Switch Mode

အပိုင်း (၂၇၀)

ပြင်ဆင်ထားသော တိုက်ပွဲတစ်ခု

ရှောင်ဝူကျိတို့ ခြောက်ယောက် ကလည်း ပြင်ဆင်ထားပြီး ဖြစ်သည်။ ယွီချိန်ချင်းက သူတို့အား သတိပေးသည်… “သတိထား….”

သူတို့ ခြောက်ယောက်က အရှေ့မြေရိုင်း ကျောင်းတော်၏ နာမည်ကျော် ပါရမီရှင်များ ဖြစ်သည့်တိုင် ချင်ပြည်ထောင် ကလည်း သူတို့အား ရင်ဆိုင်ရန် ကြိုတင် ပြင်ဆင် ထားသည်။

မနေ့က လုနန်ထျန်း ရှုံးနိမ့်ခဲ့သည်။ ယခုတစ်ကြိမ်ကား ချင်ပြည်ထောင်နှင့် ဒွန်ဟွာကလန်တို့က သူတို့၏ ဂုဏ်သိက္ခာအား ပြန်ဆည်ရန် အခွင့်အရေး ဖြစ်သည်။ သူတို့က နောက်တစ်ကြိမ် ရှုံးနိမ့်မှုကို လက်မခံနိုင်ပေ။ ထို့ကြောင့် တိုက်ပွဲက ခက်ခဲမည်မှာ သေချာသည်။

အရှေ့မြေရိုင်း ကျောင်းတော်က လူများက သူတို့ ဘာတွေကို ရင်ဆိုင်ရမည်ကို သိကြသည်။ သို့သော်လည်း စိန်ခေါ်ခံရသူများက အရှေ့မြေရိုင်း ကျောင်းတော်၏ ပါရမီရှင်များ ချည်းသာ ဖြစ်ကြသည်။ ထို့ကြောင့် တစ်ဖက်လူက ကြိုတင် ပြင်ဆင် ထားသည့်တိုင် သူတို့က ငြင်းပယ်ရန် မဖြစ်နိုင်ပေ။

ချိန်ရှင်းမူနှင့် ချင်မုံရိုတို့က တင်ပလ္လင်ခွေ ထိုင်လိုက်ကြသည်။ ချင်မုံရိုက ကု့ချင်းအား ထုတ်လိုက်ချိန်မှာ ချိန်ချင်းမူက ပလွေကို သုံးမည့်အစား ဗျပ်စောင်းအား ထုတ်လိုက်၏။ ထိုတူရိယာများကို မြင်လျှင် လူအများက အံ့အားသင့် သွားကြသည်။ ရှေးခေတ် ကတည်းက ကု့ချင်းနှင့် ဗျပ်စောင်းတို့မှာ အလွန် လိုက်ဖက်ညီသော တူရိယာများ အဖြစ် လူသုံးများသည်။ ဤတစ်ကြိမ်တွင်လည်း သူတို့ စုံတွဲက ကု့ချင်းနှင့် ဗျပ်စောင်းကို အတူတူ ယှဉ်တွဲ တီးခတ်ကြမည် ဖြစ်သည်။

ကု့ချင်းနှင့် ဗျပ်စောင်းသံက တစ်ချိန်တည်းမှာ ထွက်လာသည်။ ကု့ချင်း၏ သံစဉ်က နှင်းဖွဲများအလား ညင်သာသော အချိန်တွင် ဗျပ်စောင်းသံကား နဂါးတစ်ကောင်လို ထည်ဝါ ခန့်ညားလှသည်။ ချက်ချင်းပင် သံစဉ်များက မမြင်ရသော အရှိန်အဝါ တစ်ခု အနေဖြင့် ဖြစ်ပေါ်လာကာ သူတို့၏ ရှေ့မှ လူငယ် လေးယောက်ထံသို့ ဆင်းသက် လာသည်။ သူတို့၏ ကိုယ်ရောင် ကိုယ်ဝါများက ချက်ချင်း အလွန်အမင်း အားကောင်း သွားသည်။ လောကမှ စွမ်းအားများက ဂီတသံများနှင့် ပေါင်းစပ်သွားပုံ ရသည်။ ကြောက်မက်ဖွယ် အားအင်များက ဒွန်ချင် ကျောင်းတော်၏ ကျောင်းသား လေးယောက်ထံတွင် အားကောင်းစွာ စုစည်း လာနေကြသည်။

နဂါးများက သူတို့ လေးယောက်၏ နောက်တွင် ဖြစ်ပေါ်လာကာ လေထဲတွင် ပျံဝဲနေသည်။ ရွှေရောင် နဂါးများကား တကယ့် အစစ်အမှန် နဂါးများအလား ကြောက်မက်ဖွယ် ကောင်းလှသည်။ ပိုမို ထိတ်လန့်ဖွယ် ကောင်းသည်မှာကား သူတို့ လေးယောက်၏ အရှိန်အဝါများက ဂီတသံစဉ်နှင့် ပေါင်းစပ်သွားပုံ ရကာ လွန်စွာ ပြင်းထန်သော ဖိအားများ ဖြစ်ပေါ်လာသည်။

ရှောင်ဝူကျိတို့ အုပ်စုက စတင် တိုက်ခိုက်လိုက်သည်။ ရေခဲစွမ်းအင် ထွက်ပေါ်လာကာ ထိုလေးယောက်အား အေးခဲရန် ကြိုပမ်းကြသည်။

ရုတ်တရက် နဂါးအော်သံတစ်သံ ကြားကြရသည်။ တကယ့် နဂါးတစ်ကောင် မွေးဖွားလာသည့် အလား မြေပြင်က တုန်ခါသွားသည်။ အသံအားလှိုင်းက မှော်တိုက်ကွက်အား ပြိုပျက်စေသည်။ ပရိသတ်များ အံ့အားသင့် သွားကြသည်။ သူတို့၏ နားစည်များ အစိတ်စိတ် အမြွှာမြွှာ ဖြစ်သွားသလို ခံစားကြရသည်။ စိတ်စွမ်းအား နည်းသူများကား ထိုအော်သံကြောင့် ပျော့ခွေကျလုနီးပါး ဖြစ်သွားသည်။

ရှောင်ဝူကျိတို့ အုပ်စုက ထို့ထက် ပိုမိုသော အားလှိုင်းများကို ရင်ဆိုင် ကြရသည်။ သူတို့၏ ခန္ဓာကိုယ်များ တုန်ခါ သွားကြသည်။ ထိုအော်သံက ဤမျှ အားကောင်းမည်ဟု သူတို့ မထင်မှတ် ထားခဲ့ကြပေ။

ပိုမို ဆိုးရွားသည်ကား သူတို့၏ အော်သံအပြင် နဂါးလက်ဝါး ရိုက်ချက်များပင်။ လက်ဝါးများက လေထုကို ခွင်းလျက် သူတို့ထံ တိုးဝင်လာပြီး လက်ဝါးများက တစ်ခုတည်း အဖြစ် ပေါင်းစပ်သွားသည်။ ချက်ချင်းပင် ကြောက်မက်ဖွယ် ကောင်းသော နဂါးကြီးတစ်ကောင် ဖြစ်ပေါ်လာကာ တန့်ယွီနှင့် တခြား အရှေ့မြေရိုင်း ကျောင်းတော်မှ တပည့်များထံသို့ ရောက်လာသည်။

သူတို့က ခုနကပင် အော်သံ၏ ဒဏ်ကို ခံစားခဲ့ရသည်။ ထိုမာန်ပြင်းသော နဂါးက သူတို့ထံ ရောက်ရှိ လာသောအခါ သူတို့၏ မျက်နှာ အမူအရာများ ပြောင်းလဲ သွားကြသည်။ သူတို့က ဓမ္မများကို ထုတ်၍ တတ်နိုင်သမျှသော စွမ်းအားများဖြင့် ခုခံရန်သာ တတ်နိုင်တော့သည်။

ထိုအခိုက်တွင် အားကောင်းသော စိတ်ဝိညာဉ် တိုက်ခိုက်မှု တစ်ခုက သူတို့၏ စိတ်နယ်ပယ်ထဲကို တိုးဝင်လာသည်။ ထို့နောက် ကြီးမားသော နဂါးကြီး ရောက်ရှိလာသည်။

ဘန်း …. လွန်စွာ ပြင်းထန်သော ပေါက်ကွဲမှု တစ်ခု ဖြစ်ပွားသည်။ လူနှစ်ယောက်ကား ကောင်းကင်သို့ လွင့်စဉ်သွားသည်။ သူတို့က လေထဲတွင် သွေးများ အန်ကျပြီး စင်မြင့်အောက်ကို ရောက်သွားသည်။ သူတို့ကား တိုက်ကွက် တစ်ကွက်မျှဖြင့် ရှုံးနိမ့်ခဲ့သည်။

“ဒါ ပူးပေါင်း တိုက်ကွက် တစ်ခုပဲ….” လူတိုင်းက စင်မြင့်ပေါ်မှ လူလေးယောက်ကို ကြည့်လိုက်ကြသည်။ ထိုတိုက်ကွက်ကား ပူးပေါင်း တိုက်ကွက်မျှသာ မဟုတ်ပေ။ သူတို့၏ တိုက်ခိုက်မှုက ချင်မုံရိုနှင့် ချိန်ရှင်းမူတို့၏ စွမ်းအင် အားဖြည့်မှုများလည်း ပါဝင်ပေသည်။

“အဲဒါ တော်ဝင် နဂါး တိုက်ကွက်ပဲ…”

ထိပ်သီး အင်အားစုများ မြင်သည်ကား တန့်ယွီတို့၏ ရှုံးနိမ့်မှု မဟုတ်ဘဲ ထိုလေးယောက်၏ စွမ်းရည်များကို ဖြစ်သည်။ သူတို့ လေးယောက်က သဘာဝ စွမ်းအင်များအား နဂါးများအဖြစ် ပြောင်းလဲခဲ့ကြသည်။ စွမ်းအားမြင့် တန်ခိုးရှင်များ အတွက် ထိုသို့ လုပ်ရန်မှာ သိပ်ခက်ခဲလှသည် မဟုတ်သော်လည်း သူတို့ လေးယောက် သုံးသော နည်းစနစ်က ချင်ပြည်ထောင်မှ နည်းစနစ်ဖြစ်ရာ ထူးခြားပေသည်။

ထိုနည်းစနစ်၏ အမည်ကား တော်ဝင်နဂါး ဖြစ်သည်။ တော်ဝင်နဂါး နည်းစနစ်အား ချင်ပြည်ထောင်၏ မျိုးဆက်များကိုသာ လက်ဆင့်ကမ်းလေ့ ရှိသည်။ တော်ဝင်နဂါးအား အဆင့်မြင့်စွာ ကျင့်ကြံနိုင်လျှင် လေ့ကျင့်သူက နောင်တွင် နဂါးကိုပင်လျှင် စီးနင်းနိုင်သည်ဟု အဆိုရှိသည်။ အခြေခံ အဆင့်တွင်ပင်လျှင် လေ့ကျင့်သူက နဂါးတစ်ကောင်၏ ကြံ့ခိုင်မှုနှင့် သန်စွမ်းမှုများ ရှိသည်။

ထိုအားကောင်းသော ဒွန်ချင် ကျောင်းတော်သား လေးယောက်လုံးက ထိုနည်းစနစ်အား လေ့ကျင့်ကြသည်။ ထိုအရာက ဘာကို ဆိုလိုသနည်း။ သူတို့အားလုံးက ချင်ပြည်ထောင်၏ မျိုးဆက်များလား။ သို့မဟုတ်လျှင် ချင်ပြည်ထောင်က ပြင်ပ မျိုးနွယ်များကို သူတို့၏ မူပိုင် နည်းစနစ်ကို သင်ပေးခဲ့သည်လား။ ဤသို့ဆိုလျှင် ချင်ပြည်ထောင်က အလွန် ထိတ်လန့်ဖွယ် ကောင်းသော ခြေလှမ်းကို လှမ်းခဲ့ပြီဟု ဆိုနိုင်သည်။

ဘုန်း …. သူတို့ လေးယောက်က ရှေ့ကို တက်လာသည်။ သူတို့က လျှပ်စီးအလား လျင်မြန်စွာ ရွေ့လျား လာကြသလို နဂါးစွမ်းအင်များက လှည့်ပတ်ထားသည်။ သူတို့က စုမူဂီနှင့် ကျင့်တန်တို့ထံ လေ၏ အလျင်ဖြင့် ပြေးသွားကြသည်။

သူတို့၏ နည်းစနစ်ကား ရိုးရှင်းပေသည်။ အားနည်းသူ များအား အရင်ဦးဆုံး ရှင်းပစ်ခြင်းပင်။ ရှောင်ဝူကျိနှင့် ယွီချိန်ချင်းတို့ကား အသန်မာဆုံးဖြစ်ရာ ပထမဆုံး တိုက်ခိုက်မည့် ပစ်မှတ် မဟုတ်ပေ။ ကျန်လူများကို ရှင်းပြီးမှ သူတို့က အားအကောင်းဆုံး နှစ်ယောက်နှင့် ရင်ဆိုင်မည် ဖြစ်သည်။

သူတို့ လေးယောက်ကား ပြိုင်ဘက်ကင်း သကဲ့သို့ အားကောင်းလှသည်။ စုမူဂီ၏ အမူအရာက အနည်းငယ် ပြောင်းလဲသွားသည်။ သူတို့အတွက် ထိုအားကောင်းသော ဒွန်ချင် ကျောင်းသား လေးယောက်နှင့် ရင်ဆိုင်ရန် အလွန်ခက်ခဲဟန် ရှိနေသည်။ အထူးသဖြင့် သူတို့ လေးယောက်အား စိတ်ဝိညာဉ် တန်ခိုးရှင် နှစ်ယောက်က ထောက်ပံ့ ထားသည်လည်း ပါ၏။

ဘုန်း….။

ထိုအခိုက်တွင် လူတစ်ယောက်က နတ်ဘုရားတစ်ပါးလို လေထဲမှ ဆင်းသက်လာသည်။ ကြောက်မက်ဖွယ် အားလှိုင်းက နောက်က လိုက်ပါလာပြီး အောက်ကို ဆင်းသက်လာသည်။ တောင်တစ်လုံး ပေါ်လာပြီး ထိုလေးယောက်ထံ ကျဆင်းလာသည်။ သူတို့ လေးယောက်က လက်အား မြှောက်လိုက်လျှင် နဂါးများက ကောင်းကင်ကို ထိုးတက်သွားသည်။ သို့သော် ရှောင်ဝူကျိက လျှပ်တစ်ပြက်ပင် သူတို့ရှေ့ကို ရောက်လာကာ တိုက်ကွက်အား ကာကွယ် လိုက်သည်။

နဂါးနွယ်ပင်များ ပေါ်လာကာ သူတို့ လေးယောက်ထံသို့ တိုးဝင် သွားကြသလို အလွန် အားကောင်းသော ဖိအားကလည်း တစ်ပြိုင်နက်တည်း ဆင်းသက်လာသည်။ သို့သော် တိုက်ကွက် ပြိုလဲသည်နှင့် ကြောက်မက်ဖွယ် ကောင်းသော အသံလှိုင်းတစ်ခု ရောက်လာကာ နဂါးသဏ္ဌာန် နွယ်ပင်များ အပိုင်းပိုင်း အစစ ဖြစ်သွားသည်။ တစ်ဆက်တည်းပင် သံစဉ်က အလင်းအဖြစ် ပြောင်းလဲသွားပြီး ဒွန်ချင် ကျောင်းသား လေးယောက်အား လွှမ်းခြုံသွားပြီး မြေဆွဲအားကို ကာကွယ်ပေးသည်။ သူတို့၏ ခန္ဓာကိုယ်အား လေဓာတ်များပင်လျှင် စီးဆင်းလာသည်။

ဘန်း…။

သူတို့ လေးယောက်က ရှေ့ကို တစ်ပြိုင်နက်တည်း တက်လာလျှင် စင်မြင့်က တုန်ခါသွားသည်။ ရှောင်ဝူကျိက ပြောသည်…. “သူတို့နောက်က နှစ်ယောက်ကို သွားတိုက်လိုက်…. ငါက သူတို့ လေးယောက်ကို ရင်ဆိုင်မယ်…” ယွီချိန်ချင်း၊ စုမူဂီနှင့် ကျင့်တန်တို့က ခေါင်းညိတ်ကာ လှုပ်ရှားလိုက်ကြသည်။ ယွီချိန်ချင်းက ချိန်ရှင်းမူထံသို့ တိုက်ရိုက် ပြေးသွားသော အချိန်တွင် စုမူဂီနှင့် ကျင့်တန်တို့က ချင်မုံရိုထံ ပြေးသွားကြသည်။ သူတို့က ပစ်မှတ်ကို ချက်ချင်း သတ်မှတ် လိုက်ကြသည်။

ချိန်ရှင်းမူက သူတို့အား ဂရုမစိုက်ပေ။ သူက ကြိုး နှစ်ဆယ့်ငါးချောင်း ဗျပ်စောင်းအား အလွန် လျင်မြန်စွာ တီးခတ်ပြီး တော်ဝင် မြင့်မြတ်သော သံစဉ်များအား ထုတ်ဖော် လိုက်သည်။ ချင်မုံရိုထံ ပြေးသွားသော စုမူဂီ၊ ကျင့်တန်တို့က သူတို့၏ စိတ်နယ်ပယ်ထဲအား အပ်အစင်းပေါင်း များစွာဖြင့် ထိုးစိုက် လာသည်ကို ခံစားကြရသည်။ မကြာမီ ချင်မုံရို၏ ကု့ချင်းထံမှ သံစဉ်များက နဂါးများအဖြစ် ပြောင်းလဲသွားကာ သူတို့နှစ်ယောက်ထံ ရောက်လာသည်။ စုမူဂီနှင့် ကျင့်တန်တို့ အဝေးကို လွင့်စဉ်သွားသည်။

“ဘယ်လို…” လူအများ၏ ရင်ဘတ်များ တုန်ခါသွားကြသည်။ ထိုပြင်းထန်သော တိုက်ပွဲတွင် အရှေ့မြေရိုင်း ကျောင်းတော်မှ လေးယောက်က ရှုံးနိမ့်သွားပြီး ဖြစ်သည်။

ဒွန်ချင် ကျောင်းတော်က တစ်စု တစ်စည်းတည်း တိုက်ခိုက်နေသော အချိန်တွင် အရှေ့မြေရိုင်း ကျောင်းတော်မှ လူများက ပြန့်ကျဲနေသည်မှာ ထင်ရှားသည်။ ပထမ နှစ်ယောက်ကား တိုက်ပွဲ အစတွင်ပင် ဒဏ်ရာ ရသွားကြသည်။ စုမူဂီနှင့် ကျင့်တန်တို့မှာလည်း ချိန်ရှင်းမူ၏ တိုက်ခိုက်မှုကို ရင်မဆိုင်နိုင်ဘဲ ရှုံးနိမ့်ခဲ့ရသည်။

ဒွန်ဟွာကလန်၏ ပါရမီ အမြင့်ဆုံး နှစ်ယောက်မှာ လုနန်ထျန်းနှင့် ချိန်ရှင်းမူတို့ ဖြစ်ကြသည်။ ချိန်ရှင်းမူကား ဂီတပညာတွင် အတော်ဆုံးအဖြစ် သတ်မှတ် ခံထားရသူ ဖြစ်သည်။ စုမူဂီကား သူ့ထံမှ တိုက်ကွက် တစ်ခုကိုပင် ခံနိုင်ရည် မရှိပေ။

ရှောင်ဝူကျိကား အားကောင်းသည်။ သို့သော်လည်း သူကား ပူးပေါင်း တိုက်ခိုက်ရာတွင် ကောင်းပြီး တော်ဝင် နဂါးနည်းစနစ်ကို လေ့ကျင့်ထားသော ဒွန်ချင် ကျောင်းသား လေးယောက်ကို ရင်ဆိုင်နေရသည်။

သည်တိုက်ပွဲတွင် အရှေ့မြေရိုင်း ကျောင်းတော်က သေချာပေါက် ရှုံးမည် ဖြစ်သည်။

ရှောင်ဝူကျိဘက်တွင်မူ ဒွန်ချင် ကျောင်းသား လေးယောက်က သူ့အား ပြင်းထန်စွာ တိုက်ခိုက် နေကြသည်။ သူတို့ ထုတ်လွှတ် လိုက်သော လက်ဝါး ရိုက်ချက်တိုင်းမှ ကြီးမားသော နဂါးကြီးများ ထွက်ပေါ် လာနေသည်။ သို့သော်လည်း ရှောင်ဝူကျိကား လေဓာတ်၏ အကူအညီဖြင့် လွန်စွာ လျင်မြန်ရာ လွယ်ကူစွာ ရှောင်တိမ်းနိုင်သည်။ သူ၏ နောက်မှ ဓမ္မကလည်း သဘာဝ စွမ်းအင်များကို အဆက်မပြတ် စုပ်ယူနေသည်။ ထိုအရာကား ဂူတုံးလျိုကဲ့သို့ ပုံရိပ်ယောင်တစ်ခု ဖြစ်သည်။

သူ၏ ဓမ္မမှ ဓာတ်လုံး ခုနစ်လုံးက အလင်းများ ဖြာထွက်နေသည်။ ဓာတ်လုံး ခုနစ်လုံးက ဓာတ်စွမ်းအင် ခုနစ်မျိုးအား ကိုယ်စားပြုသည်။

ဒွန်ချင် ကျောင်းသား လေးယောက် ပြေးဝင်လာသည်ကို မြင်လျှင် ရှောင်ဝူကျိ၏ ပုံရိပ်ယောင်က ကြောက်မက်ဖွယ် ပုံရိပ်ယောင် အလင်းများ ဖြာထွက်လာသည်။ စိတ်ဝိညာဉ် တိုက်ခိုက်မှုက ထိုလေးယောက်ထံ တိုးဝင်သွားသည်။ သို့သော်လည်း ဒွန်ချင် ကျောင်းသား လေးယောက်၏ စိတ်က တစ်သားတည်း ပေါင်းစည်းထားသည်။ ချင်မုံရို၏ ကု့ချင်း သံစဉ်ကလည်း ရောက်ရှိလာသည်။ စိတ်ဝိညာဉ် တိုက်ခိုက်မှုက သူတို့အတွက် ဘာမှ မဟုတ်ပေ။

ရှောင်ဝူကျိ၏ နောက်မှ ဓာတ်လုံး ခုနစ်လုံးက ပိုမိုလင်းလက်လာကာ ဓာတ်ခုနစ်မျိုးလုံး၏ အားလှိုင်းများ ထွက်ပေါ်လာပြီး ဒွန်ချင် ကျောင်းသား လေးယောက်ထံကို တိုးဝင်သွားသည်။

“ရှောင်ဝူကျိက တကယ်ပဲ အားကောင်းတယ်….” လူအများက တိုက်ပွဲအား ဆက်ကြည့် နေကြသည်။ ဒွန်ချင် ကျောင်းသား လေးယောက်က ပူးပေါင်း တိုက်ခိုက်ခြင်း မဟုတ်ဘဲ တစ်ယောက်ချင်း ဆိုပါက ရှောင်ဝူကျိထံတွင် ချက်ချင်း ရှုံးနိမ့်သွားမည် ဖြစ်သည်။

ထိုကြောက်မက်ဖွယ် ကောင်းသော တိုက်ခိုက်မှုကို မြင်လျှင် ဒွန်ချင် ကျောင်းသား လေးယောက်က လေထဲကို ပြိုင်တူ ခုန်တက်သွားကာ နဂါးပုံစွမ်းအင် အလင်းနံရံတစ်ခု ဖန်တီးပြီး ရောက်ရှိလာသော တိုက်ခိုက်မှုများကို ခုခံသည်။

ထို့နောက် သူတို့က နောက်ဆုတ် လိုက်ကြသည်။ သူတို့က ရှောင်ဝူကျိနှင့် တိုက်ခိုက်နေသည်ကို ရပ်တန့်လိုက်ပြီး ချိန်ရှင်းမူထံသို့ ဆုတ်သွားကြ၏။ ထိုအခိုက်တွင် ချိန်ရှင်းမူကား ယွီချိန်ချင်းနှင့် တိုက်ခိုက်နေသည်။ ယွီချိန်ချင်းကား သူ၏ စိတ်ဝိညာဉ် လှောင်အိမ် ကမ္ဘာတွင် အပိတ်ခံထားရသည်။

“သတိထား….” ရှောင်ဝူကျိက သတိပေးလိုက်သည်။ ယွီချိန်ချင်းက နောက်ဆုတ်ရန် ကြိုးစားသော်လည်း ချိန်ရှင်းမူ၏ စိတ်ဝိညာဉ် အားလှိုင်းများက ပိုမို ပြင်းထန်လာသည်။ အရာအားလုံးက ပိတ်ဆို့ထားကာ သူ့အား လှုပ်မရအောင် ပြုလုပ်ထားသည်။ ထိုအချိန်တွင် ဒွန်ချင် ကျောင်းသား လေးယောက် ရောက်ရှိလာသည်။

ယွီချိန်ချင်းက ရုန်းကန်ရန် ကြိုးစားသည်။ သို့သော် ချိန်ရှင်းမူက ခွင့်မပြုပေ။ သံစဉ်များက လေထုထဲတွင် အဆက်မပြတ် ပေါက်ကွဲနေပြီး သူ၏ စိတ်အသိမှာ ပြိုလဲတော့မည် ကဲ့သို့ ခံစားလာရသည်။ ဘန်းခနဲ မြည်သံနှင့်အတူ ယွီချိန်ချင်း မြေပြင်သို့ ကျသည်။

ဘုန်း… ဘုန်း… ဘုန်း ….။ ရှောင်ဝူကျိ ရောက်လာသောအခါ နောက်ကျသွားပြီး ဖြစ်သည်။ သူက ဒွန်ချင် ကျောင်းသား လေးယောက်အား အဆက်မပြတ် တိုက်ခိုက်လိုက်လျှင် ထိုလေးယောက်က နောက်ဆုတ် သွားပြန်သည်။ ထိုလေးယောက်မှ နှစ်ယောက်ကား အမှန်တကယ် ဒဏ်ရာ ရသွားသည်။ ထိုစဉ် သံစဉ်တစ်ခု သူ့ထံ ဆင်းသက်လာသည်။ ယခုကား ရှောင်ဝူကျိ တစ်ယောက်တည်းသာ ကျန်တော့ရာ ချိန်ရှင်းမူနှင့် ချင်မုံရိုတို့ လွတ်လပ်သွားပြီ ဖြစ်သည်။

ရှောင်ဝူကျိ၏ မျက်လုံးများက အလွန်အမင်း အေးစက်သွားသည်။ သူက တစ်ယောက်တည်း တိုက်ခိုက်ရန် အားကောင်းသော အရှိန်အဝါဖြင့် ရှေ့ကို တက်လိုက်သည်။

“ရှောင်ညီလေး… တော်ပြီ… ” လေလိရှာက အော်လိုက်သည်။

ရှောင်ဝူကျိက တွန့်ဆုတ်စွာ ရပ်တန့်လိုက်သည်။ သူက စိတ်မပါစွာဖြင့် နောက်လှည့်ကာ ယွီချိန်ချင်းနှင့်အတူ စင်မြင့်ပေါ်မှ ဆင်းသက်လိုက်သည်။ စုမူဂီနှင့် တန့်ယွီတို့ကား အလွန် ဒေါသထွက် နေကြသည်။

သူတို့ကား စိန်ခေါ်ပွဲတွင် ဆိုးရွားစွာ ရှုံးနိမ့်ခဲ့သည်။

“ဒါက သေချာ ပြင်ဆင်ထားတဲ့ တိုက်ပွဲပဲ… ဒါက ပျော်စရာ ကောင်းလား…” ကျူးချိန်က ဒွန်ချင် ကျောင်းတော်ဘက်ကို လှည့်ကာ ပြောသည်။

ချင်ယွီက ရယ်မောလျက် ပြောသည်…. “တိုက်ပွဲက အချင်းချင်း သင်ယူဖို့အတွက် သက်သက်ပဲ…. ရလဒ်က သိပ်အရေးမကြီးဘူး…. ပြီးတော့ ဒွန်ချင် ကျောင်းတော်သား အပါအဝင် အခု တိုက်ခိုက်ခဲ့တဲ့ တပည့်လေးယောက်က ဒွန်ချင် ကျောင်းတော်ကို တက်ရောက်ဖို့ ရွေးချယ်ခဲ့ကြတယ်… သူတို့က သိုင်းပညာမှာ ပါရမီပါတာကြောင့် ကျုပ်တို့က တော်ဝင် နဂါးနည်းစနစ်ကို သင်ပေးခဲ့တယ်… ဒီနေ့က သူတို့ကို စမ်းသပ်တာပဲ….”

လူအများက ချင်ယွီအား ကြည့်လိုက်ကြသည်။ ရလဒ်က ပြဿနာ မဟုတ်ပေ။ ပုံမှန်အားဖြင့် အနိုင်ရသူက စကားပြောပိုင်ခွင့် ရှိပြီး ရှုံးနိမ့်သူကား အရှက် ရရစမြဲဖြစ်သည်။

သို့သော် လူအများက ချင်ယွီ၏ နောက်ဆုံးစကားကို အံ့အားသင့်ရသည်။ ဤတိုက်ပွဲက အရှေ့မြေရိုင်း ကျောင်းတော်ကို အနိုင်ယူရုံမျှ မဟုတ်ဘဲ တစ်လောကလုံးအား ဒွန်ချင်ကျောင်းတော်က မည်သည့်အရာများ ပေးအပ်နိုင်သည်ကို ပြသရန် ဖြစ်ပေသည်။

***

အတွဲ(၁၈)ပြီးပါပြီ

ဆက်ပါဦးမည်။

***


Comment

Leave a Reply

Options

not work with dark mode
Reset