အခန်း ( ၂၀၅ )

ပိုင်ရှောင်ချန်း၏ မျက်လုံးများမှာ ရဲရဲနီလျက်ရှိသည်။ သူက လောချိန်မျိုးနွယ်စု၏ လိုက်လံဖမ်းဆီးမှုကိုခံရသော အချိန်တုန်းက သူ့အားသတ်ရန်ကြိုးစားခဲ့သူများကို ရင်ဆိုင်ခဲ့ပြီးဖြစ်သည်။ ထိုကဲ့သို့အခြေအနေမျိုးတွင် တစ်ခုတည်းသောရွေးချယ်နိုင်မည့်အခွင့်အရေးမှာ သူ၏ပြိုင်ဘက်ရန်သူများထက်ပိုပြီး ရက်စက်မှဖြစ်မည်ကို သူ သဘောပေါက်ခဲ့သည်။ ထို့အပြင် သူတို့ကသူ့အားမသတ်နိုင်မီ သူက ဦးအောင်သတ်နိုင်မှ ဖြစ်ပေမည်။

ထိုအရာမှာ အသက်ရှင်သန်နိုင်မည့် တစ်ခုတည်းသောနည်းလမ်းဖြစ်သည်။

သူက အလင်းတန်းတစ်ခုအသွင်ပြောင်းလိုက်သည့်အခါ ကောင်းကင်ကိုတုန်လှုပ်သွားစေကာ မြေပြင်များအက်ကွဲသွားသည့်မြည်ဟည်းသံများက ထိုနေရာတွင်ပြည့်နှက်သွားလေသည်။ စောစောက သူ့အားတိုက်ခိုက်ခဲ့သော အခြေခိုင်မာခြင်းအဆင့် ဓမ္မစောင့်ရှောက်သူဘေးတွင် သူက ချက်ချင်း ပေါ်လာကာ ပြင်းပြင်းထိုးချလိုက်လေသည်။

ဝုန်းးးးးဆိုသည့်မြည်ဟည်းသံကြီး ပဲ့တင်ထပ်သွားပြီး ဓမ္မစောင့်ရှောက်သူမှာ နာကျင်စွာအော်ဟစ်လိုက်ပြီး အပိုင်းပိုင်းအစစအဖြစ် ကွဲထွက်သွားလေသည်။ ပိုင်ရှောင်ချန်းမှာ သွေးများအကြားဖြတ်သွားလိုက်ပြီး သူ့ တစ်ကိုယ်လုံးသွေးများစွန်းပေနေသည်။ ထို့နောက်ရုတ်တရက်နောက်ပြန်ဆုတ်လိုက်ပြီး သူအားကလိမ်ကျစ်ဖြင့် ခိုးကြောင်ခိုးဝှက်တိုက်ရန်ပြင်နေသော ကျင့်ကြံသူတစ်ဦး၏ လည်ပင်းကိုညှစ်လိုက်သည်။ ထိုလူမှာ အာခေါင်ခြစ်ကာ အော်ဟစ်လိုက်ရင်း အစိတ်စိတ်အမြွှာမြွှာ ကွဲထွက်သွားသည်။

ပိုင်ရှောင်ချန်းမှာ သွေးများနှင့်ရွှဲရွှဲစိုနေပြီဖြစ်သည်။ သူ၏အသက်ရှုနှုန်းမှာ မူမမှန်တော့ဘဲ မျက်လုံးများကလည်း ရဲရဲနီနေသည်။

“လာကြစမ်း…” သူက အော်ဟစ်လိုက်သည်။
” ဘာကြောင့်ထွက်ပြေးကုန်ကြတာလဲ….။ မင်းတို့ငါ့ကိုသတ်ချင်နေတာမလား….။ ဆက်တိုက်ကြစမ်းပါ…”

သူက နေရာမှ ပျောက်ကွယ်သွားကာ ကြောက်ရွံ့စွာထွက်ပြေးနေသော အခြေခိုင်မာခြင်းအဆင့်ကျင့်ကြံသူ၏ အနောက်တွင်ပေါ်လာပြန်သည်။ မျက်စိတမှိတ်အတွင်း ပိုင်ရှောင်ချန်း၏လက်မှာ ထိုလူ၏ပခုံးအားတင်းတင်းဆုပ်ကိုင်လိုက်လေသည်။ ထိုလူမှာ အော်ဟစ်လိုက်ပြီး မန္တန်လက်ကွက်တစ်ခုဖော်ရန်ပြင်လိုက်ပါသော်လည်း သူဘာမျှမလုပ်နိုင်မီ ပိုင်ရှောင်ချန်း၏အခြားလက်တစ်ဖက်မှာ ထိုသူ၏လည်ပင်းအားပြင်းပြင်းထန်ထန် ညှစ်ချလိုက်လေသည်။

အက်ကွဲသည့်အသံထွက်ပေါ်လာပြီး ထိုလူမှာသေဆုံးသွားလေသည်။

ပိုင်ရှောင်ချန်းက ပတ်ပတ်လည်အား လှည့်ကြည့်လာသောအခါ အခြားအခြေခိုင်မာခြင်းအဆင့်ကျင့်ကြံသူများ၏ မျက်နှာတွင် ကြောက်ရွံ့မှုများပြည့်နှက်လျက် သွေးရူးေသွးတမ်း ထွက်ပြေးကုန်ကြတော့သည်။ တချို့မှာ သူတို့၏အင်မော်တယ်ဂူများဆီသို့ပြန်ပြေးကာ အကာအကွယ်မန္တန်အစီအရင်များကို ဖွင့်လိုက်ကြပြီး တချို့မှာ တတ်နိုင်သမျှ ဝေးဝေးပြေးနေကြတော့သည်။

သူတို့ထဲမှတချို့မှာ ပိုင်ရှောင်ချန်းကသူတို့အနားမလာနိုင်ရန် ကြီးမားလှသောအကာအကွယ်မန္တန်အစီအရင် တစ်ခုကိုစုပေါင်း၍လုပ်လိုက်ကြလေသည်။ ထိုအုပ်စုထဲတွင် စုန့်ချွဲနှင့် နတ်ဆရာပါ ပါဝင်နေလေသည်။

” မင်းက လူတောင်မဟုတ်တော့ဘူး…”

” ဒီလောက်ရက်စက်တဲ့သူမျိုး ကျုပ် တစ်ခါမှမတွေ့ခဲ့ဖူးဘူး”

“ဘုရားရေ….ညမုဆိုး က တကယ်ကြောက်စရာကောင်းလိုက်တာ”

ပိုင်ရှောင်ချန်း၏ အရိုင်းဆန်ဆန်အကြမ်းဖက်မှုကြီးမှာ သူတို့အား လုံးဝကို တုန်လှုပ်ချောက်ချားစေခဲ့သည်။ သူတို့အတွက်မူ သူက မကောင်းဆိုးဝါး၊မိစ္ဆာနှင့်တူနေသည်။ သူ၏ဝတ်ရုံမှာ သွေးများနှင့်ရွှဲရွှဲစိုနေပြီး သူ၏မျက်နှာမှာ ရက်စက်ကြမ်းကြုတ်ကာ လူသတ်ချင်နေသည့်အရိပ်အယောင်များနှင့် ပြည့်နှက်နေသည်။

ထိုကဲ့သို့သော ရက်စက်ကြမ်းကြုတ်မှု၊ ရူးသွပ်မှုများမှာ ကျင့်ကြံသူများအားလုံး၏စိတ်ကို လုံးဝတုန်လှုပ်ချောက်ချားသွားပြီး ရှုပ်ထွေးသွားစေသည်။ စုန့်ချွဲမှာ ပင့်သက်ရှိုက်နေပြီး နတ်ဆရာမှာမူ စိတ်ထဲတွင် လုံးလုံးလျားလျားကြောက်ရွံ့နေတော့သည်။

ဤသွေးစွမ်းအင်နတ်ရေစင်ဂိုဏ်းမှဂိုဏ်းသားများကို အခြားဂိုဏ်းမှလူများက ရက်စက်ကြမ်းကြုတ်လွန်းလှသူများဟု ရှုမြင်ခြင်းခံရသူများဖြစ်လေသည်။ သို့သော်ယခုအချိန်တွင် ထိုဂိုဏ်းသားများအားလုံးမှာ ပိုင်ရှောင်ချန်းအားကြည့်ပြီး သူ၏ရက်စက်ကြမ်းကြုတ်မှုမှာ ဖော်ပြနိုင်ခြင်းထက်ကျော်လွန်နေပြီဟု တွေးနေကြတော့သည်။

အံ့အားသင့်စရာကောင်းစွာ မကြာသေးခင်က ပိုင်ရှောင်ချန်းအား ရပ်တန့်ရန်ပြောခဲ့သူမှာ နောက်ထပ်ဘာမှမပြောတော့ပေ။

ဂိုဏ်းစောင့်အကြီးအကဲများနှင့် အခြားသူများကလည်း ရင်သက်ရှုမောစွာနှင့် ထိုအတိုင်းသာ စောင့်ကြည့်နေကြပြီး ဝင်ရောက်စွက်ဖက်ခြင်းမရှိကြပေ။ သူတို့ထဲမှတချို့မှာ လူမျိုးတုံးလုနီးပါး အသတ်ခံနေရသည်များကို စောင့်ကြည့်ဖို့ရန်အတွက် ကိုယ်တိုင်ကိုယ်ကျချဉ်းကပ်လာကြတော့သည်။

အသက်ပြင်းပြင်းရှုလိုက်ပြီး ပိုင်ရှောင်ချန်းက မန္တန်အစီအရင်အတွင်းမှလူအုပ်စုကိုကြည့်ကာ အေးစက်စက်ပြုံးပြလိုက်ပြီး အနီးရှိအင်မော်တယ်ဂူတစ်ဂူဆီသို့တဟုန်ထိုးပြေးသွားလိုက်သည်။ အမွှေးတိုင်တစ်တိုင်စာလောင်ကျွမ်းပြီးချိန်လောက်တွင် သူ၏အပြင်ခန္ဓာအားကိုသုံးကာ ဂူအားပြင်းထန်စွာရိုက်ချလိုက်ရာ ဂူ ပွင့်သွားသည်။ ခဏကြာပြီးနောက် သူက ထိုဂူအတွင်းပုန်းအောင်းနေသည့် အခြေခိုင်မာခြင်းအဆင့်ကျင့်ကြံသူ၏ ရုပ်အလောင်းကိုဆွဲလျက်ထွက်လာလေသည်။ သူကအလောင်းကို မန္တန်အစီအရင်၏အရှေ့သို့ပစ်ချလိုက်ပြီး မောပန်းနွမ်းနယ်စွာဖြင့် ဘေးတွင်ထိုင်ချလိုက်လေသည်။ သူ့မျက်နှာပေါ်မှသွေးများကိုသုတ်လိုက်ကာ လေထဲရှိ သူ့ကို ကြည့်နေသူများအား မော့ကြည့်လိုက်သည်။

ရုတ်တရက် သူကမျက်တောင်တဖျတ်ဖျတ်ခပ်လိုက်သည်။ မောပန်းနွမ်းနယ်မှုဒဏ်များ ခံစားလိုက်ရသဖြင့် သူ၏ကြွက်သားများ မှာ နုန်းချိလာသည်။ တချိန်တည်းမှာပင် သူ ကြောက်ရွံ့လာပြီး နောင်တရလာသလို ခံစားလိုက်ရသည်။ သူ စိတ်လိုက်မာန်ပါလုပ်ခဲ့ခြင်းကြောင့် အနည်းငယ် ဒေါသပြေသွားပါသော်လည်း အနည်းငယ် စိုးရိမ်စပြုလာပြီဖြစ်သည်။

“ငါက စိတ်စွမ်းအင်နတ်ရေစင်ဂိုဏ်းရဲ့ နည်းလမ်းတွေကိုမသုံးခဲ့ပါဘူးနော်” သူ၏ စိတ်ထဲတွင်တုန်လှုပ်သွားလျက် တွေးလိုက်မိသည်။
” သွေးစွမ်းအင်နတ်ရေစင်ဂိုဏ်းရဲ့နည်းတွေပဲသုံးခဲ့တာပါ…။ ပြောရမယ်ဆိုရင် ငါ့ရဲ့အပြင်အားကျင့်ကြံနည်းပညာရပ်ကလည်း သွေးစွမ်းအင်နတ်ရေစင်ဂိုဏ်းနဲ့ ဆက်စပ်နေတာပဲလေ။ သူတို့က ငါ့ကိုအပြစ်ပေးကြလိမ့်မယ်…။ဒါပေမဲ့သတ်ကြမှာတော့မဟုတ်ဘူး..မလား…” သူက သွေးစွမ်းအင်နတ်ရေစင်ဂိုဏ်းအားဖျက်စီးရန်အတွက် ဧရာမလက်ကြီးအားဆင့်ခေါ်ရန်စဥ်းစားလိုက်သော်လည်း အောင်မြင်စွာ ဆင့်ခေါ်နိုင်မည်ဟူသောယုံကြည်ချက်မရှိပေ။

အလယ်တောင်တွင် တိတ်ဆိတ်ငြိမ်သက်ခြင်းသာ ကြီးစိုးထား၏။

သွေးစွမ်းအင်နတ်ရေစင်ဂိုဏ်းအတွင်းမှာပင် ထိုကဲ့သို့ သတ်ဖြတ်ခဲ့မှုမျိုးမှာ အလွန် ရှားပါးသည်။ ထိုကဲ့သို့သော တိုက်ခိုက်သည့်မြင်ကွင်းမှာ လူတိုင်းအားထိတ်လန့်တုန်လှုပ်သွားစေပြီး တချိန်တည်းမှာပင် ညမုဆိုး အပေါ်ထားရှိသည့် သူတို့၏ အမြင်များ ပြောင်းသွားတော့သည်။

ထိုသို့ တိတ်ဆိတ်နေမှုအား ရှေးဟောင်းအသံကြီးက ဖြိုခွင်းလိုက်သည်။
” လူတွေသတ်လို့ဝသွားပြီလား”

တချိန်တည်းမှာပင် ပိုင်ရှောင်ချန်း၏အရှေ့၌ မှုန်ဝါးသောအရိပ်တစ်ခု တဖြည်းဖြည်း ရုပ်လုံးပေါ်လာလေသည်။

ထိုလူက သက်လတ်ပိုင်းအရွယ်လူတစ်ယောက်ဖြစ်ပြီး ရှည်လျားသောဝတ်ရုံကိုဝတ်ဆင်ထားလေသည်။ သူက လေပေါ်တွင် ပျံဝဲနေစဥ် သူ၏လက်နှစ်ဖက်အား နောက်ပစ်ထားကာ ပိုင်ရှောင်ချန်းအား အေးစက်စက်ကြည့်နေတော့သည်။ သူထံမှ ကြောက်မက်ဖွယ်ကောင်းသည့်သွေးချီများ ဖြာထွက်နေကာ ထိုသွေးချီမှာ အလယ်တောင်နှင့် ဆက်စပ်နေဟန်တူပြီး ကောင်းကင်နှင့်မြေပြင်အားပဲ့တင်ရိုက်နေသကဲ့သို့ ထင်ရသည်။

ထိုသွေးချီများမှာ ကြီးမားသော ဖိအားတစ်ခုဖြစ်လာပြီး ပိုင်ရှောင်ချန်း၏ စိတ်စွမ်းအင်ပင်လယ်ပင် တုန်ခါလာသည်။

သူကစူးရှသောမျက်လုံးတွေနှင့် ဓားပါးလေးများအလား ပိုင်ရှောင်ချန်း၏တစ်ကိုယ်လံုး ထွင်းဖောက်လုမတတ် ကြည့်နေပြီး အတိတ်၏ပုံရိပ်များကိုပါ မြင်နေသည့်အလားရှိရာ ပိုင်ရှောင်ချန်းမှာ တုန်ရီသွားတော့သည်။

ကံကောင်းသည်မှာ သူတပ်ဆင်ထားသည့်မျက်နှာဖုံးသည် လျှို့ဝှက်ဆန်းကြယ်ဂိုဏ်း၏အဖိုးတန်ရတနာတစ်ပါးဖြစ်ပြီး သူ့အားဖုံးကွယ်ပေးနိုင်ဆဲဖြစ်သည်။ ခဏအကြာတွင် သူက သူ့ကိုယ်သူတစ်ခုခုရေရွတ်လိုက်ကာ သူ၏အကြည့်အားပြန်ရုပ်သိမ်းလိုက်လေသည်။ ထို့နောက်သူ၏ညာလက်ကို ဝှေ့ယမ်းလိုက်ရာ ပိုင်ရှောင်ချန်းအရှေ့သို့ပုလင်းငယ်တစ်လုံး ပစ်လွင့်လာသည်။

“ထူးခြားတဲ့ မွေးရာပါ ပါရမီရှင်လေးပဲကိုး…။ သွေးပြောင်းပြန်ဘိုးဘေးနိုးထခြင်းပဲ…။ အဲ့တာထက်ပိုကောင်းတာက နတ်ဆိုးဆန်တဲ့စရိုက်ပဲ…။ ဝမ်းနည်းစရာကောင်းတာက… မင်းကအခုမှ လူသားတာအိုအခြေခိုင်မာခြင်းအဆင့်ပဲရှိနေသေးတာပဲ…”

“အဲ့ပုလင်းထဲမှာ စိတ်စွမ်းအင်သွေးဆေးလုံး သုံးလုံးပါတယ်။ အဲဒီဆေးလုံးတွေက မင်းရဲ့ဒဏ်ရာတွေကို ကုသပေးပြီး သွေးချီတွေကို မင်း ပိုပြီးခံစားနိုင်အောင် လုပ်ပေးလိမ့်မယ်” ထိုသို့ပြောပြီး သက်ပြင်းချကာ လှည့်ပြီး လှည့်ကာ ရှေ့တစ်လှမ်းရွေ့လျားသွားသည်။ လေတချက် ဖျတ်ခနဲ တိုက်ခတ်သွားပြီး သူ ပျောက်ကွယ်သွားသည်။

“ဟမ်…” ပိုင်ရှောင်ချန်းမှာ အံ့အားသင့်လျက်ကြည့်နေသည်။ သူက အပြစ်ပေးခံရရန် အပြည့်အဝပြင်ဆင်ထားသော်လည်း ထိုလူမှာ သူ့အားဆေးတစ်ပုလင်းပင်ဆုချသွားသေးသည်။

လေထဲတွင် တောင်ထိပ်များ၏ မဟာအကြီးအကဲများမှာ မျက်လုံးများအရောင်တောက်လျက် ငုံ့ကြည့်နေကြသည်။ စောစောက မည်သူမျှဘာမှမပြောကြသည်မှာ ခေါင်းဆောင်ကြီးရောက်ရှိလာ၍ဖြစ်သည်။ ညမုဆိုး၏အသွင်ပြောင်းလဲမှုမှာ အလွန်ကြီးကျယ်သောကြောင့် ခေါင်းဆောင်ကြီးကိုယ်တိုင်အခြေအနေကိုစစ်ဆေးရန်လာခဲ့ခြင်းဖြစ်သည်။ သူကထိုအရာအားပြဿနာတစ်ခုအဖြစ် မသတ်မှတ်သဖြင့် သူတို့၏ ညမုဆိုးကို လိုချင်စိတ်မှာပို၍ပြင်းထန်လာသည်။

ညမုဆိုးတွင် မယုံနိုင်လောက်သည့် ပင်ကိုယ်စွမ်းရည်ရှိရုံမျှမက ရှားပါးသောနည်းလမ်းဖြင့် လူအများအပြားအားသတ်ဖြတ်ခဲ့သည်။ ထို့အပြင် ခေါင်းဆောင်က သူ့ထံ၌နတ်ဆိုးဆန်သောစရိုက်ရှိသည်ဟုပင်ပြောခဲ့သေးသည်။ မဟာအကြီးအကဲများအားလုံးမှာ ညမုဆိုး ၏ပါရမီအားလွန်စွာသဘောကျနေတော့သည်။ ထို့နောက်သူတို့က အခြေခိုင်မာခြင်းအဆင့်ဆေးလုံးများအတွက်သူက မည်သို့တိုက်ခိုက်ခဲ့သည်ကိုပြန်လည်စဉ်းစားမိပြီး သူတို့၏လေးစားမှုမှာပိုမိုပြင်းထန်လာသည်။

သတ်ဖြတ်ခြင်းမှာ ဂိုဏ်း၏စည်းမျဥ်းစည်းကမ်းများကို ဆန့်ကျင်နေသော်လည်း သူတို့ကလုံးဝဂရုမစိုက်ပေ။ သွေးစွမ်းအင်နတ်ရေစင်ဂိုဏ်းတွင် ကြီးနိုင်ငယ်ညှင်းဝါဒ လွှမ်းမိုးမှုရှိလေသည်။ သူတို့ထဲတွင် မည်သူမျှ လက်တွင်သွေးမစွန်းဖူးသူမရှိပေ။ လူများက ကိုယ့်အစွမ်းအစကို ကိုယ်မသိပဲ စွမ်းအားကြီးမားသူများကို ရန်စမိ၍ သေဆုံးသွားလျှင် မိမိကိုယ်ကိုသာ အပြစ်တင်ရမည်သာ ဖြစ်သည် ။ အဆင့်နိမ့်ကျင့်ကြံသူများအကြားတွင် ဂိုဏ်း၏စည်းမျဥ်းစည်းကမ်းများကို ပိုမိုတင်းကြပ်စွာ သတ်မှတ်ထားသည်။ သို့သော် ထိုအရာမှာ သူတို့အတွက် ကာကွယ်ပေးထားခြင်းဖြစ်လေသည်။ အခြေခိုင်မာခြင်းအဆင့်နှင့်အထက်ရှိ ကျင့်ကြံသူများမှာ စွမ်းအား တစ်ခုထဲကိုသာလေးစားကြသည်။

ထို့အပြင် ပိုင်ရှောင်ချန်း၏ လူများကို ဒေါသထွက်အောင်လုပ်နိုင်သည့် အစွမ်းမှာ အလွန်ပင် အံ့သြဖွယ်ကောင်းလှသည်။ လူတိုင်းက မိမိကိုနှစ်သက်လာအောင် လုပ်ခြင်းနှင့် မိမိကို မုန်းတီးအောင်လုပ်ခြင်း တို့မှာ အကွာကြီးကွာပေသည်။ သို့သော် အဆုံးသတ်၌ ဂိုဏ်း၏ ခေါင်းဆောင်များ အမြင်တွင်မူ ရလာဒ်မှာ အတူတူပင်။

လူတိုင်းက မိမိကိုနှစ်သက်အောင် လုပ်နိုင်ပါက မိမိက တရားမျှတမှု၏ ကာကွယ်သူကြီးဖြစ်လာမည်ဖြစ်ပြီး လူတိုင်းက မိမိကိုမုန်းသွားပါက မိမိမှာ မိစ္ဆာကြီးတစ်ကောင် ဖြစ်သွားမည်ဖြစ်သည်။

အကယ်၍ညမုဆိုးသာ ဆက်လက်ရှင်သန်နိုင်မည်ဆိုပါက သူ့ထံတွင်ထိုကဲ့သို့သောနတ်ဆိုးဆန်သောစရိုက်ရှိသဖြင့် သူ၏ကျင့်ကြံခြင်းမှာ တိုးတက်လာသည်နှင့်အမျှ ယခုမျိုးဆက်၏ခေတ်ကာလတွင် ဆရာကြီးတစ်ဆူ ဖြစ်လိမ့်မည်။ သူက တစ်မိုးအောက်ရှိအရာအားလုံးကိုသိမ်းပိုက်စိုးမိုးနိုင်ပေမည် သို့မဟုတ်ပါက ကောင်းကင်ဘုံကသူ့အားစိုးမိုးသွားပေလိမ့်မည်။

နွံအိုင်တောင်ထိပ်မှအရပ်ရှည်ရှည်နှင့် ထွားကြိုင်းသန်မာသော မဟာအကြီးအကဲမှာ မျက်နှာတွင်အပြုံးပန်းဆင်လျက် ရှေ့သို့ပျံသန်းထွက်လာသည်။

“ဂိုဏ်းတူညီလေး ညမုဆိုးရေ….အစ်ကိုကြီးနဲ့အတူတူ နွံအိုင်တောင်ထိပ်ကိုလိုက်ခဲ့ပါလားကွ။ မင်းရဲ့ အပြင်အားမှော်ပညာရပ်နဲ့ဆို နွံအိုင်တောင်ထိပ်ကိုမလာရင် နှမြောစရာကြီး။ တကယ်လို့မင်းသာသဘောတူရင် မင်းကို လက်ချောင်းရဲ့အထက်ဘက်မှာနေခွင့်ပြုမှာကွ..။ လာခဲ့ပါကွာ…။ မင်းက အပြင်အားကျင့်ကြံခြင်းမှာ ဘယ်သူမှမကြားဖူးတဲ့အောင်မြင်မှုကို ရမယ်ဆိုတာ ငါယုံကြည်တယ် …”

ပိုင်ရှောင်ချန်းမှာရုတ်တရက် နွံအိုင်တောင်ထိပ်မှမဟာအကြီးအကဲ၏ လောကွပ်စကားများကြောင့် အနည်းငယ်အံ့အားသင့်သွားလေသည်။ သူက မတုံ့ပြန်ခင် ရုပ်အလောင်းတောင်မှ မဟာအကြီးအကဲမှာ ရှေ့သို့ထွက်လာလေသည်။

“သူ့ကိုခေါက်ထားလိုက် ညမုဆိုးလေး… ။ ရုပ်အလောင်းတောင်ကိုလာခဲ့ပါလား။ ရုပ်အလောင်းတောင်က မင်းအတွက်ထာဝရအိမ်ဖြစ်လာလိမ့်မယ်ကွ…။ လာခဲ့ပါကွာ..။ ငါတို့ဆီက မင်းကြိုက်တဲ့အရောင်ရှိတဲ့ ရုပ်အလောင်းတွေကို မင်းရွေးချယ်လို့ရပါတယ်ကွ ”

” ဂိုဏ်းတူညီလေး ညမုဆိုးရေ…အဲဒါသူတို့ရဲ့စိတ်ရင်းနဲ့ပြောတာမဟုတ်ဘူးကွ ” အမည်မဲ့တောင်မှ လူပုလေးကပြောလေသည်။ သူက သူ၏သွေးပြောင်းပြန်ဘိုးဘေးနိုးထခြင်းပညာကို တတ်သည့် ပိုင်ရှောင်ချန်းအားအပိုင်သိမ်းဖို့အတွက် အရာအားလုံးကိုပေးဆပ်ရန်အသင့်ဖြစ်နေသည်။

“အမည်မဲ့တောင်ကိုလာခဲ့ကွာ…။ ငါ မင်းကို သွေးစီးကြောင်းအကြီးအကဲတွေရဲ့အဖွဲ့ထဲဝင်ခွင့်ပြုမယ်လေ။ အမည်မဲ့တောင်ရဲ့အခွင့်အာဏာက မင်းလက်ထဲမှာဆိုေတာ့ ဘယ်သူမှမင်းကို နှောင့်ယှက်ရဲမှာမဟုတ်တော့ဘူး”

ပိုင်ရှောင်ချန်းမှာ ပြောစရာစကားရှာမရေအာင် ဖြစ်သွားသည်။ သူက ပြဿနာအကြီးအကျယ်ရှာကာ၊ အခြေခိုင်မာခြင်းအဆင့်ကျင့်ကြံသူ ခုနစ်ယောက်၊ရှစ်ယောက်ကို တစ်ခါတည်း ကိစ္စတုံးပစ်ခဲ့သည်။ ထို့အပြင် အလယ်တောင်ရှိ သွေးချီများကို အုတ်နင်းသောင်းနင်းဖြစ်သွားစေပြီး သက်လတ်ပိုင်းအရွယ်လူကိုလည်း လုံးဝ လျစ်လျူရှုခဲ့သည်။ ထိုလူမည်သူဖြစ်ကြောင်းကို သူ မသိသော်လည်း ဂိုဏ်းစောင့်အကြီးအကဲတစ်ဦး သို့မဟုတ်လျှင် ခေါင်းဆောင်ကြီးတစ်ယောက်ပင်ဖြစ်နိုင်သည်ဟု ယူဆလိုက်သည်။

သူက စိတ်စွမ်းအင်နတ်ရေစင်ဂိုဏ်းတွင်ထိုကဲ့သို့ ရာထူးကြီးသူတစ်ယောက်ကို အာခံပြီး ဤကဲ့သို့သော ပြဿနာမျိုးရှာပါက ဂိုဏ်း၏စည်းမျဥ်းစည်းကမ်းများအရ တရားစီရင်ရာဆောင်သို့ ပို့ဆောင်ခံရမည်ဖြစ်ပြီး သူ၏ကျင့်ကြံခြင်းအခြေခံအား နှုတ်ယူခံရကာ သူ၏ခန္ဓာကိုယ်နှင့်စိတ်ဝိညာဥ်မှာလည်း ဖျက်စီးခံရမည်သာ ဖြစ်သည်။

သို့သော် သွေးစွမ်းအင်နတ်ရေစင်ဂိုဏ်းတွင် အရာရာမှာ ဆန့်ကျင်ဖက်ဖြစ်နေသည်။

သူက နေရာမှာပင် အံ့သြတကြီးရပ်နေစဥ် တခစ်ခစ် ရယ်မောသံလေး ထွက်ပေါ်လာပြီး စွဲဆောင်နိုင်အားပြင်းသော စုန့်ကျင်းဝမ် ပေါ်လာလေသည်။ မွှေးပျံ့သော ကိုယ်သင်းရနံ ့လွင့်ပျံလာပြီး သူမ ရောက်ရှိလာပြီး ပိုင်ရှောင်ချန်းအား တန်ဖိုးမဖြတ်နိုင်သော ကျောက်မျက်ရတနာလေးကဲ့သို့ ကြည့်ရှုကာ သူမ၏မျက်လုံးများတွင် ချီးကျူးဟန်များနှင့် တလက်လက်တောက်ပနေသည်။ သူမက သူ၏အရှေ့တွင်ကွယ်ရပ်လိုက်ကာ လူတိုင်းအားမျက်နှာချင်းဆိုင်လိုက်သည်။

” ဒီနေရာက အလယ်တောင်ပဲ။ ရှင်တို့တွေ ကျမရဲ့နေရာမှာ ပြောင်ပြောင်တင်းတင်းနဲ့ ကျမမျက်နှာကို အိုးမဲသုတ်နေတာလား”

ပိုင်ရှောင်ချန်းက စုန့်ကျင်းဝမ်မှာ သူ၏ရှေ့၌ကာကွယ်ပြောဆိုပေးနေသည်ကိုကြည့်ကာ မျက်တောင်တဖျတ်ဖျတ်ခပ်လိုက်သည်။ သူမက ပုံမှန်အတိုင်းပင် ခပ်ဟော့ဟော့ ဝတ်ဆင်ထားခဲ့သည်။ သူမ၏ဝတ်ရုံဘေးဖက်ရှိ အကွဲကြောင်းမှာ ရှည်လျားလှသဖြင့် သူမ၏နို့နှစ်ရောင်ကဲ့သို့ ဖြူဆွတ်နေသော ခြေသလံုးသားလေးများ ပေါ်နေသည်ဖြစ်ရာ ပိုင်ရှောင်ချန်းမှာ မျက်လုံးပြူးသွားလေသည်။ ဖြစ်ပျက်နေသည်များကို မတွေးနိုင်တော့ပဲ သူက ငေးသာကြည့်မိနေတော့သည်။

ကျန်ရှိနေသော မဟာအကြီးအကဲသုံးဦးမှာ စုန့်ကျင်းဝမ်၏လုပ်ဆောင်မှုကိုအတိအကျသိမြင်ပြီး ပိုင်ရှောင်ချန်းကသူမအားကြည့်နေပုံကိုလည်းသတိပြုမိကြသည်။ သူတို့က စုန့်ကျင်းဝမ်၏ ပရိယာယ်သုံးခြင်းအပေါ်သက်ပြင်းချလိုက်ရုံမှလွဲ၍ ဘာမှမလုပ်နိုင်ပေ။ ပိုင်ရှောင်ချန်းအား မက်မက်မောမောကြည့်ရင်း သူတို့မှာ လှည့်၍ထွက်သွားတော့သည်။

သူတို့ထွက်သွားကြသောအခါ စုန့်ကျင်းဝမ်၏ အပြုံးမှာပျောက်ကွယ်သွားပြီး မျက်နှာမှာတင်းမာသွားကာ အလယ်တောင်၏ အခြေခိုင်မာခြင်းအဆင့်ကျင့်ကြံသူများအားကြည့်လာလေသည်။ သူမ၏အကြည့်များ သူတို့ထံရောက်ရှိသွားသောအခါ သူတို့မှာတုန်ရီသွားကြပြီး တိတ်ဆိတ်စွာဖြင့် ဦးညွတ်လိုက်ကြသည်။

စုန့်ချွဲမှာ အခြားသူများထက်ကြောက်ပုံပေါ်ကာ မျက်နှာချင်းပင်မဆိုင်ရဲပေ။ ငယ်စဥ်ကတည်းက သူ့အဒေါ်အား သူ အမြဲတမ်း ကြောက်ခဲ့ရလေသည်။

” မင်းတို့အားလုံးသွားကြတော့” စုန့်ကျင်းဝမ်က အေးစက်စွာပြောလိုက်လေသည်။
” ဒီနေရာကိုပြန်လာပြီးသန့်ရှင်းရေးလုပ်ဖို့လဲ မမေ့ကြနဲ့” လူတိုင်းမှာစိတ်သက်သာရာရစွာ သက်ပြင်းချလိုက်ပြီး လေးစားစွာ ထွက်သွားကြသည်။ မကြာခင် ထိုနေရာမှာ တစ်ဖန်ပြန်၍ တိတ်ဆိတ်သွား၏။

စုန့်ကျင်းဝမ်မှာ ပိုင်ရှောင်ချန်းဆီသို့ အာရုံပြန်စိုက်လိုက်သည့်အခါ သူမ၏မျက်နှာတွင် နားလည်ရခက်သောအပြုံးတစ်စပေါ်လာပြီး ခန္ဓာကိုယ်ကို ရှေ့သို့ကိုင်းလိုက်ကာ သူ၏မေးစေ့ကို သူမ၏ကျောက်စိမ်းကဲ့သို့ဖြူနုသောလက်ကလေးဖြင့် ကိုင်လိုက်ပြီးနောက် သူမ၏မျက်လုံးနှင့် မျက်နှာချင်းဆိုင် စူးစိုက်စွာ ကြည့်လိုက်သည်။
” မောင်လေး ညမုဆိုး… ကြည့်ရတာမဝသေးဘူးလားဟင် ”

ပိုင်ရှောင်ချန်းမှာ ရှက်ရွံ ့သွားပြီး ချောင်းဟန့်လိုက်ကာ ကိုယ်ကိုမတ်မတ်ရပ်လိုက်ပြီး လက်ကိုဆုပ်လျက်ဦးညွတ်လိုက်လေသည်။

” အစ်မတော် စုန့်ကို ဂါရဝပြုပါတယ်”

” နောင်တခါဆိုရင် နည်းနည်းလောက်သတိထားဖို့လိုတယ် မောင်လေးရဲ့..။ သွေးစွမ်းအင်နတ်ရေစင်ဂိုဏ်းက ဒီလိုပဲ အမြဲတမ်းပရမ်းပတာဖြစ်နေတာ…။ ဒီလိုသာ ဖြစ်မနေရင် အစ်မတို့က ပိုလို့တောင် အင်အားကြီးနိုင်သေးတယ်။ ဒါပေမဲ့လည်း ဘာမှမတတ်နိုင်ပါဘူးလေ။ မင်းလုပ်နိုင်တာက လူတွေအထင်ကြီးလာအောင် စွမ်းအားကြီးတဲ့ရန်သူတွေကို အနိုင်ယူပြမှဖြစ်မှာ…။ ခေါင်းဆောင်ကြီးတွေရှိနေသမျှတော့ ဂိုဏ်းကသူ့ဟာနဲ့သူ စုစည်းနေမှာပဲ။ သူတို့ကလိုအပ်လို့ရှိရင် အဲ့လို ပရမ်းပတာနိုင်တဲ့ အုံကြွမှုတွေကိုဖြေရှင်းပေးကြပါတယ်…”

” အခုတော့ အလယ်တောင်မှာပဲနေပါ မောင်လေးရယ်။ မင်းဒီမှာလုံလုံခြုံခြုံနေရပါစေမယ်။ ပြီးတော့ မင်းသန်မာပြီးအားကြီးလာလေလေ လူတွေရဲ့လေးစားအားကျမှုကို ပိုပြီးရလာလေလေ ဖြစ်မှာပါ” သူမကပြုံးလိုက်သည်။ ထိုအပြုံးမှာ အစွမ်းကုန် ဖူးပွင့်နေသောနှင်းဆီပန်းလေးကဲ့သို့တူကာ သူမအား ရှိရင်းစွဲထက်ပင် ပိုမိုလှပချောမောသွားစေသည်။

ခဏကြာ တုံ့ဆိုင်းနေပြီး ပိုင်ရှောင်ချန်းကမေးမြန်းလိုက်လေသည်။
“အစ်မတော် စုန့်…စောစောကလူက ခေါင်းဆောင်ကြီးလား”

“သူက ခေါင်းဆောင်ကြီးအတုမဲ့လေ” သူမက နူးညံ့ညင်သာစွာပြန်ဖြေလေသည်။ ပိုင်ရှောင်ချန်း၏ တုန်လှုပ်သွားသောအမူအယာကိုမြင်လိုက်သည့်အခါ သူမကလက်ကိုအုပ်၍ ပြုံးလိုက်ပြီး ထွက်ခွာသွားရာ သူမ၏ကိုယ်သင်းနံ့တချို့လေထဲတွင် ကျန်ရစ်ခဲ့လေ၏။

ပိုင်ရှောင်ချန်းမှာ အသက်ပြင်းပြင်းရှုလျက် ထိုနေရာတွင် အချိန်အတန်ကြာရပ်နေလေသည်။

” ဒါဆို သူကလွန်ခဲ့တဲ့နှစ်ပေါင်းရှစ်ရာတုန်းက ပြိုင်ဘက်ကင်း လက်ရွေးစင် ခေါင်းဆောင်ကြီးအတုမဲ့ပေါ့” ပိုင်ရှောင်ချန်းမှာ တုန်တုန်ရီရီဖြင့် ပတ်ပတ်လည်အားကြည့်လိုက်သည်။ အချိန်များကုန်လွန်လာလေလေ၊ သွေးစွမ်းအင်နတ်ရေစင်ဂိုဏ်းမှာ သူ့အားမည်မျှကောင်းမွန်စွာဆက်ဆံနေကြောင်းကိုသူက အံ့သြချီးမွမ်းနေလေတော့သည်။ စိတ်စွမ်းအင်နတ်ရေစင်ဂိုဏ်းတွင်မူ ဘေးအန္တရာယ်ကျရောက်စေမှုကြောင့် အမြဲတမ်း အပြစ်ပေးခံရတတ်သည်။ သို့သော် ဤဂိုဏ်းတွင်မူ သူတို့ကအပြစ်ဒဏ်ကိုတားဆီးပေးရုံမျှမက သူ့အားဆုပင်ချလိုက်သေးသည်။

တောင်ထိပ်အားလုံးမှာ သူ့အားရရှိဖို့ရန် အပြိုင်အဆိုင်လုနေကြပြီး အလယ်တောင်၏ မဟာအကြီးအကဲစုန့်ကျင်းဝမ်မှာလည်း အလွန်ချစ်စရာကောင်းပြီး သူမ၏ကျစ်လျစ်ဖွံ့ထွားသောကိုယ်လုံးလေးက သူ့ကို အလွန်အမင်း ဆွဲဆောင်နိုင်၏။

ထို့အပြင် ဤဂိုဏ်းမှာ ထာဝရအသက်ရှည်နည်းအားကျင့်ကြံရန် ပြီးပြည့်စုံလှသည်။ ဤနေရာမှာ သွေးချီများနှင့်ပြည့်နေသော သူ၏ကိုယ်ပိုင်သန့်စင်မွန်မြတ်သောနယ်မြေလေးဖြစ်လေသည်။

” ဘယ်လိုတောင် ကောင်းလိုက်တဲ့ဂိုဏ်းလဲကွာ” သူကခေါင်းကိုခါလိုက်ပြီး သူ၏စဥ်းစားနေသမျှကို ထိန်းချုပ်လိုက်သည်။ သူက စိတ်စွမ်းအင်နတ်ရေစင်ဂိုဏ်းမှသူတစ်ယောက်ဖြစ်ပြီး သွေးစွမ်းအင်နတ်ရေစင်ဂိုဏ်း၏ရန်သူတော်တစ်ယောက်သာ ဖြစ်သည်။

သို့သော်လည်း သွေးစွမ်းအင်နတ်ရေစင်ဂိုဏ်းမှာကောင်းမွန်လှသည်ဟူသော သူ၏စိတ်ခံစားချက်အား မဖျောက်ဖျက်နိုင်ပေ။

အခန်း ( ၂၀၅ )

အခြားဖတ်စရာများ

ကမ္ဘာပျက်ကပ်ကြားက ဆေးခန်းလေး {BL}

နှောင်ဖွဲ့ခြင်းကင်းတန်ခိုးရှင်

ကံကြမ္မာဖန်တတ်ပါ့လေ

ဒဏ္ဍာရီထဲကဖူရှင်း

မြို့ပြနတ်ဘုရား

Comment

Leave a Reply Cancel reply

Options