ရီဖူရှင်းက ထိုသို့ ပြောလိုက်သည်နှင့် လူအများအပြားက ထိတ်လန့် သွားကြသည်။ ထိုချောမောသော လူငယ်လေးအား ကြည့်သော သူတို့အကြည့်က အေးခဲသွားဟန်တူသည်။
သူက မှော်ဂီတပညာရပ်ကို မိမိကိုယ်ကို တိုးတက်ရန် အလို့ငှာ လေ့လာသည်တဲ့လား။
ယခုတိုက်ခိုက်မှုတွင်ပင် ရီဖူရှင်း၏မှော်ဂီတပညာက ချင်ကလန်မှ အထက်မြက်ဆုံးသော လူငယ်ပါရမီရှင်အား အဆုံးစွန်သော အားထုတ်မှုကို ရောက်အောင် ဖိအားပေးနိုင်ခဲ့ရာ ယခု သူက မှော်ဂီတပညာမှာ သူအမှန်တကယ် ကျွမ်းကျင်သည့်ပညာ မဟုတ်ဟု ဘုရင်မင်းမြတ်ကို ပြောနေသည်။ သည်အရာကား…
ဘေချူ၏အမူအရာ ပြောင်းလဲသွားသည်။ ယခုအချိန်အထိ သည်တိုက်ပွဲအတွက် သူ့တွင် ဂုဏ်ယူစရာ တစ်ကွက်မျှပင် မရှိပေ။ သူက ရီဖူရှင်း၏ အပြုအမူများအတွက် လက်စားချေနေခြင်း သက်သက်သာဖြစ်သည်။ ဤသည်ကို သူလည်း သိသည်။ ပရိသတ်များအားလုံး သိသည်။ ယခု ရီဖူရှင်း၏စကားများအရ သူ့လုပ်ဆောင်မှုက ကောင်းမွန်သည်ဆိုသော အဆင့်တွင်ပင် မရှိတော့ပေ။ ရီဖူရှင်း၏စကားနောက်ကွယ်မှ ရည်ရွယ်ချက်များက အဘယ်နည်း။
ကောင်းကင်တွင် ကြည့်နေသော ဟွာဖန်းလူ အနည်းငယ် ချောင်းဟန့်လိုက်သည်။
သိမ်းငှက်နက်ပေါ်တွင် ထိုင်နေသော ဟွာဂျီယူက မျက်တောင်များ ပုတ်ခတ်ပုတ်ခတ် လုပ်လျက် ကြည့်နေသည်။ ယူချင်းက မျက်လုံးများ ပြူးကျယ်လျက် ထိုင်နေသည်။ သူက ဘေချူအား သနားစဖွယ် လူငယ်အဖြစ် မြင်နေရသည်။
တခြားလူများကို အသာထား… ဘုရင်မင်းမြတ်ပင်လျှင် ရီဖူရှင်း၏အယူခံအတွက် မည်သို့ပြန်ပြောရမှန်း မသိပေ။ သူက ကိုယ်ဟန်ကို ချက်ချင်း ပြန်ပြင်လိုက်ပြီး ဖန်းဟွာစင်မြင့်ပေါ်မှ ချောမောသော လူငယ်လေးအား ကြည့်ကာ ပြောလိုက်သည်… “ဒါက အဆင်ပြေတယ်… ဒါဆိုလည်း မင်းရဲ့ ကျွမ်းကျင်တဲ့ ပညာနဲ့ တိုက်ခိုက်ခွင့်ပြုတယ်…”
“ကျေးဇူးကြီးမြတ် လှပါတယ်… အရှင်မင်းကြီး…” ရီဖူရှင်းက ဘုရင်မင်းမြတ်အား ဦးညွှတ်လိုက်ပြီး ဘေချူထံသို့ လှည့်ကာ ပြုံးလိုက်သည်။
“မင်းတကယ် ကျွမ်းကျင်တယ်ဆိုတဲ့ ပညာကို ငါလည်း သိချင်တယ်…” ဘေချူက မျက်နှာ မည်းမှောင်လျက် ပြောသည်။ သူက ကု့ချင်းပေါ်တွင် လက်တင်လိုက်လျှင် ဂီတသံစဉ်က တစ်ဖန် ထွက်ပေါ်လာပြန်သည်။ သူက ရီဖူရှင်းအား အနိုင်မယူနိုင်လျှင် သူ့ဂုဏ်သိက္ခာများ အားလုံး ဆုံးရှုံးသွားနိုင်ပေသည်။
ဘေချူ၏ လက်ချောင်းများက ကု့ချင်းနှင့် ထိတွေ့မိသည်နှင့် ကောင်းကင်တွင် လျှပ်စီးမုန်တိုင်းများ တစ်ဖန် ဖြစ်ပေါ်လာပြန်သည်။ လေရူးများနှင့် တိမ်မည်းများ ဖြစ်ပေါ်လာသည်။ သူကား သည်မတိုင်မီက သံစဉ်ကိုပင် တီးခတ်လိုက်ခြင်း ဖြစ်သည်။
ရီဖူရှင်းက ရှေ့ကို လှမ်းတက်လိုက်သည်။ သူ့နတ်ငှက်ဝိညာဉ်အား ထုတ်လွှတ်လိုက်လျှင် ကြီးမြတ်သော ကိုယ်ရောင်ကိုယ်ဝါက သူ့ခန္ဓာကိုယ်မှ ထွက်ပေါ်လာ၏။ စက္ကန့်ပိုင်းအတွင်းပင် လူအများ၏မျက်လုံးများက ရီဖူရှင်း၏သက်စောင့်ဝိညာဉ်ကို ကြည့်ပြီး ပြူးကျယ်ကာ ထိတ်လန့်တုန်လှုပ်သွားကြသည်။
မှန်သည်။ သက်စောင့်ဝိညာဉ် နှစ်ခုပင်။ လူတိုင်း၏ရင်ဘတ်များ တုန်ခါသွားကြသည်။
ရီဖူရှင်းက သည်မတိုင်မီက မှော်ဂီတပညာရှင်အနေဖြင့် သူ့ကု့ချင်းဝိညာဉ်အား ထုတ်ဖော်ပြသခဲ့သည်။ ယခု ရွှေရောင် နတ်ငှက်ဝိညာဉ် ထပ်မံ ထွက်ပေါ်လာသည်။ သူ့တွင် သက်စောင့်ဝိညာဉ် နှစ်ခုရှိသည်။
ပရိသတ်က နောက်ဆုံးတွင် လုံးဝ နားလည်သွားပြီ ဖြစ်သည်။ သူတို့က ဟွာဂျီယူအားသာလျှင် လျှော့တွက်မိခဲ့ကြသည် မဟုတ်။ သူတို့က ရီဖူရှင်းအားလည်း လျှော့တွက်မိကြသည်။ သည်ကြယ်ခုနစ်ပွင့် ကောင်းကင်အဆင့် လူငယ်သုံးယောက်မှာ ဖန်းဟွာပွဲတော်တွင် ထွန်းတောက်ရန် ဖြစ်လာပုံရသည်။
ယူချင်းနှင့် ဟွာဂျီယူတို့က သူတို့၏ တကယ့် အရည်အချင်းများအား ထုတ်ဖော်ပြသပြီး ဖြစ်ကြသည်။ ယခု ရီဖူရှင်း၏ အလှည့်ဖြစ်သည်။ သူ့မှော်ဂီတပညာက ဘေချူအား အစွမ်းကုန် သုံးရလောက်အောင် ဖိအားပေးနိုင်ခဲ့သည်။ ယခု သူက ဘုရင်မင်းမြတ်အား သူတကယ် ကျွမ်းကျင်သော ပညာရပ်မှာ မှော်ဂီတပညာမဟုတ်ဟု ပြောထားသည်။
ထို့နောက်တွင် သူ၏ ဒုတိယမြောက် သက်စောင့်ဝိညာဉ်ကို ထုတ်လွှတ်ခဲ့သည်။
ကု့ချင်းအား စတင်တီးခတ်နေသော ဘေချူလည်း ထိတ်လန့်သွားသည်။ သူ၏အေးစက်သော အကြည့်က ရီဖူရှင်းထံ ရောက်လာသည်။ ဓမ္မအဆင့် တန်ခိုးရှင် တစ်ယောက်အနေဖြင့် သူက ရီဖူရှင်းအား အသာစီးရရမည် ဖြစ်ပေသည်။ သို့သော် မူလအစ ပထမကပင် ရီဖူရှင်းက လူအများ၏အာရုံစိုက်မှုအား ရယူသွားသည်။
ထိုသို့တွေးမိလျှင် ဘေချူက သူ၏ဓမ္မအသိအား ထုတ်လွှတ်လိုက်သည်။ ကု့ချင်းများစွာ လေထဲတွင် ဖြစ်ပေါ်လာပြီး သူ၏ကု့ချင်းဝိညာဉ်အား တီးခတ်လျှင် လေထဲမှ ကု့ချင်းများက သံစဉ်များဖြင့် အထောက်အပံ့ပေးကြသည်။ ကြောက်မက်ဖွယ် အားလှိုင်းတစ်ခု ဖန်းဟွာစင်မြင့်ပေါ်ကို ဆင်းသက်လာသည်။ လေထုက ပရမ်းပတာ ဖြစ်လာသည်။ ကု့ချင်းဂီတသံက မှော်စွမ်းအင်အဖြစ် ပြောင်းလဲသွားသည်။ လျှပ်စီးကြောင်း တချို့က ရီဖူရှင်းနေရာကို ဆင်းသက် လာသော်လည်း ရီဖူရှင်းက လျင်မြန်စွာ ရှောင်တိမ်းလိုက်နိုင်သည်။
“အရမ်းမြန်တယ်…” လူတိုင်းက ကောင်းကင်မှ လူငယ်လေးအား ကြည့်လိုက်ကြသည်။ ကောင်းကင်တွင်ကား ရီဖူရှင်းက သူ၏အတောင်ပံများအား ဖြန့်ကာ လေထဲတွင် ရပ်နေသည်။ သူ့ကိုယ်တွင် ရစ်ပတ်နေသော လေဓာတ်စွမ်းအင်များက သူ့အား သည့်ထက် ပိုမို မြန်ဆန်စေသည်။ သူက လက်ဆန့်တန်းလိုက်လျှင် သတ္တဓာတ်စွမ်းအင်က ရွှေရောင်နှင်တံတစ်ခုအဖြစ် ပြောင်းလဲသွားလျှင် ရီဖူရှင်းက ထိုနှင်တံကို ဝှေ့ယမ်းလိုက်သည်။
ရီဖူရှင်းက ရှေ့ကို တစ်လှမ်းတိုးလိုက်လျှင် မမြင်ရသော အားလှိုင်းတစ်ခု သူ့ခန္ဓာကိုယ်မှ ထွက်ပေါ်လာသည်။ လျှပ်စီးတန်းများက သူ့ထံ ထပ်မံဆင်းသက် လာကြပြန်သည်။ သို့သော် သည်တစ်ကြိမ်တွင် သူက ရှောင်ဖယ်ရန် မကြိုးစားပေ။ ထိုအစား သူက ရှေ့ကို တိုးလျက် နှင်တံအား ဝှေ့ယမ်းလိုက်လျှင် လျှပ်စီးများက တစ်ဘန်းဘန်း မြည်ကာ ပျောက်ကွယ် သွားကြသည်။ ရီဖူရှင်းက တောင်တစ်လုံးကဲ့သို့ တည်ငြိမ်စွာ ရပ်နေကာ ထိုအခိုက်တွင်ပင် သူ့ကိုယ်ရောင်ကိုယ်ဝါများက တဖြည်းဖြည်း အားကောင်းလာနေသည်။
သံစဉ်က တဖြည်းဖြည်း ကြမ်းတမ်းလာသည်။ မုန်တိုင်းကလည်း တဖြည်းဖြည်း ပိုကြမ်းလာသည်။ တစ်ချိန်တည်းမှာပင် ကု့ချင်းဂီတသံက ရီဖူရှင်း၏နားထဲကို အဆက်မပြတ် လာရောက်ရိုက်ခတ်ကာ သူ့အား အနုပညာရသ အသိထဲကို ဆွဲခေါ်ယူရန် ကြိုးစားနေသည်။ ကောင်းကင်ကား နက်မှောင်နေသည်။ သို့သော် လျှပ်စီးများက အဆက်မပြတ် ဝင်းလက်နေကြသည်။ ဘေချူ၏ဂီတတွင် ထပ်ဆင့်တိုက်ခိုက်မှုဖြစ်သော စိတ်ဝိညာဉ်စွမ်းအင်နှင့် မှော်စွမ်းအင်များ ပါဝင်နေသည်။
သူ့မျက်လုံးများထဲမှ ထူးဆန်းသော မုန်တိုင်းများ တိုက်ခတ်သွားပြီး ရီဖူရှင်းက မုန်တိုင်း၏မျက်လုံးများမှ ထောက်ပံ့သော အဆုံးမဲ့ စိတ်ဝိညာဉ်စွမ်းအား အကူအညီဖြင့် ဂီတသံစဉ်၏ လွှမ်းမိုးမှုကို ကာကွယ်ထားသည်။ လျှပ်တစ်ပြက်ပင် သူက လျှပ်စီးအလား လျင်မြန်စွာဖြင့် ပြိုင်ဘက်ထံသို့ တိုးဝင်သွားသည်။ မှော်ဂီတပညာရှင် တစ်ယောက်အနေဖြင့် မှော်ဂီတပညာရှင်၏အားနည်းချက်ကို သိခြင်းမှာ သဘာဝပင်ဖြစ်သည်။
မှော်ဂီတပညာရှင်များက သိုင်းပညာရပ်နှင့် သဘာဝစွမ်းအင် သက်သက်ကိုသာလျှင် ကျင့်ကြံသော တန်ခိုးရှင်များအား အလွယ်တကူ အသာစီးရနိုင်သည်။ အလွန်ထက်မြက်သော မှော်ဂီတပညာရှင်များက သူတို့၏သံစဉ်များအား အလွန် အားကောင်းသော မှော်စွမ်းအင်များအဖြစ် ပြောင်းလဲ တိုက်ခိုက်နိုင်သည်။ သို့သော်လည်း သူတို့၏ အားနည်းချက်ကား အလွန် သိသာထင်ရှားသည်။ မှန်သည် အနီးကပ် တိုက်ခိုက်ခြင်းပင်။ တိုက်ခိုက်နေစဉ်အတွင်း ပြိုင်ဘက်က ထိုမှော်ဂီတပညာရှင်အနီးသို့ ရောက်လာလျှင် မည်သို့ ဖြစ်သွားမည်နည်း လူတိုင်း တွေးကြည့်၍ ရသည်။
မှန်သည်… မှော်ဂီတပညာရှင်၏အနီးကို ကပ်ရန်မှာ လွယ်ကူသော ကိစ္စတစ်ရပ်တော့ မဟုတ်ပေ။
ရီဖူရှင်းအနီးသို့ ကပ်လာသည်ကို မြင်သော်လည်း ဘေချူက တည်ငြိမ်စွာ တီးခတ်နေဆဲဖြစ်သည်။ သူ့ဂီတသံစဉ်က မုန်တိုင်းအလား ရီဖူရှင်းထံ တိုးဝင်သွားကာ အရာအားလုံးကို ဖျက်ဆီးရန် ကြိုးပမ်းကြသည်။ သို့သော်လည်း ရီဖူရှင်းက ကွေ့ကောက်စွာ ပြေးဝင်လာနေပြီး သူက ဘေချူထံမှ ပျံ့လွင့်လာသော သံစဉ်လှိုင်းများအား ရှောင်တိမ်းနေသည်။ သူက သံစဉ်မုန်တိုင်းအား တိုက်ရိုက် ရင်မဆိုင်လိုပေ။
ဘေချူ၏ လက်ချောင်းများက မယုံကြည်နိုင် လောက်အောင် မြန်ဆန်လာသည်။ သူတို့က ကု့ချင်းပေါ်တွင် ကြမ်းတမ်းစွာ ရွေ့လျားနေသည်။ ဂီတသံစဉ်မှ ဖြစ်ပေါ်လာသော မှော်စွမ်းအင် တိုက်ခိုက်မှုများက ရုတ်တရက် ဦးတည်ရာ ပြောင်းသွားကြသည်။ စိတ်ဝိညာဉ်စွမ်းအင် တိုက်ခိုက်မှုများက အရပ်မျက်နှာ အားလုံးကို ဖြန့်ကြက်နိုင်သော်လည်း မှော်စွမ်းအင်များက ထိုသို့ လုပ်နိုင်စွမ်း မရှိပေ။
လူတိုင်းက ဘေချူ၏ တိုက်ခိုက်မှုများက ဦးတည်ရာ အရပ်များစွာသို့ သွားနေသည်ကို မြင်နေကြရသည်။ သူ၏ကြီးမားသော ရွှေရောင်အတောင်ပံများ အားကိုးဖြင့် လေထဲတွင် လျင်မြန်စွာ ရွေ့လျားနေသော ရီဖူရှင်းက နှင်တံအားလည်း ဆက်မပြတ် ဝှေ့ယမ်းနေသည်။ သူ့လှုပ်ရှားမှုများတွင် ထူးခြားသော ဟန်ပန်များ ပါဝင်နေသည်။ သူ့အနီးတွင် အလွန် အားကောင်းသော စွမ်းအင်များ စုစည်းလာနေသည်။
“သူက စွမ်းအင်တွေကို စုစည်းနေတာ…” ပရိသတ်များက ရီဖူရှင်း၏ လှုပ်ရှားမှုတိုင်းအား ကြည့်နေကြသည်။ ဘေချူ၏ တိုက်ခိုက်မှုများအား တိမ်းရှောင်လျက် သူကား အဆက်မပြတ် စွမ်းအားများကို စုစည်းနေသည်။ သူ၏ ရွှေရောင် ကိုယ်ရောင်ကိုယ်ဝါများ တောက်ပနေသော ခန္ဓာကိုယ်က အလွန်ထူးဆန်းသော ခံစားချက်များအား ပေးသည်။ သူ့ပတ်ဝန်းကျင်မှ စွမ်းအားများကလည်း တစ်ဆပြီး တစ်ဆ အားကောင်းလာနေသည်။
ပုံမှန်အားဖြင့် ဘေချူကလည်း ထိုဖြစ်စဉ်အား သတိပြုမိသည်။ သို့သော် သူအလေးမထားပေ။ သူ့ဂီတသံစဉ်၏ စိတ်ဝိညာဉ် အားလှိုင်းများ အောက်တွင် ရီဖူရှင်းက မည်မျှကြာကြာ ခုခံနိုင်မည်နည်း။ သူ မည်မျှကြာကြာ တာရှည်ခံမည်နည်း။
ထိုစဉ်မှာပင် လေထဲတွင် ပျံသန်းနေသော ရီဖူရှင်း၏ခန္ဓာကိုယ် ရုတ်တရက် ရပ်တန့်သွားသည်။ သူ့ထံ တိုးဝင်လာနေသော မုန်တိုင်းအလား အားလှိုင်းက သူ့နှင်တံ၏ ရိုက်ချက်အောက်တွင် ပျောက်ကွယ်သွားသည်။
ရီဖူရှင်းက ဘေချူ၏အပေါ်တွင် ဝင့်ကြွားစွာ ရပ်နေသည်။ ကြီးမားသော ရုပ်ပိုင်းဆိုင်ရာ ကြံ့ခိုင်မှုမရှိသော်လည်း သူ့ခန္ဓာကိုယ်တွင် လှည့်ပတ်နေသော ကြောက်မက်ဖွယ် အားလှိုင်းက သူ့အား အလွန်ကြီးမြတ်ကာ ထိတ်လန့်ဖွယ် အရှိန်အဝါများကို ပေးသည်။ ကောင်းကင်တွင် တိမ်များ ပြည့်နှက်နေပြီး လျှပ်စီးနှင့် မိုးကြိုးများ လိုက်လျောညီထွေစွာ ဖြစ်ပေါ်လာနေသည်။ လေရူးများက ဓားသွားများအလား လေကို ခွင်း၍ ရီဖူရှင်းထံကို တိုးဝင်လာနေကြသည်။
သူ၏လက်မှ နှင်တံက ကခုန်သွားသည်။ ကြောက်မက်ဖွယ် အားလှိုင်းက ရောက်ရှိလာသော မုန်တိုင်းကို ဖျက်ဆီးပစ်လိုက်သည်။ သူ၏အတောင်ပံများ တဖျတ်ဖျတ်ခတ်သွားပြီး ရှေ့ကို တစ်လှမ်းတိုးကာ နှင်တံအား မိုး၍ ရိုက်ချလိုက်လျှင် မုန်တိုင်းမှာ နှစ်ခြမ်းကွဲသွားသည်။
“သူ့တိုက်ကွက်ရဲ့ အားအင်က…..” ထိုမြင်ကွင်းက လူအများအပြား၏ ကျောများအား စိမ့်စေသည်။ သံစဉ်မုန်တိုင်းကား နှင်တံ၏ရိုက်ချက် တစ်ချက်ဖြင့် ပျက်စီးသွားသည်။ ထိုအားအဟုန်က ကမ္ဘာမြေမှ စွမ်းအားများအားလုံးမှာ ရီဖူရှင်းနှင့် သက်ဆိုင်နေသည့် အလားပင်။
သူ၏ရွှေရောင်ခန္ဓာကိုယ်က ပိုမို တောက်ပလာသည်။ ရှေ့ကို ရွေ့လျားရမည့်အစား နှင်တံကို ရိုက်ချလိုက်ခြင်းဖြင့် ဖြစ်ပေါ်လာသော လမ်းကြောင်းအတိုင်း သူက ဘေချူရှိရာ မြေပြင်သို့ တိုက်ရိုက် ဆင်းသက်လာသည်။ သည်တစ်ကြိမ်ကား နောက်ထပ် ရှောင်တိမ်းစရာ မလိုတော့ပေ။ သူက ဘေချူ၏တိုက်ခိုက်မှုကို တိုက်ရိုက် ရင်ဆိုင်တော့မည် ဖြစ်သည်။ သူက ကောင်းကင်ဘုံးကိုးဆင့် တိုက်ကွက်၏ မူလဘူတ ရိုက်ချက်အတွက် လုံလောက်သော စွမ်းအားကို စုဆောင်းပြီး ဖြစ်သည်။ သူ့လမ်းကြောင်းကို ရောက်လာသူ ဟူသမျှ ဖျက်ဆီးခံရမည်ဖြစ်သည်။
ကောင်းကင်တွင် လျှပ်စီးနဂါးက ဒေါသတကြီး ဟိန်းဟောက်သကဲ့သို့ လေပြင်းများက အော်ဟစ်ကြသည်။ ထိုအင်အားကား ထိတ်လန့်ဖွယ်ဖြစ်ပြီး သူ့စွမ်းအားက ကောင်းကင်အား ပြိုလဲသွားစေ နိုင်လောက်သည်။
နှင်တံရှည်က သူ့လက်ထဲတွင် ကခုန်နေသလို စွမ်းအားကလည်း တစ်ဆပြီးတစ်ဆ ကြီးမားလာနေသည်။ ကမ္ဘာမြေပေါ်မှ အရာခပ်သိမ်းက ရီဖူရှင်းကို အသနားခံရမည်ဖြစ်သည်။ နဂိုမူရင်းစွမ်းအားကို နောက်တစ်ဆ ထပ်တိုးလာစေသည့် ကောင်းကင်ဘုံကိုးဆင့် တိုက်ကွက်၏ ဒုတိယမြောက် ရိုက်ချက်ကို ထုတ်ဖော်လိုက်သည်။ ရီဖူရှင်းက နှင်တံကို ဝှေ့ယမ်းလိုက်လျှင် ကောင်းကင်ရှိ မုန်တိုင်းများအားလုံး လွင့်စဉ်သွားပြီး တစ်ဖန် ဘေချူထံသို့ နှင်တံကို ကိုင်စွဲလျက် ဆင်းသက်လာပြန်သည်။
ရီဖူရှင်း၏မျက်လုံးများက အလွန် ထူးခြားနေသည်။ သူ့စိတ်ဝိညာဉ်နယ်ပယ်အား ဘေချူ၏ စိတ်ဝိညာဉ်အားလှိုင်းများက အဆက်မပြတ် လာရောက် ရိုက်ခတ်နေသည်။ သို့သော် အလွန် အားကောင်းလှသော မုန်တိုင်း၏မျက်လုံးများမှ ပေးသော စိတ်ဝိညာဉ်အားဖြင့် သူက စိတ်ကို တည်ငြိမ်အောင်ထားနိုင်ကာ ကောင်းကင်ဘုံကိုးဆင့် တိုက်ကွက်အား အခက်အခဲမရှိဘဲ ထုတ်ဖော်နိုင်သည်။ သူက ကောင်းကင်ဘုံကိုးဆင့် တိုက်ကွက်ဖြင့် တိုက်ခိုက်လိုက်လျှင် သဘာဝစွမ်းအင် ပေါက်ကွဲမှုတစ်ခုဖြစ်သွားကာ သူ၏စိတ်ဝိညာဉ်အင်အားက အဆင့်တက်သွားသည်။
ဘေချူ၏အမူအရာ ပြောင်းသွားသည်။ သူ၏သံစဉ်က အနည်းငယ်သော စိတ်ရှုပ်ထွေးမှုကို ဖော်ပြသည်။ သည်ကဲ့သို့ အားကောင်းသော မှော်ဂီတသံစဉ်က ရီဖူရှင်း ရှေ့တက်လာမှုကို အဘယ်ကြောင့် တားဆီး၍ မရသနည်း။ ဘေချူက ထိုလူငယ် သူ့အနီးသို့ တဖြည်းဖြည်း နီးကပ်လာသည်ကို မြင်နေရသည်။ သူ့အမူအရာများ မကောင်းတော့ပေ။
ရီဖူရှင်းခန္ဓာကိုယ်တွင် စုစည်းလာနေသော အင်အားများ ပိုမို အားကောင်းလာသည်။ အမှန်က အားကောင်းလွန်းလှရကား သူ့လမ်းကြောင်းရှိ အရာအားလုံးကို ဖျက်ဆီးပစ်နိုင်သည့် အင်အားရှိသည်။
ဘေချူ၏လက်ချောင်းများက ကု့ချင်းပေါ်တွင် ကခုန်သွားကာ စိတ်ဝိညာဉ် အားလှိုင်းတစ်ခု ပေါက်ကွဲသွားသည်။ သို့သော် တစ်ချိန်တည်းမှာပင် ရီဖူရှင်းက လှုပ်ရှားလိုက်သည်။ အလွန်အမင်း ကြီးမားသော အားလှိုင်း၏အကူအညီဖြင့် နှင်တံရှည်က တစ်ဖန် အရာအားလုံးကို ဖျက်ဆီးရန် ကောင်းကင်မှ ဆင်းသက်လာသည်။ နှင်တံမှ ဖြစ်ပေါ်လာသော ဖိအားအရှိန်ကြောင့် လေထုကား ပေါက်ကွဲထွက်လုနီးပါးပင်။ နှင်တံရှည်က ဘေချူ၏ မှော်တိုက်ကွက်အား အတားအဆီးမရှိ ရိုက်ချလိုက်သည်။
လေဓာတ်များက ဘေချူအား ရစ်ပတ်သွားပြီး သူ့အား အဝေးသို့ သယ်ဆောင် သွားသည်။ သူ့ဂီတသံစဉ်က အားနည်းချက် ဖြစ်ပေါ်သွားပြီ။ ဘေချူ ဆုတ်ခွာလျှင် ရီဖူရှင်း၏လက်မှ ရွှေရောင်နှင်တံက အလင်းတန်းအလား လျှပ်တစ်ပြက်ပင် ဘေချူထံ တိုးဝင်သွားသည်။
ဤသည်ကို မြင်လျှင် ဘေချူက သူ့ကု့ချင်းဝိညဉ်အား စွန့်ခွာကာ လေဓာတ်ကို သုံးလျက် ပို၍ လျင်မြန်စွာ ဆုတ်ခွာလိုက်သည်။ တစ်ချိန်တည်းမှာပင် သူက အကာအကွယ် တစ်ခု ဖန်တီးရန် ကြိုးစားသည်။ ရွှေရောင်အလင်းတန်းက အလွန်လျင်မြန်ကာ အားပြင်းလှသည်။ နှင်တံက ဘေချူ၏ အကာကွယ်ကြောင့် အနည်းငယ် အားပျော့သွားသော်လည်း ဘေချူ၏အားပြင်းထန်စွာ ထိသည်သာ ဖြစ်သည်။ အော်ဟစ်သံတစ်ခုနှင့်အတူ ဘေချူ၏ပါးစပ်မှ သွေးတစ်ပွက် အန်သည်။ သူ့မျက်နှာပေါ်တွင် သွေးရောင်များ ပျောက်ဆုံးသွား၏။ သူ့ခန္ဓာကိုယ်ကား လွင့်စဉ်သွားပြီး ဖန်းဟွာစင်မြင့်၏အစွန်းနားကို ရောက်ရှိသွားသည်။
ကြောက်မက်ဖွယ် မုန်တိုင်းမှာလည်း တဖြည်းဖြည်း ပြယ်လွင့်သွားသည်။ ဖန်းဟွာ စင်မြင့်ပေါ်တွင် ရီဖူရှင်း ဝင့်ကြွားစွာ ရပ်နေသည်။ သူ့အရည်အချင်းကား အခြားလူများနှင့် မတူပေ။ ယခု အရာအားလုံးကား လုံးဝ တိတ်ဆိတ်နေသည်။ လူတိုင်းက မယုံကြည်နိုင်မှုများစွာဖြင့် မျက်လုံးများ ပြူးကျယ်ကာ ကြည့်နေကြသည်။ ကြယ်ခုနစ်ပွင့် ကောင်းကင်အဆင့်မျှဖြင့် ရီဖူရှင်းက ဓမ္မအဆင့်မှ ပါရမီရှင်အား အနိုင်ယူခဲ့သည်။ သူ၏ကြမ်းတမ်းသော ဟန်ပန်ဖြင့် လွှမ်းမိုးနိုင်စွမ်းသော ကိုယ်ရောင်ကိုယ်ဝါက လူတိုင်း၏စိတ်ထဲတွင် အမှတ်အသား ဖြစ်စေသည်။
ချင်ကလန်မှ လူငယ်များအားလုံး မျက်နှာ ပျက်နေကြသည်။ ဘေချူကား ချင်ကလန် လူငယ်မျိုးဆက်၏ ကိုယ်စားလှယ်ဖြစ်သည်။ သို့သော် ယနေ့ သူ့ထက် တန်ခိုးအဆင့်နိမ့်သော သူထံတွင် ရှုံးနိမ့်ခဲ့ရသည်။ မည်မျှ အရှက်ရဖွယ် ကောင်းသနည်း။
ထိပ်သီးပါရမီရှင်။ ချင်ကလန်၏လူငယ်များထဲမှ နံပါတ်တစ်။ ဖန်းဟွာအဆင့်အတွင်း ပါဝင်ရန် ရေပန်းစားသူ။
ကန်ယီကျောင်းတော်မှ ဆင့်ရှာက ကောင်းကင်မှနေ၍ ဖြစ်ပျက်သမျှကို မြင်နေရသည်။ အမှန်ကား သူမ၏ရင်ဘတ်မှာ ငလျင်လှုပ်ခတ်သည့်အလား တုန်ခါနေသည်။ သူမက ကန်ယီကျောင်းတော်တွင် ရီဖူရှင်းတို့ အုပ်စုကို လမ်းညွှန်ခဲ့သော အချိန်ကို ပြန်သတိရသည်။ ထိုအချိန်က သူမက ဘေချူအား လက်ညှိုးထိုးပြပြီး ရီဖူရှင်းအား ပြောခဲ့သည်။ သူကား ဘေချူဖြစ်ပြီး ချင်ကလန်မှ ဓမ္မအဆင့် ထိပ်သီးပါရမီရှင် ဖြစ်ကြောင်း။ ဖန်းဟွာ ရပ်တည်မှုအတွက် ရေပန်းစားသူများထဲမှ တစ်ယောက် ဖြစ်ကြောင်းကိုပင်။ သူမ၏ တန်ခိုးအဆင့်ကိုပင် ဂုဏ်ယူဝင့်ကြွားစွာဖြင့် သူတို့သုံးယောက်ရှေ့တွင် တမင် ထုတ်ပြခဲ့သေးသည်။ ဘေချူက ရီဖူရှင်းအား ကု့ချင်းကျောင်းသားအဖြစ် ဖိတ်ခေါ်သောအခါ သူမက ရီဖူရှင်းမှာ ဘေချူထံမှ သည်မျှဖိတ်ခေါ်ခံရခြင်းက အလွန်အမင်း ကံကောင်းသည်ဟု တွေးခဲ့သည်။ ထိုနေ့များမှ အကြောင်းများအား ပြန်တွေးလျှင် သူမအတွက် အရှက်ရဖွယ် အတိပင်။ ဆင့်ရှာကား ဖန်းဟွာပြိုင်ပွဲမှ ဖယ်ထုတ်ခံရပြီး ဖြစ်သော်လည်း သူမအထင်သေးခဲ့သော တစ်ယောက်မှာ ယခု အထွန်းတောင်ဆုံးသော လူငယ်တစ်ယောက် ဖြစ်နေလေပြီ။
ယခုကား မည်သူမှ ငြိမ်သက်သောစိတ် မရှိကြတော့ချေ။
ထိုစဉ်မှာပင် ဘေချူက ဖန်းဟွာစင်မြင့် အစွန်းနားတွင် ကုန်းရုန်း ထလာသည်ကို အားလုံးသူ မြင်ကြရသည်။ ရီဖူရှင်းက ပြုံးလျက် မေးသည်…..“ငါ့ကို မင်းရဲ့ ကု့ချင်းကျောင်းသား အဖြစ် လိုချင်သေးလား…”
ထိုမေးခွန်အားကြားလျှင် လူအများအပြားက ဘေချူအား ကြည့်လိုက်ကြသည်။ သူ အမှန်တကယ် ရီဖူရှင်းအား သူ၏ကု့ချင်းကျောင်းသား အဖြစ် လုပ်ခိုင်းခဲ့သည်လား။ သည်အဖြစ်က အလွန်….
ဘေချူက ရီဖူရှင်းကို အေးစက်စွာ ကြည့်သော်လည်း သူ၏ အပူအပင်ကင်းသော အပြုံးကိုသာ မြင်ရသည်။ ဘေချူအား သူက ထပ်ပြောသည်… “ကျုပ်ကို ဒီလို ကြည့်နေစရာ မလိုဘူး… မင်းက ချင်ကလန်မှာ နောက်နှစ်နှစ်လောက် ဆက်ပြီး တန်ခိုးကျင့်ရင်တောင် ကျုပ်ကို မီမှာ မဟုတ်ဘူး…”
မနေ့က ဘေချူက ရီဖူရှင်းအား ပြောခဲ့သော စကားများကို ပရိသတ်များ ပြန်မှတ်မိ လာကြသည်။ ထိုစကားများကို ပြောခဲ့စဉ်က သူ့မျက်လုံးများမှ ဖော်ပြနေသော မောက်မာမှုများ။ ယခု သူ့အားကြည့်ကာ သနားမိရုံမျှသာ တတ်နိုင်ကြသည်။ သည်နှစ် ဖန်းဟွာပွဲတော်ကား ဘေချူ၏ တစ်သက်လုံးအတွက် လုံးဝ မမေ့နိုင်စရာ အမှတ်တရ ဖြစ်နေတော့မည် ဖြစ်သည်။