” ကျနော်နားလည်သွားပြီ။ ဒီ သုံးသပ်ချက်အတိုင်းသာဆိုရင် ကျင့်သိုမင်ကိုလည်း ခုန်းတောက်လိုပဲ သတ်မှတ်လို့ရတယ်။ သူနဲ့ ကျနော်ရဲ့ကြားမှာ ပဋိပက္ခတွေ ဖြစ်စရာအကြောင်းမရှိလို့ သူ့ကို မိတ်ဆွေလိုမျိုး ဆက်ဆံရုံပဲ ” ဝမ်ပေါင်လဲ့က ချက်ချင်းပင်ဆိုလိုက်၏။ ထို့ကြောင့် သူ၏ စကားသံမှာ အသံလွှင့်လက်စွပ်ထဲမှ ထွက်ပေါ်လာသည်။ ထိုအခါ လင်းယုံမှာ သူ၏ လက်ဖက်ရည်ခွက်ကို မြှောက်ကာ တစ်ငုံခန့် မော့သောက်လိုက်ပြီး ပြုံးကာ ဆိုလိုက်၏။
” မှန်တယ်။ လသုံးစင်း မဟာမိတ်အဖွဲ့က နိုင်ငံရေးအပိုင်းမှာ ရှုပ်ထွေးတဲ့ အဖွဲ့အစည်းတစ်ခုဆိုတာ မင်း သိထားဖို့လိုတယ်။ အဲဒီအဖွဲ့အစည်းထဲမှာကို အဖွဲ့အစည်းတစ်ခုလုံးကို ထိန်းချုပ်နိုင်ဖို့အတွက် ကြိုးစားနေကြတဲ့ အဖွဲ့ခွဲတွေ အများကြီးရှိတယ်။ ကျင့်သိုမင်တစ်ယောက်တည်း မဟုတ်ဘူး။ အနာဂတ်မှာ အကြိတ်အနယ် ယှဉ်ပြိုင်မှုတွေ ပေါ်ပေါက်လာမှာသေချာတယ် ”
” တာအိုရောင်းရင်းကျင့် ကျင့်သိုမင်ကို လသုံးစင်းမဟာမိတ်အဖွဲ့အစည်းရဲ့ အမွေခံအဖြစ် အသိအမှတ် ပြုထားပေမယ့် သူက ပြီးခဲ့တဲ့ သားရဲစစ်ပွဲထဲမှာ ဒဏ်ရာ အပြင်းအထန်ရခဲ့။ အခုထိအောင် သူ့ဒဏ်ရာတွေရဲ့ ဘေးထွက်ဆိုးကျိုးဒဏ်တွေကို ခံစားနေရတုန်းပဲ။ ကြည့်ရတာ သူက အမြတေအဆင့်ကနေ ဖောက်ထွက်ပြီးတော့ ယွမ်ယင်အဆင့်ကို တက်လှမ်းနိုင်တော့မယ့်ပုံ မပေါ်ဘူးကွ။ အဲ့တာမလို့ လသုံးစင်းမဟာမိတ်အဖွဲ့ရဲ့ ကံကြမ္မာက ပြည်ထောင်စုကြီးရဲ့ ကံကြမ္မာအပေါ် မူတည်နေသလို ဖြစ်နေပြီ ”
” ငွေကြေးအင်အားတောင့်တင်းပြီးတော့ အရင်းအနှီး အလုံအလောက်ရှိတဲ့ အဖွဲ့အစည်းတွေကို မောင်ပိုင်စီးနိုင်ဖို့ ကြိုးစားနေတဲ့ တခြားနိုင်ငံရေးအဖွဲ့အစည်းတွေနဲ့ ယှဉ်လိုက်ရင် ပြည်ထောင်စုကြီးက သူ့ရဲ့ ပုံရိပ်နဲ့ ဂုဏ်သိက္ခာတွေကို ထိန်းသိမ်းဖို့ လိုသေးတယ်လေ။ လသုံးစင်းမဟာမိတ်အဖွဲ့က မင်းကို အင်္ဂါဂြိုဟ်နယ်မြေအသစ် တည်ဆောက်တဲ့နေရာမှာ ကူညီပေးဖို့ အင်တိုက်အားတိုက် ကြိုးပမ်းတာ ဘာကြောင့်လို့ မင်းထင်လဲ။ သူတို့က မင်းနဲ့ ခင်မင်ရင်းနှီးတဲ့ဆက်ဆံရေးတစ်ခုရအောင် လုပ်နေရုံတင်မဟုတ်ဘူး။ အင်္ဂါဂြိုဟ်အစိုးရအဖွဲ့စည်းနဲ့ ပြည်ထောင်စုကြီးကိုပါ ဖားနေတာကွ ”
” တာအိုရောင်းရင်းကျင့်က စီးပွားရေးသမားတစ်ယောက်ဆိုတော့ သူက ငါတို့တွေနဲ့ မတူဘူး… ” လင်းယုံ၏ ပြောစကားများကိုကြည့်လျှင် သူသည် နိုင်ငံရေးအင်အားစုအသီးသီးအား အသေးစိတ် ခွဲခြမ်းစိတ်ဖြာလေ့လာ၍ နားလည်အောင်လုပ်ထားသည်ဖြစ်ကြောင်း သိနိုင်ပေသည်။ သူ၏ စကားများမှာ အဖိုးမဖြတ်နိုင်လောက်အောင် တန်ဖိုးကြီးမားနေ၏။ ပြည်ထောင်စုကြီး တစ်ခုလုံးထဲတွင် သူနှင့် ရာထူးအဆင့်အတန်းတူသောလူများသာလျှင် သူ့လိုမျိုး အခြေအနေတစ်ခုကို နားလည်သုံးသပ်နိုင်စွမ်းရှိသည့် အရည်အချင်းကို ပိုင်ဆိုင်ထားမည်ဖြစ်သည်။
သူ၏ ပြောစကားများကိုကြည့်လျှင် လင်းယုံမှာ မည်သည့်အချက်အလက်ကိုမှ ထိမ်ချန်နေခြင်းမရှိဘဲ ဝမ်ပေါင်လဲ့အား အကုန်ပြောပြနေခြင်းဖြစ်ကြောင်း သိနိုင်ပေသည်။ သူသည် ဝမ်ပေါင်လဲ့၏ နေရာ၍ ဝင်ရောက်ခံစားကာ။ သူ၏ အနာဂတ်အတွက် အစီအစဉ်များ ချမှတ်ပေးနေသည်ဖြစ်သည်။
ဝမ်ပေါင်လဲ့မှာ သူပြောခဲ့သမျှ စကားအားလုံးကို နားထောင်လိုက်ပြီးနောက် အသက်ပြင်းပြင်းရှူလိုက်ပြီး သူ၏ မျက်ဝန်းများထဲတွင် ထူးဆန်းသော အလင်းရောင်တစ်ခု တောက်ပလာ၏။ သူသည် သူနှင့် ကျင့်သိုမင်တို့၏ ကြားရှိ သဘောတူညီချက်ကို ပြန်၍သတိရသွားခြင်းဖြစ်သည်။ ၎င်းမှာ သူနှင့် လသုံးစင်းမဟာမိတ်အဖွဲ့အား ကိုယ်စားပြုသည့် ကျင့်သိုမင်တို့၏ ကြားမှ သဘောတူညီချက်ဖြစ်သည်။
သူသည် ထိုအကြောင်းကို တွေးတောရင်း ကျင့်သိုမင်၏ စကားများ၏နောက်ကွယ်တွင် ပိုမိုလေးနက်သော အဓိပ္ပါယ်တစ်ခု ကိန်းအောင်းနေသည်ဖြစ်ကြောင်း သိလိုက်ရ၏။
” လသုံးစင်းမဟာမိတ်အဖွဲ့ကို လျှော့တွက်လို့တော့မရဘူး။ တာအိုရောင်းရင်းကျင့်က ယွမ်ယင်အဆင့်ကို ဖောက်ထွက်နိုင်ဖို့ အခွင့်အလမ်း မရှိတော့တဲ့အပြင် သူ့ရဲ့ အဖွဲ့အစည်းတစ်ခုလုံးက အဖွဲ့ကွဲ မူဝါဒတွေကြောင့် ပြဿနာတက်နေရပေမဲ့ တစ်ယောက်ယောက်ကသာ ဖောက်ထွက်သွားနိုင်ခဲ့မယ်ဆိုရင် အခြေအနေတွေက ပြောင်းလဲသွားမှာ။ ပြီးတော့ တာအိုရောင်းရင်းကျင့်ကာ တီထွင်ကြံဆဉာဏ် အရမ်းကောင်းတဲ့လူတစ်ယောက်။ သူက ပြည်ထောင်စုကြီးနဲ့ပူးပေါင်းပြီးတော့ ဝိညာဉ်ဆန့်ကျင်ဗုံးတစ်လုံးကို တီထွင်နေတာ။ ထင်မြင်ယူဆချက်တွေအရဆိုရင် အဲဒီဗုံးကြီးသာ အောင်မြင်သွားမယ်ဆိုရင် သူ့ရဲ့ စွမ်းအားက အဆမတန် ကြီးမားနေမှာ အသေအချာပဲ။ ယွမ်ယင်အဆင့်ကျင့်ကြံသူတစ်ယောက်တောင် အဲဒီ ဝိညာဉ်ဆန့်ကျင်ဗုံးနဲ့ ယှဉ်လိုက်မယ်ဆိုရင် ဘာအဆင့်မှ ရှိမှာမဟုတ်တော့ဘူး ”
” နိုင်ငံရေးအင်အားစုတွေက အဲ့အကြောင်းနဲ့ ပတ်သက်ပြီးတော့ စုံစမ်းစစ်ဆေးမှုတွေ ပြုလုပ်ခဲ့ပေမယ့် အကျိုးထူးမလာခဲ့ဘူး။ အဲဒီဝိညာဉ်ဗုံးကို စမ်းသပ်ခဲ့တဲ့ အကြိမ်တိုင်းမှာ အောင်မြင်ခဲ့တယ်ဆိုတဲ့ ကောလာဟလတွေလည်း ရှိနေတာ ”
” ဒီအချက်တွေအားလုံးကို မင်းကိုယ်တိုင် သိရှိနားလည်ထားဖို့ လိုအပ်တယ်။ ကျင့်သိုမင်က ပြည်ထောင်စုကြီးရဲ့ နိုင်ငံရေးကိစ္စတွေနဲ့ ပတ်သက်လာရင် ဘက်မလိုက်ပဲ နေရမယ်ဆိုတဲ့အချက်ကို မင်း နားလည်ထားဖို့လိုတယ်။ သူက မိတ်ဆွေလိုနေတာမဟုတ်ဘူး… မဟာမိတ်တစ်ယောက်လိုနေတာ ” လင်းယုံမှာ အလေးအနက်ထား၍ သတိပေးလိုက်၏။ သူသည် စကားဆုံးသွားပြီးနောက် ဝမ်ပေါင်လဲ့၏ အသက်ရှူသံများ ပို၍မြန်ဆန်လာသည်ကို ကြားမိသွားသည့်ပုံပင်။ ထို့ကြောင့် သူသည် သူ၏လက်ဖက်ရည်ခွက်အား အောက်သို့ပြန်ချလိုက်ပြီး သူ၏ မျက်ဝန်းများထဲ၌ သဘောကျနှစ်သက်နေသည့် အရိပ်အယောင်များ တောက်ပသွားတော့သည်။ သို့သော် ဝမ်ပေါင်လဲ့မှာမူ ၎င်းတို့ကို မမြင်လိုက်ရပေ။ ထို့နောက် သူသည် တစ်ခဏမျှ တွေးတောလိုက်ပြီးနောက် လေသံတိုးတိုးနှင့် ဆိုလိုက်၏။
” ပေါင်လဲ့။ နိုင်ငံရေးတွေက အရမ်းကြီးရှုပ်ထွေးနေတယ်လို့ မင်း တွေးနေလား။ မင်း အဆုံးမရှိလောက်အောင် နက်ရှိုင်းတဲ့ ရေကန်ထဲကို ဆင်းနေရသလိုမျိုး ခံစားနေရလား ”
ထိုအခါ ဝမ်ပေါင်လဲ့မှာ ခေါင်းမော့လာပြီး သူ၏ အသံလွှင့်လက်စွပ်အား ငေးကြည့်နေလိုက်၏။ ထို့နောက် တစ်ခဏမျှ နှုတ်ဆိတ်နေလိုက်ပြီးမှ ခေါင်းညိတ်ပြလိုက်သည်။
လင်းယုံမှာ ဝမ်ပေါင်လဲ့ ခေါင်းညိတ်ပြလိုက်သည်ကို မမြင်ရပါသော်လည်း စိတ်ကူးထဲ၌ ပုံဖော်ထားပြီးသား ဖြစ်နေ၏။ ထို့ကြောင့် သူသည် လေသံတိုးတိုးနှင့် ထပ်ပြောလိုက်ပြန်သည်။
” ရေကန်တစ်ကန်က ဘယ်လောက်ပဲ ကြည်လင်နေတဲ့ပုံစံ ပေါက်နေပါစေ ရေကန်ရဲ့ အလယ်ကို ပထမဆုံးအကြိမ်အဖြစ် ရောက်သွားတဲ့အချိန်မှာ အဲဒီရေကန်ကြီးက အဆုံးမရှိလောက်အောင် နက်ရှိုင်းနေတယ်လို့ ခံစားလိုက်ရမှာပဲ။ ရေတွေကလည်း နောက်ကျိနေပြီးတော့ လျှို့ဝှက်ချက်တွေနဲ့ ပြည့်နှက်နေသလို ဖြစ်နေမှာ…. ”
” ဒါပေမဲ့ မင်း ရေကန်ပေါ် ပြန်တက်သွားပြီးတော့ အစွန်းနားမှာ ရပ်ပြီး ရေကန်ထဲကို ပြန်ကြည့်လိုက်တဲ့ အချိန်ကျရင် ရေတွေက ကြည်လင်နေတာကို ပြန်မြင်လိုက်ရမှာ။ ရေကန်ရဲ့ အောက်ခြေအထိတောင် လှမ်းမြင်ရင် မြင်နေဦးမှာ ”
” ဘာလို့အဲ့လိုဖြစ်ရတာလဲဆိုတာ သိလား။ မင်း အဖြေကိုသိပါတယ်။ ကိုယ်က ရေထဲကိုရောက်နေတုန်းမှာ ကိုယ့်ရဲ့ အမြင်အာရုံတွေက ဝေဝါးနေတာမလိုပဲ။ ဒါပေမဲ့ အဲ့အချက်ကြောင့် ရေကန်ထဲကနေ အပေါ်ပြန်မတက်ဘဲ နေလို့မဖြစ်ဘူးလေ။ တစ်ရက်ရက်ရောက်လို့ မင်း အဲဒီရေကန်ရဲ့ အစွန်းနားမှာတောင် မဟုတ်ဘဲ ရေကန်ရဲ့ အထက်မှာရှိတဲ့ ကောင်းကင်ယံထဲကနေ အဲဒီရေကန်ကို ငုံ့ကြည့်လိုက်မယ်ဆိုရင် အဲဒီရေတွေက ကြည်လင်နေရုံတင်မဟုတ်ဘဲ…. အဲဒီရေကန်ကြီးတစ်ကန်လုံးက မင်းရဲ့ လက်တစ်ဖဝါးစာ အရွယ်အစားပဲ ရှိတယ်ဆိုတာကို သိလိုက်ရမှာပဲ ”
” မင်း ခပ်လှမ်းလှမ်းကို ထပ်ပြီးတော့ လှမ်းကြည့်လိုက်မယ်ဆိုရင်လည်း အဲဒီရေကန်ထက် အဆပေါင်းများစွာ ပိုကြီးတဲ့ သမုဒ္ဒရာကြီးကို မြင်လိုက်ရမှာ။ မင်း ကောင်းကင်ပေါ်အထိ ပျံတက်သွားပြီးတော့ ခေါင်းမော့ကြည့်လိုက်မယ်ဆိုရင် မင်းရှိနေတဲ့ ကမ္ဘာကြီးထက် ပိုပြီးတော့ ကြီးကျယ်ခမ်းနားတဲ့ စကြဝဠာကြီးကို မြင်လိုက်ရဦးမှာ ”
” ငါ ပွင့်ပွင့်လင်းလင်း ထုတ်ပြောလို့မရတဲ့ အချက်တွေ ရှိတယ် ပေါင်လဲ့။ ငါတို့ လူသားတွေက သမုဒ္ဒရာကြီးထဲက သဲပွင့်တစ်ပွင့်စာလောက်ပဲ ရှိတာပါ… ” လင်းယုံမှာ စကားဆက်ပြောချင်သည့်ပုံ ပေါက်နေပါသော်လည်း မည်သည့်အကြောင်းကြောင့်မှန်းမသိ ဆက်မပြောဘဲ ရပ်တန့်လိုက်၏။ ထို့နောက် သူသည် သူ၏ ကံကြမ္မာကို ထိန်းချုပ်နိုင်စွမ်းမရှိသော လေသံဖြင့် သက်ပြင်းချလိုက်တော့သည်။ ထိုသို့ဖြင့် သူတို့၏ စကားဝိုင်းမှာ အဆုံးသတ်သွား၏။
ထို ဆက်သွယ်မှု ပြီးဆုံးသွားသည့်တိုင်အောင် သူ၏သက်ပြင်းချသံကြီးမှာ ဝမ်ပေါင်လဲ့၏ နားထဲ၌ ပဲ့တင်ထပ်နေဆဲပင်။ သူသည် သူကြားခဲ့ရသည် စကားများကို ပြန်လည်တွေးတောနေရင်း တဖြည်းဖြည်းနှင့် ငြိမ်ကျသွား၏။
” သမုဒ္ဒရာကြီးထဲက သဲတစ်ပွင့်ဆိုပါလား… ” အချိန် အတော်အတန်ကြာပြီးမှ ဝမ်ပေါင်လဲ့မှာ ခေါင်းမော့ကာ ကြယ်ရောင်စုံများဖြင့် လင်းလက်နေသည့် ကောင်းကင်ယံကြီးအား လှမ်းကြည့်လိုက်၏။ သူသည် အချိန်အတော်အတန်ကြာအောင် စိုက်ကြည့်နေလိုက်ပြီးနောက် မျက်လုံးများကို မှိတ်လိုက်၏။ သူသည် သူလက်လှမ်းမမီနိုင်သော အရာများအား ပိုင်ဆိုင်နိုင်ရန် ရူးရူးမိုက်မိုက် ကြိုးစားတတ်သည့် လူတစ်ယောက်မဟုတ်ပေ။ လက်ရှိတွင် သူ အာရုံစိုက်ထားရမည့် အရာမှာ အင်္ဂါဂြိုဟ်နယ်မြေအသစ်သာဖြစ်ကြောင်း သူက သိထား၏။ အနာဂတ်သို့ရောက်မှသာ အနာဂတ်အကြောင်း ဆက်၍ စဉ်းစားမည်ဖြစ်သည်။
ဝမ်ပေါင်လဲ့မှာ ထိုသို့နှလုံးသွင်းလိုက်ပြီး လိုအပ်သော ပြင်ဆင်မှုများကို ဆက်လက် ဆောင်ရွက်နေလိုက်၏။ ထိုသို့ဖြင့် အချိန်များမှာ မျက်စိတစ်မှိတ်အတွင်း ကုန်ဆုံးသွားပြီး ခဏအကြာတွင် ထွက်ခွာရမည့် နေ့ရက်သို့ ရောက်ရှိလာတော့သည်။
ဝမ်ပေါင်လဲ့မှာ ထိုနေ့သို့ မရောက်ခင် တစ်ရက်အလိုတွင် သူ ခန့်အပ်လိုသည့် မြို့တော်ဝန်များ၏ အမည်စာရင်းကို တင်ပြခဲ့၏။ ဘုရင်ခံမှာလည်း တွေဝေတုံ့ဆိုင်းနေခြင်းမရှိဘဲ သူတို့အား ချက်ချင်းပင် လက်ခံပေးလိုက်သည်။ သူ၏ လက်ထောက်မြို့တော်ဝန်များမှာ လီယီ၊ ခုန်းတောက်၊ ကျင့်သိုမင်နှင့် လင်းတျန်ဟောက်တို့ပင် ဖြစ်သည်။
လင်းတျန်ဟောက်မှာ ဝမ်ပေါင်လဲ့နှင့်အတူ နယ်မြေအသစ်ဆီသို့ ထွက်ခွာမည်ဖြစ်ပြီး အခြားသုံးယောက်မှာ နောက်မှ လိုက်လာကြမည်ဖြစ်သည်။ သူတို့မှာ သူတို့၏ သက်ဆိုင်ရာ နိုင်ငံရေးအဖွဲ့အစည်းများက သတိပေးထားသော ပစ္စည်းများကို ပြင်ဆင်ဖို့ အချိန်လိုအပ်သေးသည် ဖြစ်သည်။ ဝမ်ပေါင်လဲ့မှာ သတ်မှတ်ချက်တစ်ခု ချမှတ်ထားခဲ့သည် မဟုတ်ပါလော။ သူတို့မှာ လက်ထောက်မြို့တော်ဝန်ရာထူးအား ရယူပိုင်ဆိုင်လို့ပါက သူတို့ကတိပေးထားသည့် ပစ္စည်းများကို တစ်ပါတည်း ယူဆောင်လာရမည်ဖြစ်သည်။
လီယီနှင့် ခုန်းတောက်တို့မှာ ထိုသဘောတူညီမှုများနှင့် ပတ်သတ်၍ မည်မျှပင် မကျေမချမ်းဖြစ်နေစေကာမူ သူတို့၏ ခံစားချက်များကို မျိုသိပ်ထားရသည်သာ ဖြစ်သည်။ ကျင့်သိုမင်ကမူ ထိုကိစ္စနှင့် ပတ်သက်၍ မည်သည့်ခံစားချက်မှ ရှိမနေခဲ့ပေ။ သူသည် နယ်မြေအသစ်ဆီသို့ သွားရသည်ဖြစ်စေ မသွားရသည်ဖြစ်စေ ဂရုစိုက်နေခြင်းမရှိသလို မည်သည့်အချိန်၌ ထွက်ခွာရမည်ကိုလည်း ဂရုစိုက်နေခြင်းမရှိပေ။ မြို့တော်နယ်မြေအသစ်ကြီးမှာ လူသူကင်းမဲ့ကာ ခြောက်ကပ်နေသည့် နယ်မြေကြီးတစ်ခု ဖြစ်နေမည်ဖြစ်ရာ သူ အစောကြီး ထွက်ခွာသွားရမည်ဆိုလျှင် ပျင်းစရာကောင်းနေမည်သာ ဖြစ်သည်။
အမှန်တွင် လီယီနှင့် ခုန်းတောက်တို့၏ လက်ထောက်မြို့တော်ဝန်ရာထူးများကို မည်သည့် နိုင်ငံရေးအင်အားစုများမှ ကန့်ကွက်နေခဲ့ခြင်းမရှိပေ။ သို့သော် ကျင့်သိုမင်မှာ သူ၏ရာထူးအား လက်လွှတ်ဆုံးရှုံးရခါနီး အနေအထားထိ ရောက်ရှိသွားခဲ့၏။ လသုံးစင်းမဟာမိတ်အဖွဲ့မှာ လိုအပ်သောပစ္စည်းများ၏ ငါးဆယ်ရာခိုင်နှုန်းတိတိကို ထောက်ပံ့ပေးရန် ကတိပေးထားသည့်တိုင်အောင် ခက်ခက်ခဲခဲ ကြိုးစားခဲ့ရသည်ဖြစ်သည်။
ဆည်းဆာကြယ်စင်စုဂိုဏ်းနှင့် ငါးဆက်မြောက်ကောင်းကင်မျိုးနွယ်စုတို့မှာ ထိုလက်ထောက်မြို့တော်ဝန်ရာထူးအား ငမ်းငမ်းတက် လိုချင်နေခဲ့ကြသည်ဖြစ်သည်။ သို့သော် ဆည်းဆာကြယ်စင်စုဂိုဏ်းနှင့် ဝမ်ပေါင်လဲ့၏ ကြားရှိ တင်းမာမှုများကြောင့် သူတို့၏ကမ်းလှမ်းချက်မှာ ငြင်းပယ်ခံခဲ့ရသည်။ ငါးဆက်မြောက်ကောင်းကင်မျိုးနွယ်စုမှာမူ လိုအပ်ချက်အားလုံးနှင့် ပြီးပြည့်စုံနေခဲ့ပြီး လသုံးစင်းမဟာမိတ်အဖွဲ့ထက် ပိုမိုထောက်ပံ့ပေးရန် ကတိပေးခဲ့သည့်တိုင်အောင် နောက်ဆုံး၌ ကျရှုံးသွားခဲ့ရသည်သာဖြစ်သည်။
ဝမ်ပေါင်လဲ့မှာ ထိုအကြောင်းများအားလုံးကို ပြန်ကြားခဲ့ရ၏။ လွှတ်တော်ခေါင်းဆောင်ကြီးမှာ အလွန်အရေးပါသည့် အခိုက်အတန့်၌ စကားဝင်ပြောခဲ့သည့်ပုံပင်။ ထို့ကြောင့် ငါးဆက်မြောက်ကောင်းကင်မျိုးနွယ်စုမှ ကျိုးမိသားစုမှာ အလျှော့ပေးလိုက်ရခြင်း ဖြစ်သည်။ ကျိုးရိရှန်မှာလည်း အင်္ဂါဂြိုဟ်ပြင်ပသို့ ရာထူးပြောင်းရွှေ့ခံလိုက်ရ၏။ သူသည် မည်သည့်အကျိုးအမြတ်ကိုမှ မရရှိခဲ့ဘဲ အင်္ဂါဂြိုဟ်ထဲမှ နှင်ထုတ်ခံလိုက်ရခြင်းဖြစ်သည်။
အကြောင်းမသိသော လူတစ်ယောက်သာဆိုလျှင် နိုင်ငံရေးအင်အားစု အချင်းချင်း အားပြိုင်မှုကြောင့် ထိုကဲ့သို့ဖြစ်သွားရခြင်းဖြစ်ကြောင်း မှတ်ယူလိုက်မိသာ ဖြစ်သည်။ ဝမ်ပေါင်လဲ့မှာမူ တစ်ခဏမျှ စဉ်းစားတွေးတောလိုက်ပြီးနောက် ကျိုးရိရှန်၏ ဝမ်ပေါင်လဲ့နှင့် လီဝမ်အာတို့နှစ်ယောက်အတူတူ တစ်ညတာကုန်ဆုံးသည့် ဖြစ်ရပ်ကြီးအား ရူးရူးမိုက်မိုက် စုံစမ်းစစ်ဆေးခဲ့ခြင်းမှာ သူ ယခုကဲ့သို့ဖြစ်သွားရခြင်း၏ အကြောင်းအရင်းတစ်ခု ဖြစ်နေနိုင်ပေသည်ဟု ဆုံးဖြတ်လိုက်တော့သည်။
” ဘာတတ်နိုင်မှာလဲ။ သူက အဲဒီကိစ္စကြီးကို မရမက စုံစမ်းခဲ့တဲ့အချိန်ကတည်းက ကိုယ့်သေတွင်း ကိုယ်တူးမိသလို ဖြစ်သွားခဲ့တာကိုး ” ဝမ်ပေါင်လဲ့မှာ ထိုရလဒ်ကြောင့် ကျေနပ်အားရသွား၏။ ထို့နောက် သူသည် ထိုအကြောင်းအား မေ့ထားလိုက်ပြီး ဆက်လက်တွေးတောနေခြင်း မရှိတော့ပေ။
ထိုသို့ဖြင့် ထွက်ခွာရမည့်နေ့ရက်သို့ ရောက်ရှိလာ၏။ ဝမ်ပေါင်လဲ့နှင့် လင်းတျန်ဟောက်တို့မှာ သူတို့၏ ရာထူးအသစ်များကို လွှဲပြောင်းယူလိုက်ကြ၏။ အင်္ဂါဂြိုဟ်ကိုလိုနီနယ်မြေ ဘုရင်ခံနှင့် အင်္ဂါဂြိုဟ်အစိုးရအဖွဲ့အစည်းမှ အခြား အဆင့်မြင့်အရာရှိများမှာ သူတို့အား လိုက်လံနှုတ်ဆက်လိုက်ကြ၏။ ထို့နောက် ဧရာမ သင်္ဘောပျံ အစင်းပေါင်း ငါးရာမှာ အင်္ဂါဂြိုဟ်မြို့တော်၏ လေဆိပ်ထဲမှနေ၍ ကောင်းကင်ပေါ်သို့ ပျံတက်သွားကြတော့သည်။
ထို သင်္ဘောပျံ အစင်းငါးရာထဲမှ အစင်းသုံးရာပေါ်တွင် မြို့တော်နယ်မြေအသစ်အား တည်ဆောက်ရန် တာဝန်ယူထားကြသည့် လူတစ်သိန်းတိတိ ရှိနေကြသည်။ သူတို့မှာ ဝမ်ပေါင်လဲ့၏ အမိန့်များကို နာခံကြရမည်ဖြစ်သည်။ ကျန်သင်္ဘောပျံ အစင်းနှစ်ရာထဲတွင်မူ ပြည်တောင်စုကြီးနှင့် အင်္ဂါဂြိုဟ်အစိုးရမှ ပေးအပ်ခဲ့သည့် ပစ္စည်းများ အပြည့်ရှိနေ၏။
လေထုထဲတွင် ပေါက်ကွဲသံများ ကျယ်လောင်စွာ မြည်ဟည်းနေကြပြီဖြစ်သည်။ ဝမ်ပေါင်လဲ့မှာ ရှေ့ဆုံးရှိ သင်္ဘောပျံကြီး၏ ကုန်းပတ်ပေါ်၌ ရပ်နေပြီး လင်းတျန်ဟောက်မှာ သူ၏ဘေး၌ ရှိနေ၏။ သူတို့နှစ်ယောက်မှာ ခေါင်းငုံ့၍ အောက်ဘက်ရှိ မြေပြင်ကြီးအား လှန်းကြည့်လိုက်ကြသည်။ သူတို့၏အကြည့်များမှာ အင်္ဂါဂြိုဟ်မြို့တော်ဆီမှ မြို့တော်နယ်မြေအသစ် တည်ရှိရာ အရပ်မျက်နှာဆီသို့ ရောက်သွားကြ၏။ ဝမ်ပေါင်လဲ့၏ အတွေးစိတ်ထဲတွင်မူ ပြင်းပြသောစိတ်ဆန္ဒများနှင့် ခမ်းနားကြီးကျယ်သော ရည်မှန်းချက်များဖြင့် ပြည့်နှက်နေပြီဖြစ်သည်။
” တျန်ဟောက်ရေ။ အမြန်ဆုံးနည်းနဲ့ ပန်းကန်လုံးစီးဖို့ အမိန့်ပေးလိုက်တော့ ” ဝမ်ပေါင်လဲ့မှာ အမိန့်ပေးလိုက်၏။ ထိုအခါ လင်းတျန်ဟောက်မှာလည်း အသက်ပြင်းပြင်းရှူကာ သူ၏အမိန့်အတိုင်း ဆောင်ရွက်လိုက်၏။ ထိုသို့ဖြင့် သင်္ဘောပျံ အစင်းပေါင်း ငါးရာမှာ တအုန်းအုန်း မြည်သံများနှင့်အတူ ရှေ့သို့ ပျံသန်းသွားကြတော့သည်။
အဝေးမှကြည့်လိုက်မည်ဆိုပါက ၎င်းတို့မှာ မိုးကောင်းကင်ကြီးအား ထိုးခွင်းသွားပြီး အဝေးသို့ ဆန့်တန်းသွားကြသည့် သက်တံ့ကွေးပေါင်း ငါးရာနှင့်ပင် ဆင်တူနေတော့သည်။
နာရီပေါင်းများစွာ ကုန်ဆုံးသွားပြီးနောက် ထို သင်္ဘောပျံ အစင်းပေါင်း ငါးရာမှာ နတ်ဘုရားလက်နက် နယ်မြေဆီသို့ရောက်ရှိလာကြ၏။ ထိုနယ်မြေထဲ၌ ရှုပ်ယှက်ခက်နေခဲ့သည့် အပျက်အစီးများမှာ ပျောက်ကွယ်သွားကြပြီဖြစ်ပြီး မြည်းလေးမှာ ကျေနပ်အားရကာ ပျင်းရိပျင်းတွဲဖြစ်နေသည့် အမူအရာဖြင့် မြေကြီးပေါ်၌ ခြေပစ်လက်ပစ် လဲချောင်းနေ၏။ ၎င်း၏ ကျင့်ကြံခြင်းအဆင့်မှာလည်း သူ ပြိုင်ပွဲကြီးပြီးဆုံးသွားပြီးနောက် ကျန်ရစ်ခဲ့သော အမှိုက်များကို ရှင်းလင်းနေရင်း အဆင့်တက်သွားခဲ့၏။ လက်ရှိတွင် ၎င်းမှာ အာနာပါန ထိပ်ဆုံးအဆင့်သို့ ရောက်နေသည့်ပုံ ပေါ်နေပြီဖြစ်သည်။
ဝမ်ပေါင်လဲ့မှာမူ မြည်းလေးအား လျစ်လျူရှုလိုက်၏။ ထို့နောက် သင်္ဘောပျံများမှာ အောက်သို့ဆင်းသက်လာကြပြီး ထာဝရခံတပ်ကြီး၏ ပထမဆုံးအဆင့် ဆောက်လုပ်ရေးလုပ်ငန်းများအား မှတ်တမ်းတင်ထားသော ပုံစံစာရွက်များကို ဝမ်ပေါင်လဲ့၏ အမိန့်အတိုင်း ဖြန့်ဝေပေးလိုက်၏။ ထာဝရခံတပ်ကြီး၏ အဓိကအစိတ်အပိုင်းများကိုသာ ထိုပုံစံစာရွက်များထဲ၌ ထည့်သွင်းမထားဘဲ ချန်ရစ်ထားခဲ့၏။ ထိုသို့ဖြင့် လူအယောက်တစ်သိန်းတိတိမှာ ဆောက်လုပ်ရေးလုပ်ငန်းများကို ချက်ချင်းပင်ဆောင်ရွက်လိုက်ကြတော့သည်။
ဝမ်ပေါင်လဲ့မှာ သူ၏ ရုပ်သေးရုပ်များကိုလည်း အသုံးပြုခဲ့၏။ ထို ရုပ်သေးရုပ် တစ်ရုပ်ချင်းစီတိုင်းမှာ ဝမ်ပေါင်လဲ့၏ အမိန့်များအားအတိုင်း ဆောက်လုပ်ရေးလုပ်ငန်းများထဲ၌ ကြီးကြပ်သူများအဖြစ် လိုက်လံဆောင်ရွက်နေတော့သည်။
သူတို့အားလုံးမှာ အတူတကွစုပေါင်းကာ… ထာဝရခံတပ်ကြီးအား ဆောက်လုပ်နေကြပြီဖြစ်သည်။
good