဲ။ အေးဆေးလုပ်စမ်းပါဟ’ စုရှောင်ရှန် သူ့ဘေးနားက မာန်မဲနေသော မုကျစ်ရှီကို မျက်တောင်ပုတ်ခတ်ပြလိုက်သည်။

“စုရှောင်ရှန် နင်ငါ့ကို ဘယ်လိုကြည့်နေတာလဲ” မုကျစ်ရှီက စုရှောင်ရှန်ကို ပြန်၍ ဘုကြည့်ကြည့်လိုက်သည်။

စုရှောင်ရှန်စွံ့အသွား၏။

‘အချက်ပြနေတာလေ။ ညီမလေး။ အချက်ပြနေတယ်ဆိုတာ နားမလည်ဘူးလား။ လခွမ်း’

ထို့နောက် စစ်ဆေးမေးမြန်းသည့်အပိုင်းကို သူတာ၀န်ယူမည်ဖြစ်ကြောင်းကို မုကျစ်ရှီအား ပါးစပ်တွင် ဇစ်ပိတ်သလို ဟန်ပြလိုက်၏။

ထို့နောက် မိုမို့ဘက်ပြန်လှည့်ကာ ညှင်ညှင်သာသာ ဆိုလိုက်သည်။ “သူ့ကို ဂရုမစိုက်နဲ့။ ဘယ်လိုပြောမလဲ အဲ့ဒီအရာက သူ့သရုပ်မှန်ကို နင့်ကိုပြောပြခဲ့ရင်တောင် မျက်စိစုံမှိတ်ပြီး ယုံလို့မရဘူးမလား”

“နင်လည်း အဲ့အရာက အမှန်တကယ် ဘာကြီးလဲဆိုတာ သိချင်နေလောက်မယ်။ ပြီးတော့ အဲ့အရာက အချိန်ပြည့်နင့်ကို စောင့်ကြည့်နေဖို့ဆိုတာ မဖြစ်နိုင်ဘူး။ အဲ့အချိန်တွေမှာ နင် အဲ့အရာရဲ့ အကြောင်းကို ရှာဖွေမကြည့်ဖူးဘူးလား”

မိုမိုတုန့်ဆိုင်းသွားပြီးနောက် ခေါင်းကို အသာအာယာ ညိတ်ပြလိုက်သည်။ “ရှာဖူးတယ်”

“ဆိုပါဦး…” စုရှောင်ရှန် ကိုယ်ကိုယ်ကိုင်းညွှတ်ကာ နားပင့်လိုက်သည်။

အရင်ဘ၀က ထိုဆေးရုံမှ အဖြူ၀တ် နတ်ဆိုးတွေလည်း သူ့ကို ထိုသို့ မေးမြန်းဖူးတာ သတိရသွားသည်။

စုရှောင်ရှန်၏ အင်္ကျီ ကော်လံစကို မုကျစ်ရှီ ပြန်ဆွဲကာ မကျေမနပ်မေးလိုက်သည်။ “နင်မေးတာ အဲ့လောက် အနီးနားထိကပ်သွားစရာမလိုဘူးမလား”

စုရှောင်ရှန် ဘာပြောရမှန်းမသိဖြစ်သွား၏။

‘အိုးးး ငါ့ချစ်စရာညီမလေး ပါးစပ်ကို တစ်စက္ကန့်လောက်တောင် ပိတ်ထားပေးလို့မရဘူးလား။ အဲ့လောက်တောင် စကားများချင်နေတာလား…’ စိတ်ထဲမှ ပြောလိုက်သည်။

စုရှောင်ရှန်နှင့် မိုမို့ကြားမှ အပြန်အလှန်ပြောဆို ဆက်ဆံပုံကိုကြည့်ပြီး မိုမို ပြုံးမိသွားသည်။ “ငါစာအုပ်တွေ လှန်လှောရှာဖွေကြည့်ရသလောက်တဲ့ အဲ့တာက ‘မိစ္ဆာ သားရဲ’ တစ်မျိုးဖြစ်မယ်ထင်တယ်”

မိစ္ဆာ သားရဲ ဟုတ်လား။

ဆရာတူမောင်နှမနှစ်ဦး မှင်တက်သွားကြသည်။ ထိုအသုံးအနှုန်းကို ယခင်က သူတို့ တစ်ခါမှ မကြားဖူးပါချေ။

“မိစ္ဆာသားရဲကဘာကြီးတုန်း” သိချင်စိတ် ပြင်းပြနေသော မုကျစ်က မေးလိုက်သည်။

ဒီတစ်ခါတော့ သူလည်း ထိုသို့ မေးခွန်းမျိုးမေးရန်ပြင်ထားရာ စုရှောင်ရှန် မုကျစ်ရှီကို မတားလိုက်ပါပေ။

သူမညာလက်ထဲမှ အရာ အိပ်မောကျနေတာကို ထပ်၍ သေချာအောင်ဆန်းစစ်ကြည့်ပြီးနောက် လေသံလေးလေးပင်းပင်းဖြင့် ဆိုသည်။ “နင်တို့ ထျန်းရွှမ်တံခါးက တခြား ဗလာနယ်ပယ်ထဲမှာ ရှိတဲ့ ကမ္ဘာငယ်လေးဆိုတာသိတယ်မလား”

သူတို့နှစ်ဦးလုံး ခေါင်းညိတ်လိုက်ကြသည်။

“ထျန်းရွှန်တံခါးက အတွင်းစည်းဂိုဏ်းသားတွေ လေ့ကျင့်ဖို့အတွက် ထျန်းစန်းနန်းတော်ရဲ့ အကြီးပိုင်‌တွေ စုပေါင်းပြီး ဖန်တီးထားကြတာပဲ” မိုမိုက စကားစလိုက်သည်။

“ဒါပေမယ့် စိတ်ဝိညာဉ်နန်းတော်အပြင်ဘက်က ကုန်းမြေတစ်လျှောက်လုံးမှာ ဒီလို ကမ္ဘာငယ်လေးတွေက မရှားဘူး”

မိုမို ခဏရပ်တန့်လိုက်ကာ ဆက်လက်၍ “ဒီလို ကမ္ဘာငယ်လေး အများစုက သဘာ၀အတိုင်း ဖြစ်တည်လာကြတာပေါ့”

စုရှောင်ရှန် မျက်ခုံးများပင့်လိုက်သည်။ ထိုကမ္ဘာငယ်လေးများအကြောင်းကို သူသိပါသည်။ သို့သော် မီးခိုးမြူပုံရိပ်နှင့် ဒါနှင့် ဘာများ သက်ဆိုင်နေလို့လဲ။

ထို့နောက် မိုမိုက ဆက်ပြီးတော့ “ဒီလို လူလုပ် ကမ္ဘာငယ်လေးတွေကတော့ ကုန်းမြေတစ်လျှောက်လုံးတောင်တွေ့ရခဲတယ်။ ဒီလိုနေရာတွေကို လျှို့ဝှက် ရတနာနယ်မြေတွေအဖြစ် သတ်မှတ်ထားကြတာပေါ့”

“ဒီလို ကမ္ဘာငယ်လေးတွေက ရတနာတွေသာ ဖန်တီးနိုင်စွမ်းရှိတာမဟုတ်ဘူး လူလိုအရာတွေလည်း ဖန်းတီးနိုင်ကြတယ်။ အဆင့်နိမ့်ကမ္ဘာငယ်လေးက သက်ရှိ တွေကတော့ ဘာမှ မဟုတ်ဘဲ ဉာဏ်ရည်နိမ့်တဲ့အကောင်တွေပေါ့။ အဆင့်မြင့်တဲ့ ကမ္ဘာငယ်လေးတွေကြ လူသားတွေလို အသိဉာဏ်ရှိတဲ့ သက်ရှိတွေပါ ရှိတယ်”

“အဲ့တာက မိစ္ဆာသားရဲလား” စုရှောင်ရှန် မေးလိုက်သည်။

မိုမို ခေါင်းညိတ်ပြကာ “ဟုတ်တယ်။ မိစ္ဆာသားရဲတွေက တွေ့ရ တအားခဲတယ်။ တစ်ခါတစ်လေဆို ကမ္ဘာငယ်လေးတစ်ခုတည်းကတောင် မိစ္ဆားသားရဲတစ်ကောင်ကို မဖန်တီးပေးနိုင်ဘူး။ ဒါပေမယ့် ဖန်တီးပေးလိုက်ပြီဆိုရင်လည်း…” မိုမို ခါးသက်သက်ပြုံးလိုက်သည်။

သူမ၏ ဆိုလိုရင်းကို စုရှောင်ရှန် နားလည်သလိုလို ရှိလာသည်။

မိစ္ဆာသားရဲတွေက တွေ့သည့်အရာကို ဖျက်ဆီးရုံဖြင့် မကျေနပ်နိုင်ဘဲ အပြင်ဘက်ကမ္ဘာကြီးသို့ပါ ထွက်လာတတ်ကြသည်။

ဒါပေမယ့် သူတို့ ထိုကဲ့သို့ ကမ္ဘာငယ်လေးထဲက အစကနည်းက ဘာလို့ ထွက်နိုင်ကြတာလဲ။ ကမ္ဘာငယ်လေး၏ အစောင့်အရှောက်တွေက မရိပ်မိကြဘူးလား။

ထိုမေးခွန်းများအားလုံး အဖြေများလိုအပ်သည်။

ထိုသို့ ထွက်‌ပြေးရခြင်း အကြောင်းအရင်းက အစောင့်အရှောက်များက မြင်သမျှ ဖျက်ဆီးချင်နေသည့် မိစ္ဆာသားရဲများကို ဘာမှ မဟုတ်သလို သတ်ဖြတ်ကြသောကြောင့်ဖြစ်သည်။

ဤကဲ့သို့သော အခြေအနေမှာတောင် အစောင့်အရှောက်များ၏ မျက်စိအောက်ကနေ လွတ်လာပြီး အပြင်ဘက်ကမ္ဘာကြီးကိုလာဖို့ဆိုတာ ဘယ်လွယ်ကူလိမ့်မလဲ။ ထိုသို့ပြုလုပ်ရန် အလွန်အသိဉာဏ်ပညာကြွယ်၀ပြီး တိုက်ခိုက်စွမ်းရည်လည်း အတော်ကောင်းဖို့လိုမှာ သေချာ၏။

စုရှောင်ရှန် အချိန်တိုအတွင်း မိုမိုပြောသည့်အကြောင်းအရာများကို ‌ချေဖျက်လိုက်ပြီးနောက်မှာ သူမ၏ ပုံပြင်အတွင်းမှ ဟာကွက်များကို တွေ့လိုက်ရသည်။

“နင်ပြောသလိုဆို ဒီမိစ္ဆာသားရဲရဲ့ အာရုံကိုဖမ်းစားလိုက်တုန်းက နင်က စစ်မှန်ခြင်းနယ်ပယ်ကိုတောင်မရောက်လောက်သေးဘူး မဟုတ်လား။ ဒါနဲ့ ဘယ်လိုဖြစ်လို့ အဲ့လို ကမ္ဘာငယ်လေးတစ်ခုထဲ နင်၀င်သွားနိုင်တာလဲ”

စုရှောင်ရှန်လို သိချင်စိတ်ပြင်းပြစွာ မုကျစ်ရှီလည်း မိုမို့ကို ကြည့်လိုက်သည်။

မိုမိုက ခါးသီးစွာပြုံး၍ ပြန်မေးလိုက်သည်။ “ဒီလိုကမ္ဘာငယ်လေးကပဲ မိစ္ဆာသားရဲတွေကို ဖန်တီးနိုင်တယ်ထင်နေတာလား”

စုရှောင်ရှန် အလင်းပေါက်သွားသည်။

‘ဟုတ်သားပဲ။ ဒီလို မိစ္ဆာသားရဲတွေကို ကမ္ဘာငယ်လေးထဲမှပဲ တွေ့ကြတာများတယ်ဆိုပေမယ့် ငါတို့ကမ္ဘာကြီးကို လွတ်လာတဲ့ ကောင်တွေလည်းရှိကြတာပဲ’

ထိုသို့လွတ်လာပြီးနောက်တောင် စိတ်ဝိညာဉ်ကျင့်ကြံသူများ၏ လိုက်လံ သုတ်သင်ခြင်းကို မခံရသေးတာက ဘယ်လောက်တောင် ကြောက်မက်ဖွယ်ရာကောင်းလိုက်မလဲ။ ထိုအတွေးဖြင့် စုရှောင်ရှန် ကြက်သီးတဖျင်းဖျင်းထသွား၏။

ထျန်းရွှမ်တံခါးလိုနေရာမျိုးမှာ မီးခိုးမြူပုံရိပ်နှင့် တွေ့ရတာက တကယ် တိုက်ဆိုင်ပေလို့ဖြစ်ရမည်။ ကံကောင်းတာက ကမ္ဘာငယ်လေးရဲ့ နိယာမကြောင့် အရှင်သခင်နယ်ပယ် အထက်ကို တက်နိုင်ခြင်းမရှိပါချေ။

ထိုအရာနှင့် ထျန်းရွှမ်တံခါးအပြင်ဘက်မှာတွေ့ရမယ်ဆိုရင်တော့ သူ၏ မဖြစ်စလောက်ခွန်အားလေးနှင့် သွားတိုက်ခိုက်ရဲလိမ့်မည်မဟုတ်ပေ။ ထိုသို့သော အရာက သေကြောင်းကြံခြင်းသာ။

စုရှောင်ရှန် ထို့နောက် သူ၏ “ရန်သူများအား ရင်ဆိုင်ခြင်း နည်းဗျူဟာ” မှာ နောက်ထပ် အသစ်တစ်ခုရေးလိုက်သည်။

မီးခိုးမြူပုံရိပ် : စိတ်ကူးယဉ်နိုင်လောက်တာထက် ပိုသန်မာသော ရန်သူ။ ငကြောက်ဖြစ်ရမှာ မရှက်ဘဲ ပုန်းကွယ်နေမှသာ အသက်ရှည်မယ်။

ဟုတ်တယ် ငကြောက်တစ်ကောင်လို ပုန်းတာ။

ထိုစကားလုံးတစ်ခုတည်းက အလွန်အရေးကြီးသလို သူ့မှတ်ဉာဏ်ထဲမှာ စုရှောင်ရှန် မှတ်ထားလိုက်သည်။ ဘယ်အရာကိုမှ ၁၀၀ ရာခိုင်နှုန်းမသေချာလျှင် မလုပ်တော့ပါဟု ‌မှတ်ချက်ချလိုက်၏။

ဒီတစ်ကြိမ်တောင် ကံကောင်း၍သာ…

စုရှောင်ရှန် စိတ်ထဲမှ သက်ပြင်းရှည်ကြီးချလိုက်ပြီး မေးလိုက်သည်။ “အဲ့ဒီ မိစ္ဆာသားရဲက ဒီလောက် သန်မာနေမှတော့ ပျက်ဆီးခြင်းတွေကို မဖြစ်စေဘူးလား။ ဘာလို့ အပြင်ဘက်က အင်အားကြီးအဖွဲ့အစည်းတွေက ဒီကောင်တွေကို သောင်းကျန်းချင်သလို သောင်းကျန်းခွင့်ပေးထားကြတာလဲမသိဘူး။ စုပေါင်းလက်တွဲပြီး နှိမ်နင်းကြရမှာမဟုတ်လား”

မိုမိုလည်း သက်ပြင်းချကာ ဖြေလိုက်သည်။ “မြင့်မြတ်နတ်ဘုရားနန်းတော်က ဒီကိစ္စကို ဆောင်ရွက်နေတာကြာပြီ။ မြင်တာနဲ့ချက်ခြင်းသတ်ဆိုပြီးတောင် မှတ်ချက်ထုတ်ပေးထားသေးတယ်။ ဒါကြောင့်ပဲ အသက်ရှင်နေသေးတဲ့ မိစ္ဆာသားရဲတွေက ပိုပြီး သတိရှိလာကြတာပေါ့။ ပြီးတော့ ပုန်းခိုတဲ့နေရာမှာလည်း ဒီအရာတွေလောက် တော်တဲ့ဟာ ဘာမှ မရှိဘူးလေ”

စုရှောင်ရှန် အခြေအနေကို ဇာတ်ရည်လည်သွားတော့ကာ “ဒီတော့ နင့်ကိုလည်း ဒီလိုအရာတစ်ခုက ပစ်မှတ်ထားလိုက်တာပေါ့”

မိုမို ထင်မှတ်မထားစွာ ခေါင်းခါရမ်းလိုက်ပြီး “မဟုတ်ဘူး”

“ ငါတစ်ယောက်တည်း ဒီလိုကမ္ဘာငယ်လေးက မိစ္ဆာသားရဲရဲ့ ၀င်ပူးတာကိုခံရပြီး ပထမမျိုးဆက် မိစ္ဆာသားရဲ လက်ခံသူဖြစ်လာတာပဲ”

“…”

စုရှောင်ရှန်ဘာပြောရမှန်းပင်မသိတော့ပေ။ “ဆိုတော့ ငါတို့က နောက်ဆုံးတော့လည်း အစကို ပြန်ရောက်လာတာပဲပေါ့”

မုကျစ်ရှီတောင် မနေနိုင်ဘဲ မေးလိုက်သည်။ “ပထမမျိုးဆက်ဆိုတော့ နင်က ဒီလို ကမ္ဘာငယ်လေးထဲကို အားနည်းတုန်းကတောင် ၀င်လိုက်တာပေါ့။ ဘယ်လိုဖြစ်နိုင်မှာလဲ”

ဒီလို ကမ္ဘာငယ်လေးများက လူတိုင်း ၀င်ချင်တိုင်း၀င်၍ ရ‌သည့်နေရာမဟုတ်ပေ။ သန်မာသော လက်ရွေးစင်များသာ ၀င်နိုင်ကြ၏။

မိုမို သူမ၏ ခေါင်းကို ထပ်ခါရမ်းလိုက်ပြီး “မ၀င်ခဲ့ဘူး”

စုရှောင်ရှန်ရော မုကျစ်ရှီပါ နားမလည်နိုင်ဖြစ်သွားကြသည်။

သူမ ဒီလို ကမ္ဘာငယ်လေးထဲကို မ၀င်ဘူးလဲပြောတယ်။ ပထမမျိုးဆက်မိစ္ဆာသား လက်ခံသူလို့လည်း ပြောတယ်။ သူမ ငါတို့ကို လာနောက်နေတာလား။

“နင်တို့နှစ်ယောက်လုံး ထျန်းစန်း စီရင်စုမှာ လွန်ခဲ့တဲ့ နှစ်‌ပေါင်းများစွာဖြစ်ခဲ့တဲ့ ကမ္ဘာငယ်လေးဖြစ်ရပ်ကို မေ့သွားကြပြီလား”

မုကျစ်ရှီ ‌မိုမိုပြောတာကို ခေါင်းထဲ လှန်လှောရှာဖွေကြည့်လိုက်သည်။

စုရှောင်ရှန်လည်း အတွေးရေယဉ်ကြောထဲမှာ စီးနင်းလိုက်ပါသွား၏။ သို့သော် သူ၏ ဝေဝေဝါးဝါး မှတ်ဉာဏ်အပိုင်းအစများထဲတွင် ထိုအရာနှင့် ပတ်သက်၍ ဘာအချက်အလက်မှ ရှာမတွေ့ပါချေ။

သူတို့နှစ်ဦးကိုကြည့်ပြီး မိုမို့မှာ စွံ့အသွားရတော့သည်။

ဒီနှစ်ယောက်ဘာလဲ။ ကျောက်တုံးအောက်မှာများ နေနေကြတာလား။

ထျန်းစန်း စိတ်ဝိညာဉ်နန်းတော်ကလွဲပြီး တစ်ဘ၀လုံး ဘယ်‌မှ မသွားဖူးကြဘူးလား။ ထိုဖြစ်ရပ်က မြို့အနည်းငယ်နှင့် စီရင်စုတွေကိုတောင် ၀ရုန်းသုန်းကား ‌ဖြစ်သွားစေလောက်အောင်ကြီးတာ တကယ် မသိကြဘူးလား။

မိုမို ချက်ခြင်း မနေနိုင်တော့ဘဲ ပြောလိုက်သည်။

“လှိုဏ်ဂူဖြူ ကိစ္စလေ”

Comment

Leave a Reply

Options

not work with dark mode
Reset