အခန်း ( ၁၆၁ )

ဒီရေစီးကြောင်းကို ဖျက်စီးပစ်မယ်

ဝိညာဥ်စွယ်နှင့် ရှန်ကွမ်းထျန်ယုံမှာ စုန့်ချွဲ၏မန္တန်အစီအရင်ကို တိုက်ခိုက်နေခဲ့ကြသည်။ မန္တန်အစီအရင်မှာ အက်ကွဲပြိုလဲကျသွားပြီဖြစ်သော်လည်း ကာကွယ်ထားဆဲဖြစ်သည်။

စုန့်ချွဲ၏နဝမအကြိမ်မြောက် ရေဝဲငယ်မှာ မြန်မြန်ဆန်ဆန်လှည့်ပတ်ကာ မြေခဓားကမ္ဘာမှ မြေစီးကြောင်းစွမ်းအင်များကို စုပ်ယူနေလေသည်။

သူ၏မျက်လုံးများမှာ ပိတ်ထားသော်လည်း လုံးဝကိုရဲရဲနီလျက်ရှိသည်။ သူက ထိုနေရာတွင် တင်ပျဥ်ခွေထိုင်လိုက်ကာ မန္တန်အစီအရင်အဖြစ်သူချိတ်ဆက်ထားသည့် မြေခဓားကမ္ဘာတစ်လျှောက်ရှိ စွမ်းအင်အမှတ်အသားများမှတစ်ဆင့် မြေစီးကြောင်းစွမ်းအင်ကို စုပ်ယူခြင်းအပါအဝင် အရင်းအမြစ်အားလုံးကို ဖယ်ရှားယူဆောင်လိုက်သည်။

ထို စွမ်းအင်အမှတ်အသားများကို မည်သူမျှမမြင်နိုင်သော်လည်း ယခုတွင် သူတို့အပေါ်၌ အက်ကွဲကြောင်းများစတင်ပေါ်လာသည်။ အထူးသဖြင့် ပိုင်ရှောင်ချန်းက ဓားကမ္ဘာအပြင်ဘက်တွင် စုန့်ချွဲနှင့်ပထမဆုံးတွေ့ဆုံခဲ့သည့်နေရာရှိအမှတ်အသား မှာစတင်ကွဲအက်လာသည်။ အက်ကွဲကြောင်းမှာပျံ့နှံ့လာပြီး ကြီးမားသည့် မျက်နှာပြင်ရှိသော ဓားမှာ ပြိုလဲကြေမွသည်အထိ စတင်၍ မတည်မငြိမ်ဖြစ်လာသည်။

သို့သော်လည်း ဓားကိုဖျက်ဆီးနိုင်သည့် လက္ခဏာများကို ရှာဖွေရန် မဖြစ်နိုင်ပေ။ မီးတောက်ကြိုးကြာတောင်ရှိ အူယန်ကျဲပင် မတတ်နိုင်ချေ။

“မြန်မြန်လုပ်ရမယ် ” စုန့်ချွဲ က စိတ်ထဲတွင် ကြုံးဝါးလိုက်သည်။ သူက လက်များကို သူ၏ရှေ့ရှိ မြေပြင်ပေါ်တွင် ခွဲ၍ဖြန့်လိုက်ပြီး မြေစီးကြောင်းစွမ်းအင် အမြောက်အများကိုစုပ်ယူလိုက်သောအခါ သူ၏ဦးခေါင်းပေါ်ရှိဆံပင်များက လွင့်သွားလေသည်။ ရေဝဲငယ်မှာ လည်ပတ်လာသည်နှင့်အမျှ သူက နဝမအကြိမ်မြောက် ဒီရေစီးကြောင်းကို ပြီးမြောက်ရန် နီးကပ်လာကာ သူ၏ပတ်လည်ရှိ ကမ္ဘာကြီးမှာ တုန်ခါလာလေသည်။ ကောင်းကင်ကြီးကပင် အားနည်းသွားသည့်ပုံ ဖြစ်သွားလေသည်။

စုန့်ချွဲထိုင်နေသည့်နေရာမှလွဲ၍ အခြားတစ်နေရာမှအာရုံမခံနိုင်သော နောက်ထပ်လမ်းကြောင်းတစ်ခုရှိပေသည်။ အားနည်းနေသည့်ကောင်းကင် အထက်ရှိ ရေဝဲငယ်၏ အလယ်နေရာတွင် ….စွမ်းအင်စီးကြောင်း တစ်ခုရှိနေကာ ထိုစွမ်းအင်မှာ လွန်စွာအားနည်းလွန်းသဖြင့် မည်သူမျှ သတိမထားမိကြပေ။

ထိုစွမ်းအင်မှာ မြေစီးကြောင်းစွမ်းအင်နှင့် လုံးဝကွဲပြားခြားနားပြီး ထိတ်လန့်စရာကောင်းသော စွမ်းအင်အမျိုးအစားတစ်ခုဖြစ်ကာ ပို၍အဆင့်မြင့်သော နေရာတွင်တည်ရှိလေသည်။

စုန့်ချွဲ ထိုင်ခဲ့သောနေရာအတိအကျတွင် ထိုင်သောသူမှသာ ထိုအရာကို ရှာဖွေတွေ့ရှိနိုင်ပေမည်။ အကြောင်းမှာ သူက မြေခဓားကမ္ဘာ၏နောက်ဆုံးစွမ်းအင်အမှတ်အသား ပေါ်တွင်ထိုင်နေခြင်းကြောင့်ဖြစ်သည်။ စုန့်ချွဲက ထိုနေရာကို အခြေခိုင်မာခြင်းအဆင့်တက်ရောက်ရန် သေချာသော အကြောင်းပြချက်ဖြင့် ရွေးချယ်ခဲ့လေသည်။

စုန့်ချွဲက စွမ်းအင်ကို အာရုံခံမိသွားသည်နှင့်တပြိုင်နက် သူ၏နှလုံးသားမှာ စိတ်လှုပ်ရှားမှုကြောင့် လှုပ်ခတ်သွားလေသည်။ သူက ယနေ့ကဲ့သို့နေ့မျိုးကို စောင့်နေခဲ့သည်မှာ အချိန်များစွာကြာမြင့်ခဲ့ပြီဖြစ်သည်။

“မြေစီးကြောင်းအခြေခိုင်မာခြင်းအဆင့်ရဲ့ အထွတ်အထိပ်က ဘာနဲ့မှ မရေတွက်နိုင်ဘူး။ ဒါက ပထမခြေလှမ်းပဲ ရှိပါသေးတယ်။ ငါဒီမှာ တကယ်ရောက်နေတာက ဘာအတွက်လဲ….။ ကောင်းကင်တာအိုအခြေခိုင်မာခြင်းအဆင့် အတွက်ကွ။ ဒါမှသာ ငါဂိုဏ်းကိုပြန်ရောက်ရင် ငါ့ရဲ့လမ်းကြောင်းမှာ ပိတ်နေတဲ့ ဘယ်သူ့ကိုမဆို ချေမှုန်းနိုင်တဲ့ စွမ်းအားတွေရှိမှာ…။ နောက်ဆုံးတော့ငါဟာ ငါ့အဒေါ် စုန့်ကျင်းဝမ်နဲ့ ယှဥ်နိုင်ပြီး ဟို ရွှယ်မေ့နဲ့ ကျုံးဖုန် တောင်ရဲ့ သွေးသခင်ဖြစ်ဖို့အတွက် ယှဥ်နိုင်တော့မယ်ကွ။ မဟာသွေးသခင်လေးယောက်ထဲက တစ်ယောက်ဖြစ်လာခဲ့ရက် သွေးစွမ်းအင်နတ်ရေစင်ဂိုဏ်းက မဟာ အကြီးအကဲတွေထက်ပိုပြီး အဆင့်အတန်းမြင့်မားသွားလိမ့်မယ်” စုန့်ချွဲမှာ စတင်၍ စိတ်လှုပ်ရှားနေပြီဖြစ်သည်။

ဝါအရ သွေးစွမ်းအင်နတ်ရေစင်ဂိုဏ်း၏ သွေးသခင်များမှာ ဂိုဏ်းခေါင်းဆောင်နှင့် အရည်အချင်းတန်းတူဖြစ်ကြောင်းသိရသည်။ စွမ်းအား၏ အထွတ်အထိပ်အဆင့်မှ သူတို့အားလုံးမှာ မြင့်မားသောနေရာဖြစ်သည့် ဘိုးဘေး တောင်သို့ ရောက်ရန်အတွက် ပထမခြေတစ်လှမ်း လိုအပ်သည်။

သို့သော် စုန့်ချွဲက သူ၏နဝမအကြိမ်မြောက် ဒီရေစီးကြောင်း ပြီးဆုံးတော့မည့်အချိန်တွင် ပိုင်ရှောင်ချန်းမှာ သူ့ထံသို့အလင်းတန်းတစ်ခု ကဲ့သို့ ဝင်ရောက်လာသည်။ သူ၏မျက်လုံးများမှာ ရဲရဲနီလျက် လူသတ်လိုသည့်အငွေ့အသက်များကလည်း ဖြာထွက်နေလေသည်။ သူ၏နောက်ကျောဘက်ရှိ တောင်ပံတစ်စုံကိုလည်း မြင်ရနိုင်ပြီး မယုံနိုင်လောက်သောအမြန်နှုန်းဖြင့် ပျံသန်းလာသည်။

နဝမအကြိမ်မြောက် ဒီရေစီးကြောင်း၏ စွမ်းအားများနှင့်ပေါင်းလိုက်သည့်အခါ ချီစုစည်းမှုအဆင့်တွင်ရှိသော မည်သူ့ထက်မဆို သူက လျင်မြန်စွာ ရွေ့လျားနိုင်လေသည်။ ထို့ကြောင့် စုန့်ချွဲ၏ မန္တန်အစီအရင်ဆီသို့ ရောက်ဖို့ရန် အချိန်ခဏသာ ကြာလိုက်လေသည်။

ချက်ချင်းနီးပါး ပိုင်ရှောင်ချန်းထံမှ မယုံကြည်နိုင်လောက်သော ဖိအားများ ထွက်ပေါ်လာရာ ဝိညာဥ်စွယ်၏ မျက်လုံးအိမ်များ ကျဥ်းမြောင်းသွားသည်။ သူသည် သူ၏တာအိုအခြေခိုင်မာခြင်းအဆင့်အား မတည်မငြိမ်ဖြစ်မည်ကို စိုးရိမ်လျက် အေးစက်စက်ချောင်းဟန့်ကာ နောက်ဆုတ်သွားလေသည်။

ရှန်ကွမ်းထျန်ယုံမှာ ဝိညာဥ်စွယ်ထက်ပင်အဆင့်နိမ့်ပြီး သူထံ၌ ငါးကြိမ်မြောက်ဒီရေစီးကြောင်း၏စွမ်းအားသာရှိလေသည်။ ထို့ကြောင့် ခါးသက်စွာရယ်မောလျက် တွန့်ဆုတ်စွာဖြင့်နောက်ဆုတ်ရုံမှလွဲ၍ ရွေးချယ်စရာမရှိပေ။

ပိုင်ရှောင်ချန်းက အရှိန်တညီးညီး ေတာက်ပနေသော နေမင်းကဲ့သို့ ချဥ်းကပ်နေသောအခါ ရှန်ကွမ်းထျန်ယုံမှာ မြေစီးကြောင်းအခြေခိုင်မာခြင်းအထွတ်အထိပ်အဆင့်၏ သဘာဝကျသော ဖိအားကြောင့် သူ၏ကိုယ်မှာ တုန်လှုပ်နေသည်ကိုခံစားမိလိုက်သည်။

“စုန့်ချွဲ…” ပိုင်ရှောင်ချန်းက ဟိန်းဟောက်လိုက်သည်။ မန္တန်အစီအရင်၏အတွင်းတွင် စုန့်ချွဲမှာတုန်ခါသွားသော်လည်း သူ့ မျက်လုံးများအား ဖွင့်၍မရပေ။ သူက ကျရောက်အံ့ဆဲဆဲ အန္တရာယ်ကိုခံစားမိလိုက်ပြီး သူ၏နှလုံးသားမှာ စတင်၍တဒုန်းဒုန်းခုန်သွားလေသည်။ သူက ရူးသွပ်စွာြဖင့် သူ၏ဒီရေစီးကြောင်းကို တတ်နိုင်သမျှ မြန်မြန်ပြီးမြောက်အောင် ကြိုးစားလေတော့သည်။

သို့သော် ပိုင်ရှောင်ချန်း၏အသံမှာ ကောင်းကင်ဘုံမှမိုးကြိုးပစ်သံနှင့် တူညီနေလေသည်။ ထိုအသံမှာ မန္တန်အစီအရင်၏အပြင်ဘက်နားမှ ဝင်လာသောအခါ အရာအားလုံးမှာ တုန်ခါသွားလေသည်။ ထို့နောက် သူက ခြေထောက်ကို မြှောက်ကာ မန္တန်အစီအရင်ကို နင်းခြေလိုက်လေသည်။

မြေပြင်မှာ တုန်ခါသွားပြီး မန္တန်အစီအရင်၏တစ်ဝက်ကျော်ကျော် ကွဲအက်သွားလေသည်။ ဘေးဘက်ရှိ ရှန်ကွမ်းထျန်ယုံ၏နှလုံးသားမှာ တဒုန်းဒုန်းခုန်နေပြီး ဝိညာဥ်စွယ်မှာလည်း သူ၏တိုက်ခိုက်လိုနေသည့်စိတ်ဆန္ဒကို ဖိနှိပ်ထားနိုင်ရန် တော်တော်ကိုကြိုးစားလိုက်ရ၏။

“မင်း…. ငါ့ရဲ့နဝမအကြိမ်မြောက် ဒီရေစီးကြောင်းကိုဖြတ်တောက်ဖို့ကြိုးစားခဲ့တာကို စဥ်းစားကြည့်ဦး။ ငါက မင်းကို အောင်မြင်အောင်လုပ်ခွင့်ပေးမယ်လို့များ ထင်နေလား” သူကညာဘက်လက်ကို မြှောက်လိုက်ပြီး သူ၏အပြင်အား ထွက်ပေါ်လာကာ ရွှေရောင်အလင်းများလက်လာလေသည်။ သူ့ထာဝရရွှေအရေပြား၏စွမ်းအားများအား ထုတ်ဖော်လိုက်ကာ လက်သီးဖြင့်တစ်ချက်ထိုးချလိုက်လေသည်။

မန္တန်အစီအရင်မှာတုန်ခါသွားပြီး ရှင်းရှင်းလင်းလင်းကွဲကြေလုဆဲဆဲ ဖြစ်သွားလေသည်။ ပိုင်ရှောင်ချန်းကနောက်ခြေတလှမ်းထပ်လှမ်းကာ နောက်ထပ်လက်သီးဖြင့်တစ်ချက်ထိုးလေသည်။ ထို့နောက်တွင် နောက်တစ်ချက်…ထို့နောက်….နောက်တစ်ချက်။

လက်သီးလေးချက်လုံးမှာ သူ၏ထာဝရရွှေအရေပြားစွမ်းအားအပြည့်ဖြင့်အားဖြည့်ထားလေသည်။ လက်သီးချက်တိုင်းမှာ လူသားဘဝ၏ပထမဆုံးအတားအဆီးကို ကျော်ဖြတ်နိုင်သည့် စွမ်းအားများနှင့် ပြည့်နေသည်။ ထို့ပြင် ပိုင်ရှောင်ချန်း၏ ပြင်းထန်သောအမျက်ဒေါသတို့ ပါဝင်နေသည်။ ထိုကဲ့သို့ လက်သီးလေးချက်ထိုးလိုက်ပြီးနောက် စုန့်ချွဲကို ကာကွယ်ပေးနေသည့် မန္တန်အစီအရင်မှာ ပြိုလဲသွားလေသည်။

နောက်ဆုံး စုန့်ချွဲမှာ ကြွက်သားများပင် မလှုပ်နိုင်ဘဲ တင်ပျဥ်ခွေပြီး တရားထိုင်နေသည်ကို မြင်ရလေသည်။

ပိုင်ရှောင်ချန်းက ရပ်တန့်ခြင်းမရှိပေ။ သူက ခြေလှမ်းကျဲကျဲဖြင့်ရှေ့ဆက်တိုးကာ အကျီလက်ကိုဝှေ့ယမ်းလိုက်ပြီး ခရမ်းရောင်ချီများအား ထုတ်ဖော်လိုက်ရာ ကြီးမားသော ခရမ်းရောင်ချီဒယ်စောက်အိုးပုံပေါ်လာသည်။ ထိုဒယ်စောက်အိုးမှာလုံးဝနီးပါး လူပုံသဏ္ဍာန်ဖြစ်နေကာ ထိုအရာ၏မျက်နှာပြင်တွင်လည်း မှော်သင်္ကေတများ၊ ငှက်များနှင့်သားရဲများပုံစံေတွ ဖုံးအုပ်နေသည်။ ပိုင်ရှောင်ချန်း၏ထိန်းချုပ်မှုအောက်တွင် မှော်သင်္ကေတများမှာ ဒယ်စောက်အိုး၏ပတ်လည်တွင်စတင် လှည့်ပတ်လာပြီး ငှက်များနှင့် သားရဲများကလည်း အသက်ဝင်နေသကဲ့သို့ စတင်လှုပ်ရှားလာကြသည်။ တချိန်တည်းမှာပင်……။

ခရမ်းရောင်ချီဒယ်စောက်အိုးမှာ စုန့်ချွဲကို တိုက်ခိုက်ရန် အောက်သို့ကျလာလေသည်။

“မင်းက ကိုယ်ကိုယ်တိုင် နဝမအကြိမ်မြောက် ဒီရေစီးကြောင်းကို အဆုံးမသတ်နိုင်မှတော့ ငါကကူညီပေးရမှာပေါ့” ကြီးမားသောတခဲနက်မြည်ဟည်းသံကြီးမှာ ပဲ့တင်ထပ်သွားပြီး ခရမ်းရောင်ဒယ်စောက်အိုးမှာ သောင်းနှင့်ချီသောကီလိုဂရမ်ရှိသည့် အားဖြင့် အောက်သို့ဆင်းသက်လာသည်။

မြည်ဟည်းသံများ ပဲ့တင်ထပ်သွားပြီး စုန့်ချွဲ၏ကိုယ်ပိုင်အကာအကွယ်များမှာ သူ့အားကာကွယ်ရန်ကြိုးပမ်းကြလေသည်။ ဒယ်စောက်အိုးကြီးက သူ၏အကာအကွယ်များနှင့် တိုက်မိသွားသောအခါ ထိုအကာအကွယ်များ ပြိုကွဲသွားလေသည်။ ထို့နောက် မှော်ပစ္စည်းများအတန်းလိုက်ထွက်လာသော်လည်း အလွယ်တကူပင်ကျိုးကျေသွားလေသည်။ နောက်ဆုံးတွင် ဒယ်စောက်အိုးကြီးမှာ စုန့်ချွဲကို တိုက်မိသွားလေသည်။

သူ၏ပါးစပ်မှ သွေးပျက်ခမန်း နာကျင်စွာ အော်ဟစ်သံ ပဲ့တင်ထွက်ပေါ်လာပြီး သူ၏မျက်လုံးများမှာလည်း ပွင့်လာသည်။ သူက နဝမအကြိမ်မြောက် ဒီရေစီးကြောင်းကိုပြီးလုဆဲဆဲဖြစ်နေခဲ့သော်လည်း ပိုင်ရှောင်ချန်း၏ဝင်ရောက်နှောင့်ယှက်မှုကြောင့် ပျက်စီးသွားလေသည်။ သူ၏ဒန်တျန်ထဲရှိ တစိတ်တပိုင်းပြီးမြောက်ထားသော နဝမအကြိမ်မြောက်တာအိုအခြေခိုင်မာခြင်းအဆင့်မှာ အပိုင်းပိုင်း ကွဲကြေသွားလေသည်။

တချိန်တည်းမှာပင် နဝမအကြိမ်မြောက် ဒီရေစီးကြောင်းနှင့်အတူ ယူဆောင်လာသည့် မြေစီးကြောင်းစွမ်းအင်မှာ စုန့်ချွဲထံမှ စတင်၍စီးထွက်သွားပြီး လျင်မြန်စွာပျံ့နှံ့သွားကာ ပတ်ဝန်းကျင်ကမ္ဘာနှင့်ပြန်ပေါင်းသွားလေသည်။

သို့သော် တစ်စုံတစ်ခုသော အကြောင်းအရာကြောင့်ထင် စုန့်ချွဲက လွတ်ထွက်သွားသော မြေစီးကြောင်းစွမ်းအင်များကို အလင်းတန်းတစ်ခုအလား တိမ်တိုက်များအတွင်းသို့ အားအင်သုံး ပစ်လွှင့်လိုက်ရာ ကမ္ဘာကြီးဆီသို့ ယခင်ကထက်ပိုမိုမြန်ဆန်စွာ ပြန်ပေါင်းသွားသည်။

တချိန်တည်းမှာပင် သူ၏အထက်ရှိ ရေဝဲငယ်ကိုးခုမှာ ရပ်တန့်သွားရုံမျှမက အမှန်တကယ်ပင် အစိတ်စိတ်အမွှာမွှာ ကွဲဲကြေသွားလေသည်။

မြေခဓားကမ္ဘာတစ်လျှောက်ရှိ ကျန်ရှိနေသောဂိုဏ်းသားများမှာ လုံးလုံးလျားလျား ထိတ်လန့်တုန်လှုပ်သွားပြီး အံ့အားသင့်လျက် စတင်အော်ဟစ်ကြလေသည်။

“စုန့်ချွဲ….ကျရှုံးသွားပြီ”

“ပိုင်ရှောင်ချန်းက သူ့ရဲ့နဝမအကြိမ်မြောက်ဒီရေစီးကြောင်းကို ဝင်နှောင့်ယှက်ဖျက်စီးလိုက်တာကွ”

“ဘုရားရေ…သူ့ကိုသတ်လိုက်ရင်တောင် ပိုင်ရှောင်ချန်းကို ဒီလောက်စိတ်တိုမှာမဟုတ်ဘူး။ အခုတော့ သူ့ဒေါသတွေက ထိပ်ဆုံးရောက်နေလောက်ပြီ။ ပိုင်ရှောင်ချန်းက သူ့ရဲ့တာအိုကို ဖျက်စီးလိုက်တာကွ”

လူတိုင်းမှာ ထိတ်လန့်တုန်လှုပ်နေကြပြီး ရူးသွပ်မတတ်ဖြစ်နေကြသည်။ ရွှီရှောင်ရှန်းက အတန်ငယ်ဝေးသောနေရာသို့အလျင်အမြန် ပြေးသွားလိုက်သည်။ သူက ဖြစ်ပျက်နေသည်ကိုမြင်လိုက်စဥ်မှာပင် ထိုနေရာ၌ရပ်လိုက်ကာ အနားသို့မကပ်ရဲတော့ပေ။

အတန်ငယ်ဝေးသောတခြားနေရာတစ်ခုတွင် ကျုံးတာအိုမှာ သူ၏ပါးစပ်မှသွေးများကိုသုတ်လိုက်ပြီး သူ၏ကျင့်ကြံခြင်းအခြေခံကို လည်ပတ်စေလိုက်သည်။ သူက ဖြစ်ပျက်သမျှကို အာရုံခံမိသွားပြီး သူ၏မျက်လုံးများတွင် ကြောက်လန့်ခြင်းများထင်ဟပ်သွားသည်။

“ဒီပိုင်ရှောင်ချန်းကို…မနိုင်တော့ဘူး”

ဝိညာဥ်စွယ်မှာ လက်သီးကို တင်းကျပ်စွာဆုပ်လိုက်လေသည်။ သူက ခံစားချက်ကြောင့်အလွယ်တကူစိတ်ထိခိုက်သူမဟုတ်သော်လည်း ယခုအချိန်တွင် မရေမတွက်နိုင်သော၊အနက် အဓိပ္ပါယ် ဖွင့်ဆို၍မရသော ခံစားချက်များဖြင့် ပြည့်နှက်နေလေသည်။

ရှန်ကွမ်းထျန်ယုံမှာ ပင့်သက်ရှိုက်လျက်ကျန်ခဲ့လေသည်။ သူ၏နှလုံးသားကို အဆိပ်ပြင်းသောမြွေပွေးတစ်ကောင်က ကိုက်သွားသကဲ့သို့ခံစားလိုက်ရပြီး ရူးသွပ်မှုနှင့်မနာလိုမှုများပြည့်နှက်သွားလေသည်။ “ပိုင်ရှောင်ချန်း…မင်းသာမရှိခဲ့ရင် အဲ့ဒီအရာအားလုံးဟာ ငါ…ရှန်ကွမ်းထျန်ယုံအတွက်ပဲဖြစ်မှာ”

လူတိုင်းမှာတုန်လှုပ်နေကြပြီး စုန့်ချွဲမှာ လဲကျနေကာ သွေးများလည်းအန်ထွက်နေသည်။ သူ၏မျက်လုံးများမှာနီရဲနေပြီး ဆံပင်များမှာလည်း ဖရိုဖရဲဖြစ်နေလေသည်။ သူက ပိုင်ရှောင်ချန်းအားအရှင်လတ်လတ်ဝါးစားချင်သည့်ပုံပေါက်နေပြီး စက်ဆုပ်နေသောအသံဖြင့် အော်ဟစ်လိုက်သည်။

“ပိုင်ရှောင်ချန်း”

သူ၏နဝမအကြိမ်မြောက်ဒီရေစီးကြောင်းမှာ ကျရှုံးသွားခဲ့ပြီး ရှစ်ကြိမ်မြောက်ဒီရေစီးကြောင်းသာကျန်ရှိခဲ့လေသည်။ တာအိုအခြေခံမှာတည်ငြိမ်လာသည်နှင့်အမျှ သူ၏ကျင့်ကြံခြင်းအခြေခံမှာ အခြေခိုင်မာခြင်းအဆင့်သို့ရောက်လာလေသည်။ သူကစွန့်လွှတ်ခဲ့ရသော်လည်း သူ၏စွမ်းအားမှာ ယခင်ကထက် တိုးလာလေသည်။

ပိုင်ရှောင်ချန်း၏မျက်လုံးများမှာ အရောင်တောက်သွားပြီး အလျင်အမြန်လှုပ်ရှားလိုက်သောအခါမှုန်ဝါးဝါးသာမြင်လိုက်ရပြီး ခဏအကြာတွင် စုန့်ချွဲ၏အရှေ့၌ပြန်ပေါ်လာလေသည်။ ထို့နောက်သူ၏ လက်ချောင်းနှစ်ချောင်းကို အလျင်အမြန်လှုပ်ရှားလိုက်သည်။

လည်မျိုဖမ်းဆုပ်ကွက်…။

လက်ချောင်းများ စုန့်ချွဲအပေါ်မကျရောက်သေးမီ စုန့်ချွဲက လက်နှစ်ဖက်နှင့် မန္တန်လက်ကွက်ဖော်လိုက်လေသည်။ ထို့နောက် သူ၏ပါးစပ်ကိုဖွင့်ကာ လက်သည်းခွံအရွယ်လောက်ရှိသွေးလုံးလေးတစ်ခုကို ထွေးထုတ်လိုက်လေသည်။

မြေစီးကြောင်းအခြေခိုင်မာခြင်းအဆင့်၏ အထွတ်အထိပ်အဆင့်ကိုရောက်နေသော်လည်း ပိုင်ရှောင်ချန်းက ပြင်းထန်သောအန္တရာယ်တစ်ခုကို ခံစားမိလိုက်သည်။

ထိုသွေးလုံးထဲရှိ စိတ်စွမ်းအင်များမှာ ကြောက်မက်ဖွယ်ကောင်းနေသည်။

ပိုင်ရှောင်ချန်းမှာ ထိုအန္တရာယ်ကို သေချာမသိသော်လည်း ရင်းနှီးနေသည့်အလား ခံစားလိုက်ရသည်။

သူ၏လက်ချောင်းနှစ်ချောင်းမှာ သွေးလုံးနှင့်ထိမိသွားသောအခါ နားပင်းမတတ် ပေါက်ကွဲသံထွက်ပေါ်လာပြီး ပြင်းထန်သောအားလှိုင်းတစ်ခုက နေရာအနှံ ့အပြားသို့ လွင့်ပျံသွားသည်။

ပြင်းထန်သော အားလှိုင်းကြောင့် ဝိညာဥ်စွယ်နှင့် ရှန်ကွမ်းထျန်ယုံမှာ နောက်သို့ လွင့်သွားပြီး အောက်ရှိမြေကြီးများမှာလည်း ကွဲအက်ကုန်သည်။

ပိုင်ရှောင်ချန်း၏ပါးစပ်ထောင့်မှ သွေးများစီးကျလာကာ နောက်သို့ခြေလှမ်းအနည်းငယ်ဆုတ်သွားပြီး ထိတ်လန့်အံ့သြကာ စိတ်ရှုပ်သွားလေသည်။ သူ့တွင် ထာဝရရွှေအရေပြားရှိသော်လည်း သွေးလုံးမှာ သူ့အားအမှန်တကယ်ထိခိုက်စေသည်။ ထိခိုက်မှုမှာမကြီးမားသော်လည်း မည်သို့ပင်ဆိုစေ သူ့အားထိတ်လန့်တုန်လှုပ်သွားစေသည်။

စောစောက သူတွေ့ကြုံလိုက်ရသည့် ရင်းနှီးသောခံစားချက်မှာ သွေးလုံးနှင့် ထိမိပြီးနောက် ပို၍ပြင်းထန်လာလေသည်။ သို့တိုင် မည်သည့်အရာဖြစ်သည်ကို သူစဥ်းစား၍မရချေ။

“ဘာလို့ ဒါကို အရမ်းရင်းနှီးနေသလိုခံစားရတာပါလိမ့်။ အဲ့သွေးလုံးက ဘာမို့လို့လဲ ”

ပိုင်ရှောင်ချန်းသည် သွေးများထွက်ကျေနပြီး ရင်ဘက်မှာ လှိုက်ဖိုနေကာ ကြိုးပြတ်နေသောစွန်တစ်ခုကဲ့သို့ လွင့်ထွက်သွားသည့် စုန့်ချွဲကိုကြည့်လိုက်သည်။ သူ၏ထိခိုက်ဒဏ်ရာက ပိုင်ရှောင်ချန်းထက် ဆိုးဝါးသည်မှာ သိသာထင်ရှားသည်။

သူ၏ နဝမအကြိမ်မြောက်ဒီရေစီးကြောင်းမှာ အလယ်တွင်ဝင်ရောက်နှောင့်ယှက်ခံလိုက်ရသောကြောင့် သူ၏ကျင့်ကြံခြင်းအခြေခံမှာ တည်ငြိမ်အောင်လုပ်နေဆဲဖြစ်သည်။ သူက ပိုင်ရှောင်ချန်းထက် အစွမ်းနိမ့်ပြီး သွေးလုံးကြောင့် တန်ပြန်ထိခိုက်ဒဏ်ရာကိုလည်းခံစားလိုက်ရသည်။

သို့တိုင်အောင် သူက ပိုင်ရှောင်ချန်းအား ရက်စက်ကြမ်းကြုတ်စွာ ကြည့်နေသည်။

ပိုင်ရှောင်ချန်းက စုန့်ချွဲ လှည့်၍ထွက်ပြေးသွားသောအခါ နောက်ထပ်တိုက်လိုက်သည်။ စုန့်ချွဲက ထွက်ပြေးနေသော်လည်း သူ၏အဖိုးတန်သော တည်နေရာရွေ့ပြောင်းခြင်းကျောက်စိမ်းထုတ်ကာ ချိုးလိုက်သည်။ ခဏအကြာတွင် တည်နေရာရွေ့ပြောင်းခြင်းစွမ်းအားမှာ သူ့အားဆွဲခေါ်သွားကာ ပျောက်ကွယ်သွားလေသည်။

သူပြန်ပေါ်လာသည့်အခါ ကီလိုမီတာရာချီ၍ဝေးသောနေရာသို့ရောက်နေပြီး သူက အရှိန်တင်၍ဆက်ပြေးလေသည်။

“သူသတိမထားမိဖို့ပဲ ငါမျှော်လင့်တယ်” စုန့်ချွဲမှာအံကိုကြိတ်လျက် တီးတိုးရေရွတ်လိုက်သည်။ “သေစမ်း…။ သူက အရမ်းမြန်လွန်းတယ်။ ခြေတစ်လှမ်းပဲ လိုတော့တာ… ခြေတစ်လှမ်းပဲ…..။ အေး..ကောင်းတယ်။ဒါကသိပ်အရေးမကြီးဘူး။ ငါက မြေစီးကြောင်းအခြေခိုင်မာခြင်းရဲ့ အထွတ်အထိပ်အဆင့်ကို မရောက်ခဲ့ရင်တောင်မှ ပိုင်ရှောင်ချန်းကို ကျော်တက်နိုင်သေးတာပဲ။ ငါသာ အောင်မြင်သွားတာနဲ့…သူတော့အသေပဲ။”
ထိုသို့ပြောပြီးနောက် အလင်းစက်ကိုးစက် တလက်လက် တောက်ပနေသော သူ၏ဖုန်းရွှေသံလိုက်ကိုထုတ်လိုက်သည်။ ထိုအလင်းစက်များမှာ မြေခဓားကမ္ဘာတစ်လျှောက်လုံး သူထုတ်ဖော်ခဲ့သည့် စွမ်းအင်အမှတ်အသားများဖြစ်လေသည်။


Comment

Leave a Reply

Options

not work with dark mode
Reset