“သွန်းထျန် …”
သည်စကား နှစ်လုံးက သူ့နားထဲသို့ ဝင်လာသည့် အခါတွင် ဝမ်လင်း မျက်လုံးများက အလေးအနက် ဖြစ်သွား၏။ သို့ရာတွင် သူက သည်အကြောင်းကို တွေးနေရန် အချိန်မရချေ။ သည့်အတွက်ကြောင့် သူက သူ့ခန္ဓာကိုယ်ထဲရှိ စိတ်ဝိညာဉ် စွမ်းအင်များ ကြီးထွားလာမှုကိုသာ အပြည့်အဝ အာရုံစိုက်ထားလေ၏။
စိတ်ဝိညာဉ် အပိုင်းအစ ဆယ်ခုမှ များပြားစွာသော စိတ်ဝိညာဉ် စွမ်းအင်များက ဝမ်လင်း ခန္ဓာကိုယ်ထဲသို့ ရွှေရောင်၊ ခရမ်းရောင် မျဉ်းလိုင်းများကို ဖြတ်သန်း၍ ဝင်ရောက်နေသည်။ သည်စိတ်ဝိညာဉ် စွမ်းအင်များက ဝမ်လင်း၏ သွေးကြောများတွင် ဖြတ်သန်း၍ တလိပ်လိပ် ထိုးတက် လာနေခဲ့သည်။
ဝမ်လင်းက သူ့ခန္ဓာကိုယ်ထဲရှိ အညစ်အကြေးများသည် မွှေးညှင်းပေါက်များမှ စိမ့်ထွက် လာနေသည်ကို ခံစားမိနေ၏။
သိပ်မကြာခင်တွင် ဝမ်လင်း၏ ခန္ဓာကိုယ်ထဲရှိ စိတ်ဝိညာဉ် စွမ်းအင်များသည် အထွတ်အထိပ်သို့ ရောက်လာခဲ့သည်။ သူ့နယ်ပယ်က ခုထိ စိတ်ဝိညာဉ်ပုံစံ ဖြစ်ပေါ်ခြင်း အလယ်အလတ် အဆင့်တွင် ရှိနေ သေးသော်လည်း သူ့စိတ်ဝိညာဉ် စွမ်းအင်များကမူ နောက်ဆုံးအဆင့်ကို ချိုးဖြတ်သွားခဲ့ပြီ ဖြစ်သည်။
ဝမ်လင်းအတွက်က သူ့နယ်ပယ်သည် အမြဲ စွမ်းအားကောင်းလှသည်။ သူ့ စိတ်ဝိညာဉ်ပုံစံ ဖြစ်ပေါ်ခြင်း အလယ်အဆင့် နယ်ပယ်နှင့်ပင် သူက အနီရောင် လိပ်ပြာ၏ နောက်ဆုံးအဆင့် နယ်ပယ်ကို ရင်ဆိုင်နိုင်စွမ်း ရှိခဲ့သည်။ သူ့စိတ်ဝိညာဉ် စွမ်းအင်များက ကြီးထွား လာပြီးသည့်နောက် သူ့တိုက်ပွဲဝင် စွမ်းအားသည်လည်း ကောင်းစွာ တိုးတက်လာခဲ့သည်။
ခုချိန်၌သာ သူက အနီရောင် လိပ်ပြာနှင့် တိုက်ခိုက်လျှင် တိုက်ပွဲက သူ့အတွက် အရင်ကထက် အဆများစွာ လွယ်ကူနေပြီ ဖြစ်သည်။
ဝမ်လင်၏ မျက်လုံးများက လက်ခနဲ ဖြစ်နေသည်။ သူက ပတ်ဝန်းကျင်ရှိ စိတ်ဝိညာဉ် အပိုင်းအစများကို ကြည့်၍ စဉ်းစားနေသည်။
သွန်းထျန်က ဝမ်လင်းကို ကြည့်၍ ရယ်မောလိုက်သည်။
“မိတ်ဆွေလေး စန်နူး … ဒီတတိယ လက်ဆောင်ကနေ လုံလောက်တဲ့ စိတ်ဝိညာဉ် စွမ်းအင်တွေကို ရရှိခဲ့ရဲ့လား …”
ဝမ်လင်းက အနည်းငယ် စဉ်းစားနေ၏။ သည်ဘိုးဘေးက သူ့ကို ခုလောက်ထိ ပြုလုပ် ပေးနေသည်မှာ သူ့ကို ကြီးကြီးမားမား တစ်ခုကို လုပ်ခိုင်းချင်၍သာ ဖြစ်ပေမည်။ ဝမ်လင်းက သည်လက်ဆောင်များကို လက်ခံလိုက်ကတည်းက သူက အကူအညီ ပြန်ပေးရန် ငြင်းဆန်နိုင်တော့မည် မဟုတ်ချေ။
သို့ရာတွင် ဝမ်လင်း အကျင့်စရိုက်က သူက ကူညီရန် ဆုံးဖြတ်လိုက်ပြီးသည်နှင့် အဆုံးထိ ကူညီမည်သာ ဖြစ်သည်။
“စီနီယာ … ငါက ငါစုပ်ယူ နိုင်သလောက် စုပ်ယူခဲ့တယ် … ဟုတ်တယ်မလား …”
ဝမ်လင်းက ဘိုးဘေး သွန်းထျန်ကို တည်ငြိမ်စွာ ကြည့်သည်။
အဘိုးအိုက ရယ်မော၍ ဆုံးဖြတ်ချက် ပြတ်သားစွာ ပြောလိုက်သည်။
“ဒါမှန်တာပေါ့ … မိတ်ဆွေလေး စန်နူး … ဒီတတိယ လက်ဆောင်အတွက် နှမြောတွန့်တိုခြင်း မရှိခဲ့ပါဘူး …”
ဝမ်လင်းက ခေါင်းညိတ်၍ မျက်လုံး မှိတ်လိုက်သည်။
“ဒီကောင်လေးက စိတ်ဝိညာဉ် စွမ်းအင်တွေကို လုံးဝ စုပ်ယူပြီးသွားပြီ။ သူထပ်ပြီး စုပ်ယူချင်တယ် ဆိုရင်တော့ ထပ်ပြီး မလုပ်နိုင်လောက်တော့ဘူး …”
“မူလခန္ဓာကိုယ် … ငါတို့အတူ စုပ်ယူကြတာပေါ့ …”
ဝမ်လင်းက စိတ်ထဲကနေ မူလခန္ဓာကိုယ်ကို လှမ်း၍ ခေါ်လိုက်၏။
သည်လိုလှမ်း၍ ဆက်သွယ်မှုကြောင့် ဝေးကွာလှသော ချူနိုင်ငံရှိ မူလခန္ဓာကိုယ်က မျက်လုံး ပွင့်လာခဲ့သည်။
မူလ ခန္ဓာကိုယ်ပေါ်ရှိ ခရမ်းရောင် ကြယ်နှစ်ခုကလည်း စတင် လှည့်ပတ်လာသည်။
သည်မူလ ခန္ဓာကိုယ်ဖြစ်စေ၊ အခု ဒုတိယကိုယ်ပွားဖြစ်စေ သည်နှစ်ယောက်လုံးက ဝမ်လင်းသာ ဖြစ်သည်။ သည်အရာက သူကိုယ်တိုင် နှစ်ခြမ်းခွဲထားခြင်းသာ ဖြစ်သည်။ သည်နှစ်ယောက်ကို ပြန်ပေါင်းစပ်လျှင် အစစ်အမှန် ဝမ်လင်းတစ်ယောက်တည်း ပြန်ဖြစ်မည် ဖြစ်၏။
သူ့ကိုယ်ပွားနှင့် မူလ ခန္ဓာကိုယ်ကြားတွင် ထူးဆန်းသော ဆက်သွယ်ချက် ရှိလေသည်။ ထို့ကြောင့်လည်း သူ့မူလ စိတ်ဝိညာဉ် ပျက်စီးကွဲကြေ သွားသည့်အခါ မူလ ခန္ဓာကိုယ်ကလည်း နာကျင်မှုကို ခံစားရခြင်း ဖြစ်၏။ သည်ထူးဆန်းသော ဆက်သွယ်ချက်ကြောင့်လည်း မူလခန္ဓာကိုယ်က သူ့ကိုယ်ပွား ထံကနေ စိတ်ဝိညာဉ် စွမ်းအင်များကို ရူးသွပ်စွာ စုပ်ယူနိုင်စွမ်း ရှိနေ၏။
မူလ ခန္ဓာကိုယ်၏ စုပ်ယူမှုက သူ့ကိုယ်ပွားထက်ပင် ပို၍ အားကောင်းနေသေးသည်။ တကယ်တော့ မူလခန္ဓာကိုယ်က ရှေးဟောင်း နတ်ဘုရားများ၏ လမ်းကြောင်းကို လျှောက်လှမ်းခြင်း ဖြစ်သည်။ ၎င်းက စိတ်ဝိညာဉ် စွမ်းအင်များကို ဝါးမျိုပြီး ရှင်သန်သည့်သက်သက် ဖြစ်လေသည်။
ဝမ်လင်း ခန္ဓာကိုယ်တွင် ဝန်းရံနေသော စိတ်ဝိညာဉ် အပိုင်းအစ ဆယ်ခုက တုန်ခါလာ၏။ သူတို့က ဝမ်လင်းထံကနေ အားကောင်းသော စုပ်ယူအားတစ်ခုကို ခံစားနေရသည်။
ခုအခြေအနေက စိတ်ဝိညာဉ် အပိုင်းအစများ၏ စိတ်ဝိညာဉ် စွမ်းအားများကို ဝမ်လင်းကနေ တစ်ဆင့် သူ့မူလ ခန္ဓာကိုယ်ကပါ စုပ်ယူနေခြင်း ဖြစ်သည်။ သည်ပြောင်းလဲမှုက သွန်းထျန်၏ မျက်လုံးကိုပင် ပြူးကျယ်သွားစေသည်။
သူ့မျက်နှာပေါ်ရှိ ကြွက်သွားများက ရှုံ့တွသွားပြီး သူက ကြေကွဲသည့်အသွင် ဖြစ်ပေါ်သွားသည်။
အသက်ရှူစာ ဆယ်ကြိမ်ကြာချိန် … သည်လောက် ကြာချိန်လေးအတွင်း စိတ်ဝိညာဉ် အစိတ်အပိုင်းများ၏ စိတ်ဝိညာဉ် စွမ်းအင်များသည် တစ်ဝက်ကျော် စုပ်ယူခြင်း ခံလိုက်ရသည်။ သွန်းထျန်၏ အသွင်က အလွန် ရုပ်ဆိုးသွား၏။ သူက ဝမ်လင်းကို ရပ်တန့်လိုပေသည်။ သို့သော် သူက သူပြောခဲ့သည်ကို ပြန်စဉ်းစား မိပြီးနောက် သက်ပြင်းသာ ချလိုက်နိုင်တော့သည်။ သူ့အတွေ့အကြုံဖြင့် သူက သည်စန်နူးတွင် ကိုယ်ပွားတစ်ခု ရှိကြောင်း ချက်ချင်း ပြောနိုင်ပေသည်။ သည်စန်နူးက ခုလက်ရှိတွင် သူ့ကိုယ်ပွားနှင့်အတူ စိတ်ဝိညာဉ် စွမ်းအင်များကို စုပ်ယူနေခြင်း ဖြစ်၏။
ချူနိုင်ငံရှိ ဝမ်လင်း၏ မူလခန္ဓာကိုယ်ကလည်း စိတ်ဝိညာဉ် စွမ်းအင်များနှင့် ပြည့်လာခဲ့သည်။ အမှတ်တစ်ခုသို့ ရောက်သည့်အခါ မူလခန္ဓာကိုယ် ထံကနေ ရွှေရောင်လိုင်းများ ထွက်ပေါ်လာပြီး သူ့ကို ထွေးပွေ့ထားသလို ဖြစ်လာခဲ့သည်။ သိပ်မကြာခင်တွင် သလင်းကျောက် ပိုးအိမ်တစ်ခုက ဖြစ်ပေါ်လာ၏။
မူလ ခန္ဓာကိုယ်က သည်ပိုးအိမ်ထဲတွင် ထိုင်နေသည်။ သည့်နောက် သူ့နဖူးပေါ်ရှိ နောက်ထပ် ကြယ်တစ်ခုက တဖြည်းဖြည်း ဖြစ်ပေါ်လာနေခဲ့သည်။
ဝမ်လင်းက လောဘ ကြီးလွန်းသူတစ်ယောက် မဟုတ်ချေ။ ထိုအချိန်တွင်ပင် သူက မျက်လုံး ဖွင့်လာခဲ့ပြီး စုပ်ယူခြင်းကို ရပ်တန့်ပစ်လိုက်၏။
သွန်းထျန်က ခုမှ စိတ်သက်သာရာ ရဟန်ဖြင့် သက်ပြင်းချနိုင်တော့သည်။ သူက လျင်မြန်စွာဖြင့် သူ့လက်ထဲရှိ အလံကို ဝှေ့ရမ်းလိုက်ရာ စိတ်ဝိညာဉ် အပိုင်းအစ ဆယ်ခုက အလံထံသို့ ပြန်ဝင်ရောက်သွား၏။ သူက ဝမ်လင်းကို ခါးသက်စွာပြုံး၍ ပြောလိုက်သည်။
“မိတ်ဆွေလေး စန်နူး … မင်းက တကယ့်ကို ထိန်းချုပ်မှု မရှိတာပဲ …”
ဝမ်လင်းမျက်လုံးက တလက်လက် ဖြစ်နေ၏။ သူက မတ်တတ် ထရပ်လိုက်သည်။ သူ့ခန္ဓာကိုယ် ထဲ၌ အားကောင်းသော စိတ်ဝိညာဉ်များကို ခံစားနေရသည်။ သည့်နောက် သူက ရွှမ်ယွဲ့နိုင်ငံ ရှိရာသို့ အေးစက်စွာ ကြည့်လိုက်သည်။
ဝမ်လင်းက ပင်ကိုယ်အားဖြင့် ပြတ်သားသည့် လူတစ်ယောက် ဖြစ်သည်။ သူက သူ့ကို မနှောင့်ယှက်သရွှေ့ ဘာမှ မလုပ်ချေ။ သို့သော် တစ်စုံတစ်ယောက်က သူ့ကို နှောင့်ယှက်လာခဲ့လျှင်လည်း သူက အဆတစ်ဆယ် … အဆတစ်ရာလောက် ပြန်ပေးဆပ်စေသည့် လူမျိုးဖြစ်သည်။ သူက အခု တစ်စုံတစ်ဦးကို လက်စား ချေခြင်နေ၏။
“လီယွမ်ဖန် …”
ဝမ်လင်း မျက်လုံးထဲရှိ အေးစက်မှုက ပျောက်ကွယ်သွားပြီး သူက သွန်းထျန်ရှိရာသို့ လှည့်၍ လက်နှစ်ဖက်ဆုပ်ကာ ပြောလိုက်သည်။
“ကျေးဇူးတင်ပါတယ် … စီနီယာ … ဒီလက်ဆောင် သုံးခုအတွက် … စီနီယာက ငါ့ကို တစ်ခုခု လိုတာရှိရင် ငါက အကောင်းဆုံး လုပ်ပေးမှာပါ …”
သွန်းထျန်က ပြုံးလိုက်၏။ သူ့ထံ၌ အစောပိုင်းက မပျော်မရွှင် ဖြစ်နေသည့် ခံစားချက်သည် လုံးဝ ပျောက်ကွယ်သွားသည်။
“မိတ်ဆွေလေး စန်နူး … ငါမင်းကို ဒီလို လက်ဆောင်သုံးခု ပေးရတဲ့ ရယ်ရွယ်ချက်က အလွန် အရေးကြီးတယ်။ မင်းသာ ငါတို့ စိတ်ဝိညာဉ်သန့်စင်ခြင်း ကလန်ကို မလာခဲ့ရင် ငါကမင်းကို ရှာနိုင်မှာ မဟုတ်ဘူး …”
ဝမ်လင်းက သွန်းထျန်ကို ကြည့်၍ ပြုံးကာ ပြောသည်။
“ဂျူနီယာက စိတ်ဝိညာဉ် သန့်စင်ခြင်း ကလန်က စိတ်ဝိညာဉ်ပုံစံ ဖြစ်ပေါ်ခြင်းအဆင့် ကျင့်ကြံသူ တစ်ယောက်ကို သတ်ပစ်ခဲ့တယ်လို့ ပြောကြတာကို ကြားခဲ့ပြီးပါပြီ။ ဒါတောင် စီနီယာက ဂျူနီယာကို မေးခွန်းထုတ်မလို့ ရှာနေတယ်လို့ ယူဆပါတယ် …”
သွန်းထျန်က ခေါင်းခါကာ ပြုံးသည်။
“ဒါက လှည့်ကွက်တစ်ခုပါ … ငါက မင်းကို အကြောင်းပြချက် မရှိဘဲ ရှာနေတယ် ဆိုရတာ သိရင် လူအများရဲ့ အာရုံစိုက်မှုကို ခံရလိမ့်မယ် … ဒါပေမဲ့ ငါက ဒီလိုမျိုး ငါ့ကလန်ရဲ့ စိတ်ဝိညာဉ်ပုံစံ ဖြစ်ပေါ်ခြင်းအဆင့် တစ်ယောက်က မင်းသတ်တာ ခံရတယ်လို့ သတင်း လွှင့်လိုက်တော့ လူတွေက ငါမင်းကို ရှာတာနဲ့ ပတ်သက်ပြီး အာရုံမစိုက် တော့ဘူးပေါ့ …”
ဝမ်လင်း မျက်လုံးက လက်ခနဲ ဖြစ်သွားသည်။ ဘိုးဘေးက ငါ့ကို ဂရုစိုက်လွန်း နေခြင်းက မခန့်မှန်းနိုင်သော အရာတစ်ခုခု ဖြစ်လာတော့မည်ကို ဆိုလိုနေတာ မဟုတ်လား။
သွန်းထျန်က ဝမ်လင်းကို အသိအမှတ် ပြုဟန်ဖြင့် ကြည့်သည်။ ခဏအကြာတွင် သူက ပြောလိုက်သည်။
“မိတ်ဆွေလေး … ဟင်္သာပြဒါး နိုင်ငံက ဒီလောက် အချိန်အကြာကြီး ထိန်းချုပ်ထားပြီးနောက် ဒီဂြိုဟ်မှာ အဆင့်ငါး နိုင်ငံတွေက ဆယ်ခုထက် နည်းပြီး ရှိနေရတဲ့ အကြောင်းရင်းကို သိလား …”
သူက ဝမ်လင်း ပြန်ဖြေတာ စောင့်မနေတော့ချေ။ သည့်နောက် သူက အကူအညီမဲ့သည့် အသွင်ဖြင့် ရှင်းပြလိုက်သည်။
“ဒီဂြိုဟ်ကို ဟင်္သာပြဒါးနိုင်ငံ စရောက်လာတော့ ဒီနိုင်ငံမှာ အဓိက ကလန်ခြောက်ခု ရှိတယ်။ အဲဒီနောက်မှာ ဒီကလန်ရဲ့ တပည့်တွေက အသီးသီး ပျံ့နှံ့သွားပြီး ဒီဂြိုဟ်ပေါ်မှာ အမျိုးမျိုးသော ကျင့်ကြံခြင်း နိုင်ငံတွေကို ထူထောင်ခဲ့တယ်။ တစ်ချိန်တည်းမှာပဲ ဒီကလန် ခြောက်ခုရဲ့ အဓိက တပည့်တွေက အဆင့်ငါး နိုင်ငံကို ထူထောင်ခဲ့ကြတယ် …”
“ဒါက ဒီဂြိုဟ်ရဲ့ ပထမဆုံး အဆင့်ငါး ကျင့်ကြံခြင်း နိုင်ငံအုပ်စု ဖြစ်တယ် … ငါ့စိတ်ဝိညာဉ် သန့်စင်ခြင်း ကလန်ကလည်း ဒီနိုင်ငံတွေထဲက တစ်ခု အပါအဝင်ပဲ …”
ဝမ်လင်း မျက်လုံးများက တည်ငြိမ်နေဆဲပင်။ သူ့အသွင်ကလည်း ပြောင်းလဲခြင်း မရှိချေ။
သွန်းထျန်က ခေါင်းမော့၍ ကောင်းကင်ကို ကြည့်သည်။ သည့်နောက် သူက တည်ငြိမ်စွာ ဆက်ပြောသည်။
“အချိန် တဖြည်းဖြည်းချင်း ကုန်ဆုံးလာခဲ့တယ်။ ဒီလိုနဲ့ အဆင့်ငါး ကျင့်ကြံခြင်း နိုင်ငံတစ်ခုက အဆင့်ခြောက် နိုင်ငံအဖြစ်ကို ရောက်ခါနီးချိန်တိုင်း ဒီကလန်တွေက သူတို့ရဲ့ မူလ အဆင့်အတန်းကိုပဲ ပြန်ပြန် ပြုတ်ကျအောင် တစ်ညတည်းနဲ့ ရိုက်ချခြင်း ခံခဲ့ရတယ်။ ဒီဟင်္သာပြဒါး နိုင်ငံက ဒီဂြိုဟ်ပေါ်မှာ နောက်ထပ် အဆင့်ခြောက် နိုင်ငံတစ်ခု ဖြစ်လာဖို့ ခွင့်မပြုခဲ့ဘူး …”
“ကုန်ခဲ့တဲ့ မရေမတွက်နိုင်တဲ့ နှစ်တွေမှာ ငါ့စိတ်ဝိညာဉ် သန့်စင်ခြင်း ကလန်က အဆင့်ခြောက် နိုင်ငံအဖြစ် ရောက်ရှိဖို့ အခွင့်အရေး သုံးခါ ရခဲ့တယ်။ ဒါပေမဲ့ ငါတို့လည်း ဒီလိုပဲ ရိုက်ချခြင်း ခံခဲ့ရတယ်။ အခု ငါတို့က နိုင်ငံအဖြစ် တည်ရှိမှုကို ဆုံးရှုံးခဲ့ရပြီး ကလန်အဖြစ်ပဲ ရှိနေခဲ့ရတယ် …”
ဝမ်လင်းက တိတ်ဆိတ်စွာ စဉ်းစားနေသည်။
“အဆင့်ခြောက် နိုင်ငံတစ်ခု ဖြစ်လာဖို့က ငါတို့ကလန်ရဲ့ ပထမဆုံး ဘိုးဘေတွေရဲ့ အိပ်မက်ပဲ။ ဒီအိပ်မက်က ကလန်ရဲ့ နောက်မျိုးဆက် များစွာထိ ဆက်ရှိနေခဲ့တယ်။ အတိတ်တုန်းက ဟင်္သာပြဒါး ဂြိုဟ်ပေါ်မှာ ကျင့်ကြံသူတစ်ယောက် ရှိခဲ့တယ်။ အတိတ်တုန်းက ဟင်္သာပြဒါး နိုင်ငံက အဆင့်ငါး နိုင်ငံအဖြစ် သူတော်စင်လေးပါး ဂြိုဟ်မှာ ရှိစဉ်တုန်းက ကလန်ခြောက်ခုလုံးက အတူတူကြိုးစား လုပ်ဆောင်ခဲ့ကြတယ်။ အဲဒီနောက်မှာ ကျင့်ကြံခြင်း မဟာမိတ် အဖွဲ့အစည်းကြီးက ဒီကလန်တွေကို ဟင်္သာပြဒါး ဂြိုဟ်ကို ပေးခဲ့တယ် …”
“အတိတ်တုန်းက စိတ်ဝိညာဉ်သန့်စင်ခြင်း ကလန်မှာ အာဏာတက်ခြင်းအဆင့် ဘိုးဘေး သုံးယောက် ရှိခဲ့တယ်။ အခြားကလန် ငါးခုကလည်း ဒီလိုပဲ ရှိခဲ့တယ်။ ဟင်္သာပြဒါး နိုင်ငံကလည်း ဒီလိုပဲ စွမ်းအား ကြီးခဲ့တယ်။ ဒါပေမဲ့ ငါတို့က ဒီဂြိုဟ်ကို စရောက်လာတဲ့ အချိန်မှာ သိပ်အကောင်းမွန်ကြီး မဟုတ်တာကို တွေ့ခဲ့ရတယ်။ ဒီဂြိုဟ်မှာက တက်တူးစွမ်းအားကို အသုံးပြုတဲ့ မျိုးနွယ်စုတွေ ရှိခဲ့ပြီး သူတို့ကလည်း အလွန်ပဲ စွမ်းအားကောင်းကြတယ် …”
“ဒီတော့ မရေမတွက်နိုင်တဲ့ နှစ်တွေတုန်းက ဒီဂြိုဟ်မှာ သွေးလွှမ်းတဲ့ စစ်ပွဲတစ်ခု ဖြစ်ခဲ့တယ်။ ဒီတိုက်ပွဲ အတွင်းမှာ ဒီစိတ်ဝိညာဉ် အလံက စိတ်ဝိဉာ ဉ်ဆယ်သန်းထိ ပြည့်လာခဲ့ရတယ် …”
“ငါတို့က အနိုင်ရခဲ့ပေမဲ့ ဟင်္သာပြဒါး ဂြိုဟ်ကလည်း ပျက်စီးသွားခဲ့ပြီး ဟင်္သာပြဒါး နိုင်ငံက အာဏာတက်ခြင်းအဆင့် ဘိုးဘေးတွေ များစွာကိုလည်း ဆုံးရှုံးခဲ့ရတယ်…”
ဒါ့ကြောင့်ပဲ ကလန်ခြောက်ခုက အဆင့်ငါး နိုင်ငံအဖြစ် ကွဲထွက်သွားချိန်မှာ ဟင်္သာပြဒါး နိုင်ငံရဲ့ ပထမဆုံး မျိုးဆက်က ဟင်္သာပြဒါးတောင်ကို တည်ထောင်ပြီး ဒီဟင်္သာပြဒါး ဂြိုဟ်ရဲ့ ဗဟိုထိန်းချုပ်မှု တစ်ခု ဖြစ်လာခဲ့တာ။
“ဒီဒေသခံတွေနဲ့ တိုက်ပွဲ ပြီးတဲ့နောက်မှာ အဆင့်ငါးနိုင်ငံ အားလုံးအတွက် အိပ်မက်ဆိုးတစ်ခု ရောက်လာခဲ့တယ်။ နိုင်ငံတွေ အားလုံးက ဟင်္သာပြဒါးနိုင်ငံရဲ့ အမိန့်ကို လိုက်နာရပြီး သူတို့က အဆင့်ငါး နိုင်ငံတွေကို အဆင့်ခြောက်နိုင်ငံ ဖြစ်လာဖို့ ခွင့်မပြုတော့ဘူး။ ခုချိန်မှာ ဟင်္သာပြဒါး နိုင်ငံမှာက အာဏာတက်ခြင်းအဆင့် ကျင့်ကြံသူ လေးယောက် ရှိပေမဲ့ သူတို့တွေက အားနည်းနေပြီ …”
“ဟင်္သာပြဒါး နိုင်ငံက အဆင့်ငါး နိုင်ငံတွေက သူ့အဆင့်ကို ဖယ်ရှားပစ်ပြီး အရှင်သခင်တွေ ဖြစ်လာကြမှာကို စိုးရိမ်နေကြတယ် …”
ဝမ်လင်းက စဉ်းစားနေ၏။ ခဏအကြာတွင် သူက သွန်းထျန်ကို ကြည့်ကာ မေးလိုက်သည်။
“စီနီယာ … သင်က ငါ့ကို ဘာလို့ ခုလိုတွေ အရာအားလုံးကို ပြောပြရတာလဲ။ ဂျူနီယာက ခုမှ စိတ်ဝိညာဉ်ပုံစံ ဖြစ်ပေါ်ခြင်းအဆင့် သာသာလေးပဲ ရှိပါသေးတယ် …”
သွန်းထျန်၏ မျက်လုံးများက ပို၍ အလေးအနက် ဖြစ်လာသည်။ သူက ဝမ်လင်းကို ကြည့်၍ စကား တစ်လုံးချင်းစီ ပြောလိုက်သည်။
“ဒါက မင်းနဲ့ ပတ်သက်နေတယ် …”
“အို … တကယ်လား …”
ဝမ်လင်းက ခေါင်းမော့၍ သွန်းထျန်ကို ကြည့်သည်။
သွန်းထျန်က ဖြည်းညင်းစွာ ပြောလိုက်သည်။
“မင်းက နောက်ဖြစ်လာမဲ့ ဟင်္သာပြဒါး ဂြိုဟ်ရဲ့ ခေါင်းစီးနေရာအတွက် ယွင်ချွဲဇီရဲ့ ရွေးချယ်ထားတဲ့ လေးယောက်ထဲက တစ်ယောက် ဖြစ်နေလို့ပဲ …”
“ယွင်ချွဲဇီ …”
ဝမ်လင်းက မျက်မှောင်ကြုတ်သွားသည်။
သွန်းထျန်က သူ့လက်ကို ဝှေ့ရမ်းလိုက်ရာ သစ်သားပန်းပု ရုပ်တစ်ခုက သူ့လက်ဝါးပေါ်၌ ပေါ်လာခဲ့သည်။ သည်သစ်သားရုပ်က အလွန်ကြည့်ကောင်းသည့် လူကြီးတစ်ယောက်၏ အသွင်ကို ထွင်းထုထားခြင်း ဖြစ်သည်။ သူ့မျက်လုံး များကလည်း အသက် ဝင်နေသည့်အလား ရှိနေ၏။
“ဒါ … ဒါက သူပဲ …”
ဝမ်လင်းက မှင်တက်သွားပြီးနောက် သူ့အသွင်က ထူးဆန်းသွားသည်။ သည်အဘိုးအိုက သူ့ကို ကောက်ရိုးဦးထုပ် ပေးခဲ့သော အဘိုးအိုပင် ဖြစ်နေသည်မဟုတ်လား။ သည်အဘိုးအို၏ စွမ်းအားက အလွန် ကောင်းလှသည်။ သူက အတိတ်တုန်းက သံသယ ရှိနေသော်လည်း ခုတော့ အဖြေတစ်ခု ရသွားခဲ့ပြီ ဖြစ်သည်။
“သူက ယွင်ချွဲဇီ။ သူက ခုလက်ရှိ ဟင်္သာပြဒါး နိုင်ငံရဲ့ ခေါင်းစည်းရဲ့ ဂျူနီယာ ညီလည်း ဖြစ်တယ် …”
သွန်းထျန်က သစ်သားရုပ်ကို ကြည့်၍ ပြောလိုက်သည်။
“ဒီသစ်သား ပန်းပုရုပ်က မင်းထွင်းထု ထားခဲ့တာလေ။ ဒါက သူနဲ့ တော်တော်လေး တူတယ် …”
“စီနီယာ ငါ့ကို လက်ဆောင်သုံးခု ပေးရတဲ့ အကြောင်းက သူ့ကြောင့်ပေါ့ …”
ဝမ်လင်းအသွင်က ပို၍ပို၍ ထူးဆန်းလာနေသည်။
“ဒါက အစိတ်အပိုင်း တစ်ခုပဲ ရှိပါသေးတယ် …”
သွန်းထျန်က ခေါင်းမော့လိုက်သည်။ သူ့မျက်လုံးထဲ၌ ထူးဆန်းသောအလင်းတစ်ခု ရှိနေသည်။
***