Switch Mode

အပိုင်း (၃၁၆) :

မွေးရာပါ ခွန်အားကြီးသောသူ

လေ့ကျင့်ရေးကွင်းထဲတွင် ရီဖူရှင်းက လက်ဝါးသိုင်းအား လေ့ကျင့်နေသည်။ သူ၏ လှုပ်ရှားဟန်များက ထူးခြားသော စည်းချက်များ ပါဝင်နေသည်။ သူက အထိန်းအချုပ် ကင်းမဲ့စွာ လှုပ်ရှားနေသည်။

သူ၏ လက်ဝါးမှ နဂါးတစ်ကောင်၏ မာန်သွင်းသံ၊ လူဝံတစ်ကောင်၏ ဟိန်းဟောက်သံနှင့် လျှပ်စီးလက်သံများကို ကြားရသည်။ သူ၏ ခန္ဓာက နတ်ငှက်တစ်ကောင်က ကောင်းကင်တွင် သက်သောင့်သက်သာ ပျံသန်းနေသည့် အလား လှုပ်ရှားနေသည်။ အားကောင်းသော မြေဆွဲအားက သူ၏ လှုပ်ရှားဟန်အား မသက်ရောက် စေနိုင်ပေ။

လေ့ကျင့်ခန်းအား အဆုံးသတ် ပြီးနောက် သူက နှင်တံရှည်အား မလိုက်ကာ သူ၏ ရုပ်ပိုင်းဆိုင်ရာ ကြံ့ခိုင်မှု သက်သက်ဖြင့် စတင် လေ့ကျင့်သည်။ သူက ကောင်းကင်ဘုံ ကိုးဆင့်၏ စွမ်းအင်များကို စုစည်းရန် မလိုပေ။ သူက နှင်တံအား လက်ချည်း သက်သက်ဖြင့် ဝှေ့ယမ်းရန်နှင့် စည်းချက် ကိုက်ရန်သာ လိုအပ်သည်။ စွမ်းအင် စုစည်းခြင်း မရှိရာ သူ၏ လှုပ်ရှားမှုတိုင်းက လွန်မင်းစွာ ပင်ပန်းနွမ်းနယ်စေသည်။ သူက ပိုမိုအားကောင်းသော စွမ်းအင်ကို လိုအပ်သည်။ ထို့အပြင် လေ့ကျင့်ရေးကွင်းမှ ဖိအားများကြောင့် ပိုမိုခက်ခဲသည်။

သို့သော်လည်း ရီဖူရှင်းက အဖန်ဖန် လေ့ကျင့်သည်။ တစ်ခါတစ်ရံ သူက လုံးဝ မဟန်နိုင်ဘဲ ရပ်တန့် သွားရသည်။ တစ်ခါတစ်ရံ လေထု ပေါက်ကွဲမှုများ ဖြစ်ပေါ်သည်။ လူအများက သူ့အား အမြဲတမ်းလိုလို လှမ်းကြည့်ကြသည်။ ရီဖူရှင်း ထုတ်လွှတ်သော ရိုက်ချက်တိုင်းက ပိုမိုအားကောင်း လာနေသည်။ မမြင်ရသော စွမ်းအင်က ကြောက်မက်ဖွယ် နည်းလမ်းဖြင့် ပိုမိုအားကောင်း လာနေသည်။

သူက နှင်တံဖြင့် ဆက်လက်၍ လေ့ကျင့်သည်တွင် နောက်ဆုံးတွင် သူ၏ ခန္ဓာမှ အက်ကွဲသံ ပေါက်ကွဲသံများ ကြားလာရသည်။ နဂါးအော်သံနှင့် လျှပ်စီးသံများက ပိုမို၍ ပြင်းထန်လာသည်။ သူ၏ သွေးများက သွေးကြောများထဲ ရူးသွပ်စွာ ဆူပွက်နေပုံရသည်။ နောက်ဆုံးတွင် ရိုက်ချက်တစ်ချက်က ကောင်းကင်အား တုန်ခါသွားစေသည်။ သူ့ထံမှ ပိုမိုအားကောင်းသော လှုပ်ရှားဟန် ဖြစ်ပေါ်လာသည်။ သူ၏ သိုင်းပညာက ဓမ္မအဆင့်ရှစ်ကို တက်လှမ်းသွားသည်။

သူက ယူချင်းအား ကြည့်သည်။ ယူချင်းက လေထဲတွင် ရပ်လျက် ရုပ်တုများကို စိုက်ကြည့်နေသည်။ ရက်အနည်းငယ်က ယူချင်းကလည်း အဆင့်တက် သွားခဲ့သည်။ ရုပ်တုများကို ဆင်ခြင်ခြင်းက သူ၏ စိတ်စွမ်းအားကို ပိုမိုအားကောင်းစေသည်။ ထိုအရာအား ရီဖူရှင်းက ယူချင်းကို သင်ထားခြင်း ဖြစ်သည်။

လေ့ကျင့်ရေးကွင်းကား သိုင်းပညာရှင်များ အတွက် လေ့ကျင့်ရန် လွန်စွာ ကောင်းသော နေရာဖြစ်သည်။ တောင်ကုန်း အကြီးအကဲ ဇုန်ဇွီ ကျွမ်းကျင်သော ပညာမှာ သိုင်းပညာ ဖြစ်သည်။ သို့သော်လည်း ရီဖူရှင်းက ရုပ်တုများကို ဆင်ခြင်၍ သူ၏ စိတ်ဝိညာဉ် စွမ်းအားကိုလည်း လေ့ကျင့်နိုင်သည်။

ရီဖူရှင်းက နှင်တံရှည်အား ပစ်ချလိုက်သည်။ ထို့နောက် သူက ရုပ်တုများကို စိုက်ကြည့်ကာ တရားထိုင်သည်။ ရုတ်တရက် ရုပ်တုများက အသက်ဝင် လာကြသည်။ သူတို့၏ မျက်လုံးများ ပွင့်လာကြကာ လွန်စွာ အားကောင်းသော အရှိန်အဝါက သူ၏ စိတ်ကို လာရောက် ဖိအားပေးသည်။

ရီဖူရှင်းက အလွန် တည်ငြိမ်သော ပုံဟန်ရှိသည်။ သူက ထိုအရှိန်အဝါအား သူ၏ စိတ်အင်အားဖြင့် ခုခံကာ ဆက်လက်၍ စိုက်ကြည့်နေသည်။ မကြာမီ သူ၏နဖူးမှ ချွေးစေးများ ပြန်လာသည်။ စိတ်ဝိညာဉ် ဖိအားဒဏ်က ရုပ်ခန္ဓာ ဖိအားဒဏ်ထက် ခံရခက်သည်။ ရီဖူရှင်းက မကြာခဏ အနားယူရသည်။ ထို့နောက် သူက သိုင်းပညာအား လေ့ကျင့်ပြန်သည်။

နောက်ရက် အနည်းငယ်တွင် ရီဖူရှင်းက စိတ်ဝိညာဉ် စွမ်းအား အဆင့်တက် သွားသည်။ သူ၏ သိုင်းပညာနှင့် မှော်ပညာ နှစ်ခုလုံးက ဓမ္မအဆင့်ရှစ်ကို တက်ရောက်သွားသည်။ သူကား အကာနာအဆင့်နှင့် တဖြည်းဖြည်း နီးကပ်လာပြီ ဖြစ်သည်။ သူက ချင်းကျူ ကျောင်းတော်တွင် လေ့ကျင့်စဉ်တုန်းက အကာနာ အဆင့်ကား သမိုင်းထဲတွင်သာ ရှိသည်။

ရီဖူရှင်းက မတ်တတ်ရပ်လိုက်ကာ နှင်တံအား ဆုပ်ကိုင်လျက် အပေါ်ကို မော့ကြည့်လိုက်သည်။ ထို့နောက် သူက ကျယ်လောင်စွာ ကြေညာလိုက်သည်… “အဆင့်နိမ့် အကာနာက ဘယ်သူမဆို ကျုပ် စိန်ခေါ်တယ်… ” သူ၏ အသံက လေ့ကျင့်ရေး ကွင်းတစ်ခုလုံးကို ကြားစေနိုင်သည်။ ချက်ချင်းပင် မရေမတွက်နိုင်သော မျက်လုံးများက ရီဖူရှင်းထံ ရောက်လာသည်။ သူက စိန်ခေါ်မှုတွေကို လက်ခံတော့မည်လော။

လွန်ခဲ့သော နှစ်လခန့်က ရီဖူရှင်းက ရှာဟော့ချူအား အနိုင်ယူခဲ့သည်။ ထို့နောက် လူတိုင်းက သူ့အား စိန်ခေါ်လိုကြသည်။ ယခုတွင်ကား သူက ဓမ္မအဆင့်တွင်သာ ရှိသေးသော်လည်း အကာနာ အဆင့်နိမ့်များ အားလုံးကို စိန်ခေါ်နေသည်။ အဆင့်နိမ့် အကာနာများအား အဆင့်တစ်ကနေ သုံးအထိ အကျုံးဝင်ပေသည်။

ကောင်းကင်တွင် လူတစ်ယောက်က ဝင့်ကြွားစွာ ရပ်လျက် ရီဖူရှင်းကို ငုံ့ကြည့်နေသည်။ သူ့တွင် ကြီးမားသော ခန္ဓာကိုယ်ရှိပြီး တိုသော ဆံပင်က သူ၏ ရုပ်ရည်အား ပိုမိုကြမ်းတမ်းစေသည်။

သူကား အကာနာအဆင့်မှ အားကောင်းသော တန်ခိုးရှင် တစ်ဦးဖြစ်သူ မိုဘီ ဖြစ်သည်။

“စီနီယာ မို… ” လူအများအပြားက အားပေးကြသည်။ မိုဘီကား ချွန်တောင်၏ ထူးချွန်သော တပည့်တစ်ဦး ဖြစ်သည်။ သူက လေ့ကျင့်ရေးကွင်းသို့ အားကောင်းသော အရှိန်အဟုန်နှင့် ဆင်းသက်လာသည်။

ရီဖူရှင်းက အပေါ်ကို မော့ကြည့်လျှင် သူ့ထံသို့ ဆင်းလာသူမှ လူမဟုတ်ဘဲ တောင်တစ်လုံးအလား ခံစားရသည်။

ဘုန်း… အဖြူရောင် အလင်းများ ဖြာထွက်လာသည်။ မိုဘီ၏ ခြေထောက်များက တောင်နှစ်လုံးအလား မြေပြင်နှင့်ထိကာ မြေပြင်က တုန်ခါသွားသည်။ ဆက်တိုက်ပင် မိုဘီက ရီဖူရှင်းထံသို့ ခုန်ဝင်လာသည်။

ရီဖူရှင်းက ခေါင်းမော့လိုက်သည်။ သူ၏ လက်ထဲမှ နှင်တံက စတင်လှည့်ပတ် လာသည်။ အရှိန်အဝါက တဖြည်းဖြည်း အားကောင်းလာ၏။ နှင်တံလှည့်ပတ်မှုကြောင့် တဖြည်းဖြည်းဖြင့် ကြောက်မက်ဖွယ် လေပွေကြီး ဖြစ်လာသည်။ သဘာဝစွမ်းအင်များ အားလုံးက ထိုနေရာတွင် စုစည်း လာနေကြသည်။ ရီဖူရှင်းက နှင်တံအား ဆကာ သူ့ထံကို ခုန်ဝင်လာသော မိုဟီအား ဆီးကာရိုက် လိုက်သည်။ ချက်ချင်းပင် နှင်တံက လေထဲတွင် နဂါးတစ်ကောင်က ပျံသန်းသွားသည့်အလား မိုဟီထံသို့ တိုးဝင်သွားသည်။

သူတို့နှစ်ယောက် ရင်ဆိုင်မိလျှင် လေထုများက အဆက်မပြတ် ပေါက်ကွဲကြသည်။ တောင်များ ပြိုဆင်းကာ ကျောက်တုံးများ ပြိုကွဲသည်။ မိုဘီ၏ ခန္ဓာကိုယ်က သူဆင်းသက် လာစဉ်ကထက် အပေါ်ကို လျင်မြန်စွာ မြောက်တက်သွားပြီး ကုန်းပေါ်ကို ဖွဲအိတ်တစ်လုံးလို ကျသည်။ တစ်စုံတစ်ယောက်က ဒဏ်ရာရသွားသော မိုဘီအား သွားထူသည်။ မိုဘီ၏ ပါးစပ်မှ သွေးများ အဆက်မပြတ် ထွက်လာကာ သူ၏ မျက်နှာက ပြာနှမ်းသွားသည်။

“ဒါ… ” သူတို့အားလုံး တုန်လှုပ်ရသည်။ ထိုမျှ အားကောင်းစွာ ဆင်းသက်သွားသော မိုဘီက ဆိုးရွားစွာ ရှုံးနိမ့်လိမ့်မည်ဟု သူတို့ မထင်ထားကြပေ။

“ဘယ်သူ ရှိသေးလဲ…” ရီဖူရှင်းက သူ၏ နှင်တံအား ဘေးတွင် ထောက်ကာ အပေါ်မှ လူများကို မော့ကြည့်သည်။ တူးမြောင်းကြီးထဲမှ ဖိအားက တည်ရှိနေသော်လည်း ရီဖူရှင်း မည်သို့မှ မခံစားရတော့ပေ။ သူ၏ ခန္ဓာကိုယ်က လွန်စွာ သန်မာနေပြီဖြစ်ကာ သူက နှင်တံအား ဝှေ့ယမ်းလျှင် များစွာသော စွမ်းအားများက နောက်မှ လိုက်ပါကြသည်။ သူမည်မျှ အားကောင်းသည်ကို ခန့်မှန်းနိုင်သည်။ ယခု ဓမ္မအဆင့် ရှစ် ရီဖူရှင်းက အကာနာအဆင့်မှ မိုဘီအား အနိုင်ယူခဲ့သည်။

ရီဖူရှင်း၏ အသံက လေ့ကျင့်ရေး ကွင်းတစ်ခုလုံးကို ပျံ့နှံ့သွားလျှင် သူတို့အားလုံးက ထိုလူငယ်လေးအား ကြည့်ကြသည်။ ချွန်တောင်မှ တပည့်များက မလိုလားသော အမူအရာများရှိနေကြသည်။ ချွန်တောင်ကား သူတို့နေရာဖြစ်သည်။ သို့သော် ရီဖူရှင်းက သူ၏နေရာလို ပြုမူနေသည်။ သို့သော်လည်း မိုဘီက ရှုံးနိမ့်ခဲ့ရာ ရီဖူရှင်းအား အကာနာ အဆင့်နိမ့်မှ လူအနည်းငယ်သာ ယှဉ်နိုင်သည်။

ထိုအချိန်တွင် လွန်စွာ ကြီးမားသော လူတစ်ယောက် အောက်ကို ဆင်းလာသည်။ ဝုန်းခနဲ မြည်ကာ မြေပြင်က တုန်ခါသွားသည်။ ပတ်ဝန်းကျင်မှ လူများအားလုံး အံ့အားသင့် သွားကြသည်။ သူတို့က တူးမြောင်းထဲကို ကြည့်လျှင် လူ့ဘီလူးကြီး တစ်ကောင်အား တွေ့ရသည်။

ရှေ့မှ လူအားကြည့်ကာ ရီဖူရှင်းကလည်း အံ့အားသင့်ရသည်။ ဤမျှကြီးမားသော ခန္ဓာနှင့် လူအား သူတစ်ခါမှ မမြင်ဖူးပေ။ ယူချင်း၏ ခန္ဓာကိုယ်က ကြီးမားသော်လည်း ဤလူကား ယူချင်းထက်ပင် အရပ်ရှည်သည်။ သူ၏ တစ်ကိုယ်လုံးကို ကြွက်သား အဖုအထစ်များဖြင့် ဖုံးအုပ်ထားပြီး တောင်တစ်လုံး အလား ရပ်နေသည်။

“ထူလိ တိုက်ခိုက်တော့မှလား…” လူအများက ထိုမြင်ကွင်းကို အံ့အားသင့်စွာ ကြည့်ကြသည်။ သူတို့က တစ်ဖက်မှ လက်နောက်ချိတ်လျက် ကြည့်နေသော လူငယ်အား လှမ်းကြည့်ကြသည်။ ထိုလူငယ်ကား တောင်ကုန်း အကြီးအကဲ ဇုန်ဇွီ၏ လက်ရင်း တပည့်ဖြစ်သူ ကျုံးလီဟန် ဖြစ်သည်။ သူကား ချွန်တောင်၏ နံပါတ်တစ် တပည့်ဖြစ်သည်။ သူက နိုဘယ်အဆင့်ကို ရောက်နေပြီးဖြစ်ကာ လွန်စွာ ပါရမီကောင်းသည်။

ထူလိကား တောင်ကုန်း အကြီးအကဲ ဇုန်ဇွီ၏ တပည့်ဖြစ်သော်လည်း ကျုံးလီဟန်၏ အမိန့်ကိုသာ လိုက်နာသည်။ သိသာစွာပင် ထူလိ ထွက်ပေါ်လာခြင်းက သူစီစဉ်ခြင်း ဖြစ်သည်။

ကျုံးလီဟန်က ထိုနေရာတွင်ပင် လက်အား တင်ပါးတွင် ချိတ်လျက် ရပ်နေသည်။ ထူလိ မည်မျှ သန်မာသည်ကို သူသိသည်။ သူ့တွင် အားအကောင်းဆုံးသော ရုပ်ပိုင်းဆိုင်ရာ သန်မာမှု ရှိသည်။

ရီဖူရှင်းက ချွန်တောင်၏ အဆင့်အတန်းကို စိန်ခေါ်သည်။ ထူလိက ချွန်တောင်ကုန်းက မည်မျှ အားကောင်းသည်ကို ပြသနိုင်လိမ့်မည်ဟု ကျုံးလီဟန် ယုံကြည်သည်။

ထူလိ၏ ခန္ဓာကိုယ်ကြီးက သူ့အား ကြွက်သား တောင်ကြီးအလား ထင်မြင်ရသည်။ သူက ဘေးကို လျှောက်သွားကာ လွန်စွာ ကြီးမားသော တူကြီးတစ်လက်အား ကောက်ကိုင်သည်။ သူ၏ မျက်လုံးက လူသတ်လိုသော အငွေ့အသက်များနှင့် ပြည့်နေသည်။ ထူလိက သူ၏ ခန္ဓာကိုယ်ကြီးဖြင့် စတင်ပြေးလွှားသည်။ သူ၏ ခြေလှမ်းတိုင်းက တူးမြောင်းကြီးအား တုန်ခါစေသည်။

ရီဖူရှင်းက ပြိုင်ဖက်ထံမှ ဖိအားကို ခံစားရသည်။ သူက နှင်တံကို စတင်ဝှေ့ယမ်းသည်။ နှင်တံက အဆက်မပြတ် လည်ပတ်နေကော ထူလိအတွက် ရိုက်ချက်တစ်ခု အဆင်သင့် ပြင်ဆင်ထားသည်။

ထူလိက သူ၏ တူကြီးဖြင့် ရီဖူရှင်း၏ နှင်တံကို လှမ်းထုသည်။ တူနှင့် နှင်တံ ထိရိုက်မိသည်။

ဘန်း… လေထုကို လှုပ်ယမ်း သွားစေသော အသံက လူတိုင်းအား ကြားရစေသည်။ ရီဖူရှင်း နောက်ဆုတ်ပေးရသည်။ သူက နှင်တံအား ထပ်မံဝှေ့ယမ်းက နောက်ထပ် တိုက်ခိုက်မှုအတွက် အဆင်သင့် ပြင်သည်။ နောက်ထပ် တူနှင့် နှင်တံ ထိရိုက်မိပြန်ကာ ရီဖူရှင်း နောက်ဆုတ်သွားရပြန်သည်။ ရီဖူရှင်းက နှင်တံအား ထောက်က ဟန်ချက်ထိန်းလိုက်သည်။

“အကာနာ အဆင့်သုံး… မင်းက မွေးရာပါ အားကောင်းတဲ့လူပဲ…” ရီဖူရှင်းက ထူလိကို ကြည့်သည်။ သူကား ယူချင်းကဲ့သို့ မွေးရာပါ သန်မာသူဖြစ်သည်။

ဘန်း… ဘန်း… ထူလိက သူ့ထံသို့ တစ်လှမ်းချင်း ပြေးလာသည်။ ရုတ်တရက် လူတစ်ယောက်က သူ့ထံသို့ ပြေးသွားသည်။ သူကား ယူချင်းဖြစ်သည်။ တူကြီးတစ်လက်အား ကိုင်ကာ ယူချင်းက နတ်ဆိုးတစ်ပါးအလား ကောင်းကင်မှ ဆင်းသက်လာကာ ထူလိအား ရိုက်ချလိုက်သည်။

ထူလိက သူ၏ တူကြီးအား လက်နှစ်ဖက်ဖြင့် ကိုင်ကာ ယူချင်းအား ပြန်လည် လှမ်းရိုက်သည်။ တူနှစ်လက် ရင်ဆိုင်မိကာ ယူချင်းက နောက်ကို လွင့်စဉ် သွားသည်။

“ဘယ်လောက် အားကောင်းလိုက်သလဲ…” ရီဖူရှင်းက ပြိုင်ဖက်အား စိုက်ကြည့်လိုက်သည်။ ထူလိကား ထိုကောင်းကင်မှ ရုပ်တုတစ်ခုအလား ထင်ရသည်။ သူ့တွင် မွေးရာပါ သန်မာသော ခန္ဓာရှိပြီး လျိုဂျန်လန်ထက် ပိုစွမ်းသည်။

ကုန်းပေါ်မှ လူများက တိုက်ပွဲအား ကြည့်နေကြသည်။ အကာနာအဆင့်မှ တစ်ယောက်က ရီဖူရှင်းအား အနိုင်ယူနိုင်မည် ဆိုလျှင် သူကား ထူလိဖြစ်ရမည်။ တောင်ကုန်း အကြီးအကဲ ဇုန်ဇွီကပင် ထူလိက သူ့တစ်သက်တွင် မြင်ဖူးသမျှ မွေးရာပါ  အားအကောင်းဆုံးသူ ဖြစ်ကြောင်း ပြောခဲ့သည်။ သို့သော် ထူလိက ဉာဏ်အနည်းငယ် ထိုင်းသည်။

ဘန်း… ။ ထူလိက ရီဖူရှင်းထံ လှမ်းလာသည်။ ရီဖူရှင်းက လှမ်းအော်သည်… “ဟေ့ကောင်ကြီး…” ထူလိက လျှောက်လာရာမှ ရပ်လိုက်ပြီး သူက ရီဖူရှင်းကို ဝါးမျိုတော့မည့်အလား ကြည့်သည်။ “မင်းက တော်တော် သန်မာတာပဲ… မင်းနာမည်ဘာလဲ… ”

ထူလိက သူ့အား ဒေါသတကြီး ကြည့်ကာ ဒုန်းစိုင်း ပြေးလာသည်။ သူ၏ ခြေလှမ်းတိုင်းက မြေပြင်အား တုန်ခါစေသည်။ နောက်ထပ် တူဖြင့် ထူရိုက်သံတစ်ခု ထွက်ပေါ်လာသော်လည်း ရီဖူရှင်းက လျှပ်တစ်ပြက် ရှောင်တိမ်းကာ ကောင်းကင်သို့ ထိုးတက်သွားသည်။ ကောင်းကင်မှ ရပ်လျက် သူက ထူလိအား စိုက်ကြည့်သည်။

ထူလိက ရီဖူရှင်းအား မော့ကြည့်သည်။ သူ၏ မျက်လုံးများက ဒေါသကြောင့် နီရဲနေသည်။ နောက်ထပ် တိုက်ခိုက်မှုတစ်ခုက ရီဖူရှင်းထံ တိုးဝင်လာသည်။ သို့သော် ရီဖူရှင်းက ဆက်လက်၍ ရှောင်တိမ်းနေသည်။ သူက ထူလိအား တိုက်ရိုက် ရင်ဆိုင်ရန် စိတ်ကူးမရှိတော့ပေ။ လူအများက စိတ်ဝင်စား သွားကြသည်။ တိုက်ရိုက် မတိုက်ခိုက်ခြင်းက ကောင်းမွန်သော ဆုံးဖြတ်ချက်ဖြစ်သည်။ ထူလိနှင့် ရီဖူရှင်းအကြား တန်ခိုးအဆင့်က လွန်စွာ ကွာဟသည်။

“ဘယ်လောက် တိုက်ရခက်တဲ့ အကောင်လဲ…” ရီဖူရှင်းက မှတ်ချက်ချလျှင် ထူလိက သူ့ကို ဒေါသတကြီး ကြည့်သည်။

“ရှောင်တာ… မင်းက ဒါပဲ လုပ်နိုင်တာလား… ” ထူလိက ပြောသည်။

“တိုက်ပွဲတစ်ခုမှာ အားရှိတာက အရာအားလုံး မဟုတ်ဘူး… ငါ့မှာ မင်းကို အနိုင်ယူဖို့ နည်းလမ်း ရာချီပြီး ရှိတယ်… ဒါပေမဲ့ ငါက မင်းကို ဒဏ်ရာ မရစေချင်ဘူး…” ရီဖူရှင်းက များစွာသော ပါရမီရှင်များကို တွေ့ဖူးသော်လည်း ထူလိကား ယူချင်းကဲ့သို့ သန်မာသော ရှားပါးသော ပါရမီရှင်ဖြစ်သည်။

လူအများက သူ၏ စကားကို ကြားကာ ဆွံ့အသွားကြသည်။ ရီဖူရှင်းကား ထိုမျှ ရှက်စရာ ကောင်းအောင် အဆက်မပြတ် ရှောင်တိမ်းနေရသည်။ သို့တိုင်အောင် သူက ထိုအဓိပ္ပာယ် မရှိသော စကားများကို ပြောနိုင်သည်။

***


Comment

Leave a Reply

Options

not work with dark mode
Reset