အပိုင်း (၂၃၂)

ယနေ့ ချင်မုံရိုက ဤနေရာတွင် ကု့ချင်းအား တီးခတ်ခဲ့ကာ များစွာသော အင်အားစုများအား ဖိတ်ခေါ်၍ နားထောင် စေခဲ့သည်။
ဒွန်ဟွာကလန်မှ ချိန်ရှင်းမူက သူ၏ ပလွေဖြင့် ကု့ချင်း၏ သံစဉ်အား လိုက်ပါ တီးခတ်ပေးသည်။ ကု့ချင်းနှင့် ပလွေက အတူတူ တီးမှုတ်ခဲ့ကြကာ ဂီတကား သာယာ နာပျော်ဖွယ် ကောင်းလှသည်။ ဤမတိုင်မီက လျိုဖေးယွန်က ရီဖူရှင်းအား ထိုဂီတသံစဉ်နှင့် ပတ်သက်၍ မည်သို့ ခံစားရကြောင်း မေးခဲ့သည်။ လျိုဖေးယွန်က ဂီတနှင့် ပတ်သက်၍ နားမလည်ပေ။ သို့သော် ရီဖူရှင်းက ထိုသံစဉ်၏ အနုပညာ ရသသိအား နားလည် ခံစားနိုင်သည်။ ချိန်ရှင်းမူ၏ ပလွေက ချင်မုံရို၏ ကု့ချင်းသံစဉ်ကို လိုက်၍ ပြောင်းလဲနေသည်။ အနုပညာ ရသသိက ပြောနေသည်မှာ လူကြီး လူကောင်း တစ်ယောက်က လှပကာ နူးညံ့သိမ်မွေ့သော မိန်းမပျို တစ်ယောက်နှင့် လိုက်ဖက်သည် ဟူ၍ ဖြစ်၏။
နောက်ပိုင်းတွင် ဂီတ သံစဉ်နှစ်ခုက ခင်ပွန်းသည်နှင့် သူ၏ ဇနီးတို့က ပြန်လည် ပေါင်းစည်း သကဲ့သို့ အလွန်အမင်း လိုက်လျောညီထွေ ရှိလာသည်။ ထို့ကြောင့် ရီဖူရှင်းက ဂီတက ကောင်းသော်လည်း ဟင်းခွက်ထဲတွင် ယင်ကောင်သေ ပါဝင်နေသကဲ့သို့ ခံစားရသည်။
အစ်ကိုငါး ပြောသည့်စကားအရ ထိုကု့ချင်း ဖျော်ဖြေပွဲ ဆိုသည်မှာကား အင်အားစု နှစ်ခုက လက်ထပ်ပွဲကို အခြေပြု၍ ပူးပေါင်းရန် တွေ့ဆုံမှု သက်သက်သာ ဖြစ်သည်။ ထိုအရာက ချင်ပြည်ထောင်မှ မင်းသမီးလေးနှင့် ဒွန်ဟွာကလန်မှ ပါရမီရှင်တို့၏ လက်ထပ်ပွဲ ဖြစ်သည်။
တစ်ယောက်က အရှေ့မြေရိုင်း ဒေသမှ အလှဆုံး မိန်းမပျို သုံးယောက်ထဲမှ တစ်ယောက်ဖြစ်ပြီး နောက်တစ်ယောက်မှာ အရှေ့မြေရိုင်းဒေသ၏ လူငယ်မျိုးဆက်ထဲမှ အတော်ဆုံး ဂီတပညာရှင် အဖြစ် သတ်မှတ် ခံထားရသူ ဖြစ်သည်။ အမှန်ပင် သူတို့ နှစ်ယောက်က ကောင်းကင်ဘုံမှ သတ်မှတ်ထားသော စုံတွဲအလား လိုက်ဖက်ညီလှသည်။
အကယ်၍ ထိုအင်အားစု နှစ်ခုက ပူးပေါင်းခဲ့လျှင် ဤကဲ့သို့ လက်ထပ်ပွဲကို စီစဉ်ခြင်းမှာ အလွန် အဓိပ္ပာယ် ပြည့်ဝသည်။ သို့သော်လည်း သူတို့နှစ်ယောက်မှာ သာမန် လူငယ် မျိုးဆက်များ မဟုတ်ရာ သူတို့ နှစ်ယောက်၏ လက်ထပ်မှုကို လူကြီးများက ဆုံးဖြတ်နိုင်စွမ်း မရှိပေ။ ထို့ကြောင့်ပင် ကု့ချင်း ဖျော်ဖြေပွဲကို စီစဉ်ခြင်း ဖြစ်ဟန်ရသည်။
အမှန်တကယ် အားဖြင့် ရီဖူရှင်း ခံစားမိသလိုပင် တခြား အင်အားစုများမှ လူများကလည်း ထိုသို့ ခံစားကြရသည်။ ဤနေ့က မင်းသမီး ချင်မုံရိုနှင့် ချိန်ရှင်းမူတို့ တွေ့ဆုံပွဲသာ ဖြစ်သည်။ ကျန်လူများက ထိုအဖြစ်အပျက်အား ဝန်းရံ အားဖြည့်သူများ သက်သက်သာ ဖြစ်၏။
သူတို့က ဂီတကို အသုံးပြုလျက် တစ်ယောက်ကို တစ်ယောက် နားလည်အောင် ကြိုးစားခဲ့ကြသည်။ ဒွန်ဟွာကလန်မှ တစ်ယောက်က ပြောခဲ့သလိုပင် ဤအခြင်းအရာက ကောင်းမွန်သော ပုံပြင်တစ်ပုဒ် ဖြစ်လာလိမ့်မည် ဖြစ်သည်။ အနာဂတ်တွင် ဤစုံတွဲက အတူတူ ရှိနေခြင်းမှာ အလွန် လှပသော ပုံပြင်တစ်ပုဒ် ဖြစ်လာတော့မည် ဖြစ်သည်။
သို့သော်လည်း ထိုအရာများ အားလုံးက ရီဖူရှင်း၏ စကား တစ်ခွန်းကြောင့် မြောင်းထဲကို ရောက်ရှိသွားသည်။ စကားတစ်ခွန်းက ပတ်ဝန်းကျင် တစ်ခုလုံးကို မသက်မသာ ဖြစ်သွားစေသည်။ သူတို့က တစ်ယောက်နှင့် တစ်ယောက် ချိန်းတွေ့ရန် ကြိုးစားနေပါက သူ့အား ဆွဲမသွင်းသင့်ဟု တုံးတိတိ ပြောခဲ့သည်။ ထိုလှပသော အဖြစ်အပျက်တစ်ခုက သူ၏ ပါးစပ်ထဲတွင် အရိုင်းဆန်လွန်းလှ၏။
သူက ထိုစကားကို ပြောလိုက်သည်နှင့် လူတိုင်းက ရီဖူရှင်းအား ဆွံ့အစွာ ကြည့်လိုက် ကြသည်။ လျိုဖေးယွန်နှင့် လျိုချန်းယွီတို့ ပင်လျှင် အလွန် အံ့အားသင့် သွားသည်။
ဂူဘိုင်ယွီက ပြုံးလျက် ရီဖူရှင်းရှိရာ ဘက်ကို ကြည့်လိုက်သည်။ ဤကောင်ကား အမှန်ပင် မည်သူ့ကိုမှ မျက်နှာသာ မပေးပေ။
ချင်မုံရိုနှင့် ချိန်ရှင်းမူတို့၏ အမူအရာများလည်း အေးစက် သွားကြသည်။ ယနေ့ သူတို့နှစ်ယောက်၏ တွေ့ဆုံမှုက အလွန် သက်သောင့်သက်သာ ဖြစ်ကာ တစ်ယောက်နှင့် တစ်ယောက် ကောင်းမွန်သော အမြင်ကို တည်ဆောက် နိုင်ကြသည်။ သို့သော်လည်း ရီဖူရှင်း၏ စကားတစ်ခွန်းက သူတို့၏ ပျော်ရွှင်ဖွယ် စိတ်ခံစားချက်များ အားလုံးကို ဖျက်ဆီးသွားသည်။
“ ရပ်….”
အေးစက်သော အသံတစ်သံ ထွက်ပေါ်လာသည်။ ပြောလိုက်သူကား ဒွန်ဟွာကလန်မှ တန်ခိုးရှင် တစ်ယောက် ဖြစ်၏။
ရီဖူရှင်းက ရပ်လိုက်ကာ နောက်လှည့် ကြည့်လိုက်သည်။ သူက ဒွန်ဟွာကလန်မှ လူကို ကြည့်ကာ မေးလိုက်သည်…. “ ဘာလဲ….”
ယနေ့ သူ့အား လျိုဖေးယွန်က ဤနေရာသို့ ခေါ်လာသည်။ ကော့တေးက ပြင်ပမှ ကိစ္စများကို သိပ်အရေး မလုပ်ပေ။ ထိုအခြင်းအရာကို အစ်ကိုငါး၏ အမူအရာအရ တွေ့နိုင်သည်။ ချင်ပြည်ထောင်က ဒွန်ဟွာကလန်နှင့် ပူးပေါင်းသည် မပူးပေါင်းသည်က အရေးမဟုတ်ပေ။ ပုံမှန်အားဖြင့် ရီဖူရှင်းကလည်း ဂရုမစိုက်ပေ။ ချင်မုံရိုနှင့် ချိန်ရှင်းမူတို့ တွေ့ဆုံခြင်းက သူနှင့် သက်ဆိုင်ခြင်းလည်း မရှိပေ။ သို့သော်လည်း သူတို့က သူ့အား ထိုကိစ္စထဲကို တမင်ပင် ဆွဲသွင်း နေကြသည်။ သူက သည်းမခံနိုင်ပေ။
ချင်ပြည်ထောင်၊ ဒွန်ဟွာကလန်နှင့် ကျောင်းတော်တို့က အရှေ့မြေရိုင်း ဒေသ၏ အလွှမ်းမိုးနိုင်ဆုံး အင်အားစုသုံးခု ဖြစ်သည်။ ယခု အင်အားစု နှစ်ခုက ပူးပေါင်းလိုက်သည်။ သူတို့က ကျောင်းတော်ကို စတင် ဖိနှိပ်ရန် ကြိုးပမ်း ကြသည်လား။ ကော့တေးက ကျောင်းတော်နှင့် ဆက်ဆံရေး သိပ်မကောင်း သော်လည်း ကော့တေးကား ကျောင်းတော်၏ အစိတ်အပိုင်း တစ်ခုဖြစ်သည်။ သူတို့က ကော့တေးအား အနိုင်ယူနိုင်ခဲ့လျှင် ကျောင်းတော်အား အနိုင်ယူခြင်းနှင့် တူညီသည်။ ထို့ကြောင့် သူတို့က ရီဖူရှင်းအား စတင် အနိုင်ယူလိုကြသည်။ ဤသို့ဆိုလျှင် သူက ထိုလူများကို မျက်နှာသာ ပေးရန် လိုအပ်သေးသလော။
“မင်းက ကော့တေးရဲ့ တပည့် ဆိုရင်တောင် ဒီလို အပြုအမူမျိုးနဲ့ ပြောဆိုတာက မသင့်တော်ဘူး…..” ဒွန်ဟွာကလန်မှ တစ်ယောက်က ခံစားချက် ကင်းမဲ့စွာ ပြောသည်။ ရီဖူရှင်း ပြောသည်မှာ မမှားပေ။ ယနေ့ အဖြစ်အပျက်ကား အမှန်ပင် ချင်မုံရိုနှင့် ချိန်ရှင်းမူတို့၏ တွေ့ဆုံပွဲ ဖြစ်သည်။ သို့သော်လည်း ထိုလှပသော တွေ့ဆုံပွဲက ရီဖူရှင်း၏ စကား တစ်ခွန်းကြောင့် ပျက်စီး သွားရသည်။ ဒွန်ဟွာကလန်မှ လူများ၏ ခံစားချက်များကို ခန့်မှန်း၍ ရသည်။
လက်ထပ်ပွဲကား အင်အားစု နှစ်ခုလုံး အတွက် အရေးပါသည်။ လက်ထပ်ပွဲပြီးလျှင် ချိန်ရှင်းမူက ချင်ပြည်ထောင်မှ မင်းသမီးလေးအား ဒွန်ဟွာကလန်သို့ ဆောင်ယူ လာနိုင်မည် ဖြစ်ကာ အင်အားစု နှစ်ခု၏ ဆက်ဆံရေး ကလည်း ပိုမို၍ ခိုင်မြဲ လာမည် ဖြစ်သည်။ ထို့အပြင် သူတို့က အရှေ့မြေရိုင်း ဒေသမှ အလှဆုံး မိန်းမပျို သုံးယောက်ထဲမှ နှစ်ယောက်ကိုလည်း ပိုင်ဆိုင်ရမည် ဖြစ်သည်။
အရှေ့မြေရိုင်း ဒေသ၏ နံပါတ်တစ် ကလန် ဖြစ်ရန် ရည်မှန်းထားသော ဒွန်ဟွာကလန် အတွက် ဤသို့သော အခွင့်အရေးအား လုံးဝ လက်လွှတ်ခံမည် မဟုတ်ပေ။ သူတို့ အားလုံးက ချိန်ရှင်းမူနှင့် ချင်မုံရိုတို့ လက်ဆက်ရန် မျှော်လင့် နေကြသည်။
“ကျုပ်က ဘယ်နေရာမှာ မသင့်တော်တာလဲ…. ပြောပါဦး…..” ရီဖူရှင်းက ပြုံးလျက် ပြောသည်။ သူက ပြောပြီးမှတော့ တစ်ဖက်လူများ၏ ဝေဖန်မှုများကိုလည်း ကြောက်ရွံ့နေမည် မဟုတ်ပေ။
“ဒွန်ဟွာကလန်က ချိန်ရှင်းမူနဲ့ ချင်ပြည်ထောင်က မင်းသမီးတို့က တူရိယာတွေကို အတူတကွ တီးခတ်ခဲ့ကြတယ်…. ဒါက ကောင်းမွန်တဲ့ အဖြစ်အပျက် တစ်ခုပဲ… ဒါပေမဲ့ မင်းရဲ့ ပါးစပ်ထဲမှာ ဒါက ဆိုးရွားတဲ့ ကိစ္စတစ်ခု ဖြစ်သွားတယ်…. ကော့တေးက လူတွေက ဒီလိုပဲ ပြုမူကြတာလား…..” ဒွန်ဟွာကလန်မှ လူငယ်က မေးသည်။
ရီဖူရှင်းက ထိုလူငယ်အား အေးစက်စွာ ကြည့်လိုက်သည်။ ချင်ပြည်ထောင်နှင့် ဒွန်ဟွာကလန်တို့က ကော့တေးကို ဤမျှ နင်းခြေလို နေကြသည်လား။
ကျောင်းတော်ကား ကလန်တစ်ခု မဟုတ်ရာ ပြင်ပကိစ္စများတွင် ဝင်ပါလေ့ မရှိပေ။ ချင်ပြည်ထောင်က ဒွန်ဟွာကလန်နှင့် ပူးပေါင်းလျှင်ပင် သူတို့က ကျောင်းတော်ကို အဘယ်ကြောင့် ဤမျှ ဖိနှိပ်လိုနေရ သနည်း။ သူတို့က အရှေ့မြေရိုင်း ဒေသတွင် လွှမ်းမိုးမှု အားအကောင်းဆုံး အင်အားစု နှစ်ခု ဖြစ်လိုနေကြ သည်လား။
အကယ်၍ သူတို့က ကော့တေးနှင့် ကျောင်းတော်တို့ကို ဖိနှိပ်နိုင်ပါက နောင်တွင် လူအများက အရှေ့မြေရိုင်း ဒေသ၏ အကောင်းဆုံး အင်အားစုများကို ပြောဆိုလျှင် ချင်ပြည်ထောင်နှင့် ဒွန်ဟွာ ကလန်တို့သာ ဖြစ်မည်ဟု ပြောကြမည် ဖြစ်သည်။ ထို့အပြင် ယခု ထိုအင်အားစု နှစ်ခုက ပူးပေါင်းလိုက်ပြီ ဆိုပါက နောင်တွင် သူတို့က ပါရမီရှင်များ မြောက်မြားစွာကိုလည်း ဆွဲဆောင် နိုင်တော့မည် ဖြစ်သည်။
“ကော့တေးက ဘယ်လို ပြုမူတယ်ဆိုတာ လူတိုင်းက သိလိမ့်မယ်လို့ ကျုပ်ထင်တယ်…. ကျုပ်က ဒွန်ဟွာကလန်ကို မေးသင့်တယ်…. ခင်ဗျားတို့က စီစဉ်ပြီးမှတော့ ဘာလို့ ဝန်ခံဖို့ ကြောက်နေတာလဲ…. ချင်ပြည်ထောင်နဲ့ ဒွန်ဟွာကလန်က လူငယ် ပါရမီရှင် နှစ်ယောက်က တွေ့ဆုံပြီး ချစ်ကြိုက်တာက ကောင်းမွန်တဲ့ ပုံပြင်တစ်ပုဒ် မဟုတ်ဘူးလား…. ခင်ဗျားတို့က ဘာလို့ ဖုံးကွယ်ဖို့ ကြိုးစား နေရတာလဲ…. ဒါက ရှက်စရာလို့ ဒွန်ဟွာကလန်က လူတွေ တကယ် တွေးနေကြတာလား…..”
ရီဖူရှင်းက ပြန်မေးလိုက်လျှင် ဒွန်ဟွာကလန်မှ လူများက မည်သို့ ပြန်ပြောရမည် မသိဘဲ ဆွံ့အ သွားကြသည်။ ချိန်ရှင်းမူနှင့် ချင်မုံရိုတို့၏ တွေ့ဆုံမှုက ရှက်စရာဟု သူတို့ ပြော၍ မရပေ။
ထို့အပြင် သူတို့က ရီဖူရှင်း၏ စကားကိုလည်း ငြင်း၍ မရပေ။ ယနေ့တွင် သူတို့က ချိန်ရှင်းမူနှင့် ချင်မုံရိုတို့က ဂီတကို သုံးလျက် တစ်ယောက်ကို တစ်ယောက် နားလည်ရန် ကြိုစားခဲ့ကြသည်ကို ငြင်းပယ်လျှင် နောင်တွင် သူတို့နှစ်ယောက် လက်ထပ်ခဲ့ပါက မိမိတို့ ပါးကို ကိုယ်တိုင် ပြန်ရိုက်သည်နှင့် တူနေပေလိမ့်မည်။
သို့တိုင်အောင် ရီဖူရှင်း၏ စကားတစ်ခွန်းက ထိုအဖြစ်အပျက်အား ဆိုးရွားသော ကိစ္စသဖွယ် ဖြစ်သွားစေသည်။
ဒွန်ဟွာကလန်မှ လူများက တိတ်ဆိတ်သွားကာ မည်သို့ ပြန်ပြောရမည် မသိကြတော့ပေ။
“ကော့တေးက တပည့်တွေက ပါရမီနဲ့ အင်အားမှာပဲ ထက်မြက်တာ မဟုတ်ဘဲ စကားပြောလည်း ကောင်းတယ်လို့ ကျုပ်ကြားဖူးတယ်…. မင်းကို ဒီနေ့ တွေ့လိုက်ရတော့ ဒါက တကယ်တမ်း မှန်ကန်တယ် ဆိုတာ သိလိုက်ရတယ်…..” ထိုအခိုက်တွင် စကားသံ တစ်ခုကို ကြားလိုက် ကြရသည်။ ပြောလိုက်သူကား ဒွန်ဟွာကလန်မှ ချိန်ရှင်းမူ ဖြစ်သည်။
“ကျုပ်က ဒီနေ့ မင်းသမီးကို တွေ့ဖို့ ဆန္ဒရှိခဲ့တယ်…. သူမရဲ့ ဂီတသံစဉ်ကို ကြားပြီး နောက်မှာ ကျုပ်က သူမနဲ့ ပတ်သက်ပြီး အများကြီး သိနားလည်ခဲ့ရတယ်…. ဂီတက အရာအားလုံးကို ဖော်ကျူးနိုင်တယ်…. ကျုပ်က စိတ်ဝင်စား တာကြောင့် သူမနဲ့ အတူ လိုက်ပါ တီးခတ်ခဲ့တယ်….. ဒါပေမဲ့ မင်းက ဒါကို ဆိုးရွားတဲ့ အဖြစ်အပျက် တစ်ခုအနေနဲ့ ပြောခဲ့တယ်….” ချိန်ရှင်းမူ၏ လေသံကား ဒေါသထွက်သံ မပါဘဲ တည်ငြိမ်နေသည်။ သူက ဖြည်းညင်းစွာ ပြောသည်… “မင်းက ဂီတနဲ့ပတ်သက်ပြီး ထူးချွန်တယ်လို့ အရင်က ကျုပ်ကြားဖူးတယ်…. အခု ကြည့်ရတာတော့ မင်းက ဂီတနဲ့ ပတ်သက်ပြီး ဘာမှ မသိပါလား….”
သူ၏ စကားက သာမန် မှတ်ချက်မျှသာ ဖြစ်သော်လည်း ထိုစကားက ရီဖူရှင်း၏ အဆင့်အတန်းကို သွားရောက် ထိခိုက်သည်။ အရှေ့မြေရိုင်း ဒေသ၏ အကောင်းဆုံး လူငယ် ဂီတပညာရှင် တစ်ယောက် အနေဖြင့် သူက ရီဖူရှင်းအား လူပုံအလယ်တွင် ဂီတနှင့် ပတ်သက်ပြီး မသိ နားမလည်သူဟု မှတ်ချက်ချလျှင် ရီဖူရှင်းက အမှန် မသိနားမလည်သူ ဖြစ်သွားပေသည်။
ရီဖူရှင်းက ချိန်ရှင်းမူအား တည်ငြိမ်စွာ ကြည့်လိုက်သည်။ အင်အားစုနှစ်ခုက ပူးပေါင်းရန် ကြံစည်နေကြကာ ထိုအခွင့်အရေးကို သုံးလျက် သူ့အား ဖိနှိပ်လိုနေကြသည်။ ချိန်ရှင်းမူ၏ စကားအရ အရာအားလုံးက ရီဖူရှင်း၏ အမှားဟု ပြောနေသည်။ သူတို့အားလုံး၏ ပျော်ရွှင်မှုက ရီဖူရှင်းကြောင့် ပျက်စီး သွားရသည်ဟု တွေးကြသည်။ ထို့ကြောင့်ပင် ချိန်ရှင်းမူ၏ ရီဖူရှင်းအား ဂီတကို နားမလည်သူဟု သတ်မှတ် ပြောဆိုသည်။
ချိန်ရှင်းမူ၏ အဆင့်အတန်းအရ အရှေ့မြေရိုင်း ဒေသမှ အကောင်းဆုံး လူငယ် ဂီတပညာရှင် တစ်ယောက် အနေဖြင့် ရီဖူရှင်းအပေါ် သူ၏ သတ်မှတ်ချက်က အရှေ့မြေရိုင်း တစ်ခွင် ပျံ့နှံ့သွားမည်မှာ ထင်ရှားပေသည်။
ရီဖူရှင်းက ချိန်ရှင်းမူအား မပျော်မရွှင်စွာ ကြည့်သည်။
“ငါ့ရဲ့စကားက မသင့်တော်ဘူးလို့ မင်းထင်ရင် ငါ့ကို စိန်ခေါ်လို့ ရတယ်….” ချိန်ရှင်းမူက ရီဖူရှင်း၏ အမူအရာကို သတိထားမိကာ ပြောသည်။ ဂီတနှင့် ပတ်သက်လျှင်ကား သူ၏ စကားများက စည်းမျဉ်းများ အလားပင်။
ရီဖူရှင်းက ရုတ်တရက် ပြုံးလိုက်သည်။ ချိန်ရှင်းမူကား ဓမ္မအဆင့်ကိုးကို ရောက်နေပြီ ဖြစ်သည်။ ရီဖူရှင်းက သူ့အား မည်သို့ စိန်ခေါ်မည်နည်း။ သူကား ရီဖူရှင်းကို အမှန်ပင် အနိုင်စားနေသည်။
သို့သော်လည်း သူက ရီဖူရှင်းအား ထိုနည်းဖြင့် ဖိနှိပ်လျှင်ပင် လူအများက သူတို့၏ တန်ခိုးအဆင့်ကို ကြည့်ကြမည် မဟုတ်ပေ။ လက်ရှိ အခြေအနေအရ လူနှစ်ယောက် ရင်ဆိုင် တွေ့သည်ကိုသာ မြင်ကြမည် ဖြစ်သည်။
“မင်း မှန်တယ်….” ရီဖူရှင်းက ရုတ်တရက် ပြုံးလိုက်ကာ ပြောသည်… “တကယ်ပဲ ကျုပ်က ဂီတနဲ့ ပတ်သက်ပြီး မသိဘူး….”
သူက အရှုံးပေး နေသည်လား။ ဒွန်ဟွာကလန်မှ လူများက နှာခေါင်းရှုံ့ လိုက်သည်။
ချိန်ရှင်းမူ၏ အမူအရာကား တည်ငြိမ်နေသည်။ ရီဖူရှင်းအား ထိုသို့နည်းဖြင့် ဖိနှိပ်ခြင်းက ဂုဏ်ယူစရာ ကိစ္စတစ်ရပ်တော့ မဟုတ်ပေ။ သို့သော်လည်း ရီဖူရှင်း၏ စကားများက အလွန် ရန်လိုနေရာ သူက တစ်စုံတစ်ခု လုပ်ရန် လိုအပ်နေသည်။ မဟုတ်လျှင် ချင်ပြည်ထောင်နှင့် ဒွန်ဟွာ ကလန်တို့က အမှန်ပင် မျက်နှာပျက် ရပေတော့မည်။
“ခုနက ဒွန်ဟွာကလန်က ဘယ်သူက ကျုပ်ကို စိန်ခေါ်ချင်တာလဲ….” ဒွန်ဟွာကလန်မှ လူများက နှခေါင်းရှုံ့ နေစဉ်မှာပင် ရီဖူရှင်းက ပြောလိုက်သည်။
ထိုမြင်ကွင်းကို ကြည့်ပြီး လူအများ၏ မျက်လုံးများက အရောင်လက် သွားကြသည်။ သူ နောက်ထပ် သည်းခံနိုင်တော့ဟန် မတူတော့ပေ။
ဒွန်ဟွာကလန် ဘက်မှ လူငယ် တစ်ယောက် ထွက်လာသည်။
“ဂူမင်….” လူတိုင်းက ထိုလူငယ်ကို သိကြသည်။ သူကား ဒွန်ဟွာကလန်မှ အလွန် ထူးချွန်သော လူငယ်တစ်ယောက် ဖြစ်သည်။ သူ၏ တိုက်ခိုက်ရေး စွမ်းရည်မှာလည်း အလွန် အားကောင်းသည်။
“ဂူမင်…. ဓမ္မအဆင့်ငါး….” သူက ရီဖူရှင်းကို ပြောလိုက်သည်။ သူ၏ အသက်ကား ရီဖူရှင်းနှင့် အတူတူဖြစ်ရာ ရီဖူရှင်းအား အနိုင်ရလျှင် ကော့တေး၏ အရှိန်အဝါများ ကျဆင်း သွားမည်မှာ သေချာ၏။
ဒွန်ဟွာကလန်နှင့် ချင်ပြည်ထောင်တို့က အမှန်ပင် ကော့တေးအား ဖိနှိပ်လိုနေကြကာ ရီဖူရှင်းနှင့် စတင် လိုနေကြသည်။
“ရီဖူရှင်း… ဓမ္မအဆင့်လေး…..” ရီဖူရှင်းက ဖြည်းညင်းစွာ ပြောသည်။ ထို့နောက် သူက မြေပြင်တွင် ထိုင်လျက် သူ၏ ကု့ချင်း ဝိညာဉ်ကို ထုတ်လွှတ်လိုက်သည်။ ရီဖူရှင်း၏ ရှေ့တွင် အလွန် တောက်ပ လင်းလက်သော ကု့ချင်းတစ်လက် ဖြစ်ပေါ်လာသည်။
ထိုမြင်ကွင်းကို မြင်လျှင် လူတိုင်း၏ မျက်နှာတွင် ထူးဆန်းသော အမူအရာများ ဖြစ်ပေါ်လာသည်။ ဂူမင်အား ယှဉ်ပြိုင်ရန် သူက ကု့ချင်းဝိညာဉ်အား တိုက်ရိုက် ထုတ်ဖော် လိုက်သည်။ သိသာစွာပင ်ရီဖူရှင်းက မှော်ဂီတပညာအား အသုံးပြုမည် ဖြစ်သည်။
ခုနကပင် ချိန်ရှင်းမူက ရီဖူရှင်းအား ဂီတကို နားမလည်သူဟု မှတ်ချက်ချကာ ရီဖူရှင်းကလည်း ဝန်ခံခဲ့သည်။ ယခု ကု့ချင်း ဝိညာဉ်ကို ထုတ်လွှတ်ကာ ဒွန်ဟွာကလန်မှ လူကို ယှဉ်ပြိုင် လိုနေသည်။
ယူချင်းက ချိန်ရှင်းမူနှင့် ဒွန်ဟွာကလန်မှ လူများကို အေးစက်စွာ ကြည့်လိုက်သည်။ ပထမက ရီဖူရှင်းကား တိုက်ခိုက်ရန် စိတ်ဝင်စားပုံ မရပေ။ သို့သော် ဒွန်ဟွာကလန်မှ လူများက အတင်းပင် ဖိအားပေး နေကြသည်။ ဤသို့ဆိုလျှင် ဒွန်ဟွာကလန်မှ ဂီတပါရမီရှင် ချိန်ရှင်းမိုက ဂီတကို နားမလည်သူဟု မှတ်ချက်ချခဲ့သူက ဂီတကို သုံးလျက် ဒွန်ဟွာကလန်မှ လူကို အနိုင်ယူပြီးပါက ထိုလူများ၏ အမူအရာများက မည်သို့ ဖြစ်နေမည်ကို ယူချင်းက သိလိုသည်။

***