Switch Mode

အပိုင်း(၅၅၀)

အကြီးအကဲနန်၏အကြံ

မရေမတွက်နိုင်သော လူများက ရီဝူချင်းကို ကြည့်ကြသည်။ လက်တစ်ဖက်ပြတ် ဓားသမားကား လူအများ အထင်ကြီး လေးစားမှု မရှိသော အခြေအနေတွင် ယန်နန်၏ အရှက်ခွဲ ပြောဆိုမှုကိုပင် ခံရသည်။ သို့သော်လည်း သူက ဓားကျေးရွာမှ အတော်ဆုံး ဓားသမား တစ်ယောက် ဖြစ်သော ယန်နန်ကို အမှန် တကယ်ပင် အနိုင်ယူခဲ့သည်။

သူကား အမှန်ပင် အလွန် အားကောင်းသည်။ လီချန်းရီ၊ ချင်ရန်နှင့် အာရုဏ်လမ်းမှ တခြားလူများ အားလုံးက တွေးတောကြသည်။ ကြည့်ရသည်မှာ ရီဖူရှင်း၏ အနီးမှ​ လူများက တန်ခိုးအဆင့် နိမ့်ပုံရသော်လည်း အားနည်းသည့်ပုံ မရှိပေ။

ယန်နန်ကား ထိုနေရာတွင်ပင် ရပ်ကာ တွေဝေ မိန်းမောနေသည်။ သူကား အမှန်တကယ် ရှုံးနိမ့်ခဲ့၏။

“ငါ တကယ်ပဲ လက်ပြတ်ဆီမှာ ရှုံးနိမ့်ခဲ့တယ်…” ယန်နန်က မိမိကိုယ်ကို လှောင်ပြုံး ပြုံးသည်။ သူက လက်ပြတ်ဆိုသော စကားကို မကြာမကြာ ထုတ်ပြောနေဆဲ ဖြစ်သည်။

ရီဝူချင်းက ယန်နန်ကို တည်ငြိမ်စွာပင် ကြည့်သည်။ သူ့အား လျစ်လျူရှုကာ ရီဝူချင်းက နောက်လှည့်ကာ ထွက်သွားသည်။ သူက ယန်နန်ကို သတ်၍ မရမှတော့ ငြင်းခုံနေခြင်းက အဓိပ္ပာယ် မရှိပေ။

“နေဦး…” တော်ဝင်ကျဲ နန်းတော်မှ အကြီးအကဲ တစ်ယောက်က ပြောသည်… “ရီဝူချင်း… မင်းက တော်ဝင်ကျဲ နန်းတော်မှာ လေ့ကျင့်ချင်လား…”

ရီဝူချင်းကား စိန်ခေါ်ခံရသူ ဖြစ်သော်လည်း သူ၏စွမ်းရည်များက ထင်သာ မြင်သာ ရှိလွန်းလှပေသည်။ တစ်စုံတစ်ယောက်က သူ့အား တပည့်အဖြစ် ရွေးချယ်လိုသည်။

“ကျေးဇူးတင်ပါတယ်… ကျွန်တော်က ဆက်ပြီး စိန်ခေါ်ချင် ပါသေးတယ်…” ရီဝူချင်းက အနည်းငယ် ဦးညွှတ်ကာ ပြောပြီး သူ၏နေရာကို ပြန်လာခဲ့သည်။ သူက ကမ်းလှမ်းမှုကို ငြင်းပယ်ခဲ့သည်။ ထို့အပြင် သူက စိန်ခေါ်ခံရသူ ဖြစ်ကာ တော်ဝင်ကျဲ နန်းတော်၏ အသိအမှတ်ပြုမှုကို ရရှိပြီးဖြစ်ရာ အချိန်တစ်ခုအထိ တိုက်ခိုက်ရန် လိုတော့မည် မဟုတ်တော့ပေ။

အကြီးအကဲက ဘာမှ မပြောပေ။ သူက ယန်နန်ကို ကြည့်ကာ မေးသည်… “မင်းကရော…”

ယန်နန်က ရှုံးနိမ့်ခဲ့သော်လည်း သူ၏စွမ်းရည်များက အသိအမှတ် ပြုစရာပင်။

ယန်နန်က ရီဝူချင်း၏ နောက်ကျောကို လှမ်းကြည့်သည်။ ရီဝူချင်းက ငြင်းပယ်ခဲ့သည့် အရာက သူက မည်သို့ ရွေးချယ်မည်နည်း။

“ဟင့်အင်း…” ယန်နန်က နောက်လှည့်ကာ ထွက်သွားသည်။ သူက တစ်စုံတစ်ယောက်၏ အသိအမှတ်ပြုမှုကို ရရှိပြီဖြစ်ရာ ရှုံးနိမ့်သည့်တိုင် ကွင်းထဲတွင် ဆက်လက် ကျန်နေခွင့် ရှိပေသည်။ သူက နောက်တစ်ဆင့်ကို တက်ရောက်သွားပြီ။

သူတို့နှစ်ယောက်က အမှန်တကယ်ပင် ကမ်းလှမ်းမှုကို ငြင်းပယ်ခဲ့ကြသည်။ သိသာစွာပင် သူတို့ နှစ်ယောက်လုံးက ပိုမိုကြီးမားသော ရည်မှန်းချက်များ ရှိသည်။ ယန်နန်အတွက်မူ တော်ဝင်မြေတွင် လေ့ကျင့်မည့်အစား ဓားကျေးရွာတွင်သာ ဆက်နေမည် ဖြစ်သည်။

ကွင်းပြင် တစ်ခုလုံးက တိတ်ဆိတ်နေသည်။ ဓားသမား နှစ်ယောက်၏ တိုက်ပွဲက အမှန်ပင် ကြည့်ကောင်း လှသည်။

ရီဝူချင်းက သူ၏နေရာကို ပြန်ရောက် လာသည်။ ရီဖူရှင်းက ပြတ်တောက် သွားသော ရီဝူချင်း၏ အင်္ကျီလက်မောင်းအိုးကို ကြည့်ကာ မေးသည်… “မင်း ဒဏ်ရာရလား…”

ရီဝူချင်းက ခေါင်းယမ်းကာ ဘာမှ မပြောတော့။

“နောက်တစ်ယောက်…” လှေကားထစ်မှ အကြီးအကဲက ထပ်အော်သည်။

“ကျွန်တော်…” တစ်ယောက်က ပြောသည်။ သို့သော်လည်း ထိုလူက ရှေ့ကို ထွက်မလာမီတွင်ပင် နောက်တစ်ယောက်က တိုက်ပွဲကွင်းပြင် အလယ်ကို ထွက်လာသည်။

လူအများအပြားက အံ့အားသင့် သွားကြသည်။ ရှေ့ကို ထွက်လာသူကား အမှန်ပင် ရီဖူရှင်း ဖြစ်နေသည်။

ရီဝူချင်းက ကွင်းလယ်ကို လျှောက်လာကာ ရပ်တန့်လိုက်သည်။ ထို့နောက် သူက တစ်နေရာကို စိုက်ကြည့်သည်။ ထိုနေရာကား ယန်နန်ရှိနေရာ ဖြစ်သည်။

“ထွက်လာခဲ့စမ်း…” ရီဖူရှင်းက ယန်နန်ကို လက်ညှိုးထိုးကာ ပြောသည်။ ယန်နန်က ရှုံးနိမ့်ခဲ့သော်လည်း သူက ရီဝူချင်းကို လက်ပြတ်ဟု ခေါ်ဝေါ်နေဆဲ ဖြစ်သည်။ ရီဝူချင်းက စိတ်ထဲ မထားသော်လည်း ရီဖူရှင်းက လျစ်လျူရှု မထားနိုင်ပေ။

ရီဖူရှင်းက ယန်နန်ကို လက်ညှိုးထိုးကာ ပြောသည်တွင် မရေမတွက်နိုင်သော လူများက ရီဖူရှင်းကို ထပ်ကြည့်ကြသည်။ အကာနာအဆင့် တစ်ယောက်က ယန်နန်ကို စိန်ခေါ်ခြင်းက မလွန်ကဲလွန်းဘူးလား…။

ယန်နန်ကား အဋ္ဌမအတန်းအစား နိုဘယ်ဖြစ်ကာ သူ့ထက် တန်ခိုးအဆင့် နှစ်ဆင့်ကွာသည်။ ထို့အပြင် ယန်နန်ကား အလွန်အမင်း ပါရမီမြင့်သူ ဖြစ်သည်။ သူက ရီဝူချင်းကို ရှုံးနိမ့်ခဲ့သည့်တိုင် အားနည်းသည် မဟုတ်ပေ။

ယန်နန်က ရီဖူရှင်းကို စိတ်ဝင်စားစွာ ကြည့်သည်။ ရီဝူချင်းထံ ရှုံးနိမ့်ခဲ့ခြင်းကပင် သူ့အတွက် အရှက်ရစရာ ဖြစ်သည်။ ယခု အကာနာအဆင့် တစ်ယောက်က သူ့အား အမှန်ပင် စိန်ခေါ်ရဲသည်။

သူက ရီဖူရှင်းကို စိန်ခေါ်ခဲ့သည်။ သည်မတိုင်မီ တိုက်ပွဲတွင် ရီဖူရှင်းက အရှုံးပေးခဲ့ရာ နောက်ထပ် စိန်ခေါ်ပါက နောက်ထပ် အရှုံးပေးနိုင်၍ သူက ထပ်စိန်မခေါ်ခဲ့ခြင်း ဖြစ်သည်။

ဟူး… ဓားအသိများ လှည့်ပတ်လျက် ယန်နန်က ကွင်းလယ်သို့ ဓားတစ်လက်အလား ပျံသန်းလာသည်… “မင်းက ထွက်သွားချင်တယ် ဆိုမှတော့ မင်းဆန္ဒကို ဖြည့်ဆည်း ပေးရမှပေါ့…” သည်တိုက်ပွဲတွင် ရီဖူရှင်းက စိန်ခေါ်သူ ဖြစ်သည်။  သူက ရီဖူရှင်းကို အနိုင်ရသရွေ့ သူက နောက်ထပ် ရှုံးပွဲတစ်ခုနှင့်အတူ ကွင်းထဲမှ ထွက်သွားရမည် ဖြစ်သည်။ သူက ကျွန်းစုတစ်ထောင် တော်ဝင်မြေတွင်ပင် လေ့ကျင့်ရန် အခွင့်အရေး ရတော့မည် မဟုတ်တော့ပေ။

သူ့နောက်တွင် အားကောင်းသော ဓားအသိနှင့်အတူ အဆုံးမဲ့ မဟာနတ်ဓား ပေါ်လာပြန်သည်။ သူက ခြေလှမ်း တစ်လှမ်းမျှဖြင့် ဓားအသိက ရီဖူရှင်း၏ခန္ဓာကိုယ်ကို ထွင်းဖောက် လာသည်။

ရီဖူရှင်း၏အနီးတွင် ဥက္ကာခဲများ စတင် ဖြစ်ပေါ်လာသည်။ သူ့ပတ်ဝန်းကျင်၌ ကြယ်တာရာ သီးသန့် နယ်နှင့်အတူ မရေမတွက်နိုင်သော ဥက္ကာခဲများက မုန်တိုင်း တစ်ခုအလား ဖြစ်ပေါ်လာသည်။

သို့သော်လည်း ရီဝူချင်းကား ဓားသမားဖြစ်ကာ ထိုးစစ်တွင် အလွန်အမင်း အားကောင်းသည်။ သူက အကာနာအဆင့် တန်ခိုးရှင် တစ်ယောက်၏ ခံစစ်ကို အလေးထားမည် မဟုတ်ပေ။

ထက်ရှသော အရှိန်အဝါ တစ်ခုနှင့်အတူ ယန်နန်၏ သက်စောင့် ဝိညာဉ်က ဧရာမ ဓားတစ်လက် အဖြစ် ပြောင်းလဲသွားကာ ရီဖူရှင်းထံကို တိုးဝင်လာသည်။ အကယ်၍ သူသာ အခွင့်အရေး ရပါက ရီဖူရှင်းကို သေချာပေါက် သတ်မည် ဖြစ်သည်။

အဆုံးမဲ့ မဟာနတ်ဓားက ကောင်းကင်မှ ဆင်းသက် လာသည်တွင် လမ်းတစ်လျှောက် ဥက္ကာခဲများ အားလုံး ပျက်စီးရသည်။ ကြယ်တာရာ သီးသန့်နယ်ကား ထိုဓား၏ အရှိန်အဝါကို ခံနိုင်ခြင်း မရှိဘဲ ပြိုလဲရသည်။

ရီဖူရှင်းက မြန်ဆန်စွာ နောက်ဆုတ်သည်တွင် မဟာနတ်ဓားက မြေပြင်ကိုသာ ထိုးစိုက်မိသည်။

“ဒီလောက်နဲ့ မင်းက မောက်မာ ရတာလား…” ယန်နန်က ရီဖူရှင်းကို သရော်သည့် အကြည့်ဖြင့် ပြောသည်။ ထို့နောက် မဟာနတ်ဓားက တုန်ခါသွားကာ မြေပြင်မှ အပေါ်ကို ပြန်လည် ပျံတက်လာကာ ရီဖူရှင်းနောက်ကို လိုက်ပြန်သည်။ သို့သော် ရီဖူရှင်းကား မြန်ဆန်လွန်း လှသည်။

ဓားစွမ်းအင်များ ပျောက်ကွယ် သွားကာ ယန်နန်၏ သက်စောင့် ဝိညာဉ်က သူ့ခန္ဓာကိုယ်ထဲကို ပြန်လည် ဝင်ရောက် သွားသည်။ မဟာနတ်ဓားက ရီဖူရှင်းကို လိုက်မမီမှတော့ သူက အလင်းဓားကို အသုံးပြုရန် စိတ်ကူးသည်။

ယန်နန်၏ ခန္ဓာကိုယ်က ဓားအလင်း တစ်ခုအဖြစ် ပြောင်းလဲသွားကာ ရီဖူရှင်းထံသို့ တိုးဝင်သွားသည်။ သူ၏ခန္ဓာကိုယ် ဖြတ်သန်း သွားသမျှ ဓားက အော်ဟစ်ကာ မရေမတွက်နိုင်သော ဓားစွမ်းအားများက ရီဖူရှင်းထံကို ဖြတ်တောက် သွားကြသည်။

“သေစမ်း…” အေးစက်သော အသံတစ်ခုနှင့်အတူ အလင်းဓားက လေထုကို ဖြတ်တောက်လျက် ရီဖူရှင်းထံကို ရောက်လာသည်။

သို့သော်လည်း မမြင်ရသော မြေဆွဲအားနှင့် ရေခဲအသိက တစ်ပြိုင်နက်တည်း ပေါ်လာကာ အရာအားလုံးက နှေးကွေးသွားသည်ဟု ယန်နန်က ခံစားလိုက်ရသည်။ ရီဖူရှင်းက လက်ဆန့်တန်း လိုက်သည်တွင် ကြီးမားသော လက်ဝါးပုံရိပ်တစ်ခု ဖြစ်ပေါ်လာကာ အလင်းဓားနှင့် ထိတွေ့သည်။ သို့သော်လည်း လက်ဝါးပုံရိပ်က ဖောက်ထွင်း ဖျက်ဆီးခံရ၏။ တစ်ဖက်တွင် အလင်းဓားကလည်း အားနည်းသွားကာ သူ့ကို အန္တရာယ် မပေးနိုင်တော့ပေ။

တစ်ချိန်တည်းမှာပင် ပုံသဏ္ဌာန်မဲ့ဓားက သူ့နောက်မှ အေးစက်သော အငွေ့အသက်များ ပေးကာ ဝင်ရောက် လာသည်။ သို့သော်လည်း ရီဖူရှင်း၏ ခန္ဓာကိုယ်ကို ကြယ်တာရာများ မြန်ဆန်စွာပင် လှည့်ပတ်သွားကာ သူတို့ကြားရသည်ကား တဘန်းဘန်း မြည်သံများနှင့် ဥက္ကာခဲ ကွဲအက်သံများ ဖြစ်သည်။

“အခုထိ အရှုံးမပေးသေး ဘူးလား…” ယန်နန်က နှာခေါင်းရှုံ့သည်။ သူက လက်ကို ဆန့်တန်းလိုက် သည်တွင် သက်စောင့်ဝိညာဉ် တစ်ဖန် ပေါ်လာပြန်သည်။ အားကောင်းသော ဓားအသိက သူ့လက်ဝါးတွင် ရစ်ပတ်လျက် လျှပ်တစ်ပြက် ရီဖူရှင်းထံသို့ ခုန်ဝင်လိုက်သည်။

ကြောက်မက်ဖွယ် ကောင်းသော လျှပ်စီးများ ရီဖူရှင်း၏ ခန္ဓာကိုယ်ကို စတင် ရစ်ပတ်လာကာ သူ့ရှေ့၌ လျှပ်စီးဒိုင်းကာ ဖြစ်ပေါ်လာသည်။ ယန်နန်က သူ့ရှေ့ကို ရောက်လာကာ ဓားဖြင့် ခုတ်သည်တွင် ကောင်းကင်နှင့်​ မြေပြင်အကြား မရေမတွက်နိုင်သော ဓားချက်များ ဖြစ်ပေါ်လာပြီး ဒိုင်းကာကို အစိတ်စိတ် အမြွှာမြွှာ ဖြစ်စေသည်။

“လျှပ်စီးနတ်ဘုရား၏ ပြစ်ဒဏ်…” ထက်ရှသော အလင်းတစ်ခု ရီဖူရှင်း၏ မျက်လုံးတွင် ဖြစ်ပေါ်လာကာ ပြိုကွဲသွားသော ဒိုင်းကာက တစ်ဖန် အလင်းတန်းအဖြစ် ပြန်လည် စုစည်းသွားပြီး ယန်နန်၏ ခန္ဓာကိုယ်သို့ ပြေးဝင်သွားသည်။ သို့သော်လည်း ယန်နန်၏ ခန္ဓာကိုယ်တွင် ဓားကွန်ချာတစ်ခု ဖြစ်ပေါ်လာကာ လျှပ်စီးကို တားဆီးရန် ကြိုးစားသည်။ သို့သော် သူ၏ စိတ်ဝိညာဉ်နှင့် ခန္ဓာကိုယ်က လျှပ်စီးတန်း စီးဆင်းသွားသောကြောင့် ထုံကျဉ် ထိုင်းမှိုင်းသွားသည်။

သို့တိုင်အောင် သူ၏ဓားချက်က ရပ်တန့်သွားသည် မဟုတ်ပေ။ အကယ်၍ ရီဖူရှင်းသာ အရဲကိုး ဝင်တိုးပါက သူ့ဓားချက်အောက်တွင် သေရမည် ဖြစ်သည်။

ဓားချက် ဆင်းသက် လာသည်တွင် ရီဖူရှင်း၏ ခန္ဓာကိုယ်က နှစ်ပိုင်း ဖြစ်မသွားခဲ့ပေ။ ရွှေရောင် နွယ်ပင်များက ယန်နန်၏ဓားကို ရစ်ပတ် သွားကြသည်။ နွယ်ပင်များက ဓားချက်ကြောင့် ပြတ်တောက် သွားပြီး ဓားချက်ကလည်း ရီဖူရှင်းကို ဆက်လက် ဆင်းသက်လာခဲ့သည်။ သို့သော် ရီဖူရှင်း၏ နောက်ကျောတွင် ဧရာမ အတောင်ပံတစ်စုံ ဖြစ်ပေါ်လာကာ အတောင်ပံများကို ရှေ့သို့ ခေါက်သိမ်းကာ ဓားချက်ကို ကာကွယ်သည်။

တစ်ချိန်တည်းမှာပင် အတောင်ပံများက လှုပ်ခတ်သွားကာ ရီဖူရှင်းက ရွှေရောင် အလင်းတန်း တစ်ခုအဖြစ် ပြောင်းလဲသွား၏။

တစ်စုံတစ်ခု မှားယွင်းနေသည်ကို ယန်နန်က ခံစားရကာ နောက်ကို ဆုတ်ရန် ကြိုးစားသော်လည်း မြေဆွဲအားနှင့် ရေခဲအသိက သူ့အား လေးလံစေပြီး ဖြစ်သည်။

“သွားစမ်း…” ရီဖူရှင်းက သူ့ထံကို ပြေးဝင်လာသည်ကို မြင်သည်တွင် ယန်နန်က လက်ညှိုးထိုးလျက် ဓားစွမ်းအင်ကို ထုတ်လွှတ်သည်။ သို့သော်လည်း ရွှေရောင်ပုံရိပ် တစ်ခုကိုသာ သူ မြင်လိုက်ရသည်။ နတ်ငှက်အတောင်ပံ၊ လျှပ်စီးအရိပ် ခြေလှမ်းနှင့် လေဓာတ်စွမ်းအားတို့ ပေါင်းစပ်ခြင်းက ရီဖူရှင်းကို မယုံကြည်နိုင်စရာ အမြန်နှုန်းကို ပေးသည်။

ယန်နန်က သူ၏မြင်ကွင်းထဲကို ဓားစွမ်းအင်များကို ရှောင်ဖယ်လျက် ရွှေရောင် ပုံသဏ္ဌာန်တစ်ခု ရောက်လာသည်ကို မြင်သည်။ အလွန် အားကောင်းသော ဓားကွန်ချာတစ်ခု သူ့ပတ်ပတ်လည်၌ ဖြစ်ပေါ်လာကာ တစ်ဖန် ခုခံရန် ကြိုးစားရပြန်သည်။

“ခဲစမ်း…” ရီဖူရှင်းက ရေရွတ်သည်တွင် ရေခဲဓာတ် စွမ်းအင်တစ်ခု ကျဆင်းလာသည်။ ယန်နန်က သူ၏ သွေးစီးဆင်းမှုများပင် ရပ်တန့်သွားသည်ဟု ခံစားရသည်။ သို့သော်လည်း သူ့ပတ်ပတ်လည်မှ ဓားကွန်ချာက ရေခဲအသိများကို ဖျက်ဆီးသည်။

ထိုအချိန်တွင် ရီဖူရှင်းကား ယန်နန်၏ ခေါင်းထက်ရှိ လေထဲကို ရောက်လာပြီး ဖြစ်သည်။ ချက်ချင်းပင် သူ့ပတ်လည်၌ ရွှေဝါရောင်များ လွှမ်းခြုံသွားကာ အလွန် အားကောင်းသော နွယ်ပင်များက ယန်နန်၏ တစ်ကိုယ်လုံးကို ရစ်ပတ်သွားသည်။

ယန်ချူအပါအဝင် ဓားကျေးရွာမှ လူများ၏အမူအရာများ ပျက်ယွင်း သွားကြသည်။ ရီဖူရှင်းက ဘာလုပ်ရန် ကြိုးစားနေသနည်း။ သူက ယန်ချူကို ထိန်းချုပ်ကာ အရှုံးပေးရန်ပင် ခွင့်မပြုပေ။

သစ်ကိုင်း လှုပ်ခတ်သံများနှင့်အတူ ယန်နန်၏လည်ပင်းအား နွယ်ပင်များက ပြင်းထန်စွာ ရစ်ပတ်သွားရာ ယန်နန်က မည်သည့်အသံမှ ထွက်နိုင်စွမ်း ရှိဟန်မရတော့။

“သူ့ကို လွှတ်လိုက်… သူ အရှုံးပေးတယ်…” ယန်ချူက အော်လိုက်သည်။

သို့သော် ရီဖူရှင်းက ယန်ချူပြောသည်ကို ကြားသိဟန် မရပေ။ ရွှေရောင် နွယ်ပင်များက ယန်နန်၏လက်များကို ရစ်ပတ်သွားကာ အရိုးများနှင့် အကြောများကို ပြတ်တောက် စေသည်။ ယန်နန်၏ ခန္ဓာကိုယ်က နာကျင်မှုကြောင့် တုန်ယင် နေသော်လည်း သူ့ထံမှ ဘာစကားသံမှ ထွက်မလာ..။ နောက်ဆုံး နွယ်ပင်များ ပျောက်ကွယ်သွားမှ သူ၏နာကျင်စွာ အော်ဟစ်သံများကို ကြားကြရသည်။

“သူက မသန်စွမ်း ဖြစ်သွားမှတော့ ဒီမှာ ရှိနေစရာ မလိုတော့ဘူး…” ရီဖူရှင်းက ပြောကာ သူ့အား ကွင်းပြင်သို့ လွှင့်ပစ်လိုက်သည်။ ယန်ချူက လျှပ်တစ်ပြက်ပင် ပျံသန်းသွားကာ ယန်နန်ကို ဖမ်းလိုက်သည်။ သို့သော် ယန်နန်၏လက်များကား တွဲလောင်းကျနေကာ မည်သည့် လှုပ်ရှားမှုမှ လုပ်မရတော့။

“ငါ မသန်စွမ်း ဖြစ်သွားတာလား…” ယန်နန်၏ခန္ဓာကိုယ်ကား စိတ်ပျက်မှုများ၊ နာကျင်မှုများ ရောထွေးကာ တုန်ယင်နေဆဲ ဖြစ်သည်။

ယန်ချူက ယန်နန်ကို ပြောသည်… “လက်တွေ ကျိုးသွားရင်လည်း ဆက်ပြီး လေ့ကျင့်လို့ ရသေးတယ်…”

သူကလည်း ထိုမျှသာ နှစ်သိမ့်နိုင်တော့သည်။

ယန်နန်၏မျက်လုံးများက အသက်မဲ့သွားဟန် ရသည်။ သူကား အလွန်အမင်း ပါရမီမြင့်ကာ တော်ဝင်ကျဲ နန်းတော်ကို သေချာပေါက် ဝင်ခွင့်ရတော့မည် ဖြစ်သည်။ ယခု သူက အကာနာအဆင့် တန်ခိုးရှင် တစ်ယောက်ထံတွင် လက်များ အချိုးခံရသည်။

အကြည့်များစွာက ရီဖူရှင်းနှင့် ယန်နန်ထံကို ရောက်လာသည်။ ယန်နန်အတွက်မူကား ကံဆိုးမိုးမှောင်ကျခြင်း ဖြစ်သည်။ ဓားကျေးရွာမှ ပါရမီရှင်ကား လက်နှစ်ဖက်လုံး ကျိုးသွားခဲ့သည်။

ရီဖူရှင်းက ရက်စက်လွန်းသည်။ ယန်နန်က ရီဝူချင်းကို လက်ပြတ်ဟု ခေါ်ကာ စော်ကားခဲ့သည့်အတွက် ရီဖူရှင်းက ယန်နန်၏လက်ကို ချိုးခဲ့သည်။

“အားလုံး…” လှေကားထစ်မှ အကြီးအကဲက တော်ဝင်ကျဲနန်းတော်မှ လူများကို ကြည့်သည်။ တော်ဝင်ကျဲနန်းတော်မှ တစ်စုံတစ်ယောက်က ရီဖူရှင်းကို တပည့်အဖြစ် လက်ခံမလား သူက မေးခြင်းဖြစ်သည်။

“တစ်ဖက်လူကို တမင် ချုပ်ကိုင်ပြီး အရှုံးပေးလို့ မရအောင် လုပ်တယ်… ပြီးမှ လက်ချိုးတယ်… သူ့နည်းလမ်းက အရမ်း ရက်စက်တယ်…” တုံးတိတိ အသံတစ်သံ ထွက်လာသည်။ ပြောလိုက်သူကား ကျွန်းစုတစ်ထောင် တော်ဝင်မြေမှ ရှီတန်ခိုးရှင် တစ်ယောက် ဖြစ်သည်။

ရီဖူရှင်းက ခေါင်းမော့ကာ ပြောလိုက်သူအား လှမ်းကြည့်သည်။ ရက်စက်သည်တဲ့လား…။ ယန်နန်က သူ့ကို သတ်ရန် ကြိုးစားသည်က မရက်စက်ပေဘူးလား…။

“သူက အာရုဏ်လမ်းက လာပြီးတော့ မရေမတွက် နိုင်တဲ့လူတွေကို သတ်ခဲ့တယ်လို့ ကြားတယ်…” နောက်တစ်ယောက်က ထောက်ခံသည်။

ရီဖူရှင်း၏မျက်လုံးက အရောင်တစ်ချက် လက်သွားကာ တစ်စုံတစ်ခု လွဲမှားနေသည်ကို သိလိုက်သည်။ သူက တော်ဝင်ကျဲ နန်းတော်မှ တစ်ယောက်နှင့်မှ မသိပေ။ သူက တစ်စုံတစ်ယောက်ကို အပြစ်လုပ်မိသည် ဆိုပါက ထိုလူက အကြီးအကဲနန် ဖြစ်ရပေမည်။ သို့သော် သူ အကြီးအကဲနန်က ဘယ်သူဖြစ်သည်ကို မသိပေ။

အကြီးအကဲနန်ကား ထိုပြောလိုက်သော နှစ်ယောက်ထဲတွင် မပါပေ။ သူက အဆောင် တစ်ခုထဲတွင် တိတ်ဆိတ်စွာ ထိုင်ကာ ကြည့်နေသည်။ သူ၏ အဆင့်အတန်းနှင့် နေရာအရ ကိုယ်တိုင် ဝင်ပါစရာမလိုပေ။

အကယ်၍ ရီဖူရှင်းကသာ တော်ဝင်ကျဲ နန်းတော်ကို ဝင်ရောက်ခဲ့ပါက သူ့အားသတ်ရန် မလွယ်ကူတော့ပေ။

သူ့အတွက် အကာနာအဆင့် တစ်ယောက်က စကားထဲ ထည့်ပြောရန်ပင် မလိုပေ။ အကယ်၍ သူက တစ်စုံတစ်ယောက်၏ ပါရမီကို တန်ဖိုးထားပါက ထိုလူက ပါရမီရှင်ဖြစ်ကာ သူက မကြိုက်သောလူ ဆိုပါက ထိုလူက ပုရွက်ဆိတ် တစ်ကောင် ဖြစ်ပေသည်။

ရီဖူရှင်း ထုတ်ပြခဲ့သော ပါရမီက လက်ခံစရာ ရှိသော်လည်း သူက နန်ဟောင်ကို သတ်ခဲ့သည်။ နန်ဟောင်ကား သူ့နေရာကို ဆက်ခံရန် မျှော်လင့်ချက် ထားခံရသောလူ ဖြစ်သည်။

ထို့ကြောင့် ရီဖူရှင်းက တော်ဝင်ကျဲ နန်းတော်ကို ဝင်ရောက်ခြင်းအား သူက တားဆီးရန် ကြိုးစားနေခြင်း ဖြစ်သည်။ ရီဖူရှင်းက တော်ဝင်ကျဲ နန်းတော်ကို မဝင်ရောက်သရွေ့ သူ့အား သတ်ခြင်းက ပုရွက်ဆိတ် တစ်ကောင်ကို သတ်ခြင်းထက် လွယ်ကူပေမည်။

မှန်သည်… သူက အမြန်မလိုပေ။

အမြင်နှစ်ခုကြောင့်ပင် တခြားလူများက အခက်ကြုံရကာ မည်သို့ လုပ်ရမည် မသိကြတော့ပေ။ အကာနာအဆင့် တစ်ယောက်က ယန်နန်အား လက်ချိုးခဲ့ကာ မသန်စွမ်း ဖြစ်သွားစေသည်။ သူက မှန်မှန်ကန်ကန် တိုက်ခိုက်ခဲ့သင့်၏။

***


Comment

Leave a Reply

Options

not work with dark mode
Reset