အခန်း ( ၂၆၃ )

အဖြစ်အပျက်အားလုံးမှာ မြန်ဆန်လွန်းနေ၏။ မီးခိုးရောင်ခြင်ကြီး အပါအဝင် ခြင်များအားလုံးမှာ ချက်ချင်းဆိုသလိုပင် ချေမှုန်းခံလိုက်ရပြီး ဂူထဲတွင် နားစည်များပင်ကွဲအက်သွားစေနိုင်သော ထစ်ချုန်းသံကြီးတစ်သံ ထွက်ပေါ်လာသည်။

ထိုအခါ သုံးချောင်းထောက် ဒယ်စောက်အိုးနှင့် ရှစ်ဆယ်ရာခိုင်နှုန်းတိတိ တစ်သားတည်း ပေါင်းစည်းထားပြီးသားဖြစ်၍ အသက်တမျှ အရေးကြီးသော အချိန်ကာလသို့ရောက်နေသည့် ဝမ်ပေါင်လဲ့မှာ စိတ်နှလုံး တုန်လှုပ်ချောက်ချားသွားရ၏။ ထို ထစ်ချုန်းသံကြီးမှာ သူ၏နားထဲတွင် မိုးခြိမ်းသံပေါင်း တစ်ထောင်ကျော်ကို ကြားလိုက်ရသကဲ့သို့ပင်။ သူသည် မျက်လုံးများပွင့်လာသောအခါ သူ၏ ဦးခေါင်းအထက် နံရံထဲရှိ အပေါက်ထဲမှ ဆည်းဆာကြယ်စင်စုဂိုဏ်း၏ ဂိုဏ်းစောင့်အကြီးအကဲကြီးဖြစ်သော အဘွားကြီး သူ့ဆီသို့ ချဉ်းကပ်လာနေသည်ကို မြင်လိုက်ရသည်။ ထို့အပြင် တစ်စစီ ကွဲအက်နေသော ကျောက်စကျောက်နများမှာလည်း ကောင်းကင်ပေါ်မှ ကျဆင်းလာကြ၏။

ထိုအဘွားကြီး၏ လူရိပ်မှာ အံ့ဩတုန်လှုပ်ဖွယ်ရာကောင်းသော ပြင်းအားတစ်ခုကို ပိုင်ဆိုင်ထားသောကြောင့် ဝမ်ပေါင်လဲ့မှာ ကောင်းကင်နှင့်ကမ္ဘာမြေကြီးတို့၏ ပေါင်းစပ်စွမ်းအားကြောင့် ဖိနှိပ်ခံထားရသည့်အလား ခံစားနေရ၏။ သူသည် အသက်တမျှ အရေးကြီးသော အခြေတည်အဆင့်သို့ ရောက်ရှိနေသည်ဖြစ်ရာ အနည်းငယ်လေးပင် လှုပ်၍ မဖြစ်ပေ။

ထိုအဖြစ်အပျက်အားလုံးမှာ မျက်စိတစ်မှိတ် အတွင်း ဖြစ်ပျက်သွားခဲ့ခြင်းဖြစ်သည်။ အရာအားလုံးမှာ မြန်ဆန်လွန်းနေသောကြောင့် ဝမ်ပေါင်လဲ့မှာ မည်သို့တုံ့ပြန်ရမှန်းမသိလောက်အောင် ဖြစ်သွားပြီး အတွေးများ ယောက်ယက်ခတ်သွားရတော့သည်။

ထိုအဘွားကြီး၏ အငွေ့အသက်များနှင့် ဝမ်ပေါင်လဲ့ပေါ်သို့ ပြုတ်ကျလာသော ကျောက်တုံးများကြောင့် သူ၏ခန္ဓာကိုယ်မှာ အပြင်းအထန်တုန်ရီသွားရ၏။ ထို့ကြောင့် သူ၏ ခန္ဓာကိုယ်ထဲရှိ သုံးချောင်းထောက် ဒယ်စောက်အိုးမှာလည်း ချက်ချင်းဆိုသလိုပင် မတည်မငြိမ်ဖြစ်သွားရတော့သည်။ အငွေ့အသက်အားလုံးမှာလည်း ကစဉ့်ကလျားဖြစ်သွားပြီး တည်ငြိမ်မှုအပြည့်ရှိနေသော အနေအထားမှ ပရမ်းပတာ ဖြစ်သွားရတော့သည်။

အာနာပါနအဆင့် ကျင့်ကြံသူတစ်ယောက် အခြေတည်အဆင့်သို့ တက်လှမ်းနိုင်ရန် ကြိုးပမ်းနေတုန်း အနှောင့်အယှက်များနှင့် ကြုံပါက အလွန် အန္တရာယ်များပေသည်။ ဝမ်ပေါင်လဲ့မှာလည်း ထိုနည်းတူပင်။ သူ တံခါးပိတ်ကျင့်ကြံရန် ရွေးချယ်ထားသောနေရာကို အခြားသူများက ဖျက်ဆီးပစ်လိုက်သည်မဟုတ်ပါလော။

ထိုကဲ့သို့သော အန္တရာယ်မျိုးမှာ မိုးသစ်တောနှင့် ကူးလောင်ချိုင့်ဝှမ်းထဲတွင် ကြုံခဲ့ရသောအန္တရာယ်များထက် ပို၍ ကြီးမားပေသည်။ သူသည် ထိုနေရာနှစ်ခုတွင် ကြုံခဲ့ရသည့် အန္တရာယ်များကို အတိုင်းအတာတစ်ခုအထိ ပြန်လည်တုံ့ပြန်နိုင်ခဲ့သည် မဟုတ်ပါလော။

သို့သော် ယခုတွင်မူ အမြုတေအဆင့် ကျင့်ကြံသူတစ်ယောက်နှင့် ရင်ဆိုင်နေရသည်ဖြစ်ရာ ဝမ်ပေါင်လဲ့မှာ အလွန် အားအင်ချည့်နဲ့နေသောကြောင့် တိုက်ကွက်တစ်ကွက်ကိုပင် တောင်ခံနိုင်စွမ်းရှိမည်မဟုတ်ပေ။

ဝိညာဉ်စွမ်းအင်များ ပရမ်းပတာဖြစ်နေပြီး သူ၏ ခန္ဓာကိုယ်နှင့် သုံးချောင်းထောက် ဒယ်စောက်အိုးတို့မှာ အပြင်းအထန် တုန်ရီနေသောကြောင့် ဝမ်ပေါင်လဲ့မှာ သူ၏ခန္ဓာကိုယ်ထဲတွင် လှိုင်းလုံးကြီးတစ်ခု အပြင်းအထန် ရိုက်ခတ်နေသကဲ့သို့ ခံစားနေရ၏။ ထိုခံစားချက်ကြီးမှာ အလိုအလျောက် ပေါက်ကွဲနိုင်သော ပုတီးစေ့တစ်လုံးကို မျိုချလိုက်ရသည့် ခံစားချက်နှင့် ဆင်တူပေသည်။ ထိုအချိန်တွင် သူ၏ခန္ဓာကိုယ်ထဲရှိ ပေါက်ကွဲသံများနှင့် သူ၏ နားထဲရှိ ပေါက်ကွဲသံများမှာ တစ်ထပ်တည်းကျသွားသဖြင့် သူသည် သွေးစိမ်းများ အန်ထွက်လာရတော့သည်။ သူသည် လေလျှော့ခံလိုက်ရသော ဘောလုံးတစ်လုံးကဲ့သို့ဖြစ်သွားပြီး သူ၏ စွမ်းအင်များနှင့် ဝိညာဉ်တို့မှာ သိသိသာသာ အားအင်ကုန်ခမ်းသွားတော့သည်။

” ဥာဏ်အလင်းပွင့်စေ… ”
ဝမ်ပေါင်လဲ့မှာ ပါးစပ်ထဲတွင် သွေးများဖြင့် ပြည့်နှက်သွားပြီး သူ၏ပြိုင်ဘက်အား ခြောက်လှန့်ကာ မောင်းထုတ်နိုင်ရန်အတွက် တာအိုဂါထာတော်ကို ရွတ်ဖတ်ရန် ကြိုးစားလိုက်၏။ ယခုလို သေရေးရှင်ရေး အခြေအနေမျိုးတွင် သူ၏ ခေါင်းထဲ၌ ထို ခုခံမှု တစ်မျိုးတည်းကိုသာ တွေးနိုင်တော့သည်။ သို့သော် ပထမစာလုံးကို ရွတ်ဖတ်ပြီးသွားစဉ်မှာပင် သူ၏ခန္ဓာကိုယ်မှာ ဆက်လက်တောင့်ခံနိုင်စွမ်းမရှိတော့ပေ။ အဘယ့်ကြောင့်ဆိုသော် ထိုအချိန်တွင် သူ၏ ကျင့်ကြံခြင်းစွမ်းအားများမှာ သုံးချောင်းထောက် ဒယ်စောက်အိုးနှင့် ချိတ်ဆက်နေသောကြောင့်ဖြစ်သည်။ ထိုသုံးချောင်းထောက် ဒယ်စောက်အိုးမှာ မကောင်းဆိုးဝါး ချွတ်ခံနေရသကဲ့သို့ အပြင်းအထန်တုန်ရီကာ ပရမ်းပတာ ဖြစ်နေသောကြောင့် ဝမ်ပေါင်လဲ့မှာ တာအိုဂါထာတော်အား မရွတ်ဖတ်နိုင်ဘဲ ဖြစ်နေရတော့သည်။

သူသည် သွေးများထပ်၍ အန်ထွက်လာပြီး သူ၏မျက်နှာမှာလည်း ဖြူဆုတ်သွား၏။ ထို့ကြောင့် သူသည် ပေါင်းစည်းခြင်း လုပ်ငန်းစဉ်ကို ဂရုမစိုက်တော့ဘဲ ထွက်ပြေးရန်ပြင်လိုက်စဉ်မှာပင် အရာအားလုံးမှာ ဖရိုဖရဲဖြစ်သွားပြီး သူ၏ခန္ဓာကိုယ်မှာလည်း တစ်စစီကွဲထွက်သွားတော့မည့် ကြွေပန်းအိုးတစ်လုံးကဲ့သို့ ဖြစ်သွား၏။ သူ၏ ခန္ဓာကိုယ်တစ်ခုလုံးရှိ အစိတ်အပိုင်းများအားလုံးမှာ အရိုးထဲအထိ နာကျင်ကိုက်ခဲနေတော့သည်။

” နင့်လို မလောက်လေးမလောက်စား ကောင်ကများ ငါ့တပည့်ရဲ့ ကံကြမ္မာကို လုယူရဲတယ်ပေါ့ ”
ထိုဂူကြီးထဲတွင် အေးစက်စက်မျက်ဝန်းတစ်စုံနှင့် အထက်စီးဆန်သည့် ခပ်ဩဩ စကားသံကြီးသစ်သံ ထွက်ပေါ်လာသည်။ ထိုအဘွားကြီးမှာ ခန္ဓာကိုယ်တစ်ခုလုံး စုတ်ပြတ်ကာ ပါးစပ်ထဲမှ သွေးများစီးကျနေသော ဝမ်ပေါင်လဲ့အားကြည့်၍ ပြုံးလိုက်၏။ သူမသည် သူ့အား ရွံရှာဆက်ဆုပ်ဖွယ်ရာ လောက်တစ်ကောင်ကဲ့သို့ ကြည့်နေ၏။ ထို့‌နောက် သူမသည် တစ်စစီ ပေါက်ကွဲထွက်သွားသော ဂူထဲသို့ ဝင်လာပြီး ဝမ်ပေါင်လဲ့ဆီသို့ လှမ်းလိုက်၏။

ထို့နောက် သူမ၏ဘယ်ဘက်လက်ကို မြှောက်ကာ ဝမ်ပေါင်လဲ့၏ ဝမ်းဗိုက်အလယ်ပိုင်းကို လှမ်း၍ ဖမ်းဆုပ်လိုက်၏။

ဝမ်ပေါင်လဲ့မှာ ထိုအဘွားကြီးရောက်လာပြီး သူမ၏ဘယ်ဘက်လက်အား မြှောက်လိုက်သည်ကို မြင်လိုက်ရသောအခါ မျက်လုံးများ သွေးရောင်သန်းသွားပြီး အမြင်အာရုံများ နီမြန်းသွားရတော့သည်။ သူသည် သားရဲကြီးတစ်ကောင်ကဲ့သို့ အော်ဟစ်လိုက်ပါသော်လည်း သူ၏ပါးစပ်ထဲမှ ထွက်လာသောသွေးများကြောင့် အသံတစ်သံမှ ထွက်မလာပေ။ ထိုအော်ဟစ်သံများမှာ အမျက်ဒေါသများနှင့် စိတ်မကျေနပ်မှုများအဖြစ်သာ ပြောင်းလဲသွားတော့သည်။ သူသည် ရုန်းကန်ချင်ပါသော်လည်း အမြုတေအဆင့် ကျင့်ကြံသူတစ်ယောက်၏ရှေ့တွင် သူ၏ကြိုးစားအားထုတ်မှုများမှာ အရာမထင်ပေ။

ထို့အပြင် သူ၏ လက်ရှိအခြေအနေမှာ အလွန် ဆိုးရွားနေပြီဖြစ်ရာ အခြားမည်သည့် နည်းလမ်းကိုမှ ထုတ်သုံးနိုင်မည်လည်း မဟုတ်ပေ။ ထို့ကြောင့် ထိုအဘွားကြီး၏ ဘယ်ဘက်လက် လျှပ်စီးကဲ့သို့သော အမြန်နှုန်းမျိုးဖြင့် သူ၏ ဝမ်းဗိုက်ပေါ်သို့ အလျင်အမြန် ဖိချလိုက်သည်ကိုသာ ကြည့်နေရတော့သည်။

ထိုအချိန်တွင် ဝမ်ပေါင်လဲ့၏ ဗိုက်မှာ ချက်ချင်းဆိုသလိုပင် ပေါက်ကွဲသွားပြီး သူ၏အသားများမှာလည်း တစ်စစီဆုတ်ပြဲသွား၏။ ထိုအဘွားကြီး၏ ဖျစ်ညှစ်မှုကြောင့် သူ၏ ဝမ်းဗိုက်မှာ ပေါက်ပြဲသွားပြီး အူများပင် ပေါ်လာသောကြောင့် သူ၏ ပါးစပ်ထဲမှ သွေးစိမ်းများ အန်ထွက်လာတော့သည်။

ထိုနာကျင်မှုများကြောင့် ဝမ်ပေါင်လဲ့မှာ အသိစိတ်ပျောက်လုမတတ် သွေးရူးသွေးတန်းဖြစ်သွားရပြီး သူ၏မျက်ဝန်းများမှာလည်း နီမြန်းသွားရတော့သည်။

အဘွားကြီးမှာ ဝမ်ပေါင်လဲ့၏ ဒဏ်ရာများနှင့် နှာကျင်မှုများကို လုံးဝဂရုမစိုက်ဘဲ သူမဖောက်ထားသော ဝမ်ပေါင်လဲ့ ဗိုက်ထဲရှိ အပေါက်ထဲသို့ လက်ဖြင့်နှိုက်လိုက်၏။ ထို့နောက် သူမသည် ကြင်နာသနားစိတ် လုံးဝမရှိသော သံမဏိလူသား တစ်ယောက်ကဲ့သို့ ဝမ်ပေါင်လဲ့၏ ရုပ်ပျက်ဆင်းပျက်ဖြစ်နေသော အသားစများနှင့် သွေးများကို လျစ်လျူရှုကာ သူ၏ ဝမ်းဗိုက်အလယ်ပိုင်းပေါ်တွင် ရှိနေသည့် သုံးချောင်းထောက် ဒယ်စောက်အိုးကို အားပါပါ ဆွဲယူလိုက်တော့သည်။

ထိုခံစားချက်ကြီးမှာ လူတစ်ယောက်က သူ၏ အတွင်းကလီစာများကို ဆုပ်ကိုင်နေသည့် ခံစားချက်ကြီးနှင့် ဆင်တူပေသည်။

လူတစ်ယောက်က သူ၏ အသားစများကိုထိုးဖောက်ကာ သူ၏အတွင်းကလီစာများကို တင်းကြပ်စွာ ဆုပ်ကိုင်ထားနေသောကြောင့် ဝမ်ပေါင်လဲ့မှာ မခံမရပ်နိုင်လောက်အောင် နာကျင်သွားရပြီး နာကျည်းစွာ အော်ဟစ်မြည်တမ်းလိုက်ရတော့သည်။

” ရှာတွေ့ပြီ။ နောက်မကျသေးဘူး ”

အဘွားကြီးမှာ ဂရုမစိုက်သည့် အမူအရာဖြင့် ပြုံးလိုက်၏။ ယခုတွင် ဝမ်ပေါင်လဲ့မှာ တစ်ကိုယ်လုံးတုန်ရီကာ ချွေးများဖြင့် ရွှဲနေပြီး သူ၏ နီမြန်းနေသော မျက်ဝန်းများထဲ၌ အဘွားကြီးအား မိစ္ဆာတစ်ကောင်ကဲ့သို့ မြင်ယောင်မိနေတော့သည်။ သူသည် ယခုကဲ့သို့ တစ်ခါမှ မဖြစ်ဖူးပေ။ သူသည် ခိုကိုးရာမဲ့နေသလို ခံစားနေရပြီး သူ၏ အမျက်ဒေါသများနှင့် မုန်းတီးမှုများမှာ ဖော်ပြ၍မရနိုင်သည့် အဆင့်တစ်ခုသို့ ရောက်နေပြီဖြစ်သည်။

မည်သည့်အရာကိုမှ အဖတ်ဆယ်၍ ရတော့မည်မဟုတ်ပေ။ အဘွားကြီးမှာ သုံးချောင်းထောက် ဒယ်စောက်အိုးကို ဆုပ်ကိုင်ထားသော သူမ၏ ဘယ်ဘက်လက်ကို လှည့်လိုက်သဖြင့် ဝမ်ပေါင်လဲ့မှာ ရှင်လျက်နှင့် ငရဲကျရသည့်ခံစားချက်ကို နားလည်သွားတော့သည်။

သူသည် ခိုကိုးရာမဲ့ဖြစ်နေပြီး အနက်ရောင်မျက်နှာဖုံးကို ဆင့်ခေါ်ရန် ပြင်လိုက်၏။ သို့သော် အမြုတေအဆင့် ကျင့်ကြံသူ၏ ဖိအားကြောင့် ထိုအနက်ရောင်မျက်နှာဖုံးလေးမှာလည်း ဆိတ်ငြိမ်နေပြီး တုတ်တုတ်မျှ မလုပ်ပေ။

ဝမ်ပေါင်လဲ့မှာ ထိုနာကျင်မှုများကို တောင့်ခံကာ ရှုံ့မဲ့မဲ့နှင့် ရယ်မောလိုက်ပြီး သူ၏ ဝါးမျိုခြင်းသစ်စေ့ကို လှုပ်နှိုးရန် ကြိုးပမ်းလိုက်၏။ သို့သော် သူ၏ ကျင့်ကြံခြင်းအဆင့်နှင့် ထိုအဘွားကြီး၏ ကျင့်ကြံခြင်းအဆင့်ကြားရှိ ခြားနားချက်မှာ အလွန် ကြီးမားနေသောကြောင့် ဝါးမျိုခြင်းသစ်စေ့မှာ အနည်းငယ်ခန့်မျှ လှုပ်ရှားသွားလျှင်တောင် ထိုအဘွားကြီး၏ ချုပ်တည်းခြင်းကို ခံလိုက်ရမည်သာဖြစ်သည်။

” ပြန်ခုခံဖို့ ကြိုးစားနေတယ်ပေါ့ ”
ထိုအဖွားကြီးမှာ လှောင်ရယ်လိုက်ပြီး ဝမ်ပေါင်လဲ့အား အသာအယာ ကန်ထုတ်လိုက်၏။

ထိုအခါ အသံကျယ်ကြီးတစ်သံ ထွက်ပေါ်လာကာ အဘွားကြီးဆီမှ အားပြင်းသော စွမ်းအားတစ်မျိုး ထွက်ပေါ်လာပြီး ဝမ်ပေါင်လဲ့၏ ခန္ဓာကိုယ်ထဲသို့ တိုက်ရိုက်စီးဝင်သွား၏။ ထို့ကြောင့် ဝမ်ပေါင်လဲ့မှာ အပြင်းအထန်တုန်ရီသွားရပြီး ပါးစပ်ထဲမှ သွေးများပန်းထွက်လာပြီးနောက် သူ၏ခန္ဓာကိုယ်မှာ နောက်သို့ လွင့်ထွက်သွားတော့သည်

သုံးချောင်းထောက် ဒယ်စောက်အိုးမှာ သူ၏ ခန္ဓာကိုယ်နှင့် ရှစ်ဆယ်ရာခိုင်နှုန်းတိတိ ပေါင်းစည်းထားပြီးသား ဖြစ်နေသည်မဟုတ်ပါလော။ ထို့ကြောင့် သူ၏ အသွေးအသားများဖြစ်စေ၊ သူ၏ ဝိညာဉ်ဖြစ်စေ၊ ၎င်းတို့အားလုံးမှာ အတူတကွ ပေါင်းစည်းထားပြီးသား ဖြစ်နေပြီ ဖြစ်ပြီး သူ၏ တာအိုအုတ်မြစ်ကို အတိုင်းအတာတစ်ခုအထိ ဖန်တီးထားပေးပြီးသား ဖြစ်နေပြီ ဖြစ်သည်။

အဘွားကြီးက သူ့ကို ကန်ထုတ်လိုက်ချိန်တွင် သူ၏ခန္ဓာကိုယ်မှာ နောက်သို့ လွင့်ထွက်သွား၏။ ထိုအခါ သုံးချောင်းထောက် ဒယ်စောက်အိုးမှာလည်း သူ၏ အသားစများနှင့် ဝိညာဉ်များနှင့်အတူ အဘွားကြီး၏ ဆွဲထုတ်ခြင်းကို ခံလိုက်သည်။ ထိုအချိန်တွင် သူ၏ဝမ်းဗိုက်ပေါ်ရှိ ဒဏ်ရာထဲမှ ဝိညာဉ်ချီနှင့် သက်စောင့်စွမ်းအား အမြောက်အမြား စိမ့်ထွက်လာကြ၏။ သုံးချောင်းထောက် ဒယ်စောက်အိုး ဆွဲထုတ်ခံလိုက်ရချိန်တွင် ၎င်း၏ပတ်ပတ်လည်၌ သူ၏ ဝိညာဥ်သွေးကြောများနှင့် အသားစများ ရစ်ပတ်ပြီးထားပြီးသား အနေအထားသို့ ရောက်နေသည်ကိုပင် မြင်နိုင်ပေသည်။ ထို သုံးချောင်းထောက် ဒယ်စောက်အိုး ဆွဲထုတ်ခံလိုက်ရပြီး ဝမ်ပေါင်လဲ့၏ ခန္ဓာကိုယ်မှာလည်း နောက်သို့လွင့်ထွက်သွားသဖြင့် သူ၏ ဝိညာဥ်သွေးကြောများနှင့် အသားစများမှာလည်း တစ်စစီ ဆုတ်ပြဲသွားတော့သည်။

ထို့ကြောင့် သွေးများအဆက်မပြတ် ပန်းထွက်လာပြီး ထိုနေရာတစ်ခုလုံး၌ ဖုံးလွှမ်းသွား၏။

ထို့နောက် အသံကျယ်ကြီးတစ်သံ ထွက်ပေါ်လာပြီး ဝမ်ပေါင်လဲ့မှာ ဂူနံရံကို ဖောက်၍ အပြင်ဘက်သို့ရောက်သွား၏။ သူသည် အမြင်အာရုံများ မှေးမှိန်လာပြီး သူ၏ ခန္ဓာကိုယ်အား အအေးဓာတ်များ ဝန်းရံလာသည်ကို ခံစားလိုက်ရ၏။ ထိုကဲ့သို့ အရာအားလုံး မည်းမှောင်နေပြီး တစ်ကိုယ်လုံး အေးစက်နေစဉ် သူ၏စိတ်ထဲ၌ မိုးကောင်းကင်နှင့် ကမ္ဘာမြေကြီးတို့ကိုပင် ဖျက်ဆီးပစ်ချင်စိတ်များ ထွက်ပေါ်လာတော့သည်။

သို့သော် ထိုစိတ်မှာ လုံးဝ အသုံးဝင်တော့မည်မဟုတ်ပေ။ အရာအားလုံးမှာ အချည်းနှီးသာဖြစ်သည်။

ထိုအခိုက်အတန့်တွင် သူ၏ခန္ဓာကိုယ် တစ်ခုလုံးမှာ အပြင်းအထန်တုန်ရီနေ၏။ သူ၏ ဒေါသစိတ်များ၊ အမုန်းတရားများနှင့် သနားစရာကောင်းသော အော်ဟစ်သံများမှာ အားပျော့စပြုလာပြီ ဖြစ်သည်။ သူ၏ ဝိညာဉ်နှင့် သူ၏ ဝိညာဉ်ချီများသာမက အခြားအရာအားလုံးမှာလည်း အလျင်အမြန် ဆုတ်ယုတ်လာနေကြပြီ ဖြစ်သည်။ သူ၏ခန္ဓာကိုယ်ထဲရှိ နာကျင်မှုများမှာ မည်မျှပင် ပြင်းထန်စေကာမူ လူတစ်ယောက်က သူ၏ တာအိုအုတ်မြစ်အား လက်ဗလာဖြင့် ဆွဲထုတ်သွားသည့် ခံစားချက်ကိုမူ ယှဉ်နိုင်မည် မဟုတ်ပေ။ ထို့အပြင် အတွင်းကလီစာများပါ ဆွဲထုတ်ခံလိုက်ရသောကြောင့် ဝမ်ပေါင်လဲ့၏ အသက်မှာ မျော့မျော့ကလေးသာ ကျန်ရစ်တော့သည်။

သူ၏ တာအိုအုတ်မြစ်မှာ လုယူခံလိုက်ရပြီ ဖြစ်သည်။

ရှစ်ဆယ်ရာခိုင်နှုန်းအထိ ပြီးစီးနေပြီးသားဖြစ်သော သူ၏ အခြေတည်အဆင့်သို့ တက်လှမ်းသည့် လုပ်ငန်းစဉ်မှာလည်း ပျက်စီးသွားပြီဖြစ်သည်။ ထို့အပြင် အဘွားကြီး၏ အတင်းအဓမ္မ ဆွဲထုတ်မှုကြောင့် သူ၏ ဝမ်းဗိုက်အလယ်ပိုင်းနှင့် ဝိညာဥ်သွေးကြောများမှာလည်း သုံးဆယ်ရာခိုင်နှုန်းတိတိ ပျက်စီးသွားပြီဖြစ်သည်။ သူ၏ ဝမ်းဗိုက်ပေါ်ရှိ ကြောက်မက်ဖွယ်ရာ ဒဏ်ရာကြီးနှင့် အပြင်းအထန် ဒဏ်ရာရနေပြီ ဖြစ်သော အူများကြောင့် သူ၏ဒဏ်ရာများမှာ ပိုမို ဆိုးရွားလာနေပြီဖြစ်ရာ သူသည် အပြင်ခန္ဓာကိုယ်အခြေတည်အဆင့်တွင် ရှိနေလျှင်တောင် သေဆုံးရတော့မည်ဖြစ်သည်။

သို့သော် သူ၏ အသက်ရှင်ချင်စိတ်မှာ မည်မျှပင် ပြင်းထန်နေစေကာမူ သူ၏ တာအိုအုတ်မြစ်မှာ လုယူခံလိုက်ရပြီဖြစ်ပြီး သူ၏ ဒဏ်ရာများမှာလည်း အလွန်အင်မတန်မှ ပြင်းထန်နေပြီဖြစ်ရာ သူသည် အခြေတည်အဆင့်သို့ ထပ်၍ တက်လှမ်းခွင့် ရှိတော့မည်မဟုတ်ပေ။ သူ၏ အုတ်မြစ်မှာ ဖျက်ဆီးခံလိုက်ရပြီ ဖြစ်သောကြောင့် သူ၏ကျင့်ကြံခြင်းစွမ်းအားများမှာလည်း အလျင်အမြန် ပျောက်ကွယ်သွားတော့မည်ဖြစ်၍ နောက်ဆုံးတွင် သူသည် သာမာန်လူတစ်ယောက်အဖြစ်သို့ ရောက်ရှိသွားမည်ဖြစ်ပြီး သူ၏ဒဏ်ရာများကြောင့် သေဆုံးသွားမည်သာ ဖြစ်သည်။

ထိုကဲ့သို့သော အဖြစ်အပျက်များမှာ ရှေးဦးဝိညာဉ်ခေတ် မတိုင်ခင်တုန်းက ဖြစ်ခဲ့ဖူးသည်။ သို့သော် ဝမ်ပေါင်လဲ့ကဲ့သို့ တာအိုကျောင်းလေးကျောင်းမှ ကျောင်းသားတစ်ယောက် ထိုကဲ့သို့ဖြစ်ရပ်မျိုးနှင့် ကြုံရသည်မှာ ယခုသည် ပထမဆုံးအကြိမ်ဖြစ်သည်။

လျှို့ဝှက်ဆန်းကြယ် လကမ္ဘာကိုသာ အလုံပိတ်ထားခြင်းမရှိပါက ထိုအဘွားကြီးမှာ ယခုကဲ့သို့ လုံးဝပြုမှုရဲမည်မဟုတ်ကြောင်း အလွယ်တကူ သိနိုင်ပေသည်။ သို့သော် ကိစ္စအဝဝမှာ ပြီးစီးခါနီးအဆင့်သို့ ရောက်နေပြီဖြစ်ပြီး ပြည်ထောင်စုကြီးမှာ သေချာပေါက် ပြောင်းလဲသွားတော့မည်ဖြစ်ကြောင်း သူမက သိထားပြီးဖြစ်ရာ ဝမ်ပေါင်လဲ့ကဲ့သို့ လက်ထောက်အဆောင်မှူးလေးတစ်ယောက်မှာ သူမ အလွယ်တကူ ချေမှုန်းပစ်နိုင်သည့် ပါမွှားလေးတစ်ကောင် အဆင့်တွင်သာ ရှိသည်။

ထိုအဘွားကြီးမှာ သွေးများဖြင့်ပေကျံနေသော သုံးချောင်းထောက် ဒယ်စောက်အိုးကို လက်ထဲတွင်ကိုင်၍ ၎င်းထဲရှိ ဝိညာဉ်ချီများကို အာရုံခံလိုက်ပြီးနောက် သူမ၏မျက်ဝန်းများထဲတွင် သဘောကျသွားသည့် အရိပ်အယောင်တစ်ခု ပေါ်လာ၏။ သူမမှာ ထို သုံးချောင်းထောက် ဒယ်စောက်အိုးပေါ်ရှိ သွေးများကို ရွံရှာစက်ဆုပ်နေသောကြောင့် သူမ၏ လက်ကို ခါယမ်းလိုက်သောအခါ ထိုသွေးစက်များမှာ အငွေ့ပျံသွား၏။ ထို့နောက် သူမသည် ထိုဒယ်စောက်အိုးအား သူမ၏ ရင်ခွင်ထဲသို့ထဲလိုက်ပြီး ဝမ်ပေါင်လဲ့အား လူသေတစ်ယောက်ကဲ့သို့ သဘောထား၍ လှမ်းကြည့်လိုက်၏။

” နင့်ဆီမှာ နောက်ထပ် ဓမ္မလက်နက်တစ်ခု ရှိသေးတယ်လို့ ငါကြားထားတယ် ”
အဘွားကြီးမှာ ထိုသို့ဆိုလိုက်ပြီး ရှေ့သို့လှမ်းလာ၏။ ဝမ်ပေါင်လဲ့မှာ ထိုအဘွားကြီးက သူ့ကိုသတ်ကာ သူ၏ ဓမ္မလက်နက်အား လုယူတော့မည်ကို ကြည့်ရင်း သူ၏မျက်ဝန်းများထဲ၌ ခိုကိုးရာမဲ့နေသည့် ခံစားချက်များနှင့် ရူးသွပ်မှု အရိပ်အယောင်များ ထွက်ပေါ်လာတော့သည်။