ရီဖူရှင်း လိမ်နေသည် မဟုတ်ပေ။ သူလည်း စောင့်မျှော်နေသည်။ သူဘာကို စောင့်မျှော် နေသည်ကတော့ သူသာလျှင် သိပေလိမ့်မည်။
“သူ ရယ်နိုင်နေတုန်းပဲလား…” လူအများအပြားက ထူးဆန်းသလို ကြည့်ကြသည်။ သူပြုံးရယ်နိုင်သည်ကို မြင်လျှင် လူတိုင်းက သူ့တွင် ယုံကြည်မှုရှိသည်ဟု ယူဆကြ၏။
သည်တစ်ကြိမ်ကား ဟွာဂျီယူက သူနှင့် လက်တွဲ၍ တိုက်ခိုက်မည် မဟုတ်ပေ။ ပြိုက်ဘက်များအား သူတစ်ယောက်တည်း ရင်ဆိုင်ရတော့မည်။ ချင်ကလန်မှ မှော်ဂီတပညာရှင်များအား ရင်ဆိုင်ရမည့် မှော်ဂီတညာရှင်တစ်ယောက် အနေဖြင့် သူ့ယုံကြည်မှုများ မည်သည့်နေရာက လာသည်ကို တစ်ယောက်မှ မသိပေ။
သည်မတိုင်မီက ဘေချူက ရီဖူရှင်း၏ ကု့ချင်းဂီတအပေါ် ထက်မြက် ကျွမ်းကျင်မှုတို့ကို တွေ့မြင်ကာ ချင်ကလန်ကို ဖိတ်ခေါ်ခဲ့သော်လည်း ထိုအရာက သူ့ပါရမီကြောင့်သာ ဖြစ်သည်။ တန်ခိုးအဆင့် ကွာခြားနေခြင်းက ရီဖူရှင်းလောက် ပါရမီကောင်းမွန်ခြင်း မရှိသည့်တိုင် သူတို့က အလွယ်တကူ အနိုင်ယူနိုင်ပေသည်။ မည်သို့ပင်ဆိုစေ ချင်ကလန်ကား ကန်ယီနိုင်ငံတွင် မှော်ဂီတပညာနှင့် ပတ်သက်၍ အဆင့်အမြင့်ဆုံးဟု ပြောနိုင်သည်။
ဖန်းဟွာစင်မြင့်ပေါ်တွင် အမှန်က လူအများအပြား မရှိချေ။ သည်မတိုင်မီက မှော်ပညာရှင်များနှင့် သိုင်းပညာရှင်များ၏ ပြိုင်ပွဲမှာ ပြီးဆုံးသွားခဲ့ပြီ ဖြစ်သည်။ ယခု စင်မြင့်ပေါ်တွင် ချင်ကလန်မှ မှော်ဂီတပညာရှင် ခုနစ်ယောက်။ ဒီမွန်ကလန်မှ သုံးယောက်။ ရုပ်ပုံရေးဆွဲသူ ဟွာကျီဇင်နှင့် ရီဖူရှင်းတို့သာ ကျန်ရစ်သည်။
မှော်ပညာရှင်များ တိုက်ပွဲမှာ အရေအတွက် အများဆုံးသော တိုက်ပွဲဖြစ်သည်။ မည်သို့ပင်ဆိုစေ ဓာတ်စွမ်းအင် ခုနစ်မျိုးနှင့် စိတ်ဝိညာဉ်စွမ်းအင်တို့ကို အထူးပြုလေ့လာသော မှော်ပညာရှင်များ အားလုံးကို စုစည်းထားခြင်းဖြစ်ရာ အရေအတွက် အများဆုံး ပါဝင်ပေသည်။
ဖန်းဟွာစင်မြင့်ပေါ်တွင် လူဆယ့်နှစ်ယောက်က ထောင့်လေးခုတွင် နေရာယူထားကြသည်။ ချင်ကလန်မှ တစ်နေရာ။ ဒီမွန်ကလန်မှ တစ်နေရာ။ ဟွာကျီဇင်မှ တစ်နေရာနှင့် ရီဖူရှင်းက တစ်နေရာတို့ဖြစ်သည်။ သူတို့၏နေရာများကို ယူပြီးသောအချိန်တွင် ချင်ကလန်ကသာလျှင် ရီဖူရှင်းအား အဓိက ပစ်မှတ်ထားသည် မဟုတ်။ ဒီမွန်ကလန်ကလည်း ရီဖူရှင်းကို ပစ်မှတ်ထား နေသည်ကို မြင်ကြရသည်။ ယမန်နေ့က ယူချင်းက ယွန်ဒီအား အနိုင်ယူခဲ့သလို ဝူခမ်ရန်အားလည်း ဖန်းဟွာစင်မြင့်မှ လွှင့်ပစ်ခဲ့သည်။ သူတို့က ရီဖူရှင်းကို လက်စားချေရမည် ဖြစ်သည် အဘယ်ကြောင့်ဆိုသော် သူတို့က ယူချင်းအား အနိုင်ယူရန် မျှော်လင့်ချက် မရှိသောကြောင့်ပင်။
ဟွာကျီဇင်က ပတ်ဝန်းကျင် အခြေအနေကို ကြည့်လျှင် မကောင်းသော ခံစားချက်များ ရလာသည်။ သူမက ရီဖူရှင်းထံသို့ ဖြည်းညင်းစွာ လျှောက်သွားလိုက်ကာ မေးလိုက်သည်… “ငါတို့ ပူးပေါင်းကြမလား…”
ရီဖူရှင်းက သူ့ဘေးနားကို ရောက်လာသော မိန်းမလှလေးအား ကြည့်လိုက်သည်။ မနေ့ကလည်း သူတို့ အတူတူ ဖျော်ဖြေခဲ့သည်ဟု ပြောနိုင်သည်။ ရီဖူရှင်းက ကု့ချင်းအား တီးခတ်ခဲ့သည်။ မင်းသမီးရီလင်ဇီက ကပြဖျော်ဖြေခဲ့သည်။ ဟွာကျီဇင်က ပန်းချီဆွဲခဲ့သည်။ ယနေ့ သူတို့က တိုက်ခိုက်ကြတော့မည် ဖြစ်သည်။
“သေချာတောပေါ့…..” ရီဖူရှင်းက ပြုံးလျက် ခေါင်းညိတ်လိုက်သည်။ တစ်စုံတစ်ခုအား ခံစားမိသောကြောင့် ရီဖူရှင်းက ကောင်းကင်အား မော့ကြည့်လိုက်လျှင် သိမ်းငှက်နက်ပေါ်မှ ကြည့်နေသော လှပသော မျက်ဝန်းတစ်စုံအား သွားမြင်သည်။ သူ့ခံစားချက်များ သိပ်မကောင်းလှပေ။ သည်မိန်းမလှက သူ့ထံလာခြင်း ဖြစ်သည်။ သူ့အမှား မဟုတ်ပေ။
မနေ့ညက ဖြစ်ပျက်ခဲ့သည်များအား ပြန်တွေးမိလျှင် ရီဖူရှင်း စိတ်မသက်မသာ ခံစားရသည်။ တစ်ဝက်တစ်ပျက်ဖြင့် သူမက ဘယ်လို ထွက်သွားရသနည်း။ မြေခွေးမ၏ ဆွဲဆောင်မှုရှိသော လှုပ်ရှားမှုများအား ပြန်တွေးလျှင် သူအလွန် စိတ်ဓာတ်ကျရသည်။ ဟွာဂျီယူကား အလွန်ရက်စက်၏။ နောက်တစ်ကြိမ် သည်အကွက်ထဲသို့ သူ မဝင်မိစေရန် သတိထားရတော့မည် ဖြစ်သည်။
“မိန်းကလေး ကျီဇင်… ဒီလို လုပ်ဖို့ မလိုအပ်ပါဘူး… ကျုပ်တို့က မိန်းကလေးနဲ့ မတိုက်ခိုက်ချင်ဘူး…” ချင်ကလန်မှ လူငယ်တစ်ယောက်က ပြောသည်။ သူ့နာမည်ကား စုမူဖြစ်ပြီး ကြယ်ကိုးပွင့် ကောင်းကင်အဆင့် ဖြစ်သည်။ သူလည်း အလွန် အရည်အချင်းရှိသော လူငယ်တစ်ယောက်ဖြစ်ပြီး ဘေချူကလွဲလျှင် သူ့ထက်ပါရမီပါသောသူ ချင်ကလန်တွင် မရှိပေ။
“ရတယ်… ကျွန်မတို့က ဒီနေရာကို တိုက်ခိုက်ဖို့လာတာ ဆိုတော့ ယဉ်ကျေးနေစရာ မလိုဘူး…..” ဟွာကျီဇင်၏အသံကား နူးညံ့လှရာ နားထောင်သူများက အမှန်ပင် သူမအား တိုက်ခိုက်ရန် အင်အား မရှိကြပေ။
“ဒီလိုဆိုရင်လည်း မတတ်နိုင်တော့ဘူးပေါ့…” စုမူက ထပ်မပြောတော့ပေ။ ဟွာကျီဇင်ကား ကြယ်ရှစ်ပွင့် ကောင်းကင်အဆင့် ဖြစ်သည်။ သူမအား ကြည့်ရသည်မှာ အားနည်းပုံရသော်လည်း သူမကား ဖန်းဟွာအဆင့် အတွင်းဝင်ရန် တစ်ပေးခံရသူများထဲမှ တစ်ယောက်ဖြစ်သည်။ သူမက အမှန်တကယ်ပင် အားနည်းလိမ့်မည်ဟု သူတို့ မယုံကြည်ပေ။ အကယ်၍ သူတို့က တစ်ယောက်ချင်း ယှဉ်ပြိုင် တိုက်ခိုက်လျှင် သူ့တန်ခိုးအဆင့်က ပိုမြင့်သော်လည်း သူမအား အနိုင်ရလိမ့်မည်ဟု စုမူ ယုံကြည်ချက် မရှိပေ။
ကု့ချင်းဝိညာဉ်များ ချက်ချင်း ထွက်ပေါ်လာကြသည်။ များစွာသော မှော်ဂီတပညာရှင်များက တစ်ချိန်တည်းမှာပင် စတင် တီးခတ်လိုက်ကြသည်။ သံစဉ်နှစ်မျိုးက တစ်ကြိမ်တည်းမှာ ထွက်ပေါ်လာသည်။ သံစဉ်တစ်ခုမှာ ရီဖူရှင်းထံမှ ဖြစ်ပြီး နောက်သံစဉ်တစ်ခုမှာ ချင်ကလန်မှ ဖြစ်သည်။
ဟွာကျီဇင်က မြေပြင်တွင် ဒူးထောက်ကာ သူမ၏လက်အား အသုံးပြုလျက် မြေပြင်တွင် တစ်စုံတစ်ခုအား ရေးဆွဲနေလိုက်သည်။ သူမက အာရုံစိုက်ပြီး ရေးဆွဲနေရာ မမြင်ရသော ဆွဲငင်အား တစ်ခု သူမထံမှ ခံစားရစေသည်။
တစ်ချိန်တည်းမှာပင် ဒီမွန်ကလန်မှ ယွန်ဒီက သစ်ရွက်စိမ်းအား ပါးစပ်တွင် တေ့ကာ မှုတ်လိုက်သည်။ တခြား လူငယ်များကလည်း သစ်ရွက်စိမ်းအား မှုတ်လိုက်ကြသည်။ ထိုအသံများမှာ အလွန် ထူးဆန်းလှပြီး လေထဲမှ တောကောင်များ တစ်ဖန် လှုပ်လှုပ်ရှားရှား ဖြစ်လာကြပြန်သည်။
ဟွာကျီဇင်က လျင်မြန်စွာ ရေးဆွဲလိုက်သည်။ ရီဖူရှင်း ယခင်က ရင်ဆိုင်ဖူးသော ကျောက်မူထက်ပင်လျင် အဆမတန် လျင်မြန်သည်။ ထို့အပြင် သူမ၏အရုပ်များက အားကောင်းသော သဘာဝ စွမ်းအင်များကြောင့် ပိုမို၍ အသက်ဝင်လှသည်။ မကြာမီ မြေပြင်မှ အရောင်အသွေး စုံလင်လှသော ငှက်များ ထွက်ပေါ်လာသည်။ တချို့က သူမအား လှည့်ပတ်နေကြပြီး တချို့က ရီဖူရှင်းထံသို့ ကာကွယ်ရန် အလို့ငှာ လာရောက် လှည့်ပတ်ကြသည်။
ထိုအဖြစ်က ရီဖူရှင်းအား ရယ်မောရမလို ငိုရမလို ဖြစ်သွားစေသည်။ မည်သည့်အချိန်က မိန်းကလေး တစ်ယောက်၏ကာကွယ်မှုကို သူ လိုအပ်သနည်း။
“ငါ… ဒါကို မလိုဘူး…” ရီဖူရှင်းက ပြုံးလျက် ဟွာကျီဇင် အားကြည့်လိုက်သည်။
“ငါတို့က အခု တူတူ တွဲတိုက်နေကြတာ မဟုတ်ဘူးလား…” ဟွာကျီဇင်က ပြန်ပြုံးပြလျက် ပြောလိုက်သည်။ ထို့နောက် သူမက ခေါင်းငုံ့လျက် ဆက်လက် ရေးဆွဲလိုက်သည်။ တစ်ချိန်တည်းမှာပင် ဖန်းဟွာရင်ပြင်တွင် သတ္တဝါဆန်းများ အများအပြား ထွက်ပေါ်လာကြကာ ဟွာကျီဇင်နှင့် ရီဖူရှင်းထံသို့ တိုးဝင်လာကြသည်။
ငှက်များ လှည့်ပတ်နေသော ဟွာကျီဇင်ထံသို့ သတ္တဝါဆန်းများစွာ တိုးဝင် လာနေကြသော်လည်း သူမနှင့် မဆိုင်သလိုပင် ဆက်လက် ရေးဆွဲနေဆဲပင်။
ရီဖူရှင်း၏မျက်လုံးတွင် ထူးဆန်းသော အလင်းရောင်များ တောက်ပလာနေသည်။ သူ့ခေါင်းအား ငုံ့ထားရာ သူ့မျက်လုံးမှ ကြောက်မက်ဖွယ် မုန်တိုင်းတစ်ခု မျက်လုံးထဲတွင် လှုပ်ရှားနေသည်ကို မည်သူမှ သတိမထားမိကြတော့။ ထူးဆန်းသော စိတ်ဝိညာဉ် စွမ်းအားက သူ့ဂီတသံစဉ်ထဲကို စိမ့်ဝင်သွားရာ ထိုရုန့်ရင်း ကြမ်းတမ်းသော သားရဲများ လာရောက် တိုက်ခိုက်ကြသောအခါ သံစဉ်တွင် စိမ့်ဝင်နေကြသော ထူးဆန်းသော စိတ်ဝိညာဉ် အမှတ်အသားများက ထိုသားရဲများ၏ စိတ်နယ်ပယ်ထဲကို တိုးဝင်သွားကြသည်။ ထူးဆန်းသော မြင်ကွင်းတစ်ခု ဖြစ်ပေါ်လာသည်။ သားရဲများ ရီဖူရှင်းအနီးသို့ တိုးကပ်လာလျှင် သူတို့က ရပ်တန့်သွားသည်။ အလွန် ရုန့်ရင်းကြမ်းတမ်းကာ ဒေါသထွက်နေသော သားရဲများမှာ မြေပြင်ပေါ်တွင် ဝပ်တွားကာ သူ့ဂီတသံစဉ်အား တိတ်ဆိတ်စွာ နားထောင် နေကြတော့သည်။
လူအများအပြား အေးစက်သွားသည်။ ရီဖူရှင်း၏ဂီတသံစဉ်မှာ အလွန်အားပြင်းလှပြီး စစ်မြေပြင်ကဲ့သို့ ကြမ်းတမ်းလွန်းလှသည်။ ထိုသို့သော် ဂီတက ထိုသားရဲများအား အဘယ်ကဲ့သို့ ယဉ်ပါးစေနိုင်သနည်း။ မှန်သည် သူတို့ကား ရီဖူရှင်းတွင် စိတ်ဝိညာဉ် စွမ်းအင်သုံး သက်စောင့် ဝိညာဉ်နှစ်ခု ရှိသည်ကို သိစရာ အကြောင်း မရှိချေ။ မှော်ဂီတ ပညာရှင်ဖြစ်သလို ရီဖူရှင်းကား တောကောင် ထိန်းချုပ်သူဖြစ်သည်။
ဟွာကျီဇင်က ရီဖူရှင်းကို ဆတ်ခနဲ တစ်ချက်ကြည့်ပြီး ဘာမှ မပြောတော့ဘဲ ဆက်လက် ရေးဆွဲနေလိုက်သည်။ ရီဖူရှင်း အဆင်ပြေသည်ကို သိလျှင် သူမ၏ငှက်များက သူမ၏ဘေးနားသို့ ပြန်လည် ပျံသန်းလာကြကာ ဒီမွန်ကလန်အားသာ အာရုံစိုက် ထားလိုက်တော့သည်။
စုမူနှင့် ချင်ကလန်မှ လူငယ်များလည်း တိတ်ဆိတ်စွာပင် တီးခတ်နေကြသည်။ ခုနက ဖြစ်ပျက်ခဲ့သည်များမှာ အနည်းငယ် ထူးဆန်းသော်လည်း သူတို့၏တီးခတ်ခြင်းကို အနှောင့်အယှက် မဖြစ်ပေ။ သူတို့၏သံစဉ်များ တဖြည်းဖြည်း မြင့်တက်လာသည်။ သူတို့၏အနုပညာ ရသအသိက ရီဖူရှင်းနှင့် ဆင်တူပြီး လူတိုင်းအား တိုက်ပွဲအတွင်းသို့ စီးမျောသွားစေနိုင်သည်။ ထို့နောက်တွင် လူတိုင်းက တိုက်ပွဲမြေပြင်တွင် မြားများ အစင်းပေါင်းများစွာ ဖြစ်ပေါ်လာသည်ကို ခံစားကြရသည်။ ထိုမြားများက ရီဖူရှင်းထံသို့ အားကောင်းသော အရှိန်အဟုန်ဖြင့် တိုးဝင်လာနေကြသည်။
သည်တစ်ကြိမ်ကား စုမူတစ်ယောက်တည်းသာ တိုက်ခိုက်သည်။ သူတို့အားလုံး အတူတူ တီးခတ် နေကြသော်လည်း သူတို့က ရီဖူရှင်းအား ဝိုင်းဝန်း တိုက်ခိုက်ရန် လိုလားဟန် မရှိကြပေ။ စစ်မြေပြင်တွင် ဒိုင်းကာများ ကိုင်ဆောင်ထားသော စစ်သားများက မြားများအား ပိတ်ဆို့ ကာကွယ်ထားကြသည်။
ဖန်းဟွာရင်ပြင်မှ ပရိသတ်များက ဂီတသံစဉ်အား နားထောင်ကာ ထူးခြား ဆန်းကြယ်သော ခံစားချက်များအား ခံစားကြရသည်။ ဖန်းဟွာစင်မြင့်ကား စစ်တပ်နှစ်တပ် ရင်ဆိုင် တိုက်ခိုက်နေသော စစ်မြေပြင်နှင့် အလားသဏ္ဌာန်တူသည်ဟု ခံစားကြရသည်။
ရီဖူရှင်း၏သံစဉ်မှာ စစ်သူကြီး အမိန့်သံဖြစ်ပြီး စုမူတို့အုပ်စု တီးခတ်နေသော သံစဉ်မှာ မြေခွေးအား သုတ်သင်ခြင်း ဖြစ်သည်။ သူတို့၏သံစဉ်မှ သတ်ဖြတ်လိုသော အငွေ့အသက်များ ဖြာထွက်လာသည်။
စုမူ၏သံစဉ်မှာ အလွန်ရန်လိုသည်။ ထောင်ပေါင်းများစွာသော မြားများက တစ်ကြိမ်တည်းမှာပင် ပစ်လွှတ်လိုက်သလို အရာအားလုံးကို ဖျက်ဆီးပစ်မည့်ဟန်ဖြင့် ကြောက်မက်ဖွယ် တိုးဝင်လာနေသည်။ ရီဖူရှင်း၏သံစဉ်က စစ်သူကြီးက စစ်မြေပြင် တစ်နေရာတွင် အခိုင်အခံ့ တပ်တည် ထားသည်နှင့် တူသည်။ သူ့စစ်တပ်နေရာမှာ တောင်တစ်လုံးကဲ့သို့ တည်ငြိမ်ခိုင်ခံ့ပြီး ရန်သူက မည်သို့ပင် တိုက်ခိုက်ပါစေ လှုပ်ရှားမှု မရှိပေ။
စုမူ၏သံစဉ်က တစ်ဖန် မြင့်တက်လာပြန်သည်။ ထောင်ပေါင်းများစွာသော မြားများ ပစ်လွှတ်ပြီးသည်နှင့် သူ့စစ်သားများ စတင်ချီတက်ကြသည်။ လှံတံများက နေရာမျိုးစုံအား ထိုးဖောက်သွားကြသည်။ ရီဖူရှင်း၏သံစဉ်ကား ခုခံမှုသက်သက်အဖြစ် ရှိနေဆဲပင်။ စစ်သားများ လာလျှင်လည်းသူက ကာကွယ်မည် ဖြစ်သည်။ သူ့တွင် မည်သည့် လှုပ်ရှားမှုအတွက်မဆို တုံ့ပြန်မှုရှိသည်။ စစ်သူကြီးက စနစ်တကျ စီမံကွပ်ကဲသလိုပင် သူ့စစ်တပ်ကား အစီအစဉ်တကျ ရှိလှသည်။ စုမူက မည်သို့ပင် တိုက်ခိုက်ပါစေ ရီဖူရှင်း၏ စိတ်ဝိညာဉ် အရံအတားကို ထိုးဖောက်နိုင်စွမ်း မရှိပေ။
နှစ်ယောက်လုံးမှာ တူညီနေသလို ဖြစ်နေသည်။ စုမူ၏သံစဉ်မှာ အနည်းငယ် ပြန့်ကျဲလာသည်။ ရသအသိတွင် ထောင်ပေါင်းများစွာသော စစ်သားများက အစီအစဉ်မကျဘဲ ပရမ်းပတာ တိုက်ခိုက် နေကြသော်လည်း ရီဖူရှင်းကား လှုပ်ရှားမှုမရှိပေ။
တဖြည်းဖြည်းနှင့် စုမူ၏သံစဉ်မှာ အလွန်အမင်း ပြန့်ကျဲလာရာ ရုတ်တရက် ရီဖူရှင်း၏သံစဉ် ပြောင်းလဲသွားသည်။ သံစဉ်က တည်ငြိမ်နေရာမှ ရုတ်တရက် မြင့်တက်သွားသည်။ ထောင်ပေါင်းများစွာသော စစ်သည်များနှင့် မြင်းများက ရေလှိုင်းများလို လှိမ့်တက်လာကြသည်။ သတ်ဖြတ်လို၍ ဟစ်ကြွေးသော အသံများက မြေပြင်အား တုန်ခါသွားစေသည်။ လူတိုင်းက သံစဉ်၏အနုပညာ ရသအသိထဲကို နစ်မျောသွားသည်။ စုမူ၏တည်ရှိနေမှုမှာ ချက်ချင်းပုံ ဖုံးကွယ်သွားပြီး သူ့အား ကြည့်ရသည်မှာ ရှုံးနိမ့်သွားပြီး ဖြစ်ဟန်တူသည်။
ဖန်းဟွာစင်မြင့်ပေါ်တွင် ကြောက်မက်ဖွယ် သံစဉ်မုန်တိုင်းက လေပွေလို လှည့်ပတ်လာနေကြကာ စုမူအား ဖိအားပေးလာသည်။ ထိုမုန်တိုင်းက အရာအားလုံးကို ဖျက်ဆီး သွားတော့မည်ကဲ့သို့ပင်။ ထိုအခိုက်တွင်ပင် တခြား ချင်ကလန်မှ လူငယ်များ ပြိုင်တူ တုံ့ပြန်လိုက်ကြသည်။ သူတို့ထံမှ တီးခတ်လိုက်သော သံစဉ်က စုမူ၏သံစဉ်နှင့် ပေါင်းစပ်သွားကာ ချက်ချင်း ပေါက်ကွဲထွက်လာသည်။ ထိုအခိုက်တွင်ပင် မြေခွေးအား သုတ်သင်ခြင်း သံစဉ်က ကြောက်မက်ဖွယ် အားအင်များ စီးဆင်းလာသည်။ ထိန်းချုပ်ခံနေရသော အခြေအနေက တစ်ဖန် အားကောင်းသော အခြေအနေသို့ ပြန်ရောက်လာသည်။
လူအများအပြား၏ အမူအရာ ပြောင်းလဲသွားသည်။ စုမူက ရီဖူရှင်းကို တစ်ယောက်တည်း တိုက်ခိုက်နေသည် မဟုတ်တော့သည်ကို လူတိုင်း ရှင်းရှင်းလင်းလင်း မြင်သည်။ ချင်ကလန်ကား ယခု ပူးပေါင်း တိုက်ခိုက်နေကြသည်။
စုမူကား တန်ခိုးအဆင့် ပိုမြင့်သော မှော်ဂီတ ပညာရှင် ဖြစ်သော်လည်း ယခု ရီဖူရှင်းထံတွင် ရှုံးနိမ့်ခဲ့ရသည်။
“အရေအတွက် များတာက အရေးသာစေလို့လား…” ရီဖူရှင်းက အသာအယာ ပြုံးကာ ဖြည်းညင်းစွာ ထရပ်လိုက်သည်။ ကု့ချင်းဝိညာဉ်က သူ့နောက်ကို လိုက်လာကာ ရီဖူရှင်း၏ရှေ့တွင် ပေါ်လောမျောနေသည်။ ရီဖူရှင်းက တဖြည်းဖြည်း ရှေ့ကို လျှောက်လာသည်။ ဂီတသံစဉ်က တဖြည်းဖြည်းဖြင့် ပြင်းထန်လာကာ ရှေ့မှ လူများအား ဖိအားပေးလာ၏။
ရီဖူရှင်းက ချင်ကလန်မှ လူငယ်များထံ လျှောက်သွားလိုက်သည်ကို လူတိုင်းက ထိတ်လန့်တကြား မြင်ကြရသည်။ သူ့ခြေလှမ်းတိုင်းက တည်ငြိမ်ကာ သူ့ပတ်ဝန်းကျင်မှ စွမ်းအင်လှိုင်းများအား အင်အား ကောင်းလာစေသည်ကို ခံစားကြရသည်။ စစ်သူကြီးကား အမိန့်တော်ကို လက်ခံရရှိပြီးဖြစ်ကာ သူ့ရန်သူအား ရင်ဆိုင် တိုက်ခိုက်တော့မည် ဖြစ်သည်။
ချင်ကလန်မှ လူငယ်များက ရီဖူရှင်းထံမှ မုန်တိုင်းကဲ့သို့ ပြင်းထန်သော စိတ်ဝိညာဉ် အားလှိုင်းများအား ခုခံရန် တူရိယာများအား ရုန့်ရင်းကြမ်းတမ်းစွာ တီးခတ်ကြသော်လည်း ရီဖူရှင်းကား လုံလောက်သော စွမ်းအင်များအား ယခင်တည်းက စုဆောင်းထားပြီး ဖြစ်သည်။
သူရှေ့ဆက် လှမ်းလာတိုင်း စစ်သူကြီး အမိန့်သံက ပိုမို အားကောင်းလာသည်။ သူက တိုက်ပွဲ စတင်ကတည်းက ခံစစ်သက်သက်ဖြင့် စွမ်းအင်များအား စုဆောင်းနေခဲ့သည်။ နောက်ဆုံး သံစဉ်က လုံလောက်သော အားအင်များအား စုဆောင်ပြီးသောအခါ စစ်သူကြီးအမိန့်အား လက်ခံရရှိသည်။ သည်အချိန်တွင်ကား မည်သည့်အရာမှ နောက်ဆုတ်ရန် အခွင့်အရေး မရှိတော့ပေ။ နှိုင်းယှဉ်ရလျှင် စုမူက အချိန်ကြာမြင့်စွာ တိုက်ခိုက်ခဲ့သော်လည်း အောင်မြင်ခြင်း မရှိဘဲ သူ့အားအင်များ ယုတ်လျော့သွားခဲ့သည်။ ရီဖူရှင်းက သူ့အား အားအင်ပြန်လည် စုဆောင်းရန် အချိန်ပေးမည် မဟုတ်ပေ။
ရီဖူရှင်းက ချင်ကလန်မှ လူငယ်များထံသို့ လျှောက်သွားသည်ကို လူတိုင်းက ကြည့်နေကြသည်။ သူ့အဆင့်တွင် မည်သူမှ မရှိသလို စစ်မြေပြင်တွင် သူကား မောက်မာဝင့်ကြွားသော ဟန်ပန် အပြည့်ရှိသော စစ်သူကြီး တစ်ဦးဖြစ်သည်။
ကြယ်ရှစ်ပွင့် ကောင်းကင်အဆင့် ရှိသော ချင်ကလန်မှ လူငယ်တစ်ဦး သည့်ထက် ခံနိုင်ရည်အား မရှိတော့ပေ။ သူပါးစပ်မှ သွေးတစ်ပွက် အန်ကာ လဲပြိုသွားသည်။ တစ်ယောက် ကျသွားလျှင် သူတို့၏သံစဉ်များ ပရမ်းပတာ ဖြစ်သွားသည်။ ထို့နောက် ဒုတိယ တစ်ယောက်။ တတိယ တစ်ယောက်… တစ်ယောက်ပြီး တစ်ယောက် လဲပြိုကာ နောက်ဆုံး စုမူတစ်ယောက်သာ ကျန်ရစ်တော့သည်။
နောက်ဆုံးတွင် ရီဖူရှင်းက သူ့လက်အား ဝှေ့ယမ်းလိုက်လျှင် စိတ်ဝိညာဉ်မုန်တိုင်းက ရုန့်ရင်း ကြမ်းတမ်းစွာဖြင့် စုမူ၏ စိတ်နယ်ပယ်ထဲကို တိုးဝင်လာကြသည်။ သူ့ပါးစပ်မှ သွေးများ စီးကျလာပြီး သူ့စွမ်းအင်များလည်း အားနည်း ပျောက်ကွယ် သွားတော့သည်။
ဂီတသံစဉ်က ချက်ချင်း ရပ်တန့်သွားသည်။ ရီဖူရှင်း၏ ကု့ချင်းဝိညာဉ်လည်း ပျောက်ကွယ်သွားသည်။ သူက ပြိုလဲနေကြသော ချင်ကလန်မှ လူငယ်များရှေ့တွင် ရပ်ကာ ပြုံးလျက် ပြောလိုက်သည်… “ချင်ကလန်ရဲ့ မှော်ဂီတပညာက ကောလာဟလတွေက ပြောသလိုပါပဲ…” သူက အသာအယာ ဆက်ပြောလိုက်သည်…“သင်ခန်းစာ တကယ်ရသွားတယ်…..”
***