အပိုင်း (၁၉၅)

ဂူဘိုင်ယွီက သူမ၏ ပလွေအား နှုတ်ခမ်းရဲရဲတွင် တေ့ကာ ဖြည်းညင်းစွာ မှုတ်လိုက်သည်။ ထူးဆန်းသော သံစဉ်တစ်ခု ပလွေထံမှ ထွက်ပေါ်လာသည်။ ချက်ချင်းပင် ထိုအရာက လူတိုင်းအား အနုပညာရသသိ တစ်ခုထဲသို့ ခေါ်ဆောင်သွားသည်။

အရမ်း လှပလွန်းသည်။

ဂူဘိုင်ယွီကား သူမ၏ ညှို့ငင်နိုင်စွမ်းကြောင့် လူအများက စုန်းမဟုပင် သမုတ်ကြသည်။ အမှန်တွင်ကား သူမက ပလွေကို တီးမှုတ်သော အချိန်တွင် အလွန် နူးညံ့သိမ်မွေ့သည်။ ဂီတသံစဉ်က လှပပြီး သူမ၏ ဆံပင်ရှည်များက လေထဲတွင် မျောလွင့်နေကာ အဖြူရောင် ဝတ်စုံရှည်ကလည်း တဖျတ်ဖျတ် လွင့်နေသည်။ နတ်သမီးတစ်ပါးလို သူမကား လူတိုင်း၏ အသည်းနှလုံးကို ဆုပ်ကိုင်နိုင်စွမ်း ရှိသည်။

ဤတစ်ကြိမ်ကား သူမ တိုက်ခိုက်သည်ကို လူအများက ပထမဆုံးအကြိမ် မြင်ရခြင်း ဖြစ်သည်။ သူမအား ကြည့်နေကြသော လူတိုင်း၏ မျက်လုံးများက မြေပေါ်သို့ ကြွေကျလုနီးပါးပင်။ သူတို့၏ မျက်လုံးများကိုပင် လွှဲနိုင်စွမ်း မရှိတော့။ သူတို့၏ မျက်လုံးထဲတွင် ဂူဘိုင်ယွီသာ ရှိနေသည်။

အမှန်တကယ်ပင် စုန်းမဟု ခေါ်ရပေမည်။ ကျိစီမို၏ မျက်လုံးထဲတွင် စိတ်အား ထက်သန်မှုတစ်ခု ဖြစ်ပေါ်လာသည်။ လျိုချန်းယွီနှင့် ဂူဘိုင်ယွီတို့က ကွဲပြားခြားနားသော မိန်းမလှများဖြစ်ကာ နှစ်ယောက်လုံးက ချစ်ခင်နှစ်လိုဖွယ် ကောင်းသည်။ သူက သူမတို့ နှစ်ယောက်လုံးကို ရပါက အမှန်ပင် ကောင်းမွန်သောအရာ ဖြစ်သည်။

ဂူဘိုင်ယွီကား ယခုအချိန်တွင် ပိုမို၍ ဆွဲဆောင်မှု ကောင်းလှသည်။ ထိုအရာက သူမ တီးမှုတ်နေသော ပလွေ၏ အနုပညာရသသိကြောင့်ဟု ကျိစီမို နားလည်သည်။ စုန်းမသံစဉ်ကား မှော်ကလန်၏ စိတ်ဝိညာဉ် မှော်ပညာမှ ဖန်တီးထားခြင်း ဖြစ်သည်။ ထိုအရာက ပြောင်းလဲနိုင်စွမ်းရှိကာ အလွန် စွမ်းအားကောင်းသည်။ စုန်းမ သံစဉ်ကား မှော်ကလန်၏ အုတ်မြစ်ဖြစ်သည်။ အဆင့်မြင့် တပည့်များသာလျှင် လေ့ကျင့်နိုင်သည်။ ဂူဘိုင်ယွီကား ကလန်တွင် အလွန်မြင့်မားသော အဆင့်အတန်းရှိရာ သူမက ထိုသံစဉ်ကို လေ့ကျင့်နိုင်သည်။

တောင်ပေါ်တွင်ကား ပလွေသံမှအပ တခြား အသံများအားလုံး တိတ်ဆိတ်နေသည်။ မျက်လုံးပေါင်း များစွာက သူမကို ကြည့်နေကြသည်။ လူအများအပြားက စုန်းမ၏ ညှို့ငင်မှုအောက်တွင် နစ်မျောနေပြီ ဖြစ်သည်။ သူမကား လှပချောမောကာ သူမ၏ ဂီတကလည်း ထို့အတူပင်။ ရီဖူရှင်း အပါအဝင် လူတိုင်းက သက်ရောက်ခံရသည်။

ယခုတွင်ကား ရီဖူရှင်းက ဂူဘိုင်ယွီနှင့် မျက်နှာချင်းဆိုင်တွင် ရပ်နေသည်။ ဂီတသံစဉ်များက သူ၏ စိတ်နယ်ပယ်ထဲကို အားလှိုင်းများနှင့်အတူ မဆုံးနိုင်အောင် ဝင်ရောက် လာကြသည်။ သို့သော် ထိုအရာက သူထင်ထားသည်နှင့် ကွဲပြား ခြားနားနေသည်။ သံစဉ်က သူ့ကို မတိုက်ခိုက်ပေ။ ထိုအစား သူ၏ စိတ်နယ်ပယ်ထဲတွင် ပုံရိပ်တစ်ခု လာရောက် ဖြစ်ပေါ်သည်။ ထိုပုံရိပ်ကား ဂူဘိုင်ယွီဖြစ်သည်။ သူမ၏ နတ်သမီးအလား ပုံရိပ်က သူ၏ စိတ်နယ်ပယ်ထဲတွင် ဖြစ်ပေါ်လာသည်။

လှပသော ဂီသံစဉ်ကလည်း အလွန် ယစ်မူးဖွယ် ကောင်းလှကာ နတ်သမီးကဲ့သို့ ပုံရိပ်ကလည်း ထို့အတူပင်။ ထိုအခိုက်တွင် သူ၏ စိတ်နယ်ပယ်ကား ဂူဘိုင်ယွီ၏ ပုံရိပ်ကြောင့် လုံးဝ သာယာ ယစ်မူးနေပြီ ဖြစ်သည်။ ဂူဘိုင်ယွီက သူမ၏ အလှဖြင့် သူ၏စိတ်နယ်ပယ် တစ်ခုလုံးအား လွှမ်းမိုးရန် ကြိုးပမ်းနေသည်။

သူက အလိုအလျောက် သူမအား ချစ်ခင်နှစ်သက်လာသည်။ သူမ၏ပုံရိပ်အား သူ၏ အရေးကြီးသော အစိတ်အပိုင်း တစ်ခုအဖြစ် ထင်မှတ်လာသည်။

ထိုအရာက စုန်းမ သံစဉ်လား။ ရီဖူရှင်း တွေးလိုက်သည်။ ထိုအရာက အလွန် အဆင့်မြင့်သော နည်းစနစ်တစ်ခုဖြစ်ကာ သာမန်ပြုစားတတ်သော နည်းစနစ်များထက် အဆမတန် အားကောင်းပေသည်။ အကယ်၍ ရီဖူရှင်းက ခံနိုင်ရည်အား ရှိပါက သူမက အရှုံးပေးမည်ဟု ဂူဘိုင်ယွီက ပြောသည်။ ထိုခံနိုင်ရည် ရှိရမည်ဆိုသော အရာက သူတွေးထင် ထားခဲ့သည်နှင့် ကွဲပြားသည်ဟု သူသိလိုက်သည်။ သူက ဤသံစဉ် တစ်ခုတည်းဖြင့် အရှုံးပေးရန် ဖြစ်နိုင်ပေသည်။ ထိုအရာက ဧကရာဇ်ရီချင်က သူ့အား ဆက်ခံစေသော တောကောင်ထိန်းချုပ် သက်စောင့်ဝိညာဉ်နှင့် ဆင်တူပေသည်။ သူတို့က ကွဲပြားသောအရာ ဖြစ်သော်လည်း အကျိုးသက်ရောက်ပုံ တူညီသည်။ ဤစုန်းမကား သူ့ကို အမှန်ပင် ထောင်ချောက် ဆင်ထားခဲ့သည်။

ကံမကောင်းစွာပင် သူမ၏ ပစ်မှတ်က ရီဖူရှင်း ဖြစ်နေသည်။ ရှေးဟောင်းမြေရိုင်း ဒေသတွင် စိတ်အင်အားနှင့် ပတ်သက်ပြီး မည်သူမှ ရီဖူရှင်းကို မယှဉ်နိုင်ပေ။ ဂူဘိုင်ယွီက သူ့အား လွှမ်းမိုးနိုင်စွမ်း မရှိပေ။

သီချင်းက ပိုမို၍ သာယာနာပျော်ဖွယ် ကောင်းလာသည်။ ဤကဲ့သို့ လှပသော ပလွေသံကို နားထောင်ဖူးသည်မှာ ဤလူများအတွက် ပထမဦးဆုံး အကြိမ်ပင်။ ဂူဘိုင်ယွီက ရီဖူရှင်း တစ်ယောက်တည်းကိုသာ ဦးတည်၍ တီးမှုတ်သည့်တိုင် သံစဉ်က ပတ်ဝန်းကျင်မှ လူများကို လာရောက် လွှမ်းမိုးစေသည်သာ ဖြစ်သည်။ တချို့အားနည်းသော သူများမှာကား ပုံမှန် အသိစိတ်ပျောက်ကာ ဂူဘိုင်ယွီ၏ သံစဉ်ထဲကို နစ်ဝင်မြောလွင့်သွားပြီ ဖြစ်သည်။ သူတို့က ဂူဘိုင်ယွီကို ချစ်သူကို ကြည့်သည့်အလား မဆုံးနိုင်သော ချစ်ခြင်းများစွာဖြင့် ကြည့်နေကြသည်။

ဂီတသံစဉ်က သူ၏နားထဲကို ဝင်ရောက်လာလျှင် ရီဖူရှင်းက ဂူဘိုင်ယွီကို ချစ်ခင်လုနီးပါး ဖြစ်သွားသည်။ သို့သော် သူကား စိတ်ဓာတ်ခိုင်မြဲသည်။ သူ၏ စိတ်နယ်ပယ်ထဲတွင် နောက်ထပ် ပုံရိပ်တစ်ခု ဖြစ်ပေါ်လာသည်။ သူက မြေခွေးမအား အချိန်ကြာမြင့်စွာ မြင်တွေ့ခဲ့ရခြင်း မရှိခဲ့ပေ။ သူ ချစ်ရသော မြေခွေးမ၏ အကြောင်းကို တွေးမိလျှင် သူ၏ မျက်နှာတွင် အပြုံးတစ်ခု ဖြစ်ပေါ်လာသည်။ သူက ဂူဘိုင်ယွီ ချန်ထားခဲ့သော အမှတ်အသားကို ချေဖျက်မိပြီးသား ဖြစ်သွားသည်။

ပလွေအား တီးမှုတ်နေဆဲ ဖြစ်သော ဂူဘိုင်ယွီကား ရီဖူရှင်း၏ မျက်နှာပေါ်မှ အပြုံးကို မြင်သည်။ ထိုအရာက သူချစ်ခင် နှစ်သက်ရသော မိန်းကလေးကို မြင်သောကြောင့်ပင်။ သို့သော်လည်း သူမက ထိုအတွက် ဂုဏ်ယူခြင်း မရှိပေ။ ရီဖူရှင်း၏ အပြုံးက သူမကြောင့် မဟုတ်သလို သူမ၏ ပလွေသံစဉ်ကြောင့်လည်း မဟုတ်ကြောင်း ဂူဘိုင်ယွီ သိသည်။

သူမက ဤမျှ ပင်ပန်းတကြီး သူ့ကို ဆွဲဆောင်ရန် ကြိုးပမ်းနေစဉ် သူက တခြား မိန်းကလေး တစ်ယောက်ကို တွေးနေနိုင်သည်။

ဤသည်ကို တွေးမိလျှင် ဂူဘိုင်ယွီက ဒေါသတကြီး သူမ၏ စိတ်အသိအား ဂီတသံစဉ်ထဲတွင် ထည့်သွင်း တီးမှုတ်လိုက်ကာ သံစဉ်ကို ပိုမို လှပအသက်ဝင်စေသည်။ သို့သော်လည်း ရီဖူရှင်းကို လုံးဝ လှုပ်ခတ်နိုင်စွမ်း မရှိပေ။ တဖြည်းဖြည်းဖြင့် သံစဉ်က ပြောင်းလဲလာသည်။ လှပသောသံစဉ်က တဖြည်းဖြည်း ရန်လိုလာသည်။ ထိုပြောင်းလဲမှုက ထက်ရှလှသည်။ ထိုအနိမ့်အမြင့် အတက်အကျ ကြမ်းတမ်းကာ ရန်လိုသော သံစဉ်က ရီဖူရှင်း၏ စိတ်နယ်ပယ်ထဲကို ရုန့်ရင်းစွာ ဝင်ရောက်လာကြသည်။ ထိုအရာက သူ၏ လှပသော စိတ်ကူးများ အားလုံးကို ဖြိုခွင်းသည်။ သူ၏စိတ်နယ်ပယ်ထဲမှ ဟွာဂျီယူ၏ ပုံရိပ်က တဖြည်းဖြည်း ပြယ်လွင့်လာသည်။

ဂူဘိုင်ယွီကား နတ်သမီးနှင့် မတူတော့ပေ။ ထိုအစား သူမက အလွန် လွှမ်းမိုးနိုင်စွမ်းသော နတ်ဘုရားမနှင့် တူနေသည်။ သူမကား အလွန်လှပကာ အလွန် ကြောက်မက်ဖွယ် ကောင်းသည်။ သူမက ရီဖူရှင်း၏ စိတ်နယ်ပယ်ထဲကို အတင်းဝင်ရောက်ကာ သူမ၏ ရုပ်ပုံအား အတင်း ဖြစ်ပေါ်စေသည်။ သူမက ရီဖူရှင်းအား သူမထံသို့ ခစားစေလိုသည်။

စိတ်ကူးယဉ် နယ်ပယ်ထဲတွင် ရီဖူရှင်းက လေထဲမှ ဂူဘိုင်ယွီကို ကြည့်နေသည်။ သူမကား နတ်ဘုရားမ တစ်ပါးလို အားကောင်းသည်။ သူမ၏သံစဉ်က သူ့အား သူမကို ခစားစေလိုနေသည်။ သူ၏ စိတ်နယ်ပယ်ထဲတွင် ဟွာဂျီယူ၏ ပုံရိပ်က တဖြည်းဖြည်း မှုန်ဝါးလာနေသည်။

ပြင်ပလောကတွင်မူ ပရိသတ်များ၏ အမူအရာများ ပြောင်းလဲလာသည်။ သူတို့ အားလုံးကလည်း ဂီတသံစဉ်၏ လွှမ်းမိုးမှုကို ခံစားနေကြရသည်။ သို့သော်လည်း ရီဖူရှင်း၏ ဆံပင်များနှင့် အဝတ်စများက လေထဲတွင် တဖျတ်ဖျတ် လွင့်နေခြင်းက သူက ကြီးစွာသော ဖိအားကို ခံစားနေရကြောင်း ပြသနေသည်။

ရီဖူရှင်း၏ မျက်လုံးများက ထက်ရှသွားသည်။ သူ့အား ခစားစေလိုသည်လား။ ဟွာဂျီယူ၏ ပုံရိပ်ကို ဖျက်ဆီးလိုသည်လား။ သူ၏ စိတ်က ပိုမိုခိုင်မာလာသည်။ ရီဖူရှင်းက ရှေ့ကို လျှောက်သွားကာ ဂီတသံစဉ် သင်္ကေတများဖြင့် ဖန်တီးထာသော တူရိယာတစ်ခုထံသို့ ရောက်လာကာ ပြောသည်… “မင်းကိုငါက လက်ဆောင် ပြန်ပေးရတာပေါ့…”

ရီဖူရှင်းက ရှေ့မှ ကု့ချင်းကို တီးခတ်လိုက်သည်။ သူ၏ စိတ်အသိက လေထဲတွင် မျောလွင့်နေသော သင်္ကေတများထံသို့ ဝင်ရောက်သွားလျှင် ကု့ချင်းသံစဉ်များ ထွက်ပေါ်လာသည်။ ချက်ချင်းပင် လွန်စွာ အားကောင်းသော သံစဉ်တေးသွားတစ်ခု ဖြစ်ပေါ်လာကာ သံစဉ်နှစ်ခု ရင်ဆိုင်မိကြသည်။ ပလွေသံစဉ်ကား အလွန် ရုန့်ရင်းကြမ်းတမ်းကာ ရီဖူရှင်း၏ စိတ်နယ်ပယ်ထဲမှ အရာအားလုံးကို ဖျက်ဆီးပစ်လိုနေကာ ဂူဘိုင်ယွီ၏ ပုံရိပ်ကို ဖန်တီးလိုနေသည်။

ကု့ချင်းကား တော်ဝင်မြင့်မြတ်သည်။ ဧကရာဇ်တစ်ပါးလို သူက ရီဖူရှင်း၏ စိတ်ထဲမှ ဟွာဂျီယူ၏ ပုံရိပ်ကို ကာကွယ်သည်။ သူ၏ နယ်မြေက ပန်းချီကား တစ်ချပ်လိုပင်။ ကြောက်မက်ဖွယ် ကု့ချင်းဂီတက ဂူဘိုင်ယွီ၏ နားစည်ကို လာရောက် ရိုက်ခတ်သည်။ ထိုအရာက နတ်ဘုရားမ၏ ရန်လိုသော စိတ်ကို ပျက်ပြယ်စေကာ သူမအား ဦးညွှတ်စေသည်။

ရီဖူရှင်းက သူ၏ နားလည်မှု ဉာဏ်အလင်းကို အသုံးပြုလျက် ကမ္ဘာကြီး သံစဉ်အား ပြည့်စုံစေသည်။ အလွန် ကြီးမြတ်သော အနုပညာရသသိတစ်ခု မွေးဖွားလာသည်။

သူကား ပြန်လည် တိုက်ခိုက်နေသည်။ လူတိုင်းက ထိုမြင်ကွင်းကို ကြည့်ကာ အံ့အားသင့်ရသည်။ ဂူဘိုင်ယွီ၏ စုန်းမ သံစဉ်က ရီဖူရှင်းအား အနိုင် မယူနိုင်ပေ။ နူးညံ့သိမ်မွေ့သော အလှနတ်သမီးပင် ဖြစ်စေ ရန်လိုကာ ရုန့်ရင်းကြမ်းတမ်းသော နတ်ဘုရားမပင်ဖြစ်စေ ရီဖူရှင်း၏ စိတ်အင်အားကို ယှဉ်နိုင်စွမ်း မရှိပေ။ ယခု သူကား ပြန်လည် တိုက်ခိုက်နေသည်။

ရီဖူရှင်း၏ ကိုယ်ရောင်ကိုယ်ဝါက ချက်ချင်း ပြောင်းလဲသွားသည်။ သူ့ထံမှ ဧကရာဇ်တစ်ပါး၏ စွမ်းအားများ ထွက်ပေါ်လာသည်။ သူကား အလွန် အားကောင်းသော ဘုရင်တစ်ပါး ဖြစ်လာဟန်တူသည်။

ကု့ချင်းနှင့်ပလွေ ရင်ဆိုင်မိသကဲ့သို့ ဧကရာဇ်နှင့် နတ်ဘုရားမတို့ ရင်ဆိုင်မိကြသည်။ မဆုံးနိုင်သော ဂီတသံစဉ်များက တိုက်ခိုက်ကြလျှင် လေထုက ပိုမို တုန်ခါလှုပ်ခတ်လာ၏။

စုန်းမသံစဉ်က နတ်ဘုရားမအား အလွန်အားကောင်းသော လွှမ်းမိုးနိုင်စွမ်းကို ပေးသည်။ မဆုံးနိုင်သော ပုံရိပ်များက ရီဖူရှင်း၏ စိတ်နယ်ပယ်ထဲတွင် ဖြစ်ပေါ်လာသည်။

ကမ္ဘာကြီး သံစဉ်ကား တူညီစွာ လွှမ်းမိုးနိုင်စွမ်း ရှိသည်။ ယခုကား ရီဖူရှင်းက တကယ့်ဧကရာဇ် တစ်ပါးနှင့် တူညီသည်။ သူ၏ ဂီတသံစဉ်က ဂူဘိုင်ယွီထံ ဆင်းသက်လာကာ သူမအား ခစားစေသည်။

ဤမျှ အားကောင်းသော စိတ်အသိ။ လူတိုင်းက ကြောက်မက်ဖွယ် ကောင်းသော သံစဉ်မုန်တိုင်းကို မြင်နေကြရသည်။ နှစ်ဖက်အားအင်က အလွန်အမင်း ပြင်းထန်ကာ မည်သူမှ နောက်ဆုတ်လိုဟန် မရှိပေ။ ထိုအရာက သရေဟု ပြောရမည်လော။ သို့သော်လည်း ရီဖူရှင်းသာ သူမ၏ သံစဉ်ကို ခံနိုင်ရည်ရှိပါက အရှုံးပေးမည်ဟု ဂူဘိုင်ယွီက ပြောခဲ့သည်။ အလောင်းအစားက သူမက ရှုံးနိမ့်ခဲ့လျှင် ရီဖူရှင်း၏ အစေခံဖြစ်လာမည် ဖြစ်သည်။

သူမကသာ အစေခံလုပ်ရန် ငြင်းဆိုပါက ရီဖူရှင်းက မည်သို့မှ လုပ်နိုင်မည် မဟုတ်သော်လည်း လူသူပရိသတ်များစွာ ဤနေရာတွင် ကြည့်နေသည်။ ထိုအရာက အလွန် အရှက်ရဖွယ်ရာ ဖြစ်သည်။

ထိုစဉ်မှာပင် ဂူဘိုင်ယွီ၏ ပလွေထံမှ မဆုံးနိုင်သော သံစဉ် သင်္ကေတများ ထွက်ပေါ်လာကာ ရီဖူရှင်း၏ စိတ်နယ်ပယ်ထဲကို ဝင်ရောက်လာသည်။ သူမက သူမ၏ စိတ်အသိနှင့် သံစဉ်သင်္ကေတတို့ကို ဆက်သွယ်ကာ ရီဖူရှင်းအား မေးသည်… “နင့်စိတ်ထဲက ဘယ်သူလဲ…”

သူမ၏ ခန္ဓာကိုယ်၊ ကိုယ်ရောင်ကိုယ်ဝါနှင့် စုန်းမသံစဉ်က အလွန် စွမ်းရည်မြင့်မားသော တန်ခိုးရှင်များကိုပင်လျှင် ထိန်းချုပ်နိုင်စွမ်း ရှိသည်။ ရီဖူရှင်း၏ ဓမ္မအဆင့်နှစ် တန်ခိုးအဆင့်ကို သူမက ဂရုစိုက်ရမည်လား။ သို့သော် ရီဖူရှင်းက တစ်စုံတစ်ယောက်အား တစ်ချိန်လုံး ကာကွယ်ပေးနေပုံ ရသည်။

ရီဖူရှင်းက ပြုံးလျက် ပြောသည်… “မင်း အရှုံးပေးပြီလား…”

“အရှုံးပေးတယ်…” ဂူဘိုင်ယွီက ပြန်ပြောသည်… “ငါက နင့်ကို ငါ့စိတ်အင်အားနဲ့ အနိုင်မယူနိုင် သေးတာပဲ ရှိတာ…” ရီဖူရှင်းသာ ခံနိုင်ရည်ရှိလျှင် သူမက အရှုံးပေးမည်ဟု ပြောခဲ့သည်။

“အာ…” ရီဖူရှင်းက ရယ်မောလိုက်သည်… “ငါက ဘာမှ မတိုက်ခိုက်ရသေးဘူးဆို မင်းယုံမလား…”

သူ၏ စကားက ဂူဘိုင်ယွီအား အံ့အားသင့်စေကာ သူမက မှတ်ချက်ချသည်… “နင်က အရမ်း မာနကြီးတာပဲ…” ထို့နောက် သူမက ပလွေကို တီးမှုတ်ကာ စုန်းမသံစဉ်ဖြင့် ရီဖူရှင်းကို တိုက်ခိုက်ပြန်သည်။

ရီဖူရှင်းကလည်း ပြုံးလိုက်သည်။ သူက ကု့ချင်းကို ဆက်လက် တီးခတ်လျှင် ဧကရာဇ်အလား ကိုယ်ရောင်ကိုယ်ဝါက ပိုမို အားကောင်းလာသည်။ ယခုကား သူက ဧကရာဇ်တစ်ပါး ဖြစ်နေလေပြီ။  သူက သူ၏ စိတ်နယ်ပယ်ထဲမှ ဂူဘိုင်ယွီ၏ ပုံရိပ်များကို ချက်ချင်း ဖျက်ဆီးပစ်သည်။ တစ်ချိန်တည်းမှာပင် အလွန်တရာ အားကောင်း ပြင်းထန်သော စိတ်အသိတစ်ခု ဂူဘိုင်ယွီ၏ စိတ်နယ်ပယ်ထဲကို အတင်း တိုးဝင်ရောက်လာကာ စုန်းမသံစဉ်အား ဖျက်ဆီးလိုက်သည်။ သူမ၏ စိတ်အသိက ချက်ချင်း ထိန်းချုပ်ခံရလျှင် ပလွေသံလည်း ရပ်တန့်သွားကာ ဂူဘိုင်ယွီက ရီဖူရှင်းကို ထိတ်လန့်တကြား ကြည့်လိုက်သည်။ ဧကရာဇ်အလား ပုံသဏ္ဌာန်က ကု့ချင်းတီးနေရာမှ ရပ်ကာ ပြုံးလျက် ကြည့်နေသည်။ သူက ကမ္ဘာကြီးတွင် သူတစ်ယောက်တည်း ရှိသည့်အလား ထည်ဝါစွာ ရပ်နေသည်။

လူတိုင်း၏ မျက်လုံးက ထိုလူနှစ်ယောက်ထံကို ရောက်နေသည်။ ထိုအရာက သရေမဟုတ်ပေ။ ဂူဘိုင်ယွီက ရှုံးနိမ့်ခဲ့သည်။ စိတ်အင်အားချင်း ယှဉ်ပြိုင်သောပွဲတွင် စုန်းမသံစဉ်က အမှန်ပင် ရှုံးနိမ့်ခဲ့သည်။

လျိုချန်းယွီက ရီဖူရှင်းအား စိုက်ကြည့်နေသည်။ သူမက ရီဝူချင်း ပြောခဲ့သည်ကို ပြန်တွေးမိသည်။ ကြည့်ရသည်မှာ ရီဖူရှင်းနှင့် ယူချင်းက ရီဝူချင်းထက် နိမ့်ကျခြင်း မရှိပေ။ သူတို့အားလုံးက ကွဲပြားသော စွမ်းအင်များကို ပိုင်ဆိုင်ကြသည်။

ရီဖူရှင်းက အမှန်ပင် စုန်းမသံစဉ်ကို ရင်ဆိုင်လျက် ဂူဘိုင်ယွီကို အနိုင်ယူခဲ့သည်။ ပိုမို၍ ထိတ်လန့်ဖွယ် ကောင်းသည်မှာ သူကား ဓမ္မအဆင့်နှစ်မျှသာ ရှိနေခြင်းပင်။ သူက ကု့ချင်းကို တီးခတ်နေသော အချိန်တွင်လည်း သူ၏ ကိုယ်ရောင်ကိုယ်ဝါကား ဧကရာဇ်တစ်ပါး အလားပင်။ ထိုကဲ့သို့သောသူက တခြားလူများ၏ နောက်လိုက် အလွယ်တကူ အဖြစ်ခံမည် မဟုတ်ပေ။

ဂူဘိုင်ယွီနှင့် ကျိစီမိုတို့က ရီဖူရှင်းကို သူတို့နောက်လိုက် ဖြစ်စေလိုကြသည်။ သူက ပြန်လည် တိုက်ခိုက်ကာ ဂူဘိုင်ယွီအား အစေခံဖြစ်စေသည်မှာ မထူးဆန်းတော့ပေ။

ရီဖူရှင်းက ကျောက်ရုပ်အလား ငေးနေသော ဂူဘိုင်ယွီကို ပြုံးလျက် ပြောသည်… “မင်းကို ငါပိုင်ပြီ….”

***

အတွဲ(၁၃)ပြီးပါပြီ

ဆက်ပါဦးမည်။

***